#World_Health
Published 18 October 2024
▪️ ကိုယ်ဝန်ဆောင်စဉ် ဗိုင်းရပ်စ်ကူးစက်ခံရပါက မွေးလာတဲ့ကလေးမှာ အော်တစ်ဇင်လို့ခေါ်တဲ့ အာရုံကြောဖွံ့ဖြိုးမှုချို့ယွင်းခြင်းရောဂါတစ်မျိုး ဖြစ်လာနိုင်ကြောင်း ကြွက်တွေမှာ သုတေသန တွေ့ရှိခဲ့ပါတယ်။

▪️ ကြွက်အမေတွေက ဗိုင်းရပ်စ်တစ်မျိုးနဲ့ ထိတွေ့ပြီးနောက် ကြွက်သန္ဓေသားတွေမှာ ဖွံ့ဖြိုးမှုပိုင်း ချို့ယွင်းခြင်း လက္ခဏာများ တွေ့ရဖွယ်ရှိတယ်လို့ ကိုးလ်စပရင်းဟာဘာဓာတ်ခွဲခန်းမှ သုတေသီ အိုင်ရင်းဆန်းချက်ဇ်မာတင်က ပြောသွားပါတယ်။

▪️ ဒီလေ့လာချက်မှာ မွေးလာပြီးမှ ဆန်းစစ်တာမျိုးထက် ကြွက်အမေမှာ ဗိုင်းရပ်စ်ထိတွေ့ပြီး ၂၄ နာရီအတွင်းမှာပဲ သန္ဓေသားတွေကို စစ်ဆေးခဲ့တာ ဖြစ်တယ်လို့ ရှင်းပြပါတယ်။

▪️ အော်တစ်ဇင်ဆိုတာက ဖွံ့ဖြိုးမှုပိုင်းချို့ယွင်းတဲ့ ရောဂါတစ်မျိုးဖြစ်ပြီး လူတွေမှာ လေ့လာသင်ယူနိုင်စွမ်း၊ ပြုမူနေထိုင်မှု၊ အခြားသူတွေနဲ့ ဆက်ဆံပေါင်းသင်းမှုတွေမှာ ပုံမှန်မဟုတ်ကြပါဘူး။

▪️ အော်တစ်ဇင်ဖြစ်စေတဲ့ အကြောင်းအရင်း တိတိကျကျ မသိရသေးပေမယ့် မျိုးဗီဇနဲ့ ပတ်ဝန်းကျင် အကြောင်းအရာများ ပါဝင်ပတ်သက်နေမယ်လို့ ယူဆရပါတယ်။

▪️ သိပ္ပံပညာရှင်တွေက မိခင်ခုခံအားလှုံ့ဆော်မှုကို လေ့လာနေတာ ကြာပြီဖြစ်ပြီး ကိုယ်ဝန်ဆောင်စဉ် ရောဂါကူးစက်မှုကြောင့် ရောင်ရမ်းခြင်းကနေ သန္ဓေသားရဲ့ ဦးနှောက်ဖွံ့ဖြိုးမှုကို ထိခိုက်ကာ အော်တစ်ဇင်ဖြစ်နိုင်ခြေ များစေပါတယ်။

▪️ ကြွက်သန္ဓေသားတွေထဲက အမတွေအားလုံးက ဖွံ့ဖြိုးမှုချို့တဲ့ခြင်း မဖြစ်စေပေမယ့် အထီး ၃ ပုံ ၁ ပုံကတော့ အပြင်းအထန် ထိခိုက်စေပါတယ်။

▪️ ယောက်ျားလေးတွေက မိန်းကလေးတွေထက် အော်တစ်ဇင်ဖြစ်နိုင်ခြေ ၄ ဆပိုများကြောင်း ရောဂါထိန်းချုပ်ကာကွယ်ရေးစင်တာက ဆိုပါတယ်။

▪️ ယခုသုတေသီရဲ့ လေ့လာချက်က မမွေးခင်ကပင် အော်တစ်ဇင်ဖြစ်နိုင်ခြေ လက္ခဏာများကို တွေ့ရှိစေမယ်လို့ မျှော်လင့်နေပါတယ်။

▪️ ဒီလေ့လာချက်သာ အတည်ပြုနိုင်ပါက အော်တစ်ဇင်မဖြစ်စေရန် မမွေးခင်ကပင် စောစီးစွာပြင်ဆင်ကုသနိုင်ဖို့ အခွင့်အလမ်း ရှိလာနိုင်ကြောင်း နော့သ်ဝဲလ်ကျန်းမာရေးစင်တာမှ ညွှန်ကြားရေးမှူး ဒေါက်တာ ဗစ်တာကလိန်းက ပြောပါတယ်။

▪️ ဒီမတိုင်ခင် မီချီဂန်တက္ကသိုလ်မှ သုတေသီများ လေ့လာချက်ထဲမှာ မွေးရာပါ ဆိုင်တိုမဂ္ဂါလိုဗိုင်းရပ်စ် ကူးစက်တဲ့ ကလေးတွေဟာ အော်တစ်ဇင်ဖြစ်နိုင်ခြေ ၂ ဆခွဲပိုများတယ်လို့ ဖော်ပြထားပါတယ်။

▪️ အဓိကယူဆချက်ကတော့ ဗိုင်းရပ်စ်က မိခင်ခုခံအား လှုံ့ဆော်မှုဖြစ်စေတာ ဖြစ်ပါတယ်။

▪️ ကိုယ်ဝန်ဆောင်ချိန်မှာရော မွေးဖွားချိန်မှာပါ လက္ခဏာမပေါ်တတ်တဲ့ ဆိုင်တိုမဂ္ဂါလိုဗိုင်းရပ်စ်ကို သန္ဓေသားဘဝမှာပင် ပုံမှန်စစ်ဆေးဖို့ သုတေသီများ ထောက်ခံနေကြပါတယ်။

