#Local_News
Published_ 23 April 2022
အဂတိလိုက်စားမှု တိုက်ဖျက်ရေးဥပဒေအရ တရားစွဲဆိုခံထားရတဲ့ ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်း၊ ညွှန်ကြားရေးမှူးချုပ် ဦးအောင်မြင့်ဦး၊ ဦးရဲမင်းဇော်နှင့် ဦးနေအောင်ရဲမြင့်တို့အား အလုပ်နှင့်ထောင်ဒဏ်အမိန့်များ ချမှတ်ခဲ့ကြောင်း သိရပါတယ်။
ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်း၏ ဆောင်ရွက်ချက်များအပေါ် အဂတိလိုက်စားမှု တိုက်ဖျက်ရေးဥပဒေနှင့်အညီ အရေးယူပေးပါရန် တိုင်ကြားခြင်းနှင့်စပ်လျဉ်း၍ အဂတိလိုက်စားမှု တိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ပါတယ်။
စစ်ဆေးတွေ့ရှိချက်အရ ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်းသည် စစ်ကိုင်းတိုင်းဒေသကြီး မင်းကင်းမြို့နယ်တွင် ပြည်သူ့လွှတ်တော် ကိုယ်စားလှယ်အဖြစ် ဝင်ရောက်ရွေးချယ်ခံရန် ဆောင်ရွက်နေသည့်အချိန်တွင် ဒေသခံပြည်သူလူထု ထောက်ခံမှုရရှိစေရန်အတွက် စီမံကိန်းနှင့် ဘဏ္ဍာရေးဝန်ကြီးဌာန၏ အမိန့် ကြော်ငြာ စာအမှတ် ၃၅/၂၀၁၇ ဖြင့် ထုတ်ပြန်ထားသည့် မြန်မာနိုင်ငံ၏ ဘဏ္ဍာရေး စီမံခန့်ခွဲမှုဆိုင်ရာ စည်းမျဉ်းကို လိုက်နာမှုမရှိဘဲ မုံရွာ-ယာကြီး-ကလေးဝလမ်း၊ မိုင်(၈၅/ဝ)မှ ကြာပင်ကျေးရွာသို့ ဆက်သွယ်ထားသော လမ်းအား ငွေစာရင်းခေါင်းစဉ် လျာထားသတ်မှတ်မှုမရှိဘဲ လမ်းဦးစီးဌာန ညွှန်ကြားရေးမှူးချုပ် ဦးအောင်မြင့်ဦးက လမ်းဦးစီးဌာန ပြင်ဆင်ထိန်းသိမ်းရေး ရန်ပုံငွေကျပ် ၅၆၂ သန်းကျော်ဖြင့် သုံးစွဲစေရေး ဆောင်ရွက်စေခဲ့ကြောင်း သိရပါတယ်။
ထို့ပြင် မင်းကင်းမြို့နယ်တွင် ကျောက်အိုးတံတားအသစ်ကို ငွေလုံးငွေရင်း ရန်ပုံငွေမှ လျာထားခွင့်ပြုထားခြင်းမရှိဘဲ ဦးကျော်လင်း၏ လမ်းညွှန်ချက်ဖြင့် တံတားဦးစီးဌာန၊ ညွှန်ကြားရေးမှူးချုပ် ဦးနေအောင်ရဲမြင့်က တံတားပြင်ဆင် ထိန်းသိမ်းရေးရန်ပုံ ငွေကျပ်သန်း ၁၂၀ ဖြင့် တည်ဆောက်စေခဲ့ခြင်းတို့ကြောင့် နိုင်ငံတော်၏ ငွေကြေးများကို ထိခိုက်နစ်နာ ဆုံးရှုံးစေခဲ့တယ်လို့ ဆိုပါတယ်။
