#Local_News
Published_ 20 October 2022

အဏုမြူရောင်ခြည်နည်းပညာဖြင့် ရောဂါရှာဖွေကုသရေးပညာရပ်များလေ့လာနိုင်ရန်မြန်မာနိုင်ငံကကာကွယ်ရေးဝန်ကြီးဌာနနှင့်ကျန်းမာရေးဝန်ကြီး ဌာနတို့မှအထူးကုဆရာဝန်ကြီး(၅)ဦးသည်ရုရှားနိုင်ငံသို့သွားရောက်ကြကြောင်း ကျန်းမာရေးဝန်ကြီးဌာနမှသိရသည်၊၊

အဆိုပါအဖွဲ့သည် မြန်မာနိုင်ငံမှ ကိုယ်စားလှယ်အဖွဲ့အနေဖြင့် ရုရှားဖက်ဒရေးရှင်းနိုင်ငံ၊ The Republic of Buryatia, Ulan-Ude တွင် ကျင်းပပြုလုပ်မည့် ပထမအကြိမ်အပြည်ပြည်ဆိုင်ရာ အရှေ့ဖျားသိပ္ပံနှင့် အဏုမြူရောင်ခြည်နည်းပညာဖြင့် ရောဂါ ရှာဖွေကုသရေး လက်တွေ့လေ့ကျင့်ရေးဆိုင်ရာ အလုပ်ရုံဆွေးနွေးပွဲသို့ တက်ရောက်ကြမည်ဖြစ်ပြီး အောက် တိုဘာလ(၁၈)ရက်တွင် ရုရှားနိုင်ငံသို့ စတင်သွားရောက်ကြပြီဖြစ်သည်၊၊

အဆိုပါဆွေးနွေးပွဲသည် နိုင်ငံတော်ဝန်ကြီးချုပ်၏ ရုရှားဖက်ဒရေးရှင်းနိုင်ငံသို့ အလုပ်သဘောခရီးစဉ်အတွင်း တွေ့ဆုံဆွေးနွေးမှုအရ ဖိတ်ကြားလာခြင်းဖြစ်ပြီး မြန်မာနိုင်ငံအပါအဝင် ကမ္ဘာ့နိုင်ငံများမှ အထူးကုဆရာဝန်များတက်ရောက်၍ အဏုမြူရောင်ခြည်နည်းပညာဖြင့် ရောဂါ ရှာဖွေကုသရေးပညာရပ်များကို ညှိနှိုင်းဆွေးနွေးကြမည့်အပြင် နိုင်ငံတကာမှပညာရှင်များနှင့် အတွေ့အကြုံများဖလှယ်မည်ဖြစ်ပါသဖြင့် မိမိနိုင်ငံအတွင်း အဏုမြူရောင်ခြည်နည်းပညာ ဖြင့် ကင်ဆာရောဂါရှာဖွေကုသရေးဆိုင်ရာ ကျန်းမာရေးစောင့်ရှောက်မှုလုပ်ငန်းအတွက် အထောက် အကူများစွာရရှိနိုင်ပြီး နိုင်ငံတကာမှ အတွေ့အကြုံကောင်းများ ပြန်လည်မျှဝေပေးနိုင်မည်ဖြစ်ကြောင်း ထုတ်ပြန်ချက်တွင်ဖော်ပြထားသည်၊၊

#ymg/tthl
#Yangon_Media_Group

#Local_News
Published_20 October 2022

ရန်ကုန်မြို့၏ ပထမဆုံးရေပေါ်ညဈေးကို ဗိုလ်တထောင်ဘုရားအနီး ဆိပ်ခံတံတားအမှတ်(၅) Love Boat Bridge တွင်ဖွင့်လှစ်သွားမည်ဖြစ်ကြောင်း ညဈေးစီစဉ်သည့် တော်ဝင်ချမ်းသာ ကုမ္ပဏီမှ သိရသည်။

အဆိုပါ ရေပေါ်ညဈေးကို အောက်တိုဘာ ၃၁ ရက်မှ နိုဝင်ဘာ ၈ ရက်အထိ ညနေ ၃ နာရီမှ ည ၉ နာရီထိ ဖွင့်လှစ်ရောင်းချသွားမှာဖြစ်ပြီး ဆိုင်ခန်း ၃၀ ပါဝင်ပြသရောင်းချသွားမည်ဖြစ်ကြောင်း သိရသည်။

