#LocalNews
Published_19 May 2022

ထိုင်းနိုင်ငံသို့ မြန်မာနိုင်ငံမှ MOU အလုပ်သမားများ တတိယအကြိမ်အဖြစ် ယနေ့ မေလ ၁၉ ရက်တွင် ထပ်မံဝင်ရောက်ခဲ့ကြောင်း ထိုင်းနိုင်ငံရှိ မြန်မာနိုင်ငံဆိုင်ရာ အလုပ်သမားသံအရာရှိရုံး၏ စာရင်းများအရ သိရသည်။

ရောက်ရှိအလုပ်သမားအရေအတွက်မှာ ၁၅၁ ဦးဖြစ်ပြီး ထိုင်းနိုင်ငံ Fujikura Electronics (Thailand) Co.,Ltd တွင် ၉၂ ဦး၊ Thai Chin Fu Enterprise Co.,Ltd တွင် ၂၉ ဦး၊ Samakee Concrete Product Co.,Ltd တွင် လူဦးရေ ၃၀ သွားရောက်လုပ်ကိုင်ရမည်ဖြစ်ပါကြောင်း သိရသည်။

MOU အလုပ်သမားများအနေဖြင့် ထိုင်းနိုင်ငံသို့ မေလ ၁၀ ရက်ကစ၍ သွားရောက်ခွင့်ရခဲ့ရာ ပထမအကြိမ်အဖြစ် ထိုင်းနိုင်ငံ Panuspoultry Group Co., Ltd ကြက်သားစက်ရုံ၌ လုပ်ကိုင်နိုင်ကြမည့် အလုပ်သမား၂၈၇ ဦး၊ ဒုတိယအကြိမ် မေလ ၁၁ ရက်တွင် အလုပ်သမား ၃၀၁ ဦးကိုလည်းကောင်း နှစ်နိုင်ငံသဘောတူမှုဖြင့် တရားဝင် သွားရောက်ခွင့်ပြုခဲ့ပြီး ဖြစ်ကြောင်း သိရသည်။

ထိုင်းနိုင်ငံမှ လတ်တလောအနေဖြင့် MOU အလုပ်သမား ၂၁၄၀၁၃ ဦး ခေါ်ယူရန်လုပ်ဆောင်ရာတွင် မြန်မာနိုင်ငံမှ ၁၅၀၆၃၇ ဦး၊ ကမ္ဘောဒီးယားနိုင်ငံမှ ၄၈၂၇၂ ဦး၊ လာအိုနိုင်ငံမှ ၁၅၁၀၄ ဦး အတွက် Demand ခေါ်စာရရှိပြီး ဖြစ်ကြောင်း၊ ယခုအခါ မြန်မာနိုင်ငံမှ MOU ဖြင့် သွားရောက်ခွင့်ရပြီးသူ ၇၃၉ ဦး ရှိပြီဖြစ်ကြောင်းလည်း သိရသည်။

ymg/mt
#Yangon_Media_Group

#DailyNews
Published - 19 May 2022

၁။ မိုးကြိုးပစ်ခြင်းကြောင့် နှစ်စဉ်လူဦးရေ(၁၀၀)ကျော် သေဆုံး၊ လာမည့်မိုးရာသီတွင် မိုးကြိုးအန္တရာယ်သတိပြုရန်လို
(ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ ညွှန်ကြားရေးမှူးဒေါ်ဖြူလဲ့လဲ့ထွန်း)

၂။ ရခိုင်ပြည်နယ် ကျောက်တော်မြို့နယ်အတွင်းတွေ့ရှိသည့် ဆင်းတုတော်မှာ အေဒီ ၅ ရာစုခန့်ကဟုဆို
ရှေးဟောင်းသုတေသနနှင့် အမျိုးသားပြတိုက် ဦးစီးဌာန(စစ်တွေဌာနခွဲ)ညွန်ကြားရေးမှူး ဦးကြည်ခင်

၃။ နေ့စဉ်မိုးလေဝသသတင်း။

၄။ ယူကရိန်းပဋိပက္ခအတွင်း အစွန်းရောက်များနှင့် အကြမ်းဖက်သမားများကို ကြေးစားများအဖြစ် အမေရိကန်တပ်စုဆောင်းနေသည်ဟု ရုရှားနိုင်ငံခြားထောက်လှမ်းရေးအဖွဲ့စွပ်စွဲ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldNews
Published 19 May 2022

ဗြိတိန်ပြည်ထောင်စု၊ ပေါ်တူဂီ၊ စပိန်နဲ့ အမေရိကန်တို့မှာ မျောက်ကျောက်ရောဂါကူးစက်ပျံ့ပွားလျက်ရှိပါတယ်။

အင်္ဂလန်မှာ ၈ ဦး၊ ပေါ်တူဂီမှာ ၂၀ ဦးအပါအဝင် ဥရောပ ၃ နိုင်ငံမှာ ၃၆ ဦးကူးစက်ထားတာတွေ့ရှိတာကြောင့် ပျံ့ပွားမှုနည်း‌တယ်လို့ ယူဆရပါတယ်။

ဒါပေမဲ့ မျောက်ကျောက်ရောဂါဗိုင်းရပ်စ်ကို ဘယ်ကနေကူးစက်လာသလဲဆိုတာတော့ ကျန်းမာရေးအရာရှိတွေအတွက် ပဟေဌိဖြစ်နေပါတယ်။

ဗိုင်းရပ်စ်က လူတွေကြားထဲမှာ သိသာထင်ရှားခြင်းမရှိဘဲ ပျံ့နှံနေတာမျိုးဖြစ်နိုင်ပြီး ကူးစက်မှုပုံစံအသစ်ပေါ်ပေါက်လာမှာကို စိုးရိမ်နေရပါတယ်။