ဦးကျော်လင်းသည် ဆောက်လုပ်ရေးဝန်ကြီးဌာန၊ ဒုတိယဝန်ကြီး တာဝန်ထမ်း ဆောင်စဉ် ၂၀၂၀ ပြည့်နှစ်၊ ဇူလိုင်လအတွင်း အမျိုးသားဒီမိုကရေစီအဖွဲ့ချုပ် ပါတီခရိုင်ရုံး ဆောက်လုပ်ရန်အတွက် အဆောက်အဦဦးစီးဌာန ညွှန်ကြားရေးမှူးချုပ် ဦးရဲမင်းဇော်ထံမှ တစ်ဆင့် အဆောက်အဦအထူးအဖွဲ့ ၁၆ ဖွဲ့ရှိ လက်အောက်ဝန်ထမ်းများထံမှ ငွေကျပ် သိန်း ၃၀ ကို လက်ခံရယူခဲ့ကြောင်း သိရပါတယ်။
စစ်ကိုင်းတိုင်းဒေသကြီး၊ မင်းကင်းမြို့နယ်မှ ပြည်သူ့လွှတ်တော် ကိုယ်စားလှယ် အဖြစ် ဝင်ရောက်ယှဉ်ပြိုင်ရန် ဆောင်ရွက်နေသည့်အချိန်တွင် မင်းကင်းမြို့နယ်သို့ သွားရောက်သည့် ခရီးစဉ်များ၌ ဘုန်းတော်ကြီးကျောင်းများသို့ ဝင်ရောက်ဖူးမြော်၍ အလှူငွေနှင့် ဆန်အိတ်များ ပေးအပ်လှူဒါန်းရာတွင် ၎င်း၏ ညွှန်ကြားချက်အရ ဆောက်လုပ်ရေးဝန်ကြီးဌာန ဝန်ထမ်းများမှ စီစဉ်ပေးသည့် ဆန်အိတ် ၆၈ အိတ်ကို ထိုက်သင့်သည့်တန်ဖိုးငွေ ပေးချေခြင်းမရှိဘဲ လက်ခံခဲ့ကြောင်းသိရပါတယ်။
ဦးကျော်လင်းသည် ပါတီအောင်နိုင်ရေးတွင် အသုံးပြုရန် အကြောင်းပြ၍ အလှူငွေများကို ၎င်းကိုယ်တိုင်နှင့် ၎င်း၏ ကိုယ်ရေးအရာရှိ ဖြစ်သူမှတစ်ဆင့် ဆောက်လုပ်ရေးဝန်ထမ်းများနှင့် ဆောက်လုပ်ရေးကုမ္ပဏီများထံမှ စုစုပေါင်း ငွေကျပ် ၃၆၃ သိန်းကျော်ကို လက်ခံ၍ ရွေးကောက်ပွဲစည်းရုံးရေးအတွက် ပါတီအလံ၊ အင်္ကျီ၊ တီရှပ်၊ ဦးထုပ်နှင့် လက်ကမ်း စာစောင်များ ဝယ်ယူရာတွင် အသုံးပြုခဲ့ကြောင်း၊ ဆောက်လုပ်ရေးကုမ္ပဏီ နှစ်ခုထံမှ စုစုပေါင်း ငွေကျပ်သိန်း ၆၀၀ ကို ၎င်း၏ ကိုယ်ရေးအရာရှိမှတစ်ဆင့် လက်ခံရယူခဲ့ကြောင်းတို့ကို စစ်ဆေးပေါ်ပေါက်သဖြင့် ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်း အပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရလည်းကောင်း၊ ညွှန်ကြားရေးမှူးချုပ် တာဝန်ထမ်းဆောင်ခဲ့ကြသည့် ဦးအောင်မြင့်ဦး၊ ဦးရဲမင်းဇော်နှင့် ဦးနေအောင်ရဲမြင့် တိုအပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅/၆၃ အရလည်းကောင်း မန္တလေးတိုင်း ဒေသကြီး တရားလွှတ်တော်တွင် ၂၀၂၁ ခုနှစ် ဒီဇင်ဘာ ၁၄ ရက်၌ တရားစွဲဆိုတင်ပိုခဲ့ရာ ရာဇဝတ်ကြီးမှုအမှတ် ၂၆/၂၀၂၁ မှ ၃၅/၂၀၂၁ အထိ အမှု ၁၀ မှုဖြင့် လက်ခံစစ်ဆေးခဲ့သည်။
