#LocalNews
Published-13 Feb 2022

ရန်ကုန်မြို့၊ သဒ္ဒမ္မမာနိတာရုံကျောင်းတိုက် ပဓာနနာယကဆရာတော်မုံရွာမြို့၊သဒ္ဒမ္မဇောတက သုဗောဓာရုံ ကျောင်းတိုက်နာယကဆရာတော် ဒွါဒသမ တိပိဋိကဓရ ဓမ္မ ဘဏဂါရိက ဘဒ္ဒန္တ အဘိဇာတာဘိဝံသ (စစ်ကိုင်းတိပိဋိက)ဆရာတော်ဘုရားကြီး ရုပ်ကလာပ်အား ဖေဖော်ဝါရီလ ၁၃ရက် ယနေ့ မွန်းလွဲ ၃နာရီကအန္တိမအဂ္ဂိဈာပနအခမ်းအနားနဲ့ ပူဇော်လိုက်တယ်လို့ သိရပါတယ်။

စစ်ကိုင်းတိပိဋကဆရာတော် ဥတုဇရုပ်ကလပ်တော် စံကျောင်းတော်မှာ အန္တိမအဂ္ဂိဈာပနပူဇော်ရာနေရာသို့ တပည့်ရဟန်းသံဃာတော်နဲ့ လူပုဂ္ဂိုလ်များက ပင့်ဆောင်ပူဇော်ခဲ့ကြပြီး အဂ္ဂိစျာပနကျင်းပမည့် ခေါင်းတလားစင်မြင့်ကို လက်ဝဲသုံးပတ်ပတ်ကာ နောက်ဆုံးပူးဇော်ခဲ့ကြပြီး အန္တိမအဂ္ဂိဈာပနပူဇော်ခဲ့ကြတာဖြစ်ပါတယ်။

စစ်ကိုင်းတိပိဋကဆရာတော်ဘဒ္ဒန္တအဘိဇာတာဘိဝံသ ဆရာတော်ဟာထိုင်းနိုင်ငံ၊ဘန်ကောက်မြို့ Bumrungrad ဆေးရုံကြီးမှာ ရိုးတွင်းချဥ်ဆီအစားထိုးလဲလှယ်ကုသရန်နဲ့သွေးဖြူဥရောဂါတိုအတွက် ဆေးကုသမှုခံယူရင် ယင်းဆေးရုံတွင် ဖေဖော်ဝါရီ ၇ ရက်နေ့ မြန်မာစံတော်ချိန် ညနေ ၅ နာရီ ၄၉ မိနစ်မှာ ဘဝနတ်ထံ ပျံလွန်တော်မူခဲ့တာဖြစ်ပါတယ်။

ဆရာတော်ဟာ စစ်ကိုင်းတိုင်းဒေသကြီး ဝက်လက်မြို့နယ်၊ ဆင်နင်းကျေးရွာတွင် ခမည်းတော် ဦးတင်ရ၊မယ်တော် ဒေါ်ညွန့်ခင်တို့မှ ၁၃၃၀ ပြည့်နှစ်၊သီတင်းကျွတ်လဆန်း(၈)ရက်၊တနင်္ဂနွေနေ့တွင် ဖွားမြင်တော်မူသော သားရတနာဖြစ်ပြီး ဘဝနတ်ထံပျံလွန်တော်မူစဉ်မှာ သက်တော်(၅၄)နှစ်၊ သိက္ခာတော်(၃၄)ဝါရှိပြီဖြစ်ပါတယ်။

ymg/hm
#Yangon_Media_Group

#Health_News
Published_ 13 Feb 2022

မြန်မာနိုင်ငံကို အထူးသတိထားသင့်သော COVID – 19 မျိုးကွဲဗီဇအသစ်ဖြစ်ပွားရာ နိုင်ငံ အဖြစ် ဖေဖော်ဝါရီ ၁၀ ရက်တွင် ဂျပန်နိုင်ငံက သတ်မှတ်လိုက်လိုက်တာကြောင့် မြန်မာနိုင်ငံမှလာရောက်မည့်သူများ ဖေဖော်ဝါရီ ၁၃ ရက်မှစတင်ကာ ဂျပန်နိုင်ငံတွင် ဟိုတယ်ကွာရတင်း ၃ ရက်နေထိုင်ရမည်ဖြစ်ကြောင်း ဂျပန်သံရုံးက ၎င်းတို၏ ဖေ့ဘွက်စာမျက်နှာမှတစ်ဆင့် သတင်းထုတ်ပြန် ထားပါတယ်။