#Source: New York Post

Published  17 October 2024

တရုတ်ပြည်သူ့လွတ်မြောက်ရေးတပ်(PLA) အရှေ့ပိုင်းစစ်ဌာနချုပ်မှ အဆင့်မြင့်စစ်လေယာဉ်များဟာ ထိုင်ဝမ်ရေလက်ကြား၊ ထိုင်ဝမ်ကျွန်း မြောက်ပိုင်း တောင်ပိုင်း အရှေ့ပိုင်းတို့မှာ ပြုလုပ်နေတဲ့ Joint Sword-2024B စစ်ရေးလေ့ကျင့်မှုမှာ တနင်္လာနေ့က ပူးပေါင်းပါဝင်လာပါတယ်။ ထိုထဲမှာ ကျည်အစစ်များ တပ်ဆင်ထားတဲ့ တိုက်လေယာဉ်များ၊ H-6K ဗုံးကျဲလေယာဉ်များ ပါဝင်ပါတယ်။

၁၇ အောက်တိုဘာ ၂၀၂၄

တောင်ကိုရီးယားရဲ့ နာမည်ကျော် ဘီတီအက်စ် BTS အဖွဲ့ဝင် ကေပေါ့တ်စကား ဂျေဟုပ် J-Hope ဟာ ၁၈ လကြာ စစ်မှုထမ်းပြီးနောက် စစ်မှုထမ်းကာလပြီးဆုံးတဲ့အတွက် ပြီးခဲ့တဲ့ ကြာသပတေးနေ့က တောင်ကိုရီးယား စစ်တပ်ကနေ ထွက်ခဲ့ပါတယ်။ အဲဒါကြောင့် လာမယ့်နှစ်မှာ သူ့အနေနှင့် သူရဲ့ ဘီတီအက်စ်အဖွဲ့နှင့်ပြန်ပေါင်းတော့မလားလို့ သူ့ပရိဿတ်တွေနှင့် ရင်းနှီးမြှပ်နှံသူတွေက မျှော်လင့်နေ ကြပါတယ်။

သူတို့အဖွဲ့ထဲက နှစ်အကြာဆုံးအဖွဲ့ဝင် ဂျင်အနေနှင့် ပြီးခဲ့တဲ့ ဇွန်လက စစ်မှုထမ်းပြီးဆုံးပြီးတဲ့အခါ  (၇) ဦးပါ အဆိုပါအဖွဲ့ထဲက ဒုတိယမြောက်ဖြစ်တဲ့ အသက် ၃၀ရှိပြီဖြစ်တဲ့ ဂျေဟုပ်ဟာ စစ်မှုမထမ်းမနေရ ဥပဒေကြောင့် စစ်မှုထမ်းလိုက်ရတဲ့အတွက် သူ့ရဲ့ အသက်မွေးဝမ်းကျောင်းအလုပ်ကို ခေတ္တရပ်နားထားခဲ့ ရပါတယ်။

စစ်ဝတ်စုံဝတ်ဆင်ထားပြီး သံပုရာခွံဦးထုတ်ဆောင်းထားတဲ့ သူဟာ ဂန်ဝန်ပြည်နယ်ရဲ့ ဝန်ဂျူးစစ်တပ်  စခန်းကနေ ထွက်လာပြီးနောက် ဂျင်နှင့် သူ့ပရိဿတ်၁၀၀ခန့် ပြီးတော့ အဲဒီကိုရောက်နေကြတဲ့ သတင်းထောက်တွေကို အပြုံးနှင့်နှုတ်ဆက်ခဲ့ပါတယ်။

“ ပရိဿတ်တွေကို ကျေးဇူးတင်ပါတယ်။ ကျွန်တော်ကတော့ ဘေးမသီရန်မခဘဲ ကျန်းကျန်းမာမာနှင့် စစ်မှုထမ်းပြီးသွားပြီ” လို့ သူက လူအုပ်စုကိုပြောပါတယ်။

“ ပြီးခဲ့တဲ့ တစ်နှစ်ခွဲမှာ ကျွန်တော်ခံစားလိုက်ရတာကတော့ စစ်သားတွေဟာ နိုင်ငံတော်ကို  ကာကွယ်ဖို့  အတွက် သိပ်ပင်ပန်းကြတယ်။ သူတို့ကိုယ်သူတို့ မြှပ်နှံထားကြတယ်။အလုပ်အလွန်လုပ်ကြတာပဲ ဖြစ်တယ် ”လို့ သူက ပြောပါတယ်။ ပြီးတော့ စစ်မှုထမ်းတွေကို ချစ်မြတ်နိုးကြဖို့လည်း သူက ပြည်သူ  တွေကို ပန်ကြားလိုက်ပါတယ်။

“သူတို့အားလုံး အတူတကွနှင့်ပြန်ဖြစ်တာ သိပ်ကိုမြင်ချင်တယ်” လို့ ဂျေဟုပ်ကို လာကြိုတဲ့ ပရိသတ်     တစ်ဦးဖြစ်တဲ့ အသက် ၃၃နှစ်အရွယ် ချီလီနိုင်ငံသားပရိဿတ် ကော့စတန်ဇာဂေါ့ဒွိုင်ကပြောပါတယ်။

ဘီတီအက်စ်ဟာ ၂၀၁၃ ခုနှစ်မှာ စတင်ဖွဲ့စည်းဖျော်ဖြေပြီးနောက် ယခုထက်ထိ အွန်လိုင်းမပါဘဲ တကယ့် အယ်လ်ဘမ်အချပ်ပေါင်း ၅၆ သန်းကျော်ရောင်းချခဲ့ရပြီးဖြစ်ပါတယ်။

တောင်ကိုရီးယားနိုင်ငံမှာ ဥပဒေအရ အသက် ၁၈နှစ်မှ ၂၈ နှစ်အကြား သန်စွမ်းတဲ့ အမျိုးသားအားလုံးဟာ စစ်တပ် ဒါမှမဟုတ် လူမှုလုပ်ငန်းတွေမှာ ၁၈လမှ ၂၁လအထိ မဖြစ်မနေ အမှုထမ်းကြရပါတယ်။ ဒါပေမယ့် ၂၀၂၀ ပြည့်နှစ်မှာတော့ တကမ္ဘာလုံးက အသိအမှတ်ပြုထားတဲ့ ကေပေါ့တ်စတားတွေအတွက် အသက် ၃၀ မတိုင်ခင်မထိ စစ်မှုထမ်းခြင်းမှရွှေ့ဆိုင်းခွင့်ပြုတဲ့ ဥပဒေပြင်ဆင်မှုပြုလုပ်ပေးခဲ့ပါတယ်။