၎င်းအမှုများအပေါ် ပြစ်မှုထင်ရှားသဖြင့် မန္တလေးတိုင်းဒေသကြီး တရားလွှတ်တော်က ယနေ့ရက်စွဲဖြင့် ဆောက်လုပ်ရေးဝန်ကြီးဌာန၊ ဒုတိယဝန်ကြီးဟောင်း ဦးကျော်လင်းကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ အလုပ်နှင့် ထောင်ဒဏ် ၂၀ နှစ် ကျခံစေရန်၊ ညွှန်ကြားရေးမှူးချုပ်ဟောင်း ဦးအောင်မြင့်ဦးကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅/၆၃ အရ အလုပ်နှင့်ထောင်ဒဏ် ၄ နှစ် ကျခံစေရန်နှင့် ညွှန်ကြားရေးမှူးချုပ်ဟောင်း ဦးရဲမင်းဇော်နှင့် ဦးနေအောင်ရဲမြင့် တို့အား အဂတိ လိုက်စားမှု တိုက်ဖျက်ရေးဥပဒေ ပုဒ်မ ၅၅/၆၃ အရ အလုပ်နှင့်ထောင်ဒဏ် ၂ နှစ်စီ ကျခံစေရန် အမိန့်ချမှတ်ခဲ့ကြောင်း သတင်းရရှိပါတယ်။
ymg-mnn
#Yangon_Media_Group
#Local_News
Published_ 23 April 2022
ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီးဟောင်း ဦးသောင်းထွန်းအား အဂတိလိုက်စားမှု တိုက်ဖျက်ရေးဥပဒေပုဒ်မ ၅၅ အရ မန္တလေးတိုင်းဒေသကြီး တရားလွှတ်တော်တွင် ၂၀၂၁ ခုနှစ် ဒီဇင်ဘာ ၂၀ ရက်၌ တရားစွဲဆိုတင်ပို့ခဲ့ရာ ရာဇဝတ်ကြီးမှုအမှတ် ၄၁/၂၀၂၁၊ ၄၂/၂၀၂၁ နှင့် ၄၃/၂၀၂၁ အထိ အမှုသုံးမှုဖြင့် လက်ခံစစ်ဆေးခဲ့ပြီး အဆိုပါအမှုများမှာ ပြစ်မှုထင်ရှားသဖြင့် မန္တလေးတိုင်းဒေသကြီး တရားလွှတ်တော်က ယနေ့ရက်စွဲဖြင့် ဦးသောင်းထွန်းကို အဂတိလိုက်စားမှုတိုက်ဖျက်ရေး ဥပဒေ ပုဒ်မ ၅၅ အရ အမှုသုံးမှုအတွက် စုစုပေါင်း အလုပ်နှင့် ထောင်ဒဏ် ၉ နှစ် ကျခံစေရန် အမိန့်ချမှတ်ခဲ့ကြောင်း သတင်းရရှိပါတယ်။
ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဟောင်း ဦးသောင်းထွန်း၏ ဆောင်ရွက်မှုများအပေါ် အဂတိလိုက်စားမှုတိုက်ဖျက်ရေး ဥပဒေနှင့်အညီ အရေးယူပေးပါရန် တိုင်ကြားခြင်းနှင့်စပ်လျဉ်း၍ အဂတိလိုက်စားမှု တိုက်ဖျက်ရေး ကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ခြင်း ဖြစ်ပါတယ်။
စစ်ဆေးတွေ့ရှိချက်အရ မြန်မာနိုင်ငံရင်းနှီးမြှုပ်နှံမှုကော်မရှင် ဥက္ကဋ္ဌဟောင်း ဦးသောင်းထွန်းသည် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး တာဝန်ထမ်းဆောင်စဉ် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာနပိုင် မင်္ဂလာတောင်ညွန့်မြို့နယ်၊ အထက်ပုဇွန်တောင်လမ်းပေါ်ရှိ မြေဧက ၉ ဒသမ ၂၂၀ အား ၎င်းနှင့် ပုဂ္ဂိုလ်ရေးရင်းနှီးသော ပုဂ္ဂလိကကုမ္ပဏီတစ်ခုသို့ တင်ဒါခေါ်ယူမှုမရှိဘဲ နှစ် ၃၀ ငှားရမ်းပေးခဲ့ရာတွင် ပြည်ထောင်စုအစိုးရအဖွဲ့ အမိန့်ကြော်ငြာစာအမှတ် ၃၉/၂၀၁၁ နှင့် နိုင်ငံတော်သမ္မတရုံး၏ ညွှန်ကြားချက် ၃/၂၀၁၈ ၌ ငှားရမ်းခအား နိုင်ငံပိုင်မြေ၊ အဆောက်အအုံများ တည်ရှိရာဒေသ၏ ကာလပေါက်ဈေးအတိုင်း သတ်မှတ်ရမည်ဟူသော ပြဋ္ဌာန်းချက်ကို လိုက်နာမှု မရှိခြင်း၊ နိုင်ငံတော်သမ္မတရုံး၏ ညွှန်ကြားချက်အမှတ် ၁/၂၀၁၇ တင်ဒါလုပ်ထုံး လုပ်နည်းများနှင့်အညီ လိုက်နာဆောင်ရွက်မှုမရှိခြင်းတို့ကြောင့် တစ်နှစ်အတွက် မြေငှားရမ်းခ အမေရိကန် ဒေါ်လာ ၁ ဒသမ ၃ သိန်းကျော်နှင့် မြေအသုံးချမှု ပရီမီယံကြေးအမေရိကန် ဒေါ်လာ ၈ ဒသမ ၉ သန်းကျော် နစ်နာဆုံးရှုံးခဲ့ကြောင်း သိရပါတယ်။
ymg-mnn
#Yangon_Media_Group
Published 22 April 2022
မြန်မာ့ကျောက်မျက်ရတနာတွေကို ပြပွဲဖြင့်ခင်းကျင်းရောင်းချကြရာမှာ နောင်မှာ ဟောင်ကောင်ဒေါ်လာနှင့် ထိုင်းဘတ်ငွေ တို့ဖြင့်ပါ ရောင်းချနိုင်ရေးစီစဉ်ကြဖို့ နစက ဥက္ကဋ္ဌက ပြပွဲတာဝန်ရှိသူတွေကို မှာကြားခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။
(၅၇)ကြိမ်မြောက် မြန်မာ့ကျောက်မျက်ရတနာပြပွဲဖွင့်ပွဲကို ဧပြီ ၂၂ရက် သောကြနေ့က နေပြည်တော်မှာရှိတဲ့ မဏိရတနာ ကျောက်စိမ်းခန်းမမှာ ကျင်းပခဲ့ရာ မှာ နစကဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်တက်ရောက်ပြီး မှာကြားခဲ့တာ ဖြစ်ပါတယ်။
