၂၁ ဧပြီ ၂၀၂၄

မြန်မာ့တပ်မတော်နှင့် တိုင်းရင်းသားလက်နက်ကိုင်တပ်ဖွဲ့တွေအကြား စစ်ပွဲတွေကြောင့် မြဝတီမှ မဲဆောက်သို့ ထွက်ပြေးလာကြတဲ့ မြန်မာဒုက္ခသည် ၃၀၀၀ဦးခန့်ကို လက်ခံထားရတယ်လို့ ထိုင်းအရာရှိတွေရဲ့ ပြောဆိုချက်ကို ကိုးကားပြီး ဘန်ကောက်ပို့စ်သတင်းစာကရေးသားလိုက်ပါတယ်။

မဲဆောက်ကိုရောက်လာတဲ့ မြန်မာဒုက္ခသည် ၃၀၀၀ခန့်အထိ မြင့်တက်လာပြီး သူတို့ကို ပြည်ထဲရေးဝန်ကြီးဌာနရဲ့ စောင့်ကြပ်မှု အောက် ထားရှိထားတယ်လို့ ထိုင်း နိုင်ငံခြားရေးဝန်ကြီး ပန်ပရီဘာဟီဒါနူကာရာက ဧပြီ ၂၁ရက် တနင်္ဂနွေနေ့က ပြောဆိုတယ်လို့လည်း အဆိုပါသတင်းမှာဖော်ပြထားပါတယ်။

အရင်က မြန်မာဒုက္ခသည်တွေ မဲဆောက်မှာ တစ်သောင်းခန့်ရှိခဲ့ပြီး သူတို့နိုင်ငံမှာ အခြေအနေတွေပုံမှန်ဖြစ်ပြီးနောက် သူတို့ ပြန်သွားကြတယ်လို့ လည်း ထိုင်းနိုင်ငံခြားရေးဝန်ကြီးကပြောပါတယ်။

မဲဆောက်က သာဆိုင်းလုယတ်ခရိုင်ခွဲ ဘန်ဝမ်တက်ခီယမ်းရွာက ထိုင်းအိမ်တစ်အိမ်ကို  ကျဉ်ဆံတစ်ခုထိမှန်တဲ့အတွက် မြန်မာဘက်ကို သတိပေးထားတယ်လို့လည်း သူကဆက်ပြောပါတယ်။ ဒါပေမယ့် ထိခိုက်သူတစ်ဦးတစ်ယောက်မျှမရှိပါဘူး။

မြန်မာဒုက္ခသည်တွေရဲ့ ၄၀ ရာခိုင်နှုန်းခန့်ဟာ အမျိုးသမီးတွေ၊သက်ကြီးရွယ်အိုတွေနှင့် ကလေးသူငယ်တွေဖြစ်ကြပြီး အများစုဟာ အပူဒဏ်ခံစားနေကြရတယ်လို့ လုံခြုံရေးအဖွဲ့တွေကပြောပါတယ်။

လုံခြုံရေးအာဏာပိုင်တွေက အဲဒီဒုက္ခသည်တွေအတွက် မဲဆောက်မှာ ယာယီစခန်းခြောက်ခုဖွင့်လှစ်ထားရှိပေးပြီး သူတို့ကို ရှေးဦးသူနာပြုစုမှုနှင့် ဆေးဝါးကုသမှုတွေလုပ်ပေးနေတယ်လို့ သိရပါတယ်။

မြဝတီက ထိခိုက်ဒဏ်ရာရသူတွေကို မဲဆောက်ဆေးရုံမှာ ဆေးဝါးကုသပေးနေတယ်လို့လည်းဆိုပါတယ်။

နယ်စပ်တံတားအမှတ်(၁)ကို တနင်္ဂနွေနေ့မှာ ဆက်လက်ဖွင့်ပေးထားပြီး စနေနေ့ညနေမှာ မြဝတီက မဲဆောက်ကူး  လာကြသူတွေများလာပြီးတဲ့နောက် ယာဉ်ကြောနှေးကွေးနေတယ်လို့လည်းသိရပါတယ်။

