Published 26 Sept 2022

ဒေသနှင့် တိုင်းပြည်အတွက် အမှန်တကယ်လိုအပ်ပြီး ဖြစ်နိုင်သည်များနှင့် ဖြစ်သင့်ဖြစ်ထိုက်သည်များကို ပွင့်လင်းစွာဖြင့် အကြေအလည် ဆွေးနွေးသွားမှာဖြစ်တယ်လို့ နစကဥက္ကဋ္ဌ နှင့်တပ်မတော်ကာကွယ်ရေးဦးစီးချုပ် ဗိုလ်ချူပ်မှူးကြီးမင်းအောင်လှိုင်က တိုင်းရင်းသား လက်နက်ကိုင်အဖွဲ့အစည်း(၃)ခုမှ ခေါင်းဆောင်တွေကို ပြောကြားလိုက်ပါတယ်။

 “ဝ”ပြည် သွေးစည်းညီညွတ်ရေးပါတီ (UWSP) ဒုတိယဥက္ကဋ္ဌ ဦးလော့ယာကု၊ အမျိုးသားဒီမိုကရက်တစ်မဟာမိတ်အဖွဲ့ (NDAA) ဒုတိယဥက္ကဋ္ဌ ဦးစန်ပေ့နှင့် ရှမ်းပြည်တိုးတက်ရေးပါတီ (SSPP) ဒုတိယဥက္ကဋ္ဌ(၂) စဝ်ခွန်ဆိုင်တို့ ဦးဆောင်သည့် ငြိမ်းချမ်းရေးကိုယ်စားလှယ်အဖွဲ့အား ယနေ့ စက်တင်ဘာ ၂၆ ရက် နံနက်ပိုင်းတွင် နေပြည်တော်ရှိ ဘုရင့်နောင်ရိပ်သာ ဧည့်ခန်းမဆောင်၌ တွေ့ဆုံ၍ ငြိမ်းချမ်းရေးဆိုင်ရာကိစ္စရပ်များ ဆွေးနွေးခဲ့ရာမှာ  ဗိုလ်ချူပ်မှူးကြီးမင်းအောင်လှိုင်က ယခုလို ပြောကြားခဲ့တာဖြစ်တယ်လို့ နစကရဲ့ သတင်းထုတ်ပြန်ချက်အရသိရပါတယ်။

ဗိုလ်ချူပ်မှူးကြီးက ယခု ငြိမ်းချမ်းရေးဖိတ်ခေါ် ဆွေးနွေးမှုများကို တိုင်းရင်းသားလက်နက်ကိုင်အဖွဲ့များ၏ တောင်းဆိုချက်များ၊ ဒေသနှင့် တိုင်းပြည်အတွက် အမှန်တကယ်လိုအပ်ပြီး ဖြစ်နိုင်သည်များနှင့် ဖြစ်သင့်ဖြစ်ထိုက်သည်များကို ပွင့်လင်းစွာဖြင့် အကြေအလည် ဆွေးနွေးသွားမည်ဖြစ်ပြီး ပြည်ထောင်စုအကျိုးကို ရှေးရှု၍ အမြင်ကျယ်ကျယ်ဖြင့် ဆွေးနွေးဆောင်ရွက်သွားကြရန်လိုတဲ့ အခြေအနေတွေ၊  ဖွဲ့စည်းပုံအခြေခံဥပဒေ (၂၀၀၈ ခုနှစ်)နှင့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA)တို့ကို အခြေခံ၍ ငြိမ်းချမ်းရေး လမ်းကြောင်းကို ဆက်လက်ဖော်ဆောင်သွားမည်ဖြစ်သည့် အခြေအနေတွေကိုဆွေးနွေးခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။

နစကဥက္ကဋ္ဌ၊တပ်မတော်ကာကွယ်ရေးဦးစီးချုပ်က သဘောထားကြီးစွာဖြင့် နိုင်ငံရေးဆွေးနွေးမှုမှတစ်ဆင့် ပြည်တွင်း ငြိမ်းချမ်းရေးနှင့် ဖွံ့ဖြိုးတိုးတက်ရေးဖော်ဆောင်နိုင်ရန် အမြော်အမြင်ကြီးစွာ ကမ်းလှမ်းခဲ့မှုအပေါ် ဝမ်းမြောက်ကြိုဆိုတဲ့ အခြေအနေတွေ၊ နိုင်ငံတော်မှ ခွဲမထွက်ဘဲ ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်ရေးနှင့် နိုင်ငံတော်အချုပ်အခြာအာဏာ တည်တံ့ခိုင်မြဲရေးကို စွဲမြဲစွာ ထိန်းသိမ်း လိုက်နာလျက်ရှိသည့် အခြေအနေတွေနှင့်  သဘောထားကွဲလွဲမှုများကို လက်နက်ဖြင့် ဖြေရှင်းခြင်းမပြုလုပ်ဘဲ ငြိမ်းချမ်းစွာဖြင့်သာ ဆွေးနွေးဖြေရှင်းဆောင်ရွက်ရန် လိုလားပြီး ဒေသတွင်းတည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးကို တစိုက်မတ်မတ်ကြိုးပမ်းဆောင်ရွက်လျက်ရှိသည့် အခြေအနေများ၊ ပါတီစုံဒီမိုကရေစီစနစ် ကျင့်သုံးဆောင်ရွက်ရေး၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုတည်ဆောက်ရေးနှင့် ပတ်သက်၍ သဘောထား တူညီချက်အမြင်များကို တိုင်းရင်းသားခေါင်းဆောင်တွေက ပြန်လည်ဆွေးနွေးခဲ့ပြီး  ဒေသဖွံ့ဖြိုးတိုးတက်ရေးဆိုင်ရာများကို တင်ပြခဲ့ကြတယ်လို့သိရှိရပါတယ်။

