Published_29 August 2022

ရန်ကုန်တိုင်းဒေသကြီး အင်းစိန်ဗဟိုအကျဉ်းထောင်ကို ဩဂုတ်လ ၂၂ ရက်တွင် ၆၀ မမ စိန်ပြောင်းဖြင့် ပစ်ခတ်ခဲ့သည့် ထွန်းထွန်းဟန်(ခ)ဝသုန် အား ၆၀ မမ စိန်ပြောင်း ၁ လက်နှင့်အတူ ဩဂုတ်လ ၂၃ ရက်တွင် မော်လမြိုင်မြို့၊ လှိုင်ရပ်ကွက်၊ မြို့ရှောင်လမ်း၊ ဘိုကလိုလမ်းသွယ်ရှိ STAR FAMILY တည်းခိုခန်း၌ ဖမ်းဆီးရမိခဲ့ကြောင်း နစက အနေဖြင့် ထုတ်ပြန်လိုက်သည်။

ယင်း၏ထွက်ဆိုချက်အရ ဩဂုတ်လ ၂၄ ရက် နံနက်ပိုင်းတွင် ကျိုက်မရောမြို့နယ်၊ ပိန္နဲကုန်းကျေးရွာ၊ ကင်းစုရပ်ကွက်၌ ပြည့်ဖြိုးပိုင်နှင့် မျိုးဇော်လင်း တို့အားလည်းကောင်း၊ ယင်းနေ့ညနေပိုင်းတွင် မြောက်ဥက္ကလာပမြို့နယ်၊ ဝေဘာဂီလမ်းအနီးရှိ (ဌ)ဈေး၌ အောင်ဇော်မြင့်(ခ)စစ်နိုင်နှင့် သန့်စင်တို့အား လည်းကောင်း၊ ဩဂုတ်လ ၂၅ ရက် နံနက်ပိုင်းတွင် အင်းစိန်မြို့နယ်၊ မြို့သစ်(ဂ)ရပ်ကွက်၊ သရဖီလမ်း၌ မျိုးမင်းဇော်(ခ)ပါကျဲ အားလည်းကောင်း ထပ်မံဖမ်းဆီးရမိခဲ့ကြောင်း သိရသည်။

ထို့အပြင် ဩဂုတ်လ ၂၆ ရက် နံနက်ပိုင်းတွင် အင်းစိန်မြို့နယ်၊ ရွာမအနောက်ရပ်ကွက်၊ ဖန်ချက်စက်လမ်း၌ နေထိုင်သည့် ဆက်စပ်တရားခံ ထိန်လင်း၏နေအိမ်ကို သွားရောက်ရှာဖွေခဲ့ရာ ထိန်လင်းမှာ ထွက်ပြေးတိမ်းရှောင်နေပြီး သံသယတရားခံများဖြစ်သည့် သူဇာသင်းနှင့် ဉာဏ်ထက်ဇံ တို့အား ထပ်မံဖမ်းဆီးရမိခဲ့ကြောင်း၊ယင်းကြောင့် စုစုပေါင်း အမျိုးသားကျား ၇ ဦး၊ အမျိုးသမီး ၁ ဦးတို့ကို ဖမ်းဆီးရမိခဲ့ကြောင်း သိရသည်။

ယင်းတို့အဖွဲ့အနေဖြင့် ရန်ကုန်တိုင်း ဒေသကြီးအတွင်း ဧပြီလ ၁၀ ရက်တွင် ကမာရွတ်မြို့နယ်၊ အင်းလျားလမ်းပေါ်ရှိ ဇော်ဂျီလမ်း လုံခြုံရေးဂိတ်ကို လက်နက်ငယ်ဖြင့် ပစ်ခတ်တိုက်ခိုက်ခဲ့ခြင်း၊ဇူလိုင်လ ၁၉ ရက်တွင် လှိုင်မြို့နယ်၊ ဘူတာရုံအနီးရှိ ရထားလမ်းလွှဲပြုလုပ်သော Control Box ကို လက်လုပ်မိုင်း ၂ လုံးဖြင့် ပစ်ခတ် ဖောက်ခွဲဖျက်ဆီးခြင်းတို့ကိုလည်း ကျူးလွန်ခဲ့ကြကြောင်း ထွက်ဆိုထားကြောင်း သတင်းထုတ်ပြန်ချက်တွင် ဖော်ပြထားသည်။

ymg/mt
#Yangon_Media_Group

Published_ 29 Aug 2022
နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် သျှမ်းပြည် ပြန်လည်ထူထောင် ရေးကောင်စီ(RCSS) အဖွဲ့ဥက္ကဋ္ဌ ဗိုလ်ချုပ်ကြီး ယွက်ဆစ် ဦးဆောင်တဲ့ ငြိမ်းချမ်းရေး ကိုယ်စားလှယ် အဖွဲ့အား ဒီကနေ့နံနက်ပိုင်းတွင် နေပြည်တော်၌ တွေ့ဆုံ၍ ငြိမ်းချမ်းရေး ဆိုင်ရာကိစ္စရပ်များ ဆွေးနွေးခဲ့ကြောင်း သိရပါတယ်။
တွေ့ဆုံရာ၌နစကဥက္ကဌက စည်းကမ်းပြည့်ဝတဲ့ပါတီစုံဒီမိုကရေစီစနစ်ကျင့်သုံးရေး၊ ဒီမိုကရေစီနှင့် ဖက်ဒရယ်စနစ်ကိုအခြေခံတဲ့ ပြည်ထောင်စုတည်ဆောက်ရေးကို နိုင်ငံရေး မျှော်မှန်းချက်အဖြစ် ကြိုးပမ်းဆောင်ရွက်လျက်ရှိသည့် အခြေအနေများ၊ ဖွဲ့စည်းပုံအခြေခံ ဥပဒေ (၂၀၀၈ ခုနှစ်) နှင့် တစ်နိုင်ငံလုံးပစ်ခတ် တိုက်ခိုက်မှုရပ်စဲရေး သဘောတူစာချုပ် (NCA) တို့ကိုအခြေခံ၍ ငြိမ်းချမ်းရေးလမ်းကြောင်းကို ဆက်လက်ဖော်ဆောင်သွားမယ့် အခြေအနေများကို ရှင်းလင်းဆွေးနွေးခဲ့ပါတယ်။