ယူကေကျန်းမာရေးလုံခြုံရေးအေဂျင်စီမှ ဆေးပညာအကြံပေးအရာရှိချုပ်’ဆူဆန်ဟော့ပ်ကင်းစ်’က ဒီကူးစက်မှုဟာ ရှားပါးကူးစက်မှုမျိုးဖြစ်ကြောင်း၊ ဘယ်ကနေဘယ်လိုကူးစက်လာသလဲဆိုတာကို အရေးတကြီးစုံစမ်းလေ့လာနေကြကြောင်း တနင်္လာနေ့က ထုတ်ပြန်ခဲ့ပါတယ်။

မျောက်ကျောက်ရောဂါက စိတ်အနှောင့်အယှက်ဖြစ်ရတဲ့ ရောဂါဖြစ်ပြီး ဖျားနာခြင်း၊ ခန္ဓာကိုယ်ကိုက်ခဲခြင်း၊ သားငံရေဖုထွက်ခြင်း၊ တဖြည်းဖြည်းဖြင့် ကျောက်ရောဂါပုံစံဖြစ်လာပြီး မျက်နှာ၊ လက်၊ ခြေထောက်တွေမှာ နာကျင်ရသည့်ရေကြည်ဖုများထွက်ပေါ်ခြင်းတို့ ဖြစ်တတ်ပါတယ်။

မျောက်ကျောက်ရောဂါတစ်မျိုးကတော့ ကူးစက်သူ ၁၀ ရာခိုင်နှုန်းခန့် သေဆုံးနိုင်တဲ့အထိ အန္တရာယ်ရှိနိုင်ပါတယ်။

လက်ရှိအင်္ဂလန်မှာဖြစ်ပွားနေတဲ့ဗိုင်းရပ်စ်ကတော့ အပျော့စားသာဖြစ်ပြီး သေဆုံးနိုင်မှုနှုန်း ၁ ရာခိုင်နှုန်းအောက်သာရှိပါတယ်။ များသောအားဖြင့် ၂ ပတ်မှ ၄ ပတ်အတွင်း သက်သာသွားတတ်ပါတယ်။

ပုံမှန်အားဖြင့် မျောက်ကျောက်ရောဂါကို အာဖရိကအနောက်ပိုင်းနဲ့ အလယ်ပိုင်းတို့ရှိ တိရိစ္ဆာန်များမှ ကူးစက်လာလေ့ရှိပြီး ဗိုင်းရပ်စ်က ထိုလူများမှတဆင့် အခြားနိုင်ငံများသို့ ရောက်ရှိသွားတတ်ပါတယ်။

လူလူချင်းကူးစက်ဖို့က သွေးသားချင်းထိတွေ့မှု၊ ချောင်းဆိုးရာမှသလိပ် ဒါမှမဟုတ် အနာမှပြည်များဖြင့် ထိတွေ့မှုတိုဖြင့်သာ ကူးစက်နိုင်တာကြောင့် သိပ်ပြီးကူးစက်လေ့မရှိပါဘူး။

ဒါပေမဲ့ အင်္ဂလန်မှ ကူးစက်သူ ၈ ယောက်ထဲက ၇ ယောက်ဟာ လတ်တလောအာဖရိကကိုသွားရောက်ထားခြင်း မရှိပါဘူး။

ဒါကြောင့် အင်္ဂလန်ထဲကနေပဲ ကူးစက်တာဖြစ်မယ်လို့ ယူဆနေကြပါတယ်။

ဒ့ါအပြင် ထို ၇ ယောက်ဟာ နိုက်ဂျီးရီးယားကိုသွားထားတဲ့ လူနာနဲ့လည်း ထိတွေ့ခြင်းမရှိပါဘူး။

ထိုကဲ့သို့အချက်အလက်တွေကို ခြုံငုံကြည့်တဲ့အခါ ဗိုင်းရပ်စ်က အင်္ဂလန်နိုင်ငံထဲမှာ မသိမသာပျံ့ပွားနေပြီလို့ ယူဆလိုရပါတယ်။

အမေရိကန် မာဆာချူဆက်စ်မှလူနာဆိုရင် ရောဂါပျံ့ပွားနေတဲ့ နိုင်ငံတွေကိုသွားရောက်ခြင်းမရှိပေမယ့် ကနေဒါကိုတော့ သွားရောက်ခဲ့ပါတယ်။

ဗိုင်းရပ်စ်က ကူးစက်မှုလမ်းကြောင်းအသစ်အဖြစ် လိင်မှတဆင့်ကူးစက်မှုပါဖြစ်နေပြီဟု တွေ့ရှိနေရကြောင်း ကူးစက်ရောဂါပညာရှင်’မက်တီယိုပရိုချက်ဇ်ကာ’က တွစ်တာမှာဖော်ပြထားပါတယ်။

“လိင်တူဆက်ဆံသူတွေအနေနဲ့ အနာဖြစ်ခြင်းမျိုး၊ အဖုအပိန့်ထွက်ခြင်းမျိုးဖြစ်တယ်လို ခံစားရရင် ကျန်းမာရေးစောင့်ရှောက်မှုချက်ချင်းခံယူသင့်ပါတယ်” လို့ ‘ဟော့ပ်ကင်းစ်’က ဖော်ပြထားပါတယ်။

