#LocalNews
Published - 19 March 2022

မေလအတွင်း ဖွင့်လှစ်မယ့်ဆိုတဲ့ အဝေးသင်တက္ကသိုလ် အနီးကပ်သင်တန်းတချို့ကို ခေတ္တရက်ရွေ့ဆိုင်းလိုက်တယ်လို့ အဆင့်မြင့်ပညာဦးစီးဌာနက ပြန်လည်ကြေညာလိုက်ပါတယ်။

မေလ ၁၂ နေ့မှာ ၂၀၂၂ ခုနှစ် ပညာသင်နှစ် ဝိဇ္ဇာ/ သိပ္ပံ တက္ကသိုလ်များ၊ ဒီဂရီကောလိပ်များ ကော်လိပ်တွေရဲ့ ဘာသာရပ်အားလုံးကို ပြန်ဖွင့်လှစ်မယ်လို့ ကြေညာထားပါတယ်။

ယခုအခါ အဝေးသင်တက္ကသိုလ် ဝိဇ္ဇာအထူးပြု နောက်ဆုံးနှစ် ဒုတိယသုတ်နဲ့ တတိယသုတ်တို့ရဲ့ အနီးကပ်သင်တန်းတွေကို ခေတ္တရက်ရွှေ့ဆိုင်းလိုက်တာဖြစ်ပါတယ်။

ဒါ့အပြင် အဝေးသင်တက္ကသိုလ်သင်တန်းအသီးသီးအတွက် စာစဉ်ပို့ချဆွေးနွေးမှုတွေနဲ့ အသံလွှင့်ပို့ချချက်တွေကို ဆောင်ရွက်ပေးသွားမှာဖြစ်ပြီး အနီးသင်တန်းအချိန်စာရင်းကို အချိန်မီအသိပေး ကြေညာသွားမယ်လို့ ထုတ်ပြန်ထားပါတယ်။

ymg/ei
#Yangon_Media_Group

#LocalNews
Published_19 April 2022

သီလဝါ ဆီသိုလှောင်စခန်းများအပါအဝင် ပြည်တွင်းဆီလက်ကျန်များမှာ ဓာတ်ဆီ ဂါလံ ၄၅ သန်း ၊ ဒီဇယ်ဂါလန် သန်း ၇၀ ခန့် ရှိနေ၍ လောင်စာဆီလုံး၀ မပြတ်လပ်ကြောင်း လျှပ်စစ်နှင့် စွမ်းအင်ဝန်ကြီးဌာနက ထုတ်ပြန်လိုက်သည်။

လူမှုကွန်ရက်၌ "သီလဝါဆီသိုလှောင်ကန်စခန်းများအတွင်း စက်သုံးဆီများ လက်ကျန်လျော့နည်းနေသည်"ဆိုသည်မှာလည်း ကောလဟလသတင်းမှားများသာဖြစ်ပြီး လက်ရှိ ဆိပ်ကမ်းတွင် တန်နှစ်သောင်းဆံ့ ဆီသင်္ဘောနှစ်စီး ရောက်ရှိနေကြောင်း ၊ထို့ကြောင့် လောင်စာဆီ လုံး၀ ပြတ်လပ်မှုမဖြစ်ပေါ်နိုင်ကြောင်း ယင်းထုတ်ပြန်ချက်တွင် ပါရှိသည်။

ထို့အပြင် မြန်မာနိုင်ငံသို့ ဆီဆင်သွင်းသည့် လုပ်ငန်းစဉ်မှာ လူမှုကွန်ရက်တွင်ရေးသားနေကြသည့် တရုတ်ပြည် ၊ သီရိလင်္ကာကတစ်ဆင့် ကြားခံပြီး တင်သွင်းနေရသည်ဆိုခြင်းမှာ မဟုတ်ဘဲ စင်ကာပူနိုင်ငံ၊မလေးရှားနိုင်ငံ နှင့် ကိုရီးယားနိုင်ငံတွေက အဓိကတင်သွင်းနေခြင်းဖြစ်ကြောင်းနှင့် ဌာနခွင့်ပြုချက်တောင်းခံ၍ ပြင်ဆင်နေသည့် စက်သုံးဆီဆိုင်များကလွဲ၍ ပိတ်ထားရသည့် စက်သုံးဆီဆိုင်များလည်း မရှိကြောင်း ယင်းထုတ်ပြန်ချက်တွင် ဖော်ပြ ထားသည်။

ymg/mt
#Yangon_Media_Group

#LocalNews
Published - 19 April 2022

စက်သုံးဆီများအား အကန့်အသတ်မရှိ ရောင်းချ ပေးသွားမည်ဟု ပြည်တွင်းရှိ စက်သုံးဆီ ရောင်းချသည့် ကုမ္ပဏီကြီး (၃)ခု က ယနေ့ ဧပြီ ၁၉ ရက်မှာ ထုတ်ပြန်ကြေညာလိုက်ပါတယ်။

ယနေ့ ဧပြီ ၁၉ ရက်၊ နံနက်ပိုင်းမှစတင်လို့ စက်သုံးဆီများ ပြတ်လပ် နေသည်ဟု ဆို သော လူမှုကွန်ရက်သတင်းများ ကြောင့် နိုင်ငံတစ်ဝှမ်းတွင် စက်သုံးဆီဂယက်
အတော်လေးရိုက်ခတ်ခဲ့ပြီး နောက် ဒီကနေ့ မွန်းလွဲပိုင်း အချိန်မှာတော့ စက်သုံးဆီ ရောင်းချသည့် ကုမ္ပဏီကြီးများက စက်သုံးဆီများအား အကန့်အသတ်မရှိ ရောင်းချပေးသွားမည်ဆိုသည့် ထုတ်ပြန်ကြေညာချက်များကို ထုတ်ပြန်လာခဲ့ကြတာလည်းဖြစ်ပါတယ်။

ရွှေဗျိုင်းဖြူ စက်သုံးဆီအရောင်းဆိုင်အားလုံးတွင် စက်သုံးဆီများအား အကန့်အသတ်မရှိ ရောင်းချပေးနေကြောင်း ရွှေဗျိုင်းဖြူကုမ္ပဏီလီမိတက်က ဒီကနေ့ နေ့လည်ပိုင်း အချိန်မှာ ထုတ်ပြန်ကြေညာခဲ့သလို စက်သုံးဆီ ရောင်းချသည့် ကုမ္ပဏီကြီးတစ်ခုဖြစ်သည့် Best Oil Company (BOC) ကုမ္ပဏီကလည်း မကြာမီ အချိန်အတွင်းမှာ လိုအပ်သော စက်သုံးဆီများကို BOC ဆီဆိုင်များတွင် အကန့်အသတ်မရှိ ရောင်းချပေးမည်ဖြစ်ကြောင်း ထုတ်ပြန် ကြေညာခဲ့တာပါ။