ညဈေးတွင် ရန်ကုန်မြစ်၏ အလှအပများကို ကြည့်ရင်း ရိုးရာအစားအစာများ၊ ဖော်ထုတ်သွားမှာဖြစ်ပြီး တိုင်းရင်းသားရိုးရာအစားအစာရောင်းချမည့်သူများကိုလည်း ရိုးရာဝတ်စုံဝတ်စုံဝတ်ဆင်စေ၍ ရောင်းချစေမည်ဖြစ်ကြောင်း သိရသည်။ ယင်းအပြင် ဈေးပွဲတော်ရက်တွင် အင်းလေးဒေသလိုမျိုး လှေများ၊ ရိုးရိုးလှေများဖြင့် ပါဝင်ပြသသွားမည်ဖြစ်သည်။

ယင်းအပြင် ဆိုင်ခန်းခမှာ အခမဲ့ဖြစ်ပြီး အစားအသောက်တည်ခင်းရောင်းချနိုင်မည့် လှည်းပုံစံထုတ်ပေးမည်ဖြစ်ကာ လှည်း၏ နေရာထားခကို တစ်ရက် ၃၀၀၀၀ ကျပ်၊ ရေနှင့် မီး အပါအဝင် စားသုံးသူတွေ နေရာထိုင်ခင်းကို ကုမ္ပဏီဘက်မှ စီစဉ်ပေးမည်ဖြစ်ပြီး မည်သူမဆိုလာရောက်စုံစမ်းရောင်းချနိုင်ကြောင်း သိရသည်။

#ymg/sth
#Yangon_Media_Group

#Local_News
Published_20 October 2022

မြန်မာ့ဆန်ကို အရည်အသွေးမြှင့်တင်ပြီး ဘင်္ဂလားဒေ့ရှ်အပါအဝင် ပြည်ပနိုင်ငံများသို့ တင်ပို့ရောင်းချရန် ပြည်တွင်းကုမ္ပဏီ ၃၀ ကို ခွင့်ပြုထားပြီးဖြစ်ကြောင်း ဝန်ကြီးဌာနထုတ်ပြန်ချက်များအရ သိရသည်။

ယခင်က ကုမ္ပဏီများစုပေါင်း၍ ပြည်ပသို့ ဆန်တင်ပို့ရာတွင် အရည်အသွေးလျော့သောဆန်များ ရောနှောပါဝင်နေမှုကြောင့် အရည်အသွေးကောင်းတင်ပို့သော ကုမ္ပဏီများအနေဖြင့် နစ်နာမှုများစွာကြုံတွေ့ခဲ့ရကြောင်း သိရသည်။ ယင်းကြောင့် သက်ဆိုင်ရာဝန်ကြီးဌာနအနေဖြင့် တင်ပို့သောဆန်အိတ်အတွင်း ကုမ္ပဏီအမှတ်တံဆိပ်ကိုထည့်သွင်းထားခြင်း၊ ဆန်အရည်အသွေးအထူးဂရုပြုစစ်ဆေးခြင်းများ ကြပ်မတ်ဆောင်ရွက်လျက်ရှိကြောင်း သိရသည်။

ယင်းအပြင် ဘင်္ဂလားဒေ့ရှ်မှ ဆန်အဝယ်လိုက်မှုကြောင့် ဝယ်ယူသောဆန်အမျိုးအစားများ ပြည်တွင်းဈေးကွက်အတွင်း၌ အရောင်းအဝယ်ကောင်းနေပြီး ဝယ်ယူသွားသောဆန်များအတွက် တစ်ပါတ်၊ ၁၀ ရက်ငွေစောင့်ဆိုင်းမှုမရှိစေရန်အတွက် ငွေလက်ငင်းဈေးကွက်ပုံစံစနစ်ဖြင့် ဝယ်ယူရောင်းချမှုများ ပြုလုပ်နေကြောင်း သိရသည်။

ပြည်ပသို့ ဆန်နှင့်ဆန်ကွဲကို တရုတ်၊ ဖိလစ်ပိုင်၊ ဘင်္ဂလားဒေ့ရှ်နှင့် ဥရောပနိုင်ငံအချို့ကို တင်ပို့ရောင်းချလျက်ရှိကြောင်း၊ ပြည်တွင်း၌စိုက်ပျိုးထုတ်လုပ်သည့် ဆန်နှင့်ဆန်ကွဲများကို နယ်စပ်နှင့် ပင်လယ်ရေကြောင်း ကုန်သွယ်မှုကနေ တင်ပို့ရောင်းချလျက်ရှိပြီး စက်တင်ဘာအတွင်း ၉၃,၇၉၁ မက်ထရစ်တန် တင်ပို့နိုင်ခဲ့ကြောင်း သိရသည်။

#ymg/sth
#Yangon_Media_Group

#LocalNews
Published _ 20 october 2022

မွန်ပြည်နယ်၊ သထုံမြို့နယ် ကွင်းစပ် ကွက်သစ်ပိုင်းတွင် သုံးလသား အရွယ်ရှိ ကလေးငယ်တစ်ဦး နို့အဆိပ်သင့်၍ သေဆုံးသွားကြောင်း ပီတိနှလုံးသား နာရေးကူညီမှုအသင်းထံမှ သိရှိရသည်။