ထို့နောက် RCSS အဖွဲ့ဥက္ကဋ္ဌနှင့် အဖွဲ့ဝင်များက ဒီမိုကရေစီနှင့်ဖက်ဒရယ်စနစ်ကို အခြေခံသော ပြည်ထောင်စုတည်ဆောက်ရေး၊ ငြိမ်းချမ်းရေးလုပ်ငန်းစဉ်၊ ဒေသဖွံ့ဖြိုး တိုးတက်ရေး၊ ဖက်ဒရယ်စနစ်ကျင့်သုံး ဆောင်ရွက်ရေး၊ နိုင်ငံရေးပြဿနာများကို နိုင်ငံရေး နည်းဖြင့် ဖြေရှင်းရေး၊ ပြည်သူလူထုတို့၏ လူနေမှုဘဝမြှင့်တင်ရေး၊ လက်နက်ကိုင် ပဋိပက္ခ နှင့် အကြမ်းဖက်မှုများပပျောက်ရေး၊ ရှေ့ဆက်လက်ဆောင်ရွက်သွားမယ့် လုပ်ငန်းစဉ်များ နှင့် ပတ်သက်၍ သဘောထားအမြင်များကို တင်ပြဆွေးနွေးကြပါတယ်။
ဆွေးနွေးတင်ပြမှုများနှင့်ပတ်သက်၍ နစကဉက္ကဌက နိုင်ငံတော်ရဲ့ ပထဝီဝင် အနေ အထားအရ အရေးပါမှုနှင့် မိမိတို့နိုင်ငံနှင့်ကိုက်ညီသည့် နိုင်ငံခြားရေးမူဝါဒကို ကျင့်သုံး ဆောင်ရွက်နေတဲ့ အခြေအနေများ၊ ကမ္ဘာပေါ်တွင် ဒီမိုကရေစီနှင့် ဖက်ဒရယ်စနစ်ကို ကျင့်သုံးဆောင်ရွက်တဲ့နိုင်ငံ အများအပြားရှိကြပြီး မိမိတို့နိုင်ငံ၏ ပထဝီဝင်အနေအထား၊ အမျိုးသားရေး စရိုက်လက္ခဏာ၊ ယဉ်ကျေးမှုတို့နှင့် ကိုက်ညီသည့် ဖက်ဒရယ်စနစ်ကိုသာ ဖော်ဆောင်ကျင့်သုံးဆောင်ရွက်ရန်လိုအပ်တဲ့ အခြေအနေများ၊ စစ်မှန်စည်းကမ်းပြည့်ဝတဲ့ ဒီမိုကရေစီစနစ်ကို ကျင့်သုံးရာတွင် အသိပညာ၊ အတတ်ပညာနှင့် ပြည့်စုံသည့် လူသား အရင်းအမြစ်များ ပြည့်စုံရန် မဖြစ်မနေလိုအပ်မည်ဖြစ်ပြီး ပညာတတ်များ ပေါကြွယ်ဝမှ သာလျင် နိုင်ငံဖွံ့ဖြိုးတိုးတက်ရေးကို အရှိန်အဟုန်ဖြင့် ဆောင်ရွက်နိုင်မှာ ဖြစ်တဲ့အတွက် ပညာရေးကို မြှင့်တင်ဆောင်ရွက်ပေးလျက်ရှိတဲ့ အခြေအနေများ၊ တိုင်းရင်းသား ဒေသများ ဖွံ့ဖြိုးတိုးတက်ရေးအတွက်လည်း လက်တွေ့အကောင်အထည်ဖော် ဆောင်ရွက်ပေးလျက် ရှိတဲ့ အခြေအနေများနှင့်ပတ်သက်၍ ပြန်လည်ဆွေးနွေးပြောကြားပြီး ငြိမ်းချမ်းရေး ဆိုင်ရာ ကိစ္စရပ်များ၊ ဒေသဖွံ့ဖြိုးရေးဆိုင်ရာ ကိစ္စရပ်များနှင့် ပတ်သက်၍ နှစ်ဖက်အမြင်များကို ရင်းနှီးပွင့်လင်းစွာ အပြန်အလှန် ဆွေးနွေးခဲ့ကြကြောင်း သတင်းရရှိပါတယ်။
ygm_mnn
#Yangon_Media_Group

Published 29 Aug 2022

ငွေကြေးဖောင်းပွမှုတွေဟာ ခုန်ကျော်မြင့်တက်လာနေပြီး အဲဒါကို နှိမ်နှင်းဖို့ ထူးကဲတဲ့ကြိုးစားအားထုတ်မှုတစ်ခု ပြုလုပ်ဖို့ လိုအပ်နေပြီလို့ ကမ္ဘာ့ထိပ်တန်း ဘဏ္ဍာရေးအရာရှိချုပ်တွေက ရှင်းလင်းပြတ်သားစွာ ပြောဆိုလိုက်ကြပါတယ်။ အလုပ်အကိုင် ဆုံးရှုံးမှုတွေနှင့် ထွန်းသစ်စဈေးကွက်တွေမှာ လှိုင်းဂယက်တွေထကာ စီးပွားရေးကျဆင်းမှုတွေကြုံရနိုင်ခြေရှိနေတယ် လို့လည်းသူကပြောပါတယ်။

လက်ရှိအခြေအနေကတော့ ပေးဆပ်လို့ခံနိုင်ပါသေးတယ်။ ဒါပေမယ့် ဗဟိုဘဏ်တွေက ငွေကြေးဖောင်းပွမှု ကျွမ်းကျင်မှုတွေအပေါ် ယုံကြည်မှုကို ဆယ်စုများစွာ အချိန်ပေးတည်ဆောက်ခဲ့ပါတယ်။  ဒီစစ်ပွဲမှာ ကျရှုံးရတာဟာ ခေတ်သစ် ငွေကြေးမူဝါဒတွေရဲ့ အုတ်မြစ်တွေကို လှုပ်ခါပစ်နေ ပါတယ်။