ဒါ့အပြင် Denko ဆီဆိုင်များတွင် စက်သုံးဆီများကို ပုံမှန်အတိုင်း အကန့်အသတ်မရှိ ရောင်းချပေးနေပြီ ဖြစ်တယ်လို့ လည်း အဆိုပါ Denko ကုမ္ပဏီ ဒီကနေ့ နေ့လည်ပိုင်းမှာ Customer များသို့ အသိပေးကြေညာချက်များကို အသီးသီး ထုတ်ပြန်ခဲ့ကြတာပါ။

ဒီကနေ့ ဧပြီ ၁၉ ရက်၊ နံနက်မှစတင်၍ စက်သုံးဆီများ ပြတ်လပ်နေသည်ဟု ဆိုသည့် လူမှုကွန်ရက်သတင်းများ ကြောင့် ဆီဆိုင်များတွင် ကားတန်းများဖြင့် ပြည့်နှက် နေခဲ့ပြီး အချို့ သော စက်သုံးဆီအရောင်းဆိုင်များက ကိုယ်တာ စနစ်ဖြင့် ကားတစ်စီးလျှင် ၂၀၀၀၀ ၊ ၃၀၀၀၀ နှင့် ၅၀၀၀၀ ဖိုးသာ ရောင်းချ ပေးမှုတွေ ရှိခဲ့တာပါ။

ymg/kg
#Yangon_Media_Group

#LocalNews
Published_19 April 2022

စက်သုံးဆီဆိုင်အချို့တွင် ယနေ့ ဧပြီလ ၁၉ ရက် နံနက်က စ၍ ကန့်သတ်ချက်ဖြင့် စတင်ရောင်းချနေသည် ဆိုခြင်းမှာ ဆီပြတ်လပ်နေသောကြောင့် မဟုတ်ကြောင်း သိရသည်။

ရန်ကုန်တိုင်းဒေသကြီးအပြင် မြန်မာနိုင်ငံရှိ မြို့ကြီးအချို့ ၌ စက်သုံးဆီကို ကားအမျိုးအစားအလိုက် ကန့်သတ်ပမာဏ ဖြင့် ရောင်းချပေးနေသည့်အတွက် အချို့က စိုးရိမ်မှုများ ရှိခဲ့ကြကြောင်းလည်း သိရသည်။

"ဆီလုပ်ငန်းရှင်တွေ အချို့ ဆီပြတ်လပ်မှုမရှိရအောင် လုပ်နေတယ်။ဆီလုပ်ငန်းရှင်တွေ စက်သုံးဆီ တင်သွင်းနိုင်ဖို့ကို ဗဟိုဘဏ်အနေနဲ့က ဈေးပြိုင်လေလံနဲ့ ဒေါ်လာရောင်းပေးဖို့ လုပ်နေတယ်။အခုလည်း နိုင်ငံတွင်း အရန်ဆီ ရှိတယ်။လက်ရှိ တင်သွင်းလာနေဆဲ စက်သုံးဆီလည်း ရှိသလို မြန်မာနိုင်ငံက တချို့ ဆီလုပ်ငန်းရှင်တွေဆိုရင် စင်ကာပူနိုင်ငံထိသွားပြီးတော့ ငွေပေးချေတာတွေ လုပ်နေကြတယ်"ဟု ဆီလုပ်ငန်းရှင်တစ်ဦးက ပြောသည်။

ယနေ့ ဧပြီလ ၁၉ ရက်တွင် ရန်ကုန်မြို့အတွင်း စက်သုံးဆီအရောင်းဆိုင်အချို့ အနေဖြင့် မော်တော်ယာဉ်များကို အနည်းဆုံး ကျပ် ၂ သောင်းမှ အများဆုံး ကျပ် ၅ သောင်းဖိုးသာ ရောင်းပေးကြောင်း၊ကုန်တင်ယာဉ်ကြီးများကို ငွေကျပ် နှစ်သိန်းထိုးထိ ရောင်းပေးကြောင်းလည်း ယာဉ်အသုံးပြုသူများက ပြောသည်။

"ဒီနေ့ Max ဆီဆိုင်မှာ ‌95 သွားထည့်တာ၊မရှိလို့ ကုန်နေပြီ ဆိုလို့ 92ထည့်ခဲ့ရတယ်။ကျွန်တော်တို့ ငယ်ငယ်တုန်းကလို ဆီကို စာအုပ်လေးနဲ့တန်းစီထုတ်ရတဲ့ ခေတ်ကို ပြန်ရောက်သွားသလိုပဲ ခံစားရတယ်။ဆီဆိုင်တချို့ ဆိုရင် ဆီကားမလာလို့ ပိတ်ထားတဲ့ အကြောင်းရေးပြီးတော့ ဆီဆိုင်မှာ ဆိုင်းဘုတ်ထောင်ထားကြတာ ရှိတယ်။ဒီနေ့ ကားတွေ တန်းစီပြီး ဆီတွေ ဝယ်ယူကြတာတော့ တွေ့ရတယ်"ဟု စက်သုံးဆီ သွားဖြည့်သူတစ်ဦးကပြောသည်။

ymg/mt
#Yangon_Media_Group

#LocalNews
Published - 19 April 2022

ရွှေဗျိုင်းဖြူ စက်သုံးဆီအရောင်းဆိုင်အားလုံးတွင် စက်သုံးဆီများအား အကန့်အသတ်မရှိ ရောင်းချပေးနေကြောင်း ရွှေဗျိုင်းဖြူကုမ္ပဏီလီမိတက်က ဒီကနေ့ဧပြီ ၁၉ ရက်၊ နေ့လည်ပိုင်း အချိန်မှာ ကြေညာချက်တစ်စောင်ကို ထုတ်ပြန်လိုက်ပါတယ်။

