Published 8 Sept 2022

ရုရှားဖက်ဒရေးရှင်းနိင်ငံ၊ Primorskyဒေသရှိ ဗလာဒီဗော့စတော့ခ်မြို့မှာ မြန်မာကောင်စစ်ဝန်ချုပ်ရုံးနှင့် စီးပွားရေးစင်တာ Business Center တို့ကို အမြန်ဆုံးဖွင့်လှစ်နိုင်ရေးဆောင်ရွက်မယ်လို့သိရပါတယ်။

ရုရှားဖက်ဒရေးရှင်းနိုင်ငံကို ရောက်ရှိနေတဲ့ နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်ဟာ စက်တင်ဘာ ၈ ရက် ကြာသပတေးနေ့မှာ Primorskyဒေသ အစိုးရအဖွဲ့အကြီးအကဲ Mr. Oleg Nikolaevich Kozhemyako နှင့် တွေ့ဆုံရာမှာ ပြောကြားခဲ့ခြင်းဖြစ်တယ်လို့ နစကရဲ့သတင်းထုတ်ပြန်ချက်မှာ ဖော်ပြထားတာဖြစ်ပါတယ်။

တွေ့ဆုံဆွေးနွေးရာမှာ Primorskyဒေသ နှင့် မြန်မာနိုင်ငံတို့အကြား ကုန်စည်ပို့ဆောင်ရေး၊ပို့ကုန် သွင်းကုန်တိုးမြှင့်ရေး၊ မြန်မာ ကျောင်းသူကျောင်းသားတွေ ပညာတော်သင်များအဖြစ်လက်ခံရေး၊ လူငယ်များအတွေ့အကြံဖလှယ်သည့်အစီအစဉ်များတွင် မြန်မာလူငယ်တွေပါဝင်ရေးနှင့် မြန့်မာစိုက်ပျိုးရေးကဏ္ဍမှ တာဝန်ရှိသူတွေ လာရောက်လေ့လာစေလိုတာတွေကိုလည်း Primorskyဒေသ အစိုးရအဖွဲ့အကြီးအကဲက ကူညီဆောင်ရွက်ပေးမယ့်အခြေအနေတွေကို ပြန်လည်ပြောကြားဆွေးနွေးခဲ့တယ်လို့ သတင်းထုတ်ပြန်ထားပါတယ်။

အဲဒီ့အပြင် ဗိုလ်ချူပ်မှူးကြီးမင်းအောင်လှိုင်နှင့်အဖွဲ့ဟာ Republic of Buryatia ပြည်နယ်အစိုးရအဖွဲ့အကြီးအကဲ Mr. Aleksey Sambuyevich Tsydenov နှင့်အဖွဲ့တို့နှင့် အဲဒီပြည်နယ်ပြခန်းဆောင်၌ တွေ့ဆုံဆွေးနွေးခဲ့ကြပါတယ်။

မြန်မာနိုင်ငံနှင့် အဲဒီ Buryatia ပြည်နယ်တို့အကြား စီးပွားရေးပူးပေါင်းဆောင်ရွက်နိုင်မည့်အခြေအနေတွေကို ဆွေးနွေးခဲ့ကြတယ်လို့သိရပါတယ်။

ထို့အပြင်  နစက ဥက္ကဋ္ဌဟာ ဗလာဒီဗော့စတော့ခ်မြို့ Far Eastern Federal University (FEFU)အရှေ့ဖျားဖက်ဒရယ်တက္ကသိုလ် ပါမောက္ခချုပ် Mr.Boris Nikolaevich Korobetsနှင့်လည်း အဲဒီတက္ကသိုလ်မှာ မြန်မာနိုင်ငံနှင့်ပညာရေးပူးပေါင်းဆောင်ရွက်နိုင်မယ့်အခြေအနေတွေကိုဆွေးနွေးခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။

အဆိုပါတက္ကသိုလ်နှင့် မြန်မာနိုင်ငံမှ ရန်ကုန်နိုင်ငံခြားဘာသာတက္ကသိုလ်တို့ အကြားမကြာမီ သဘောတူညီချက်တစ်ရပ် လက်မှတ်ရေးထိုးမှာဖြစ်တယ်လို့သိရပြီး မြန်မာနိုင်ငံမှ သင်တန်းသားတွေလာရောက်ပါက အရှေ့ဖျားဖက်ဒရယ်တက္ကသိုလ်မှ စီမံဆောင်ရွက်ပေးနိုင်မယ့်အခြေအနေတွေကိုလည်း ပါမောက္ခချုပ်က ပြန်လည်ရှင်းလင်းပြောကြားခဲ့ကြောင်းသတင်းရရှိပါတယ်။

သက်တမ်း ၁၂၃နှစ်ရှိပြီဖြစ်တဲ့ အဆိုပါတက္ကသိုလ်ကြီးတွင် ပညာရပ်ပေါင်းစုံ၊နယ်ပယ်စုံသင်ကြားပေးလျက်ရှိပြီး မြန်မာနိုင်ငံမှ ဆေးဘက်ဆိုင်ရာပညာတော်သင်တွေစေလွှတ်ဖို့နှင့် တက္ကသိုလ်များအချင်းချင်း ဘာသာရပ်ပိုင်းဆိုင်ရာပူးပေါင်းဆောင်ရွက် ပညာရေးမြှင့်တင်နိုင်မည့် ကိစ္စတွေကို ဆွေးနွေးဆောင်ရွက်နိုင်ခဲ့တယ်လို့ နစကရဲ့သတင်းထုတ်ပြန်ချက်မှာဖော်ပြထားပါတယ်၊

Source: SAC’s information

Published 8 Sept 2022

မစ္စတာ ဂျိုးဘိုင်ဒင်ဟာ အမေရိကန်ရဲ့ (၄၆) ဦးမြောက်သမ္မတအဖြစ် တာဝန်ယူအပြီး ပထမဦးဆုံးသမ္မတအဖြစ်တက်ရောက်ခဲ့တဲ့ ကမ္ဘာ့ထိပ်သီးခုနှစ်နိုင်ငံညီလာခံ (G-7) မှာ အမေရိကန်ရဲ့ အရင်းနှီးဆုံး မဟာမိတ်များကို ' အမေရိကန် ပြန်လာပြီ ' ဆိုပြီး ယုံကြည်ချက်ရှိရှိ ပြောကြားခဲ့သော်လည်း ယခုအချိန်မှာတော့ ၎င်းတို့ထဲက တော်တော်များဟာ မျက်မှောက်ခေတ် အမေရိကန်ရဲ့ နိုင်ငံရေးအခင်းအကျင်းကြောင့် ဒီဘူတာဆီသို့ပဲ ပြန်ဆိုက်နေပြီလားဆိုပြီး စိုးရိမ်ပူပန်နေကြတယ်လို့ AP သတင်းတစ်ခုမှာ ဖတ်လိုက်ရပါတယ်။ ဘာကြောင့်ပါလဲ။