ပြည်သူ့ကျန်းမာရေးစစ်ဆေးရေးအရာရှိချုပ် ဒေါက်တာဆိုဖွန်လမ်ဆီယစ်သာဝန်က လောလောဆယ်မှာ မြန်မာဒုက္ခသည် ၁၆၈၆ဦး စာရင်းဝင်နေပြီး ပိုရောက်လာဖို့ရှိနေတယ်လို့ပြောပါတယ်။ ကာကွယ်ရေဝန်ကြီးဆူတင် ကလန်ဆန်က မြဝတီမှာ စစ်ရှိန်မြင့်နေဆဲဖြစ်ပြီး ထိခိုက်ခံစားရသူတွေအတွက် ထိုင်းအစိုးရကလူသားချင်းဆိုင်ရာအကူအညီတွေပေးနေတယ်လို့ ပြောပါတယ်။ အလုံးစုံအခြေအနေကတော့ ထိုင်းအစိုးရ မျှော်လင့်ထားတဲ့ အတိုင်းပဲရှိနေပါသေးတယ်လို့ သူကပြောပါတယ်။ သူဟာ မဲဆောက်ကို လာမယ့်ရက်အနည်းငယ်အတွင်း သွားရောက်ဖို့စီစဉ်နေတယ်လို့သိရပါတယ်။

အင်္ဂါနေ့မှာ ဝန်ကြီးအဖွဲ့အစည်းအဝေးခေါ်ယူမယ်လို့ ထိုင်းဝန်ကြီးချုပ် ဆရက်သာ သာဗီဆင်က ဖေ့စ်ဘုတ်မှာ ရေးတင် ထားပါတယ်။ နယ်စပ်ကုန်သွယ်ရေးကိစ္စအပါအဝင်အခြေအနေတွေ စောင့်ကြပ်ကြည့်ရှုရအောင်နှင့် အဲဒီမှာရှိတဲ့ ဒေသခံတွေနှင့် လုံခြုံရေးအဖွဲ့တွေကို အားပေးဖို့အတွက် မဲဆောက်ကို သူသွားမယ်လို့လည်း ဝန်ကြီးချုပ်က ဆက်လက်ပြောကြားပါတယ်။

စစ်ပွဲဟာ ထိုင်းမြေကို မထိခိုက်စေဖို့အတွက် သူလိုလားပြီး မဲဆောက်ကိုပြေးလာကြသူတွေထဲ မြဝတီမှာ အလုပ်လုပ်နေကြတဲ့ လူလိမ်လူညာတွေပါမလာဖို့ အရာရှိတွေ စောင့်ကြည့်ဖို့လည်း သူက ဖေ့စ်ဘုတ်မှာရေးသားထားပါတယ်။

@ymg/knl

Published 21 April 2024

ရန်ကုန်မြို့ရှိ ရွှေတိဂုံစေတီတော်မြတ်ကြီး လုံးတော်ပြည့် ရွှေသင်္ကန်းကပ်လှူခြင်းကို ငါးနှစ်တစ်ကြိမ် ဆောင်ရွက်လျက်ရှိရာ ၂၀၂၄-၂၀၂၅ ခုနှစ်တွင် လုံးတော်ပြည့်ရွှေသင်္ကန်းကပ်ပူဇော်ရန် စီစဉ်ဆောင်ရွက်လျက်ရှိကြောင်း
ရွှေတိဂုံစေတီတော်ဘဏ္ဍာတော်ထိန်း ဂေါပကအဖွဲ့မှ သိရသည်။

အဆိုပါလုံးတော်ပြည့်ရွှေသင်္ကန်းကပ်လှူခြင်းမပြုမီ အထက်ပစ္စယံရှိ စေတီရံများနှင့် နောင်တော်ကြီးစေတီတို့ကို တစ်နှစ်ကြိုတင်၍ ရွှေသင်္ကန်းကပ်လှူခြင်းများ ဆောင်ရွက်ခဲ့ရာ ယခုအခါ နောင်တော် ကြီးစေတီ ရွှေသင်္ကန်းကပ်လှူခြင်းကို အပြီးဆောင်ရွက်နေပြီ ဖြစ်ကြောင်း သိရသည်။

ရွှေတိဂုံစေတီတော်ကြီးတွင် ဘက်စုံပြုပြင်မွမ်းမံမှုများ ကို ဆောင်ရွက်လျက်ရှိရာ ဘုရားဖူးပြည်သူများ အပူဒဏ်သက်သာ စေရန် စေတီတော်ရင်ပြင်တော်ရှိ ကျောက်ပြားများကို ကော်ပတ်စား ခြင်း၊ ပေါ်လစ်တင်ခြင်းများ ကို အပိုင်း လိုက်ခွဲ၍ ဆောင်ရွက်ခဲ့ရာ အပိုင်း ၁ မှာ ရာနှုန်းပြည့်ပြီးစီးသွား၍၊ အပိုင်း ၂ တွင် ၉၀ ရာခိုင်နှုန်းခန့် ပြီးစီးနေပြီ ဖြစ်ကြောင်း သိရသည်။