"ဖေဖော်ဝါရီလ ၁၀ ရက်နေ့တွင် ဂျပန်အစိုးရသည် မြန်မာနိုင်ငံကို ဂျပန်နိုင်ငံ အတွင်း ကိုဗစ်-၁၉ ရောဂါကူးစက်ပျံ့နှံမှု တားဆီးကာကွယ်ထိန်းချုပ်ရေးစီမံချက်အရ အထူးသတိထားသင့်သော ကိုဗစ်_၁၉ မျိုးကွဲဗီဇအသစ်ဖြစ်ပွားရာနိုင်ငံ၊ ဒေသအဖြစ် သတ်မှတ်လိုက်ကြောင်း အသိပေးကြေညာအပ်ပါသည်"လို ဂျပန်သံရုံးရဲ့ထုတ်ပြန် ချက်မှာ ဖော်ပြထားပါတယ်။

အဆိုပါသတ်မှတ်ချက်အရ ဖေဖော်ဝါရီလ ၁၃ ရက်မှစတင်၍ မြန်မာနိုင်ငံမှ ဂျပန် နိုင်ငံတွင်းသို့ ဝင်ရောက်လာသူအားလုံးသည် ရောဂါကူးစက်ပျံ့နှံမှု တားဆီးကာကွယ်ရေးဌာန၏ ဌာနမှူးက သတ်မှတ်သည့်ဟိုတယ်တွင် ၃ ရက်ကြာ သီးသန့်နေထိုင်စောင့်ကြည့်မယ်လို့ ဆိုပါတယ်။

နိုင်ငံတွင်းသိုဝင်ရောက်ပြီး ၃ ရက်မြောက်နေ့တွင် စစ်ဆေးသော PCR စစ်ဆေးမှု ရလဒ်တွင် ကိုဗစ်_၁၉ ကူးစက်ရောဂါကင်းစင်ကြောင်းတွေ့ရှိရပါက နိုင်ငံတွင်းသို ဝင်ရောက်သည့်နေ့ နောက်တစ်ရက်မှစတင်သော ၇ ရက်သီးသန့်နေထိုင် စောင့်ကြည့် ကာလ၏ ကျန်ရှိသော ၄ ရက်ကို မိမိနေအိမ်စသည်တို၌ ဆက်လက်သီးသန့်နေထိုင် ရမယ်လို ထုတ်ပြန်ချက်မှာဖော်ပြထားပါတယ်။

ဂျပန်နိုင်ငံသို့ ဝင်ရောက်ချိန်တွင် ဝင်ရောက်သည့်နေ့ နောက်တစ်ရက်မှ စတင်၍ ၇ ရက်အတွင်း အများပြည်သူသုံး သယ်ယူပို့ဆောင်ရေးယာဉ်များကို အသုံးမပြု ခြင်း၊ နေအိမ်သို့မဟုတ် မိမိတည်းခိုနေထိုင်မည့်နေရာများတွင် သီးသန့်နေထိုင် စောင့်ကြည့်ခြင်းနှင့် ထိုကာလအတွင်း မိမိ၏ကျန်းမာရေးအခြေအနေ၊ တည်နေရာအချက်အလက်များနှင့်ပက်သက်၍ ဆက်သွယ်မေးမြန်းမှုများကို လိုက်နာဖြေကြားခြင်း စသည့် ကတိကဝတ်များကို လိုက်နာစောင့်ထိန်းရန် လိုအပ်ပါကြောင်း ဂျပန်သံရုံးက ထုတ်ပြန် ထားပါတယ်။