Source: Reuters

သီတင်းကျွတ်အခါသမယတွင် မြန်မာပြည်သူပြည်သားအားလုံး စိတ်နှလုံးအေးချမ်းကြပါစေ

YMG မိသားစု

Published 16 October 2024
ကယ်လီဖိုးနီးယား REMspace ကုမ္ပဏီမှ သိပ္ပံပညာရှင်များက လူနှစ်ယောက်အိပ်ပျော်နေစဉ် အိပ်မက်ထဲမှာ အပြန်အလှန် ဆက်သွယ်စေနိုင်ခဲ့ပါတယ်။
ထိုအချိန်မှာ အိပ်မက်တွေက ရှင်းလင်းပြတ်သားစွာ မက်နေကြပြီး REM အိပ်စက်အဆင့်အတွင်း ဖြစ်ပျက်ကြပါတယ်။
စမ်းသပ်ခံတဲ့သူတွေဟာ အိပ်မက်မက်ခဲ့တာကို ရှင်းလင်းစွာ မှတ်မိနိုင်တဲ့သူတွေ ဖြစ်ပါတယ်။
စက်တင်ဘာ ၂၄ ရက်နေ့မှာ စမ်းသပ်မှုပြုလုပ်ခဲ့ပြီး မအိပ်ခင်မှာ ဦးနှောက်လှုပ်ရှားမှုတွေနဲ့ အိပ်စက်မှုပုံစံတွေကို တိုင်းတာစောင့်ကြည့်နိုင်ရန် အထူးကိရိယာများဖြင့် ချိတ်ဆက်ခဲ့ကြပါတယ်။
သူတို့ရဲ့ အိပ်မက်မက်တဲ့အခြေအနေတွေကို စောင့်ကြည့်နေတဲ့ ဗဟိုစနစ်တစ်ခုသို့ အချက်အလက်များ ပေးပို့ခဲ့ပါတယ်။
အိပ်မက်ပြတ်သားစွာ မက်နေတဲ့အချိန်မှာ ဦးနှောက်လှုပ်ရှားမှု ပြောင်းလဲတာကို တွေ့ရှိခဲ့ပြီး ကျပန်းစကားလုံးတစ်လုံး ပေါ်ပေါက်လာကာ စမ်းသပ်ခံသူက ထိုစကားလုံးကို ကြားယောင်ပြီး အကြိမ်ကြိမ် အော်ပြောနေခဲ့ပါတယ်။
ဒုတိယတစ်ယောက်ဟာလည်း အိပ်မက်ပြတ်သားစွာ မက်တဲ့အဆင့်ကို ရောက်နေကာ ဦးနှောက်လှုပ်ရှားမှု ပြောင်းလဲမှုတွေ့ခဲ့ပြီး ထိုစကားလုံးကိုပဲ ပေးပို့ခဲ့ပါတယ်။
ယင်းဟာလည်း အိပ်မက်ထဲမှာ ထိုစကားလုံး ကြားယောင်ခဲ့ပြီး အကြိမ်ကြိမ်ပြောနေခဲ့ပါတယ်။
နိုးလာတဲ့အခါမှာ အိပ်မက်ထဲက စကားလုံးအတိုင်း ပြောနိုင်ခဲ့ပြီး လူနှစ်ဦး အိပ်မက်မက်နေစဉ် ပထမဆုံးအနေဖြင့် အောင်မြင်စွာ ဆက်သွယ်နိုင်ခဲ့ပါတယ်။
ဒီအောင်မြင်မှုဟာ အိပ်စက်မှုဆိုင်ရာသိပ္ပံပညာ တိုးတက်ဖို့ အလားအလာ ဖြစ်နေပါတယ်။
ဒီနည်းပညာကို စိတ်ကျန်းမာရေး ကုသမှု၊ စွမ်းရည်တိုးတက်မှု၊ အခြားနေရာတွေမှာလည်း အသုံးချသွားနိုင်ဖို့ REMspace စီအီးအို မိုက်ကယ်ရေဒူဂါက မျှော်မှန်းထားပါတယ်။
Source: NDTV 

#World_News
Published 17 October 2024

▪️ ကမ္ဘာပေါ်ရှိ မိန်းကလေးငယ် ၈ ဦးမှာ ၁ ဦးနှုန်း၊ တစ်နည်းအားဖြင့် ယနေ့အသက်ရှင်နေသေးတဲ့ အမျိုးသမီးပေါင်း သန်း ၃၇၀ ကျော်ဟာ အသက် ၁၈ နှစ်မပြည့်ခင် မုဒိမ်းကျင့်ခံရခြင်း ဒါမှမဟုတ် လိင်ပိုင်းစော်ကားခံရခြင်း ကြုံတွေ့ဖူးတယ်လို့ ကုလသမဂ္ဂ ကလေးသူငယ်ဆိုင်ရာဌာနက ဗုဒ္ဓဟူးနေ့မှာ ဖော်ပြထားပါတယ်။

▪️ အွန်လိုင်းနဲ့ အပြောအဆိုပိုင်းဆိုင်ရာလိုမျိုး မထိတွေ့ရတဲ့ လိင်ပိုင်းအကြမ်းဖက်မှုတွေကိုပါ ထည့်တွက်ရင် လူပေါင်းသန်း ၆၅၀ ဒါမှမဟုတ် ၅ ဦးလျှင် ၁ ဦးနှုန်းအထိ မြင့်တက်သွားကြောင်း UNICEF ယူနီဆက်ဖ်က ဖော်ပြထားပါတယ်။

▪️ မိန်းကလေးတွေနဲ့ အမျိုးသမီးငယ်တွေ အများဆုံး ထိခိုက်ခံရသလို ယောကျ်ားလေး သန်း ၂၄၀ မှ ၃၁၀ ဒါမှမဟုတ် ၁၁ ဦးလျှင် ၁ ဦးနှုန်းဟာလည်း ကလေးဘဝမှာ လိင်ပိုင်းစော်ကားမှုခံရတယ်လို့ ဆိုပါတယ်။

▪️ ဒီလိုမျိုး လူ့အခွင့်အရေး ချိုးဖောက်မှုအတိုင်းအတာက အလွန်များပြားလွန်းတယ်လို့ UNICEF က ဖော်ပြပါတယ်။