ယခုမျောက်ကျောက်ရောဂါက ပုံမှန်သိထားတာနဲ့ကွဲပြားစွာကူးစက်နေတာကြောင့် အမေရိကန်ရောဂါထိန်းချုပ်ကာကွယ်ရေးစင်တာမှ သိပ္ပံပညာရှင်များက စိုးရိမ်တကြီစောင့်ကြည့်နေကြပါတယ်။

Source: npr.
#Yangon_Media_Group

#LocalNews
Published - 19 May 2022

မိုးရာသီကာလတွေမှာကျေးရွာတွေမှာ မြွေကိုက်ခံရမှုတွေ များပြားတဲ့အတွက် မြွေအန္တရာယ်နဲ့ မြွေကိုက်ဒဏ်ရာပြုစုနည်း အသိပညာပေးတာတွေကို မြန်မာနိုင်ငံကြက်ခြေနီအသင်းကဆောင်ရွက်လျက်ရှိတယ်လို့ သိရပါတယ်၊၊

ကရင်ပြည်နယ်၊ ဘားအံမြို့ ပေါ့ထော်ကျေးရွာမှာ ကျေးရွာအတွင်း မိုးရာသီမှာ အဖြစ်များပြီး လိုအပ်လျက်ရှိတဲ့ မြွေကိုက်ဒဏ်ရာပြုစုနည်း၊ အခြေခံအသက်ကယ်အထောက်အကူ ပြုစုနည်းတွေကိုမြန်မာနိုင်ငံကြက်ခြေနီအသင်းအနေနဲ့ ရှင်းလင်းသရုပ်ပြတာတွေဆောင်ရွက်ခဲ့တာဖြစ်ပါတယ်၊၊

အဲဒီလိုအသိပညာပေးခြင်းလုပ်ငန်းကို ဘားအံမြို့နယ် ကြက်ခြေနီအသင်းခွဲမှ ကြက်ခြေနီစေတနာ့လုပ်အားရှင်တွေသရုပ်ပြ ကူညီဆောင်ရွက်ခဲ့တာဖြစ်တယ်လို့ သိရပါတယ်၊၊

မြန်မာနိုင်ငံမှာ နှစ်စဥ်မြွေအန္တရာယ်ကြောင့် လူသေဆုံးမှုတွေရှိနေပြီး လက်တလောမှာလည်း စစ်ကိုင်းတိုင်းဒေသကြီးအတွင်းရှိ နေရပ်စွန့်ခွာနေထိုင်နေရသူတွေဟာ တောတွေ၊ တောင်တွေထဲမှာ မြွေအန္တရာယ်တွေနဲ့ ရင်ဆိုင်နေရတယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published_ 19 May 2022

မြန်မာနိုင်ငံအနေဖြင့် အာဆီယံရဲ့ စီးပွားရေးမဏ္ဍိုင်အောက်တွင် ဆောင်ရွက်ရန် ရှိတဲ့ကိစ္စများကို တက်ကြွစွာဆောင်ရွက်လျက်ရှိကြောင်း နစကရဲ့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ဝန်ကြီးဦးအောင်နိုင်ဦးက အင်ဒိုနီးရှားနိုင်ငံ၊ ဘာလီကျွန်း၌ မေ ၁၇ ရက်မှ ၁၈ ရက်အထိ ကျင်းပခဲ့တဲ့ အာဆီယံစီးပွားရေးဝန်ကြီးများ အထူးအစည်းအဝေးမှာ ပြောကြားခဲ့ပါတယ်။

ထို့ပြင် ဒေသတွင်းစီးပွားရေး ပေါင်းစည်းမှုအစီအစဉ်များမှာလည်း ဆက်လက် ပူးပေါင်း ဆောင်ရွက်သွားမှာဖြစ်ကြောင်းနှင့် နစကအစိုးရ အနေဖြင့် အခက်အခဲများကို ကျော်လွန်ရေး ကြိုးပမ်းဆောင်ရွက်ကာ ဖွဲ့စည်းပုံအခြေခံ ဥပဒေနှင့်အညီ ၂၀၂၃ ခုနှစ် အတွင်း ရွေးကောက်ပွဲကျင်းပနိုင်ရေးအတွက် ကြိုတင်ပြင်ဆင်မှုများ ဆောင်ရွက်နေပြီဖြစ်ကြောင်း ပြောကြားခဲ့ပါတယ်။

မြန်မာနိုင်ငံ၏ နိုင်ငံရေးနှင့်စီးပွားရေး တည်ငြိမ်တိုးတက်လာစေရေးအတွက် အာဆီယံနိုင်ငံများ၏ အထောက်အကူနှင့် နားလည်မှုသည် အရေးကြီးပါကြောင်း၊ သို့ဖြစ်၍ အာဆီယံနိုင်ငံများအနေဖြင့် မြန်မာနိုင်ငံရဲ့အခြေအနေကို နားလည်စာနာကာ ဝိုင်းဝန်းအထောက်အကူပြုစေလိုကြောင်း ပြောကြားခဲ့ပါတယ်။

အာဆီယံရဲ့ ကိုဗစ်-၁၉ အလွန် စီးပွားရေးပြန်လည်ထူထောင်ရန် ကြိုးပမ်းဆောင်ရွက်ရေး၊ ဒေသတွင်းနှင့် ကမ္ဘာ့ရေးရာများတွင် အာဆီယံ၏ စီးပွားရေးထိခိုက်မှု နည်းပါးအောင်ဆောင်ရွက်ရေးနှင့် စီးပွားရေးပေါင်းစည်းမှုတွင် အာဆီယံရဲ့ အချက်အချာကျမှုကို ပိုမိုမြှင့်တင်ရေးတို့အပေါ် အာဆီယံနိုင်ငံများက ဆွေးနွေးခဲ့ကြပါတယ်။