ymg-mnn
#Yangon_Media_Group

#Local_News
Published_13 Feb 2022

ဖေဖော်ဝါရီလ ၁၂ ရက် ယမန်နေ့ နေ့လည် ၁၂ နာရီခန့်တွင် စစ်ကိုင်းတိုင်းဒေသကြီး၊ ဘုတလင်မြို့နယ်၊ ဇီးတောကျေးရွာအနီးရှိ တိုးဂိတ်သို့ လက်နက်များကိုင်ဆောင်၍ ရောက်ရှိလာပြီး တိုးဂိတ်အားမိုင်းထောင်ဖောက်ခွဲ၍ ဖျက်ဆီးမှုများပြုလုပ်သွားကြောင်းသိရပါတယ်။

မုံရွာ- ဘုတလင်လမ်းပိုင်းရှိ တိုးဂိတ်တစ်ခုကို ဖောက်ခွဲဖျက်ဆီးမှုပြုလုပ်ခဲ့ကြောင်း YAN GYI AUNG(YGA) LPDF အဖွဲ့က ယနေ့ထုတ်ပြန်ထားပါတယ်။

ymg-mnn
#Yangon_Media_Group

Published 13 Feb 2022

ကျောက်ဖြစ်ရုပ်ကြွင်းပညာရှင်တွေဟာ မြန်မာနိုင်ငံက သတ္တုတွင်းတစ်ခုက ထွက်ရှိတဲ့ ပယင်းကျောက် အပိုင်းအစတစ်ခု အတွင်းမှာ ပုတ်သတင်မျိုးစိတ်သစ်တစ်မျိုးကို ရှာဖွေတွေ့ရှိခဲ့တယ်လို့ သိရပါတယ်။

“ယေဘုယျအားဖြင့် ရုပ်ကြွင်းတွေရှိတဲ့အထဲက  ပယင်းထဲတွေ့ရှိရတာဟာ အင်မတန်ရှားပါးပြီး အတုမရှိတဲ့ မျိုးသုဉ်းသွားတဲ့   ဇီဝရုပ်တစ်ခု ကိုကိုယ်စားပြုနေပါတယ်” လို့ ကွမ်မင်နီယပ်စ်တက္ကသိုလ်က ဒေါက်တာ အန်ဒရက်ဆာနန်စကီနှင့်သူ့လုပ်ဖော် ကိုင်ဖက်တွေက ပြောပါတယ်။

“ပယင်းထဲမှာ သုံးဖက်ရုပ်ကြွတိရိစ္ဆာန်တွေ၊သူတို့အစိတ်အပိုင်းတွေကို မကြာခဏရှိနေတတ်ပြီး နူးညံ့တဲ့တစ်သျှူးတွေလည်း ပါဝင်နေတတ်ပါတယ်” လို့ သူတို့ကပြောပါတယ်။

ဒီလိုမျိုး ထိန်းသိမ်းထားရှိမှာကိုအခြေခံရရင် အနည်းဆုံးပုသတ်သင်အုပ်စုတစ်စုရဲ့ ပုံမှန်အတိုင်းအတာပုံစံဟာ ခရီတေးရှပ်စ် ခေတ်အရောက်မှာ ဖွံ့ဖြိုးပြီးသားဖြစ်နေတယ်လို့ ကျွန်တော်တို့သိထားပါတယ်။ ဥပမာ တောက်တဲ့တွေရဲ့ ကြမ်းထော်တဲ့ ခေါင်း စကေးနှင့် စေးကပ်တဲ့ ခြေထောက်အပြားတွေလိုမျိုးပေါ့” လို့ ပြောပါတယ်။

“ ဒိုင်နိုဆောတွေ ခြေဦးတည့်ရာသွားလာနေကြတဲ့အချိန်မှာရှိနေတဲ့ တိရိစ္ဆာန်တစ်ကောင်ရဲ့ မျက်နှာကို ခင်ဗျားတို့ကြည့်ရ တာပဲ” လို့ ဗီလန်နိုဗာတက္ကသိုလ် ပါမောက္ခ အာရွန်ဘေရာက ပြောပါတယ်။

