#Local_News
Published 3 January 2025

▪️ ရန်ကုန်-မန္တလေးအမြန်လမ်းမကြီး၌ အိမ်စီးကားတစ်စီး လမ်းလယ်ကျွန်းကိုတိုက်မိပြီး တစ်ဦး‌ေ-သဆုံးပြီး သုံးဦးဆေးရုံသို့တင်ပို့ခဲ့ရကြောင်း ပြည်သာယာလူမှုကူညီရေးအသင်းမှ သိရသည်။

▪️ ဖြစ်စဉ်မှာ ဇန်နဝါရီ ၂ ရက်နေ့၊  နေ့လယ် ၂နာရီ  ၄၅မိနစ် အချိန်ခန့် က ၊ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၂၉၀/၇)အနီးတွင် ယာဉ်(၁)စီးသည် လမ်းလယ်ကျွန်းအား ဝင်ရောက်တိုက်မိမှုဖြစ်ပွားခဲ့ကြောင်း သိရသည်။

▪️ အဆိုပါ  သတင်းရရှိသဖြင့် သီးကုန်းအမြန်လမ်းမီးသတ်စခန်းမှ မီးသတ်ယာဉ်(၁)စီး၊ ရှာဖွေကယ်ဆယ်ရေးတပ်ဖွဲ့ဝင်များ၊ ပြည်သာယာလူမှုကူညီရေးအသင်းများမှ ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ ကြောင်းသိရသည်။

▪️ "ကျွန်တော်တို့ အသင်းကို ဖုန်းဆက်အကူအညီတောင်းလာတာကြောင့်အသင်း ရဲ့  အရေးပေါ်လူနာတင်ယာဉ်နဲ့ ချက်ချင်းထွက်ပြီး  ဖြစ်စဉ်သို့ရောက်တဲ့အခါ
လူနာတွေနဲ့သေဆုံးသူတို့ကို အမြန်လမ်း ရဲတပ်ဖွဲ့၊ အမြန်လမ်း မီးသတ်တပ်ဖွဲ့ ၊ အမြန်လမ်း 192 တို့နဲ့အတူ ကျနော်တို့အသင်းတို့  ပူးပေါင်းကူညီဆောင်ရွက်ပေးပါတယ်။" ဟု ပြည်သာယာလူမှုကူညီရေးအသင်းမှ တာဝန်ရှိသူတစ်ဦးက ပြောသည်။

▪️ အဆိုပါ  ဖြစ်စဉ်ကြောင့် ယာဉ်ပေါ်ပါ ကျား(၂)ဦး၊ မ(၂)ဦး စုစုပေါင်း(၄)ဦးအနက် မ(၁)ဦး(သေဆုံး)နှင့် ထိခိုက်ဒဏ်ရာရရှိသူ ကျား(၂)ဦးနှင့် မ(၁)ဦးတို့အား ပြည်သာယာလူမှုကူညီရေးအသင်းမှ သူနာတင်ယာဉ်ဖြင့် မိတ္ထီလာမြို့နယ်ပြည်သူ့ဆေးရုံသို့ ကူညီပို့ဆောင်ပေးခဲ့ကြောင်း သိရသည်။

#YMG/NN #Yangon_Times

#World_Climate
Published 03 January 2025

▪️ ၁၈၁၅ ခုနှစ်မှာ တမ်ဘိုရာတောင် မီးတောင်ပေါက်ကွဲခဲ့ခြင်းဟာ ကမ္ဘာကြီးကို သိသိသာ ပြောင်းလဲစေခဲ့တဲ့ ဖြစ်ရပ်ဆိုးဖြစ်ခဲ့ပြီး နွေရာသီမရှိခဲ့တဲ့နှစ် ဖြစ်ခဲ့ပါတယ်။