“ငွေကြေးဖောင်းပွမှုကို သတ်မှတ်အဆင့်ပြန်ဆွဲယူဖို့ဆိုတာ ကျွန်တော်တို့ ယုံကြည်မှုကို ပြန်ရရှိ ထိန်းသိမ်းနိုင်ဖို့လိုအပ်တယ်” လို့  ဥရောပ ဗဟိုဘဏ် ဘုတ်အဖွဲ့ဝင် အစ္စဘယ် ရှန်နာဗဲလ် ကပြောပါတယ်။

“ ငွေကြေးဖောင်းပွမှုတွေ ကြာကြာမြင့်မားလေလေ၊  ပြည်သူတွေရဲ့ ဝယ်လိုအားကို ဆုံးဖြတ်ထိန်းသိမ်းထားနိုင်စွမ်းနှင့်ပတ်သက်တဲ့  ယုံကြည်မှုတွေ ကျဆင်းမယ့် အန္တရာယ်ရှိလေလေဖြစ်တယ်” လို့ သူမက ဆက်ပြောပါတယ်။

တိုးတက်မှုတွေထိခိုက်လာပြီး လူတွေ စပြီး အလုပ်လက်မဲ့ဖြစ်လာတာတောင် ဘဏ်တွေက ဆက်ပြီး လှုပ်ရှားဆောင်ရွက်နေသင့်ကြပါတယ်။

“ ကျွန်မတို့ စီးပွားရေးကျဆင်းမှုထဲ ဝင်လာတာတောင်  ကျွန်မတို့မှာ ရွေးချယ်ဖို့ များများစားစား မကျန်တော့သည့်တိုင် မူဝါဒလမ်းကြောင်းအပေါ် ဆက်သွားနေကြရမယ်” လို့ ရှန်နာဗဲလ်က ပြောပါတယ်။

ကမ္ဘာ့ အကြီးဆုံးစီးပွားရေးနိုင်ငံတွေမှာ ငွေကြေးဖောင်းပွမှုက  ကိန်းဂဏန်းနှစ်လုံးနီးပါးဖြစ်လာနေပါတယ်။  ဒီကိန်းဂဏန်းအဆင့် ဟာ ရာစုနှစ် တစ်ဝက်အတွင်း မမြင်ဖူးခဲ့တဲ့ ကိန်းဂဏန်းတွေပါ။အဲဒီအထဲမှာ အမေရိကန်က မပါသေးပါဘူး။ အမေရိကန်မှာ ငွေကြေးဖောင်းပွမှုအမြင့်ဆုံးရောက်ဖို့ လပေါင်းများစွာ လိုပါသေးတယ်။

ယူကရိန်းက ရုရှားစစ်ပွဲကြောင့် လောင်စာဆီဈေးနှုန်းမြင့်တက်လာမှုဟာ ငွေကြေးမူဝါဒ ထိခိုက်မှုနည်းနည်းရှိနေတဲ့ ထောက်ပို့လှုပ်ခါမှုတွေ ဖန်တီးနေပါတယ်။

ကမ္ဘာပြုမှုပျက်ယွင်းလာမှု၊ ရုရှားစစ်ကြောင့် မဟာမိတ်တွေ ပြန်လည်ချိန်ညှိလာမှု၊လူမှုပထဝီပြောင်းလဲမှုနှင့်  ထွန်းသစ်စ နိုင်ငံတွေမှာ ထုတ်လုပ်မှုဈေးကြီးမြင့်လာမှုတွေက ထောက်ပို့အကန့်အသတ်တွေဖြစ်လာပြီး အဲဒါတွေက အမြဲတမ်းသဘော ပိုဖြစ်လာနေပါတယ်။

“  ထောက်ပို့အတွဲတော်တော်များများဟာ  ငွေကြေးဖောင်းပွမှုကို ဖုံးဖိထားပေးတဲ့ လေစုန်အဖြစ်ကနေ လေဆန်အဖြစ်ပြောင်းလဲလာတာနှင့်အတူ ကမ္ဘာ့စီးပွားရေးဟာ သမိုင်းဝင်ပြောင်းလဲမှုတစ်ခု ဖြစ်တော့မယ့်အနေအထားရှိနေတယ်” လို့ International Settlements ဘဏ်ရဲ့ ဥက္ကဋ္ဌ အော်ဂတ်စတင် ကာစတင်းက ပြောပါတယ်။

“ အဲသလိုဆိုရင် လက်ရှိ ငွေကြေးဖောင်းပွမှုဖိအားဟာ ဆက်လက်တည်မြဲနေဦးမယ့်သဘောရှိတယ်” လို့လည်း ကာစတင်း ကပြောပါတယ်။ သူ့လုပ်ငန်းစုကို ကမ္ဘာ့ဗဟိုဘဏ်တွေရဲ့ ဗဟိုဘဏ်ရယ်လို့ မကြာခဏဆိုသလို ပြောဆိုသုံးနှုန်းလေ့ရှိကြပါတယ်။

အမေရိကန်ရဲ့ အတိုးနှုန်းမြင့်လားတဲ့ ဒဏ်ဟာ အမေရိကန်နိုင်ငံရဲ့ စီးပွားရေးကိုကျော်လွန်ပြီး ပဲ့တင်ရိုက်ခတ်တာတွေရှိလာပြီး ထွန်းသစ်စစီးပွားရေးနိုင်ငံတွေကို ထိခိုက်မှုတွေဖြစ်နေပါတယ်။

