#Local_News
Published _ 20 September 2022
ကမ္ဘာလုံးဆိုင်ရာ ငွေကြေးခဝါချမှု စောင့်ကြည့်ရေးအဖွဲ့ (Financial Action Task Force-FATF) ရဲ့ တိုးမြှင့်စောင့်ကြည့်ရမည့် နိုင်ငံနှင့် ဒေသများစာရင်း (Jurisdictions under Increased Monitoring) ကနေ လွတ်မြောက်စေရေး ကြိုးပမ်းဆောင်ရွက်နေကြောင်း ဗဟိုဘဏ်ဥက္ကဋ္ဌ ဒေါ်သန်းသန်းဆွေ၏ ပြောပြချက်အရ သိရသည်။
ဗဟိုဘဏ်အနေဖြင့် ပြည်ထဲရေးဝန်ကြီးဌာနအပါအဝင် သက်ဆိုင်ရာဝန်ကြီးဌာနများနှင့် ပူးပေါင်းဆောင်ရွက်နေခြင်းဖြစ်ပြီး လိုက်နာဆောင်ရွက်ရမည့် Action Plan ပါ အချက်များထဲမှ ဘဏ်များ၏ ဆုံးရှုံးနိုင်ချေ မြင့်မားသည့်အပိုင်း အပါအဝင် Onsite နဲ့ Offsite စစ်ဆေးခြင်းကို အချိန်မီ ဆောင်ရွက်ခဲ့ကာ ကြီးမားစွာ လိုက်နာဆောင်ရွက်ခြင်း (Largely Addressed) အဆင့်သတ်မှတ်ချက် ရရှိထားပြီးဖြစ်ကြောင်း ၎င်းကဆိုသည်။
ယင်းအပြင် ဘဏ်များ၏ လျို့ဝှက်ထားရမည့် တာဝန်ကို ကျိုးပေါက်မှုမရှိစေရေး အထူးအလေးထား ဆောင်ရွက်ကြရန်နှင့် ပြည်ပငွေလွှဲလုပ်ငန်း ကုမ္ပဏီများ ကြီးကြပ်ရေးလက်ဆွဲကို ပြုစုထားပြီးဖြစ်ကာ ပြည်ပငွေလွှကုမ္ပဏီတွေကို မကြာမီ သွားရောက်စစ်ဆေးမည်ဖြစ်ကြောင်း သိရသည်။
ပြီးခဲ့သည့် ရက်ပိုင်းက မြန်မာနိုင်ငံကို ငွေကြေးမသမာမှုလုပ်ဆောင်ချက်တွေကြောင့် ကမ္ဘာလုံးဆိုင်ရာ ဘဏ္ဍာရေးရာဇဝတ်မှု စောင့်ကြည့်အဖွဲ့ - FATF ရဲ့ အမည်ပျက်စာရင်း သွင်းခံရဖွယ်ရှိနေကြောင်း သတင်းများထွက်ပေါ်ခဲ့ခြင်းလည်းဖြစ်သည်။
#ymg/sth
#Yangon_ Media _group
#Local_News
Published- 20 September 2022
မီးဘေး၊ ရေဘေး၊ လေဘေး အပါအဝင် အခြားသော တိုက်ပွဲရှောင်စခန်းများအတွက် ကျပ်သိန်းပေါင်း ၁၄၀၀၀ ကျော်ထောက်ပံ့ထားကြောင်း နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။
ယနေ့ (စက်တင်ဘာလ ၂၀) ရက်နေပြည်တော်တွင် ကျင်းပပြုလုပ်သည့် အကြိမ် (၂၀)မြောက် သတင်းစာရှင်းလင်းပွဲတွင် ပြောကြားခဲ့ခြင်းဖြစ်သည်။