ယခုငြိမ်းချမ်းရေးတွေ့ဆုံဆွေးနွေးပွဲသို့ နစကဥက္ကဋ္ဌနှင့်အတူ ဒုတိယဥက္ကဋ္ဌ ဒုတိယတပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီး စိုးဝင်း၊ ကောင်စီအဖွဲ့ဝင်များဖြစ်ကြသည့် ဗိုလ်ချုပ်ကြီး မြထွန်းဦး၊ ဒုတိယဗိုလ်ချုပ်ကြီး မိုးမြင့်ထွန်း၊ ဒုတိယဗိုလ်ချုပ်ကြီး ရာပြည့်တို့ တက်ရောက်ကြပြီး “ဝ”ပြည် သွေးစည်းညီညွတ်ရေးပါတီ(UWSP) ဒုတိယဥက္ကဋ္ဌ ဦးလော့ယာကု၊ အမျိုးသားဒီမိုကရက်တစ်မဟာမိတ်အဖွဲ့ (NDAA) ဒုတိယဥက္ကဋ္ဌ ဦးစန်ပေ့၊ ရှမ်းပြည်တိုးတက်ရေးပါတီ (SSPP) ဒုတိယဥက္ကဋ္ဌ(၂) စဝ်ခွန်ဆိုင် တို့နှင့်အတူ (UWSP)မှ နိုင်ငံရေးဌာနကြီးမှူး ဦးအိုက်နပ်လိုင်း၊ (NDAA)မှ အထွေထွေအတွင်းရေးမှူး ဦးကြည်မြင့်၊ (SSPP)မှ အတွင်းရေးမှူး(၂) စဝ်ဆိုင်းဆုနှင့် အဖွဲ့ဝင်များ တက်ရောက်ခဲ့ကြပါတယ်။

ယခုငြိမ်းချမ်းရေးကိုယ်စားလှယ်အဖွဲ့တွေအနေနှင့် ငြိမ်းချမ်းရေးဆွေးနွေးရေးအဖွဲ့၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီတို့နှင့် ငြိမ်းချမ်းရေးဆွေးနွေးမှုများကို ဆက်လက်ပြုလုပ်သွားမယ်လို့ သတင်းထုတ်ပြန်ထားပါတယ်။

Source SAC’s info

#ymg/knl

#Myanmar_EAO_Peace_Talk

Published 25 Sept 2022

တရုတ်နိုင်ငံဟာ ယင်းရဲ့ ပထမဆုံး ပြည်တွင်းထုတ် လေယာဉ်တင်သင်္ဘောကြီး လျောင်နင်း စတင်တာဝန်ထမ်းဆောင်ကတည်းက  ရေကြောင်း တိုက်ခိုက်ရေးစွမ်းရည်တွေဟာ သိသိသာသာတိုးတက်လာခဲ့တယ်လို့ တရုတ်အစိုးရ မီဒီယာတွေကပြောပါတယ်။

လျောင်နင်းကို ၂၀၁၂ခုနှစ် စက်တင်ဘာလမှာ တရုတ်ပြည်သူ့လွတ်မြောက်ရေးတပ်မတော် ထံ ပေးအပ်ခဲ့တာဖြစ်ပါတယ်။

လွန်ခဲ့တဲ့ ၁၀နှစ်ကျော်ကာလမှာ back-to-back (ဘက်တူဘက်) စနစ်ထိပ်တိုက်တွေ့မှုနှင့် လက်တွေ့တိုက်ပွဲလေ့ကျင့်ခန်း တွေကနေတစ်ဆင့် ပလက်ဖောင်းတစ်ခုမှသည်  တိုက်ပွဲဖွဲ့စည်းမှုအထိ၊ အသေးစားစနစ်လေ့ကျင့်မှုမှသည် အကြီးစားပူးတွဲစစ်ဆင်ရေးတွေအထိ လျောင်နင်းလေယာဉ်တင်စစ်သင်္ဘောကြီးရဲ့ ဖွဲ့စည်းပုံဟာ သင်္ဘောတွေ၊ရေငုပ်သင်္ဘောတွေနှင့် လေယာဉ်တွေကို  ကောင်းစွာ စုဖွဲ့ပေါင်းစပ်ပေးနိုင်ခဲ့တာဖြစ်ပါတယ်။  ဖွဲ့စည်းမှုရဲ့ တိုက်ပွဲစွမ်းရည်ဟာဆက်တိုက်တိုးတက်လာတယ်လို့လည်း ဆိုပါတယ်။