▪️ အဆိုပါ အင်ဒိုနီးရှားမီးတောင် ပေါက်ကွဲမှုဟာ သမိုင်းမှာ အပြင်းထန်ဆုံးဖြစ်ခဲ့ပြီး လေထုထဲသို့ ဆာလ်ဖာဒိုင်အောက်ဆိုဒ်ငွေ့များ အလုံးအရင်း ဝင်ရောက်ကာ ကမ္ဘာဂြိုဟ်ကြီးတစ်ခုလုံး ချမ်းအေးသွားခဲ့ပြီး သီးနှံများ ပျက်စီးတဲ့အပြင် ကမ္ဘာတဝှမ်း ငတ်မွတ်ခေါင်းပါးခြင်းနဲ့ ရောဂါဘယများ ဖြစ်ခဲ့ပါတယ်။

▪️ နောက်ထပ် ရာစုနှစ် ၂ခုအကြာမှာတော့ သိပ္ပံပညာရှင်တွေဟာ နောက်ထပ်မီးတောင်ပေါက်ကွဲမှုကြီး ထပ်ဖြစ်နိုင်တဲ့အခြေအနေကို သတိပေးလာတယ်လို့ ဂျီနီဗာတက္ကသိုလ်မှ ရာသီဥတုပရော်ဖက်ဆာ မားကပ်စ်စတော့ဖယ်ရဲ့ အဆိုကို CNNက ဖော်ပြလိုက်ပါတယ်။

▪️ ယခုရာစုနှစ်အတွင်း ထိုကဲ့သို့ မီးတောင်ပေါက်ကွဲမှု ဖြစ်နိုင်ခြေက ၆ ပုံ ၁ ပုံလောက်ရှိပါတယ်။

▪️ မီးတောင်များ ပြင်းထန်စွာပေါက်ကွဲတဲ့အခါ လေထုထဲသို့ ဆာလ်ဖာဒိုင်အောက်ဆိုဒ်များ ထုတ်လွှတ်ပြီး အမှုန်တွေက နေရောင်ကိုကွယ်သွားတာကြောင့် တစ်ကမ္ဘာလုံးမှာ အေးမြလာပါတယ်။

▪️ ၁၉၉၁ တုန်းက ပီနာကျူဘိုတောင် ပေါက်ကွဲခဲ့စဉ် ဆာလ်ဖာဒိုင်အောက်ဆိုဒ် တန်ချိန် ၁၅ သန်းထုတ်လွှတ်ခဲ့ပြီး အပူချိန်က နှစ်တွေကြာအောင် ၀.၅ ဒီဂရီဆဲလ်စီးယပ်စ်လောက် ပိုအေးသွားခဲ့ပါတယ်။

▪️ ၁၈၁၅ တုန်းက တမ်ဘိုရာတောင်နဲ့ ၁၂၅၇ တုန်းက ဆာမာလက်စ်တောင်တို့ ပေါက်ကွဲခဲ့စဉ်ကဆိုရင် အပူချိန် ၁- ၁.၅ ဒီဂရီလောက် ပိုအေးသွားခဲ့ပါတယ်။

▪️ ရာသီဥတု ဖောက်ပြန်မှုဒဏ် ခံနေရတဲ့ ကမ္ဘာကြီးမှာ နောက်ထပ် မီးတောင်ပေါက်ကွဲမှုကြီး ဖြစ်လာနိုင်ပြီး ၁၈၁၅ ခုနှစ်ကထက် ပိုမိုပြင်းထန်နိုင်တယ်လို့ နယူးယော့ခ်တက္ကသိုလ်မှ မီးတောင်နဲ့ ရာသီဥတုပရော်ဖက်ဆာ မိုက်ကယ်ရမ်ပီနိုက ပြောပါတယ်။

▪️ ရာသီဥတု ပြောင်းလဲခြင်းတွေက မီးတောင်လှုပ်ရှားမှု ဖြစ်စေပြီး ရေခဲများအရည်ပျော်လာခြင်းကြောင့် ကျောက်ရည်တွင်းတွေအပေါ် ဖိအားကျဆင်းလာကာ မီးတောင်ပေါက်ကွဲဖို့ တွန်းအားဖြစ်လာပါတယ်။

