#Local_News
Published-31 August 2022

ငွေလဲလှယ်နှုန်းမြင့်မားမှုကြောင့် တစ်လအတွင်း နှမ်းဈေး ၁၀ ရာခိုင်နှုန်းအထိ မြင့်တက်လာခဲ့ကြောင်း နှမ်းကုန်သည်များထံမှ သိရသည်။

ယင်းအပြင် ပြီးခဲ့သည့်နှမ်းစိုက်ရာသီချိန်တွင် နှမ်းစိုက်သည့်ဒေသအများစု အကြောင်းအမျိုးမျိုးကြောင့် လျော့ချစိုက်ပျိုးခဲ့ရသည့်အတွက် အထွက်နှုန်းနည်းကာ နှမ်းစျေး စျေးကောင်း ပြန်ရလာကြောင်း သိရသည်။

လက်ရှိ နှမ်းစျေးကွက်တွင် အက်စစ်အောင်သည့်နှမ်းများသာ အဓိကထား အရောင်းဝယ်ဖြစ်နေပြီး အက်စစ်အောင်သည့် နှမ်းမှာလည်း လက်ရှိစျေးကွက်တွင် ရှားနေကြောင်း သိရသည်။

ကိုဗစ်ကြောင့် နှမ်းနက် (၄၅)ပိဿာ၀င် တစ်အိတ်ကို နှစ်သိန်းထိ ပေါက်စျေးသာရှိခဲ့ရာမှ ယခုလျှင် အက်စစ်အောင်သည့် နှမ်း (၄၅)ပိဿာ၀င် တစ်အိတ်ကို (၃)သိန်းဝန်းကျင်ရှိပြီး အချိန်နှင့်နေရာလိုက်၍ စျေးနှုန်းများပြောင်းလဲနိုင်ကြောင်း သိရသည်။

မြန်မာ့နှမ်းကို တရုတ်နိုင်ငံ၊ ကိုရီးယား၊ ဂျပန်၊ စင်ကာပူနှင့် ထိုင်၀မ်တို့ကိုလည်း တင်ပို့လေ့ရှိပြီး ယခုအချိန်တွင် တရုတ်နိုင်ငံ တခုတည်းသာတင်ပိုနေရကြောင်း ကျန်နိုင်ငံများသို့ တင်ပို့ရန် အခက်အခဲများစွာ ရှိနေကြောင်းလည်း သိရသည်။

မြန်မာနိုင်ငံတွင် နှမ်းကို ဧရာဝတီတိုင်းဒေသကြီး၊ ရန်ကုန်တိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် မွန်ပြည်နယ်တို့တွင် အများအပြား စိုက်ပျိုးလျှက်ရှိပြီး မကွေးတိုင်းဒေသကြီး အောင်လံမြို့နယ်မှ ထွက်ရှိသည့် နှမ်းနက်သည် အရည်အသွေးကောင်းမွန်ကြောင်း သိရသည်။

#Ymg/STH
#Yangon_Media_Group

#Local_News
Published-31 August 2022

လက်ရှိငွေကြေးဈေးကွက်တွင်များစွာ ဂယက်ထနေပြီး ရင်းနှီးမြှုပ်နှံသူများက ခိုင်မာ၍ ပိုင်ဆိုင်မှုရှိသည့် အိမ်ခြံမြေဈေးကွက်အပေါ် ရင်းနှီးမြှုပ်နှံမှု ပိုများလာကြောင်း သိရသည်။

လက်ရှိ ပြည်တွင်းတွင် ငွေကြေး မတည်ငြိမ်မှုသည် အကြီးစားရိုက်ခတ်မှုသဘောဖြစ်နေပြီး ငွေကြေးဖောင်းပွမှုကို အနည်းဆုံး ထိန်းထားနိုင်သည့် အိမ်ခြံမြေအပေါ် ရင်းနှီးမြှုပ်နှံမှု ပိုမိုပြုလုပ်လာသော်လည်း အိမ်ခြံမြေဈေးများ အတက်ဘက်သို့ သွားနေကြောင်း သိရသည်။