တစ်နိုင်ငံလုံးအတိုင်းအတာအနေဖြင့် မြို့ပေါင်း ၈၄ မြို့အတွက် ကျပ်သိန်းပေါင်း ၉၀၀၀ ကျော်ကို ထောက်ပံ့ပေးထားပြီး ကချင်ပြည်နယ် စစ်ဘေးရှောင်စခန်းရှိ အိမ်ထောင်စု ၇၆၉ စု လူဦးရေ ၄၅၄၅ ဦးအတွက် ကျပ်သိန်းပေါင်း ၁၇၀၀ ကျော်အပါအဝင် ကချင်းပြည်နယ်၊ ချင်းပြည်နယ်၊ ရခိုင်ပြည်နယ်ဒေသတို့ရှိ စစ်ဘေးရှောင်စခန်းနှင့် နေရပ်စွန့်ခွာသူများ ပြန်လည်နေရာချထားရေးအတွက် အိမ်ထောင်စု ၂၅၉၁ စု လူဦးရေ ၁၁၆၉၁ ဦး ငွေကျပ်သိန်းပေါင်း ၃၈၀၀ ကျော်ကိုလည်း ထောက်ပံ့ထားကြောင်း သိရသည်။
ကချင်ပြည်နယ်၊ ရခိုင်ပြည်နယ်၊ ရှမ်းပြည်နယ် အစရှိသည့် ပြည်နယ်နှင့် တိုင်းဒေသကြီးအချို့တွင် စစ်ဘေးရှောင်စခန်းများအပါအဝင် အခြားသောသဘာဝဘေးအန္တရာယ်ကြောင့် နေရပ်စွန့်ခွာရသူများလည်းရှိကြောင်း သိရသည်။
#ymg/sth
#Yangon_Media_Group
#Local_News
Published - 20 September 2022
ဒေါ်အောင်ဆန်းစုကြည်ရင်ဆိုင်နေရသော စီးပွားရေးလုပ်ငန်းရှင်ဦးမောင်ဝိတ်နှင့်ပတ်သက်သည့်အမှု နောက်နှစ်ပတ်အကြာ အပြီးသတ်လျှောက်လဲမည်ဖြစ်ကြောင်း တရားရုံးနှင့် နီးစပ်သူများက ပြောသည်။
ဒေါ်အောင်ဆန်းစုကြည်ရင်ဆိုင်နေရသော အမှုများထဲတွင် စီးပွားရေးလုပ်ငန်းရှင်ဦးမောင်ဝိတ်က ဒေါ်ခင်ကြည်ဖောင်ဒေးရှင်းကို ငွေလှူသည်ဆိုသော အမှုမှာ ရာဇဝတ်ကြီးအမှုအမှတ် ၃/၂၀၂၂ နှင့် ၄/၂၀၂၂ တို ဖြစ်ပြီး ဇူလိုင်လ ၁၃ ရက်တွင် တရားလွှတ်တော်ချုပ်၌ ရှေ့နေအဖွဲ့က ချေဖျက်ခွင့်တင်ခဲ့သော်လည်း သြဂုတ်လ ၁၇ ရက်က ပယ်ချခဲ့ကြောင်း သိရသည်။
"ဒေါ်ခင်ကြည်ဖောင်ဒေးရှင်းကို ငွေလှူတယ်ဆိုတဲ့ ဦးမောင်ဝိတ်နဲ့ ပတ်သက်တဲ့ ကိစ္စမှာ ဒေါ်အောင်ဆန်းစုကြည်ကို ဒီနေ့ စစ်တယ်။ အပြစ်မရှိဘူးလို့ ပြောတယ်။ ကျန်းမာရေးလည်း ကောင်းပါတယ်။နောက်ထပ်နှစ်ပတ်ခွာပြီးတော့ ချိန်းတယ်ဆိုတော့ အောက်တိုဘာလ ၄ ရက်နေ့မှာ ထပ်ချိန်းပါတယ်။ အပြီးသတ် လျှောက်လဲဖို့ပေါ့"ဟု တရားရုံးနှင့် နီးစပ်သူက ပြောသည်။