ပြီးခဲ့တဲ့ နှစ်လေးဆယ် ယုံကြည်မှုတွေဟာ ပျက်ယွင်းမယ့် အန္တရာယ်ပေါ်ကျရောက်နေပါတယ်။ အဲဒါကြောင်း ဘာပဲလုပ်ရ လုပ်ရ သူတို့ဟာ ငွေကြေးဖောင်းပွမှုတွေကို ဆွဲချကြပါလိမ့်မယ်။ အဲဒီအထဲမှာ ထွန်းသစ်စနိုင်ငံတွေ ဆက်စပ်ထိခိုက်နစ်နာ တာတွေရှိလာပါစေဦး လုပ်စရာရှိတာ ဆက်လုပ်သွားကြပါလိမ့်မယ်။

ဒေါ်လာတွေချေးငှားထားတဲ့ ထွန်းသစ်စနိုင်ငံတွေဟာ  အတိုးနှုန်းမြှင့်လိုက်တဲ့အတွက် သူတို့ဟာ ဘက်ပေါင်းစုံမှ ထိုးနှက် ခံနေရပါတယ်။

အဲဒါကြောင့် ချေးငှားရတဲ့ စရိတ်တွေတက်လာပြီး အကြွေးတွေတက်လာကြပါလိမ့်မယ်။အမေရိကန်ဈေးကွက်မှာ စာရင်းရှင်း ဖျက်သိမ်းတာတွေဖြစ်လာစေပြီး ထွန်းသစ်စစီးပွားရေးတွေဟာ ပရီမီယံတွေအတွက် အန္တရာယ်ရှိလာစေပြီး ငွေချေးတာ ပိုပြီးတောင် ခက်ခဲလာမှာဖြစ်ပါတယ်။

နိုင်ငံကြီးတွေဖြစ်တဲ့ တရုတ်နှင့် အိန္ဒိယတို့ဟာ ဒီပြဿနာတွေကနေ လွတ်နေပုံရပေမယ့် တူရကီမှသည် အာဂျင်းတီးနားအထိ နိုင်ငံငယ်ကလေးတွေကတော့ ထိခိုက်ခံစားနေရတာ ထင်ရှားနေပါတယ်။

“နိုင်ငံတွေတော်တော်များများပါပဲ။ ဝင်ငွေနိမ့်နိုင်ငံတွေရဲ့ ၆၀ ရာခိုင်နှုန်းနှင့် ထွန်းသစ်စနှင့်နယ်သစ်စီးပွားရေးနိုင်ငံတွေရဲ့ ၂၀ ရာခိုင်နှုန်းဟာ ဒီအခြေအနေတွေနှင့် ရင်ဆိုင်နေကြရပါတယ်” လို့ ကမ္ဘာ့ငွေကြေးရန်ပုံငွေအဖွဲ့ရဲ့ စီးပွားရေးပညာရှင်ချုပ် ပီယဲ အိုလီဗာ ဂိုရင်းချားက ပြောပါတယ်။

သီရိလင်္ကာနှင့် တူရကီတို့လို နယ်သစ်စီးပွားရေးနိုင်ငံတွေဟာ အမေရိကန်က အတိုးနှုန်းတွေဆက်မြှင့်နေရင် အကြီး အကျယ်ထိခိုက်လိမ့်မယ်။  တရုတ်၊အိန္ဒိယနှင့် အင်ဒိုနီးရှားအပါအဝင် နိုင်ငံတွေတပြုံတစ်ခေါင်းကြီးမှာ ငွေကြေး လုပ်ငန်းတွေရဲ့ အကြွေးအန္တရာယ်ဟာ အလွန့်ကိုမြင့်မားနေတယ်လို့ အက်စ်အင်န်ပီ ဂလိုဗယ်က ပြောပါတယ်။

Source: Reuters

#Global_Inflation

#Recession

#World_Economy

Published 28 Aug 2022

ကမ္ဘာကြီးဟာ  စားနပ်ရိက္ခာ မရေရာမှုတွေ ယိုယွင်းလာမှုတွေနှင့်  လွန်ခဲ့တဲ့ သုံးနှစ်အတွင်း  ရင်ဆိုင်နေခဲ့ရတယ်လို့  ကုလသမဂ္ဂ စားနပ်ရိက္ခာအစီအစဉ်အဖွဲ့က သတိပေးလိုက်ပါတယ်။ စားနပ်ရိက္ခာ မလုံလောက်မှုတွေ အကြီးအကျယ် ရင်ဆိုင်နေရတဲ့ ကမ္ဘာ့လူဦးရေဟာ  လူဦးရေ ၃၄၅ သန်းအထိရှိလာပြီး ရာခိုင်နှုန်းအားဖြင့် ၁၅၀ ရာခိုင်နှုန်းတိုးလာတာ လို့ အဖွဲ့ကပြောပါတယ်။

ကိုဗစ်-၁၉ ကပ်ရောဂါ၊ ရာသီဥတုပြောင်းလဲခြင်းနှင့်ကမ္ဘာ့အကြီးဆုံး ဂျုံထုတ်လုပ်တင်ပို့တဲ့ ရုရှားနှင့်ယူကရိန်း ပဋိပက္ခတွေကြောင့် စားနပ်ရိက္ခာ မလုံခြုံ မရောရာမှုတွေဖြစ်နေပါတယ်။ ဂျုံတင်ပို့မှုကျဆင်းသွားတဲ့အတွက် ကမ္ဘာ့ဈေးနှုန်းတွကလည်း မြင့်တက်လာတယ်လို့ ကမ္ဘာ့စားနပ်ရိက္ခာအဖွဲ့ကပြောပါတယ်။

ကပ်ရောဂါဘေးမသင့်ခင် ၂၀၁၉ခုနှစ်မှာ လူဦးရေ ၁.၃၅ သန်းဟာ စားနပ်ရိက္ခာမလုံလောက်မှုနှင့်ရင်ဆိုင်ခဲ့ရပြီး  အရှေ့အလယ်ပိုင်းနှင့် မြောက်အာဖရိကတို့လို အားနည်းမှုတွေရှိနေတဲ့ ဒေသက ယီမင်လိုနိုင်ငံမျိုးတွေမှာ စားနပ်ရိက္ခာ မလုံခြုံမှု နာတာရှည်ခံစားနေကြရပါတယ်။

