#Local_News
Published_ 30 December 2022

တစ်နိုင်ငံလုံး၌ ရွေးကောက်ပွဲ တစ်ပြိုင်နက်တည်းဖြစ်ရေးပါဝင်သည့် အချက် ၄ ချက်ကို NSPNC နှင့် တိုင်းရင်းသားလက်နက်ကိုင်အဖွဲ့၅ ဖွဲ့တို့ သဘောတူခဲ့ကြကြောင်း ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အဖွဲ့ဝင် တိုင်းရင်းသားလက်နက်ကိုင် အဖွဲ့ ၅ ဖွဲ့က ယနေ့ ဒီဇင်ဘာလ ၂၉ ရက်တွင် ထုတ်ပြန်လိုက်သည်။

ယင်းတွင် ပါတီစုံဒီမိုကရေစီနိုင်ငံရေးစနစ်ကို လက်ခံခြင်း (Political System)၊ဒီမိုကရေစီနှင့် ဖက်ဒရယ်စနစ်တို့ကို အခြေခံသော ပြည်ထောင်စုတည်ဆောက်ခြင်း (Form of State)၊ပြည်ထောင်စုငြိမ်းချမ်းရေးနှင့် ဖွံ့ဖြိုးတိုးတက်ရေး (Peace and Development) တရားဥပဒေစိုးမိုးရေး၊ ဒေသတည်ငြိမ်ရေး၊ ပါတီစုံဒီမိုကရေစီရွေးကောက်ပွဲများ ကျင်းပနိုင်ရေးနှင့် လွတ်လပ်ခြင်း၊ တရားမျှတခြင်း၊ တိုက်ရိုက်စနစ်-လျှို့ဝှက်မဲ ပေးစနစ်ဖြစ်ခြင်း၊ တစ်နိုင်ငံလုံး၌ တစ်ပြိုင်နက်တည်းဖြစ်ခြင်းဟူသော ရွေးကောက်ပွဲစံချိန်စံညွန်းများနှင့်အညီ ဆောင်ရွက်နိုင်ရေး (Rule of Laws, Stability and Multi Party general election convening with free, fare, direct, secret and general) တို့ဖြစ်ကြောင်း ဖော်ပြထားသည်။

အဆိုပါ သဘောတူညီချက် (၄)ချက်အနက် (၂၀၀၈)ဖွဲ့စည်းပုံအခြေခံဥပဒေကို ပြင်ဆင်ရန်(၁၀)ချက်ပါဝင်ပြီး ၎င်း(၁၀)ချက်ပါ ပြင်ဆင်မည့်စာတမ်းကို “အဆိုပြုချက် (မူကြမ်း)” များအဖြစ် ထားရှိရန် လည်း နှစ်ဦးနှစ်ဖက် သဘောတူခဲ့ကြကြောင်း သိရသည်။

ထို့အတူ နှစ်ဦးနှစ်ဖက်သဘောတူကြသည့်မှတ်တမ်း (၅) ရပ်၏ အနှစ်သာရများမှာ PPST အဖွဲ့ဝင်(၇)ဖွဲ့ပါဝင်သော “အလွတ်သဘောဆွေးနွေးညှိနှိုင်းရေးအဖွဲ့နှင့် NSPNC ၏ ကိုယ်စားလှယ်အဖွဲ့တို့ အမြန်ဆုံးတွေ့ဆုံနိုင်ရေး။

ပဋိပက္ခများလျော့ချရေးနှင့် ပြည်ထောင်စုတည်ငြိမ်အေးချမ်းရေးအတွက် ပြည်သူ လူထုတစ်ရပ်လုံးလိုလားတောင့်တနေသော စစ်မှန်သည့်ငြိမ်းချမ်းရေးရရှိရန် အတွက် NCA လမ်းကြောင်းအတိုင်း လုပ်ငန်းစဉ်များ နှစ်ဦးနှစ်ဖက်ချမှတ်ဆောင်ရွက်သွားရေး။