 လက်ရှိမှာ လျောင်နင်းဟာ ပစိဖိတ်အနောက်ပိုင်းသမုဒ္ဒရာမှာ လေ့ကျင့်ရေးလုပ်ငန်းတွေ လုပ်ဆောင်နေပါတယ်။  လျောင်နင်း လေယာဉ်တင်သင်္ဘောဖွဲ့စည်းမှုကနေ အရှိန်မြင့်မားစွာဖြင့် ပျံသန်းနေတဲ့အမျိုးအမည်မသိ လေယာဉ်အုပ်စုတွေကို ထောက်လှမ်းနိုင်ခဲ့ပါတယ်။ 

ဖွဲ့စည်းမှုဟာ မိနစ်အနည်းငယ်အတွင်းမှာပဲ တိုက်ပွဲအစီအစဉ်တွေနှင့် တုန့်ပြန်နိုင်စွမ်းရှိခဲ့ပါတယ်။   အမိန့်ပေးစစ်စခန်းကနေ တိုက်ခိုက်ဖို့ အမိန့်ပေးနိုင်ပါတယ်။ ပြီးတော့ J-15 တိုက်လေယာဉ်တွေ ပစ်မှတ် လေပိုင်နက်ထဲ ဦးတည်ပျံသန်းနိုင်ပါတယ်။  များစွာသော တိုက်ပွဲနည်းနာတွေကတစ်ဆင့် တင်းကြပ်တဲ့ တိုက်စစ်နှင့်ခံစစ်တွေကို ဖွဲ့စည်း တည်ဆောက်နိုင်ခဲ့ပါတယ်လို့ သတင်းထုတ်ပြန်ထားပါတယ်။

၂၀၁၇ခုနှစ်မှာ 901 အမျိုးအစား သမုဒ္ဒရာသွား ထောက်ပို့ ရေယာဉ် ဟူလန်ဟူကို အဆိုပါ ဖွဲ့စည်းမှုပုံစံအထဲ စတင်တာဝန်ပေးနိုင်ခဲ့ပါတယ်။ ပြီးခဲ့တဲ့နှစ်က  အနောက်ပိုင်းပစိတ်ဖိတ် သမုဒ္ဒရာမှာ ဟူလန်ဟူဟာ လျောင်နင်းလေယာဉ်တင်သင်္ဘောကို ရေကြောင်းဆိုင်ရာ ဖြည့်တင်းမှုအောင်မြင်စွာ ပြီးဆုံးခဲ့ပါတယ်။ ရန်သူတွေရဲ့ ခြိမ်းခြောက်မှုအောက်ကနေ အကြီးစားဖြစ်တဲ့ နေ့ ည ကာလရှည်ထောက်ပို့မှုတွေကို  ထူးခြားအောင်မြင်စွာ ဆောင်ရွက်နိုင်ခဲ့ကြပါတယ်။

တရုတ်ရဲ့ပထမဆုံး 055  ပုံစံ ပဲ့ထိန်းဒုံးဖျက်သင်္ဘော နန်ချန်းဟာလည်း ဖွဲ့စည်းမှုပုံစံထဲ ပူးပေါင်းပါဝင်ခဲ့ပါတယ်။

“ကျွန်တော်တို့ရဲ့ လေယာဉ်တင်သင်္ဘော ဖွဲ့စည်းမှုဟာ  မတူတဲ့ လုပ်ငန်းတာဝန်ပေါ်မူတည်လုပ်ဆောင်တာပါ။  တိုက်ပွဲ အုပ်စုဝင်တွေကို မစ်ရှင်ချက်ခြင်းစနိုင်အောင် ယာယီရွေးချယ်တာဝန်ပေးပါတယ်။  အဲဒါကြောင့် ကျွန်တော်တို့ဟာ  စံမှီတဲ့ အကဲဖြတ်ယန္တယားတစ်စုံကို မိတ်ဆက်နိုင်ခဲ့ပါတယ်။ ပြီးခဲ့တဲ့ (၂)နှစ်အတွင်း အရာရှိတွေနှင်စစ်သည်တွေ အကဲဖြတ်မှု ပိုမိုအောင်မြင်လာခဲ့ကြပါတယ်။ ကျွန်တော်တို့ဆီမှာ တာဝန်ပေးဖို့ ကြီးမားတဲ့ ရွေးချယ်မှုရှိပြီးဖြစ်ပါတယ်” လို့ လျောင်နင်း လေယာဉ်တင်သင်္ဘောရဲ့ ကပ္ပတိန် ချေးယွန်ဂန်ကပြောပါတယ်။

Source CCTV+

#Aircraft_carrier_Liaoning

#China_Navy

#China_Military_Power

Published 25 Sept 2022

ရတုစာဆိုအကျော်အမော်ဖြစ်သည့် တောင်ငူဘုရင် နတ်သျှင်နောင်နှင့် ရာဇဓာတုကလျာမင်းသမီးတို့ အချစ်ဇာတ်ကြောင်း ကို နိုင်ငံရေး၊စစ်ရေးအခင်းအကျင်းတွေနောက်ခံဖြင့် တင်ဆက်ထားတဲ့  “အသက်ထက်မြတ်သော ဂုဏ်သိက္ခာ”  ဆို-ငို-ပြော ဇာတ်တော်ကြီးကို စက်တင်ဘာ ၂၄ ရက်က တင်ဆက်ကပြခဲ့ပါတယ်။