ထို့ပြင် ၂၀၂၃ ခုနှစ်တွင် တောင်ဘက်စောင်းတန်းကြီးကို ပြုပြင်မွမ်းမံခဲ့ပြီး ယခုနှစ်တွင် အရှေ့ဘက်စောင်းတန်းနှင့် အနောက် ဘက်စောင်းတန်းတို့ကို ပြုပြင်မွမ်းမံသွားမည်ဖြစ်ပြီး လက်ရှိတွင် မုခ်ဦးဆောင်များနှင့် ရင်ပြင်ဦးဆောင်များရှိ ခြင်္သေ့ရုပ်တုများကို ကြံ့ခိုင်ရေးအတွက် ဆေးသုတ်မွမ်းမံခြင်းများ ဆောင်ရွက်လျက် ရှိကြောင်း သိရသည်။
Yangon_Times/LW
#Local_News
#Published_ 21 April 2024
#YMG_News #Yangon_Times #Yangon_Media_Group

Published 21 April 2024

ကရင်ပြည်နယ် မြဝတီမြို့ရှိ မြန်မာ - ထိုင်း ချစ်ကြည်ရေးတံတား အမှတ် (၁) မှ ထိုင်းနိုင်ငံဘက်ကို ဝင်ရောက်နိုင်ရန်ထုတ်ပေးသည့် (၇) ရက်ယာယီလက်မှတ်နှင့်ဖြတ်သန်းခွင့်ကို ဧပြီ ၂၁ရက်မနက်ပိုင်းတွင် စတင်ယာယီရပ်ဆိုင်းလိုက်ကြောင်း မြဝတီမြို့ရှိဒေသခံများထံက သိရသည်။

၇ရက် ယာယီလက်မှတ်ဖြတ်သန်းခွင့်ကို ရပ်ဆိုင်းထားသော်လည်း နိုင်ငံကူးလက်မှတ် (Passport) ကိုင်ဆောင်ထားသူများကိုတော့ ဝင်ခွင့်ပြုကြောင်း သိရသည်။

""ယာယီဖြတ်သန်းခွင့် (Temporary Boder Pass) လက်မှတ်နဲ့ဖြတ်သန်းခွင့်ကို ဒီနေ့မနက်ပိုင်းက စပိတ်လိုက်တယ်။ဒါပေမယ့် Passport နဲ့ တော့ဖြတ်လို့ရသေးတယ်"ဟု မြဝတီ ဒေသခံတစ်ဦးကပြောသည်။

ထိုင်းသတင်းဌာန တွေမှာလည်း မြန်မာ-ထိုင်းချစ်ကြည်ရေးတံတားအမှတ် (၁) တွင်တံတားကူးလက်မှတ်ကုန်သွားသဖြင့် မြဝတီမှသွားလာခွင့်ကို ယာယီပိတ်ထားလိုက်ပြီး ထိုင်းဖက်မှ မြ၀တီ အပြန်ဖက်ကိုတော့ သွားလာ ခွင့်ပေးထားကြောင်းထိုင်းသတင်းများကဖော်ပြထားသည်
Yangon_Times/LW
#Local_News
#Published_ 21 April 2024
#YMG_News #Yangon_Times #Yangon_Media_Group

Published 21 April 2024

သီလဝါအထူးစီးပွားရေးဇုန်အတွင်း ဆိုလာစနစ်ဖြင့် ဓာတ်အား ၁၄ မဂ္ဂါဝပ်ခန့်အထိ တပ်ဆင်ထုတ်လုပ်နိုင်ရေးကို အဆင့်အလိုက်အကောင်အထည်ဖော်သွားမည်ဖြစ်ကြောင်း လျှပ်စစ်ဝန်ကြီးဌာန မှ သိရသည်။

လက်ရှိတွင် သီလဝါအထူးစီးပွားရေးဇုန်၌ နေရောင်ခြည်စွမ်းအင်မှ လျှပ်စစ်ဓာတ်အားထုတ်လုပ်မှုအနေဖြင့် စက်ရုံ သုံးရုံတွင် ဆိုလာစနစ် များ တပ်ဆင်ထားပြီး ဓာတ်အား ၂ မဂ္ဂါဝပ်ခန့် ထုတ်လုပ်အသုံးပြုနေ သည့် ဇုန်အတွင်း ဆိုလာစနစ်တပ်ဆင် ဓာတ်အားထုတ်လုပ်နိုင်ရေး အတွက် ဇုန်ကုမ္ပဏီများ၏ လေ့လာစူးစမ်းမှုပြုထားချက်များအရ ဓာတ်အား ၁၄ မဂ္ဂါဝပ်ခန့်အထိ ဆိုလာစနစ်တပ်ဆင် ဓာတ်အား ထုတ်လုပ်နိုင်မည်ကို တွေ့ရှိထားကြောင်း သိရသည်။