ယခုနှစ် ဇွန်လ၊ ဂျာမနီနိုင်ငံ၊ ဘေဗားရီရန်တောင်တန်းဒေသ (Bavarian Alps) မှာ ပြုလုပ်ခဲ့တဲ့ ဒီမိုကရက်တစ်စီးပွားရေးကို ဦးဆောင်ထားသူများ G-7 ထိပ်သီးခေါင်းဆောင်များနှင့်တွေ့ခဲ့စဉ်မှာတော့ သမ္မတဘိုင်ဒင်ဟာ နိုင်ငံတွင်း အစုအလိုက်အပြုံအလိုက်ပစ်ခတ်သတ်ဖြတ်မှုများ၊ ဖွဲ့စည်းပုံအခြေခံဥပဒေအရအကာအကွယ်ပေးထားသော ကိုယ်ဝန်ဖျက်ချခြင်းကိုပယ်ဖျက်လိုက်တဲ့ တရားရုံးချုပ်ရဲ့ ဆုံးဖြတ်ချက်စတဲ့ နိုင်ငံရေးမငြိမ်မသက်မှုများရဲ့ ပြည်တွင်းရေးဝန်စည်စလွယ်များကိုပါ သူနှင့်အတူတစ်ပါတည်း သယ်ဆောင်လာခဲ့ဟန်တူပါတယ်။ မကြာသေးခင် တစ်နှစ်အကျော်က သမ္မတဟောင်း ဒေါ်နယ်လ်ထရမ့် ရွေးကောက်ပွဲမှာ ရှုံးနိမ့်အပြီး သူ့ကို ထောက်ခံသူများက အမေရိကန်လွှတ်တော်အဆောက်အဦကို ဝင်ရောက်တိုက်ခိုက် စီးနင်းခဲ့တဲ့ ၂၀၂၁ ခုနှစ်၊ ဇန်နဝါရီ (၆) ရက်နေ့ ဖြစ်ရပ်ဟာ လွန်စွာမှ အကျည်းတန်လှလွန်းပြီး နိုင်ငံရေးရန်ပွဲတွေ ဖြစ်လာနေပြီဆိုတဲ့ သတိပေးခေါင်းလောင်းသံဆိုရင်လည်း မမှားပါဘူး။ ဒါကြောင့် အမေရိကန်ရဲ့ အကောင်းဆုံးနေ့ရက်များရောက်လာမည်ဆိုတဲ့ စကားလုံးဟာလည်း ယုံကြည်ဖို့ ပိုခက်ခဲလာပြီး နောက်ထပ် စိတ်ဓာတ်ကျဖွယ် အကြောင်းပြချက်များအနက် စီးပွားရေးဖိအားဟာလည်း လူမှုရေးတင်းမာမှုများကို လှုံ့ဆော်ပေးနေပါတယ်။

အမေရိကားဟာ အခြားအခြားသော နိုင်ငံများမှ ရွှေ့ပြောင်းလာသူများအဖို့ အိပ်မက်နိုင်ငံဖြစ်ပါတယ်။ ကမ္ဘာ့ဒီမိုကရေစီစံနှုန်းအမြင့်မားဆုံးနိုင်ငံတွေထဲက တစ်ခုဖြစ်တဲ့ အမေရိကန်ပြည်ထောင်စုဟာ အကဲဆတ်လှတဲ့ ပြည်တွင်းရေးမတည်ငြိမ်မှုများ၊ ယိုယွင်းလာတဲ့ ဒီမိုကရေစီစံနှုန်း သွေဖယ်မှုများ၊ အထူးသဖြင့် ငွေကြေးဖောင်းပွမှု၊ စီးပွားရေးကျဆင်းမှုနဲ့ ကြွေးမြီပြသနာတွေကို ယနေ့မျက်မှောက်ခေတ်မှာ ရင်ဆိုင်ခံစားနေရတာကို ကမ္ဘာ့သတင်းမီဒီယာတွေမှတဆင့် သိမြင်လာနေကြရပါတယ်။

ဒါတွေဟာ လက်ရှိသမ္မတ ဂျိုးဘိုင်ဒင်အစိုးရအတွက် ရတက်မအေးစရာ စိန်ခေါ်မှုတွေပဲ ဖြစ်ပါတယ်။

လက်နက်(သေနတ်) ကိုင်ဆောင်ခွင့်ပြဌာန်းချက်နှင့် လူ့အခွင့်အရေးချိုးဖောက်မှုများ

လူဦးရေ သန်းပေါင်း (၃၃၀) ကျော် မှီတင်းနေထိုင်လျက်ရှိတဲ့ အမေရိကန်ပြည်ထောင်စုရဲ့ ပြည်တွင်းရေးမတည်ငြိမ်မှုများအနက် သေနတ်ဖြင့် မထင်ရင်မထင်သလို အစုလိုက်အပြုံလိုက်ပစ်ခတ်သတ်ဖြတ်ခံရမှုအခြေအနေဟာဆိုးရွားလွန်းလှပါတယ်။ မှတ်တမ်းများအရ အမေရိကန်ဟာ အခြားသော လက်နက်ကိုင်ဆောင်ခွင့်ရရှိတဲ့ ကမ္ဘာ့နိုင်ငံများအကြားမှာလည်း ဖြစ်ပွားမှုအကြိမ်ရေအများဆုံးဖြင့် ပြိုင်စံရှားရပ်တည်လျက်ရှိနေပါတယ်။

လွန်ခဲ့တဲ့ နှစ်ပေါင်း (၅၀) ကျော်ကာလအတွင်းကို အခြေအနေကို မဖော်ပြဘဲနှင့်တောင် ယခုနှစ် ၂၀၂၂ ခုနှစ် သြဂုတ်လကုန်အထိအတွင်းမှာပဲ ပြည်ထောင်စုတစ်ဝှမ်းလုံး အစုလိုက်အပြုံလိုက် သေနတ်ဖြင့် ပစ်ခတ်ခံရမှုအရေအတွက်ပေါင်းဟာ (၄၇၁) ကြိမ်အထိရှိနေပြီး အဲဒိအထဲမှာ သေနတ်သမားအပါအဝင် ပြည်သူ (၅၀၆) ဦးဟာ အသက်ခန္ဓာစွန့်ခွာခဲ့ရသလို လူပေါင်း (၁၉၆၂) ဦး ဒဏ်ရာရရှိခဲ့တယ်လို့ လေ့လာတွေ့ရှိခဲ့ရပါတယ်။ ယခုနှစ် ပစ်ခတ်မှုတွေအနက် စာသင်ကျောင်းနဲ့ တက္ကသိုလ်မှာ ဖြစ်ပွားခဲ့တာ အကြိမ်ရေ (၃) ကြိမ်ဖြစ်ပါတယ်။

ဒီလို မမျှော်မှန်းနိုင်သော ကြေကွဲဖွယ်ဖြစ်ရပ်များအပေါ် အမေရိကန်ရဲ့ မဟာမိတ်ဘက်နိုင်ငံများက ထိတ်လန့်တုန်လှုပ်လျက်ရှိပြီး ပြစ်တင်ရှုတ်ချနေကြပါတယ်။

ဒါ့အပြင် ယခုနှစ် ဇူလိုင်လအတွင်းမှာလည်း ကော်လိုရာဒိုပြည်နယ်၊ ဒန်ဗာမြို့မှာနေထိုင်တဲ့ မြန်မာရွှေ့ပြောင်းနေထိုင်သူ ' မခိုင် ' ဆိုသူ  လူမှုအသင်းအဖွဲ့ခေါင်းဆောင်အမျိုးသမီးတစ်ဦးဟာ သေနတ်သမားတစ်ဦးရဲ့ ရက်စက်စွာ ရမ်းသမ်းပစ်ခတ်မှုမှာ ကြက်ကလေး၊ ငှက်ကလေး သေသလို အသက်ပေးခဲ့ရပါတယ်။ ဖြစ်ဖြစ်ချင်းမှာ သူမရဲ့ သားဖြစ်သူက 911 ကို (၅) ကြိမ်ဖုန်းခေါ်ဆိုခဲ့သလို အိမ်နီးချင်းတွေကလည်း အကူအညီရဖို့ အကြိမ်ကြိမ်ဖုန်းခေါ်ဆိုခဲ့ပါတယ်။ ဒါပေမယ့် ဖုန်းဖြေကြားခြင်းမရှိဘဲ လျစ်လျူရှုခံခဲ့ရပါတယ်။

