#Local_News
Published _ 28 November 2022

ပြင်ဦးလွင်မြို့နယ်အတွင်း မောင်းနှင်လာသည့် အုတ်သယ်ယာဉ်တစ်စီးသည် လမ်းတွင်သွားလာနေသည့် နွားအုပ်အား ရှောင်တိမ်းရာ၌ အရှိန်လွန်၍ ယာဉ်တိမ်းမှောက်ပြီး နွားကျောင်းသားနှင့်ခရီးသည်တစ်ဦးသေဆုံးခဲ့ကြောင်း ဒေသနေ လူမှုကူညီရေးအသင်းမှ သိရသည်။

ဖြစ်စဉ်မှာ ယနေ့ နိုဝင်ဘာလ ၂၈ရက် နံနက်ပိုင်းအချိန်ခန့်တွင် ပြင်ဦးလွင်မြို့နယ်ရှိ ကျိုင်းထောင်းရွာနှင့် သင်္ဂတုံရွာအကြား၌ အုတ်သယ်ယာဉ်တစ်စီးဟာ နွားအုပ်ကို ရှောင်စဉ်ယာဉ်တိမ်းမှောက်မှုဖြစ်ပွားခဲ့ခြင်းဖြစ်သည်။

အဆိုပါ ဖြစ်စဉ်ကြောင့် နွားကျောင်းသားတစ်ဦးနှင့် ယာဉ်ပေါ်ပါလာသူ အမျိုးသမီးတစ်ဦး သေဆုံးခဲ့ပြီး ၃ဦးမှာ စိုးရိမ်ရဒဏ်ရာရရှိခဲ့ကြောင်း သန္တိသုခ အခမဲ့ လူမှုကူညီရေးအသင်းမှ ဆိုသည်။

ဖြစ်စဉ်အတွင်း နွား ၂ကောင်ပါ သေဆုံးခဲ့ပြီးသေဆုံးသူများ၏ ရုပ်အလောင်းများအား ပြင်ဦးလွင်ဆေးရုံသို့ အသင်းမှ လူနာတင်ယာဉ်နှစ်စီးဖြင့် ပို့ဆောင်ခဲ့ကြောင်း သိရှိရသည်။

#ymg/NN
#Yangon_Media_Group

#Local_News
Published_28 November 2022

၂၀၂၂ ခုနှစ်အတွင်း ရန်ကုန်တိုင်းဒေသကြီး၌ ရွှေဆိုင်ဖွင့်လှစ်ရန် လိုင်စင်အသစ်လျှောက်ထားသူ ၁၀၀ ကျော်ရှိပြီး နေ့ချင်းပြီးဆောင်ရွက်ပေးနေကြောင်း ရန်ကုန်တိုင်းဒေသကြီး ရွှေလုပ်ငန်းရှင်များအသင်းမှ ဥက္ကဋ္ဌ ဦးမျိုးမြင့်ကပြောသည်။

ရွှေကုန်သည် နှင့် ရွှေဆိုင်ပိုင်ရှင်များအနေဖြင့် လုပ်ငန်းလိုင်စင် အသစ်လျှောက်ထားခြင်း ၊ သက်တမ်းတိုး လိုင်စင်လျှောက်ထားခြင်းနှင့် ရွှေတုံး ရွှေခဲ လိုင်စင်လျှောက်ထားရာတွင် လုပ်ငန်းအကြီး၊ အလတ်၊ အသေး အမျိုးအစား ခွဲခြားဖော်ပြပြီး ရန်ကုန်တိုင်းဒေသကြီး ရွှေလုပ်ငန်းရှင်များ အသင်းသို့တင်ပြ၍ ထောက်ခံချက် ရယူရမည်ဖြစ်ကြောင်းသိရသည်။