လက်ရှိမှာ မြန်မာ့ကျောက်မျက်ရတနာတွေကို ပြည်တွင်းပြည်ပကုန်သည်တွေက အမေရိကန်ဒေါ်လာ၊ယူရို၊ယွမ်နှင့်ကျပ်ငွေတို့ဖြင့် ပေးချေနိုင်ကြပါတယ်။ အဲသလိုရောင်းချကြရမှာ ပုလဲအတွဲတွေကို အမေရိကန်ဒေါ်လာဖြင့် ကြမ်းခင်းဈေးသတ်မှတ်ပေးပြီး ကျောက်စိမ်းနှင့် ကျောက်မျက်အတွဲတွေကို ယူရိုငွေဖြင့် ကြမ်းခင်းဈေးသတ်မှတ်ပေးထားတယ်လို့သိရပါတယ်။ပေးချေကြရမှာတော့ ပုလဲအတွဲတွေကို ပြည်ပကုန်သည်တွေက အမေရိကန်ဒေါ်လာ၊ယွမ်တို့ဖြင့်၊ ပြည်တွင်းကုန်သည်တွေက အမေရိကန်ဒေါ်လာ၊ယွမ်နှင့်ကျပ်ငွေတို့ဖြင့် ပေးချေဝယ်ယူနိုင်ကြပါတယ်။ ကျောက်မျက်နှင့် ကျောက်စိမ်းအတွဲတွေကိုတော့ အမေရိကန်ဒေါ်လာ၊ယူရိုနှင့်ယွမ်ငွေတို့ဖြင့်ပေးချေဝယ်နိုင်ကြပါတယ်လို့သိရပါတယ်။
ယခုပြပွဲတွင် အလေးချိန် ၇၇၅၃၈ ဒသမ ၁၅ မိုမီရှိ နိုင်ငံပိုင်ပုလဲအတွဲပေါင်း (၃၃၀)၊ အလေးချိန် ၁၂၆၀၂ ဒသမ ၇၃၈၉ ကရက်၊ ၃၃၅ ဒသမ ၄၆ ဂရမ်ရှိ နိုင်ငံပိုင်ကျောက်မျက်အတွဲ ၆၂ တွဲ၊ အလေးချိန် ၉၉၁၀၅ ဒသမ ၀၀ ကရက်၊ ၆၁ ဒသမ ၂၆ ကီလိုရှိ နိုင်ငံတော်နှင့် အကျိုးတူဆောင်ရွက်သော ကုမ္ပဏီများမှ ကျောက်မျက်အတွဲ ၂၀ နှင့် အလေးချိန် ၂၉၇၈ ဒသမ ၅၁ ကရက်၊ ၄၇ ဒသမ ၈၃ ကီလို၊ ၄၃၉ ဒသမ ၆၃ ဂရမ်ရှိ ပုဂ္ဂလိကကုမ္ပဏီများမှ ကျောက်မျက်အတွဲ ၃၈ တွဲ စုစုပေါင်းအလေးချိန် ၁၁၄၆၈၆ ဒသမ ၂၄၈၉ ကရက်ရှိ ကျောက်မျက်အတွဲပေါင်း (၁၂၀)၊ အလေးချိန် ၅၈ ဒသမ ၅၉၇ တန်ရှိ နိုင်ငံပိုင် ကျောက်စိမ်းအတွဲ ၁၅၀၊ အလေးချိန် ၅၂၉ ဒသမ ၀၁၃ တန်ရှိ နိုင်ငံတော်နှင့် အကျိုးတူဆောင်ရွက်သော ကုမ္ပဏီများမှ ကျောက်စိမ်းအတွဲ ၈၀၀၊ အလေးချိန် ၁၁၉၀ ဒသမ ၉၃၅ တန်ရှိ ပုဂ္ဂလိကကုမ္ပဏီများမှ ကျောက်စိမ်းအတွဲ ၁၀၅၀ စုစုပေါင်း အလေးချိန် ၁၇၇၈ ဒသမ ၅၄၅ တန်ရှိ ကျောက်စိမ်းအတွဲပေါင်း (၂၀၀၀) တို့ကို ပြည်တွင်း၊ ပြည်ပ ရတနာကုန်သည်များအား အိတ်ဖွင့်တင်ဒါစနစ်ဖြင့် ရောင်းချပေးသွားမယ်လို့ ပြန်ကြားရေးဝန်ကြီးဌာနရဲ့သတင်းထုတ်ပြန်ချက်မှာ ဖော်ပြထားပါတယ်။