▪️ ကလေးသူငယ်များနဲ့ ပတ်သက်တဲ့ ဥပဒေတွေ မြှင့်တင်ပြဌာန်းပြီး ကူညီပေးခြင်း အပါအဝင် တစ်ကမ္ဘာလုံး အတိုင်းအတာဖြင့် လုပ်ဆောင်ကြဖို့ အရေးတကြီးလိုအပ်ကြောင်း ချပြသွားပါတယ်။

▪️ ဆာဟာရတောင်ပိုင်း အာဖရိကဒေသတွေမှာ မိန်းကလေး ၇၉ သန်း ဒါမှမဟုတ် ၂၂ ရာခိုင်နှုန်းလောက် အများဆုံးခံစားနေရပြီး အရှေ့တောင်အာရှနဲ့ အရှေ့အာရှတို့မှာ ၇၅ သန်းရှိနေပါတယ်။

▪️ အာရှတောင်ပိုင်းနဲ့ အလယ်ပိုင်းမှာ ၇၃ သန်း၊ ဥရောပနဲ့ မြောက်အမေရိကမှာ ၆၈ သန်း၊ လက်တင်အမေရိကနဲ့ ကာရစ်ဘီယန်မှာ ၄၅ သန်း၊ မြောက်အာဖရိကနဲ့ အာရှအနောက်ပိုင်းမှာ ၂၉ သန်း ရှိမယ်လို့ ယူနီဆက်ဖ်က ခန့်မှန်းထားပါတယ်။

▪️ ဒီလိုကျူးလွန်မှုကြောင့် ကလေးတစ်ယောက်ဟာ ဘေးကင်းစိတ်ချရမယ်လို့ ယုံကြည်သင့်တဲ့နေရာမှာတင်ပဲ စိတ်ဒဏ်ရာဖြစ်ရတယ်လို့ ယူနီဆက်ဖ် အမှုဆောင်ညွှန်ကြားရေးမှူး ကက်သရင်းရပ်ဆဲလ်က ဆိုပါတယ်။

▪️ ကလေးသူငယ် လိင်ပိုင်းစော်ကားခံရတာဟာ အသက် ၁၄ နှစ်နဲ့ ၁၇ နှစ်ကြားမှာ အများဆုံးဖြစ်ပြီး လိင်မှုရောဂါများ၊ စိတ်ကျန်းမာရေးပြဿနာများ ခံစားရနိုင်ခြေ များပါတယ်။

▪️ ယူနီဆက်ဖ်ရဲ့ ခန့်မှန်းချက်တွေက ၂၀၁၀ မှ ၂၀၂၂ အတွင်း နိုင်ငံဒေသပေါင်း ၁၂၀ ထံကနေ စစ်တမ်းကောက်ယူခဲ့ကြတာ ဖြစ်ပါတယ်။

#Source: The Jerusalem Post

#Local_News
Published 16 October 2024

▪️ ရန်ကုန်နှင့် မန္တလေးမြို့ရှိ နိုင်ငံတော်ပရိယတ္တိသာသနာ့တက္ကသိုလ်များတွင်  ၂၀၂၄-၂၀၂၅ ပညာသင်နှစ်အတွက် ဝင်ခွင့်များလျှောက်ထားနိုင်ပြီဖြစ်ကြောင်း  သိရသည်။

▪️ ထိုသို့လျှောက်ထားရာတွင် သာသနတက္ကသီလဓမ္မာစရိယတန်း(ပထမနှစ်)သင်တန်း ၊သာသနတက္ကသီလဓမ္မာစရိယတန်း(ပထမနှစ်)သင်တန်း၊ သာသနတက္ကသီလ မဟာဓမ္မာစရိယတန်း(ပထမနှစ်)သင်တန်းများအတွက် လျှောက်ထားနိုင်ကြောင်း သိရသည်။

▪️ သာသနတက္ကသီလဓမ္မာစရိယတန်း(ပထမနှစ်)သို့တက်ရောက်လိုသူ ရဟန်းတော်များသည်  အစိုးရပထမကြီးတန်း၊ စေတိယင်္ဂဏစာသင်တန်း၊ သကျသီဟ စာသင်တန်းတစ်ခုခုအောင်မြင်ပြီး သက်တော် ၃၀ နှစ်၊ သိက္ခာ ၁၀ ဝါ အောက်ရှိရမည့် ရဟန်း/သာမဏေများနှင့် သာသနတက္ကသီလမဟာဓမ္မာစရိယတန်း(ပထမနှစ်)သို့ သာသနတက္ကသီလဓမ္မာစရိယဘွဲ့၊ သာသနဓဇဓမ္မာစရိယဘွဲ့၊ သကျသီဟဓမ္မာစရိယဘွဲ့နှင့် စေတိယင်္ဂဏဓမ္မာစရိယဘွဲ့တစ်ခုခုရရှိပြီး သက်တော် ၃၅ နှစ်၊ သိက္ခာ ၁၅ ဝါအောက် ရှိရမည့် ရဟန်း/ သာမဏေများ လျှောက်ထားနိုင်ကြောင်း သိရသည်။

▪️ ထို့အပြင် သာသနတက္ကသီလဓမ္မာစရိယတန်း(ပထမနှစ်) ဝင်ခွင့်လျှောက်ထားသော ရဟန်း/သာမဏေများသည် အစိုးရ ပထမကြီးတန်းနှင့်ညီမျှသော ဝိနည်းဆိုင်ရာ(၅)ပုစ္ဆာနှင့် အဘိဓမ္မာဆိုင်ရာ (၅)ပုစ္ဆာ၊ မေးခွန်းလွှာတစ်ခု၊ ပါဠိဆိုင်ရာ (၅) ပုစ္ဆာနှင့် အထွေထွေဗဟုသုတ(၅)ပုစ္ဆာ၊ မေးခွန်းလွှာတစ်ခုကို တစ်ရက်စီ စုစုပေါင်း နှစ်ရက် ဖြေဆိုရမည်ဖြစ်ကြောင်း သိရသည်။