အဲဒီပုတ်သင်ရုပ်ကြွင်းပါဝင်တဲ့ ပယင်းကျောက်အစိတ်အပိုင်းကို မြန်မာနိုင်ငံ မြောက်ပိုင်း ကျောက်စိမ်းတွင်းနှင့် နီးကပ်နေတဲ့ ခမ္မတီးခရိုင်မှာတွေ့ခဲ့တယ်လို့သိရပါတယ်။

အဲဒီပယင်းကို စီတီစကန်နှင့်ရိုက်ကြည့်ပြီး ရုပ်ကြွင်းကို သုံးသပ်လေ့လာကြည့်ခဲ့တာဖြစ်ပါတယ်။

“ ကျွန်တော်တို့ဟာ တွဲဆက်ထားတဲ့ အရိုးစုတစ်ခုသာမက ပုတ်သင်ရဲ့ ပြင်ပအသွင်အပြင်ကိုပါ ရှားရှားပါးပါးလေ့လာ ခွင့်  ရခဲ့ပါတယ်။ တွားတွားသတ္တဗေဒပညာရှင်တွေ လက်ရှိမျိုးစိတ်တွေကိုလေ့လာနေတဲ့ နည်းအတိုင်းပါပဲ” လို့ ဆမ်ဟောက်စတန်ပြည်နယ်တက္ကသိုလ်က သုတေသနပညာရှင်ဒေါက်တာဂျူအန် ဒီယာဂိုဒါဇာကပြောပါတယ်။

ဒါဟာ ခရီတေးရှပ်ခေတ်အစောပိုင်းမှာ ပုတ်သင်မျိုးအုပ်စုကနေ ခွဲထွက်လာတာဖြစ််န်ိုင်ပြီး တောင်ပိုင်းတိုက်ကြီးတွေနှင့် အိန္ဒိယ နေရာဖြစ်တဲ့ ဂွန်ဝါနာလိုနေရာမျိုးမှာရှိခဲ့တာပါ” လို့ ဘရစ်စတိုတက္ကသိုလ်က သုတေသနပညာရှင် ဒေါက်တာ အာနိုးဘိုလက် ကပြောပါတယ်။

“ ယနေ့မြန်မာနိုင်ငံနေရာဖြစ်တဲ့ Burma Terrane microplate ဟာ ပုတ်သင်တွေနေခဲ့တဲ့အဲဒီခေတ်တုန်းက အာရှရဲ့အစိတ် အပိုင်း ဖြစ်ပုံမရဘူး” လို့သူကပြောပါတယ်။

ဒီတွေ့ရှိမှုဟာ အငြင်းပွားစရာ ရှိနေဦးမှာဖြစ်ပြီး ဒီဒေသမှာ ခရီတေးရှပ်ခေတ်တုန်းက တိရိစ္ဆာန်မျိုးနွယ်တွေရဲ့ ဇာစ်မြစ်ကို အခြားအဓိပ္ပါယ်ဖွင့်ဆိုချက်တွေလုပ်ဖို့လိုဦးမှာဖြစ်တယ်” လို့ ပညာရှင်တွေက ကောက်ချက်ချပါတယ်။

ဒီတွေ့ရှိချက်ကို Scientific Reports ဂျာနယ်မှာ စာတမ်းအဖြစ်တင်ပြထားတာဖြစ်ပါတယ်။

Source Nature.com

#LocalHealth
Published - 13 feb 2022

ကိုဗစ်ရောဂါရဲ့ မျိုးရိုးဗီဇပြောင်းပိုး အိုမီခရွန်ကူးစက်ခံရမှုနှုန်းမြင့်တက်လာတာကြောင့် ရန်ကုန်တိုင်းဒေသကြီး၊တောင်ဒဂုံမြို့နယ်က အောင်မြင့်မိုရ်ကိုဗစ်ကုသရေးစင်တာကို ပြန်လည်ဖွင့်လှစ်ထားပြီး အောင်မြင့်မိုရ်ကုသရေးစင်တာတွင် ကုသမှူခံယူနေသောသူများအတွက် သောက်ရေများလိုအပ်လျက်ရှိကာ လှူဒါန်းလိုသော အလှူရှင်များ 09-795002257 သို့ ဆက်သွယ်လှူဒါန်းနိုင်တယ်လို့ သိရပါတယ်။