မြန်မာ့သမိုင်းမှာ ရတုရေးသားရာ၌ တံခွန်စိုက်ထူခဲ့တဲ့ တောင်ငူဘုရင် နတ်သျှင်နောင်နှင့် ရာဇဓာတုကလျာ မင်းသမီးတို့၏ အချစ်ဇာတ်ကြောင်း၊ ဟံသာဝတီပြည့်ရှင် ဘုရင့်နောင် မင်းတရားကြီး၏ သမီးတော်ဖြစ်သော်လည်း လောကဒဏ်အနိမ့်အမြင့် အတက်အကျတွင် လိုက်ပါခဲ့ရသည့် ရာဇဓာတုကလျာ၏ ရင်နင့်ဖွယ်ရာဖြစ်ရပ်နှင့်အတူ ပဒေသရာဇ်များ၏ အားပြိုင်မှုမှ ဖြစ်ပေါ်လာသော နိုင်ငံရေး၊ စစ်ရေး အခင်းအကျင်းများကို နောက်ခံထား တင်ဆက် ထားတာဖြစ်ပါတယ်။

စစ်ရေးစစ်ရာတွင် ရဲစွမ်းသတ္တိရှိသည်သာမက အနုသုခုမပညာတွင်လည်း လက်ရာ ပြောင်မြောက်ခဲ့သည့် နတ်သျှင်နောင် ဟာ မိမိနိုင်ငံအတွင်း ပြဿနာကို ဖြေရှင်းရန် ကြိုးပမ်းရာ၌ တိုင်းတစ်ပါးသားကို အကြွင်းမဲ့ယုံစား၍ ပူးပေါင်းဆောင်ရွက်မိ တဲ့အတွက် မလှပတဲ့ သမိုင်းနိဂုံးဖြင့် ဇာတ်သိမ်းရသည်ကို သမိုင်းတစ်ကွေ့၏ သတိမူစရာသင်ခန်းစာ ဖြစ်ရပ်   တစ်ခုအနေဖြင့် တင်ဆက်ကပြရခြင်းဖြစ်တယ်လို့ တင်ဆက်သူတွေက ပြောပါတယ်။

မြန်မာ့ရိုးရာယဉ်ကျေးမှုအမွေအနှစ်များကိုထိန်းသိမ်းစောင့်ရှောက်တဲ့အနေနှင့် သာသနာရေးနှင့် ယဉ်ကျေးမှုဝန်ကြီးဌာန၊ အနုပညာဦးစီးဌာနမှ အရာထမ်း၊ အမှုထမ်း များနှင့် အနုပညာရှင်များ ပူးပေါင်းပါဝင်၍ သမားစဉ်နှင့်အညီ ကပြဖျော်ဖြေ တင်ဆက်ထားသည့် အဆိုပါ“အသက်ထက်မြတ်သော ဂုဏ်သိက္ခာ” ဆို ငို ပြော ဇာတ်တော်ကြီးကို စက်တင်ဘာ၂၄ ညပိုင်းတွင် နေပြည်တော်ရှိ ဇေယျာသီရိဗိမာန် သဘင်ဆောင်အတွင်း၌ တင်ဆက်ကပြဖျော်ဖြေခဲ့ရာ နစက ဥက္ကဋ္ဌနှင့် နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ကြည့်ရှု အားပေးခဲ့တယ်လို့ နစကရဲ့ သတင်းထုတ်ပြန်ချက်မှာ ဖော်ပြထားပါတယ်။

ဇာတ်တော်ကြီးကို မြန်မာ့ရိုးရာအစဉ်အလာ သမားစဉ်နှင့်အညီ ကပြဖျော်ဖြေရာတွင် ဘုရားကန်တော့ခန်း၊ ဇာတ်တော်ကြီးသမားစဉ် အပျိုတော်ထွက်ခန်းနှင့် နှစ်ပါးသွားခန်းတို့ဖြင့် စတင်အစပျိုးခဲ့ပြီး ကပြ ဖျော်ဖြေခဲ့တာဖြစ်ပါတယ်။