မြန်မာ - ဂျပန် သီလဝါဖွံ့ဖြိုးတိုးတက်ရေးကုမ္ပဏီလီမိတက် (MJTD) သည် ဆိုလာစနစ် တပ်ဆင်ပြီးပါက အသုံးပြုနေသော ဝန်အား ထက် ဆိုလာစနစ်မှ ဓာတ်အားထုတ်လုပ်နိုင်မှု ပိုနေချိန်များတွင် ချိတ်ဆက်ထားသည့် လျှပ်စစ်စွမ်းအားဝန်ကြီးဌာန၏ ဓာတ်အားလိုင်း မှတစ်ဆင့် အဆိုပါအထူးစီးပွားရေးဇုန်အတွင်းရှိ အခြားစက်ရုံများသို့ ဓာတ်အားပို့လွှတ်ဖြန့်ဖြူးပေးသွားမည်ဖြစ်ကြောင်း ယင်းဝန်ကြီးဌာနမှ သိရသည်။

သီလဝါအထူးစီးပွားရေးဇုန်သည် ၆၆၇ ဒသမ ၂၇၅ ဟက်တာ (၁၆၅၀ ဧက နီးပါး) ကျယ်ဝန်းပြီး နိုင်ငံပေါင်း ၂၁ နိုင်ငံမှ ကုမ္ပဏီပေါင်း ၁၁၄ ခုက ရင်းနှီးမြှုပ်နှံထားကာ လက်ရှိ မြန်မာနိုင်ငံ၌ စီးပွားရေးဇုန် သုံးခုအနက် အအောင်မြင်ဆုံးလည်ပတ်နေသည့် အထူးစီးပွားရေးဇုန် တစ်ခုဖြစ်ကြောင်း သိရသည်။

ဆိုလာစနစ်မှ လျှပ်စစ်ဓာတ်အားရရှိပါက ဇုန်အတွင်း မူလသုံးစွဲရ သည့် လျှပ်စစ် ဓာတ်အားကို အခြားလိုအပ်သည့်နေရာတွင် သုံးစွဲနိုင် မည်ဖြစ်သည့်အတွက် သီလဝါအထူးစီးပွားရေးဇုန်အတွင်း ဆိုလာ လျှပ်စစ်မီးရရှိရေးကို ဆောင်ရွက်သွားမည်ဖြစ်ကြောင်း သိရသည်။
Yangon_Times/LW
#Local_News
#Published_ 21 April 2024
#YMG_News #Yangon_Times #Yangon_Media_Group

၂၁ ဧပြီ ၂၀၂၄

လေ့ကျင့်ခန်းပြုလုပ်နေစဉ်အတွင်း ဂျပန်ရေတပ်ရဲ့ ရဟတ်ယာဉ်နှစ်စီး ပင်လယ်ထဲပျက်ကျခဲ့ရာ  ရဟတ်   ယာဉ်ပါ တပ်သား(၈) ဦးအနက် အနည်းဆုံး (၁)ဦးသေဆုံးသွားရတယ်လို့ ကာကွယ်ရေးဝန်ကြီးဌာနက တနင်္ဂနွေနေ့က ပြောပါတယ်။

စနေနေ့ညက SH-60 ကင်းလှည့်ရဟတ်ယာဉ်နှစ်စီးဟာ ဂျပန်နိုင်ငံအလယ်ပိုင်းရှိ တောင်ပိုင်းကမ်းခြေ  အလွန် အီဇူးကျွန်းစု တိုရီရှီမာအနီးမှာ ရေငုပ်သင်္ဘော တိုက်ဖျက်ရေးလေ့ကျင့်ခန်းလုပ်ဆောင်နေစဉ် ပျက်  ကျခဲ့တာဖြစ်ပါတယ်။

ပျက်ကျရတဲ့အကြောင်းရင်းကို စစ်ဆေးနေဆဲဖြစ်တယ်လို့ ဂျပန်ကာကွယ်ရေးဝန်ကြီး မီနိုရူကီဟာရာက သတင်းစာရှင်းလင်းပွဲမှာပြောပါတယ်။ ပျံသန်းမှုအသံမှတ်တမ်း flight recorderနှစ်ခုကို တစ်ခုနှစ့်တစ်ခု နီးနီးကပ်ကပ်နေရာမှာ ရှာတွေ့ပြီး ဒါဟာ ရဟတ်ယာဉ်နှစ်စီးတိုက်မိတာဖြစ်ဖို့များတယ်လို့လည်း သူက ဆက်ပြောပါတယ်။