ငြိမ်းချမ်းရေးလုပ်ငန်းစဉ်သည် အမျိုးသားလုပ်ငန်းစဉ် (National Ownership) ဖြစ်ခြင်းနှင့် ပူးပေါင်းဆောင်ရွက်ရမည့်လုပ်ငန်း (Joint Ownership)ဖြစ်ခြင်း၊ NCA လက်မှတ်ရေးထိုးထားသော EAOs အဖွဲ့ များနှင့် NCA လက်မှတ်ရေးထိုးရန် အဆင့်သင့်မရှိသေးသည့် EAOs အဖွဲ့များအားလုံး ပူးပေါင်းပါဝင်လာနိုင်ရန် နှစ်ဦးနှစ်ဖက် ကြိုးပမ်းသွားရေး။NCA ပြဋ္ဌာန်းချက်ပါ အရပ်သားများကို အကာအကွယ်ပေးခြင်း (Civilian Protection) အပါအဝင် လူသားချင်းစာနာထောက်ထားမှုဆိုင်ရာ အကူအညီများ ပေးရေး (Humanitarian Assistance) ကိစ္စရပ်များကို နှစ်ဦးနှစ်ဖက်ကြိုးပမ်း ဆောင်ရွက်သွားရေးတို့ဖြစ်ကြောင်းလည်း ထုတ်ပြန်ချက်တွင် ဖော်ပြထားသည်။

PPST အဖွဲ့ဝင် EAOs (၅)ဖွဲ့ (ALP, DKBA, KNU/KNLA P.C, LDU, PNLO) မှ ကိုယ်စားလှယ်များအနေဖြင့် နေပြည်တော်သို့ ဒီဇင်ဘာလ ၂၅ ရက်တွင် ရောက်ရှိခဲ့ကြကာ အရေးပေါ်ဆွေးနွေးတိုင်ပင်ကြပြီးနောက် တစုတစည်းတည်း ဆွေးနွေးရေးမူအရ ဆွေးနွေးမည့် ကိုယ်စားလှယ်အဖွဲ့ကို ဖွဲ့စည်း၍ အဖွဲ့ခေါင်းဆောင်နှင့် ဒုတိယအဖွဲ့ ခေါင်းဆောင်ကိုလည်း ရွေးချယ်တာဝန်ပေးအပ်ခဲ့ကြကြောင်းလည်း သိရသည်။

ဆွေးနွေးပွဲအစီအစဉ်များကို ဒီဇင်ဘာလ ၂၇ ရက်တွင် အကြေ အလည် ကြိုတင်ညှိနှိုင်းဆွေးနွေးခဲ့ပြီး အစီအစဉ်(၈)ရပ်ကို နှစ်ဦးနှစ်ဖက် အတည်ပြု နိုင်ခဲ့ကြကြောင်း၊ အဆိုပါအစီအစဉ်(၈)ရပ်ကို အသေးစိတ်ဆွေးနွေး နိုင်ရေးအတွက် သီးခြားညှိနှိုင်း ဆွေးနွေးမှုတစ်ရပ်ကိုလည်း ပြင်ဆင်ပြုလုပ်ခဲ့ကြကြောင်း၊ဒီဇင်ဘာလ ၂၈ ရက်တွင် ဒုတိယဗိုလ်ချုပ်ကြီး ရာပြည့် ဦးဆောင်သော နိုင်ငံတော် ၏ ငြိမ်းချမ်းရေးဆွေးနွေးရေးအဖွဲ့နှင့် PPST အဖွဲ့ဝင် (၅)ဖွဲ့၏ ကိုယ်စားလှယ်အဖွဲ့တို့ တနေ့တာ အပြန်အလှန်ဆွေးနွေးခဲ့ကြခြင်း ဖြစ်သည်။

PPST အဖွဲ့ဝင်(၅)ဖွဲ့၏ ကိုယ်စားလှယ်အဖွဲ့ နှင့် နိုင်ငံတော်၏ ငြိမ်းချမ်းရေးဆွေးနွေး ရေးအဖွဲ့တို့၏ ပဏာမ ရရှိထားသော မှတ်တမ်း(၅)ရပ်၊ သဘောတူချက် (၄)ရပ် တို့သည် တစ်နိုင်ငံလုံးပြည်သူလူထုတစ်ရပ်လုံးနှင့် EAOs များအားလုံးအတွက် ဘုံအကျိုးစီးပွားကို ရည်မှန်း၍ နှစ်ဦးနှစ်ဖက် အကြေအလည် ဆွေးနွေးညှိနှိုင်း ရရှိထားသော အချက်များဖြစ်သောကြောင့် ဆွေးနွေးပွဲ အနေဖြင့် တစ်စုံတရာ အောင်မြင်မှုရှိသော ဆွေးနွေးပွဲဖြစ်ကြောင်းအဆိုပါ ထုတ်ပြန်ချက်တွင် ဖော်ပြထားသည်။

#ymg/mt
#Yangon_Media_Group