#WorldHealth
Published 15 July 2022

တုပ်ကွေးရောဂါနဲ့ ကိုဗစ်-၁၉ရောဂါ တပြိုင်နက်ကူးစက်ခံရပါက တုပ်ကွေးက ကိုဗစ်ရောဂါဖြစ်ပွားခြင်းမှကာကွယ်ပေးနိုင်ဖွယ်ရှိကြောင်း လေ့လာတွေ့ရှိထားပါတယ်။

တုပ်ကွေးရောဂါပိုးက SARS-CoV-2 ဗိုင်းရပ်စ်ကို ဖိနှိပ်ပေးပြီး အဆုတ်တွေကိုမထိခိုက်အောင် ကာကွယ်ပေးနိုင်ကြောင်း စမ်းသပ်မှုများအရသိရှိရပါတယ်။

ဒါပေမဲ့ ကိုဗစ်ရောဂါအရင်ကူးစက်မိတာဆိုရင်တော့ တုပ်ကွေးရောဂါကို ဘာကာကွယ်မှုမှ မပေးနိုင်ပါဘူး။

အဆိုပါ ဗိုင်းရပ်စ်နှစ်မျိုးစလုံးကို တပြိုင်နက်ကူးစက်ထားတဲ့ ဟမ်းစတားကြွက်တွေဟာ ပိုမိုဆိုးရွားတဲ့လက္ခဏာတွေ မပေါ်ပေါက်နိုင်တာကို စမ်းသပ်တွေ့ရှိခဲ့ပါတယ်။

ယခုဆောင်းရာသီအတွင်း တုပ်ကွေးနဲ့ ကိုဗစ်ရောဂါ နှစ်ခုစလုံးဒုက္ခပေးလာနိုင်တယ်လို့ စိုးရိမ်ပူပန်နေကြချိန်မှာ နယူးယော့ခ်တက္ကသိုလ်က အခုလိုစမ်းသပ်ခဲ့တာဖြစ်ပါတယ်။

လက်ရှိမှာ ဩစတြေးလျနိုင်ငံအတွင်း တုပ်ကွေးရောဂါကူးစက်မှု အဆိုးရွားဆုံးဖြစ်နေပြီး ကမ္ဘာ့မြောက်ဘက်ခြမ်းမှာလည်း အလားတူအခြေအနေမျိုးဖြစ်လာနိုင်တယ်လို့ သတိပေးထားပါတယ်။

ဒါ့အပြင် ကျန်းမာရေးစောင့်ရှောက်မှုဌာနတွေမှာ ဝန်ထမ်းနည်းပါးလာပြီး SARS-CoV-2 ကလည်း ဆက်လက်ပျံ့ပွားနေဦးမှာဖြစ်ပါတယ်။

အဆိုပါ ရောဂါနှစ်မျိုးစလုံးကူးစက်ခံရပါက အသက်အန္တရာယ်ခြိမ်းခြောက်နိုင်ချေ ၂ ဆပိုများနိုင်တယ်လို့ အစိုးရသုတေသီများက သတိပေးထားပေမယ့် နောက်ပိုင်းမှာတော့ ကျွမ်းကျင်သူတွေက သိပ်ပြီးစိုးရိမ်စရာမလိုကြောင်း အသိပေးခဲ့ပါတယ်။

နယူးယော့ခ်တက္ကသိုလ်မှ ပရော်ဖက်ဆာ'ဘန်ဂျမင်တန်အိုဗာ'နဲ့အဖွဲ့က ဟမ်းစတားကြွက်တွေကို ဗိုင်းရပ်စ်နှစ်မျိုးစလုံးဖြင့် တပြိုင်တည်းကူးစက်စေပြီး စမ်းသပ်လေ့လာရာမှာ ရောဂါလက္ခဏာပိုဆိုးရွားမလာကြောင်း တွေ့ရှိခဲ့ပါတယ်။

ဒါ့အပြင် တုပ်ကွေးဗိုင်းရပ်စ်အရင်ကူးစက်စေတဲ့ကြွက်တွေမှာ အခြားကြွက်တွေထက်စာရင် SARS-CoV-2 ဗိုင်းရပ်စ်ပမာဏလျော့နည်းကြောင်း တွေ့ရှိခဲ့ပါတယ်။

ခန္ဓာကိုယ်က တုပ်ကွေးရောဂါပိုးကို တိုက်ထုတ်ပြီးနောက် ၁ ပတ်လောက်ကြာတဲ့အထိ SARS-CoV-2 ပိုးပွားခြင်းကိုလည်း ထိန်းချုပ်ပေးထားနိုင်ပါတယ်။

အဆိုပါ တွေ့ရှိချက်များအရ SARS-CoV-2 ရော တုပ်ကွေးပါ တပြိုင်တည်းကူးစက်ခံရခြင်းက အန္တရာယ်မကြီးမားလှပါဘူး။

ရောဂါကူးစက်မှုများလာတာကြောင့် ကျန်းမာရေး ဝန်ထမ်းအင်အားနည်းပါးလာတဲ့အပြင် ကျန်းမာရေးစောင့်ရှောက်မှုလာရောက်ခံယူတဲ့လူတွေ ပိုများလာတဲ့ဖိအားတွေကို အမျိုးသားကျန်းမာရေးစောင့်ရှောက်မှု(NHS)က ရင်ဆိုင်နေရပါတယ်။

Source: DailyMail
#Yangon_Media_Group