အဆိုပါ ထုတ်ပြန်ချက်တွင် ရွှေဗျိုင်းဖြူစက်သုံးဆီအရောင်းဆိုင်အားလုံးတွင် စက်သုံးဆီအားလုံးအား အကန့်အသတ်မရှိ ရောင်းချပေးနေကြောင်း၊ စားသုံးသူမိဘပြည်သူများအား အထင်အမြင်လွဲမှားစေရန် လူမှုကွန်ယက်စာမျက်နှာများတွင် ရွှေဗျိုင်းဖြူ စက်သုံးဆီအရောင်းဆိုင်များ ခေတ္တပိတ်ထားမည်ဆိုသည်မှာ မဟုတ်မမှန်ရေးသားနေမှုများသာဖြစ်ကြောင်း ယနေ့ထုတ်ပြန်ချက်တွင် ဖော်ပြထားပါတယ်။

"ကျွန်တော်များ ရွှေဗျိုင်းဖြူ ကုမ္ပဏီလီမိတက်သည် အရောင်းဆိုင်ခွဲအချို့တွင် စက်သုံးဆီကန်သန့်ရှင်းရေးနှင့် ဆိုင်ပြင်ဆင်ခြင်းများ ဆောင်ရွက်ရန်ရှိနေသော ဆိုင်ခွဲများမှာ နယ်ဆိုင်ခွဲအချို့သာဖြစ်၍ ကျန်ရှိသော စက်သုံးဆီအရောင်းဆိုင်အားလုံးသည် ပုံမှန်အတိုင်းဝန်ဆောင်မှုများပေးနေပါတယ်။"လို့ လက်ရှိဖြစ်ပေါ်နေသော အခြေအနေနှင့်ပတ်သက်၍ ဖြစ်စဥ်အမှန်ကို အများပြည်သူထံသို့ အသိပေးခြင်းဟုဆိုကာ ရွှေဗျိုင်းဖြူကုမ္ပဏီလီမိတက်က အသိပေးကြေညာချက်တစ် စောင်ကို ထုတ်ပြန်ခဲ့တာပါ။

ထို့အပြင် ရွှေဗျိုင်းဖြူအား အစဥ်တဆက်အားပေးလာသော (Customer)များနှင့် စားသုံးသူမိဘပြည်သူများအား စိုးရိမ်ထိတ်လန့်မှုများ ဖြစ်ပေါ်စေခဲ့သည့်အတွက် ရွှေဗျိုင်းဖြူကုမ္ပဏီလီမိတတ်မှ အနူးညွန့်တောင်းပန်အပ်ကြောင်းကိုလည်း အဆိုပါကုမ္ပဏီ၏ ထုတ်ပြန်ချက်မှာ ဖော်ပြခဲ့ပါတယ်။

ယနေ့ ဧပြီ ၁၉ ရက်၊ နံနက်မှစတင်၍ စက်သုံးဆီများပြတ်လပ်နေသည်ဟုဆိုသည့် လူမှုကွန်ရက်သတင်းများကြောင့် ဆီဆိုင်များတွင် ကားတန်းများဖြင့် ပြည့်နှက်နေခဲ့ပြီး အချို့သော စက်သုံးဆီအရောင်းဆိုင်များက ကိုယ်တာစနစ်ဖြင့် ကားတစ်စီးလျှင် ၂၀,၀၀၀ ၊ ၃၀,၀၀၀ နှင့် ၅၀,၀၀၀ ဖိုးသာ ရောင်းချပေးမှုဖြစ်စဥ်တွေ ရှိခဲ့တာပါ။

ဒါ့အပြင် ရန်ကုန်မြို့ရှိ ဆီဆိုင်များတွင် ကားများစီတန်း၍ ဆီအလုအယက်ဝယ်ယူနေသော ဓါတ်ပုံများသည်လည်း ဖေ့ဘုတ်လူမှုကွန်ရက်ပေါ်မှာ ယနေ့ မနက်ပိုင်းမှစလို့ ပျံ့နှံ့နေခဲ့တာဖြစ်ပါတယ်။

Photo - ရွှေဗျိုင်းဖြူ/ CJ

ymg/kg
#Yangon_Media_Group

#LocalNews
Published_19 April 2022

ရခိုင်ပြည်နယ်တွင် ပထမဆုံးအကြိမ်ကျင်းပသော လေးမြို့မြစ်သင်္ကြန်ပွဲတော်အတွင်းတိုင်းရင်းသားမျိုးနွယ်စုများက ရိုးရာအကများဖြင့်ဖျော်ဖြေကြကြောင်း သိရသည်။

သင်္ကြန်မဏ္ဍပ်ကို ဧပြီလ ၁၇ ရက်တွင် ဖွင့်လှစ်ခဲ့ခြင်းဖြစ်ပြီး ဒိုင်းနက်ခေါ် ချက္ကမာလူမျိုးတို့မှ ရိုးရာ အကများ ၊ ချင်းလူမျိုးတို့၏ ရိုးရာဝါးညှပ်အကတို့ဖြင့် ကပြဖျော်ဖြေခဲ့ကြခြင်းဖြစ်ကြောင်း သိရသည်။

လေးမြို့မြစ်အတွင်းရှိ ပေါ်ကျွန်းတစ်ခုပေါ်တွင် ပြုလုပ်သည့် ယင်းသင်္ကြန်ပွဲတော်ကို ဧပြီလ ၁၇ ရက်မှ ယနေ့ ဧပြီလ ၁၉ ရက်ထိ ကျင်းပခဲ့ရာ အနယ်နယ်အရပ်ရပ်မှ လူပေါင်းသောင်းနှင့်ချီလာ ရောက်ခဲ့ကြကြောင်း သိရသည်။

အဆိုပါ ဒေသမှာ AA ထိန်းချုပ်နယ်မြေ ဖြစ်ကြောင်း၊ ဧပြီလ ၁၃ ရက်မှ ၁၇ ရက်ထိ ကျောက်တော်မြို့နယ်၊ ဇီးချောင်းဆည်တွင်လည်း သင်္ကြန်ပွဲတော်ကို ၅ ရက်တိုင်တိုင် စည်ကားသိုက်မြိုက်စွာကျင်းပခဲ့ရာ လူပေါင်းသိန်းချီ ပါဝင်ဆင်နွဲခဲ့ကြကြောင်း သိရသည်။