အိုမီခရွန် ကူးစက်မှုနူန်း အရမ်းမြန်ဆန်နေတာကြောင့် အောင်မြင့်မိုရ်ကုသရေးစင်တာကို ဖေဖော်ဝါရီလ ၉ ရက်နေ့မှာ ရန်ကုန်တိုင်းဒေသကြီးအတွင်း ကူးစက်မှုတွေရှိလာတာကြောင့် ပြန်လည်ဖွင့်လှစ်ရတာဖြစ်တယ်လို့ သိရပါတယ်။

လတ်တလော အောင်မြင့်မိုရ်ကိုဗစ်စင်တာတွင် တက်ရောက်ကုသမှုခံယူနေသောလူနာများရဲ့ အခြေအနေနဲ့ပတ်သတ်ပြီး "နေ့စဉ်စင်တာရောက်လာသူတွေ တိုးတိုးလာနေတယ်။ ယနေ့အထိတော့ တစ်ယောက်မှ အောက်ဆီဂျင်မလိုသေးဘူး။ အများစုဟာ mild အပျော့စား ရောဂါလက္ခဏာတွေပဲရှိကြတယ်"လို့ စင်တာကတာဝန်ရှိသူတစ်ဦးကပြောပါတယ်။

ဖေဖော်ဝါရီလ ၉ ရက်နေ့မှ ၁၂ ရက်ထိ အောင်မြင့်မိုရ်အိမ်ရာ ကိုဗစ်ကုသရေးစင်တာသို့ဆေးရုံတက်လူနာ ကျား( ၁၅၄)ဦး၊မ ၁၉၅ ဦး စုစုပေါင်း ၃၄၉ ဦးရှိကာ ဆေးရုံဆင်းခွင့်ရသူ ၉ ဦးဖြစ်တာကြောင့် စုစုပေါင်းလူနာ ၃၄၀ ဦးကုသမှုခံယူနေရဆဲ ဖြစ်ပါတယ်။

ယခုကာလတွင် ရန်ကုန်မြို့ အပါအဝင် မြို့ကြီးအချို့မှာ ကိုဗစ်အစုအပြုံလိုက်ဖြစ်ပွားမှုနဲ့ အိုမီခရွန်ရောဂါပိုး ကူးစက်တွေလည်းရှိနေတဲ့အတွက် ပြည်သူလူထုတွေအနေနဲ့ ကိုဗစ်စည်းကမ်းကို အထူးသတိပြုလိုက်နာကြဖို့နဲ့ ကာကွယ်ဆေးထိုးနှံကြဖို့ကိုလည်း ကျန်းမာ ရေးပညာရှင်များက တိုက်တွန်းထားပါတယ်။

ဒါ့အပြင် အိုမီခရွန်ဗီဇပြောင်း ကိုဗစ်-၁၉ ရောဂါပိုး ကူးစက်မှုမှကာကွယ်ရေးအတွက် ကိုဗစ်-၁၉ ရောဂါကာကွယ်ရေး အခြေခံစည်းမျဉ်းစည်းကမ်းများကို တိကျစွာလိုက်နာကြဖို့နဲ့ သံသယရောဂါလက္ခဏာရှိသူများအနေဖြင့် နီးစပ်ရာကျန်းမာရေးဌာနသို့ ချက်ချင်းသတင်းပေးပို့ကြဖို့ ကျန်းမာရေးဝန်ကြီးဌာနက တိုက်တွန်းနှိုးဆော်ထားပါတယ်။