ပုလဲအတွဲများကို ဧပြီ ၂၃ ရက်နှင့် ၂၄ ရက်တို့တွင် အိတ်ဖွင့်တင်ဒါစနစ် ဖြင့်လည်းကောင်း၊ ကျောက်မျက်အတွဲများကို ဧပြီ ၂၂ ရက် မှ ၂၄ ရက်အထိ ခင်းကျင်းပြသပြီး ဧပြီ ၂၅ ရက်တွင် အိတ်ဖွင့်တင်ဒါစနစ်ဖြင့် လည်းကောင်း၊ ကျောက်စိမ်းအတွဲများကို ဧပြီ ၂၂ ရက်မှ ၂၅ ရက်အထိ ခင်းကျင်းပြသပြီး ဧပြီ ၂၆ ရက်မှ ၂၈ ရက်အထိ အိတ်ဖွင့်တင်ဒါစနစ်ဖြင့် ရောင်းချပေးသွားမယ်လို့ လည်းသတင်းကဆိုပါတယ်။
မြန်မာ့ကျောက်မျက်ရတနာပြပွဲတွေကို ၁၉၆၄ ခုနှစ်မှ စတင်၍ ကျင်းပခဲ့ပြီး ယခု ၅၇ ကြိမ်မြောက် မြန်မာ့ ကျောက်မျက်ရတနာ ပြပွဲကို ဧပြီ ၂၂ ရက်မှ ၂၈ ရက်အထိ ခင်းကျင်းပြသသွားမှာဖြစ်ပါတယ်။
#LocalNews
Published - 22 April 2022
လန်ချန်း-မဲခေါင်ပူးပေါင်းဆောင်ရွက်မှု အစီအစဉ်အရ အရည်သွေးမြင့် ကော်ဖီစိုက်ပျိုး ထုတ်လုပ်ရေးအတွက် တရုတ်က မြန်မာကို အမေရိကန်ဒေါ်လာ လေးသိန်းလေးသောင်းကျော်အား ကူညီထောက်ပံ့ပေးအပ်ခဲ့တယ်လို့ မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်ခဲ့ပါတယ်။
အဆိုပါ စီမံကိန်းကို ၂၀၁၈ ခုနှစ်မှစတင်ခဲ့ခြင်းဖြစ်ပြီး တရုတ်-မြန်မာ နှစ်ဦးနှစ်ဖက်က လန်ချန်း-မဲခေါင်ပူးပေါင်းဆောင်ရွက်မှု မူဘောင်အောက်တွင် “လန်ချန်း-မဲခေါင်ဒေသ ကော်ဖီအထွက်နှုန်းနှင့် အရည်အသွေးမြင့်စီမံကိန်း” ဖော်ဆောင်ခဲ့ကာ မြန်မာနိုင်ငံ၏ ကော်ဖီစိုက်ဒေသ၏ ဒေသလက္ခဏာနှင့် ဖွံ့ဖြိုးတိုးတက်မှုလိုအပ်ချက်အရ ကော်ဖီဆွတ်ခူးမှု၊ အကိုင်းအခတ်များဖြတ်ညှပ်ခြင်းနှင့် ထုတ်လုပ်မှုလေ့ကျင့်ရေးများ ပူးပေါင်းဆောင်ရွက်ခဲ့ခြင်းဖြစ်တယ်လို့ သိရပါတယ်။
ဒါ့အပြင် တောင်သူများအား ပျော့ဖတ်ပြုလုပ်သည့်စက် (Pulping machine)နှင့် ကော်ဖီပျိုးပင်များလက်ဆောင်ပေးအပ်ကာ မြန်မာ့ကော်ဖီလုပ်ငန်းတိုးတက်စေရန် ကူညီပေး၍ ဒေသန္တရစီးပွားရေးဖွံ့ ဖြိုးတိုးတက်မှုနှင့် တောင်သူများအထွက်နှုန်းတိုးမြှင့်ရေးကို အထောက်အကူပြုခဲ့ကြောင်း တရုတ်သံရုံးက ဆိုပါတယ်။