ယနေ့ စက်တင်ဘာလ ၂၀ ရက်တွင် ဒေါ်အောင်ဆန်းစုကြည် ရင်ဆိုင်နေရဆဲဖြစ်သော ရဟတ်ယာဉ်အမှုကိစ္စနှင့်ပတ်သက်၍ အမှုအမှတ် ၄၇ နှင့် ၄၈ တို့အတွက် တရားလိုပြသက်သော ယခင်လူကယ်ပြန်က ဒုတိယအမြဲတမ်းအတွင်းဝန် ဦးနေဝင်းအား စစ်ဆေးခဲ့ကြောင်းလည်း သိရသည်။
စီးပွားရေးလုပ်ငန်းရှင်ဦးမောင်ဝိတ်ကလည်း အဆိုပါ ဒေါ်ခင်ကြည်ဖောင်ဒေးရှင်းအတွက် အမေရိကန်ဒေါ်လာ ၅ သိန်းလှူခဲ့သည်ကိုလည်း တရားရုံး၌ ကိုယ်တိုင်သက်သေလာရောက် ထွက်ဆိုပြီးလည်း ဖြစ်သည်။
လက်ရှိတွင် ဒေါ်အောင်ဆန်းစုကြည်အနေဖြင့် သူရင်ဆိုင်နေရသော အမှုများထဲမှ တရားရုံးကစစ်ဆေးအမိန့်ချပြီးသည့်အမှုများအတွက် စုစုပေါင်းထောင်ဒဏ် နှစ် ၂၀ ကို ချမှတ်ခံထားရပြီး ဖြစ်ကြောင်းလည်း သိရသည်။
#ymg/mt
#Yangon_Media_Group
#Local_News
Published_ 20 September 2022
ရုရှားနိုင်ငံကပြုလုပ်သည့်ငွေပေးချေမှု MIR Card ကို မြန်မာတွင် အသုံးပြုရေးအတွက် ဆွေးနွေးလျက်ရှိကြောင်း နစက၏ သတင်းထုတ်ပြန်ရေးအဖွဲ့ခေါင်းဆောင်၊ ပြန်ကြားရေးဝန်ကြီးဌာန၊ ဒုတိယဝန်ကြီး ဗိုလ်ချုပ်ဇော်မင်းထွန်းက ပြောသည်၊၊
စက်တင်ဘာလ(၂၀)ရက်က ပြုလုပ်သည့်နစက၏ (၂၀)ကြိမ်မြောက်သတင်းစာရှင်းလင်းပွဲတွင် ထည့်သွင်းပြောခဲ့ခြင်း ဖြစ်သည်၊၊
ဗိုလ်ချုပ်ဇော်မင်းထွန်းက"ရုရှားနိုင်ငံက ပြုလုပ်တဲ့ MIR Card ကို လျှင်မြန်စွာ အသုံးပြုနိုင်ရေးအတွက် ရုရှားငွေရေးကြေးရေးအဖွဲ့အစည်းတွေက ကူညီဆောင်ရွက်ပေးသွားမှာဖြစ်ပြီး ရုရှားနိုင်ငံရဲ့ MIR Card မြန်မာနိုင်ငံရဲ့ငွေပေးချေမှုစနစ်မှာ အသုံးပြုနိုင်ရေးအတွက်ဆွေးနွေးလျက်ရှိပါတယ်၊၊ လာမယ့် နိုဝင်ဘာလမှာ တတိယအကြိမ်ရုရှားမြန်မာ အစိုးရ အချင်းချင်းကုန်သွယ်ရေးနဲ့ စီးပွားရေးပူးပေါင်းဆောင်ရွက်မှုကော်မရှင်အစည်းအဝေးရှိပါတယ်၊၊ အဲဒီ့အစည်းအဝေးမတိုင်မီမှာ ရုရှားနိုင်ငံဗဟိုဘဏ်ငွေကြေးဆိုင်ရာ စာတိုပို့စနစ် SPFF စတဲ့ ရုရှားနိုင်ငံဘဏ်တွေနဲ့ အမြန်ဆုံးချိတ်ဆက်ဆောင်ရွက်သွားမှာ ဖြစ်ပါတယ်၊၊ အဲဒီ့အချိန်မှာ ရူဘယ်နဲ့ကျပ်တိုက်ရိုက်ပေးချေနိုင်ဖို့အတွက် မြန်မာနိုင်ငံရှိ ဘဏ်တွေအနေနဲ့ ရုရှားဘဏ်တွေမှာ အကောင့်ဖွင့်နိုင်ဖို့နဲ့ SPFF အသုံးပြုနိုင်ဖို့အရေးပါလာမှာ ဖြစ်ပါတယ်"လို့ ထည့်သွင်းပြောခဲ့သည်၊၊
နှစ်နိုင်ငံငွေကြေး တိုက်ရိုက်လဲလှယ်ရာတွင် ဘဏ်လုံခြုံရေးစနစ်နဲ့ နည်းပညာသတင်းအချက်အလက်များ အသင့်အနေအထားရှိရမည်ဖြစ်ကြောင်းနှင့် ရုရှား-မြန်မာနှစ်နိုင်ငံဗဟိုဘဏ်များ အချင်းချင်းပူးပေါင်းဆောင်ရွက်မှုနားလည်မှု စာချွန်လွှာကို မြန်မာနိုင်ငံအနေနဲ့လက်မှတ်ရေးထိုးဆောင်ရွက်နိုင်ခဲ့ကြောင်း ဗိုလ်ချုပ်ဇော်မင်းထွန်းကထည့်သွင်း ပြောကြားခဲ့သည်၊၊
#ymg/tthl
#Yangon_Media_Group
#Local_News
Published - 20 September 2022
မှတ်ပုံတင်အတုဖြင့် ရန်ကုန်သို့သွားမည့် ဘင်္ဂါလီ ၂ ဦးကို ရခိုင်ပြည်နယ် စစ်တွေလေဆိပ်၌ ဖမ်းမိခဲ့ကြောင်း ရခိုင်ပြည်နယ် အစိုးရအဖွဲ့က သိရသည်။
စက်တင်ဘာလ ၁၉ ရက် ညနေ ၅ နာရီခွဲခန့်က အပြည်ပြည်ဆိုင်ရာ မြန်မာ့လေကြောင်းလိုင်းဖြင့် ရန်ကုန်သို့ လိုက်ပါမည်ခရီးသည်များအား မှတ်ပုံတင် စစ်ဆေးခြင်းဆောင်ရွက်စဉ် ခရီးသည် ၂ ဦး၏ မှတ်ပုံတင်ကို သံသယရှိသဖြင့် မြို့နယ်လဝကရုံးသို့ ပို့ဆောင်စစ်ဆေးခဲ့ရာမှ ဖမ်းဆီးမိခြင်း ဖြစ်သည်။
မှတ်ပုံတင်အတုပေါ်တွင် ၎င်းတို့၏အမည်နှင့် နေရပ်လိပ်စာများမှာ ကျော်ဌေး(၃၅)နှစ်၊ (ဘ)ဦးကျော်စန်း၊ သာယာကုန်းရွာ၊ စစ်တွေမြိုနယ်၊ ဝေယံထွန်း (၂၂)နှစ်၊ (ဘ)ဦးစိုးထွန်း၊ သက္ကေပြင်ရွာမကျေးရွာ၊ စစ်တွေမြိုနယ်ဟု ဖော်ပြထားသော်လည်း စစ်ဆေးချက်အရ ၎င်းတို၏ အမည်မှန်မှာ အဒူရော်ဟိန်း (၃၅)နှစ်၊ (ဘ)ဟာလာခမ်း၊ ဒါးပိုင်းရွာဟောင်း၊ စစ်တွေမြိုနယ်၊ အဒူရာမန် (၁၈)နှစ်၊ (ဘ)အဒူလာရှိန်း၊ သဲချောင်းကျေးရွာအုပ်စု၊ ဇင်ပိုင်ညှာရွာ၊ စစ်တွေမြို့နယ်နေသူတို့ဖြစ်ကြောင်း သိရသည်။