▪️ မီးတောင်ပေါက်ကွဲမှု အနီးနားက သက်ရှိတွေအတွက်တော့ ချက်ချင်းဘေးအန္တရာယ်ဖြစ်နိုင်ကာ နောက်ဆက်တွဲအကျိုးဆက်တွေက အပူချိန်ချမ်းအေးလာခြင်းနဲ့ မိုးရွာသွန်းမှု ပြောင်းလဲလာခြင်းတို့ကြောင့် စိုက်ပျိုးမွေးမြူရေးဒေသတွေ ထိခိုက်လာနိုင်ကာ ကမ္ဘာ့စားနပ်ရိက္ခာ ယိုယွင်းစေနိုင်ပါတယ်။

▪️ ဒီလိုမျိုး မီးတောင်ပေါက်ကွဲမှုကြီး ဖြစ်လာနိုင်ခြေက နည်းပေမယ့် လျစ်လျူရှုထားလို့တော့ မရဘူးလို့ စတော့ဖယ်က ပြောသွားပါတယ်။

#Source: Times of India

#Local_News
Published 3 January 2025

▪️ ရန်ကုန်မြို့ရှိအင်းစိန်မြို့နယ်၊ လှိုင်မြစ်လမ်းတွင် ယာဉ်တိုက်မှုဖြစ်ပွားပြီး လူညပ်နေ၍ ကယ်ထုတ်ခဲ့ရကြောင်းမြန်မာနိုင်ငံမီးသတ်တပ်ဖွဲ့မှ သိရသည်။

▪️ ဖြစ်စဉ်မှာဇန်နဝါရီ ၂ ရက်နေ့၊ နေ့လယ် ၂နာရီ  ၃၇ မိနစ်အချိန်ခန့်က  ရန်ကုန်တိုင်းဒေသကြီး၊ အင်းစိန်မြို့နယ်၊ ဈေးကုန်းအနောက်ရပ်ကွက်၊ လှိုင်မြစ်လမ်းတွင် ယာဉ်တိုက်မှုဖြစ်ပွားပြီး လူညပ်နေကြောင်းသိရသည်။

▪️ အဆိုပါ သတင်းရရှိသဖြင့် အင်းစိန်မြို့နယ်မီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ ဆောင်ရွက်ခဲ့ကြောင်း၊ယင်း ဖြစ်စဉ်ကြောင့် ကားခေါင်းခန်းတွင် ညပ်နေသူ ကျား(၁)ဦးအား ၂နာရီ  ၄၁မိနစ် အချိန်တွင် ကယ်ထုတ်နိုင်ခဲ့ပြီး တွဲလက်ပရဟိတအသင်းမှ သူနာတင်ယာဉ်ဖြင့် အင်းစိန်ပြည်သူ့ဆေးရုံသို့ ကူညီပို့ဆောင်ပေးခဲ့ကြောင်း သိရသည်။

#YMG/NN #Yangon_Times

#World_Health
Published 03 January 2025

▪️ ကော်ဖီလက်ဖက်ရည်တို့ သောက်လေ့ရှိသူတွေဟာ ဦးခေါင်းနဲ့ လည်ပင်းကင်ဆာ ဖြစ်နိုင်ခြေ အနည်းငယ်လျော့ကျစေတယ်လို့ သုတေသီများ တွေ့ရှိထားပါတယ်။

▪️ လေ့လာချက်အသစ်မှာ လက်ဖက်ရည်နဲ့ ကော်ဖီတို့ ကိုယ်တိုင်က ကင်ဆာကာကွယ်နိုင်တာ မဟုတ်ပေမယ့် အငြင်းပွားစရာ အဖြေတွေကိုတော့ ရှင်းပေးနိုင်မှာ ဖြစ်ပါတယ်။

▪️ သုတေသနအဖွဲ့က ဥရောပ၊ မြောက်အမေရိက၊ လက်တင်အမေရိကတို့မှာ ပြုလုပ်တဲ့ လေ့လာမှု ၁၄ ခုကနေ ဆန်းစစ်ခဲ့ကြပါတယ်။