ကမ္ဘာ့လူဦးရေ ၈၂၈သန်းဟာ ညစဉ် ဆာလောင်မွတ်သိပ်စွာနှင့်ပဲ အိပ်ရာဝင်နေကြရပြီး နိုင်ငံပေါင်း ၄၅ နိုင်ငံမှ လူသန်း၅၀ခန့်ဟာ အငတ်ကပ်ဘေးရောက်လုနီးဖြစ်နေကြရတယ်လို့ ကမ္ဘာ့စားနပ်ရိက္ခာအဖွဲ့က သတင်းထုတ်ပြန်ထားပါတယ်။

Source: CCTV Plus

#World_Food_Programme

#Severe_food_shortage

#Russia_Ukraine_Crisis

Published 28 Aug 2022

တစ်ကမ္ဘာလုံးမှာ လက်ရှိအသုံးပြုနေတဲ့ လေယာဉ်တင်သင်္ဘော ၄၇ စီးရှိနေပါတယ်။  အဲဒီ (၄၇)စီးကို နိုင်ငံပေါင်း ၁၄ နိင်ငံ ကသာ စီမံလုပ်ဆောင်နေတာဖြစ်ပါတယ်။ လေယာဉ်တင်သင်္ဘောဆိုတာ ရေတပ်ရဲ့ တန်ဖိုးအရှိဆုံး ပိုင်ဆိုင်မှုဖြစ်ပြီး စစ်ဆင်ရေးအတွက်သာမကဘဲ ရေပိုင်နက်ကို စောင့်ကြပ်ထိန်းသိမ်းရတဲ့ တာဝန်ပါ ထမ်းဆောင်ကြရတာပါ။

အမေရိကန်ပြည်ထောင်စု၊ တရုတ်၊ဗြိတိန်၊ပြင်သစ်နှင့် အိန္ဒိယတို့ဟာ သင်္ဘောရဲ့ ဝမ်းပမာဏနှင့်ညီမျှတဲ့ရေထုအလေးချိန်အရ ကမ္ဘာ့အကြီးဆုံး လေယာဉ်တင် သင်္ဘော ၁၀စီးကို ပိုင်ဆိုင်ထားကြပါတယ်လို့ ရေတပ်ဗိသုကာ ဟာရီအဲလက်ဇင်းဒါး ကာရန်နက်ဆော့ ကပြောပါတယ်။

အဲဒီအကြီးဆုံး လေယာဉ်တင်သင်္ဘော (၁၀)စီးကို အဆင့်  အနိမ့်မှအမြင့်အလိုက် ဖော်ပြအပ်ပါတယ်။

၁၀။ချားလ်စ်ဒီဂေါ Charles De Gaulle (ပြင်သစ်)

ချားလ်စ်ဒီဂေါဟာ ၂၀၁၁ခုနှစ်မှာ စတင်တာဝန်ထမ်းဆောင်ပြီး ပြင်သစ်ရေတပ်ရဲ့ ရေယာဉ်စုမှူးစီးနင်းတဲ့ သင်္ဘောအဖြစ် ဆက်လက်တည်ရှိနေပါတယ်။ ဒီသင်္ဘောဟာ ပြင်သစ်ရဲ့ ပထမဆုံးနှင့်တစ်ခုတည်းသော နျူကလီးယားစွမ်းအင်သုံး သင်္ဘော ဖြစ်ပါတယ်။

အဲဒီစစ်သင်္ဘောဟာ အလျား ၈၅၈ ပေရှိပြီး ၂၁၈ပေ အမြင့်ရှိပါတယ်။ သင်္ဘောရဲ့ဝမ်းပမာဏာနှင့် ညီမျှတဲ့ ရေထုအလေးချိန် Displacement ဟာ ၄၂,၅၀၀ တန်ရှိပါတယ်။သင်္ဘောသား ၁၂၀၀ တင်ဆောင်နိုင်ပါတယ်။

Dassault Rafale M တိုက်လေယာဉ်အစီး (၄၀)နှင့် Super Etendard ခေတ်မီလေယာဉ်တွေနှင့် Northrop Grumman E-2C Hawkeyesတွေ အပါအဝင် ဒါဇင်ပေါင်းများစွာသော လေယာဉ်တွေအသုံးပြုနိုင်ပါတယ်။

၉။ အိုင်အင်န်အက်စ် ဗီကရာမာဒစ်ယာ INS Vikramaditya (အိန္ဒိယ)

အိုင်အင်န်အက်စ် ဗီကရာမာဒစ်ယာ ဟာ ဆိုဗီယက်လုပ် လေယာဉ်တင်သင်္ဘောဖြစ်ပြီး ၂၀၁၃ခုနှစ်မှာ အိန္ဒိယရေတပ်က စတင် အသုံးပြုပါတယ်။ ဒီစစ်သင်္ဘောဟာ လက်ရှိ အိန္ဒိယရေတပ်ရဲ့ ရေယာဉ်စုမှူးသင်္ဘောဖြစ်ပါတယ်၊ ရုရှားထံမှ ဒေါ်လာ ၂.၃၅ ဘီလျံဖြင့်ဝယ်ယူခဲ့ပါတယ်။

ပင်လယ်နက်သင်္ဘောကျင်းက တည်ဆောက်တဲ့ ဒီသင်္ဘောဟာ အလျား ၉၃၂ ပေရှိ ပြီး Displacement ဟာ တန်ချိန်ပေါင်း ၄၄၅၀၀ ရှိပါတယ်။ သင်္ဘောသား ၁၆၀၀ တင်ဆောင်နိုင်ပါတယ်။

သင်္ဘောဟာ လေယာဉ်ပျံ အစီး ၃၀ အသုံးပြုနိုင်ပါတယ်။ အဲဒီအထဲမှာ Mikoyan MiG-29K ဘက်စုံတိုက်လေယာဉ်တွေနှင့် Kamov Ka-31၊KA-28 ရဟတ်ယာဉ်တွေပါဝင်ပါတယ်။