၎င်းတို့ ၂ ဦးမှာ ရန်ကုန်သို့ သွားရောက်ရန် မှတ်ပုံတင်အတုပြုလုပ်ပေးသူနှင့် ချိတ်ဆက်ခဲ့ပြီး လေယာဉ်လက်မှတ်အပါအဝင် တစ်ဦးလျှင် ငွေကျပ် ၁၀ သိန်း ပေးခဲ့ရကြောင်းနှင့် ရန်ကုန်လေဆိပ်တွင် ဆွေမျိုးတော်စပ်သူ ဆူလ်တန်အာမောက် ဆိုသူမှ လာရောက်ကြိုဆိုမည်ဖြစ်ပြီး ရန်ကုန်မှတစ်ဆင့် မလေးရှားနိုင်ငံသို့ သွားရောက်ရန် စီစဉ်ထားကြကြောင်းလည်း သိရသည်။
ယခုအခါ ယင်းဖမ်းဆီးရမိဘင်္ဂါလီ ၂ ဦးကို အမှုဖွင့်အရေးယူထားပြီး မှတ်ပုံတင်အတု ပြုလုပ်ပေးသူအား ဖမ်းဆီးရမိရေး ဆောင်ရွက်လျက်ရှိကြောင်း အစိုးရအဖွဲ့က သတင်းရရှိသည်။
#ymg/mt
#Yangon_Media_Group
#Local_News
Published - 20 September 2022
သက်တမ်းကုန်ဆုံးမည့် မော်တော်ယာဉ်နှင့်မော်တော်ဆိုင်ကယ်များအားလုံးကို ယာဉ်စစ်ဆေးခြင်းမပြုဘဲ ဖြေလျှော့၍ သက်တမ်းတိုးဆောင်ရွက်ပေးမည်ဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာန ကုန်းလမ်းပို့ဆောင်ရေးညွှန်ကြားမှုဦးစီးဌာနက စက်တင်ဘာလ ၁၉ ရက်က သတင်းထုတ်ပြန်လိုက်သည်။
ကိုဗစ်-၁၉ ကပ်ရောဂါကြောင့် ခေတ္တရပ်ဆိုင်းခဲ့ရသည့် မော်တော်ယာဉ်၊ မော်တော်ဆိုင်ကယ် နှစ်လဲသက်တမ်းတိုးလုပ်ငန်းများ ပြန်လည်ဖွင့်လှစ်ဆောင်ရွက်ရာတွင် ရုံးများ၌ လူစုလူဝေး အနည်းဆုံး ဖြစ်စေရေးနှင့် လုပ်ငန်းများ မြန်ဆန်စွာပြီးစီးရေးအတွက် တိုင်းဒေသကြီး၊ ပြည်နယ်၊ခရိုင်ရုံးများရှိ မှတ်ပုံတင်ထားသည့် မော်တော်ယာဉ်နှင့် မော်တော်ဆိုင်ကယ်များအနက် Road Safety ဖြစ်စေရေး အရေးကြီးသည့် အများပြည်သူသယ်ယူပို့ဆောင်သည့်ခရီးသည်တင်ယာဉ်များကိုသာ ယာဉ်စစ်ဆေး၍ အခြားမော်တော်ယာဉ်နှင့် မော်တော်ဆိုင်ကယ်များအားလုံးကို ယာဉ်စစ်ဆေးခြင်းမပြုဘဲ မှတ်တမ်းနှင့်သာ တိုက်ဆိုင်စစ်ဆေး၍ ယာဉ်စစ်ကင်းလွတ်ဖြင့် သက်တမ်းတိုးခြင်းကို သက်ဆိုင်ရာ ဌာနများသို ညွှန်ကြားထားရှိပြီးဖြစ်ကြောင်းလည်း ယင်းထုတ်ပြန်ချက်တွင် ဖော်ပြထားသည်။