"ကျွန်တော့်မှာတော့ ဟိုဆေးရုံပြေးလိုက် ဒီဘက်ဆေးရုံပြေးလိုက်နဲ့အခုတော့ သမီးလေးသေဆုံးသွားပြန်ပြီဗျာ၊ ခလေးတွေပဲ သေဆုံးနေတာကို အများပြားတွေ့နေရတာစိတ်မကောင်းဖြစ်မိတယ်ဗျာ"လို့ ပီတိနှလုံးသား နာရေးကူညီမှုအသင်း၏ တာဝန်ရှိသူက ဆိုသည်။

အဆိုပါ နို့အဆိပ်သင့်ခဲ့သည့် မပွင့်ဖူးလို့ အမည်ရတဲ့ ကလေးငယ်ကို အသင်းပိုင်ယာဉ်ဖြင့် လိုအပ်သည့် ဆေးဝါးကုသမှုခံယူစေနိုင်ရန် ပီတိနှလုံးသားအသင်း(နောင်ဘို)ပရဟိတလူငယ်များမှ သိမ်ဆိပ်ဆေးရုံသို့ ကူညီပို့ဆောင်ပေးခဲ့ကြကြောင်းလည်း သိရှိရသည်။

ဆေးရုံတွင် နို့အဆိပ်သင့် သမီးငယ်မှာ(တက်) နေသည့်အတွက် လွှဲစာနှင့်အတူ သထုံပြည်သူ့ဆေးရုံကြီးသို့ ထပ်မံကူညီပို့ဆောင်ပေးခဲ့ပြီးနောက် ယနေ့ အောက်တိုဘာလ ၂၀ရက် နံနက် ၁၀နာရီခွဲအချိန်ခန့်တွင် ဆုံးပါးသွားခဲ့ကြောင်း သိရှိရသည်။

Photo - ပီတိနှလုံးသား လူမှုကူညီကယ်ဆယ်ရေးအသင်း

#ymg/NN
#Yangon_Media_Group

#Local_News
Published_ 20 October 2022

အောက်တိုဘာ (၁၉) ရက် ဒီကနေ့မနက်ပိုင်းက ပေါက်ကွဲမှုဖြစ်ပွားခဲ့တဲ့ အင်းစိန် ဗဟိုအကျဉ်းထောင်ကို ပြည်ထဲရေးဝန်ကြီးဌာနဝန်ကြီး ဒုတိယဗိုလ်ချုပ်ကြီးစိုးထွဋ် သွားရောက် စစ်ဆေးခဲ့ကြောင်း သိရပါတယ်။

ဒီကနေ့မနက်ပိုင်းမှာ အကြမ်းဖက်သမားတွေဟာ ပါဆယ်ထုပ်အတွင်း၌ လက်လုပ်မိုင်းထည့်သွင်းပြီး အကျဉ်းသားများအတွက် ပါဆယ်ထုပ်လက်ခံတဲ့ အဆောက်အဦအတွင်းနဲ့ အပြင်ဘက်တို့မှာ ဖောက်ခွဲ တိုက်ခိုက်ခဲ့တာ ဖြစ်ပါတယ်။

အဆိုပါ ဖောက်ခွဲတိုက်ခိုက်မှုအတွင်း အကျဉ်းထောင်ဝန်ထမ်း ၃ ဦးနဲ့ ထောင်ဝင်စာ လာတွေ့တဲ့ အရပ်သား ၅ ဦး၊ စုစုပေါင်း ၈ ဦး သေဆုံးခဲ့ပြီး အကျဉ်းထောင် ဝန်ထမ်း ၅ ဦးနဲ့ အရပ်သားပြည်သူ ၁၃ ဦး၊ စုစုပေါင်း ၁၈ ဦးတို့ ထိခိုက်ဒဏ်ရာရရှိခဲ့ကြောင်း သိရပါတယ်။

ဝန်ကြီးက ပေါက်ကွဲမှုဖြစ်စဉ်အတွင်း သေဆုံး၊ ထိခိုက်ဒဏ်ရာရရှိခဲ့ကြတဲ့ အကျဉ်းထောင်ဝန်ထမ်းတွေနဲ့ ၎င်းတို့၏ မိသားစုဝင်တွေကိုတွေ့ဆုံပြီး နှစ်သိမ့်အားပေးခဲ့ပြီး ထောက်ပံ့ငွေ များပေးအပ်ခဲ့ပါတယ်။