ယခင်က မိုးရာသီတွင် အိမ်ခြံမြေဈေးကွက် အရောင်းအဝယ်အေးသည့် အချိန်ကာလဖြစ်ပြီး နိုင်ငံရေးအခြေအနေ၊ ငွေကြေးဈေးကွက်ဂယက်များကြောင့် အိမ်ခြံမြေဈေးကွက်မှာ လှုပ်ခတ်လာရခြင်းဖြစ်သည်။

လက်ရှိဈေးကွက်ထဲတွင် သိန်း ၁၀၀၀ နှင့် ၃၀၀၀ ကြား အရောင်းအဝယ်ပိုမိုဖြစ်လျက်ရှိပြီး သိန်း ၁၀၀၀ အောက် တိုက်ခန်းများ ဝယ်လိုအား‌ နှေးနေကြောင်း၊ ပြည်နယ်နှင့် တိုင်းအလိုက်ကြည့်ပါက ရန်ကုန်မြို့တွင် ပိုမိုရင်းနှီးမြှုပ်နှံကြကြောင်းလည်း သိရပါတယ်။

#Ymg/STH
#Yangon_Media_Group

#Local_News
Published_31 August 2022

ကရင်ပြည်နယ် ဘားအံမြို့နယ်အတွင်း ခနောက်စိမ်းသန့်စင်စက်ရုံ တည်ဆောက်နိုင်ရေးအတွက် ယနေ့ သြဂုတ်လ ၃၁ ရက်က ကရင်ပြည်နယ်ဝန်ကြီးချုပ်နှင့် တည်ဆောက်ရန် စိတ်ဝင်စားသည့် ကုမ္ပဏီတစ်ခုတို့ ဆွေးနွေးခဲ့ကြကြောင်း သိရသည်။

အဆိုပါ ခနောက်စိမ်း သန့်စင်စက်ရုံကို အမေရိကန်ဒေါ်လာ ၂ သန်းခန့် ရင်းနှီးမြှုပ်နှံ၍ တစ်နှစ်လျှင် ခနောက်စိမ်းတန်ချိန်(၉၀၀)ခန့် ထုတ်လုပ်နိုင်သော (၄၅)နှစ်သက်တမ်းရှိ ခနောက်စိမ်းသန့်စင်ရုံကို တည်ဆောက်နိုင်ရန်နှင့် စက်ရုံကို မီးခိုးထွက်မှုမရှိသလောက်နည်းပါးသော သန့်စင်သည့်နည်းပညာ အသုံးပြုတည်ဆောက်မည် ဖြစ်ကြောင်း လည်း ဆွေးနွေးရာတွင် ထည့်သွင်းပြောကြားခဲ့ကြခြင်း ဖြစ်သည်။

စက်ရုံတည်ဆောက်ခြင်းဖြင့်ဒေသတွင်း အလုပ်အကိုင်အခွင့်အလမ်းများ ရရှိနိုင်မည်ဖြစ်ကြောင်း၊ တည်ဆောက်ရေးလုပ်ငန်းများလုပ်ဆောင်ရာတွင် သဘာဝပတ်ဝန်းကျင် ထိန်းသိမ်းကာကွယ်မည့်အစီအစဉ်များကို စနစ်တကျ ဆောင်ရွက်ကြရန် နှင့် ဥပဒေလုပ်ထုံးလုပ်နည်းများနှင့်အညီ သတ်မှတ်စည်းမျဉ်းစည်းကမ်းများအတိုင်း အဆင့်ဆင့်ရေးဆွဲတင်ပြရန်လည်း အစိုးရအဖွဲ့က ပြောကြားခဲ့ကြောင်း သိရသည်။

#ymg/mt
#Yangon_Media_Group

#Local_News
Published_31 August 2022

မဲခေါင်–လန်ချန်းပူးပေါင်းဆောင်ရွက်မှု အထူးရန်ပုံငွေ(၂၀၁၈)ဖြင့် အကောင်အထည်ဖော် ဆောင်ရွက်လျက်ရှိသည့် စီမံကိန်းအတွက် အသုံးပြုရန် ဆောက်လုပ်ပြီးစီးခဲ့သည့် မဲခေါင်–လန်ချန်း စီမံကိန်း သတင်း အချက်အလက် ဗဟိုဌာန အဆောက်အဦကို ဩဂုတ်လ (၃၀)ရက်တွင် ဖွင့်လှစ်ခဲ့ကြောင်း သိရသည်။