ဒေသတွင်းဘက်စုံစီးပွားရေး ပူးပေါင်းဆောင်ရွက်မှု သဘောတူညီချက်သည် ကပ်ရောဂါအလွန် စီးပွားရေး ပြန်လည်ထူထောင်ရာတွင် အထောက်အကူပြုတဲ့အတွက် အဆိုပါ သဘောတူညီချက် အသက်ဝင်ရေးကို အရှိန်မြှင့်တင်ဆောင်ရွက်ရန် အာဆီယံ စီးပွားရေးဝန်ကြီးများက တိုက်တွန်းခဲ့ကြပါတယ်။

#Yangon_Media_Group

#LocalNews
Published_19 May 2022

ဆန္ဒမဲပေးပိုင်ခွင့်ရှိသူများအနေဖြင့် နိုင်ငံသားကတ်ကိုင်ဆောင်၍ မဲပေးနိုင်ရန် လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာနက အဓိကလုပ်ဆောင်နေကြောင်း ပြည်ထောင်စုဝန်ကြီး ဦးခင်ရီက ပြောသည်။

အိမ်ထောင်စုလူဦးရေစာရင်းပုံစံ (၆၆/၆)နှင့် နိုင်ငံသားကတ်ထုတ်ပေးခြင်း မှတ်ပုံတင်စာအုပ် (နိုင်-၄)ရှိ စာရင်းမှတ်တမ်း အချက်အလက်များကို နည်းပညာ၊ စက်ကိရိယာများ အသုံးပြု၍ ကွန်ပျူတာအတွင်း ထည့်သွင်းဆောင်ရွက်ခြင်းကို သတ်မှတ်ကာလအတွင်း ပြီးစီးရန် ဆောင်ရွက်နေကြောင်း ဌာန၏လုပ်ငန်းများနှင့် ပတ်သက်သည့် အစည်းအဝေးတစ်ခုတွင် ထည့်သွင်းပြောကြားခဲ့ခြင်း ဖြစ်သည်။

မဲစာရင်းမှန်ကန်စေရန်လည်း နည်းပညာဖြင့် အချက်အလက်များ ဖြည့်သွင်းဆောင်ရွက်နေကြောင်း၊ ပြည်တွင်းသို့ အကြောင်းအမျိုးမျိုးကြောင့် ဝင်ရောက်လာသည့် နိုင်ငံခြားသားများအား စနစ်တကျ ကြီးကြပ်ထိန်းသိမ်းရေး၊ ပြည်တွင်းနေ နိုင်ငံခြားသားများအား သတ်မှတ်အခွန်ဆောင်မှု ရှိစေရေးတို့အတွက် နည်းပညာများ အသုံးပြုဆောင်ရွက်နေသောကြောင့် နယ်မြေဒေသအလိုက် နိုင်ငံခြားသားများနှင့် ပတ်သက်သည့် အချက်အလက်များ ပြည့်စုံမှန်ကန်စွာဖြည့်သွင်းလုပ်ဆောင်နေကြကြောင်းလည်း သိရသည်။

ymg/mt
#Yangon_Media_group

#WorldHealth
Published 19 May 2022

ကလေးနှစ်ယောက်အမေဖြစ်သူ အသက် ၃၁ နှစ်အရွယ်အမျိုးသမီးဟာ ကိုဗစ်စမ်းသပ်စစ်ဆေးတဲ့ ၆ လက်မအရှည်နှာခေါင်းတိုဖတ်တံကို မတော်တဆမျိုချမိပြီးနောက် အရေးပေါ်ခွဲစိတ်ဖယ်ထုတ်ခဲ့ရပါတယ်။

'ဘော်ဘီလီ'လိုမျိုး ကိုဗစ်စမ်းသပ်ပစ္စည်းအသုံးပြုရင်း ထိခိုက်ဒဏ်ရာရခဲ့တဲ့ အင်္ဂလန်သား တစ်ရာကျော်ရှိလာပြီဖြစ်ကြောင်း MailOnline က ဧပြီလမှာဖော်ပြခဲ့ပါတယ်။

မစ္စ'လီ'ဟာ ညဘက်အလုပ်တာဝန်ချိန်ပြီးဆုံးပြီးနောက် နေမကောင်းဖြစ်လာသလိုခံစားလာရကာ ကိုဗစ်စမ်းသပ်ဖို့ဆုံးဖြတ်ခဲ့ပါတယ်။

အဲဒီနောက် တို့ဖတ်တံက ပါးစပ်ထဲဝင်သွားပြီး အာခေါင်ထဲညပ်သွားခဲ့ပါတယ်။
မစ္စ'လီ'က ဘာလုပ်ရမှန်းမသိဘဲ တိုဖတ်တံကိုမျိုချလိုက်ပေမယ့် လည်ချောင်းမှာကန့်လန့်ခံနေခဲ့ပါတယ်။

အရေးပေါ်ဌာနကိုအပြေးသွားခဲ့ရာ ဆေးဝန်ထမ်းတွေကလည်း ဒီလိုအဖြစ်မျိုးတစ်ခါမှမကြုံဖူးကြောင်း ပြောပြလာပါတယ်။

ဒါနဲ့ပဲ နီးစပ်ရာဆေးရုံသို့သွားခဲ့ပြီး အရေးပေါ်ခွဲစိတ်မှုခံယူခဲ့ရပါတယ်။ ခွဲစိတ်ဆရာဝန်များက ကွေးဆန့်လို့ရတဲ့ကင်မရာလေးကို လည်ချောင်းထဲထည့်ကြည့်ရာ တို့ဖတ်တံကိုတွေ့ရှိခဲ့ကြပါတယ်။