▪️ စမ်းသပ်ပါဝင်သူများ လက်ဖက်ရည်နဲ့ ကော်ဖီ သောက်သုံးပုံတွေကို စစ်တမ်းကောက်ခံခဲ့ကြပြီး ကဖင်းမပါကော်ဖီသောက်သုံးတဲ့ သူတွေလည်း ပါဝင်ပါတယ်။
ဦးခေါင်းနဲ့ လည်ပင်းကင်ဆာဖြစ်သူ ၉၅၄၈ ဦးနဲ့ ကင်ဆာမရှိသူ ၁၅၇၈၃ ဦးတို့ရဲ့ အချက်အလက်တွေ ဆန်းစစ်ခဲ့ကြပါတယ်။

▪️ အခြားအချက်အလက်များပါ ထည့်သွင်းစဉ်းစားတဲ့အခါ တစ်နေ့ကို ကဖင်းပါတဲ့ကော်ဖီ ၄ ခွက်နဲ့အထက် သောက်သူတွေက မသောက်တဲ့သူတွေထက် ဦးခေါင်းနဲ့ လည်ပင်းကင်ဆာ ဖြစ်နိုင်ခြေ ၁၇ ရာခိုင်နှုန်း ပိုနည်းတာကို တွေ့ခဲ့ကြပါတယ်။

▪️ ဒါ့အပြင် ခံတွင်းခေါင်းနဲ့ ပါးစပ်အနောက်ဘက် လည်ချောင်းအစိတ်အပိုင်း ကင်ဆာတို့လည်း ဖြစ်နိုင်ခြေ လျော့နည်းတာနဲ့ ဆက်စပ်နေပါတယ်။

▪️ ကဖင်းမပါတဲ့ကော်ဖီ သောက်ခြင်းကတော့ ခံတွင်းခေါင်းကင်ဆာ ဖြစ်နိုင်ခြေတစ်ခုတည်းနဲ့ပဲ သက်ဆိုင်နေပါတယ်။

▪️ လက်ဖက်ရည်သောက်တဲ့ အခြေအနေကတော့ သိပ်မရှင်းလင်းဘဲ တစ်နေ့ကို တစ်ခွက်မျှ သောက်သုံးခြင်းဖြင့် ဦးခေါင်းနဲ့ လည်ပင်းကင်ဆာ ဖြစ်နိုင်ခြေ ၉ ရာခိုင်နှုန်း လျော့နည်းတာနဲ့ ဆက်စပ်နေတယ်လို့ တွေ့ရပါတယ်။

▪️ ကဖင်းဓာတ်အပြင် အခြား ဇီဝသတ္တိကြွဒြပ်ပေါင်းတွေက ကော်ဖီနဲ့ လက်ဖက်ရည်တို့မှာ ကင်ဆာဆန့်ကျင်အာနိသင် ရစေတာဖြစ်မယ်လို့ ဟန့်စ်မန်းကင်ဆာအဖွဲ့အစည်းမှ ဒေါက်တာ ယွမ်ချင်အေမီလီက ပြောသွားပါတယ်။

▪️ ဒါပေမဲ့ လက်ဖက်ရည်ကို တစ်နေ့ တစ်ခွက်ထက်ပိုသောက်ရင်တော့ အစာအိမ်အက်ဆစ် လျှံတက်ခြင်း ပိုဖြစ်လာနိုင်တယ်လို့ ဆိုပါတယ်။

▪️ ဆက်စပ်ကြည့်ရင်တော့ ကော်ဖီ လက်ဖက်ရည်တို့ သောက်တဲ့သူတွေဟာ အရက်သေစာ ဆေးလိပ်တို့ သုံးစွဲနိုင်ခြေ နည်းသွားတာကြောင့် ကင်ဆာဖြစ်နိုင်ခြေနည်းတာ ဖြစ်နိုင်တယ်လို့လည်း သုံးသပ်ထားပါတယ်။

