#Local_News
Published 5 March 2025

▪️ ယခုရက်ပိုင်းအတွင်း မြေငလျင်ငယ် များ ရက်ခြားနှင့် နောက်ဆက်တွဲ အကြိမ်ရေ များပါ လှုပ်ခတ်ခဲ့ပြီးနောက်မိုးလေဝသနှင့်ဇလဗေဒညွှန်ကြားမှုဦးစီးဌာနက  မြေငလျင် သတိပေးချက်များကို ထုတ်ပြန်လာကြောင်း သိရသည်။

▪️ ပြီးခဲ့သည့် မတ်လ၃ရက်နေ့က တိုက်ကြီးမြို့နယ်အနီး၌ မြေငလျင်ငယ် တစ်ကြိမ်၊ ယနေ့မတ်လ၅ရက်နေ့၌ ညောင်တုန်းမြို့နယ်အနီး၌ မြေငလျင်ငယ်တစ်ကြိမ်နှင့် နောက်ဆက်တွဲငလျင်သုံးကြိမ်အထိ လှုပ်ခတ်ခဲ့ခြင်းဖြစ်သည်။

▪️ အဆိုပါ ကဲ့သို့လှုပ်ခတ်ခဲ့ပြီးနောက် ငလျင်မလှုပ်မီ၊ ငလျင်လှုပ်စဉ်နှင့် ငလျင်လှုပ်ပြီးချိန်များတွင် သတိပြုလိုက်နာရမည့်အချက်များအား ထုတ်ပြန်ပေးခဲ့ပြီး ယင်းထုတ်ပြန်ချက်၌  ငလျင်လှုပ်ရှားနိုင်သည့် ဒေသ (သို့ မဟုတ်) ငလျင်ပြတ်ရွေ့တည်ရှိရာဒေသများတွင် နေထိုင်ကြသူများအနေဖြင့် ငလျင်သတိ အမြဲရှိနေကြရန်နှင့် ငလျင်လှုပ်ရှားမှုကြောင့် ထိခိုက်ဆုံးရှုံးမှုများ မရှိရစေရန် ကြိုတင်ပြင်ဆင်ထားမှုများ ပြုလုပ်ထားကြရမည်ဖြစ်ပါ၍ ငလျင်မလှုပ်မီ၊ ငလျင်လှုပ်စဉ်နှင့် ငလျင်လှုပ်ပြီးချိန်များတွင် ပြုလုပ်ကြရမည်များကို သိရှိထားရန် လိုအပ်ကြောင်း ဖော်ပြထားသည်။

▪️ ထို့အပြင် ငလျင်မလှုပ်မီဆောင်ရွက်ရန် အချက်များမှာ 
(၁) အခန်းတိုင်းတွင် လုံခြုံသောနေရာကိုသိထားရမည်၊

(၂) လုံခြုံသောနေရာသို့ ဝင်ရန်၊ အကာအကွယ်ယူရန်၊ ဆွဲကိုင်ထားရန်တို့အား   လေ့ကျင့်ထားရမည်၊

(၃) အန္တရာယ်ရှိသော နေရာများကို သိထားရမည်၊

(၄) အိမ်ပြင်တွင်ရှိလျှင် လုံခြုံစိတ်ချရသောနေရာများကို သိထားရမည်၊

(၅) ထွက်ပြေးရန် လမ်းကြောင်းများ၊ အရံထွက်လမ်းများကို လေ့လာမှတ်ထားရမည်၊

(၆) ရေ၊ ဓာတ်ငွေ့နှင့် လျှပ်စစ်မီးတို့ကို အရေးပေါ် ဖြတ်တောက်နိုင်မည့်နေရာများကို သိထားရမည်ဖြစ်ကြောင်း သိရသည်။

▪️ ငလျင်လှုပ်ရှားစဉ် လုပ်ဆောင်ရန်အချက်များမှာ

(၁) မြေကြီး(သို့မဟုတ်) အဆောက်အဦတုန်ခါခြင်းကြောင့် ပြိုကျလာသည့် အကျိုးအပဲ့များ ထိခိုက်မည့်အန္တရာယ်မှ  လွတ်ကင်းအောင်  စာရေးခုံ၊  စားပွဲအောက်တွင်  ချက်ချင်းအမြန်ဆုံးဝင်၍ ပုန်းလျှိုးနေလိုက်ပါ၊