ရန်ကုန်တိုင်းဒေသကြီးတွင် ရွှေဆိုင်လုပ်ငန်း တစ်သောင်းကျော်ရှိပြီး နှစ်စဉ် ဒီဇင်ဘာလကုန်၌ သက်တမ်းကုန်ဆုံးပြီး လာမည့် နှစ်အတွက် ရွှေလုပ်ငန်းလိုင်စင် သက်တမ်းတိုးခြင်းကိုလည်း ကြိုတင်ဆောင်ရွက်လျက်ရှိကြောင်း သိရသည်။

ယင်းအပြင် ရွှေအရောင်းအဝယ်လိုင်စင်ပြုလုပ်ထားခြင်းမရှိသော ရွှေဆိုင်များ၊ ရွှေအရောင်းအဝယ်လိုင်စင်ပြုလုပ်ကြရန်၊ မီးလင်းရွှေ အတုံးအခဲ အရောင်းအဝယ်ပြုလုပ်သူများ လိုင်စင်ပြုလုပ်ထားကြရန်နှင့် ဆိုရှယ်မီဒီယာများ၊ အွန်လိုင်းများမှ တစ်ဆင့် ရွှေအရောင်းအဝယ်ပြုလုပ်သူများအနေဖြင့်လည်း လိုင်စင်ပြုလုပ်ထားရန်ပြီး ပြီးခဲ့သည့် မေလတွင် အသိပေးကြေညာထားသည်။

#ymg/sth
#Yangon_Media_Group

#Local_News
Published_ 28 November 2022

လာမည့်နွေရာသီကာလတွင်ဓာတ်အားလိုအပ်ချက်ကို ပြည့်မီအောင်ဆောင်ရွက်မပေးနိုင်သေးသော်လည်း အချိန်ပိုင်းအလိုက်ပေးဝေနိုင်ရေး လုပ်ဆောင်သွားမည်ဖြစ်ကြောင်း လျှပ်စစ်စွမ်းအားဝန်ကြီးဌာနက သိရသည်၊၊

ယင်းသို့ပေးဝေရာတွင် ဓာတ်အားပြတ်တောက်မှု မဖြစ်ပေါ်စေရေးအတွက် ဓာတ်အားခွဲရုံများကို ကြိုတင်ထိန်းသိမ်းပြုပြင်ခြင်းလုပ်ငန်းများကို ဆောင်ရွက်လျက် ရှိကြောင်းနှင့် ဓာတ်အားပြတ်တောက်မှု၊ ဓာတ်အားပျောက်ဆုံးမှု လျော့နည်းစေရေးနှင့် ဓာတ်အားစနစ် တည်ငြိမ်တိုးတက်ကောင်းမွန်စေရေးတို့အတွက်လည်း ဓာတ်အားလိုင်းများကို သန့်ရှင်းရေးပြုလုပ်ခြင်း၊ ထိန်းသိမ်းပြုပြင်ခြင်း၊ အဆင့်မြှင့်တင်ခြင်း လုပ်ငန်းများကို ကြိုတင်ဆောင်ရွက်ကြမည် ဖြစ်ကြောင်း သိရသည်။

လက်ရှိတွင် ရန်ကုန်တိုင်းဒေသကြီးအတွင်း လျှပ်စစ်မီးကို အများပြည်သူသို့ အချိန်ပိုင်းဖြင့် ပေးနေရကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်း(YESC) က YMG ကို ပြောသည်။

ပြီးခဲ့သည့် နိုဝင်ဘာလ ၃ ရက် ညပိုင်းက ဘီလူးချောင်းရေအားလျှပ်စစ်ဓာတ်အားပေးစက်ရုံများမှထွက်ရှိသည့် လျှပ်စစ်ဓာတ်အားပို့လွှတ်ပေးလျက် ရှိသော ၁၃၂ ကေဗွီ ဘီလူးချောင်း(၂)-တီကျစ် နှစ်ထပ်ဓာတ်အားလိုင်း၏ တာဝါတိုင်(၂)တိုင်ကို အဖွဲ့တစ်ခုက မိုင်းခွဲဖျက်ဆီးခဲ့သည့် အတွက် နိုင်ငံတော်ဓာတ်အားစနစ်သို့ ပို့လွှတ်ပေးလျက်ရှိသည့် လျှပ်စစ်ဓာတ်အား(၇၀)မဂ္ဂါဝပ်လျော့နည်းနေခြင်းလည်း ဖြစ်သည်။