"တို့ဖတ်တံက ပါးစပ်ထဲဝင်သွားပြီး လည်ချောင်းအနောက်ဘက်မှာ ညပ်နေခဲ့ပြီး တို့ဖတ်တံတဖက်က အာခေါင်မှာကပ်နေခဲ့ပါတယ်၊ ဖယ်ထုတ်ဖို့လုပ်ပေမယ့် မရခဲ့တာကြောင့် မျိုချလိုက်မယ်လို့တွေးမိလိုက်ပါတယ်၊ အသက်လည်းမရှူနိုင်တော့ပါဘူး၊ အဲဒီနောက်ကားထဲဝင်ပြီး အရေးပေါ်ဌာနကို မောင်းထွက်သွားပါတယ်" လို့ ဆိုပါတယ်။

အရေးပေါ်ဌာနရောက်တဲ့အခါ မစ္စ'လီ'ကဖြစ်စဉ်ကိုရှင်းပြခဲ့ရာ ဆေးဝန်ထမ်းတွေက ဘာလုပ်ရမှန်းမသိခဲ့ပါဘူး။

"တို့ဖတ်တံကိုပါးစပ်ထဲကထုတ်မှရမှာပါ၊ တကယ်လို့အူထဲကိုသာရောက်သွားရင် ပေါက်ထွက်ကုန်နိုင်ပါတယ်" လို့ ခွဲစိတ်ဆရာဝန်နဲ့ တိုင်ပင်ဆွေးနွေးခဲ့ပါတယ်။

ပြီးခဲ့တဲ့လက MailOnline က စုံစမ်းရာမှာ ယူကေမှာ ကိုဗစ်စမ်းသပ်ပစ္စည်းအသုံးပြုပြီး ထိခိုက်ဒဏ်ရာရခဲ့သူ ၃ ထောင်လောက် အကြောင်းကြားခဲ့ကြကြောင်း တွေ့ရှိခဲ့ကြပါတယ်။

PCR test ပုံစံအဟောင်းတွေက တို့ဖတ်တံကိုလည်ချောင်းအနောက်ဘက်အထိ ထည့်ပြီးတို့ရတာကြောင့် ယခုလိုအဖြစ်မျိုးအင်္ဂလန်မှာ အနည်းငယ်တွေ့ရှိနေရပါတယ်။

အချို့လူတွေမှာလည်း စမ်းသပ်ပြီးနောက် နှာခေါင်းသွေးလျှံခြင်းမျိုးကြုံတွေ့ရကြောင်း အကြောင်းကြားလာကြပါတယ်။

လူအများအပြားကလည်း မတော်တဆထိခိုက်တာမျိုးဖြစ်တဲ့အခါ သက်ဆိုင်ရာကိုအကြောင်းမကြားတတ်ကြဘူးလို့ ယူကေဆေးဝါးဌာနနဲ့ ကျန်းမာရေးစောင့်ရှောက်မှုပစ္စည်းကွပ်ကဲရေးအေဂျင်စီတို့က ဆိုပါတယ်။

တာဝန်ရှိသူတွေကတော့ ကိုဗစ်စစ်ဆေးရင်းထိခိုက်မှုမျိုးဖြစ်တဲ့အခါ မှတ်တမ်းတင်အကြောင်းကြားဖို့ မှာကြားထားပါတယ်။

ဒီလိုအကြောင်းကြားခြင်းဖြင့် အလားတူအဖြစ်မျိုး၊ ပိုမိုဆိုးရွားခြင်းမျိုးဖြစ်မလာအောင် ဖော်ထုတ်နိုင်မှာဖြစ်တယ်လို့ အကြုံပြုထားပါတယ်။

Source: DailyMail
#Yangon_Media_Group

#Local_News
Published_ 19 May 2022

မန္တလေးတိုင်းဒေသကြီးတွင် ခေတ်မီစံပြကျေးရွာ (SMART Village) ၃ ရွာ ရွေးချယ် အကောင် အထည်ဖော်သွားမှာဖြစ်ကြောင်း သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီးဦးမြင့်စိုးရဲ့ ပြောကြားချက်အရ သိရပါတယ်။

ကျေးလက်နေပြည်သူများ၏ လူမှုစီးပွားဘဝ ဖွံ့ဖြိုးတိုးတက်ရေး၊ ကျေးလက်နှင့် မြိုပြုဖွံ့ဖြိုးမှုကွာဟချက် လျှော့ချရေး၊ မိသားစုဝင်ငွေတိုးပွားရေး၊ အလုပ်အကိုင် အခွင့်အလမ်းများ ရရှိရေးစသည့် ရည်မှန်းချက်၊ ရည်ရွယ်ချက်များဖြင့် တိုင်းဒေသကြီးနှင့် ပြည်နယ်အသီးသီးတွင် ခေတ်မီစံပြကျေးရွာ (SMART Village) များ ထူထောင်နိုင်ရေး ဆောင်ရွက်လျက်ရှိကြောင်း သိရပါတယ်။

SMART Village များပေါ်ပေါက်လာရေး သမဝါယမနှင့်ကျေးလက်ဖွံ့ဖြိုးရေးဝန်ကြီး ဌာနအောက်ရှိ ဦးစီးဌာန ၃ ခုတိုက သက်ဆိုင်ရာကဏ္ဍများအလိုက် အကောင်အထည်ဖော် ဆောင်ရွက်လျက်ရှိတယ်လို့ ဆိုပါတယ်။