ဒါဟာ အမေရိကန်ရဲ့ ဒီမိုကရေစီစံနှုန်းနဲ့ တန်းတူညီမျှမှုအပေါ် မေးခွန်းထုတ်စရာဖြစ်ပါတယ်။ တစ်ချိန်တည်းမှာပဲ မိတ်ဘက်နိုင်ငံတွေအကြားမှာ အမေရိကန်ရဲ့ လက်နက်ကိုင်ဆောင်ခွင့်အပေါ် စိုးရိမ်မှုတွေလည်းကြီးမားလာနေပါတယ်။

ဒီလိုမျိုး ပြသနာတွေတင်မကဘဲ အမေရိကန်နိုင်ငံဟာ လူ့အခွင့်အရေးစံချိန်စံနှုန်းတွေကိုပါ တစ်ဖြည်းဖြည်းချင်း ရိုက်ချိုးလာနေတယ်လို့ ဝေဖန်မှုတွေလည်းရှိနေပြန်ပါတယ်။ ထင်ရှားတဲ့အကြောင်းတစ်ခုကတော့ ပြည်နယ်အစိုးရအား ကိုယ်ဝန်ဖျက်ချခြင်းကိုတားမြစ်ခွင့်ပြုလိုက်တဲ့ အထက်တရားရုံးရဲ့ ဆုံးဖြတ်ချက်ကြောင့် အချို့သော အမေရိကန်ရဲ့ အနီးစပ်ဆုံး မိတ်ဖက်များထံမှ နောက်ထပ်စွပ်စွဲရှုတ်ချမှုအသစ်များကို မြင်တွေ့လာရပြီး နိုင်ငံကို စိုးရိမ်ပူပန်မှုများတိုးပွားလာအောင်လည်း မီးမွှေးပေးသကဲ့သို့ဖြစ်ခဲ့တယ်လို့သုံးသပ်မှုတွေရှိလာပါတယ်။

စီးပွားရေးကျဆင်းမှုဝဲဂယက်နှင့်သမ္မတဘိုင်ဒင်၏စိန်ခေါ်မှုများ

ပြည်တွင်းရေးမတည်ငြိမ်မှု၊ လူ့အခွင့်အရေးချိုးဖောက်မှုအပါအဝင် ဒီမိုကရေစီစံနှုန်းများ ဆိုးရွားစွာကျဆင်းနေခြင်းစတဲ့ ပြသနာများကြားကပင် အမေရိကန်ဟာ စီးပွားရေးကျဆင်းမှု ဝဲဂယက်ထဲ တဖြည်းဖြည်းချင်း မြုပ်ဆင်းနေပြန်ပါတယ်။

ဇွန်လ (၁၇) ရက်၊ သောကြာနေ့က ထုတ်ဝေခဲ့တဲ့ နောက်ဆုံး IBD/TIPP စီးပွားရေးအကောင်းမြင်ညွှန်ကိန်း (Economic Optimism Index) ရဲ့ စစ်တမ်းမှာ အမေရိကန်ဟာ စီးပွားရေးကျဆင်းမှုတစ်ခုအတွင်း ဝင်ရောက်နေပြီလို့ နိုင်ငံသား ထက်ဝက်ကျော်က ယူဆကြောင်း ဖော်ပြထားပါတယ်။ အဲဒိစစ်တမ်းအရ အမေရိကန်နိုင်ငံသား (၅၃) ရာခိုင်နှုန်းကျော်က စီးပွားရေးကျဆင်းမှုတစ်ခုအတွင်း သွားနေကြောင်း ယူဆကြပြီး (၂၅) ရာခိုင်နှုန်းက သူတို့ သေချာမသိဘူးလို့ ပြောဆိုကြပါတယ်။ (၂၀) ရာခိုင်နှုန်းကတော့ အမေရိကန်ဟာ စီးပွားရေးကျဆင်းခြင်းမရှိဘူးလို့ ယုံကြည်နေကြပါတယ်။

မရေရာမှုကြားကပင် ပြီးခဲ့တဲ့လများအတွင်း စီးပွားရေးအပေါ် စိုးရိမ်ပူပန်မှုများက သိသိသာသာ မြင့်တက်လာခဲ့ပါတယ်။ ကမ္ဘာကျော်သတင်းစာ နယူးစ်ဝိခ် (News Week) ရဲ့အဆိုအရ မေလတုန်းက အမေရိကန်နိုင်ငံသားထက်ဝက်အောက်ဖြစ်တဲ့ (၄၈) ရာခိုင်နှုန်းက စီးပွားရေးကျဆင်းနေတယ်လို့ဆိုသော်လည်း (၂၃) ရာခိုင်နှုန်းကတော့ အမေရိကန်နိုင်ငံဟာ စီးပွားရေးကျဆင်းခြင်းမရှိဘူးလို့ သိရှိရပါတယ်။

ဒါ့အပြင် စီးပွားရေးအင်အားကြီးမားတယ်ဆိုတဲ့ အမေရိကန်ဟာ ကြွေးမြီပြသနာများကို ရင်ဆိုင်နေရသလို ငွေကြေးဖောင်းပွမှုနှုန်းဟာလည်း နှစ်ပေါင်း (၄၀) ကျော်မှာ မျှော်မှန်းတာထက်ကို မြင့်တက်နေပါတယ်။ ယခုနှစ် ဇူလိုင်လမှာ အမေရိကန်ရဲ့ ငွေကြေးဖောင်းပွမှုနှုန်းဟာ (၈.၅) ရာခိုင်နှုန်းကို ရောက်ရှိခဲ့ပါတယ်။

ဇွန်လ (၁၆) ရက်၊ ကြာသပတေးနေ့မှာ အမေရိကန်စတော့ဈေးကွက်တစ်ခုဖြစ်တဲ့ Dow Jones Average ဟာ တစ်နှစ်ခွဲအတွင်း ၃၀,၀၀၀အောက် ပထမဆုံးအကြိမ် ကျဆင်းခဲ့ပါတယ်။

အဲဒိသီတင်းပတ်အတွင်း အမေရိကန်ဟာ ကာလအတန်ကြာဈေးကျဆင်းသည့် (ဈေးကွက်အခေါ် - Bear Market) တစ်ခုအတွင်းသို့ ၂၀၂၀ ပြည့်နှစ်နောက်ပိုင်း ပထမဆုံးအကြိမ် ဝင်ရောက်ခဲ့ခြင်းဖြစ်ကာ ယင်းမှာ အမေရိကန်သမ္မတ ဂျိုးဘိုင်ဒင်ရဲ့ သမ္မတရာထူးကာလအတွင်း ပထမဆုံး Bear Market ဖြစ်ပါတယ်။ စတော့ရှယ်ယာဈေးကွက်တစ်ခုဟာ ရှည်ကြာသောကာလတစ်ခုအတွင်း အနည်းဆုံး ၂၀% ကျဆင်းတဲ့အခါ "Bear Market" ဟူသော အသုံးအနှုန်းကို အသုံးပြုပြီး ယင်းသည် စီးပွားရေးကျဆင်းမှုတစ်ခုကို အချက်ပြတာလည်းဖြစ်ပါတယ်။