အဲဒီနောက် ဘုရင့်နောင် မင်းတရားကြီး ထွက်တော်မူကြီးနှင့် ဓာတုကလျာ ဖွားမြင်ခန်း၊ ဝန်မင်းနှစ်ပါး ဇာတ်ပန္နက်ရိုက် ပြည်တည်ခန်း၊ မင်းရဲနန္ဒမိတ် ညီလာခံခန်း၊ နတ်သျှင်နောင် နောက်ကြောင်းပြန်ခန်း၊ နတ်သျှင်နောင်နှင့် ရာဇဓာတုကလျာတွေ့ဆုံခန်း၊ နတ်သျှင်နောင် ကိုယ်လုံပညာ လေ့ကျင့်ခန်း၊ နတ်သျှင်နောင်မှ ရာဇဓာတုကလျာအား ချစ်ခွင့်ပန်ခန်း၊ နတ်သျှင်နောင်နှင့် ရာဇဓာတု ကလျာလက်ထပ်မည့် အကြောင်း ပြည်သူပြည်သားများ ပြောဆိုခန်း၊ နတ်သျှင်နောင်နှင့် ရာဇဓာတုကလျာ လက်ထပ်ခန်း၊ နတ်သျှင်နောင်နှင့် ရာဇဓာတုကလျာ သစ္စာတိုင်ခန်းနှင့် ခွဲခွာခန်း၊ နတ်သျှင်နောင်မှ အယုဒ္ဓယတပ်များကို တိုက်ခိုက်ရန် ပြင်ဆင်ခန်း၊ နတ်သျှင်နောင် နောက်ကြောင်းပြန် ဇာတ်လမ်းနိဂုံးချုပ်ခန်း၊ ငဇင်ကာ အမြောက်လက်နက် ပြုလုပ်ခန်း၊ ငဇင်ကာနှင့် အပေါင်းပါများ အစည်းအဝေး ပြုလုပ်ခန်း၊ နတ်သျှင်နောင် နှင့် ငဇင်ကာ တွေ့ဆုံခန်း၊ မင်းရဲနန္ဒမိတ်မှ တပ်မှူး ဗိုလ်မှူးများနှင့် တိုင်ပင်ခန်း၊ မင်းရဲနန္ဒမိတ်မှ သန်လျင်သို့ စစ်ချီခန်း၊ ပေါ်တူကီတပ်များနှင့် အပေါင်းပါ တောင်ငူတပ်များအား အင်းဝတပ်များက တိုက်ခိုက်ခန်း၊ မင်းရဲနန္ဒမိတ်မှ သန်လျင်မြို့အား သိမ်းပိုက် နိုင်ရေး ဥမင်လိုဏ်ခေါင်း ပြုလုပ်ရန် အမိန့်ပေးခန်း၊ အင်းဝတပ်များ သန်လျင်မြို့အား သိမ်းပိုက်နိုင်ရန် ဥမင်လိုဏ်ခေါင်းပြုလုပ်ခန်းနှင့် သန်လျင်မြို့ရိုး ကျိုးပေါက်ခန်း၊ မင်းရဲ နန္ဒမိတ်မှ ငဇင်ကာနှင့် နတ်သျှင်နောင်အား ဖမ်းဆီးခန်း၊ ငဇင်ကာအား စစ်မေးခန်း၊ နတ်သျှင်နောင်အား တရားနှင့်အညီ စီရင်ခန်း၊ နတ်သျှင်နောင်နှင့် ငဇင်ကာအား ကွပ်မျက်ခန်းနှင့် ဇာတ်သိမ်းခန်းတို့ဖြင့် ဖျော်ဖြေတင်ဆက်ခဲ့တာဖြစ်ပါတယ်။

အဆိုပါ ဇာတ်တော်ကြီး တင်ဆက်ကပြဖျော်ဖြေပွဲကို နစကဥက္ကဋ္ဌ၏ ဇနီး ဒေါ်ကြူကြူလှ၊ နစက ကောင်စီဝင်များနှင့် ဇနီးများ၊ ကောင်စီအတွင်းရေးမှူးနှင့်ဇနီး၊ ကောင်စီ တွဲဖက်အတွင်းရေးမှူးနှင့်ဇနီး၊ ပြည်ထောင်စုအဆင့် တာဝန်ရှိပုဂ္ဂိုလ်များနှင့် ဇနီးများ၊ ပြည်ထောင်စုဝန်ကြီးများနှင့်ဇနီးများ၊ ကာကွယ်ရေးဦးစီးချုပ်ရုံးမှ တပ်မတော် အရာရှိကြီးများနှင့် ဇနီးများ၊ ကာကွယ်ရေးဦးစီးချုပ်ရုံး(ကြည်း)ရှိ ရုံးဌာန အသီးသီးမှအရာရှိ၊ စစ်သည်များနှင့် မိသားစုဝင်များ တက်ရောက်ကြည့်ရှု အားပေးခဲကြတယ်လို့သိရှိရပါတယ်။

#ymg/knl

Published 25 Sept 2022

မြန်မာနိုင်ငံတွင် ခရိုင်များတိုးချဲ့ဖွဲ့စည်းခဲ့ပြီးနောက် ခရိုင်အချို့တွင် ခရိုင်တရားရုံးများ  ဖွင့်လှစ်ခွင့်ပြုတဲ့ အမိန့်တွေကို  ပြည်ထောင်စုတရားလွှတ်တော်ချုပ်က ၂၀၂၂ခုနှစ် ဩဂုတ်လ(၁၇)ရက် ရက်စွဲဖြင့် ထုတ်ပြန်ပေးခဲ့ ကြောင်းသိရှိရပါတယ်။

အဲဒီအမိန့်များအရ အောက်ပါအတိုင်း  ခရိုင်တရားရုံး (၂၆ )ရုံးကို  တိုးချဲ့ခွင့်ပြုလိုက်တာဖြစ်ပါတယ်။