(၂) ပြိုကျနေသည့်အကျိုးအပဲ့များ၊ မြင့်မားသည့်ပရိဘောဂများ၊ ကြမ်းပြင်ပေါ်တွင် လျောကျနိုင်သော (သို့မဟုတ်) မှောက်လဲနိုင်သော လေးလံသည့် အရာဝတ္တုများကို သတိထားပါ၊

(၃) အပြင်ထွက်သော တံခါးပေါက်၊ ပြူတင်းပေါက်များမှ ဝေးဝေးနေပါ၊

(၄) ငလျင်လှုပ်စဉ် အိမ်အပြင်သို့ ထွက်မပြေးပါနှင့်၊

(၅) မိမိသည် တိုက်အမြင့်ကြီး၌ နေထိုင်ပါက လှေကားများ(သို့မဟုတ်) ဓာတ်လှေကားများတွင် တိုးဝှေ့ခြင်း မပြုပါနှင့်၊

(၆) မိမိသည် လမ်းပေါ်သို့ရောက်နေပါက အဆောက်အဦများ၊ လျှပ်စစ်ကြိုးများနှင့် ဝေးကွာသော ကွင်းပြင်သို့ ရောက်ရှိရန် ကြိုးပမ်းရမည်၊

(၇) မိမိသည် ကားအတွင်းတွင်ရှိနေလျှင် ကားကို စက်သတ်ရပ်ထား၍ ကားအတွင်း၌ပင် ဆက်နေပြီး တံတားများ၊ အဆောက်အဦးများနှင့် ဝေးဝေးနေရမည်၊

(၈) ပင်လယ်ကမ်းခြေ၊ နိမ့်သော မြစ်ကမ်းပါးတို့မှ ဝေးနိုင်သမျှ ဝေးဝေးနေပါ။ ဆူနာမီရေလှိုင်းကြီးများ ဝင်ရောက်လာနိုင်ကြောင်း သိရသည်။

▪️ ယင်းအပြင် ငလျင်လှုပ်ပြီးလျှင် လုပ်ဆောင်ရန်အချက်များ

(၁) မိမိကိုယ်ကို အနာတရ ဖြစ် မဖြစ် စစ်ဆေးပါ၊

(၂) နောက်ဆက်တွဲဖြစ်နိုင်သည့် အန္တရာယ်တို့ကို ကာကွယ်ပါ၊

(၃) ရှေးဦးသူနာပြုစုနည်းများဖြင့် ပြုစုပါ၊

(၄) အဆောက်အဦတွင် ထိခိုက်မှု မမာဏကို စစ်ဆေးပါ၊

(၅) မီးဘေးအန္တရာယ်ကို တွက်ဆပါ၊

(၆) မီးခြစ် မသုံးပါနှင့်၊ မီးခလုတ်များကို ပိတ်ထားပြီး ဓာတ်မီးနှင့် ဘတ္ထရီမီးတို့ကို သုံးပါ၊

(၇) ဓာတ်ငွေ့နံ့၊ ဓာတ်ဆီနံ့စသည့် လောင်စာနံ့ရပါက အမြန်ဆုံး ထွက်ခွာပါ၊

(၈) နောက်ဆက်တွဲငလျင်များ လှုပ်နိုင်သည်ကို သတိပြု ပြင်ဆင်ရမည်ဖြစ်ကြောင်း သိရသည်။

ငလျင်လှုပ်ပြီးနောက် နောက်ဆက်တွဲ ဘေးအန္တရာယ်များမှာ

(၁) နောက်ဆက်တွဲငလျင်များ၊

(၂) မြို့ပြမီးဘေးအန္တရာယ်၊

(၃) ရေကာတာကြီးများ ကျိုးပျက်၍ ရေကြီးခြင်း၊

(၄) တောင်ပြိုခြင်း၊ မြေပြိုခြင်း၊

(၅) ရွံ့မီးတောင်များ ပေါက်ကွဲပန်းထွက်ခြင်း၊

(၆) ဆူနာမီရေလှိုင်း ဖြစ်ပေါ်ရိုက်ခတ်ခြင်း၊

(၇) ကောလဟာလ သတင်းလွှင့်ခြင်း စသည့်အချက်များကို ငလျင်မလှုပ်မီ၊ ငလျင်လှုပ်စဉ်နှင့် ငလျင်လှုပ်ပြီးချိန်များတွင် သတိပြုလိုက်နာဆောင်ရွက်သင့်ကြောင်း ထုတ်ပြန်ထားသည်။