၂၀၂၁ ခုနှစ်တွင် လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေက “အသေးစားတောင်သူများ ကော်ဖီထုတ်လုပ်မှုအရည်အသွေးအား ပြုပြင်ထုတ်လုပ်မှုနည်းပညာဖြင့် မြှင့်တင်ခြင်း” စီမံကိန်းကို ထပ်မံထားရှိပြီး မြန်မာဘက်သို့ ရင်းနှီးငွေ အမေရိကန်ဒေါ်လာ လေးသိန်းလေးသောင်းကျော် ထောက်ပံ့ပေးခဲ့ကာ မြန်မာနိုင်ငံက ကော်ဖီလုပ်ငန်းဖော်ဆောင်၍ ပြုပြင်ထုတ်လုပ်သည့်နည်းပညာ အဆင့်အတန်းမြှင့်တင်ရန် ထောက်ပံ့ကူညီ ပေးခဲ့ကြောင်း တရုတ်သံရုံး၏ သတင်းထုတ်ပြန်ချက်မှာ ဖော်ပြခဲ့ပါတယ်။
ဓါတ်ပုံ - မြန်မာနိုင်ငံဆိုင်ရာ တရုတ်သံရုံး
ymg/kg
#Yangon_Media_Group
#LocalNews
Published - 22 Apr 2022
ဗဟိုဘဏ် ထုတ်ပြန်ချက်ထွက်ပြီးနောက် ပို့ကုန်လုပ်ငန်းအပေါ် သက်ရောက်မှုရှိလာသလို နိုင်ငံခြားငွေကြေးစနစ်အပြောင်းအလဲကြောင့် သင်္ဘာသားလစာပေးစနစ်အပြောင်းအလဲပြုလုပ်ထားရတယ်လို့ သင်္ဘောသားအလုပ်အကိုင်ရှာဖွေရေးအေဂျင်စီတွေဆီကနေ သိရပါတယ်။
#Yangon_Media_Group
#Local_News
Published_ 22 April 2022
မန္တလေးနန်းမြို့ရိုးအရှေ့ဘက်ခြမ်းနှင့် တောင်ဘက်ခြမ်းတို့တွင် တည်ဆောက်ဖွင့်လှစ်ခဲ့တဲ့ ရတနာပုံဥယျာဉ်အတွင်း အများပြည်သူများအနေဖြင့် လာရောက်အပန်းဖြေ အနားယူနိုင်ကြောင်း မန္တလေးမြို့တော်စည်ပင်သာယာရေးကော်မတီက ကြေညာထားပါတယ်။
ပြည်သူများလာရောက် အပန်းဖြေခြင်း၊ ကိုယ်လက်လှုပ်ရှား အားကစားပြုလုပ်ခြင်းများ ဆောင်ရွက်နိုင်ရန် နေ့စဉ် နံနက် ၅ နာရီခွဲမှ ည ၇ နာရီအထိ ဖွင့်လှစ်ပေးထားမှာဖြစ်တယ်လို့ ဆိုပါတယ်။
ရတနာပုံ ဥယျာဉ်အတွင်းသို့ ၂၆ လမ်း နှင့် ၇၃ လမ်း၊ ကျော်မိုးတံခါး မင်္ဂလာတံတား ဝင်ပေါက်၊ ၆၆ လမ်းနှင့် ၁၉ လမ်း ဦးထိပ် တံခါးဝင်ပေါက် နှင့် လမ်း ၈၀ နှင့် ၂၂ လမ်း ကြေးမုံတံခါး ဝင်ပေါက်များမှ အခမဲ့ ဝင်ရောက်နိုင်ကြောင်းသိရပါတယ်။