ဂျပန်ပင်လယ်ရေကြောင်းကိုယ်ပိုင်ကာကွယ်ရေးတပ် (MSDF) နှင့် ကမ်းခြေစောင့်တပ်တွေက ပျောက်ဆုံးနေတဲ့ ရဟတ်ယာဉ်ပါ စစ်သား (၇)ဦးကိုရှာဖွေနေပါတယ်။

အခြားနိုင်ငံတစ်နိုင်ငံက ဒီပျက်ကျမှုမှာပါဝင်ပတ်သက်တယ်လို့ သူမယုံကြည်ဘူးလို့ MSDF အကြီးအကဲ ယိုရှီတာကာ ဆာကေးက ပြောပါတယ်။

ဂျပန်နိုင်ငံဆိုင်ရာ အမေရိကန်သံအမတ်ကြီး ရမ်အီမန်နျူယယ်က အမေရိကန်နိုင်ငံအနေနှင့် ရှာဖွေ ကယ်ဆယ်ရေးလုပ်ငန်းမှာ ကူညီပေးပါမယ်လို့ ဆိုရှယ်မီဒီယာ အိစ်တ်စာမျက်နှာကနေ ကမ်းလှမ်းလိုက် ပါတယ်။

Source Reuters

#World_News
Published 21 April 2024

▪️ အမေရိကန်မှ လူကြိုက်များတဲ့ မုန့်အချို့နဲ့ သကြားလုံးတွေမှာ ကင်ဆာဖြစ်စေနိုင်တဲ့ ဓာတုပစ္စည်းများ ပါဝင်နေတာကြောင့် ပြည်နယ်အများအပြားမှာ ပိတ်ပင်ခံရနိုင်ပါတယ်။

▪️ ထိုထဲမှာ Lucky Charms ၊ Froot Loops တို့လို အာဟာရကွေကာများ၊ Skittles၊  Nerds၊ M&M’s၊ Swedish Fish တို့လို သကြားလုံးချိုချဥ်များ၊ Flamin’ Hot Cheetos ၊ Doritos တို့လို မုန့်များ၊ Gatorade နဲ့ အခြားအားဖြည့်အချိုရည်များ ပါဝင်နေပါတယ်။

▪️ ထိုမုန့်တွေထဲက ဓာတုပစ္စည်းတွေကို ဥရောပနေရာအများစုမှာ ပိတ်ပင်ထားပြီးဖြစ်ပြီး အခုဆိုရင် အမေရိကန် ပြည်နယ်အများအပြားကလည်း ထိုကဲ့သို့ ပြုလုပ်ရန်ကြိုးပမ်းလာပါတယ်။

▪️ ပိုတက်ဆီယမ် ဘရိုမိတ်ဆိုရင် ပေါင်မုန့်သားတောင့်တင်းဖို့ အသုံးပြုကြပေမယ့် ကြွက်တွေမှာ ကင်ဆာဖြစ်နိုင်ပြီး လူသားတွေမှာ ကျောက်ကပ်ပြဿနာများ ဖြစ်နိုင်ဖွယ်ရှိပါတယ်။

▪️ ထိုသို့ပိတ်ပင်မယ့် ဥပဒေကြမ်းကို ၂၀၂၇ မှာ စတင်အသက်သွင်းမှာ ဖြစ်ပေမယ့် ကယ်လီဖိုးနီးယားမှာသာ ဖြစ်ပါတယ်။

▪️ မတ်လ ၅ ရက်နေ့မှာ လွှတ်တော်အမတ်တွေက နယူးယော့ခ်ပြည်သူတွေကို အဆိပ်သင့်အစားအစာတွေမှ ကာကွယ်နိုင်စေရန် ဥပဒေကြမ်းနှစ်ခုကို ပြသခဲ့ပါတယ်။

▪️ အဆိုပြုမူကြမ်းထဲမှာ တိုက်တေနီယမ် ဒိုင်အောက်ဆိုဒ်၊ BHA ၊ အေဇိုဒိုင်ကာဗွန်နမိုက်တို့ကို ပိတ်ပင်သွားမှာ ဖြစ်ပါတယ်။

▪️ အချို့သောအရောင်ဆိုးဆေးတွေဆိုရင် ကလေးတွေမှာ အပြုအမူ မမှန်ခြင်း၊ ကင်ဆာဖြစ်နိုင်ခြေများခြင်း၊ DNA နဲ့ အာရုံကြောစနစ်တို့ကို ထိခိုက်စေခြင်းတို့ ဖြစ်စေနိုင်ပါတယ်။