ရခိုင်ပြည်နယ်တွင် ဒေသတွင်း မငြိမ်မသက်မှုများ၊ကိုဗစ်ကပ်ဘေးများကြောင့် သင်္ကြန်ပွဲတော်ကို စည်စည်ကားကား မပြုလုပ်ခဲ့ရသည်မှာ ၃-နှစ်ကြာမြင့်ခဲ့ပြီ ဖြစ်သည်။

ymg/mt
#Yangon_Media_Group

#DailyNews
Published -18 April 2022

၁။ ပုဂံရှေးဟောင်းယဉ်ကျေးမှုနယ်မြေတွင် စေတီပုထိုးအချို့တံခါးနှင့်သော့များ ဖျက်ဆီးခံရ

၂။ မြို့တွင်းမြို့နယ်များတွင် ညလုံးပေါက်လျှပ်စစ်မီးရရှိရန် လုပ်ဆောင်

၃။ မိုးလေဝသ သတင်း

၄။ တရုတ်နိုင်ငံမှ ဧရာမ နဂါးစက်ရုပ်ကြီး ပြင်သစ်နိုင်ငံတူးလုစ်မြို့တွင် သရုပ်ဖော်ပြသ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 19 April 2022

မန္တလေးတိုင်းနှင့် စစ်ကိုင်းတိုင်းအတွင်းရှိ မြို့နယ်အချို့တွင် လေပြင်းတိုက်ခတ်မှုများဖြစ်ပေါ်ခဲ့ခြင်းကြောင့် သစ်ပင်ကြီးများပြိုလဲပြီး လူနေအိမ်အချို့နှင့် လူမှုရေးအသင်းကား လူနာတင်ယာဥ်အချို့ ပျက်စီးဆုံးရှုံးခဲ့တယ်လို့ သိရပါတယ်။

ဖြစ်စဥ်မှာ ဒီကနေ့ ဧပြီ ၁၉ ရက်တွင် စစ်ကိုင်းမြို့၊ပိုးတန်းရပ်ကွက်တွင် စိန်ပန်းပင် (၁)ပင်၊ မန်ကျည်းပင် (၁)ပင်၊ နန္ဒဝန်ရပ်ကွက်ရှိ တာရိုးကြီးလမ်းတွင် သရက်ပင်(၁)ပင်၊ ဧမြဝတီရပ်ကွက် ကြေးဘုရားအနီးတွင် ကုက္ကိုပင်(၁)ပင်၊ သောတပန်ရပ်ကွက် ဝေဇယန္တာလမ်းတွင် မန်ကျည်းပင် (၁)ပင်၊ စိန်ကုန်းရပ်ကွက် ဦးဗိုလ်သန်းလမ်းတွင် မန်ကျည်းပင်(၁)ပင်၊ ထုံးဘိုရပ်ကွက်
သဲဆိပ်ဆင်းလမ်းတွင် သကြားပင် (၁)ပင်တို့ လေပြင်းတိုက်ခိုက်မှုကြောင့် ပြိုလဲခဲ့ပြီး လူနေအိမ်အချို့လည်း ထိခိုက်ပျက်စီးခဲ့တာပါ။

ဒါ့အပြင် မြင်းမူမြို့နယ်၊ အထက(၁)ကျောင်းရှေ့တွင် သစ်ပင်လဲကျပြီး ဓာတ်တိုင်ကျိုးသည့် နေရာများနှင့် မုံရွာမြို့နယ်၊ ထန်းတောရပ်ကွက်၊ နယ်မြေ(၁၅)၊ နန်းချယ်ရီလမ်းတွင် ညောင်ကိုင်းကျိုးကျမှုတို့ ဖြစ်ပေါ်ခဲ့ခြင်းကြောင့် နယ်မြေခံ မီးသတ်တပ်ဖွဲ့ဝင်များနှင့် ဒေသခံလူမှုကူညီရေးအဖွဲ့တို့က ပူးပေါင်းပြီး ရှင်းလင်းရေးလုပ်ငန်းများကို ဆောင်ရွက်ပေးခဲ့ရတာဖြစ်ပါတယ်။

"မုံရွာမှာဆိုရင် ကျေက္ကာလမ်းပေါ့ အဲ့ဒီလမ်းမကြီးပေါ်မှာ သစ်ပင်တွေကျိုးကျနေတယ်လို့သတင်းရလို့ မုံရွာခရိုင်မီးသတ်တပ်ဖွဲ့နဲ့အတူ ရှင်းလင်း‌ရေးလုပ်ငန်းများကို ကူညီဆောင်ရွက်ပေးခဲ့ရပါတယ်။"လို့ မုံရွာမြို့ အခြေစိုက် လူမှုကယ်ဆယ်ရေးအဖွဲ့မှ တာဝန်ရှိသူတစ်ဦးက ပြောပါတယ်။

အလားတူ ဧပြီ ၁၈ ရက် နေ့က မန္တလေးတိုင်းဒေသကြီးအတွင်း မိုးရွာသွန်းပြီး လေပြင်းတိုက်ခတ်မှုကြောင့် မန္တလေးခရိုင်အတွင်းရှိ အောင်မြေသာစံမြို့နယ်၊ ချမ်းအေးသာစံမြို့နယ်၊ မဟာအောင်မြေမြို့နယ်၊ ချမ်းမြသာစည်မြို့နယ်၊ ပြည်ကြီးတံခွန်မြို့နယ်၊ အမရပူရမြို့နယ်နှင့် ပုသိမ်ကြီးမြို့နယ်တို့တွင် လူနေအိမ်များပေါ်သို့ သစ်ပင်များလဲကျခြင်း၊ ဓါတ်တိုင်များ လဲကျခြင်းနှင့် လမ်းပိတ်ဆို့မှုများလည်း ဖြစ်ပေါ်ခဲ့တယ်လို့ သိရပါတယ်။

ဒါ့ကြောင့် မန္တလေးမြို့အခြေစိုက် သန္ဓေမီးသတ်တပ်ဖွဲ့ဝင်(၉၀)ဦးနှင့် အရန်မီးသတ်တပ်ဖွဲ့ဝင်(၁၆၀)ဦး တို့ဖြင့် ရှင်းလင်းရေးလုပ်ငန်းများအား ကူညီဆောင်ရွက်ပေးခဲ့ရတယ်လို့လည်း မီးသတ်တပ်ဖွဲ့က သတင်းထုတ်ပြန်ခဲ့ပါတယ်။