အဆိုပါ တာဝါတိုင်များကို မိုင်းခွဲ မခံရမီကလည်း ဘီလူးချောင်းရေအား လျှပ်စစ်ဓာတ်အားပေးစက်ရုံများမှ ဓာတ်အား (၂၄၀) မဂ္ဂါဝပ်ကို နိုင်ငံတော်ဓာတ်အားစနစ်သို့ ပိုလွှတ်ပေးလျက်ရှိသည့် အနက် ၂၃၀ ကေဗွီ ဘီလူးချောင်း(၂)-ရွှေမြိုမဟာဓာတ်အားလိုင်းမှ တာဝါတိုင်(၁၅)တိုင်ကို လက်နက်ကိုင်အဖွဲ့တစ်ခုက မိုင်းခွဲဖျက်ဆီးမှု (၆) ကြိမ်၊ ၂၃၀ ကေဗွီ ဘီလူးချောင်း(၂)- တောင်ငူမဟာဓာတ်အားလိုင်းမှ တာဝါတိုင် (၆)တိုင်ကို (၄)ကြိမ်၊ ၁၃၂ ကေဗွီ ဘီလူးချောင်း(၂)-တီကျစ် နှစ်ထပ်ဓာတ်အားလိုင်းမှ တာဝါတိုင်(၂၁)တိုင်ကို (၇)ကြိမ် ထိ အကြိမ်ကြိမ် ဖျက်ဆီးထားကြသေးကြောင်း လျှပ်စစ်ဝန်ကြီးဌာန၏ စာရင်းများတွင် ဖော်ပြထားသည်။

#ymg/tthl
#Yangon_Media_Group

#Local_News
Published _ 28 November 2022

ပြီးခဲ့သည့် နိုဝင်ဘာလ ဒုတိယအပတ်မှစ၍ မတ်ပဲဈေးနှုန်း တစ်တင်းလျှင်ကျပ် ၆၀၀၀၀ ဝန်းကျင်ဖြင့်ဈေးငြိမ်နေခဲ့ပြီး ယခု နိုဝင်ဘာလ နောက်ဆုံးအပတ်တွင် ၅သောင်း၆ထောင် ကျပ်ဖြင့် ဈေးငြိမ်သက်နေကြောင်း ဟင်္သာတကုန်စည်ဒိုင်မှ သိရသည်။

အဆိုပါ ဈေးသည်ပြီးခဲ့သည့် နိုဝင်ဘာလ တတိယအပတ်ဈေးနှင့်ယှဉ်ရင် ၁သောင်း၃ရာကျပ် ကွာဟနေပြီး မတ်ပဲဈေးကွက်လည်း ငြိမ်သက်နေလျှက်ရှိနေသည်။

ဧရာဝတီတိုင်းဒေသကြီးအတွင်း ဖြစ်ပေါ်ခဲ့သည့် မတ်ပဲဈေးနှုန်းများမှာ နိုဝင်ဘာလ ၃ ရက်တွင် တစ်တင်းလျှင် ကျပ် ၅၇၅၀၀၊ ၄ ရက်တွင် ကျပ် ၅၈၀၀၀ ၊ ၈ ရက်တွင် ကျပ် ၆၀၀၀၀၊ ၉ ရက်တွင်ကျပ် ၆၀၀၀၀၊ ၁၀ ရက်တွင် ကျပ် ၆၀၃၀၀၊ ၁၁ ရက်တွင် ကျပ် ၅၉၈၀၀၊ ၁၂ ရက်တွင် ကျပ် ၆၀၀၀၀၊ ၁၃ ရက်တွင် ကျပ် ၅၈၈၀၀ အသီးသီးဖြစ်ခဲ့သည်။