၈။အိုင်အင်န်အက်စ် ဗီကရန့် INS Vikrant (အိန္ဒိယ)

ကိုချင်းသင်္ဘောကျင်းကတည်ဆောက်ပြီး ပထမဆုံးပြည်တွင်းထုတ် လေယာဉ်တင်သင်္ဘောဖြစ်ပါတယ်။ ၂၀၁၃ခုနှစ်မှာ ရေချခဲ့ပါတယ်။ သင်္ဘောတည်ဆောက်ကုန်ကျစရိတ်ပေါင်း ဒေါ်လာ ၃.၅ ဘီလျံရှိပါတယ်။  ၂၀၁၈ခုနှစ်မှာ စတင်သုံးဖို့ ရည်ရွယ်ခဲ့ပေမယ့် ကပ်ဘေးကြောင့် နောက်ကျခဲ့ရပါတယ်။

အိုင်အင်န်အက်စ်ဗီကရန့်ဟာ Displacement အားဖြင့် ၄၅,၀၀၀ တန်ရှိပြီး အိန္ဒိယရေတပ်ရဲ့ အကြီးဆုံး လေယာဉ်တင်သင်္ဘော ဖြစ်ပါတယ်။ အလျား ၈၆၀ပေရှိပြီး အမြင့်၁၉၄ပေရှိပါတယ်။ သင်္ဘောသား ၁၆၄၅ဦးတင်ဆောင်နိုင်ပါတယ်။

ပြည်တွင်းမီဒီယာတွေက ဒီသင်္ဘောကို လက်ရွေးစင် စစ်သင်္ဘောကြီးလို့ ဖော်ပြကြပါတယ်။ MiG-29K တိုက်ဂျက်လေယာဉ်၊ Kamov-31 ရဟတ်ယာဉ်တွေနှင့် Sikorsky MH-60R Seahawk ရဟတ်ယာဉ်တွေ အသုံးပြုနေပါတယ်။

၇။လျောင်နင်း ပုံစံ၀၀၁ Liaoning, Type 001  (တရုတ်)

လျောင်နင်းကို ပုံစံ ၀၀၁လို့သိကြပြီး ၂၀၁၂ မှာစတင်အသုံးပြုပါတယ်။ ဒီသင်္ဘောကို ပင်လက်နက် သင်္ဘောကျင်းက ဆိုဗီယက် ခေတ်မှာ တည်ဆောက်ခဲ့ပါတယ်။ တရုတ်စစ်တပ်က ဒီသင်္ဘောကို ယူကရိန်းထံမှ ဝယ်ယူခဲ့တာပါ။

ဒီလေယာဉ်တင်သင်္ဘေဟာ ၉၉၉ပေ အလျားရှိပြီး  Displacementက ဝန်အပြည့်မှာ ၆၀၉၀၀ တန်ရှိပါတယ်။ သင်္ဘောသား ၂၅၀၀ ဦးလိုက်ပါနိုင်ပါတယ်။

လျောင်နင်းစာ တရုတ်ထုတ် Type 1130 rotary အမြောက်တွေနှင့် HQ-10 မြေပြင်မှဝေဟင်ပစ် ဒုံးကျည်တွေအပါအဝင် လက်နက်ကြီးတွေ တင်ဆောင်နိုင်ပါတယ်။ အဲဒီအပြင် Shenyang J-15၊ Shenyang J-15နှင့်  Harbin Z-9 လေယာဉ်တွေ အပါအဝင် လေယာဉ် ၃၆ စီးအသုံးပြုနိုင်ပါတယ်။

၆။အက်ဒ်မိုင်ရယ်လ် ကူညက်ဆော့ဗ် Admiral Kuznetsov (ရုရှား)

ဒီသင်္ဘောကို နီကိုလာယက်တောင်ပိုင်းက ဆိုဗီယက်ခေတ်အတွင်း တည်ဆောက်ခဲ့ပြီး ၁၉၉၁ မှာ ပထမဆုံးအသုံးပြုခဲ့ပါတယ်။ ဒီသင်္ဘောကို လောလာဆယ် ရုရှားစစ်တပ်က စီမံကြီးကြပ်တဲ့ တစ်စီးတည်းသော သင်္ဘောဖြစ်ပါတယ်။ ဇွန်လအထိ သတင်းအရ ဒီသင်္ဘောဟာ ပြန်လည်ပြုပြင်နေတယ်လို့ ရိုက်တာသတင်းအရသိရပါတယ်။

သင်္ဘောဟာ အလျား ၁၀၀၀ပေရှိပြီး Displacement က ဝန်အပြည့် ၆၇၅၀၀ တန်ရှိပါတယ်။ သင်္ဘောသား ၁၆၉၀ကျော် တင်ဆောင်နိုင်ပါတယ်။

သင်္ဘောဟာ ဆိုဗီယက်လုပ် AK-630 လက်နက်များကအစ   P-700 Granit anti-cruise ဒုံးကျည်များအထိ လက်နက်ကြီးမျိုးစုံ အသုံးပြုနိုင်ပါတယ်။

၅။ရှန်ဒေါင်း  ပုံစံ၀၀၂ Shandong, Type 002 (တရုတ်)

ရှန်ဒေါင်းဟာ ၂၀၁၈ခုနှစ်မှာ ဒါလျန်း သင်္ဘောကျင်းကနေ တည်ဆောက်ပေးခဲ့ပါတယ်။ ဒီသင်္ဘောကိုပုံစံ ၀၀၂ လို့လည်း သိကြပါတယ်။  ၂၀၁၉ မှာ စတင်အသုံးပြုပါတယ်။ ရှန်ဒေါင်းဟာ တရုတ်လုပ် ပထမဆုံးလေယာဉ်တင်သင်္ဘောဖြစ်ပြီး  ဆိုဗီယက်လုပ် Kuznetsov-class ရဲ့ ပုံစံကွဲတစ်ခုဖြစ်ပါတယ်။