#Source: The Guardian

အမ်မရိတ်မှ ပျားမွေးမြူသူများနဲ့ ပျားရည်လုပ်ငန်းကို ပံ့ပိုးတဲ့အနေနဲ့ နှစ်စဉ်နာမည်ကျော် ယူအေအီးပွဲတစ်ခုဖြစ်တဲ့ ၉ ကြိမ်မြောက် ဟက်တာဟန်နီပွဲတော်ကို ဒူဘိုင်းမှာ ကျင်းပခဲ့ပါတယ်။
#World_Event
Published 2 January 2025
#ပျားရည်ပွဲတော် #ပျားရည်လုပ်ငန်း
#YMG #Yangon_Times #Yangon_Media_Group

#Daily_News
Published 2 January 2025

၁။ တောင်ငူ၌ (၁၄) ကြိမ်မြောက်မျက်စိအလင်းအလှူတော်ပြုလုပ်မည်

၂။ မြန်မာနိုင်ငံ၏ခန့်မှန်းလူဦးရေ ၅၁ သန်းကျော်ရှိပြီး ရန်ကုန်တိုင်းတွင်အများဆုံးဟုဆို

၃။ တစ်နေ့လျှင် ‌ရွှေပိဿာတစ်ရာကျော်ထွက်ရှိနေပြီး ရွှေဈေးကွက်အေးနေ

၄။ (၉)ကြိမ်မြောက် ပျားရည်ပွဲတော် ဒူဘိုင်းတွင်ကျင်းပ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ပြည်တွင်းစားသောက်ကုန်‌တွေအတွက် နိုင်ငံတကာအဆင့်မီစားသောက်ကုန်ဓာတ်ခွဲခန်း‌မှာ အရည်အ‌သွေးစစ်‌ဆေးပေးလျက်ရှိရာမှာ ဂျပန်နိုင်ငံအသိအမှတ်ပြုလက်မှတ်စတင်ရရှိနေပြီဖြစ်တယ်လို့ သိရပါတယ်။
#Local_News
Published 2 January 2025
#ဂျပန်နိုင်ငံအသိအမှတ်ပြုလက်မှတ် #ပြည်တွင်းစားသောက်ကုန်
#YMG/SW #Yangon_Times

လက်ရှိ ရွှေဈေးကွက်မှာ တစ်နေ့ကို ရွှေပိဿာတစ်ရာကျော်ထွက်ရှိနေပြီး ဈေးကွက်အနေအထားမှာ အရောင်းအဝယ်အေးနေတယ်လို့ ရန်ကုန်တိုင်းဒေသကြီးရွှေလုပ်ငန်းရှင်များအသင်း (YGEA)ဥက္ကဌ ဦးမျိုးမြင့်က ရန်ကုန်မီဒီယာကို ပြောပါတယ်။
#Local_News
Published 2 January 2025
#ရွှေပိဿာတစ်ရာကျော်ထွက်ရှိ #ရွှေဈေးကွက်အေးနေ
#YMG/SW #Yangon_Times

မြန်မာနိုင်ငံရဲ့ ခန့်မှန်းလူဦးရေ(၅၁ ဒဿမ ၃) သန်းကျော်ရှိ ပြီး ရန်ကုန်တိုင်းမှာ  (၁၄ ဒဿမ ၄)ရာခိုင်နှုန်းနဲ့  အများဆုံးဖြစ်တယ်လို့ သိရပါတယ်။
#Local_News
Published 2 January 2025
#ခန့်မှန်းလူဦးရေ၅၁သန်း #ရန်ကုန်တိုင်းတွင်အများဆုံး
#YMG/NN #Yangon_Times

ပဲခူးတိုင်းဒေသကြီး၊ တောင်ငူမြို့ရှိ သီတဂူကေတုမတီအာယုဒါနဆေးရုံတော်မှာ(၁၄) ကြိမ်မြောက်မျက်စိအလင်းအလှူတော်ကို အခုလအတွင်း ပြုလုပ်သွားမယ်လို့ သိရပါတယ်။
#Local_News
Published 2 January 2025
#မျက်စိအလင်းအလှူတော် #တောင်ငူ
#YMG/NN #Yangon_Times