နိုင်ငံအနေနဲ့ ဘိုင်ဒင်ရဲ့ စီးပွားရေးကိုင်တွယ်နိုင်စွမ်းကိုလည်း စိုးရိမ်ပူပန်နေကြပြီဖြစ်ကာ ဒီမိုကရက်တစ်ပါတီဝင်များကပင် ဘိုင်ဒင်အပေါ် ယုံကြည်မှုမရှိကြပေ။ (၄၅) ရာခိုင်နှုန်းကသာ သမ္မတကို အကောင်းမြင်ကြပြီး ဤသည်မှာ မနှစ်က ယခုအချိန် ဒီမိုကရက်တစ်ပါတီဝင် (၈၀) ရာခိုင်နှုန်းက ဘိုင်ဒင်သည် စီးပွားရေးကို ကောင်းစွာကိုင်တွယ်နေတယ်လို့ ထင်မြင်ခဲ့ကြခြင်းကနေ သိသိသာသာ ကျဆင်းသွားခြင်းဖြစ်ပါတယ်။

စစ်တမ်းများအရ ရီပတ်ဘလစ်ကန်ပါတီဝင် (၁၀) ယောက်မှာ (၈) ယောက်ကျော်၊ တစ်သီးပုဂ္ဂလ (၁၀) ယောက်မှာ (၆) ယောက်နီးပါးက ဘိုင်ဒင်ကို စီးပွားရေးကျရှုံးသောအဆင့်အဖြစ် သတ်မှတ်ကြကြောင်း လေ့လာသိရှိရပါတယ်။

ဤအရေအတွက်များကြောင့် ရီပတ်ဘလစ်ကန်ပါတီက အောက်လွှတ်တော်ကို ပြန်လည်ရယူရန် ရည်ရွယ်ထားတဲ့ နိုဝင်ဘာလကြားဖြတ်ရွေးကောက်ပွဲမှာ လွှတ်တော်အမတ်နေရာများကို များနိုင်သမျှများအောင် တတ်နိုင်သမျှ ထိန်းထားရန်မျှော်လင့်နေကြတဲ့  ဒီမိုကရက်များအတွက် အခက်အခဲများပင် ဖြစ်တယ်လို့ သုံးသပ်ရပါတယ်။

မကြာသေးမီကထွက်ရှိလာတဲ့ စစ်တမ်းများအရ ငွေကြေးဖောင်းပွမှုနှင့် ဈေးနှုန်းမြင့်တက်ခြင်းဟာ အမေရိကန်အများစုအတွက် ထိပ်တန်းပြဿနာတစ်ခုဖြစ်ကြောင်းဖော်ပြထားပါတယ်။ အမေရိကန် (၁၀) ယောက်မှာ (၈) ယောက်ကျော်က ကြားဖြတ်ရွေးကောက်ပွဲများတွင် သူတို့ ဘယ်လိုမဲပေးမည်ဆိုတာကို ဆုံးဖြတ်ကြတဲ့နေရာမှာ စီးပွားရေးဟာ အဓိကပြဿနာတစ်ခုဖြစ်လာလိမ့်မယ်လို့ ပြောကြားခဲ့ကြပါတယ်။

ဒါ့အပြင် စီးပွားရေးအခြေအနေဟာ ကြားဖြတ်ရွေးကောက်ပွဲပြီးနောက် စိုးရိမ်စရာအဖြစ် ဆက်လက်ရှိနေဦးမယ်ဆိုရင် ဘိုင်ဒင်အတွက် ရွေးကောက်ပွဲ ပြန်လည်အနိုင်ရနိုင်ခြေဟာ ပို၍ခက်ခဲနိုင်ချေရှိမယ်လို့ ထင်မြင်ယူဆမိပါတယ်။

"၂၀၂၄ ခုနှစ်မှာ ငွေကြေးဖောင်းပွမှုဟာ နည်းနည်းလေးတောင် ကောင်းမလာဘူးဆိုရင် ဒီမိုကရက်တစ်ပါတီဝင်တွေဟာ ငွေကြေးအရဖိအားများနေတဲ့ မဲဆန္ဒရှင်တွေရဲ့ ဆန့်ကျင်မှုကို ရင်ဆိုင်ရတော့မှာပါ" ဆိုပြီး ဟူးစတန်တက္ကသိုလ်မှ နိုင်ငံရေးသိပ္ပံပါမောက္ခတစ်ဦးဖြစ်သူ ဘရန်ဒန် ရော့တင်ဟောက်စ်က ယခင်က နယူးစ်ဝိခ်သတင်းစာကို ပြောကြားခဲ့ဖူးပါတယ်။

"ဒါဟာ လက်ရှိပါတီအတွက် ဘယ်တော့မှ ကောင်းတဲ့အနေအထား မဟုတ်ပါဘူး" လို့ သူက ပြောပါတယ်။

အမေရိကန်ပြန်လာမှာလား

မစ္စတာ ဂျိုးဘိုင်ဒင်ဟာ အမေရိကန်ရဲ့ (၄၆) ဦးမြောက်သမ္မတအဖြစ် တာဝန်ယူအပြီး မနှစ်က သူ ပထမဦးဆုံးသမ္မတအဖြစ်တက်ရောက်ခဲ့တဲ့ ကမ္ဘာ့ထိပ်သီးခုနှစ်နိုင်ငံညီလာခံ (G-7) မှာ အမေရိကန်ရဲ့ အရင်းနှီးဆုံး မဟာမိတ်များကို ' အမေရိကန် ပြန်လာပြီ ' ဆိုပြီး ယုံကြည်ချက်ရှိရှိ ပြောကြားခဲ့ဖူးပါတယ်။

ယခုအချိန်မှာတော့ ၎င်းတို့ထဲက တော်တော်များဟာ အမေရိကန်ဟာ ဒီဘူတာဆီသို့ပဲ ပြန်ဆိုက်နေပြီလားဆိုပြီး စိုးရိမ်ပူပန်နေကြတယ်လို့ AP သတင်းတစ်ခုမှာ ဖတ်လိုက်ရပါတယ်။ ဘာကြောင့်ပါလဲ။

သမ္မတဖြစ်ပြီးတစ်နှစ်အကြား အမေရိကန်ရဲ့ ဦးဆောင်မှုကို ပြည်သူအများစုက အလေးထားခဲ့ကြတယ်ဆိုပေမယ့် မငြိမ်မသက်မှုလမ်းကြောင်းဆီသွားနေတဲ့ မျက်မှောက်ခေတ် အမေရိကန်ရဲ့ နိုင်ငံရေးအခင်းအကျင်းကြောင့် အဲဒိလိုအမြင်မျိုးကို ကြီးမားစွာဆန့်ကျင်နေပြီလို့ ယူဆမိပါတယ်။

ယခုနှစ် ဇွန်လ၊ ဂျာမနီနိုင်ငံ၊ ဘေဗားရီရန်တောင်တန်းဒေသ (Bavarian Alps) မှာ ပြုလုပ်ခဲ့တဲ့ ဒီမိုကရက်တစ်စီးပွားရေးကို ဦးဆောင်ထားသူများ G-7 ထိပ်သီးခေါင်းဆောင်များနှင့်တွေ့ခဲ့စဉ်မှာတော့ သမ္မတဘိုင်ဒင်ဟာ နိုင်ငံတွင်း အစုအလိုက်အပြုံအလိုက်ပစ်ခတ်သတ်ဖြတ်မှုများ၊  ဖွဲ့စည်းပုံအခြေခံဥပဒေအရအကာအကွယ်ပေးထားသော ကိုယ်ဝန်ဖျက်ချခြင်းကိုပယ်ဖျက်လိုက်တဲ့ တရားရုံးချုပ်ရဲ့ ဆုံးဖြတ်ချက်စတဲ့ နိုင်ငံရေးမငြိမ်မသက်မှုများရဲ့ ပြည်တွင်းရေးဝန်စည်စလွယ်များကိုပါ သူနှင့်အတူတစ်ပါတည်း သယ်ဆောင်လာခဲ့ဟန်တူပါတယ်။

.