▪️ သာသနတက္ကသီလ မဟာဓမ္မာစရိယတန်း(ပထမနှစ်) ဝင်ခွင့်လျှောက်ထားသော ရဟန်း/ သာမဏေများမှာမူ  သာသနတက္ကသီလဓမ္မာစရိယတန်း(စတုတ္ထနှစ်)နှင့်ညီမျှသည့်  ဝိနည်း၊ သုတ္တန်၊ အဘိဓမ္မာကို ပထမနေ့တွင် (က) အတ္ထယောဇနာ၊ (ခ) ဝါကျသဒ္ဒါ၊ (ဂ) အဓိပ္ပာယတ္ထ၊ (ဃ) ခေတ်လေ့လာနည်းအားဖြင့် (၁၀)ပုစ္ဆာဖြေဆိုရမည် ဖြစ်ကြောင်း ၊ ဒုတိယနေ့တွင်မူ ပါဠိ၊ မြန်မာ၊ အင်္ဂလိပ်၊ ပြန့်ပွားဘာသာအားဖြင့် (၁၀)ပုစ္ဆာဖြေဆိုရမည်ဖြစ်ကြောင်း သိရသည်။

▪️ အဆိုပါ သာသနာ့တက္ကသိုလ်ဝင်ခွင့်လျှောက်လွှာများကို ၁၃၈၆ ခုနှစ် သီတင်းကျွတ်လပြည့်ကျော် ၁၁ ရက်၊ ၂၀၂၄ ခုနှစ်၊ အောက်တိုဘာလ ၂၈ ရက် (တနင်္လာနေ့နှင့် အစိုးရရုံးပိတ်ရက်များမှအပ)စတင်ထုတ်ပေးသွားမည်  ဖြစ်ပြီး  ၁၃၈၆ ခုနှစ်၊ တန်ဆောင်မုန်းလဆန်း ၁၂ ရက်၊ ၂၀၂၄ ခုနှစ်၊ နိုဝင်ဘာလ ၁၂ ရက် နောက်ဆုံးထားပြီး သက်ဆိုင်ရာ တက္ကသိုလ်များ၏ မော်ကွန်းထိန်းရုံးတို့တွင် တင်သွင်းနိုင်ကြောင်း သိရသည်။

▪️ အသေးစိတ်သိရှိလိုသော အချက်များကို နိုင်ငံတော်ပရိယတ္တိသာသနာ့ တက္ကသိုလ်(ရန်ကုန်) မော်ကွန်းထိန်းရုံး ဖုန်း ၀၉-၅၄၀ဝ၈၂၈၊ ၀၉-၄၂၅၀၀၈၇၂၈နှင့် နိုင်ငံတော်ပရိယတ္တိသာသနာ့ တက္ကသိုလ်(မန္တလေး) မော်ကွန်းထိန်းရုံး ဖုန်း ၀၉-၂၀၃၅၅၇၂၊ ၀၉-၂၅၀၂၃၀၇၉၁ သို့ ဆက်သွယ်စုံစမ်းနိုင်ကြောင်း  သိရသည်။

#YMG/NN #Yangon_Times

#Local_News
Published 16 October 2024

▪️ ရန်ကုန်တိုင်းဒေသကြီး၊ ဗိုလ်တထောင်မြို့နယ်ရှိ ဝန်ကြီးများရုံးတွင်  သီတင်းကျွတ်ဈေးပွဲတော်ကိုယနေ့ စတင်၍ ကျင်းပနေပြီဖြစ်ကြောင်း သိရသည်။

▪️ အဆိုပါ သီတင်းကျွတ်ဈေးပွဲတော်ကို အောက်တိုဘာလ ၁၆ ရက်မှ ၁၈ ရက်အထိမနက် ၉ နာရီ မှ ည ၉ နာရီအထိ  ရန်ကုန်တိုင်းဒေသကြီး ဗိုလ်တထောင်မြို့နယ်ရှိ၀န်ကြီးများရုံး  Heritage Market Indoor & Outdoor  တွင် ပြုလုပ်သွားမည်ဖြစ်သည်။

▪️ ပွဲ‌တော်၌ လူသုံးကုန်ပစ္စည်း များ ၊Fashion များ၊ တားရော့ဆိုင်များ၊ အစားအသောက်များ၊ ရိုးရာ handmade များ၊ လက်၀တ်ရတနာများ၊ ၀န်ဆောင်မှုများ၊ ကလေးပစ္စည်းဆိုင်များနှင့် အခြားသောထုတ်ကုန်များစွာ ပါ၀င်ကြောင်း သိရသည်။

▪️ ထို့အပြင် စားသောက်တန်းများမှာလည်း စားပွဲထိုင်ခုံများနှင့် ပါ၀င်ထားသည့်အပြင်အခမဲ့ မြည်းစား၍ရတဲ့ ဆိုင်များလည်းပါရှိကြောင်း ပွဲတော်၌ စားသောက်ကုန်၊ လူသုံးကုန်နှင့် အထွေထွေကုန်ပစ္စည်းမျိုးစုံတို့ကို ဆိုင်ခန်းပေါင်း ၈၀ ခန့်ဖြင့် ပြသဖွင့်လှစ်ရောင်းချပေးနေကြောင်း သိရသည်။

▪️ ထို့အပြင် ဖျော်ဖြေရေးများအဖြစ် လပြည့်နေ့နှင့် လပြည့်ကျော် ၁ ရက်နေ့ ညနေခင်းများတွင် အနုပညာရှင်များမှအက၊ အဆို performance များဖြင့် အခမဲ့ ဖျော်ဖြေတင်ဆက်သွားမည်ဖြစ်သည့်အပြင် စျေးပွဲလာပရိသတ်များ ပါ၀င်၍ရသည့်  ဂိမ်းပြိုင်ပွဲများကိုလည်း ထည့်သွင်းပေးထားကြောင်း သိရသည်။

#YMG/NN #Yangon_Times

#World_News
Published 16 October 2024

▪️ မြောက်ကိုရီးယားမှာ ယခုသီတင်းပတ်အတွင်း ကျောင်းသားများနဲ့ လူငယ်အသင်းအဖွဲ့ အရာရှိများ အပါအဝင် လူငယ်လူရွယ် ၁.၄ သန်းခန့် စစ်တပ်ထဲဝင်ရောက်ရန် လာရောက်လျှောက်ထားခဲ့တယ်လို့ မြောက်ကိုရီးယားနိုင်ငံပိုင် မီဒီယာက ဗုဒ္ဓဟူးနေ့မှာ ဖော်ပြခဲ့ပါတယ်။