မဲခေါင်-လန်ချန်းပူးပေါင်းဆောင်ရွက်မှု အထူးရန်ပုံငွေစီမံကိန်း(၂၀၁၈)ကို မူလက ၂၀၂၁ ခုနှစ်ထိသာ ဆောင်ရွက်ရန်ဖြစ်သော်လည်း ကမ္ဘာ့ကပ်ရောဂါကြောင့် ၂၀၂၂ ခုနှစ်အထိ ကာလပြောင်းလဲ ဆောင်ရွက်ခဲ့ရကြောင်း၊ ကမ္ဘာ့နိုင်ငံအသီးသီး၌ ကိုဗစ် -၁၉ ကပ်ရောဂါ၏ နောက်ဆက်တွဲ သက်ရောက်မှုများ၊ ရာသီဥတု ဖောက်ပြန် ပြောင်းလဲမှုများနှင့် နိုင်ငံတကာစီးပွားရေး မတည်ငြိမ်မှုများ ကြောင့် စားနပ်ရိက္ခာဖူလုံရေးမှာ အလွန်အရေးကြီးသော ကဏ္ဍတစ်ခုဖြစ်လာရာတွင် သတင်းအချက်အလက်ဌာနအနေဖြင့် မဲခေါင်-လန်ချန်းဒေသတွင်းနိုင်ငံများ၏ စားနပ်ရိက္ခာဖူလုံရေးအတွက် လုံလောက်သည့် အသင်း အချက်အလက် ရရှိနိုင်မည်ဖြစ်ကြောင်း သိရသည်။

မဲခေါင်–လန်ချန်း စီမံကိန်း သတင်းအချက်အလက်ဗဟိုဌာန အနေဖြင့် မဲခေါင်-လန်ချန်းဒေသတွင်း နိုင်ငံများ အကြား သတင်းအချက်အလက်ဖလှယ်မှု စင်္ကြန်မှတစ်ဆင့် စိုက်ပျိုးရေး၊ မွေးမြူရေး၊ ရေလုပ်ငန်းနှင့် လယ်ယာကဏ္ဍ ကျေးလက်ကဏ္ဍဆိုင်ရာ စီမံကိန်းအချက် အလက်များ ညွှန်းကိန်းများကို အပြန်အလှန်ချိတ်ဆက် အသုံးပြုနိုင်မည် ဖြစ်ကြောင်းလည်း သိရသည်။

မဲခေါင်မြစ် ဖြတ်သန်းစီးဆင်းရာ မြန်မာ၊ တရုတ်၊ ကမ္ဘောဒီးယား၊ လာအို၊ ဗီယက်နမ်နှင့် ထိုင်းနိုင်ငံများပါဝင်သော မဲခေါင်- လန်ချန်းနိုင်ငံများအကြား အပြန်အလှန်လေးစားမှု ယုံကြည်မှု တန်းတူညီမျှရှိမှု၊ တစ်ဦးပေါ်တစ်ဦး နားလယ်ပေးနိုင်မှု စသည်တို့အပေါ်အခြေခံသည့် ချစ်ကြည် ရင်းနှီးမှုနှင့် နွေးထွေးသော ဆက်ဆံမှုများကို အခြေပြုပြီး မဲခေါင်-လန်ချန်းပူးပေါင်းဆောင်ရွက်မှု အထူးရန်ပုံငွေဖြင့် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနက စီမံကိန်း(၃၁)ခု အကောင်အထည်ဖော် ဆောင်ရွက်လျက်ရှိရာ ယခုနေပြည်တော်၌ ဖွင့်သည့် မဲခေါင်–လန်ချန်းစီမံကိန်း သတင်းအချက်အလက်ဗဟိုဌာန လုပ်ငန်းမှာ စီမံကိန်း၏ အစိတ်အပိုင်းတစ်ခုဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_31 August 2022

ကချင်ပြည်နယ် စီးပွားမြှင့်တင်ရေးအတွက် မတည်ထားသော ငွေကျပ် ၈ ဘီလီယံကို စိုက်ပျိုးမွေးမြူရေးဆောင်ရွက်ရသော ရင်းနှီးမြှုပ်နှံမည့် စီမံကိန်းလုပ်ငန်းများ အမြန်အကောင်အထည်ဖော် ဆောင်ရွက်နိုင်ရေးလုပ်ငန်းများ ဆောင်ရွက်ရန် စီစဉ်ထားကြောင်း သိရသည်။