▪️ နိုဝင်ဘာလကဆိုရင် အာရုံကြောစနစ်ကို ထိခိုက်စေတဲ့ ဘရိုမင်းပါဝင်သော ဟင်းရွက်ဆီကို တားမြစ်ရန် FDA က အဆိုပြုခဲ့ပါတယ်။

▪️ ဒီလိုတားမြစ်တာဟာ အစားအစာတွေကို လုံးဝပထုတ်တာမဟုတ်ဘဲ ပါဝင်ပစ္စည်းတွေကို ပြောင်းလဲစေချင်တဲ့ သဘောဖြစ်တယ်လို့ အစားအသောက်ဘေးကင်းရေး ညွှန်ကြားရေးမှူး ဘရိုင်ယန်ရွန်ဟုမ်းက ပြောပြသွားပါတယ်။

#Source: New York Post

Published 21 April 2024

ရန်ကုန်ပြည်သူ့ဆေးရုံကြီးတွင် အပူဒဏ်နှင့်ဆက်စပ်သည့် ရောဂါများအတွက် ကုသမှုနည်းလမ်းများ၊ ဆေးဝါးများနှင့် သီးသန့် ကုသမှုပေးနိုင်မည့် ကုသခန်းများကို ကြိုတင်ပြင်ဆင်ထားကြောင်း သိရသည်။

အပူဒဏ် ကြောင့် ပင်ပန်းနွမ်းလျမှုနှင့်အတူ ခန္ဓာကိုယ်ရှိ ရေဓာတ်ပျက်စီးဆုံးရှုံး ကာ အရေပြားပူလာခြင်း၊ ခန္ဓာကိုယ်အပူချိန်မြင့်တက်ခြင်းများ ဖြစ်ပေါ် နိုင်ပြီး ခေါင်းမူးခြင်း ၊ ချွေးထွက်ခြင်း ၊ ပျို့အန်ခြင်းများလည်း ဖြစ်ပွား နိုင်ကြောင်း သိရသည်။

ကလေးများ၊ သက်ကြီးရွယ်အိုများ၊ နာတာရှည်ရောဂါအခံရှိသူများ၊ အရက်သေစာ သောက်စားထားသူများနှင့် မူးယစ်ဆေးသုံးစွဲထားသူ များတွင် အပူဒဏ်နှင့်ပတ်သက်သည့် ရောဂါများအဖြစ်များပြီး ကြောင်း သိရသည်။

ယင်းအခြေအနေများ ဖြစ်ပွားနေချိန် ကုသမှုမပြုလုပ်ပါက နောက် တစ်ဆင့်ကူးသွားပြီး အပူဒဏ်ကြောင့် သတိလစ်မေ့မျောနိုင်သည့် အပြင်းထန်ဆုံးအဆင့်အထိ ရောက်ရှိနိုင်ခြင်းကြောင့် သတိပြုရန်လို ကြောင်း၊ ယင်းသို့ဖြစ်ပွားပါက လူနာကိုနီးစပ်ရာ ဆေးရုံ၊ ဆေးခန်းသို့ အမြန်ဆုံးပို့ဆောင်ပေးရမည်ဖြစ်ကြောင်း အသိပေးထားသည်။

ပြီးခဲ့သည့် ၂၀၂၃ ခုနှစ်အတွင်း တိုင်းဒေသကြီးနှင့် ပြည်နယ် အသီးသီးရှိ ဆေးရုံများတွင် အပူဒဏ်နှင့်ပတ်သက်ပြီး ဖြစ်ပေါ်လာသည့် ရောဂါ အမျိုးမျိုးကြောင့် ဆေးရုံတက်ရောက်ကုသသည့် လူနာပေါင်း ၄၀၀ ခန့်ရှိကြောင်း ရန်ကုန်ဆေးရုံကြီးက ထုတ်ပြန်ထားသည်။
Yangon_Times/LW
#Local_News
#Published_ 21 April 2024
#YMG_News #Yangon_Times #Yangon_Media_Group

လေပြင်းတိုက်တာ၊ မိုးသည်းတာတွေ ဖြစ်ပေါ်နိုင်တယ်။ စစ်ကိုင်းတိုင်းအထက်ပိုင်း၊ မကွေးတိုင်း၊ ကချင်ပြည်နယ်နှင့် ရှမ်းပြည်နယ်(မြောက်ပိုင်း)တို့မှာ မိုးတိမ်တောင်များ စတင်ဖြစ်ထွန်းလျက်ရှိတယ်။
#Local_News
Published_ 21 April 2024
#မိုးတိမ်တောင် #လေပြင်းတိုက်ပြီးမိုးသည်းနိုင်
#tthl #Yangon_Times