(၁) ကချင်ပြည်နယ်

               (က)တနိုင်းခရိုင်တရားရုံး

               (ခ) ချီဖွေခရိုင်တရားရုံး

(၂) ကယားပြည်နယ်

               (က) ဒီးမော့ဆို ခရိုင်တရားရုံး

                (ခ) မယ်စဲ ခရိုင်တရားရုံး

(၃)ကရင်ပြည်နယ်

            (က)ကြာအင်းဆိပ်ကြီး ခရိုင်တရားရုံး

            (ခ) သံတောင်ကြီး ခရိုင်တရားရုံး

(၄)ချင်းပြည်နယ်

            (က) တီးတိန် ခရိုင်တရားရုံး

            (ခ) ပလက်ဝ ခရိုင်တရားရုံး

(၅)စစ်ကိုင်းတိုင်းဒေသကြီး

            (က) ရေဦီး ခရိုင်တရားရုံး

            (ခ) ဟုမ္မလင်း ခရိုင်တရားရုံး

            (ဂ) ကောလင်း ခရိုင်တရားရုံး

(၆) တနင်္သာရီတိုင်းဒေသကြီး

            (က) ဘုတ်ပြင်းခရိုင်တရားရုံး

(၇) ပဲခူးတိုင်းဒေသကြီး

            (က) ညောင်လေးပင် ခရိုင်တရားရုံး

            (ခ) နတ်တလင်း ခရိုင်တရားရုံး

(၈) မကွေးတိုင်းဒေသကြီး

            (က) ချောက် ခရိုင်တရားရုံး

            (ခ) အောင်လံ ခရိုင်တရားရုံး

(၉) မန္တလေးတိုင်းဒေသကြီး

            (က)အမရပူရ ခရိုင်တရားရုံး

            (ခ) သပိတ်ကျင်း ခရိုင်တရားရုံး

            (ဂ) တံတားဦး ခရိုင်တရားရုံး

(၁၀) နေပြည်တော်

            (က) ဥတ္တရ ခရိုင်တရားရုံး

            (ခ) ဇေယျာသီရိ ခရိုင်တရားရုံး

            (ဂ) ပျဉ်းမနား ခရိုင်တရားရုံး

(၁၁) မွန်ပြည်နယ်

            (က) ရေး ခရိုင်တရားရုံး

            (ခ) ကျိုက်ထိုခရိုင်တရားရုံး

(၁၂) ရခိုင်ပြည်နယ်

            (က) အမ်း ခရိုင်တရားရုံး

            (ခ) တောင်ကုတ် ခရိုင်တရားရုံး

အဆိုပါအမိန့်ကြေညာစာများကို အမိန့်ကြေညာစာ အမှတ် ၅၄၃/၂၀၂၂ မှ ၅၅၅/၂၀၂၂ အထိဖြင့်  ပြည်ထောင်စု တရားသူကြီးချုပ် ဦးထွန်းထွန်းဦးက လက်မှတ်ရေးထိုး ထုတ်ပြန်ကြေညာခဲ့တာဖြစ်ပါတယ်။

အများစုဟာ တိုးချဲ့ဖွဲ့စည်းလိုက်တဲ့ ခရိုင်အသစ်များအတွက်ဖြစ်ကြပြီး ပြည်ထောင်စုအစိုးရအဖွဲ့က အဆိုပါခရိုင် တရားရုံးတွေရဲ့ ဖွဲ့စည်းပုံကိုအတည်ပြုပေးခဲ့ပြီးနောက် ဖွင့်လှစ်ခွင့်အမိန့်ထုတ်ပြန်ခဲ့တာဖြစ်ပါတယ်။

#District_Courts_Myanmar

#ymg/-knl

Published 25 Sept 2022

မြောက်ကိုးရီးယားက ပဲ့ထိန်းဒုံးကျည်တစ်စင်းကို ယင်းရဲ့ အရှေ့ဖက်ကမ်းခြေပင်လယ်ထဲ ပစ်လွှတ်ခဲ့ပါတယ်။ ဒါဟာ   တောင်ကိုရီးယားနှင့် အမေရိကန်တပ်တွေ လေယာဉ်တင်သင်္ဘောကြီးတစ်စီးပါဝင်ပြီး စစ်ရေးပူးတွဲလေ့ကျင့်ခန်းလုပ်ဖို့ စီစဉ်ထားတာနှင့် အမေရိကန်ဒုသမ္မတ ကမ်မလာဟာရစ် ဒေသကို လာရောက်လည်ပတ်မယ့်ကိစ္စ မတိုင်ခင် ပစ်လွှတ် ခဲ့တာဖြစ်ပါတယ်။

အဲဒီပဲ့ထိန်းဒုံးကျည်ဟာ တာတိုပစ်ဒုံးကျည်တစ်စင်းဖြစ်ပြီး မြောက်ပြုံယမ်းပြည်နယ်ရဲ့ တေချွန်ဒေသအနီး  မနက်၇နာရီမတိုင်ခင်လေးတင် ပစ်လွှတ်တာလို့ တောင်ကိုရီးယားစစ်တပ်က ပြောပါတယ်။ ဒုံးကျည်ဟာ အမြင့် ၆၀ကီလိုမီတာကနေ ၃၇၃ မိုင်အထိ  အမြန်နှုန်း Mach 5 ပျံသန်းခဲ့တာလို့လည်း တောင်ကိုးရီးယားစစ်တပ်ဘက်က ပြောပါတယ်။