ယင်းအပြင် မြစိမ်းရောင်စီမံကိန်းပုံဖြင့် ကျေးရွာများ ရွေးချယ်သတ်မှတ်၍ အရင်းမပျောက်မတည်ငွေဖြင့် ဆောင်ရွက်သွားမည့် စီမံကိန်းလုပ်ငန်းစဉ်များ၊ အတိုးနှုန်းနှင့် ချေးငွေသက်တမ်း သတ်မှတ် ဆောင်ရွက်နိုင်ရေး စသည်တို့ကိုလည်း လုပ်ဆောင်နိုင်ရန် ပြည်နယ်ကျေးလက်ဒေသ ဖွံ့ဖြိုးတိုးတက်ရေးဦးစီးဌာန၊ ပြည်နယ်သမဝါယမဦးစီးဌာန၊ ငါးလုပ်ငန်းဦးစီးဌာနတိုက စီစဉ်နေကြောင်း သိရသည်။

ကချင်ပြည်နယ် စီးပွားမြှင့်တင်ရေးဆောင် ရွက်သွားမည့် လုပ်ငန်းစဉ်စနစ်များ၊ စီမံကိန်းလုပ်ငန်းများ မြန်ဆန်စွာအကောင်အထည်ဖော်ဆောင် ရွက်နိုင်ရေး၊ ဘဏ္ဍာလုပ်ထုံးလုပ်နည်းများနှင့်အညီ လိုက်နာဆောင်ရွက်နိုင်ရေးအတွက် သြဂုတ်လ ၃၀ ရက်တွင် ပြည်နယ်ဝန်ကြီးချုပ် ဦးခက်ထိန်နန် ဦးဆောင်၍ ဆွေးနွေးခဲ့ကြခြင်းလည်း ဖြစ်သည်။

#ymg/mt
#Yangon_Media_Group

#Local_News
Published _ 31 August 2022

တောင်ကိုရီးယားနိုင်ငံမှာ အလုပ်လုပ်မည့် မြန်မာလုပ်သား ၂၂၀ ဦးဟာ ဩဂုတ်လ ၃၀ ရက်နှင့် ၃၁ ရက်မှာ တောင်ကိုရီးယားနိုင်ငံသို့ ရောက်ရှိလာကြောင်း ဆိုးလ်မြို့ရှိ မြန်မာသံရုံးမှ သတင်းထုတ်ပြန်ထားသည်။

ဩဂုတ်လ ၃၀ ရက်မှာ ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ် ၁၁၁ ဦးဟာ အင်ချွန်း အပြည်ပြည်ဆိုင်ရာ လေဆိပ်သို့ရောက်ရှိလာကြောင်း ထုတ်ပြန်ချက်၌ ဖော်ပြထားသည်။

ဩဂုတ်လ ၃၁ ရက်မှာ စိုက်ပျိုးရေးနှင့် မွေးမြူရေးလုပ်သားသစ် ၂၉ ဦး၊ ဆောက်လုပ်ရေးလုပ်သားသစ် ၅၂ ဦးနှင့် ကုန်ထုတ်လုပ်သားသစ် ၂၈ဦး၊ စုစုပေါင်း ၁၀၉ဦးဟာ အင်ချွန်းအပြည်ပြည်ဆိုင်ရာ လေဆိပ်သို့ ရောက်ရှိလာကြောင်း သိရသည်။

ရောက်ရှိလာသည့် မြန်မာလုပ်သားတွေကို အလုပ်သမားသံအရာရှိမှ ကြိုဆိုပြီး အလုပ်သမားများ သိရှိလိုက်နာသင့်သည့် အချက်များကို မှာကြားခဲ့ပြီး လိုအပ်တာများ ကူညီပံ့ပိုးပေးခဲ့ကြောင်း သိရသည်။

တောင်ကိုရီးယားအစိုးရအနေနှင့် မြန်မာလုပ်သားများကို တရားဝင်ပြန်လက်ခံနေ ပြီး ယခုဩဂုတ်လအတွင်းမှာ မြန်မာလုပ်သား ၁,၂၉၃ ဦးကို တရားဝင်ဝင်ခွင့်ပြုခဲ့သည်။

#ymg/NN
#Yangon_Media_Group