#YMG/NN #Yangon_Times

#Local_News
Published 5 March 2025

▪️ ဧရာဝတီတိုင်းဒေသကြီး၊ ညောင်တုန်းမြို့အနီးမှာ ယနေ့ မတ်လ ၅ ရက် ယနေ့ မြန်မာစံတော်ချိန် နံနက် ၄ နာရီ၊ ၃၆ မိနစ်၊ (၄၇) စက္ကန့်အချိန်တွင် အင်အားရစ်(ခ်)တာစကေး (၅.၁) အဆင့်ရှိ မြေငလျင်တစ်ခု လှုပ်ရှားသွားခဲ့ပြီးနောက် ငလျင်သုံးကြိမ်ထပ်မံလှုပ်ခတ်ခဲ့ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနမှ သိရသည်။

▪️ အဆိုပါမြေငလျင်သည်  ကမ္ဘာအေးမြေငလျင်စခန်းမှအနောက်-အနောက်မြောက်ဘက် (၃၃) မိုင်ခန့်ကွာဝေးသည့် မြန်မာနိုင်ငံပြည်တွင်း (ညောင်တုန်းမြို့၏ အရှေ့တောင်ဘက် (၆) မိုင်ခန့်အကွာ) မြောက်လတ္တီတွဒ် (၁၆.၉၆) ဒီဂရီ၊ အရှေ့လောင်ဂျီတွဒ် (၉၅.၆၆) ဒီဂရီ၊ အနက် (၁၀) ကီလိုမီတာကို ဗဟိုပြုပြီး လှုပ်ရှားသွားခဲ့ခြင်းဖြစ်ပြီး ယင်းမြေငလျင်လှုပ်ရှားမှုအပြီးတွင်  နောက်ဆက်တွဲမြေငလျင်များအဖြစ် ယနေ့ မနက် ၄ နာရီ ၅၄ မိနစ်အချိန်က အင်အားရစ်(ခ်)တာစကေး (၄.၈) အဆင့်ရှိသောမြေငလျင်တစ်ခုညောင်တုန်းမြို့၏  အရှေ့တောင်ဘက် ၁၀ မိုင်ခန့်အကွာတွင် ထပ်မံလှုပ်ရှားခဲ့ပြီး  မနက် ၅ နာရီ ၂၀ မိနစ်အချိန်က အင်အားရစ်(ခ်)တာစကေး (၃.၅) အဆင့်ရှိသည့် မြေငလျင်တစ်ခု ညောင်တုန်းမြို့၏  အနောက်တောင်ဘက် ၂၃ မိုင်ခန့်အကွာတွင် လှုပ်ရှားခဲ့ကြောင်း သိရသည်။

▪️ ထို့အပြင် မနက် ၅ နာရီ ၂၃ မိနစ်အချိန်က အင်အားရစ်(ခ်)တာစကေး (၃.၁) အဆင့်ရှိသည့်  မြေငလျင်တစ်ခုညောင်တုန်းမြို့၏ အရှေ့ဘက် ၂၅ မိုင်ခန့်အကွာတွင် ထပ်မံလှုပ်ရှားခဲ့ကြောင်း သိရသည်။

#YMG/NN #Yangon_Times

#World_Health
Published 05 March 2025

▪️ ကိုဗစ်ကပ်ရောဂါကာလအတွင်း ကိုဗစ်ကာကွယ်ဆေးတွေကြောင့် လူသန်းနဲ့ချီ အသက်သေဆုံးခြင်းမှ ကာကွယ်နိုင်ခဲ့ပါတယ်။

▪️ ဒါပေမဲ့ ကာကွယ်ဆေးထိုးပြီးနောက် ဘေးထွက်ဆိုးကျိုးများ ဖြစ်ကြတဲ့အကြောင်းတွေ ကြားနေရပြီး ယေးလ်တက္ကသိုလ်မှ သုတေသီများက ကာကွယ်ဆေးနောက်ဆက်တွဲ လက္ခဏများ(PVS)အကြောင်း ထဲထဲဝင်ဝင် လေ့လာခဲ့ကြပါတယ်။