ခေတ်မီစံပြကျေးရွာ စီမံကိန်းလုပ်ငန်းများကို နေပြည်တော်ကောင်စီနယ်မြေတွင် ကျေးရွာ ၃ ရွာရွေးချယ်၍ စတင်ဆောင်ရွက်ခဲ့ပြီး ရှမ်းပြည်နယ်တွင် ကျေးရွာ ၉ ရွာ ဆောင်ရွက်နေကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published_ 19 May 2022

ရန်ကုန်တိုင်းဒေသကြီး၊ ကမာရွတ်မြို့နယ်တွင် ငွေကျပ်သိန်း ၁၁၀၀ ကျော်တန်ဖိုးရှိ အက်တက်စီဆေးပြားများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန် ထားပါတယ်။

မေလ ၁၄ ရက် ညနေ ၃ နာရီခွဲခန့်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များပါ၀င်သော ပူးပေါင်းအဖွဲ့သည် သတင်းအရ သက်သေများနှင့်အတူ ကမာရွတ်မြို့နယ်၊ အမှတ် (၇) ရပ်ကွက်၊ နာနတ်တောလမ်းတွင် မင်းကိုကိုနှင့် ကျော်လင်းထက်တို့အား Mark II အမျိုးအစား မော်တော်ယာဉ်တစ်စီးနှင့် စိုင်းရဲထက်၊ ရဲမာန်အောင်၊ မင်းသန့်ထူးနှင့် ပိုင်သက်ကျော်တို့အား Mark II အမျိုးအစား မော်တော်ယာဉ် ၁ စီးတိုအား တွေ့ရှိပြီး စစ်ဆေးရှာဖွေခဲ့ပါတယ်။

ထိုသို့စစ်ဆေးရာ မင်းကိုကိုနှင့် ကျော်လင်းထက်တို့ မော်တော်ယာဉ်ပေါ်မှ အက်တက်စီဆေးပြား ၃၆၀၀ ပြား (ဒေသကာလပေါက်စျေးတန်ဖိုးငွေကျပ် သိန်း ၁၁၄၀) နှင့် လက်ကိုင်ဖုန်း ၂ လုံးတို့အား လည်းကောင်း၊ စိုင်းရဲထက်၊ ရဲမာန်အောင်၊ မင်းသန့်ထူးနှင့် ပိုင်သက်ကျော်တို့ထံမှ အမေရိကန်ဒေါ်လာငွေ ၁၀၄ ဒေါ်လာ၊ ထိုင်းဘက်ငွေ ၂၁၀ ဘတ်၊ မြန်မာငွေကျပ် ၁၅၂၅၀ နှင့် လက်ကိုင်ဖုန်း ၅ လုံး တို့အားလည်းကောင်း တွေ့ရှိသိမ်းဆည်းရမိခဲ့ပါတယ်။

စစ်ဆေးဖော်ထုတ်ချက်အရ အဆိုပါအက်တက်စီဆေးပြားများ သယ်ဆောင်ရာတွင် ပူးပေါင်းပါ၀င်သူ ဒေါ်မေသန်းစိုး (ခ)စိုးစိုးအား ၎င်းနေထိုင်သည့် စမ်းချောင်းမြို့နယ်၊ မုန့်လက်ဆောင်းကုန်း(မြောက်)ရပ်ကွက်၊ ရန်ကြီးအောင်လမ်းရှိ နေအိမ်တွင် လက်ကိုင်ဖုန်း ၁ လုံးနှင့်အတူ ည ၈ နာရီတွင် ထပ်မံဖမ်းဆီးရမိခဲ့ပါတယ်။

မင်းကိုကို(၃၄)နှစ်၊ ကျော်လင်းထက်(၂၇)နှစ်၊ စိုင်းရဲထက်(၂၄)နှစ်၊ ရဲမာန်အောင် (၂၃)နှစ်၊ မင်းသန့်ထူး(၂၄) နှစ်၊ ပိုင်သက်ကျော်(၂၄)နှစ် နှင့် ဒေါ်မေသန်းစိုး(၄၅)နှစ်တို့အား ဗဟန်းမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သတင်းရရှိပါတယ်။

ymg-mnn
#Yangon_Media_Group

#WorldHealth
Published 19 May 2022

ကိုရိုနာဗိုင်းရပ်စ်ဟာ ကမ္ဘာပေါ်ကပျောက်ကွယ်သွားဖို့လမ်းမမြင်ဘဲ မျိုးဗီဇကွဲတွေဟာ ခန္ဓာကိုယ်ခုခံအားစနစ်ကို ရှောင်ရှားနေပြီဖြစ်ပြီး တစ်နှစ်ကို ကူးစက်မှုလှိင်း ၂ ကြိမ် ၃ ကြိမ်လောက်အထိဖြစ်လာနေပြီမို့လို့ သိပ္ပံပညာရှင်တွေစိုးရိမ်နေရပြီဖြစ်ပါတယ်။

အဓိကပြဿနာက ကိုရိုနာဗိုင်းရပ်စ်ဟာ လူတစ်ယောက်ကိုထပ်ခါထပ်ခါကူးစက်တတ်နေပြီဖြစ်ပါတယ်။

မူလ အိုမီခရွန်ကူးစက်ဖူးသူတွေမှာ အိုမီခရွန်မှထပ်မံကွဲထွက်လာတဲ့ ဗိုင်းရပ်စ်များဖြင့် ထပ်မံကူးစက်ခံနေရကြောင်း အကြောင်းကြားလာကြပါတယ်။

အချို့လူတွေဆိုရင် တစ်နှစ်အတွင်း ၃ ကြိမ် ၄ ကြိမ်လောက်ကူးစက်ခံနေရကြောင်း သုတေသီများက ပြောပြခဲ့ပါတယ်။