#World_News
Published 02 January 2025
▪️ အမေရိကန်တပ်သားဟောင်းတစ်ဦးဟာ ISISအလံ ချိတ်ဆွဲထားတဲ့ သူ့ထရပ်ကားဖြင့် နှစ်သစ်ကူးနေ့က ယာယီအတားအဆီးများကို ကွေ့ပတ်မောင်းနှင်ပြီး နယူးအော်လင်းစ်ရှိ လူစည်ကားရာ ပြင်သစ်ရပ်ကွက်ထဲသို့ ဝင်တိုက်ခဲ့တာကြောင့် ၁၅ ဦးသေဆုံးခဲ့ကာ ဒါဟာ တခြားသူတွေရဲ့ အကူအညီနဲ့ ဆောင်ရွက်တာ ဖြစ်နိုင်တယ်လို့ အရာရှိများ ပြောပါတယ်။

▪️ တရားခံဟာ အသက် ၄၂ နှစ်အရွယ် ရှမ်ဆွတ်ဒင်ဂျက်ဘာလို့ အမည်ရပြီး တက္ကဆပ်စ်မှ အမေရိကန်နိုင်ငံသားဖြစ်ကာ အာဖဂန်နစ္စတန်မှာ တာဝန်ထမ်းဆောင်ခဲ့ဖူးပြီး ယခု လူအုပ်ထဲဝင်တိုက်ခဲ့ပြီးနောက် ရဲတွေနဲ့ ပစ်ခတ်ရာမှာ သေဆုံးသွားခဲ့ပါတယ်။

▪️ တရားခံနဲ့ ပစ်ခတ်ရင်း ဒဏ်ရာရခဲ့တဲ့ ရဲအရာရှိ ၂ ဦးအပါအဝင် လူ ၃၀ခန့် ဒဏ်ရာရရှိခဲ့ပါတယ်။

▪️ နှစ်သစ်ကူးကာလ နံနက် ၃ နာရီ ၁၅ မိနစ်ခန့်မှာ လူအများကြီး ပျော်ရွှင်နေကြတဲ့ သမိုင်းဝင်ဧည့်ခရီးသွားနေရာ ကန်နယ်လ်နဲ့ ဘော်ဘွန်လမ်းထောင့်အနီးမှာ ဖြစ်ပွားခဲ့တာ ဖြစ်ပါတယ်။

▪️ ရဲတွေနဲ့ နိုင်ငံရေးခေါင်းဆောင်တွေက ကြံရာပါတွေကို ဖမ်းဆီးသွားမယ်လို့ ကြုံးဝါးလိုက်ပါတယ်။

▪️ ကားပေါ်မှာ ပေါက်ကွဲရေးပစ္စည်းတစ်ခုနဲ့ လက်နက်တွေ တွေ့ရှိခဲ့ပြီး ပြင်သစ်ရပ်ကွက်မှာ ပေါက်ကွဲစေနိုင်တဲ့ပစ္စည်း ၂ခု တွေ့ရှိခဲ့ကာ ယခုဘေးကင်းပြီလို့ FBIက ဆိုပါတယ်။

▪️ နယူးအော်လင်းစ်မှာ နှစ်သစ်ကူးနေ့ရောက်ရင် နှစ်စဉ်ကျင်းပမြဲဖြစ်တဲ့ Sugar Bowl ကောလိပ်ဘောလုံးပွဲကို ရွှေ့ဆိုင်းထားပြီး မြို့ထဲတဝိုက် ပေါက်ကွဲစေနိုင်မယ့် ပစ္စည်းတွေကို ရဲတွေရှာဖွေနေကြပါတယ်။

▪️ ယာဉ်ရဲ့နောက်တွဲတစ်နေရာမှာ ISISအလံ ချည်ထားတာကြောင့် အကြမ်းဖက် အဖွဲ့အစည်းတွေနဲ့ ဆက်စပ်နေမလားဆိုတာကို စုံစမ်းနေကြတယ်လို့ FBIက ပြောပါတယ်။