သမ္မတဘိုင်ဒင်ဟာ အမေရိကန်ရဲ့ ပြသနာများစွာကို စိန်ခေါ်မှုများစွာနဲ့ ထမ်းပိုးနေရသလို တစ်ချိန်တည်းမှာပဲ နိုဝင်ဘာလကြားဖြတ်ရေးကောက်ပွဲများအတွက် တကျော့ပြန် ဒေါ်နယ်လ်ထရမ့်ကို ယှဉ်ပြိုင်ရဖို့ကလည်း ရှိနေပါတယ်။

ယခင်သမ္မတဟောင်း ဒေါ်နယ်လ်ထရမ့်ရဲ့ ကမ္ဘာကျော်ရေပန်းစားခဲ့တဲ့ "အမေရိကန်သာပထမ" စကားလုံးကို လက်ရှိ သမ္မတဂျိုးဘိုင်ဒင်ရဲ့ ' အမေရိကန်ပြန်လာပြီ ' က ဘယ်လောက်အထိ လွှမ်းမိုးနိုင်ခဲ့ပြီလဲ။

ဒီနေရာမှာ တစ်ခုရှိတာက ကိစ္စရပ်အကြောင်းအချင်းအရာအမျိုးမျိုးမှာ G-7 နိုင်ငံအများစုဟာ အမေရိကန်ထက်ပို၍ လစ်ဘရယ်ဆန်လေ့ရှိကြပါတယ်။ ဘိုင်ဒင်ကို သမ္မတအဖြစ် ရွေးချယ်မှုအပြီး သမ္မတဒုတိယသက်တမ်းကို ဆုံးရှုံးလိုက်ရတဲ့ ထရမ့်ရဲ့ ကပြောင်းတိကပြောင်းပြန်စုံစမ်းစစ်ဆေးခြင်းတွေဟာ ပြည်သူများအကြား စိတ်ရှုပ်စရာတွေ ဖြစ်ပေါ်ခဲ့ပြီး နိင်ငံရေးစနစ်တည်ငြိမ်တယ်ဆိုတဲ့ ဝါရင့်ဒီမိုကရေစီနိုင်ငံတစ်ခုအပေါ် သမ္မတဘိုင်ဒင်ပြောခဲ့တဲ့ " အမေရိကန်ပြန်လာပြီ " ဆိုတဲ့ သတင်းစကားဟာ မဟာမိတ်နိုင်ငံများမှ နိုင်ငံသားများအနေဖြင့် နေ့စဉ်နေ့တိုင်း ပြန်လည်စိစစ်တွေးတောလိုစိတ်များ အသစ်ထပ်မံပေါ်ပေါက်နေမှုနှင့် ကြုံတွေ့နေရတယ်ဆိုတာ မမှားပါဘူး။

မကြာသေးခင် တစ်နှစ်အကျော်က သမ္မတဟောင်း ဒေါ်နယ်လ်ထရမ့် ရွေးကောက်ပွဲမှာ ရှုံးနိမ့်အပြီး သူ့ကို ထောက်ခံသူများက အမေရိကန်လွှတ်တော်အဆောက်အဦကို ဝင်ရောက်တိုက်ခိုက် စီးနင်းခဲ့တဲ့ ၂၀၂၁ ခုနှစ်၊ ဇန်နဝါရီ (၆) ရက်နေ့ ဖြစ်ရပ်ဟာ လွန်စွာမှ အကျည်းတန်လှလွန်းပြီး နိုင်ငံရေးရန်ပွဲတွေ ဖြစ်လာနေပြီဆိုတဲ့ သတိပေးခေါင်းလောင်းသံဆိုရင်လည်း မမှားပါဘူး။

ဒါကြောင့် အမေရိကန်ရဲ့ အကောင်းဆုံးနေ့ရက်များရောက်လာမည်ဆိုတဲ့ စကားလုံးဟာလည်း ယုံကြည်ဖို့ ပိုခက်ခဲလာပြီး နောက်ထပ် စိတ်ဓာတ်ကျဖွယ် အကြောင်းပြချက်များအနက် စီးပွားရေးဖိအားဟာလည်း လူမှုရေးတင်းမာမှုများကို လှုံ့ဆော်ပေးနေပါတယ်။

အမေရိကန်ရဲ့ (၁၆) ဦးမြောက်သမ္မတ အေဗရာဟင်လင်ကွန်းက ပြောစကားတစ်ခုရှိပါတယ်။ သူဟာ အမေရိကန်ပြည်တွင်းစစ်ကို အဆုံးသတ်ပေးသူ၊ ကျွန်စနစ်ကို ဖျက်သိမ်းပေးသူစတဲ့ ဂုဏ်ဒြပ်များဖြင့် ထင်ရှားသူတစ်ဦးဖြစ်ပါတယ်။

သူပြောဆိုခဲ့တာကို အနှစ်ချုပ်ပြန်ကြားရမယ်ဆိုရင် အောက်လွှတ်တော်နှင့် အထက်လွှတ်တော်တို့ဟာ မျှတစွာ မရပ်တည်နိုင်ဘူးဆိုရင် နောင်အနာဂတ်မှာ မူမမှန်တဲ့ နိုင်ငံရေးရှုပ်ထွေးမှုတွေကို ဖိတ်ခေါ်သလို ဖြစ်နေလိမ့်မယ်ဆိုတာပါ။ ဒါဟာ မျက်မှောက်ခေတ် အမေရိကန်နိုင်ငံရဲ့ အခင်အကျင်းကို အမျှော်အမြင်ရှိရှိ ထောက်ရှုခဲ့တာပါဖြစ်ပါတယ်။ အဲဒါဟာ သမ္မတကြီးအေဗရာဟင်လင်ကွန်းရဲ့ စေတနာစကားဖြစ်ပြီး သူက ယခုအမေရိကန်ပြည်ထောင်စုရဲ့ အခင်းအကျင်းကို ကြိုမြင်ပါတယ်။

နှစ်ကာလများစွာ ဖြတ်သန်းပြီးနောက်  အမေရိကန်လွတ်လပ်ရေးနေ့ဟာ (၂၄၆) ကြိမ်တောင် တိုင်ခဲ့ပြီးဖြစ်ပါတယ်။ သတင်းအရင်းမြစ်များရဲ့ ဖော်ပြချက်အရ နိုင်ငံသားတွေဟာ ယခုအချိန်အထိ အမေရိကန်ဟာ ဘာကို ကိုယ်စားပြုနေသလဲဆိုပြီး ဝိရောဒိ ကွဲပြားလျက်ရှိနေပါတယ်။ မည်သို့ပင်ဆိုစေ အမေရိကန်ဟာ အမေရိကန်ပဲ ဖြစ်နေဦးမှာ ဖြစ်ပြီး သူ့ရဲ့ ရှိရင်းစွဲ ပြည်တွင်းရေးပြသနာများနဲ့ နိုင်ငံတကာစိန်ခေါ်မှုတွေကို အမြစ်မတွယ်အောင် လုပ်ဆောင်သွားဖို့ အချိန်တန်နေပြီဖြစ်ပါတယ်။