အဆိုပါ မိုးရွာသွန်းမှုနှင့် လေပြင်းတိုက်ခတ်မှုများကြောင့် ဒေသခံလူမှုကူညီရေးအသင်းဖြစ်တဲ့ သာသနာ့ပါလမှ အသင်းမှ လူနာတင်ယာဥ်အချို့ပေါ်သို့ သစ်ပင်ကြီးများလဲကျပြီး ပျက်စီးဆုံးရှုံးမှု တွေလည်း ဖြစ်ပေါ်ခဲ့တယ်လို့ သိရပါတယ်။

Photo - MFSD

ymg/kg
#Yangon_Media_Group

#LocalNews
Published_19 April 2022

ပုဂံရှေးဟောင်းယဉ်ကျေးမှုနယ်မြေရှိ ဘုရားအမှတ် ၄၁၈ နှင့် ၇၁၆ ရှိ ကျောက်ဆစ်လက်ရာများကို ဧပြီလ ၁၇ ရက်တွင် အခိုးခံရကြောင်း သိရသည်။

ဘုရားအမှတ် ၄၁၈ မှ ဦးခေါင်းသုံးလုံးဗြမ္ဗာရုပ် နှင့် ဘုရားအမှတ် ၇၁၆ တွင် ရှိသမျှ အားလုံးကို ဖြုတ်ခိုးသွားခြင်း ဖြစ်ကြောင်း၊ ယင်းသို့ အခိုးခံရခြင်းမှာ တံခါးတပ်ထားခြင်း၊တစ်စုံတစ်ရာ အကွယ်အကာများ မလုပ်ထားခြင်းတို့ကြောင့်ဖြစ်ကြောင်းလည်း ပြောဆိုနေကြသည်။

"မြန်မာနှစ်ဆန်း နှစ်ရက်နေ့က ကမ္ဘာ့အမွေအနှစ်ပုဂံမှာ အမွေအနှစ်တွေပျောက်ဆုံးမှုဖြစ်ခဲ့ပါတယ်။ နယ်စပ်ဖြတ်ကျော်မှုခင်းဌာန(Interpol) ကို သတင်းပေးတိုင်ကြားအမှုဖွင့်ရပါမယ်။ ခိုးသွားသူတွေရော၊သူခိုးလက်ခံတွေရော ကမ္ဘာပေါ်မှာဘယ်တော့မှ ပြောင်ပြောင်တင်းတင်းရောင်းဝယ်ဖောက်ကားခွင့်မရှိစေရပါဘူး။ဘယ်နေရာရောက်ရောက်၊ဘယ်အချိန်ဖြစ်ဖြစ် နိုင်ငံတကာဥပဒေနှင့်အညီအရေးယူခံရမှာပါ"ဟု အမွေအနှစ်ထိန်းသိမ်းရေး ပညာရှင် ဒေါ်ဥမ္မာမျိုး က ပြောသည်။

ယူနက်စကိုအသိအမှတ်ပြုပြီး ရှေးဟောင်းယဉ်ကျေးမှုပုဂံဒေသတွင် ဘုရားပုထိုးစေတီပေါင်း ၃,၈၃၇ ဆူရှိကြောင်းလည်း သာသနာရေးနှင့်ယဉ်ကျေးမှုဝန်ကြီးဌာနက သိရသည်။

ymg/mt
#Yangon_Media_Group

#WorldMilitary
Published 19 April 2022

ရုရှားတပ်ဖွဲ့များက ယူကရိန်းနိုင်ငံအရှေ့ဘက် မိုင် ၃၀၀ နီးပါးတလျှောက် မြေပြင်တိုက်ခိုက်မှုများပြုလုပ်ခဲ့ကြောင်း ယူကရိန်းဘက်က တနင်္လာနေ့မှာပြောကြားလိုက်ပါတယ်။

ပြီးခဲ့တဲ့ရက်သတ္တပတ်များမှာလည်း နိုင်ငံအနှံ့ဒုံးကျည်များပစ်ခွင်းခဲ့ကာ စစ်ပြေးရှောင်ပြည်သူသောင်းဂဏန်းခန့်ခိုလှုနေတဲ့ အနောက်ဘက်မြို့လိဗစ်ကိုလည်း ပထမဆုံးအကြိမ် တိုက်ခိုက်ခဲ့ကြပါတယ်။

ပိုလန်နယ်စပ်အနီး ကျောက်စရစ်လမ်းတွေနဲ့ သာယာလှပတဲ့ပန်းခြံလေးတွေရှိတဲ့ လိဗစ်မြို့ဟာ ဒုံးကျည်များဖြင့်တိုက်ခိုက်ခံရပြီးနောက် သုဿန်သင်္ချိုင်းသဖွယ်ပြောင်းလဲသွားခဲ့ပါတယ်။တိုက်ခိုက်ခံရတဲ့လိဗစ်မြို့မှာ လူ ၇ ဦးသေဆုံးခဲ့တယ်လို့ သိရှိရပါတယ်။

လိဗစ်မြို့ကို ဒုံးကျည်ပေါင်း ၃၀၀ နဲ့ အမြှောက်များဖြင့်ပစ်ခတ်ခဲ့ခြင်းဟာ ယူကရိန်းအရှေ့ဘက်ရှိ အရပ်သားများနဲ့ ယူကရိန်းစစ်တပ်များကိုချေမှုန်းမယ့် ရုရှားအစီအစဉ်ဖြစ်ပြီး ဒွန်ဘက်စ်ဒေသမှာ နောက်ထပ်မြေပြင်စစ်ဆင်ရေးတွေ စတင်ပြုလုပ်နေပြီဖြစ်ပါတယ်။

ရုရှားမြေပြင်တိုက်ခိုက်ရေးက ခါခိဗ်ဒေသကနေ မာရီယူပိုလ်ဆိပ်ကမ်းမြို့အထိ ရှေ့တန်းဒေသတောက်လျှောက်နီးပါး ဖြန့်ကျက်တိုက်ခိုက်နေခဲ့ကြောင်း ယူကရိန်းနိုင်ငံတော်လုံခြုံရေးနဲ့ ကာကွယ်ရေးကောင်စီအတွင်းဝန်'အိုလက်ဆေးဒန်နီလော့ဗ်'က ရုပ်သံမှတဆင့်ပြောကြားသွားပါတယ်။