ဟင်္သာတကုန်စည်ဒိုင် ပေါက်ဈေးအရ ယမန်နေ့အထိ မတ်ပဲ (၂၀)ပိသာပါသည့် တစ်တင်းဝင် တစ်အိတ်လျှင် ငွေကျပ် ၅သောင်း၇ထောင်ဖြင့် ဈေးငြိမ်သက်နေလျှက်ရှိပြီး ယနေ့ နိုဝင်ဘာလ ၂၈ရက်ပေါက်ဈေးအရ ၅သောင်း၆ထောင် ကျပ်ဖြစ်ကြောင်း သိရှိရသည်။

အိန္ဒိယနိုင်ငံသို့တင်ပို့သည့် မြန်မာမတ်ပဲဈေးနှုန်းများမှာ မတ်ပဲ SQ ၁ တန်လျှင် CNF ဈေးနှုန်း $950 နှင့် FAQ ဈေးနှုန်း $815 ဖြစ်ပြီး၊ မတ်ပဲ FAQ ၏ FOB ဈေးနှုန်းမှာ ၁ တန်လျှင် $ 770 ဖြစ်ကြောင်း သိရှိရသည်။

နိုဝင်ဘာလအတွင်း၌ မြန်မာမတ်ပဲအား ကွန်တိန်နာ ၂၀-၂၅ ခန့်တင်ပို့ခဲ့ပြီး ပြည်တွင်းကုန်သည်များ၏ ခန့်မှန်းချက်အရ မြန်မာမတ်ပဲလက်ကျန် တန်ချိန် ၁၅၀၀၀ နှင့် ပဲစင်းငုံလက်ကျန် တန်ချိန် ၂၀၀၀၀ ခန့်မှန်း ကျန်ရှိနိုင်ကြောင်းလည်း သိရသည်။

မြန်မာမတ်ပဲ ပြန်လည်စိုက်ပျိုးရာသီချိန်တွင်ဖြစ်ပေါ်နေသည့် လက်ရှိဈေးနှုန်းမှာ အမြင့်ဆုံးဖြစ်နိုင်ပြီး အိန္ဒိယဘက်မှဝယ်လိုအားကြောင့် ဈေးအနည်းငယ်တက်လာနိုင်သော်လည်း ယခုထက်ပို ဈေးအမြင့်တန်းရရှိရန် မျှော်လင့်၍မရနိုင်ကြောင်းလည်း သုံးသပ်ထားကြသည်။

#ymg/NN
#Yagon_Media _Group

#Local_News
Published_ 28 November 2022

တရုတ်နိုင်ငံမှ ယူနန်ပြည်နယ်ချစ်ကြည်ရေးအသင်းနှင့် ယူနန်ပြည်နယ် ဖောင်ဒေးရှင်းကပေးသည့် အသားစားနွားမွေးမြူရေး နည်းပညာသင်တန်းကို မြန်မာသင်တန်းသား(၁၈၀)တက်ရောက်ခဲ့ကြောင်း မြန်မာနိုင်ငံဆိုင်ရာ တရုတ်သံရုံးမှသိရသည်၊၊

ယူနန်ပြည်နယ် ပြည်သူ့ပြည်ပချစ်ကြည်ရေးအသင်းနှင့် ယူနန်ပြည်နယ် အရပ်ဘက် နိုင်ငံတကာချစ်ကြည်ရင်းနှီးစွာ ကူးလူးဖလှယ်ရေး ဖောင်ဒေးရှင်းတို့သည် နိုဝင်ဘာလ ၂၁ ရက်မှ ၂၅ ရက်အထိ ၂၀၂၂ ခုနှစ် မြန်မာအသားစားနွား မွေးမြူရေးနည်းပညာသင်တန်းကို ကြီးမှူးကျင်းပခဲ့သည်။