#World_Health
Published 21 April 2024

ဆယ်လ်မွန်နဲလားနဲ့ အီးကိုလိုင်တို့လို ဘက်တီးရီးယားတွေမှာ လက္ခဏာအသစ်တစ်မျိုး တွေ့ရှိခဲ့ပြီး ဘက်တီးရီးယားသွေးစုပ်ခြင်းလို့ ဝါရှင်တန်ပြည်နယ်တက္ကသိုလ်မှ သုတေသီများက ခေါ်ဝေါ်လိုက်ပါတယ်။

ထိုဘက်တီးရီးယားတွေဟာ အစားအစာတွေကနေ ရောဂါကူးစက်တတ်ပါတယ်။

ထိုပိုးမွှားတွေ အူထဲကနေ သွေးထဲသို့ ဘယ်လိုရွေ့လျားသွားလဲ ဆိုတာကို သိပ္ပံပညာရှင်တွေ မသိတာကြာခဲ့ပါပြီ။

ယခုလေ့လာချက်အရတော့ အစာအဖြစ် အသုံးပြုနိုင်တဲ့ အာဟာရဓာတ်တွေ ရှိနေရာ သွေးရည်ကြည်ကို ဘက်တီးရီးယားတွေက စိတ်ဝင်စားတာ ဖြစ်ပါတယ်။

သွေးရည်ကြည်ရှိတဲ့ နေရာတွေမှာ ဘက်တီးရီးယားတွေကို တွေ့ရှိနိုင်ပြီး အစာခြေစနစ်ထဲက ဒဏ်ရာငယ်လေးတွေကနေ သွေးကြောထဲသို့ ဝင်ရောက်လာကာ အူရောင်ရောဂါ ဖြစ်နေတဲ့သူဆိုရင် ရောဂါပိုးဝင်ပြီး အသက်အန္တရာယ် ရှိနိုင်ပါတယ်။

သွေးပမာဏအနည်းငယ်မျှဖြင့် သွေးစုပ်ဘက်တီးရီးယားတွေကို ဆွဲဆောင်နိုင်ပါတယ်။

သွေးထဲကို ကူးစက်လာတဲ့ ဘက်တီးရီးယားတွေက အသက်အန္တရာယ် ပေးနိုင်ကြောင်း၊ ထိုပိုးမွှားတွေက သွေးထဲက ဓာတုပစ္စည်းတစ်မျိုးကို အနံ့ခံကာ ရောက်ရှိလာနိုင်ကြောင်း ဝါရှင်တန်တက္ကသိုလ်မှ သုတေသနပြုစုသူ အာဒင်ဘေးလင့်က ဆိုပါတယ်။

စွမ်းအားမြင့် အဏုကြည့်မှန်ဖြင့် အူနံရံသွေးယိုစိမ့်ခြင်း ပြုလုပ်ကာ သွေးရည်ကြည်ထဲသို့ ဘက်တီးရီးယားများ ဝင်ရောက်လာပုံကို ကြည့်ရှုခဲ့ကြပါတယ်။

ဆယ်လ်မွန်နဲလား ဘက်တီးရီးယားမှာ Tsr လို့ခေါ်တဲ့ ပရိုတိန်းတစ်မျိုးပါဝင်ပြီး ဘက်တီးရီးယားတွေ သွေးရည်ကြည်သို့ ရောက်ရှိလာအောင် ကူညီပေးပါတယ်။

#World_Health #သွေးစုပ်ဘက်တီးရီးယားများ #Source: WION

တစ်နှစ်(၂)ကြိမ်ကျင်းပသည့် အီရန်တပ်မတော်နေ့စစ်ရေးပြပွဲအခမ်းအနားအား လုံခြုံရေးတင်းကြပ်စွာဖြင့် ကျင်းပ

ဗုဒ္ဓဟူးနေ့မှာ ကျရောက်တဲ့ အီရန်အမျိုးသား တပ်မတော်နေ့မှာ မြို့တော်တီရန်ရှိ စစ်အခြေစိုက်စခန်းတစ်ခုမှ လက်နက်များဖြင့် စစ်ရေးပြပွဲ ပြုလုပ်ခဲ့ပါတယ်။
အစ္စရေးလ်နဲ့ အခြေအနေ တင်းမာနေတဲ့ အနေအထားကြောင့် စစ်ရေးပြပွဲနားတဝိုက်မှာ လုံခြုံရေးတင်းကြပ်ထားခဲ့ပါတယ်။
#World_News
Published_ 20 April 2024
#အီရန်တပ်မတော်နေ့စစ်ရေးပြပွဲ #လုံခြုံရေးတင်းကြပ်
#YMG_News #Yangon_Times #Yangon_Media_Group