▪️ ဂျက်ဘာတစ်ဦးတည်း ပြုလုပ်တယ်လို့ မယုံကြည်ကြောင်း၊ သူနဲ့ လုပ်ဖော်ကိုင်ဖက်တွေ အပါအဝင် သတင်းလမ်းစတိုင်းကို အားချင်းစုံစမ်းနေကြကြောင်း၊ သံသယရှိသူ အများအပြားကို ရှာဖွေနေကြကြောင်း FBI လက်ထောက် အထူးအေးဂျင့် အယ်လက်သီယာဒွန်ကန်က သတင်းထောက်တွေကို ပြောသွားပါတယ်။

▪️ လက်ရှိသမ္မတဂျိုးဘိုင်ဒင်က ယခုတိုက်ခိုက်မှုကို ရှုတ်ချလိုက်ကာ တရားခံဖြစ်သူ ISISကို ဝင်ရောက်ချင်တဲ့အကြောင်း ဗီဒီယိုရိုက်ကူးထားတာကို စစ်ဆေးတွေ့ရှိတယ်လို့ CNNက ဖော်ပြထားပါတယ်။

▪️ ဂျက်ဘာဟာ ၂၀၀၇ မတ်လမှ ၂၀၁၅ ဇန်နဝါရီအထိ အမေရိကန်တပ်မှာ တာဝန်ထမ်းဆောင်ခဲ့ပြီး ၂၀၁၅ ဇန်နဝါရီကနေ ၂၀၂၀ ဇူလိုင်အထိ အရန်တပ်မှာ ပါဝင်ခဲ့သလို အာဖဂန်နစ္စတန်မှာလည်း သွားရောက်တာဝန်ထမ်းဆောင်ဖူးပါတယ်။

#Source: Reuters

#Local_News
Published 2 January 2025

▪️ ပြည်ပရောက်မြန်မာနိုင်ငံသားများပါ အကျုံးဝင်သည့် ဆိုက်ဘာလုံခြုံရေးဥပဒေကို ဇန်နဝါရီလ ၁ ရက်က ပြဋ္ဌာန်းထုတ်ပြန်လိုက်ပြီဖြစ်သည်။

▪️ ထိုဥပဒေသည် ပြည်တွင်း၌ဖြစ်စေ နိုင်ငံတော်၏ တည်ဆဲဥပဒေ တစ်ရပ်ရပ်အရ မှတ်ပုံတင်ထားသည့် ရေယာဉ် သို့မဟုတ် လေယာဉ်တစ်ခုခုပေါ်၌ဖြစ်စေ ကျူးလွန်သည့် ပြစ်မှုများ အမျိုးသား ဆိုက်ဘာနယ်ပယ်အတွင်း၌ ဖြစ်စေ အမျိုးသားဆိုက်ဘာနယ်ပယ်နှင့်ချိတ်ဆက်နေသည့် အခြားဆိုက်ဘာနယ်ပယ်တစ်ခုခု၌ဖြစ်စေ ကျူးလွန်သည့် ပြစ်မှုများ၊ ပြည်ပရောက် မြန်မာနိုင်ငံသားက ကျူးလွန်ပါကလည်း ယခုဥပဒေအရ စီရင်ပိုင်ခွင့် ရှိစေရမည်ဟု ပြဋ္ဌာန်း ထားသည်။

▪️ ဆိုက်ဘာလုံခြုံရေးဥပဒေတွင်ခွင့်ပြုချက်ရယူခြင်းမရှိဘဲ VPN ထူထောင်ခြင်းနှင့် အွန်လိုင်းလောင်းကစားစနစ် တည်ဆောက်ခြင်း၊ ဆိုက်ဘာအလွဲ သုံးစားပြုလုပ်ခြင်းများ ပြုလုပ်ပါက ထောင်ဒဏ်အပါအဝင် ငွေဒဏ်ချမှတ်နိုင်သည့် ပြစ်မှုပြစ်ဒဏ်များပါဝင်ပြီး အီလက်ထရောနစ် နည်းပညာအသုံးပြုပြီး ဆိုက်ဘာတိုက်ခိုက်ခြင်းကြောင့် နိုင်ငံအချုပ်အခြာအာဏာနှင့် တည်ငြိမ်အေးချမ်းရေးကို ထိခိုက်စေခြင်းတို့မှ ကာကွယ်ရန်၊ ဆိုက်ဘာမှုခင်းများကို ထိထိရောက်ရောက် စုံစမ်းဖော်ထုတ် အရေးယူနိုင်ရန်အတွက် ပြဌာန်းခြင်းဖြစ်ကြောင်း သိရသည်။