▪️ လူငယ်တွေဟာ တော်လှန်ရေးစိတ်ဓာတ်ဖြင့် ရန်သူတွေကို ဖျက်ဆီးမယ့် စစ်ပွဲကြီးမှာ ပါဝင်ရန် စိတ်ပိုင်းဖြတ်ထားကြတယ်လို့ KCNA သတင်းဌာနက ဖော်ပြထားပါတယ်။

▪️ ကိုရီးယားကျွန်းဆွယ်တဝိုက် တင်းမာမှုမြင့်တက်နေတဲ့ကာလမှာ မြောက်ကိုရီးယားစစ်တပ်ထဲ ဝင်ရောက်ရန် စာရင်းပေးသွင်းတဲ့ လူငယ်ပေါင်း ၂ ရက်အတွင်း ၁ သန်းကျော်ရှိထားတယ်လို့ သိရပါတယ်။

▪️ ယမန်နှစ်ကလည်း မြောက်ကိုရီးယားဟာ အမေရိကန်ကို တိုက်ခိုက်မယ့် စစ်တပ်ထဲ ဝင်ရောက်ရန် ဆန္ဒအလျောက်ဝင်ရောက်လာသူတွေ ရှိခဲ့တယ်လို့ မီဒီယာက ဖော်ပြဖူးပါတယ်။

▪️ မြောက်ကိုရီးယားဟာ အင်္ဂါနေ့က ကိုရီးယား ၂ နိုင်ငံကြား အခိုင်အမာချထားတဲ့ နယ်စပ်အနီး ယင်းတို့ဘက်ခြမ်းရှိ နှစ်နိုင်ငံဆက်သွယ် လမ်းမကြီးများနဲ့ ရထားလမ်းများကို ဖောက်ခွဲခဲ့တာကြောင့် တောင်ကိုရီးယားဘက်က သတိပေးပစ်ဖောက်ခဲ့ရပါသေးတယ်။

▪️ တောင်ကိုရီးယားဘက်ကနေ မြောက်ကိုရီးယားမြို့တော်ဘက်သို့ ဒရုန်းများ လွှတ်နေတယ်လို့ မြောက်က စွပ်စွဲထားပြီး မေလကတည်းကလည်း မြောက်ကနေ လွှတ်တင်နေတဲ့ အမှိုက်ပူဖောင်းများကြောင့် အတိုက်အခံ ဖြစ်နေကြပါတယ်။

▪️ ပူဖောင်းများလွှတ်တင်ရတာဟာ တောင်ဘက်က မြောက်ဆန့်ကျင်ရေး လှုပ်ရှားမှုများကို တုန့်ပြန်တာဖြစ်တယ်လို့ မြောက်ကိုရီးယားက ဆိုပါတယ်။

▪️ စစ်ပွဲဖြစ်ပြီဆိုရင် တောင်ကိုရီးယားနိုင်ငံ ပျက်သုဉ်းသွားမှာဖြစ်တယ်လို့ KCNA က ဖော်ပြထားပါတယ်။

#Source: Reuters

#World_Health
Published 16 October 2024

▪️ တိကျတဲ့ သွေးပေါင်ချိန်တိုင်းတာမှု ရရှိဖို့ဆိုတာ တိုင်းတာတဲ့ ပုံစံအနေအထားပေါ် မူတည်ပြီး အများစုက လွဲမှားနေကြတယ်လို့ ဂျွန်ဟော့ပ်ကင်းစ်ဆေးဘက်ဆိုင်ရာမှ သုတေသီများ ဆိုပါတယ်။

▪️ သုတေသီများက လူ ၁၃၃ ယောက်ရဲ့ လက်တွေကို ပေါင်ပေါ်ထားခြင်း၊ စားပွဲပေါ်တင်ခြင်း၊ ဘေးမှာလက်ချထားခြင်း ပုံစံ ၃ မျိုးဖြင့် သွေးပေါင်ချိန်များ တိုင်းတာပြီး နှိုင်းယှဉ်ခဲ့ကြပါတယ်။

▪️ အချို့သော ပုံစံဖြင့်တိုင်းတာခြင်းက အပေါ်သွေး ပိုများစေတယ်လို့ တွေ့ရှိထားကြပါတယ်။

▪️ လက်ကိုဘေးမှာချပြီး တိုင်းတာတဲ့အခါ အပေါ်သွေး ၆.၅ မှတ်၊ အောက်သွေး ၄.၄ မှတ် ပိုများစေတယ်လို့ တွေ့ခဲ့ကြပါတယ်။

▪️ လက်ကို မ'ထားပေးတဲ့ ပုံစံမှာတော့ အပေါ်သွေး ၃.၉ မှတ်၊ အောက်သွေး ၄ မှတ် ပိုများခဲ့ပါတယ်။

▪️ သွေးပေါင်ချိန်ရလဒ် မှားယွင်းတာတွေကြောင့် သွေးတိုးရောဂါအထင်နဲ့ မလိုလားအပ်တဲ့ ဆေးဝါးတွေ သောက်မိပြီး ဘေးထွက်ဆိုးကျိုး ဖြစ်မှာကို ဒေါက်တာ တမ်မီဘရက်ဒီက စိုးရိမ်နေပါတယ်။

▪️ အမေရိကန် ရောဂါထိန်းချုပ် ကာကွယ်ရေးဌာနရဲ့ ခန့်မှန်းချက်အရ အမေရိကန်မှာ သွေးပေါင်ချိန်ထိန်းဆေး အသုံးပြုနေရသူ ၆၁.၉ သန်းခန့် ရှိနေပါတယ်။

▪️ အမေရိကန် နှလုံးအဖွဲ့အစည်းမှ အကြံပြုချက်ကတော့ ကြမ်းပြင်မှာ ခြေဖျားချ၊ ကျောမှာအမှီထား၊ လက်တွေကို တစ်ခုခုပေါ်တင်ထားကာ နှလုံးအလယ်နဲ့ တတန်းတည်း အနေအထားမှာ သွေးပေါင်ချိန်တိုင်း လက်ပတ်ကို ပတ်ရမှာ ဖြစ်ပါတယ်။

▪️ မတိုင်းတာခင် မိနစ် ၃၀ ခန့်အလိုမှာ ဆေးလိပ်၊ ကော်ဖီ၊ လေ့ကျင့်ခန်းလုပ်ခြင်းတို့ ရှောင်ရှားဖို့လည်း တိုက်တွန်းပါတယ်။