ထွန်းသစ်နိုင်

(ကိုးကား- နိုင်ငံတကာသတင်းများ)

Published 8 Sept 2022

ထိပ်တန်းအစိုးရအရာရှိကြီးတစ်ဦးကို ပြောင်လှောင်တာလို့ အများမြင်ထားတဲ့ လူကြည့်များဗွီဒီယိုတစ်ခုကြောင့် နာမည်ကြီးသွားတဲ့ ဗီယက်နမ်က ခေါက်ဆွဲသည်တစ်ဦးကို ဖမ်းဆီးလိုက်တယ်လို့ရဲကပြောပါတယ်။ဒါဟာ ဗီယက်နမ်ရဲ့ ကွန်မြူနစ်အစိုးရက သူ့အပေါ်ဝေဖန်သူတွေကို နောက်ဆုံးနှိမ်နှင်းမှုတစ်ခုဖြစ်ပါတယ်လို့ ရိုက်တာကရေးပါတယ်။

ဒါနန်းမြို့မှာ  အမဲသားခေါက်ဆွဲဆိုင်ကလေး ဖွင့်ထားတဲ့ အသက် ၃၈နှစ်အရွယ် ဘွီတွမ်လမ်းကို  အာဏာရပါတီရဲ့ လမ်းညွှန်ချက်နှင့်မူဝါဒတွေကို ထင်ယောင်ထင်မှားဖြစ်စေတဲ့ အကြောင်းအရာတွေကို အွန်လိုင်းတင်ပြီး နိုင်ငံတော်ကို ဆန့်ကျင်ဝါဒဖြန့်တယ်လို့ စွပ်စွဲပြီး သူ့ကို ဖမ်းဆီးခဲ့တာလို့ ရဲတပ်ဖွဲ့က သတင်းထုတ်ပြန်ပါတယ်။

ဘယ်ကိစ္စနှင့်ဆိုတာတော့ အတိအကျပြောမထားပါဘူး။

၂၀၂၁ခုနှစ်မှာ ဗီယက်နမ်ရဲ့ အာဏာတန်ခိုးထွားတဲ့ ပြည်သူ့လုံခြုံရေးဝန်ကြီးဟာ လန်ဒန်က စားသောက်ဆိုင်တစ်ဆိုင်မှာ တူရီကီစားဖိုမှူးရဲ့ ရွှေမံထားတဲ့ အမဲသားကင်စားနေတဲ့ ဗွီဒီယိုပေါ်ထွက်လာပြီးနောက် သူဟာ ဟိတ်ဟန်များပြီး ကျော်ကြားလှတဲ့ စားဖိုမှူး နတ်ရက် ဂိုဆီ ဒါမှမဟုတ် Salt Bae ပုံစံဖမ်းပြီး  သူ့ကိုယ်သူ ဗွီဒီယိုရိုက်ခဲ့တဲ့အတွက်  ရဲက သူ့ကို ဆင့်ခေါ်တာခံခဲ့ရပါတယ်။

“ လမ်း နိုင်ငံတော်ဆန့်ကျင်တဲ့ အရပ်ဖက်အဖွဲ့အစည်းတော်တော်များများမှာ အဖွဲ့ဝင်လည်းဖြစ်တယ်”လို့ ရဲတပ်ဖွဲ့ရဲ့ သတင်းထုတ်ပြန်ချက်ထဲမှာ ဖော်ပြထားပါတယ်။ ခေါင်းဆောင်တွေနှင့်သူတို့ရဲ့ ဂုဏ်ူသိက္ခာ‌ေကို စော်ကားမော်ကား လုပ်တာတွေမပြုလုပ်ဖို့ အာဏာပိုင်တွေက သူ့ကို ထပ်ခါထပ်ခါသတိပေးခဲ့ပါတယ်လို့ ရဲတပ်ဖွဲ့ကပြောပါတယ်။

သူ့ကိုဆင့်ခေါ်စဉ်က လမ်းက ဝန်ကြီးကို တစ်ပွဲကို ဒေါ်လာ ၂၀၀၀အထိ ရောင်းတဲ့ အသားကင်နှင့်ပတ်သက်လို့ လှောင်ပြောင်တာမဟုတ်ဘူးလို့ ငြင်းဆိုခဲ့ပါတယ်။

နယူးယောက်အခြေစိုက် လူ့အခွင့်အရေးစောင့်ကြည့် အဖွဲ့က လမ်းကို ချက်ခြင်းလွှတ်ပေးဖို့ နှင့် သူတို့ရဲ့အမြင်ကိုဖော်ပြနေတဲ့ ပြည်သူတွေကိုဖမ်းဆီးတာတွေရပ်ဖို့ တောင်းဆိုထားပါတယ်။

“ လှောင်ပြောတာဟာ ခံစားချက်ကိုဖော်ပြတဲ့ တရားဝင်ပုံစံတစ်ခုဖြစ်ပြီး ဒါကို ရာဇဝတ်မှုလို့ မသတ်မှတ်သင့်ဘူး” လို့ အဲဒီအဖွဲ့ရဲ့ ဒုတိယ အာရှညွှန်ကြားရေးမှူး ဖီးလ်ရောဘင်ဆန်ကပြောပါတယ်။

Source: Reuters

#Vietnam_Politics

#Bui_Tuan_Lam

#Salt_Bae

Published 6 Sept 2022

အမေရိကန်နိုင်ငံမှာ ငွေကြေးဖောင်းပွမှုဟာ ဆယ်စုနှစ်လေးခုအတွင်း အမြင့်မားဆုံးအခြေအနေသို့ ရောက်ရှိနေပါတယ်။ အဲဒီအခြေအနေကို လျော့ပါးစေဖို့ အမေရိကန် သမ္မတ ဂျိုး ဘိုင်ဒန်က ငွေကြေးဖောင်းပွမှုလျှော့ချရေး အက်ဥပဒေကို ဩဂုတ်လ ၁၆ ရက်နေ့တွင် လက်မှတ်ရေးထိုးခဲ့ပါတယ်။

အမေရိကန်ရဲ့ ၂၀၂၂ ခုနှစ် ငွေကြေးဖောင်းပွမှုလျှော့ချရေးအက်ဥပဒေဟာ

ပြည်တွင်းစွမ်းအင်ထုတ်လုပ်မှုတွင် ရင်းနှီးမြုပ်နှံပြီး ကျန်းမာရေးစောင့်ရှောက်မှု ဆေးဝါးကုန်ကျစရိတ်များကိုလျှော့ချနေစဉ်လိုငွေပြမှုနှင့် ငွေကြေး ဖောင်းပွမှု ကို လျှော့ချနိုင်ဖို့ ပုံစံချရေးဆွဲထားတာ ဖြစ်ပါတယ်။

ဒါပေမယ့် အဲဒီအက်ဥပဒေဟာ အမေရိကန်ရှိ အိမ်ထောင်စုတွေအပေါ် အခက်အခဲများဖြစ်ပေါ်စေလျက်ရှိတဲ့ ဈေးနှုန်းမြင့်တက်မှုကို အမှန်တကယ်ထိန်းညှိပေးနိုင်မလားဆိုတာကတော့ မေးခွန်းထုတ်စရာဖြစ်နေပါတယ်။