အဆိုပါသင်တန်းသို့ မြန်မာနိုင်ငံ နေပြည်တော်၊ ရန်ကုန်၊ မန္တလေးစသည့် ဒေသန္တရအစိုးရ မွေးမြူရေးဌာနမှ အရာရှိများ၊ မွေးမြူရေးနည်းပညာဝန်ထမ်းများနှင့် မွေးမြူရေးသမားများ စုစုပေါင်း သင်တန်းသား သင်တန်းသူပေါင်း ၁၈၀ ခန့်တက်ရောက်ခဲ့သည်။

ယခုအကြိမ် နည်းပညာလေ့ကျင့်မှု၏ ရည်ရွယ်ချက်သည် မြန်မာနိုင်ငံရှိ နွားမွေးမြူသူများနှင့် သက်ဆိုင်ရာနယ်ပယ်မှ နည်းပညာဝန်ထမ်းများက ကမ္ဘာ့အသားစားနွားလုပ်ငန်း ဖွံ့ဖြိုးတိုးတက်မှုအခြေအနေ၊ မျိုးစိတ်ရွေးချယ်မှုကို နားလည်သိရှိရန်ကူညီပေးပြီး သင်တန်းသား သင်တန်းသူများက တိရစ္ဆာန်ရောဂါကာကွယ်ထိန်းချုပ်ရေး၊ အစာမြက်များ မျိုးစိတ်ရယူစမ်းသပ်သည့် သဘောတရားမှ လက်တွေ့စမ်းသပ်မှုအထိနားလည်သိရှိမှုကို မြှင့်တင်ရန်ဖြစ်သည်။

သင်ခန်းစာများတွင် အသားစားနွားတွင် ကြုံတွေ့ရလေ့ရှိသည့် ရောဂါ ကာကွယ်ကုသရေး၊ အသားစားနွားကူးစက်ရောဂါ ကာကွယ်ထိန်းချုပ်ရေး၊ အသားစားနွားမွေးမြူရေးနည်းပညာ၊ စားမြုံပြန်တတ်သောတိရစ္ဆာန်အစာကြမ်းများ ထုတ်ဖော်အသုံးချမှု၊ အသားစားနွားမွေးမြူရေးပုံစံအား ဆွေးနွေးမှုနှင့် မွေးမြူရေးအရင်းအနှီးထိန်းချုပ်မှု၊ အရည်အသွေးမြင့် တစ်ဖူးလိုက်ပြောင်းချဉ်ဖတ် ပြုလုပ်ခြင်းနည်းပညာစသည်တို့ ပါဝင်ကြောင်း သိရသည်၊၊

#ymg/tthl
#Yangon_Media_Group

#Local_News
Published_ 28 November 2022

တရုတ်နိုင်ငံ၊ ကွမ်ရှီးပြည်နယ်ရှိ Beibu ပင်လယ်ကွေ့ဆိပ်ကမ်း ချင်းကျိုးဆိပ်ကမ်းဇုန်မှ မြန်မာနိုင်ငံသို့တိုက်ရိုက်ရေလမ်းကြောင်း ပုံမှန်ပြေးဆွဲနေကြောင်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်အရသိရသည်၊၊

လက်ရှိတွင် အဆိုပါရေလမ်းကြောင်းသည် အလှည့်ကျပုံမှန်ပြေးဆွဲနေပြီဖြစ်ကာ အဓိကအားဖြင့် ကုန်းတွင်းပိတ်ဒေသ ကုမ္ပဏီများက စက်ပစ္စည်းစသည့် ပစ္စည်းများ တင်ပို့၍ စိုက်ပျိုးရေးတွဲဖက်ထွက်ကုန်များစသည့် မြန်မာနိုင်ငံထွက် အရည်အသွေးမြင့်ကုန်ပစ္စည်းများတင်သွင်းရန် ဝန်ဆောင်မှုပေးလျက်ရှိသည်ဟု ဆိုသည်၊၊

ချင်းကျိုးမှ စထွက်ကာ ၁၂ ရက်အကြာတွင် မြန်မာနိုင်ငံ ရန်ကုန်မြို့သို့ရောက်ရှိနိုင်ပြီး ယခင်သမားရိုးကျရေလမ်းကြောင်းများနှင့် နှိင်းယှဉ်ပါက တိုက်ရိုက်ရေလမ်းကြောင်းသည် ကြာချိန် ၈ ရက်လျှော့နည်းမည်ဖြစ်သည်။