သင်္ဘောဟာ အလျား ၁၀၃၃ပေခန့်ရှိပြီး Displacement က ၇၀၀၀၀ တန်ရှိပါတယ်။

လျန်နင်းလေယာဉ်တင်သင်္ဘောမှာပါတဲ့ လက်နက်ကြီးတွေကိုပဲ အသုံးပြုပါတယ်။ Type 1130 rotary အမြောက်နှင့် HQ-10 မြေပြင်မှဝေဟင်ပစ်ဒုံးကျည်တို့ဖြစ်ပါတယ်။ အဲဒီအပြင် Shenyang J-15 ၊ Changhe Z-18F/J နှင့် Harbin Z-9လေယာဉ်တွေ အသုံးပြုပါတယ်။

၄.အိတ်ချ်အမ်အက်စ် အဲလ်ဇဘက်ဘုရင်မ-ကလပ်စ် HMS Queen Elizabeth-class (ယူကေ)

ဒီသင်္ဘောဟာ လေယာဉ်တင်သင်္ဘော HMS Queen Elizabeth နှင့် HMS Prince of Wales တို့ပေါင်းစပ်ထားပါတယ်။ဦးဆောင် သင်္ဘော HMS Queen Elizabethကို ၂၀၁၇ခုနှစ်မှာ စတင်တာဝန်ထမ်းပါတယ်။ သင်္ဘောကို Aircraft Carrier Alliance က တည်ဆောက်ခဲ့ပြီး  တစ်စီးကို ပေါင်စတာလင် ၃.၈ ဘီလျံကုန်ကျခဲ့ပါတယ်။

သင်္ဘောဟာ အလျား ၉၃၂ ပေရှိပြီး Displacement က တန်ချိန် ၆၅၀၀၀ နှင့် ၇၁၆၅၀ အသီးသီးရှိကြပါတယ်၊  တစ်စီးကို သင်္ဘောသား ၁၆၀၀ အထိတင်ဆောင်နိုင်ပါတယ်။

Phalanx close-in လက်နက်စနစ်နှင့် အမေရိကန်လုပ် M134 မီနီဂန်းတွေအပါအဝင် လက်နက်ကြီးတွေတပ်ဆင်ထားပါတယ်။  Lockheed Martin F-35 တိုက်လေယာဉ်နှင့် ဘိုအင်းချင်းနုတ် ရဟတ်ယာဉ်တွေအပါအဝင် လေယာဉ် ၆၅စီးကျော် တင်ဆောင် နိုင်ပါတယ်။

၃။ဖူကျန့် ပုံစံ ၀၀၃ Fujian, Type 003  (တရုတ်)

ဖူကျန့်ဟာ တရုတ်နိုင်ငံရဲ့ အကြီးဆုံးနှင့် ခေတ်အမီဆုံး လေယာဉ်တင်သင်္ဘောြဖစ်ပါတယ်။ဇွန်လမှာ စတင်ရေချခဲ့ပါတယ်။ ပုံစံ ၀၀၃ အဖြစ်လည်းသိကြပါတယ်။ တရုတ်နိုင်ငံတော် သင်္ဘောကျင်းကော်ပိုရေးရှင်းက တည်ဆောက်ပေးခဲ့ပါတယ်။ ဒါပေမယ့် စတင်တာဝန်ထမ်းဆောင်ခြင်းမရှိသေးပါဘူး။

တိုက်ခိုက်ရေးအဆင်သင့်ဖြစ်ဖို့အတွက် ၁၈လခန့် စမ်းသပ်ဖို့လိုအပ်မယ်လို့ ဘေဂျင်းအခြေစိုက် ဉာဏ်ကြီးရှင်အဖွဲ့ ယွမ်ဝမ်းက သုတေသနပညာရှင် ကျောင်ချန်မင်းက ပြောပါတယ်။

သင်္ဘောဟာ ၉၈၄ ပေရှိပြီး displacement က တန်ချိန် ၈၀၀၀၀ ရှိပါတယ်။

ဖူကျန့်ဟာ ပိုမိုကြီးမားလေးလံတဲ့ လေယာဉ်တွေကို သယ်ဆောင်နိုင်တယ်လို့ဆိုပါတယ်။ ဒီသင်္ဘောကိ ထိုင်ဝမ် အရှေ့ခြမ်း တရုတ်စစ်အင်အားကို ဖြည့်ဆည်းပေးဖို့ တာဝန်ပေးထားတယ်လို့ ပြည်တွင်းရေတပ် မဟာဗျူဟာပညာရှင်တွေက ပြောပါတယ်။

၂။နီမစ်-ကလပ်စ် Nimitz-class (အမေရိကန်)

နီမစ်-ကလပ်စ်မှာ လေယာဉ်တင်သင်္ဘော ၁၀စီးပါဝင်ပါတယ်။ ဒီသင်္ဘောဆယ်စီးလုံးကို Newport News သင်္ဘောကျင်းက တည်ဆောက်ပေးပါတယ်။ ဒါဟာ ပထမဆုံးကလပ်စ်အဆင့် လေယာဉ်တင်သင်္ဘောဖြစ်ပါတယ်။ ၁၉၇၅ခုနှစ်မှာ စတင်တာဝန်ထမ်းဆောင်ပေမယ့် ၂၀၂၅ခုနှစ်မှာ တာဝန်ရပ်နားဖို့ရှိပါတယ်။

နျူကလီးယားစွမ်းအင်သုံး ဒီစစ်သင်္ဘောဟာ အလျား ၁၀၉၂ ပေရှိပြီး displacement က တန်ချိန် တစ်သိန်းရှိပါတယ်။ သင်္ဘောသား ၆၀၀၀လိုက်ပါနိုင်ပါတယ်။

နီမစ်ကလပ်စ်ဟာ ကမ္ဘာပေါ်မှာ ကလပ်စ်အမျိုးအစား လေယာဉ်တင်သင်္ဘောတွေထဲမှာ  အင်အားအကြီးမားဆုံး လေယာဉ် တင်သင်္ဘောထဲမှာ တစ်စီးအပါအဝင်ဖြစ်ပါတယ်။ အဲဒီအပြင် ရေတပ်ရဲ့ သက်တမ်းအကြာဆုံး လည်းဖြစ်ပါတယ်။