ယင်းကြောင့် ပြည်သူသယ်ယူပို့ဆောင်သည့်ခရီးသည်တင်ယာဉ်များကိုသာ ယာဉ်စစ်ဆေး၍ အခြားမော်တော်ယာဉ် နှင့်မော်တော်ဆိုင်ကယ်များအားလုံးကို ယာဉ်စစ်ဆေးခြင်းမပြုဘဲ မှတ်တမ်းနှင့်သာတိုက်ဆိုင်စစ် ဆေး၍ ယာဉ်စစ်ကင်းလွတ်ဖြင့် သက်တမ်းတိုးဆောင်ရွက်ပေးသွားရန်ဖြစ်ကြောင်း သိရသည်။
#ymg/mt
#Yangon_Media_Group
#Local_News
Published_ 20 September 2022
ပညာရေးဝန်ကြီးဌာနအနေဖြင့် တက္ကသိုလ်နည်းပြ၊ သရုပ်ပြဆရာ/ဆရာမများအဖြစ် ၂၀၂၂ ခုနှစ် မေလ ၁၈ ရက်တွင် ၁၄၇၉ ဦး၊ စက်တင်ဘာလ ၁၅ ရက်တွင် ၈၆၂ ဦးဖြင့် စုစုပေါင်း ၂၃၄၁ ဦးကို ရွေးချယ်ခန့်အပ်နိုင်ခဲ့ကြောင်း သိရပါတယ်။
စက်တင်ဘာ ၁၉ ရက် နံနက်ပိုင်းတွင် ပညာရေးဝန်ကြီးဌာနမှာ ကျင်းပတဲ့ ပညာရေးဝန်ကြီးဌာနရဲ့ တက္ကသိုလ်၊ ဒီဂရီကောလိပ်များတွင် အသစ်ခန့်အပ်သော သစ်လွင်နည်းပြ၊ သရုပ်ပြ ဆရာဆရာမများအား ကြိုဆိုပွဲအခမ်းအနားတွင် ပညာရေး ဝန်ကြီးဌာနဝန်ကြီး ဒေါက်တာညွန့်ဖေရဲ့ ပြောကြားချက်အရ သိရပါတယ်။
ထို့ပြင်ဝန်ကြီးက သစ်လွင်နည်းပြ၊ သရုပ်ပြ ဆရာဆရာမများ အနေဖြင့် ပညာရည် မြင့်မားသည့် မျိုးဆက်သစ်များကို မွေးထုတ်ပေးရမည့် တာဝန်ရှိလာသည်နှင့်အညီ မိမိတို့ကိုယ်တိုင် ပညာအရည်အသွေး၊ အရည်အချင်းများ ပြည့်ဝအောင် အမြဲလေ့လာ သင်ယူနေကြရမယ်လို့ ဆိုပါတယ်။
အခမ်းအနားသို့ ဒုတိယဝန်ကြီး ဦးဇော်ဝင်း၊ အမြဲတမ်းအတွင်းဝန် ဒေါက်တာစိုးဝင်း၊ ဦးစီးဌာနများမှ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်များ၊ ဒုတိယ ညွှန်ကြားရေးမှူးချုပ်များနှင့် တာဝန်ရှိသူများ တက်ရောက်ကြပြီး တက္ကသိုလ်များ၊ ပညာရေး ဒီဂရီကောလိပ်များမှ ပါမောက္ခချုပ်များ၊ ကျောင်းအုပ်ကြီးများ၊ ဒုတိယ ပါမောက္ခချုပ်များ၊ ပါမောက္ခများနှင့် အသစ်ခန့်အပ်သော သစ်လွင်နည်းပြ၊ သရုပ်ပြ ဆရာဆရာမများက ဗီဒီယိုကွန်ဖရင့်ဖြင့် တက်ရောက်ခဲ့ကြကြောင်း သတင်းရရှိပါတယ်။
#ygm_mnn
#Yangon_Media_Group
Page 1404 of 1881