“ ကိုရီးယားကျွန်းဆယ်နှင့် နိုင်ငံတကာ အသိုက်အဝန်းရဲ့ ငြိမ်းချမ်းရေးနှင့်လုံခြုံရေးကို ခြိမ်းခြောက်ပြီး အလွန်ရန်လိုတဲ့ ဆောင်ရွက်မှုတစ်ခုအဖြစ် မြောက်ကိုးရီးယားဟာ ပဲ့ထိန်းဒုံးကျည်တစ်စင်း ပစ်လွှတ်ခဲ့တယ်” လို့ တောင်ကိုးရီးယား  Joint Chiefs of Staff က သတင်းထုတ်ပြန်ပါတယ်။

ပစ်လွှတ်ပြီးနောက် အခြေအနေတွေနှင့်ပတ်သက်လို့ တောင်ကိုးရီးယား Joint Chiefs of Staf ဥက္ကဋ္ဌ ကင်မ်ဆောင်ကျွန် နှင့် အမေရိကန်စစ်တပ် ကိုးရီးယားစစ်တိုင်းမှူး ပေါလာကင်မရာတို့ဟာ ဆွေးနွေးခဲ့ကြပြီး မြောက်ကိုးရီးယားရဲ့ ဘယ်လိုခြိမ်းခြောက်ရန်စမှုမျိုးကိုမဆို တုန့်ပြန်ဖို့ အဆင်သင့်ရှိကြောင်း ထပ်လောင်းအတည်ပြုခဲ့ကြတယ်လို့ပြောပါတယ်။

ဒီကိစ္စကို တောင်ကိုရီးယား အမျိုးသားလုံခြုံရေးကောငစီက အရေးပေါ်အစည်းတစ်ခုပြုလုပ်ရန်ရှိပြီး ဗြိတိန်၊အမေရိကန်နှင့် ကနေဒါနိုင်ငံတွေကိုလည်ပတ်ပြီး စနေနေ့ ညပိုင်းမှ ဆိုးလ်ကိုပြန်ရောက်လာတဲ့ တောင်ကိုရီးယားသမ္မတ ယွန်ဆတ်ယိုကို ဒုံးကျည်ပစ်လွှတ်မှု အစီရင်ခံဖို့ရှိတယ်လို့ သမ္မတရုံးကသတင်းထုတ်ပြန်ပါတယ်။

ဒုံးကျည်ဟာ  အမြင့်ဆုံး ၅၀ကီလိုမီတာအထိ ပုံမှန်မဟုတ်တဲ့လမ်းကြောင်းကနေပျံသန်းခဲ့တာဖြစ်ပြီး  ဂျပန်ရဲ့ အထူး စီးပွားရေး ဇုန်အပြင်ဖက်ကို ကျရောက်ခဲ့တယ်လို့ ဂျပန်ကာကွယ်ရေးဝန်ကြီး ယာဆူကာဇူဟာမာဒါက ပြောပါတယ်။  ဒါပေမယ့် သင်္ဘောတွေ လေယာဉ်တွေ ပြဿနာတစ်စုံတစ်ခုဖြစ်ခဲ့တယ်လို့တော့ သတင်းမကြားရဘူးလို့ သူကပြောပါတယ်။

အမေရိကန်တပ် အင်ဒိုပစိဖိတ်စစ်တိုင်းက ဒုံးကျည်ပစ်လွှတ်မှုကို သတိမူမိပြီး မဟာမိတ်တွေနှင့် အနီးကပ်တိုင်ပင်နေတယ်လို့ သတင်းထုတ်ပြန်ထားပါတယ်။

Source Reuters

#North_Korea

#Misssile_launch

#Indo_pacific

Published 24 Sept 2022
တရုတ်နိုင်ငံရဲ့ နယ်စပ်ဖြတ်ကျော် တရုတ်ယွမ်ငွေ သုံးစွဲမှုဟာ ၂၀၂၁ခုနှစ်မှာ အမေရိကန်ဒေါ်လာ ၅.၂၄ ထရီလီယံနှင့် ညီမျှတဲ့ တရုတ်ယွမ်ငွေ ၃၆.၆၁ ထရီလီယံအထိရှိခဲ့ပြီး ယမန်နှစ်ထက် ၂၉ ရာခိုင်နှုန်းမြင့်တက်ခဲ့တယ်လို့ တရုတ် ဗဟိုဘဏ်က ကြေညာပါတယ်။

အဲဒီတန်ဖိုးတွေထဲမှာ လက်ခံရရှိတာက ၁၈.၅၁ ထရီလီယံ ယွမ်ဖြစ်ပြီး ပေးချေတာက ၁၈.၁ ထရီလီယံ ယွမ်ဖြစ်တယ်လို့ သောကြာနေ့က ထုတ်ပြန်တဲ့ တရုတ်ဗဟိုဘဏ်ရဲ့ အစီရင်ခံစာမှာဖော်ပြထားပါတယ်။