သင်္ဘောကြီးဟာ လေယာဉ်ပေါင်း ၈၂ စီးအထိ အသုံးပြုနိုင်ပါတယ်။ အဲဒီအထဲမှာ McDonnell Douglas Hornet တိုက်ဂျက်လေယာဉ်နှင့် Northrop Grumman E-2 Hawkeye လေယာဉ်တွေ ပါဝင်ပါတယ်။ Phalanx Mk-15 close-in လက်နက်စနစ်အပါအဝင် လက်နက်ကြီးတွေတပ်ဆင်ထားပါတယ်။

၁။ဂါးရက် အာရ် ဖို့ဒ်-ကလပ်စ် Gerald R. Ford-class (အမေရိကန်)

လေယာဉ်တင်သင်္ဘော ၁၀စီးပေါင်းထားတဲ့ ဂါးရက်စ် အာရ်ဖို့ဒ်ဟာ အမေရိကန်ရေတပ်ရဲ့  အနာဂတ်စစ်သင်္ဘောကြီး အဖြစ် မှတ်ယူထားကြပါတယ်။ ၂၀၁၇ မှာစတင်တာဝန်ထမ်းဆောင်ပြီး သုတေသနနှင့် ဖွံ့ဖြိုးရေးကုန်ကျစရိတ်က ဒေါ်လာ ၃၇.၃ ဘီလျံရှိခဲ့ပါတယ်။ တစ်စီးချင်းစီရဲ့ တည်ဆောက်စရိတ်ဟာ ဒေါ်လာ ၁၃ဘီလျံရှိပါတယ်။

အလျား ၁၁၀၆ပေရှိပြီး displacementက တန်ချိန်ပေါင်း ၁၁၂၀၀၀ ရှိတဲ့အတွက် ကမ္ဘာ့အကြီးဆုံးစစ်သင်္ဘောကြီး ဖြစ်ပါတယ်။  သင်္ဘောသား ၄၅၀၀ တင်ဆောင်နိုင်ပါတယ်။

သင်္ဘောမှာ မြေပြင်မှဝေဟင်ပစ် ဒုံးကျည်မျိုးစုံတပ်ဆင်ထားပါတယ်။ အဲဒီအထဲမှာ RIM-7 Sea Sparrow၊ RIM-116 နှင့် M2 မက်ရှင်းဂန်းတွေလည်းပါဝင်ပါတယ်။ လေယာဉ်ပေါင်း ၇၅စီးကျော် အသုံးပြုနိုင်ပြီး Lockheed Martin F-35 တိုက်လေယာဉ်တွေ၊ Boeing F/A-18E/F Super Hornet တိုက်ဂျက်လေယာဉ်တွေနှင့် Sikorsky MH-60R ရဟတ်ယာဉ်တွေ ပါဝင်ပါတယ်။

Source Business Insider

#world's_largest_aircraft_carriers

#World_navy_power

Published 28 Aug 2022

နစက ဥက္ကဋ္ဌနှင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ဖိတ်ခေါ်တဲ့ ငြိမ်းချမ်းရေးဆွေးနွေးပွဲသို့ ဒုတိယအကြိမ်တက်ရောက်ဖို့အတွက် ရှမ်းပြည် ပြန်လည်ထူထောင်ရေးကောင်စီ RCSS/SSA ဥက္ကဋ္ဌ ဗိုလ်ချုပ်ကြီး ယွက်စစ်

နှင့်အဖွဲ့ဝင်တွေဟာ ယနေ့ ဩဂုတ် ၂၈ ရက် နေ့လည် ( ၁၂ )နာရီအချိန် တာချီလိတ်လေဆိပ်မှတဆင့် တပ်မတော်လေယာဥ်ဖြင့် နေပြည်တော်သို့ထွက်ခွာသွားခဲ့ပါတယ်။

မေ ၂၀ ရက်နေ့တွင် ကျင်းပခဲ့သည့်ငြိမ်းချမ်းရေးဆွေးနွေးပွဲသို့တက်ရောက်ခဲ့ပြီးနောက် ယခုဒုတိယအကြိမ် ငြိမ်းချမ်းရေးဆွေးနွေးပွဲပြုလုပ်ရန်ထပ်မံသွားရောက်ခြင်းဖြစ်ပြီး ၊အဖွဲ့ဝင်တွေဟာ  ထိုင်းနိုင်ငံ ချင်းမိုင်မြို့မှတဆင့်

တာချီလိတ်မြို့ မြန်မာ-ထိုင်းချစ်ကြည်ရေးတံတားအမှတ်( ၂)မှတဆင့် ယနေ့နံနက် ၁၂ နာရီအချိန်၌ ဝင်ရောက်လာခဲ့ပြီး နေပြည်တော်သို့ ထွက်ခွာသွားခြင်းဖြစ်ပါတယ်။

 ဥက္ကဋ္ဌ ဗိုလ်ချူပ်ကြီး ယွက်စစ်နှင့်အဖွဲ့ဝင်များကို တာချီလိတ်တပ်နယ်မှ ဗိုလ်မှူးကြီးမင်းမင်းထွန်း၊ TBC-မြန်မာ မှဦးဘိုလေးနှင့်တာဝန်ရှိသူများက ကြိုဆိုနုတ်ဆက်ခဲ့ကြပြီးရှမ်း၊အာခါ၊လားဟူ၊ပအိုဝ့် တိုင်းရင်းသားများနှင့်ပြည်သူများက ငြိမ်းချမ်းရေးဆွေးနွေးပွဲကိုကြိုဆိုထောက်ခံကြောင်းစာတမ်းပါ ဗီနှိုင်းပိုစတာများကိုင်ဆောင်ပြီး တာချီလိတ်မကြိုဆိုခဲ့ကြပါတယ်။

Ymg/ys-tcl

#Myanmar_Politics

#RCSS/SSA

#Myanmar_NCA