အချို့လူအနည်းစုမှာ ကိုဗစ်နောက်ဆက်တွဲလက္ခဏာများကို လတွေနှစ်တွေကြာအောင်ခံစားနေရပါတယ်။

ဒီလိုအခြေအနေတွေက တာရှည်ပြဿနာတွေဖြစ်လာမှာစိုးရိမ်ရတယ်လို့ တောင်အာဖရိကနိုင်ငံ စတယ်လန်ဘော့တက္ကသိုလ်မှ ကူးစက်ရောဂါပညာရှင်'ဂျူးလိယက်ပူလီယမ်'က ပြောပြသွားပါတယ်။

"ဗိုင်းရပ်စ်က ဆက်လက်ပြီးဆင့်ကဲပြောင်းလဲနေပါတယ်၊ လူအများစုအနေနဲ့ ဘဝသက်တမ်းတလျှောက်ထပ်ခါထပ်ခါကူးစက်လာနိုင်ပါတယ်" လို့ ဆိုပါတယ်။

လူတစ်ယောက်အနေနဲ့ ဘယ်နှကြိမ်လောက်အထိကူးစက်နိုင်လဲဆိုတာက ပြောရခက်နေပြီး အကြောင်းကတော့ အခုဆိုရင် ရောဂါကူးစက်သူအများစုက သက်ဆိုင်ရာကိုအကြောင်းမကြားတော့တာကြောင့်ဖြစ်ပါတယ်။

တောင်အာဖရိကမှာကောက်ယူထားတဲ့ အချက်အလက်များအရ အိုမီခရွန်က အခြားမျိုးဗီဇကွဲတွေထက် ပိုပြီးကူးစက်နှုန်းမြင့်မားနေပါတယ်။

ကပ်ရောဂါအစပိုင်းတုန်းက ရောဂါကူးစက်ခြင်း ဒါမှမဟုတ် ကိုဗစ်ကာကွယ်ဆေးထိုးခြင်းတို့မှရရှိတဲ့ ရောဂါခုခံအားက ထပ်မံကူးစက်မှုတွေကိုကာကွယ်ပေးနိုင်မယ်လို့ မျှော်မှန်းခဲ့ကြပါတယ်။

အိုမီခရွန်လက်ထက်မှာ ဒီမျှော်လင့်ချက်တွေပျက်စီးခဲ့ရပြီး အိုမခရွန်နဲ့သူ့ရဲ့မျိုးနွယ်ခွဲဗိုင်းရပ်စ်တွေက လူတွေရဲ့ရောဂါခုခံအားကို ခံနိုင်ရည်ရှိလာကြပါတယ်။

ဒါကြောင့်ပဲ ကာကွယ်ဆေးအကြိမ်ကြိမ်ထိုးထားသူတွေတောင်မှ ရောဂါကိုအကြိမ်ကြိမ်ကူးစက်လာနိုင်တာဖြစ်ပါတယ်။

ဒါပေမဲ့ မည်သည့်မျိုးဗီဇကွဲကူးစက်သည်ဖြစ်စေ ကိုဗစ်ကာကွယ်ဆေးထိုးထားတဲ့အခါ ရောဂါပြင်းထန်မှုလျော့နည်းသွားကြပါတယ်။

တုပ်ကွေးရောဂါကိုကာကွယ်သလိုမျိုး ကိုဗစ်ရောဂါလှိင်းကျရောက်ခါနီးရာသီရောက်တဲ့အခါ ကာကွယ်ဆေးတွေကြိုတင်ထိုးနှံထားဖို့ ပညာရှင်အများအပြားကယူဆထားကြပါတယ်။

တောင်အာဖရိကနဲ့ အမေရိကန်နိုင်ငံတိုမှာ ကာကွယ်ဆေးထိုးပြီးသားလူတွေ ရောဂါကူးစက်ဖူးသူတွေများနေတဲ့အချိန်မှာပဲ နောက်ထပ်ကူးစက်မှုတွေဖြစ်လာကြတာဖြစ်ပါတယ်။

အိုမီခရွန်ကူးစက်မှုမှရရှိတဲ့ ပဋိပစ္စည်းခုခံအားတွေက အားနည်းပြီးတာရှည်မခံပေမယ့် အိုမီခရွန်ကူးစက်ခြင်းတွေကလည်း ရောဂါပြင်းထန်လေ့မရှိပါဘူး။

ဆင့်ကဲပြောင်းလဲလာတဲ့မျိုးဗီဇကွဲတွေကို ကာကွယ်နိုင်ဖို ကိုဗစ်ကာကွယ်ဆေးတွေကို လျင်လျင်မြန်မြန်နဲ့အဆင့်မြှင့်ထုတ်လုပ်ဖို့လိုအပ်လာပါတယ်။

ကိုရိုနာဗိုင်းရပ်မျိုးဗီဇကွဲအသစ်တစ်မျိုးကူးစက်တိုင်း ရောဂါခုခံအားရရှိလာမှာဖြစ်ကြောင်း ပညာရှင်များကအကြံပြုသွားပါတယ်။

Source: New York Times.
#Yangon_Media_Group

#WorldHistory
Published 18 May 2022

၂၀၁၃ ခုနှစ်မှာကွယ်လွန်ခဲ့တဲ့ ဗြိတိန်ဝန်ကြီးချုပ်ဟောင်း'မာဂရက်သက်ချာ'ရဲ့ရုပ်ထုအသစ်ကို မွေးရပ်မြေမှာ စိုက်ထူဆောက်လုပ်ခဲ့ပြီး မကြာခင်မှာပဲ ကြက်ဥဖြင့်ပစ်ပေါက်ခံခဲ့ရတာကြောင့် တနင်္လာနေ့က ခြံစည်းရိုးတပ်ဆင်ထားခဲ့ရပါတယ်။