ယူကရိန်းသမ္မတ'ဗိုလိုဒီမီယာဇယ်လန်စကီ'က "အခုဆိုရင် ရုရှားရဲ့အဓိကတပ်ဖွဲ့တွေက ဒီစစ်ဆင်ရေးကိုအာရုံစိုက်နေပါပြီ။ အဲဒီကိုစစ်မှုထမ်းအင်အားဘယ်လောက်ပဲပို့ပို့ ကျွန်တော်တို့ဘာသာ ကာကွယ်တိုက်ခိုက်သွားမှာပါ" လို့ ဆိုပါတယ်။

ရုရှားကာကွယ်ရေးဝန်ကြီးဌာနရဲ့အဆိုအရ ယူကရိန်းရဲ့ လောင်စာသိုလှောင်ရာအဆောက်အအုံများ၊ ဂိုဒေါင်များ၊ အချက်အခြာအဆောက်အအုံများကို ပစ်မှတ်ထားပြီး ဒုံးကျည်မိုးရွာခဲ့တာဖြစ်ကြောင်း သိရပါတယ်။

မာရီယူပိုလ်ဆိပ်ကမ်းမြို့မှာ ယူကရိန်းတိုက်ခိုက်ရေးအဖွဲ့တွေ အင်အားမမျှခဲ့ပေမယ့် လက်နက်ချဖို့ငြင်းဆန်ခဲ့ပြီး နောက်ဆုံးမှာတော့ ရုရှားတို့ကအဆိုပါဆိပ်ကမ်းမြို့ကို သိမ်းပိုက်နိုင်ခဲ့ပုံရပါတယ်။
ခရိုင်းမီးယားကျွန်းဆွယ်ကိုသွားရောက်ဖို့အတွက် အဓိကကုန်းတံတားလမ်းတည်ရှိနေတဲ့ မာရီယူပိုလ်မြို့ဟာ ရုရှားတို့အတွက် နောက်ဆုံးအတားအဆီးဖြစ်နေခဲ့တာဖြစ်ပါတယ်။

နိုင်ငံတကာမှ ဒဏ်ခတ်ပိတ်ဆို့မှုတွေက ရုရှားစီးပွားရေးအပေါ် စတင်ရိုက်ခတ်လာနေတဲ့အချိန်မှာ အဆိုပါတိုက်ခိုက်မှုတွေ ပြုလုပ်လာတာဖြစ်ပြီး နိုင်ငံ့ခေါင်းဆောင်တွေကြား ဆက်ဆံရေးအခြေအနေဆိုးရွားနေပြီဖြစ်ပါတယ်။

မော်စကိုမြို့တော်ဝန်က မြို့တော်တစ်ခုတည်းမှာတင် လူပေါင်း ၂ သိန်းခန့်အလုပ်အကိုင်ဆုံးရှုံးလာရကြောင်း သတိပေးခဲ့ပြီး ဗဟိုဘဏ်အကြီးအကဲကလည်း နိုင်ငံတကာမှဒဏ်ခတ်ပိတ်ဆို့မှုတွေဟာ စတင်သက်ရောက်နေပြီဖြစ်ကြောင်း သတိပေးခဲ့ပါတယ်။

ယူကရိန်းအရှေ့ဘက်ကို ရုရှားတို့ပြန်လည်အာရုံစိုက်တိုက်ခိုက်လာမှုနဲ့အတူ လိဗစ်မြို့ကိုတိုက်ခိုက်ခဲ့ခြင်းက ရုရှားတို့ရဲ့ ဒုံးကျည်ပစ်ခတ်နိုင်စွမ်းက ယူကရိန်းတစ်နိုင်ငံလုံးရှိ မည်သည့်မြို့မဆို လက်လှမ်းမီတိုက်ခိုက်နိုင်ကြောင်း ပြသနေရာရောက်ပါတယ်။

တိုက်ခိုက်ခံရမှုကြောင့် အရပ်သားသိန်းပေါင်းများစွာဟာ ရထား၊ ဘတ်စ်ကားများဖြင့် ထွက်ပြေးတိမ်းရှောင်ခဲ့ကြပါတယ်။

တနင်္လာနေ့မတိုင်ခင်အထိ လိဗစ်မြို့ကိုတိုက်ခိုက်ရာမှာ လောင်စာသိုလှောင်ရေးနေရာနဲ့ တင့်ကားထုတ်လုပ်ရေးစက်ရုံတို့ကိုသာ အဓိကပစ်မှတ်ထားခဲ့ပြီး လွန်ခဲ့တဲ့သုံးပတ်အတွင်း ဒုံးကျည်များဖြင့် အကြိမ်ပေါင်းများစွာ တိုက်ခိုက်ခံခဲ့ရပါတယ်။

အဲဒီမတိုင်ခင်ကလည်း လိဗစ်မြို့အနီးရှိ လေဆိပ်အဆောက်အအုံနဲ့ စစ်အခြေစိုက်စခန်းတစ်ခုတို့ကို တိုက်ခိုက်ခဲ့ရာ အနည်းဆုံးလူ ၃၅ ဦးသေဆုံးခဲ့ပါတယ်။

Source: The New York Times
#Yangon_Media_Group

#LocalNews
Published - 19 Apr 2022

ရန်ကုန်တိုင်းဒေသကြီး၊သန်လျင်မြို့နယ်တွင် ဧပြီလ ၁၈ရက်နေ့ ညနေပိုင်းကစတင်ကာ သန်လျင်မြို့နယ်တွင် ဆိုင်ကယ်စီးနှင်းမှုကို နှစ်ယောက်စီးနှင်းခွင့်ပိတ်ပင်လိုက်တယ်လို့ သိရပါတယ်။

ဧပြီ လ ၁၈ရက်နေ့တွင် ရန်ကုန်တိုင်းဒေသကြီးအတွင်း ပစ်ခတ်တိုက်ခိုက်မှုများဖြစ်ပွားခဲ့ပြီး လူသေဆုံးထိခိုက်မှုများဖြစ်ပေါ်ခဲ့ ပြီး သန်လျင်မြို့နယ်တွင် နှစ်ကြိမ်ထိပစ်ခတ်တိုက်ခိုက်မှုဖြစ်ပေါ်ခဲ့တာကြောင့် ပိတ်ပင်လိုက်တာလို့ သန်လျင်ဒေသခံတစ်ဦးက ပြောပါတယ်။