ပြီးခဲ့တဲ့နှစ်က နယ်စပ်ဖြတ်ကျော် အသားတင် စာရင်းရှင်းလင်း စီးဆင်းဝင်ရောက်ဟာ ၄၀၄.၄၇ ဘီလျံ ယွမ် ရှိခဲ့ပြီး  အဲဒီမတိုင်ခင်နှစ်က ယွမ်ငွေ အပြင်သို့စီးဆင်းမှုဟာ ၁၈၅. ၇၉ ဘီလျံယွမ်ငွေရှိတယ်လို့လည်း နှိုင်းယှဉ်ဖော်ပြထားပါတယ်။

၂၀၂၁ခုနှစ်မှာ နယ်စပ်ဖြတ်ကျော် ယွမ်ငွေဖြင့်စာရင်းရှင်းမှုတွေဟာ  နယ်စပ်ဖြတ်ကျော်  ပြည်တွင်းသုံးငွေနှင့် နိုင်ငံခြားငွေတွေ စာရင်းရှင်းလင်းမှုအားလုံးရဲ့ ၄၇.၄ ရာခိုင်နှုန်းရှိပြီး ၁.၂ ရာခိုင်နှုန်းမြင့်တက်လာပါတယ်။

၂၀၂၂ခုနှစ်ရဲ့ ပထမခြောက်လပတမှာ နယ်စပ်ဖြတ်ကျော် ယွမ်ငွေအသုံးပြုမှုဟာ ၂၀.၃၂ ထရီလီယံရှိခဲ့ပါတယ်။ မနှစ်က ထက် ၁၅.၇ ရာခိုင်နှုန်းထပ်မံတိုးတက်လာပါတယ်။ ဒါဟာ နယ်စပ်ဖြတ်ကျော်ပြီး ယွမ်ငွေနှင့် အခြာနိုင်ငံခြားငွေတွေ အသုံးပြုမှုအားလုံးရဲ့ ၄၉.၁ ရာခိုင်နှုန်းဖြစ်ပါတယ်။

ယွမ်ငွေပိုင်ဆိုင်မှုဟာ ကမ္ဘာလုံးဆိုင်ရာ ရင်းနှီးမြှပ်နှံသူတွေကို ဆက်လက်ပြီး မြင့်မားစွာဆွဲဆောင်ထားဆဲဖြစ်ပြီး  လုံခြုရေးရင်းနှီးမြှပ်နှံမှုဟာလည်း နယ်စပ်ဖြတ်ကျော် ယွမ်ငွေဖြင့် လက်ခံပေးချေမှု အသားတင်စီးဆင်းမှုဟာလည်း စံချိန်တင်မြင့်မားနေတယ်လို့ သတင်းမှာဖော်ပြထားပါတယ်။

 ၂၀၂၁ နှစ်ကုန်မှာ  နိုင်ငံခြားကုမ္ပဏီတွေက ပြည်တွင်းယွမ်ငွေကို စတော့၊စာချုပ်၊ချေးငွေနှင့် စုဆောင်းမှုတွေဟာ ၁၀.၈၃ ထရီလီယွမ်အထိရှိနေပြီး ပြီးခဲ့တဲ့နှစ်ထက် ၂၀.၅ ရာခိုင်နှုန်းတက်လာတာဖြစ်ပါတယ်။

ယွမ်ငွေရဲ့ နိုင်ငံခြားမှတ်ပုံတင်လုပ်ငန်းဈေးကွက်ဟာလည်း ပိုပြီး အသုံးပြုကုန်သွယ်မှုတွေရှိလာနေပါတယ်။ ၂၀၂၁ခုနှစ် နှစ်ကုန်အထိ အဲဒီ အဓိက ‌ေဈေးကွက်တွေဟာ ယွမ်ငွေစုဆောင်းမှု ၁.၅ ထရီလီယံအထိရှိလာနေတယ်လို့လည်း အစီရင်ခံစာမှာဖော်ပြထားပါတယ်။

နိုင်ငံတကာငွေပေးချေမှုမှာ ယွမ်ငွေနှင့်ပေးချေမှုအချိုးအစားဟာ  ၂၀၂၁ ဒီဇင်ဘာမှာ ၂.၇ ရာခိုင်နှုန်းအထိ မြင့်တက်လာ ပါတယ်။  ဒါဟာ ဂျပန်ယန်းငွေဖြင့်ပေးချေတာကို ကျော်ဖြတ်ပြီး ကမ္ဘာ့ငွေကြေးပေးချေမှုမှာ  စတုတ္ထအဆင့်ရောက်ရှိလာတာပါ။ ၂၀၂၂ ဇန်နဝါရီမှာ ၃.၂ ရာခိုင်နှုန်းအထိထပ်မံမြင့်တက်လာပြီး ဒါဟာ စံချိန်တင်သွားတာဖြစ်တယ်လို့  ကမ္ဘာအနှံ့ ဘဏ်အချင်းချင်း ဘဏ္ဍာရေးဆိုင်ရာ တယ်လီဖုန်းဆက်သွယ်မှု အသင်း SWIFT ( ဆွစ်) ရဲ့ ကိန်းဂဏန်းအချက်အလက်များ အရသိရပါတယ်။

Source CCTV+

#Cross-border_RMB

#Yuan_Use

#China_Economy