▪️ အပေါ်သွေး ၁၂၀ အောက်၊ အောက်သွေး ၈၀ အောက်ဆိုရင် သွေးပေါင်ချိန်ပုံမှန်လို့ သတ်မှတ်ပါတယ်။

▪️ တိုင်းတာတဲ့ ပုံစံအပြင် လက်ပတ်အရွယ်အစားကလည်း တိကျမှုကို သက်ရောက်နေပါတယ်။

▪️ သွေးပေါင်ချိန်များတဲ့ သူတွေအနေနဲ့ လေ့ကျင့်ခန်း မှန်မှန်ပြုလုပ်ခြင်း၊ အာဟာရမျှတစွာ စားသောက်ခြင်း၊ ကိုယ်အလေးချိန် ထိန်းသိမ်းခြင်း၊ ဆေးလိပ်ဖြတ်ခြင်းတို့ ပြုလုပ်ဖို့ အကြံပေးထားပါတယ်။

#Source: New York Post

#World_Health
Published 16 October 2024

▪️ ၂၀၂၃ ကျန်းမာရေးစောင့်ရှောက်မှု အရည်အသွေး ဖော်ပြချက်အရ လူတွေဟာ အိပ်ဆေးနဲ့ စိတ်ကျရောဂါထိန်း ဆေးဝါးများ အသုံးများလာခြင်း၊ အဝလွန်ခြင်း ဆေးလိပ်သောက်ခြင်း အဖြစ်များလာခြင်း၊ ရင်သားကင်ဆာ စစ်ဆေးမှု လျော့နည်းလာခြင်းတို့ တွေ့ရှိလာရပါတယ်။

▪️ အစ္စရေးလ်မှာဆိုရင် ဖြစ်ပွားနေတဲ့ စစ်ကြောင့် စိတ်ကျန်းမာရေး အခြေအနေကိုလည်း သက်ရောက်နေပါတယ်။

▪️ အထူးသဖြင့် တဲလ်အေဗစ်နဲ့ ရာမတ်ဂန်တို့လို့ မြို့ကြီးတွေမှာ အဖြစ်များလာကြပြီး အထက်တန်းစား လူတန်းစားများမှာ အိပ်ဆေး၊ စိတ်ကျသက်သာဆေးများ ပိုမိုအသုံးပြုလာရပါတယ်။

▪️ ၂၀၂၃ အတွင်း အသက် ၁၄ နှစ်မှ ၁၅ နှစ်ကြား လူငယ်တွေမှာ အဝလွန်မှုနှုန်းက ၁၂.၈ ကနေ ၁၃.၂ ရာခိုင်နှုန်း မြင့်တက်လာပါတယ်။

▪️ အစ္စရေးလ်လူကြီးတွေမှာလည်း လူဦးရေ ၅၀ ရာခိုင်နှုန်းလောက်က အဝလွန်တဲ့ အခြေအနေ ဖြစ်နေပါတယ်။

▪️ ဒါ့အပြင် ဆီးချိုဖြစ်ပွားနှုန်းလည်း မြင့်တက်လာကာ အသက်အန္တရာယ်ပါ ပိုများလာပါတယ်။

▪️ ဆေးလိပ်သောက်နှုန်းကလည်း ၂၀၂၁ ကထက်စာရင် ၀.၁ ရာခိုင်နှုန်း ပိုများလာကာ အခြေအနေမြင့် အမျိုးသားများထက် အခြေခံလူတန်းစား အမျိုးသားများက ဆေးလိပ်သောက်နှုန်း နှစ်ဆလောက် ပိုများပါတယ်။

▪️ အမျိုးသမီးတွေမှာတော့ ပြောင်းပြန်ဖြစ်နေပြီး လူမှုအဆင့်အတန်း မြင့်မားသူတွေက ဆေးလိပ်သောက်နှုန်း ပိုများနေပါတယ်။

▪️ ရင်သားကင်ဆာ စစ်ဆေးမှုကလည်း ၂၀၂၃ မှာ ၇၀.၅ ရာခိုင်နှုန်းသာ ရှိခဲ့ကာ ၂၀၂၂ တုန်းက ၇၁.၈ ရာခိုင်နှုန်း ရှိခဲ့ပါတယ်။

▪️ အထူးသဖြင့် လူမှုအဆင့်အတန်းနိမ့်ပါးတဲ့ အမျိုးသမီးတွေမှာ ၆၃.၄ ရာခိုင်နှုန်းသာ ရှိပါတယ်။

▪️ ပဋိဇီဝပိုးသတ်ဆေး အသုံးပြုမှုက လူ ၁၀၀၀ မှာ ၇၅၄ ကြိမ် ဆေးညွှန်းခဲ့ရကာ ၂၀၂၁ ခုနှစ်က ၆၇၄ သာ ရှိခဲ့ပါတယ်။

▪️ သက်ကြီးရွယ်အိုတွေကြား တုပ်ကွေးကာကွယ်ဆေး ထိုးနှုန်းကတော့ သိသိသာသာ ကျဆင်းလာကာ ၂၀၂၃ မှာ အသက် ၆၅ နှစ်အထက် ကာကွယ်ဆေးထိုးနှုန်းက ၅၄.၁ ရာခိုင်နှုန်းသာ ရှိပါတယ်။

▪️ ဒီလိုတွေ့ရှိချက်တွေဟာ စစ်ပွဲဖြစ်ပွားခြင်းရဲ့ သက်ရောက်မှုတွေဖြစ်ကြောင်း၊ ၂၀၂၄ မှာ ပြည်သူ့ကျန်းမာရေးစနစ် ပိုမိုထိခိုက်နိုင်ဖွယ်ရှိကြောင်း အမျိုးသားကျန်းမာရေး မူဝါဒဆိုင်ရာ အဖွဲ့အစည်းဥက္ကဌ ပရော်ဖက်ဆာ နက်ခ်မန်းအက်ရှ်က ပြောသွားပါတယ်။