#Yangon_Media_Group

Published 18 May 2022

မတ်လအတွင်း တရုတ်အရှေ့ပိုင်းလေကြောင်းပိုင်လေယာဉ်ပျက်ကျတာဟာ လေယာဉ်ပေါ်ပါတစ်ဦးဦးရဲ့ တမင်ရည်ရွယ်မှုတစ်ခုဖြစ်တယ်လို့ အမေရိကန်စုံစမ်းစစ်ဆေးသူတွေက ယုံကြည်ထားကြတဲ့အကြောင်း အင်္ဂါနေ့က ဝေါစထရိဂျာနယ်က သတင်းဖော်ပြလိုက်ပါတယ်။ ဒီပျက်ကျမှုဟာ ဆယ်စုနှစ်များစွာထဲမှာ တရုတ်နိုင်ငံရဲ့ အဆိုးရွးဆုံးလေယာဉ်ပျက်ကျမှုဖြစ်ပါတယ်။

တရုတ်အရှေ့ပိုင်းလေကြောင်း လေယာဉ်ခရီးစဉ်အမှတ် MU5375ဟာ ကူမင်းကနေကွမ်ကျိုးကို  မတ်၂၁ရက်နေ့က ပျံသန်းနေစဉ် အမြင့်ပေးနှစ်သောင်းကိုးထောင်ကနေ ထူးခြားစွာ ဇောက်ထိုးဆင်းပြီးပျက်ကျခဲ့တဲ့အတွက် လေယာဉ်ပါသူ ၁၃၂ဦးလုံး သေဆုံးခဲ့ကြရပါတယ်။

ပျက်ကျတဲ့နေရာက ရရှိတဲ့ ခရီးစဉ်အသံသွင်းမှတ်တမ်းသေတ္တာနက်ကို သုံးသပ်မှုပြုနိုင်ဖို့ အမေရိကန်ကိုပေးပို့ခဲ့ပါတယ်။  အဲဒီသေတ္တာနက်ကရရှိတဲ့ အချက်အလက်တွေအရ လေယာဉ်မှူး သို့မဟုတ် လေယာဉ်ခေါင်းပိုင်းထဲ  အတင်းခေါ်ဆောင်ခံရသူတစ်ဦးဦးက ဘိုအင်း၇၃၇-၈၀၀  လေယာဉ်ကို ခေါင်းစိုက်ဆင်းဖို့ အမိန့်ပေးခဲ့ပုံရတယ်လို့ ဖော်ပြနေပါတယ်လို့ အဲဒီစုံစမ်းမှုနှင့်ကျွမ်းဝင်သူတစ်ဦးကို ကိုးကားပြီး ဝေါစထရိက ရေးသားပါတယ်။

“ လေယာဉ်မောင်းခန်းထဲက တစ်ဦးဦးက လုပ်ခိုင်းတဲ့အတိုင်း လေယာဉ်ပျံသန်းခဲ့ရတာဖြစ်တယ်” လို့ ပဏာမစုံစမ်းမှုတွေနှင့် ရင်းနှီးကျွမ်းဝင်သူတစ်ဦးက ဝေါစထရိဂျာနယ်ကိုပြောပါတယ်။

တရုတ်စုံစမ်းစစ်ဆေးသူတွေကလည်း ပျက်ကျရလောက်အောင် လေယာဉ်နှင့် ပျံသန်းထိန်းကျောင်းမှုတွေမှာ ဘာပြဿနာမှမတွေ့ခဲ့ဘူးလို့ပြောထားပါတယ်။အဲဒီအချက်ကို အမေရိကန်အရာရှိတွေကလည်း ထောက်ခံထားပါတယ်။

အမေရိကန်အမျိုးသားသယ်ယူပို့ဆောင်မှုအန္တရာယ်ကင်းရှင်းရေးဘုတ်အဖွဲ့နှင့် ဘိုအင်းကုမ္ပဏီတို့က ဒီစစ်ဆေးတွေ့ရှိမှုတွေနှင့်ပတ်သက်လို့ မှတ်ချက်ပေးဖို့ငြင်းဆန်ပါတယ်။

စုံစမ်းစစ်ဆေးသူတွေဟာ ပုံမှန်မဟုတ်တာတစ်ခုခုကို အထောက်အထားမတွေ့ခဲ့ရဘူးလို့  ဘိုအင်းရဲ့ အစီရင်ခံစာတစ်ခုက ပြောတယ်လို့ တရုတ်လေကြောင်းအာဏာပိုင်အဖွဲ့က ဧပြီလတုန်းကပြောပါတယ်။

ဝန်ထမ်းတွေဟာ မပျံသန်းခင် လိုအပ်တဲ့ ဘေးအန္တရာယ်ကင်းရှင်းရေးအစီအမံတွေ အားလုံးလုပ်ခဲ့တယ်။ လေယာဉ်ပေါ်မှာလည်း အန္တရာယ်ရှိတဲ့ ပစ္စည်းတွေသယ်ယူသွားတာမရှိဘူး၊ပြီးတော့ ရာသီဥတု ဆိုးရွားတာမျိုလည်း မရှိဘူးလို့ အဲဒီအဖွဲ့ကပြောပြီး အသေးစိတ်သိရဖို့ နှစ်များစွာကြာနိုင်တယ်လို့ဆိုထားပါတယ်။

Source AFP