ရတနာပုံဥယျာဉ်အတွင်း လူလျှောက်လမ်းများ၊ ပေ ၃၀ အကျယ် နိုင်လွန်ကတ္တရာ လမ်း၊ ၂ ဒသမ ၆၄ မိုင်အရှည်အား အမြန်လျှောက်လမ်း၊ ပြေးလမ်းများအဖြစ် အသုံးပြုနိုင်ပြီး ၁၀ ပေ အကျယ် မြက်ခင်း ၂ ခုကြားတွင် မိသားစု ပျော်ရွှင်စွာလမ်းလျှောက်နိုင်ရန် တည်ဆောက်ပေးထားသော လမ်းကြောင်းတစ်လျှောက် ပုံမှန်လမ်းလျှောက်ခြင်းနှင့် ပန်းအလှပင်များအကြား နားနေနိုင်ရန် ထိုင်ခုံများ တည်ဆောက်ထားပါတယ်။
နံနက်ပိုင်းနှင့် ညနေပိုင်းတို့တွင် ကျန်းမာရေး အားကစားလှုပ်ရှားမှုများ ပြုလုပ်နိုင်တဲ့အပြင် မင်္ဂလာအကြို အလှပုံရိုက်ကူးခြင်း၊ မွေးနေ့ မင်္ဂလာဧည့်ခံပွဲများ၊ အထိမ်းအမှတ်ပွဲများကိုလည်း ကျင်းပနိုင်ရန် ၂၆ လမ်း ၆၆ လမ်းနှင့် လမ်း ၈၀ ကြားနှင့် ၆၆ လမ်း ၁၂ လမ်းမှ ၂၆ လမ်းကြားတွင် ကျုံးနှင့် မြို့ရိုးအကြား ပေ ၃၀၀ အရှည်၊ ပေ ၄၀ အကျယ်ရှိသည့် ရင်ပြင်များ တည်ဆောက်ထားပါတယ်။
ထို့ပြင် ကျန်းမာရေးအတွက် သန့်စင်ခန်း ၂ ခန်းအား တောင်ဘက်ခြမ်းနှင့် အရှေ့ဘက်ခြမ်းများတွင် ထည့်သွင်းတည်ဆောက်ထားရှိပြီး မကြာမီကာလတွင် စက်ဘီးငယ်များအား သတ်မှတ်နာရီနှုန်းဖြင့် စီးနင်းနိုင်ရန် အစီးရေ ၁၀၀ စီစဉ်ထားပြီး၊ နိုင်လွန်ကတ္တရာလမ်း တစ်လျှောက် လူကြီး၊ လူငယ်များ ၂ ဒသမ ၆၄ မိုင်ကို လှည့်လည်ကြည့်ရှုနိုင်ရန် Buggy ကားငယ် ၁၅ စီးကိုလည်း တောင်ဘက်၊ အရှေ့ဘက်နှင့် မြောက်ဘက်တို့တွင် စီးနင်းနိုင်ရန် စီစဉ်ထားပါတယ်။
နိုင်ငံခြားသားခရီးသွား ဧည့်သည်များအတွက် ၆၆ လမ်း နှင့် ၁၉ လမ်းဘက် ဝင်ပေါက်တွင် ကားကြီး၊ ကားငယ်များ ဝင်ရောက်ရပ်နားနိုင်ပြီး ဥယျာဉ်အတွင်း လှည့်လည်ကြည့်ရှု၍ အနားယူစားသုံးနိုင်ရန် ကော်ဖီ၊ အအေးဆိုင် ၅ ဆိုင်ကို ခေတ်မီ Container Box Coffee Shop များဖြင့် ဖွင့်လှစ်ထားကြောင်း သိရပါတယ်။
ymg-mnn
#Yangon_Media_Group
#LocalNews
Published - 22 April 2022
ဧပြီလ ၁၇ ရက်နေ့က စတင်ပြီး အသက် ၁၅ နှစ်နဲ့အထက် အကြိမ်ပြည့် ကာကွယ်ဆေးထိုးနှံဖို့ အကြုံးဝင်နေပြီလို့ သိရပါတယ်။
#Yangon_Media_Group
Page 1651 of 1793