#Source: The Jerusalem Post

၁၅ အောက်တိုဘာ ၂၀၂၄

မြန်မာနိုင်ငံရဲ့ ဒုတိယအကြိမ်မြောက် ဒီမိုကရေစီအစိုးရ သက်တမ်းကာလမှာ ထိန်းသိမ်းရမယ့် ပြည်တွင်းရေး လျှို့ဝှက်ချက်တွေ အလွယ်တကူပေါက်ကြားစေခဲ့ကြောင်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ဝေဖန် ပြောကြားလိုက်ပါတယ်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ချုပ်ဆိုခြင်း(၉)နှစ်မြောက် နှစ်ပတ်လည်နေ့သို့   ပေးပို့သည့် ဗီဒီယိုမိန့်ခွန်းတွင် တပ်မတော်ကာကွယ်ရေးဦးစီးချုပ်လည်းဖြစ်တဲ့ ဗိုလ်ချုပ်မှူးကြီးက ထည့်သွင်းပြော   ကြားခဲ့တာဖြစ်ပါတယ်။

“မြန်မာနိုင်ငံရဲ့ ဒုတိယအကြိမ်မြောက် ဒီမိုကရေစီအစိုးရ သက်တမ်းကာလမှာ တစ်ခါတုန်းက မြန်မာ့ သမိုင်းထဲက လို တိုင်းတစ်ပါးသားများအပေါ် ယုံကြည်ကိုးစားမှုလွန်ကဲခြင်းတွေကြောင့် တိုင်းပြည်ဘဏ္ဍာတွေဆုံးရှုံးခဲ့ရသလို မဖြစ်မနေထိန်းသိမ်းရမယ့် ပြည်တွင်းရေးလျှို့ဝှက်ချက်တွေကိုလည်း အလွယ်တကူပေါက်ကြားစေခဲ့ ပါတယ်” လို့ ဗိုလ်ချုပ်မှူးကြီးကပြောပါတယ်။

ဗိုလ်ချုပ်မှူးကြီးက မည်သည့်အစိုးရဆိုပြီး အတိအကျပြောမသွားသော်လည်း ဒုတိယအကြိမ် ဒီမိုကရေစီ အစိုးရ သက်တမ်းတွင် ဒေါ်အောင်ဆန်းစုကြည်ဦးဆောင်ခဲ့သည့် အမျိုးသားဒီမိုကရေစီအဖွဲ့ချုပ်က အာဏာရပါတီအဖြစ် နိုင်ငံရေးအာဏာရယူခဲ့ခြင်းဖြစ်ပါတယ်။

နိုင်ငံတော်ရဲ့ တာဝန်အရပ်ရပ်ကို ထမ်းဆောင်ခွင့်ရခဲ့ကြတဲ့ အစိုးရအာဏာပိုင်တွေကအစ ဒီမိုကရေစီကျင့်စဉ်ကိုလွဲမှားစွာကျင့်သုံးခဲ့ကြတယ်လို့လည်း ဗိုလ်ချုပ်မှူးကြီးက အပြစ်တင်ခဲ့ပြီး ၂၀၂၀ ပြည့်နှစ် ရွေးကောက်ပွဲမှာလည်းအဲဒီအချိန်က အစိုးရရဲ့ မဲမသမာမှုလုပ်ရပ်များဟာ အလွန်အကျည်းတန်စွာ မြန်မာ့သမိုင်းစဉ်မှာ အမည်းစက်ကြီး   အဖြစ် ကျန်ရစ်ခဲ့တာအားလုံးသိပြီးဖြစ်တယ်လို့လည်း ဗိုလ်ချုပ်မှူးကြီးက ဆက်လက်ပြောဆိုပါတယ်။

ရှေ့လုပ်ငန်းစဉ် (၅)ရပ်ရဲ့ နောက်ဆုံးအချက်ဖြစ်တဲ့ ပါတီစုံဒီမိုကရေစီအထွေထွေရွေးကောက်ပွဲကို‌ အောင်မြင်စွာ ကျင်းပပေးနိုင်ဖို့ စီမံဆောင်ရွက်နေတယ်လို့လည်း နစက ဥက္ကဋ္ဌက ပြောဆိုပါတယ်။ ရွေးကောက်ပွဲမှာ ပါတီစုံ ပါဝင်နိုင်ရေးကို အလေးထားဆောင်ရွက်နေတယ်လို့ ဗိုလ်ချုပ်မှူးကြီးက ပြောဆိုလိုက်ပြီး နယ်မြေဒေသအလိုက် ရွေးကောက်ပွဲကျင်းပနိုင်တဲ့ လုံခြုံရေးအခြေအနေရောက်အောင် ကြိုးပမ်းဆောင်ရွက်လျက်ရှိတယ်လို့လည်း ဆိုပါတယ်။

“ကျွန်တော့်အနေနှင့်ရွေးကောက်ပွဲ ကာလများမှာ ဖြစ်ပေါ်လာနိုင်တဲ့အခြေအနေများကိုတွက်ဆပြီး လုံခြုံရေး    ကောင်းမွန်အောင် တိုးမြှင့်ဆောင်ရွက်သွားမှာ ဖြစ်သလို သက်ဆိုင်ရာ EAO များကလည်း ပူးပေါင်းပါဝင်ပေးကြဖို့ ပြောကြားလိုပါတယ်” လို့ ဗိုလ်ချုပ်မှူးကြီးက လက်ရှိလုံခြုံရေးအခြေအနေနှင့်ဆက်စပ်ပြီး ပြောကြားပါတယ်။ လာမည့် ၂၀၂၅ခုနှစ်တွင် ရွေးကောက်ပွဲကျင်းပမည်ဟု ဗိုလ်ချုပ်မှူးကြီးက ထုတ်ဖော်ပြောဆိုထားပြီးဖြစ်ပါတယ်။

သန်းခေါင်စာရင်းကောက်ယူပြီးဖြစ်ပေါ်လာမယ့် ရွေးကောက်ပွဲဆိုင်ရာ အကြိုလုပ်ငန်းစဉ်ကဏ္ဍများမှာ EAO များရော တိုင်းရင်းသား ပြည်သူတစ်ရပ်လုံးကပါလုံခြုံရေးအသိ၊ လုံခြုံရေးအမြင်များထားရှိပြီး ကိုယ်စီကိုယ်စီတစ်တပ်တစ်အား ပူးပေါင်းပါဝင်ဆောင်ရွက်မှုတို့နဲ့ နိုင်ငံ့သားကောင်းစိတ်ဓာတ်တို့ကို ပြသကြဖို့ လည်း ဗိုလ်ချုပ်မှူး    ကြီးက မိန့်ခွန်းမှာ တိုက်တွန်းပြောဆိုသွားပါတယ်။

#ymg/knl