သမ္မတ ဂျော့ဂ်ျ ဒဗလျူ. ဘုရှ်ရဲ့ အကြံပေးအဖြစ် တာဝန်ထမ်းဆောင်ခဲ့ပြီး၊ နောက်ပိုင်းမှာ CBO ရဲ့ ဒါရိုက်တာဖြစ်လာခဲ့သူ ဒေါဂလက်စ် ဟို့ဇ်-အီကင်က ‘ကျန်းမာရေးစောင့်ရှောက်မှုရဲ့ ထောက်ပံ့ပေးမှုဟာ ဆေးဝါးအချို့ရဲ့ ကုန်ကျစရိတ်ကို လျှော့ချပေးနိုင်မှာဖြစ်ပေမယ့်လည်း ဆေးဝါးအသစ်များရဲ့ ဖွံ့ဖြိုးတိုးတက်မှုများကိုတော့ နှောင့်နှေးစေဖွယ်ရှိနေပြီး၊ ဆေးဝါးကုမ္ပဏီများမှာ ရင်းနှီးမြှုပ်နှံမှုအသစ်များကို လျော့ကျစေနိုင်တယ်’ လို့ စောဒကတက်ထားပါတယ်။

ဥပဒေမှာ အားနည်းချက်တွေလည်းရှိနေပြီး ဓာတ်ငွေ့နဲ့ အစားအစာဈေးနှုန်းများ မြင့်တက်မှု၊ ငှားရမ်းခနဲ့ စားသောက်ဆိုင် အစားအစာဈေးနှုန်းများ မြင့်တက်မှုတို့ကိုတော့ တိုက်ရိုက်ကိုင်တွယ်ဖြေရှင်း နိုင်ဖွယ်မရှိသေးပါဘူး။ထို့အတွက် ကဏ္ဍစုံမှာ ငွေကြေးဖောင်းပွမှုတိုက်ဖျက်‌ရေးအတွက်တော့ ထိရောက်ဖွယ်ရှိမလာနိုင်သေးပါဘူး။

ဆန်းစစ်သုံးသပ်မှုများအရတော့ ဥပဒေဟာ အမေရိကန်အိမ်ထောင်စု သန်းပေါင်းများစွာအတွက် ဆေးဝါးနဲ့ စွမ်းအင်ကုန်ကျစရိတ်များကို လျှော့ချပေးနိုင်မှာဖြစ်ပြီး၊ စုဆောင်းငွေများကို တိုးမြှင့်ပေးနိုင်မှာဖြစ်ပါတယ်။ဒါပေမဲ့ အဆိုပါပစ္စည်းတွေဟာ အိမ်ထောင်စုတွေရဲ့ ဘတ်ဂျက်မှာ အနည်းငယ်မျှသာနေရာယူထားတာဖြစ်ပါတယ်။ အမေရိကန် စားသုံးသူဈေးနှုန်း အညွှန်းကိန်းမှာတော့ ဆေးဝါးများဟာ အသုံးစရိတ်ရဲ့ ၁ ရာခိုင်နှုန်းသာရှိနေပြီး၊ လျှပ်စစ်နဲ့ သဘာဝဓာတ်ငွေ့အသုံးပြုမှုများကတော့ ၃ ဒဿမ ၆ ရာခိုင်နှုန်းအထိ ရှိနေတာဖြစ်ပါတယ်။

ထောက်ပံ့မှုများကိုရရှိမယ့် အိမ်ထောင်စုများဟာ ငွေတွေကို အခြားနေရာများဖြစ်ကြတဲ့ ငှားရမ်းခများပေးဆောင်မှု၊ ဓာတ်ငွေ့နဲ့ အစားအစာများ ဝယ်ယူမှုတို့မှာ အသုံးပြုလာဖွယ်ရှိတဲ့အတွက်လည်း ဈေးနှုန်းများမကျဆင်းသရွေ့ ငွေကြေးဖောင်းပွမှုဟာ ဆက်လက်ဖြစ်ပေါ်ဖွယ်ရှိနေပါတယ်လို့ဆိုပါတယ်။

ရီပတ်ဘလစ်ကန်များဘက်ကတော့ သမ္မတ ဂျိုး ဘိုင်ဒန်ရဲ့ ဆောင်ရွက်မှုများကို သက်တမ်းဝက် ရွေးကောက်ပွဲအတွက် မဲဆွယ်ဖို့ ကြိုးပမ်းမှုများလို့ ရှုမြင်ပြီး၊ အမှန်တကယ်လည်း သမ္မတ ဘိုင်ဒန်အပေါ် ကျဆင်းနေတဲ့ ထောက်ခံမှုများဟာ ယခုဥပဒေကြောင့် ပြန်လည်မြင့်တက်လာနိုင်ချေရှိနေပါတယ်။

အမေရိကန် သမ္မတ ဂျိုး ဘိုင်ဒန် လက်မှတ်ရေးထိုးခဲ့တဲ့ ငွေကြေးဖောင်းပွမှုလျှော့ချရေး ဥပဒေအပေါ် အလုံးစုံသုံးသပ်ရမယ်ဆိုရင်တော့ အမေရိကန်နိုင်ငံမှာ ဆယ်စုနှစ်လေးခုအတွင်း အမြင့်မားဆုံးဖြစ်လာခဲ့တဲ့ ငွေကြေးဖောင်းပွမှုကို တိုက်ဖျက်ရေးအတွက် ကဏ္ဍစုံမှာ ကြီးမားတဲ့ အကျိုးသက်ရောက်မှု မရှိနိုင်သေးဘဲ ကဏ္ဍအနည်းအကျဉ်းမှာသာ အနည်းငယ် အကျိုးသက်ရောက်နိုင်တဲ့အတွက် ဒါဟာ  သက်တမ်းဝက် ရွေးကောက်ပွဲအတွက် ထောက်ခံမှုရရှိရန် ကြိုးပမ်းမှုတစ်ခုသာ ဖြစ်ဖွယ်ရှိနေပါတယ်။

Source: VOA

#Inflation_Reduction _Act

#US_Inflation

#US_Mid_term_Elections

Published 6 Sept 2022

မြန်မာနိုင်ငံနှင့် ရုရှားနိုင်ငံတို့အကြား နျူကလီးယားစွမ်းအင်နည်းပညာ ပူးပေါင်းဆောင်ရွက်ရေး လုပ်ငန်းစဉ်ဆိုင်ရာ စာချွန်လွှာတစ်ခုကို စက်တင်ဘာ (၆)ရက် အင်္ဂါနေ့က လက်မှတ်ရေးထိုးခဲ့ကြတယ်လို့ နစကရဲ့ သတင်းထုတ်ပြန်ချက်အရ သိရပါတယ်။

မြန်မာနိုင်ငံ သိပ္ပံနှင့်နည်းပညာဝန်ကြီးဌာန၊ လျှပ်စစ်စွမ်းအားဝန်ကြီးဌာနနှင့် ရုရှားနိုင်ငံပိုင် အဏုမြူကော်ပိုရေးရှင်း Rosatom State Corporationတို့အကြား ရှေ့ဆက်လက်ဆောင်ရွက်သွားမည့် လုပ်ငန်းစဉ်ဆိုင်ရာ သဘောတူညီမှု စာချွန်လွှာတစ်ရပ်ကို လက်မှတ်ရေးထိုးခဲ့ကြတာဖြစ်တယ်လို့ သတင်းမှာဖော်ပြထားပါတယ်။