ဧပြီလ ၁၈ ရက်နေ့နံနက် ၉နာရီ ၄၅ မိနစ်အချိန်က ရန်ကုန်တိုင်းဒေသကြီး၊ သန်လျင်မြို့နယ်၊အမှုထမ်းရပ်ကွက်၊ ဓမ္မရောင်ခြည်လမ်းတွင်လေပေးစက်ပြုပြင်သူ ဦးဇော်မင်းထွန်းသည် ဇနီးဖြစ်သူနှင့်အတူ နေအိမ်ရှေ့ရပ်ထားသည့် လိုက်ထရပ်ယာဉ်နောက်ခန်းတွင်ထိုင်နေစဉ် ဓမ္မရောင်ခြည်လမ်းအတိုင်းမောင်းလာသည့် ဆိုင်ကယ်တစ်စီးပေါ်တွင် နောက်မှလိုက်လာသူက သေနတ်ဖြင့်ခြောက်ချက်ပစ်ခတ်သွားသဖြင့် ဦးဇော်မင်းထွန်းမှာဦးခေါင်း၊ ဝမ်းဗိုက်၊ ပေါင်တို့တွင် ထိမှန်ဒဏ်ရာလေးချက်ဖြင့် အခင်းဖြစ်နေရာတွင်ပင် သေဆုံးသွားပါတယ်။

ထပ်မံပြသန်လျင်မြို့နယ်၊ ဘုရားကုန်းအုပ်စု၊ ဘုရားကုန်း ကျေးရွာ၊ ဘုရားကုန်းမီးပွိင့်လမ်းဆုံအနီးတွင် ဧပြီလ ၁၈ ရက်နေ့ နံနက် ၁၁ နာရီခွဲအချိန်တွင် ဆိုင်ကယ် ကယ်ရီသမားတစ်ဦးကို သေနတ်ဖြင့်ပစ်ခတ်သွားခဲ့ပြီး သေဆုံးသူမှာ သန်လျင်မြို့နယ်၊ ကညင်ပင်ရပ်ကွက်၊ ကညင်ပင် ၂ လမ်းနေ ဆိုင်ကယ်ကယ်ရီမောင်းနှင့် အရန်မီးသတ်ဖြစ်သူ လှဆန်းဦး (၃၄) နှစ်ဖြစ်ပြီး ၎င်းသည် သန်လျင်-ကျောက်တန်းလမ်းနှင့် သန်လျင်-သုံးခွ လမ်းဆုံ၊ ဘုရားကုန်းမီးပွိင့်ရှိ ယာဉ်ထိန်း Police Box အနီး ဆိုင်ကယ်ကယ်ရီဂိတ်တွင် ခရီးသည် စောင့်ဆိုင်းနေစဉ် ဆိုင်ကယ်တစ်စီးဖြင့် လူ ၂ ဦးက သေနတ်ဖြင့် ပစ်ခတ်ထွက်ပြေးသွားသဖြင့် ဝဲရင်အုံ ထိမှန်ဒဏ်ရာ ၁ ချက်၊ ဝဲချိုင်းအောက် ထိမှန်ဒဏ်ရာ ၁ ချက် နှင့် ဝမ်းဗိုက် ယာဘက် ထိမှန်ဒဏ်ရာ ၂ ချက်တို့ရရှိခဲ့သဖြင့် အခင်းဖြစ်ရာတွင် သေဆုံးခဲ့တဲ့ဖြစ်စဥ်တွေ ဖြစ်ပွားခဲ့ပါတယ်။

ymg/hm
#Yangon_Media_Group

#WorldHealth
Published 19 April 2022

မိမိအိပ်ရေးမဝခဲ့ဘူးလို့ တစ်စုံတစ်ယောက်ကိုပြောမိတာနဲ့ ဘယ်လိုဘယ်ပုံအိပ်စက်သင့်ကြောင်း ဆရာလုပ်ကြတာမျိုး ကြုံတွေ့ရဖူးမှာပါ။

"နောက်ကျမှအိပ်ရာဝင်လို့လား? မအိပ်ခင်အစားစားလိုက်လို့လား? မင်းအိပ်ခန်းက ပူလွန်းနေလား အေးလွန်းနေလား အရမ်းလင်းနေလား?"စသဖြင့် မေးကြပါလိမ့်မယ်။

ခေါင်းအုံးနားမှာ လက်ကိုင်ဖုန်းမထားဖို့၊ နံနက်ခင်းမှာ ဖြည့်စွက်အားဆေးသောက်ဖို့၊ စားသောက်နည်းပုံစံပြောင်းလဲဖို့လိုအပ်ကြောင်း ပြောကြမှာဖြစ်ပါတယ်။

အိပ်ရေးဝဖို့ တစ်ယောက်နဲ့တစ်ယောက် လိုအပ်ချက်တွေမတူပေမယ့် ယေဘုယျအားဖြင့် အယူမှားတွေနဲ့ အယူအဆမှန်နည်းလမ်းတွေကို ဖော်ပြလိုက်ပါတယ်။

(၁) အိပ်ရာစောစောဝင်သင့်တယ်ဆိုတဲ့အယူမှား
အိပ်စက်ခြင်းကျွမ်းကျင်ပညာရှင်'ဂျိမ်းစ်ဝီလ်ဆန်'က "သင်ဟာ စောစောအိပ်ရာထတတ်တဲ့သူမဟုတ်ဘူးဆိုရင် အိပ်ရာစောစောဝင်ခြင်းက ပိုမိုဆိုးရွားစေနိုင်ပါတယ်"လို့ ဆိုပါတယ်။
လူအများစုအနေနဲ့ ည ၁၀ နာရီအိပ်ရာဝင်ခြင်းက စောလွန်းတယ်လို့ သူကသတ်မှတ်ထားပါတယ်။
"စောစောအိပ်ရာထဲဝင်လို့ အိပ်မပျော်ဘူးဆိုရင် စိတ်ဖိစီးမှုများလာပြီး အိပ်ပျော်တော့မှာမဟုတ်ပါဘူး"

(၂) ညတိုင်း ၈ နာရီပြည့်အောင်အိပ်စက်စရာမလို
တစ်နေ့တာအိပ်စက်ခြင်းမှာ ၈ နာရီပြည့်အောင် အိပ်စက်ဖို့အရေးကြီးပါတယ်။
ဒါပေမဲ့လည်း တကယ်တမ်းတော့ ၈ နာရီပြည့်အောင် မအိပ်ရတဲ့ညတွေက ပိုများပါတယ်။
ဒါဟာစိတ်ပူစရာတော့မလိုပါဘူး။ ၈ နာရီပြည့်အောင် အိပ်စရာမလိုပါဘူး။
အိပ်ရေးဝ/မဝဆိုတာက မနက် ၁၀ နာရီ ၁၁ နာရီလောက်ရောက်တဲ့အခါ နွမ်းနယ်နေလား တက်တက်ကြွကြွရှိနေလားဆိုတာကိုကြည့်ပြီး ဆုံးဖြတ်လို့ရပါတယ်။