ကိုဗစ်လူနာအများအပြားနှင့် အိုမီခရွန်အတည်ပြုလူနာများကို ပြီးခဲ့သည့်ရက်ပိုင်းတွေ အတွင်းက တမူးမြို့နဲ့ ကလေးမြို့မှာ စတင်တွေ့ ရှိခဲ့တာဖြစ်ပြီး ပြည်တွင်းကူးစက်မှုတွေလည်း စတင်ရှိလာခဲ့သလို ရန်ကုန်မြို့ရှိ စက်ရုံတစ်ခုမှာ ကိုဗစ်ရောဂါ ဖြစ်ပွားသူတွေကို အစုလိုက်အပြုံလိုက်တွေ့ ရှိခဲ့ပြီးနောက် ၎င်းတို့ထဲမှ ၁၀ ဦး၏ ဓါတ်ခွဲနမူနာများကို စစ်ဆေးခဲ့ရာမှ အဆိုပါ ၁၀ ဦးလုံးတွင် အိုမီခရွန် ရောဂါပိုးကိုတွေ့ ရှိခဲ့ရတာဖြစ်ပါတယ်။

ကျန်းမာရေးဝန်ကြီးဌာန၏ နောက်ဆုံးထုတ်ပြန်ထားတဲ့ အချက်အလက်တွေအရလည်း မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ ရှိထားတာပါ။

ဒါ့အပြင် ကိုဗစ်ရောဂါပိုးကို တိုင်းဒေသကြီး၊ ပြည်နယ်အနေနဲ့ ရန်ကုန်တိုင်းဒေသကြီးကတော့ ပိုးတွေ့ မှုအများဆုံးဖြစ်နေပြီး ယခုလက်ရှိထိ ကိုဗစ်-၁၉ ကူးစက်ခံရသူ ၅၄၅,၂၉၈ ဦးအထိ ရှိပြီးလည်းဖြစ်ပါတယ်။ တစ်နိုင်ငံလုံးအတိုင်းအတာအရ ရောဂါးပိုးတွေ့ ရှိမှု ရာခိုင်နှုန်းမှာလည်း မြှင့်တက်လာတာကို တွေ့ရပါတယ်။

ymg/hm
#Yangon_Media_Group

#Local_News
Published_ 13 Feb 2022

ရန်ကုန်အပါအဝင် တိုင်းနဲ့ပြည်နယ်အချို့တွင် ဖေဖော်ဝါရီ ၁၅ ရက်နေ့ကနေ ၁၈ ရက်အတွင်း အချိန်အခါမဟုတ် မိုးထစ်ချုန်းရွာသွန်းမယ်လို့ မိုးလေဝသနှင့် ဇလဗေဒ ညွှန်ကြားမှုဦးစီးဌာနက ထုတ်ပြန်ကြေညာထားပါတယ်။

ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ လေနွေးများနှင့် တရုတ်ပြည်မကြီးပေါ်ရှိ လေဖိအားကြီးရပ်ဝန်းဒေသမှ ရွေ့လျားလာသော လေအေးများတွေ့ဆုံမှုကြောင့်လည်းကောင်း၊ အရှေ့ဘက်မှရွေ့လျားလာသော လေပွေလှိုင်းများ၏ အရှိန်ကြောင့် လည်းကောင်း တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့တွင် နေရာကျဲကျဲနှင့် ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ရှမ်းပြည်နယ်(တောင်ပိုင်းနှင့်အရှေ့ပိုင်း)နှင့် ကယားပြည်နယ်တို့တွင် နေရာကွက်ကျား မိုးထစ်ချုန်းရွာနိုင်တယ်လို့ ဆိုပါတယ်။

ပြည်သူများအနေနဲ့ အချိန်အခါမဟုတ်မိုးရွာခြင်းနှင့်အတူ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ် နိုင်ပါသဖြင့် ကြိုတင်သတိပြုနိုင်ပါရန် မိုးလေဝသနှင့် ဇလဗေဒညွှန်ကြားမှု ဦးစီးဌာနက အကြံပြုထားပါတယ်။

ymg-mnn
#Yangon_Media_Group