၂၀ ဧပြီ ၂၀၂၄

အမှတ်(၂) ထိုင်း-မြန်မာ ချစ်ကြည်ရေးတံတား နှစ်နိုင်ငံနယ်စပ်အနီး လာရောက်ပစ်ခတ်တိုက်ခိုက်ခဲ့သည့် KNU KKO (ခွဲထွက်)အဖွဲ့နှင့် PDF ပူးပေါင်းအဖွဲ့သည်  အကျအဆုံးများစွာဖြင့် ယနေ့ ဧပြီ ၂၀ ရက်ညနေ ၅နာရီခန့်တွင် ပြန်လည်ဆုတ်ခွာသွားခဲ့ကြောင်း  နစကသတင်းထုတ်ပြန်ချက်အရသိရပါတယ်။

KNU အဖွဲ့မှ အကြမ်းဖက်မှုကိုလိုလားသူများ၊ KKO (ခွဲထွက်)အဖွဲ့နှင့် PDF ပူးပေါင်းအဖွဲ့တို့သည် ကရင်ပြည်နယ်၊ မြဝတီမြို့ နယ်၊ ထိုင်း-မြန်မာ အမှတ်(၂) ချစ်ကြည်ရေးတံတားအနီး လုံခြုံရေးဆောင်ရွက်လျက်ရှိသည့် တပ်ဖွဲ့ဝင်များအား ဧပြီ၂၀ ရက်မနက်ပိုင်းက စတင်ကာ လာရောက်ပစ်ခတ်တိုက်ခိုက်ခဲ့တာဖြစ်တယ်လို့ သတင်းထုတ်ပြန်ချက်မှာဖော်ပြထားပါတယ်။

ထိုအဖွဲ့သည် လက်နက်ကြီးများဖြင့်အဝေးမှပစ်ခတ်တိုက်ခိုက်ခြင်း၊ Drop ဗုံးများဖြင့် ပစ်ချတိုက်ခိုက်ခြင်းတို့ကို သာလွန်အင်အား အသုံးပြု၍ တိုက်ပွဲဖော်ဆောင်လာခဲ့တာဖြစ်တယ်လို့ သိရှိရပါတယ်။

ယင်းအတွက် လုံခြုံရေးတပ်ဖွဲ့ဝင်များက နှစ်နိုင်ငံနယ်စပ်ဒေသတည်ငြိမ်အေးချမ်းရေး၊ မလိုလားအပ်သော လက်နက်ကိုင်ပဋိပက္ခများ ဖြစ်ပေါ်လာမှုမရှိစေရေးတို့အတွက် ထိန်းထိန်းသိမ်းသိမ်းဖြင့် ပြန်လည် တုန့်ပြန်ဆောင်ရွက်လျက်ရှိပြီး လေကြောင်းပစ်ကူ ပစ်အားရယူ၍ အကြမ်းဖက်မှုတန်ပြန်နှိမ်နင်းရေးလုပ်ငန်းများ  ကို ဆောင်ရွက်ခဲ့ရာ အဆိုပါ ပူးပေါင်းအဖွဲ့သည် ယနေ့ ညနေ ၅ နာရီခန့်တွင် အကျအဆုံးများစွာဖြင့် အနောက်   ဖက်သို့ ပြန်လည်ဆုတ်ခွာသွားခဲ့ကြောင်း သတင်းထုတ်ပြန်ချက်မှာဖော်ပြထားပါတယ်။

@ymg/knl

#Daily_News
Published_ 20 April 2024

၁။ ကချင်ဒေသခံများ ယခုနှစ် မိုးစပါးစိုက်ပျိုးနိုင်ရန် စိုးရိမ်ပူပန်နေ

၂။ သင်္ကြန်ပြီးကာလတွင် ကြက်သွန်ဖြူ တစ်ပိဿာကျပ် ၁၅၀၀ခန့် ဈေးပြန်ကျ

၃။ မန်းရွှေစက်တော်ဘုရားပွဲ‌တော်ကာလအတွင်း ဘုရားဖူးလေးသိန်းကျော်ဝင်ရောက်ခဲ့

၄။ တစ်နှစ်(၂)ကြိမ်ကျင်းပသည့် အီရန်တပ်မတော်နေ့စစ်ရေးပြပွဲအခမ်းအနားအား လုံခြုံရေးတင်းကြပ်စွာဖြင့်ကျင်းပ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group