၎င်းသည် မလေးရှားနိုင်ငံ ခလန်၊ မြန်မာနိုင်ငံ ရန်ကုန်၊ အင်ဒိုနီးရှားနိုင်ငံဘီလာဝမ်ကို တိုက်ရိုက်ရောက်ရှိနိုင်ပြီး တစ်ဆင့်ပြောင်းသည့် နည်းလမ်းဖြင့် မလေးရှားနိုင်ငံ Pasir Gudang ၊ ပီနန်၊ ဘင်္ဂလားဒေ့ရှ်နိုင်ငံ စစ်တကောင်းစသည့်ဆိပ်ကမ်းများသို့ ပို့ဆောင်နိုင်ကြောင်းသိရသည်၊၊

အလှည့်ကျပြေးဆွဲမှုကြောင့် ကုန်စည်စီးဆင်းမှု အထွေထွေအရင်းအနှီးကို အများအပြားလျှော့ချနိုင်ပြီး ဒေသနှစ်ခုအကြား ကုန်ပစ္စည်းပို့ဆောင်သော ဝန်ဆောင်မှုစံနှုန်းကိုမြှင့်တင်နိုင်သည်။

ဆန်ကွဲ၊ စိုက်ပျိုးရေးတွဲဖက်ထွက်ကုန်များ (Subsidiary Agricultural Products)၊ ခဲသတ္ထု၊ မြေသြဇာစသည်တို့သည် Beibu ပင်လယ်ကွေ့ဆိပ်ကမ်းနှင့် မြန်မာနိုင်ငံအကြား နိုင်ငံခြားကုန်သွယ်ရေးလုပ်ငန်း အသွားအလာရှိသည့် အဓိကကုန်ပစ္စည်း အမျိုးအစားများဖြစ်ကာ တရုတ်-မြန်မာပြည်သူများ၏ ကုန်ထုတ်လုပ်မှုနှင့် လူနေမှုဘဝနှင့်ပတ်သက်လျက်ရှိသည်၊၊

မြန်မာနိုင်ငံသို့ တိုက်ရိုက်ရေလမ်းကြောင်း စတင်ပြေးဆွဲပြီးနောက် အဆိုပါ ကုန်ပစ္စည်းများသည် ပိုမြန်ဆန်၍ ပိုသစ်လွင်သောပုံစံဖြင့် မြန်မာနိုင်ငံနှင့် တရုတ်နိုင်ငံ၏ စီးပွားရေးနှင့်ကုန်သွယ်ရေးဆက်ဆံမှုကို “အပြန်အလှန်အကျိုးပြုရန် အားဖြည့်ပေး” မည်ဖြစ်သည်။

အောက်တိုဘာလ ၂၈ ရက်တွင် ကွမ်ရှီးပြည်နယ် Beibu ပင်လယ်ကွေ့ဆိပ်ကမ်း ချင်းကျိုးဆိပ်ကမ်းဇုန်သို့ "SITC Venus" သင်္ဘောအဆင်ပြေချောမွေ့စွာ ဆိုက်ရောက်လာပြီး Beibu ပင်လယ်ကွေ့ဆိပ်ကမ်း ကွန်တိန်နာကုမ္ပဏီ အမှတ် (၃) ဆိပ်ခံတံတား ဆိုက်ကပ်ရပ်နားရာနေရာမှာ ဆိုက်ကပ်ခဲ့သဖြင့် Beibu ပင်လယ်ကွေ့ဆိပ်ကမ်း - မြန်မာတိုက်ရိုက်ရေလမ်းကြောင်း စတင်ပြေးဆွဲခြင်းကို သဘောဆောင်နေသည်ဟုလည်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်များအရ သိရသည်၊၊

#ymg/tthl
#Yangon_Media_Group