ထို့ပြင် အင်းစိန်ပြည်သူ့ဆေးရုံကြီးသို့သွားရောက်ပြီး ပေါက်ကွဲမှုဖြစ်စဉ်အတွင်း သေဆုံး၊ ထိခိုက်ဒဏ်ရာရရှိခဲ့ကြတဲ့ အကျဉ်းဦးစီးဌာနမှဝန်ထမ်းတွေနဲ့ ပြည်သူတွေကို တွေ့ဆုံ နှစ်သိမ့် အားပေးစကားပြောကြားကာ ထောက်ပံ့ပစ္စည်းများပေးအပ်ခဲ့ကြောင်း သတင်းရရှိပါတယ်။

#ygm_mnn
#Yangon_Media_Group

Published 19 Oct 2022

နေပြည်တော်ရှိ မဏိရတနာ ကျောက်စိမ်းခန်းမမှာ ဒီကနေ့ အောက်တိုဘာ ၁၉ ရက်မှာ စတင်ပြသတဲ့ ၂၀၂၂ ခုနှစ် မြန်မာ့ကျောက်မျက်ရတနာပြပွဲကို ရုရှားစီးပွားရေး လုပ်ငန်းရှင်တွေ ပထမဆုံး တက်ရောက်ခဲ့တယ်လို့ သိရပါတယ်။

အဆိုပါနှစ်လယ်မြန်မာ့ကျောက်မျက်ရတနာပြပွဲမှာ ပုလဲအတွဲပေါင်း ၄၀၀ ၊ ကျောက်မျက်အတွဲပေါင်း ၁၂၀ နှင့် ကျောက်စိမ်းအတွဲပေါင်း ၂၁၅၀တို့ကို အိတ်ဖွင့်တင်ဒါစနစ်ဖြင့်ရောင်းချပေးမယ်လို့ သတင်းထုတ်ပြန်ချက်မှာ ဖော်ပြထားပါတယ်။

အဲဒီပြပွဲဖွင့်ပွဲကို နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် နစက အဖွဲ့ဝင်တွေ၊ပြည်ထောင်စုဝန်ကြီးတွေအပြင် မြန်မာနိုင်ငံဆိုင်ရာ ရုရှားနိုင်ငံသံရုံးမှ တာဝန်ရှိသူတွေနှင့်ရုရှားစီးပွားရေးလုပ်ငန်းရှင်တွေ တက်ရောက်ခဲ့ကြတယ်လို့ နစကရဲ့ သတင်းထုတ်ပြန်ချက်အရသိရတာဖြစ်ပါတယ်။

ယခုပြပွဲတွင် ပုလဲအတွဲတွေကို ကြမ်းခင်းဈေး အမေရိကန်ဒေါ်လာဖြင့်သတ်မှတ်ထားရှိပြီး ငွေပေးချေမှုကို ပြည်ပ ရတနာကုန်သည်တွေက အမေရိကန်ဒေါ်လာ၊ယွမ်ငွေ၊ထိုင်းဘတ်ငွေတို့ဖြင့်ပေးချေနိုင်ပါတယ်။ ကျောက်မျက်ကျောက်စိမ်းအတွဲတွေကို ကြမ်းခင်းဈေး  ယူရိုငွေဖြင့်သတ်မှတ်ထားပြီး ပြည်ပရတနာကုန်သည်တွေက အမေရိကန်ဒေါ်လာ၊ယူရို၊ယွမ်ငွေ၊ထိုင်းဘတ်ငွေတွေနှင့် ပေးချေရမှာဖြစ်ပါတယ်။ ပြည်တွင်းက မြန်မာကုန်သည်တွေကတော့ ကျပ်ငွေနှင့်ပေးချေနိုင်ကြမယ်လို့ သိရှိရပါတယ်။

ပုလဲအတွဲတွေရဲ့ အနိမ့်ဆုံးအခြေခံဈေးမှာ အမေရိကန်ဒေါ်လာ ၁၀၀၀ဖြစ်ပြီး ကျောက်မျက်အတွဲတွေအတွက် အနိမ့်ဆုံး အခြေခံဈေးကတော့ ယူရို ၅၀၀ဖြစ်ပါတယ်။ ကျောက်စိမ်းအချောထည်အတွက် အနိမ့်ဆုံးအခြေခံဈေး ယူရို ၁၀၀၀နှင့် ကျောက်စိမ်းအရိုင်းအတွဲများအတွက် အနိမ့်ဆုံးအခြေခံဈေးမှာ ယူရိုငွေ ၅၀၀၀ဖြစ်တယ်လို့ သိရှိရပါတယ်။

ယခုပြပွဲကို အောက်တိုဘာ ၂၅ရက်အထိခင်းကျင်းပြသသွားမှာဖြစ်ပါတယ်။

-ymg/knl

#Myanmar

#Myanmar_Gem_Emporium

#Myanmar_Business