အဲဒီစာချွန်လွှာလက်မှတ်ရေးထိုးပွဲမှာ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်ရဲ့ရှေ့မှောက်တွင် မြန်မာနိုင်ငံ သိပ္ပံနှင့် နည်းပညာဝန်ကြီးဌာန ပြည်ထောင်စုဝန်ကြီး ဦးမျိုးသိန်းကျော်၊ လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးသောင်းဟန်တို့နှင့် Rosatom State Corporation ရဲ့အမှုဆောင်အရာရှိချုပ် မစ္စတာ အဲလက်ဇီအက်ဗ်ဂျင်နီဗစ်လီခါရှက်ဖ် ( Mr. Alexey Evgenievich Likhachevi) တို့က လက်မှတ်ရေးထိုးခဲ့ကြတာဖြစ်ပါတယ်။

လက်မှတ်မရေးထိုးခင် နစက ဥက္ကဋ္ဌနှင့် အဖွဲ့ဝင်တွေဟာ Rosatom State Corporation အမှုဆောင်အရာရှိချုပ်နှင့်အဖွဲ့ဝင်တွေနှင့် နျူကလီးယားစွမ်းအင်နည်းပညာ ပူးပေါင်းဆောင်ရွက်မှု နယ်ပယ်တွေမှာ  အတွေ့အကြုံနှင့် နည်းပညာတွေ လေ့လာခွင့်ရရှိနိုင်မည့် အခြေအနေတွေနှင့် နှစ်နိုင်ငံပြည်သူလူထုအကျိုးရှိစေမည့်  ကဏ္ဍတွေမှာ ပူးပေါင်းဆောင်ရွက်နိုင်မည့်အခြေအနေတွေ၊ နျူကလီးယားစွမ်းအင်ကို နိုင်ငံသူ နိုင်ငံသားများရဲ့ လူမှုဘဝ စီးပွားဖွံ့ဖြိုးတိုးတက်ရေအတွက် ငြိမ်းချမ်းစွာ အသုံးပြုနိုင်ရေး ပူးပေါင်းဆောင်ရွက်မှုတွေအတွက် လုပ်ငန်းစဉ်တွေ ချမှတ်ဆောင်ရွက်မည့် အစီအစဉ်တွေ၊ နျူကလီးယားစွမ်းအင်ကို လျှပ်စစ်ဓာတ်အားထုတ်လုပ်ရေးကဲ့သို့သော လုပ်ငန်းအပါအဝင် သိပ္ပံနှင့် သုတေသနစမ်းသပ်ခြင်း၊ ဆေးဝါးထုတ်လုပ်ခြင်း၊စက်မှုကဏ္ဍနှင့် ကဏ္ဍပေါင်းစုံတွင် အကျိုးရှိရှိ အသုံးပြုနိုင်ရေးတွေကို ကျယ်ကျယ်ပြန့်ပြန့်ဆွေးနွေးခဲ့ကြတယ်လို့ သတင်းထုတ်ပြန်ချက်မှာဖော်ပြထားပါတယ်။

နစကဥက္ကဋ္ဌနှင့်အဖွဲ့ဝင်တွေဟာ အင်္ဂါနေ့မနက်ပိုင်းမှာ အရှေ့ဖျားစီးပွားရေးဖိုရမ်မှာ ခင်းကျင်းပြသထားတဲ့ပြခန်းတွေကိုလည်း ကြည့်ရှုလေ့လာခဲ့ကြတယ်လို့သိရပါတယ်။ အဲဒီပြခန်းတွေထဲမှာ RZD Russian Railways ကုမ္ပဏီရဲ့ ရထားလုပ်ငန်းဆိုင်ရာပြခန်း၊ Rus Hydroelectric Power Generationကုမ္ပဏီပြခန်း၊VEB.RF Investment ကုမ္ပဏီပြခန်း၊Aeroflot Airline ပြခန်းတွေပါဝင်တယ်လို့ သတင်းထုတ်ပြန်ထားပါတယ်။

Source: SAC’s Information

#Russia_Myanmar

#Rosatom_State_Corporation

#EEF_Russia

Published 5 Sept 2022

အော်ရီဒူးမြန်မာကို စင်္ကပူမှာ ရုံးချုပ်ထားရှိတဲ့ နည်းပညာကုမ္ပဏီ The One Matrix Ventures (TOMV) ကို ရောင်းချဖို့ စီစဉ်နေတယ်လို့ အဲဒီအစီအစဉ်နှင့် တိုက်ရိုက်ပတ်သက်တဲ့ လူပုဂ္ဂိုလ်(၃)ဦးကို ကိုးကားပြီး ရိုက်တာက ရေးသားလိုက်ပါတယ်။

တယ်လီဖုန်းဆက်သွယ်ရေး အခြေခံအဆောက်အအုံတွေနှင့် နည်းပညာကို လုပ်ဆောင်တဲ့ အဲဒီ TOMV ကုမ္ပဏီကို မြန်မာစီးပွားရေးလုပ်ငန်းရှင် ဦးမျိုးမြင့်အုန်းက ပိုင်ဆိုတာဖြစ်ပြီး သူဟာ စင်္ကာပူ တယ်လီကွမ်း ကုမ္ပဏီ ကမ်ပါနာ အုပ်စု Campana Group ကိုလည်း ဦးဆောင်နေသူဖြစ်တယ်လို့ ရိုက်တာကဆိုပါတယ်။

ဒိုဟာအခြေစိုက် အော်ရီဒူးဟာ ဦးမျိုးမြင့်အုန်းကို လုပ်ငန်းရောင်းချဖို့ ရည်ရွယ်ထားတာကို မြန်မာနိုင်ငံ ဆက်သွယ်ရေးညွှန်ကြားမှုဦးစီးဌာနထံ  အကြောင်းကြားထားပြီးဖြစ်ပေမယ့် ခွင့်ပြုဖို တရားဝင်တောင်းဆိုထားတာတော့ မရှိဘူးလို့ အရင်းအမြစ်တစ်ခုက ရိုက်တာကိုပြောပါတယ်။

ဒီလိုရောင်းချရာမှာ အာဏာပိုင်ရဲ့ ခွင့်ပြုချက်အပေါ်မူတည်နေပါတယ်လို့ လည်း ဒီကိစ္စရင်းနှီးတဲ့သူတစ်ဦးက ပြောပါတယ်။

ရောင်းချမယ့် ဈေးနှုန်းကိုတော့ အဲဒီသူကပြောဆိုဖို့ငြင်းဆိုပါတယ်။

အိုရီဒူးကလည်း ဘာမှတုန့်ပြန်ချက်မပေးပါဘူး။

TOMV ရဲ့ အမှုဆောင်ညွှန်ကြားရေးမှူး အလန်ဆင်ဖီးလ်ကလည်း သူ့အနေနှင့် မှတ်ချက်ပေးနိုင်တဲ့ရာထူးမရှိဘူးလို့ ရိုက်တာကို ဖြေကြားပါတယ်။

ပို့ဆောင်ရေးနှင့်ဆက်သွယ်ရေးဝန်ကြီးဌာန ဒုတိယအမြဲတန်းအတွင်းဝန် ဦးမိုးကျော်စိုးကလည်း ဒီကိစ္စသူမသိဘူးလို့ ရိုက်တာကို ပြောပါတယ်။

Source.Reuters

#Ooredoo_Myanmar

#The_One_Matrix_Vent

#Myo_Myint_Ohn