▪️ ဥပဒေပါပြစ်မှု၊ ပြစ်ဒဏ်များမှာ နိုင်ငံ့ဝန်ထမ်းမဟုတ်သည့် အရေးကြီးသတင်းအချက်အလက် အခြေခံအဆောက်အအုံ စီမံထိန်းသိမ်းရန် တာဝန်ရှိသူသည် ဥပဒေပုဒ်မ ၁၇ ၊ ပုဒ်မခွဲ (က) သို့မဟုတ် (ခ) ကို လိုက်နာဆောင်ရွက်ရန်ပျက်ကွက်ပါက အနည်ဆုံးတစ်လမှ အများဆုံးခြောက်လထိ ထောင်ဒဏ်၊ ကျပ် ၁၀ သိန်းမှ ကျပ်သိန်း တစ်ရာထက် မပိုသည့် ငွေဒဏ်၊ ဒဏ်နှစ်ရပ်လုံး ချမှတ်ရမည်ဖြစ်ကြောင်း၊ ဆိုက်ဘာလုံခြုံရေးဆိုင်ရာ ဝန်ဆောင်မှုလုပ်ငန်း လိုင်စင်မရှိဘဲ ဆောင်ရွက်ပါက ထိုသူကို အနည်ဆုံးတစ်လမှ အများဆုံးခြောက်လထိ ထောင်ဒဏ်၊ ကျပ် ၁၀ သိန်းမှ ကျပ်သိန်းတစ်ရာထက် မပိုသည်ဘဲငွေဒဏ်၊ ဒဏ်နှစ်ရပ်လုံး ချမှတ်ရမည့်အပြင် အမှုနှင့်သက်ဆိုင်သည့် သက်သေခံပစ္စည်းများကို နိုင်ငံ့ဘဏ္ဍာအဖြစ် သိမ်းဆည်းရမည် ဖြစ်ပြီး ပြစ်မှုကျူးလွန်သူသည် ကုမ္ပဏီ သို့မဟုတ် အဖွဲ့အစည်းဖြစ်ပါက ကျပ်သိန်းတစ်ရာအောက် မနည်းဘဲ ငွေဒဏ်ချမှတ်ရမည့်အပြင် အမှုနှင့်သက်ဆိုင်သည့်သက်သေခံပစ္စည်းများကို နိုင်ငံ့ဘဏ္ဍာအဖြစ် သိမ်းဆည်းရမည်ဖြစ်ကြောင်း ပြဋ္ဌာန်းပါရှိသည်။

▪️ ဥပဒေပါ ရည်ရွယ်ချက်များကို အကောင်အထည်ဖော်နိုင်ရန်အတွက် ပြည်ထောင်စုအစိုးရအဖွဲ့အနေဖြင့်ဥက္ကဋ္ဌအဖြစ် ဒုတိယသမ္မတတစ်ဦး၊ ဒုတိယဥက္ကဋ္ဌအဖြစ် ဝန်ကြီးဌာန၏ပြည်ထောင်စုဝန်ကြီး၊ အဖွဲ့ဝင်များအဖြစ် ဆက်စပ်ဝန် ကြီးဌာနများမှ ပြည်ထောင်စုဝန်ကြီးများနှင့် ဆက်စပ်ပြည်ထောင်စုအဆင့် အဖွဲ့အစည်းများမှ ဥက္ကဋ္ဌများပါဝင်စေပြီး ဆိုက်ဘာလုံခြုံရေးဆိုင်ရာ ဗဟိုကော်မတီကို ဖွဲ့စည်းရမည်ဟု ထည့်သွင်းပြဋ္ဌာန်းထားသည်။

#YMG/SW #Yangon_Times