(၃) တီဗီကြည့်ခြင်းက အိပ်ချင်စိတ်ဖြစ်ပေါ်လာစေတယ်ဆိုတဲ့ အယူမှား
တီဗီနဲ့ လက်ကိုင်ဖုန်းကြည့်ခြင်းက အိပ်ပျော်စေတဲ့ မယ်လတိုနင်ဟော်မုန်းထွက်ရှိမှုကို အနှောင့်အယှက်ဖြစ်စေပါတယ်။
အိပ်ရာမဝင်ခင် တီဗီကြည့်ခြင်းက စိတ်ပြေလက်ပျောက်အနားရစေပေမယ့် စိတ်ဖိစီးမှုပမာဏများပြားလာစေပါတယ်။

(၄) ပင်ပန်းလာရင် နေ့ခင်းဘက်တရေးအိပ်သင့်တယ်ဆိုတဲ့ အယူမှား
ညဘက်အိပ်ရေးပျက်လို့ နေ့ခင်းဘက်တရေးတမောအိပ်စက်ခြင်းဖြင့် ညဘက်မှာအိပ်စက်ချင်တဲ့စိတ်လျော့နည်းစေပါတယ်။
"တရေးတမောအိပ်ခြင်းက အဆင်ပြေတယ်ဆိုပေမယ့် ညဘက်မအိပ်ချင်တာမျိုးဖြစ်ပေါ်လာနိုင်ပါတယ်" လို့ 'ဂျိမ်းစ်'ကဆိုပါတယ်။

(၅) အရက်သေစာသောက်စားခြင်းက အိပ်ရေးမဝစေနိုင်
ညမအိပ်ခင် တစ်ခွက်တလေသောက်သုံးလေ့ရှိကြပေမယ့် နှစ်နှစ်ခြိုက်ခြိုက်အိပ်ပျော်စေမှာမဟုတ်ပါဘူး။
အရက်သေစာသောက်ခြင်းက အိပ်ပျော်ရာမှာအထောက်အကူဖြစ်ပေမယ့် နှစ်ခြိုက်စွာအိပ်ပျော်စေနိုင်မှာမဟုတ်ပါဘူး

(၆) ရုံးပိတ်ရက်တွေကျမှ အတိုးချအိပ်စက်လို့ရတယ်ဆိုတဲ့ အယူမှား
တနင်္လာနေ့မှ သောကြာနေ့အထိ မနက်တိုင်း ၇ နာရီထလို့ ပိတ်ရက်တွေမှာ ၁၀ နာရီမှအိပ်ရာထတာက ပိုမိုအိပ်ရေးဝစေမှာမဟုတ်ပါဘူး။
တနင်္ဂနွေနေ့မှာ နောက်ကျမှအိပ်ရာထတဲ့အတွက် ညဘက်ကျမအိပ်ချင်ဘဲဖြစ်နေတတ်ပါတယ်။

(၇) စောင်ထူခြုံခြင်းက ပိုမိုအိပ်ပျော်စေတယ်ဆိုတဲ့ အယူမှား
စောင်ခြုံထားတဲ့အလေးချိန်ကြောင့် အိပ်ပျော်လွယ်စေတယ်လို့ ယူဆတဲ့သူတွေရှိပါတယ်။
ဟိုတယ်မှာ စောင်တွေညပ်ထားတာကိုထုတ်ပြီး အိပ်တတ်တဲ့သူဆိုရင် စောင်ထူကြီးနဲ့အိပ်ရင် ကောင်းကောင်းအိပ်ပျော်မှာမဟုတ်ပါဘူး။

(၈) တစ်နေ့ကို ၅ နာရီထက်ပိုမိုအိပ်စက်သင့်
အိပ်ချိန် ၃ နာရီထက်ပိုမအိပ်ရပေမယ့် ပုံမှန်လုပ်ကိုင်နိုင်သေးတယ်လို့ ပြောနေတဲ့သူတွေကို မယုံစားလိုက်ပါနဲ့။
တစ်နေ့ကို အိပ်ချိန် ၅ နာရီအောက်ပဲရှိတယ်ဆိုရင် နှလုံးရောဂါ၊ လေဖြတ်ခြင်နဲ့ ပျမ်းမျှသက်တမ်းတိုတောင်းခြင်းတို့ ဖြစ်ပေါ်လာနိုင်ပါတယ်။

(၉) ဟောက်ခြင်းက အန္တရာယ်မဖြစ်စေနိုင်ဘူးဆိုတဲ့ အယူမှား
ဘေးမှာအိပ်နေတဲ့သူ ဟောက်တတ်တယ်ဆိုရင် တကယ်ကိုစိတ်အနှောင့်အယှက်ဖြစ်စေပါတယ်။
ဒါဟာ အိပ်ပျော်နေစဉ်အသက်ရှူကြပ်ခြင်းလက္ခဏာ ဖြစ်ပေါ်တာဖြစ်ပြီး နှလုံးခုန်ရပ်ခြင်း၊ အဝလွန်ခြင်း၊ သွေးတိုးခြင်းစတဲ့ဝေဒနာတွေနဲ့ ဆက်စပ်နေပါတယ်။

(၁၀) အိပ်ရာမထခင်မှိန်းမောခြင်းက ပိုမိုအိပ်ရေးဝစေမှာမဟုတ်
အိပ်ရာနှိုးစက်ကို စောစောပေးပြီး ဆက်လက်မှိန်းမောခြင်းကို ပြုလုပ်တတ်ကြတာဟာ တကယ်တော့အကျိုးမရှိပါဘူး။
ဆက်ပြီးမှိန်းမှောနေတာဟာ အိပ်ပျော်သွားတယ်ဆိုရင်တောင် နှစ်နှစ်ခြိုက်ခြိုက်အိပ်ပျော်တာမျိုးမဟုတ်ပါဘူး။

Source: The US Sun
#Yangon_Media_Group