▪️ PVS ဖြစ်တဲ့လူတွေရဲ့ ကိုယ်ခံအားဖြစ်စဉ်ပုံစံနဲ့ အခြားသူတွေရဲ့ ပုံစံကွဲပြားပုံတွေကို လေ့လာနေကြပြီး အစောပိုင်းအဆင့်သာရှိသေးကာ တွေ့ရှိချက်တွေကို အတည်ပြုဖို့ လိုသေးတယ်လို့ ယေးလ်ဆေးတက္ကသိုလ်မှ ကိုယ်ခံအားဗေဒ ပရော်ဖက်ဆာ အာကီကိုအီဝါဆာကီက ပြောသွားပါတယ်။

▪️ PVS ရဲ့ နာတာရှည် လက္ခဏာများအနေဖြင့် လေ့ကျင့်ခန်း မလုပ်နိုင်ခြင်း၊ အလွန်အမင်း နွမ်းနယ်ခြင်း၊ ဦးနှောက်ထိုင်းမှိုင်းခြင်း၊ အိပ်မပျော်ခြင်း၊ မူးဝေခြင်းတို့ ဖြစ်နိုင်ပါတယ်။

▪️ ဒီလက္ခဏာတွေ ကာကွယ်ဆေးထိုးပြီးနောက် ရက်ပိုင်းအတွင်းမှာတင် ဖြစ်ပေါ်နိုင်ပြီး နောက်ပိုင်းမှာ ပိုမိုဆိုးရွားလာတတ်ပါတယ်။

▪️ ကိုဗစ်နောက်ဆက်တွဲ လက္ခဏာများနဲ့ ကာကွယ်ဆေးနောက်ဆက်တွဲ လက္ခဏာများအကြောင်း နားလည်သိရှိဖို့ သုတေသီများက သွေးနမူနာများ ဆန်းစစ်ခဲ့ကြပါတယ်။

▪️ လက္ခဏာမပေါ်တဲ့ လူတွေနဲ့ နှိုင်းယှဉ်ကြည့်ရာမှာ ကိုယ်ခံအားဆဲလ်တွေနဲ့ ပတ်သက်ပြီး ကွဲပြားချက်တွေ တွေ့ရှိခဲ့ကြပါတယ်။

▪️ PVS ဖြစ်တဲ့လူတွေထဲမှာ SARS-CoV-2 စပိုက်ခ်ပရိုတိန်း မြင့်မားနေတာတွေ့ခဲ့ကြပြီး ဒါကနေပဲ ကိုဗစ်နောက်ဆက်တွဲလက္ခဏာ ဖြစ်ပေါ်စေတာ ဖြစ်ပါတယ်။

▪️ PVS အကြောင်း ပိုမိုနားလည်မယ်ဆိုရင် ဘေးထွက်ဆိုးကျိုး နည်းပါးပြီး ပိုမိုထိရောက်တဲ့ ကာကွယ်ဆေးတွေ ထုတ်လုပ်လာနိုင်မယ်လို့ သုတေသီများ ဆိုပါတယ်။

▪️ ရောဂါထိန်းချုပ်ကာကွယ်ရေးစင်တာ (CDC)ရဲ့ ဖော်ပြချက်အရ ကာကွယ်ဆေးတွေဟာလည်း အခြားဆေးတွေလိုပဲ ဘေးထွက်ဆိုးကျိုးများ ရှိနိုင်ပါတယ်။

▪️ ကိုဗစ်ကာကွယ်ဆေး ထိုးပြီးလို့ ပြင်းထန်တဲ့တုံ့ပြန်မှုဖြစ်တာကတော့ အလွန်ရှားပါးပါတယ်။

#Source: Times of India

ထိုင်းနိုင်ငံက အွန်လိုင်းလိမ်လည် ကျားဖြန့်လုပ်ငန်းများ တိုက်ဖျက်ရေးကို ဆန့်ကျင်နှိမ်နင်းဖို့ ကြိုးစားနေရာမှာ ထိုင်းဝန်ကြီးချုပ် ပေထုန်တန်ရှင်နာဝပ်ထရာက ကမ္ဘောဒီးယားနဲ့ ထိစပ်နေတဲ့ နယ်စပ်ရှိ ဆာကဲယိုပြည်နယ်ကို ကြည့်ရှုစစ်ဆေးခဲ့ပြီး ကြပ်မတ်စောင့်ကြည့်ရေးစနစ်များ တိုးမြှင့်ဆောင်ရွက်ဖို့ အေဂျင်စီဌာနအသီးသီးကို ညွှန်ကြားခဲ့ပါတယ်။
#Asia_News
Published 4 March 2025
#အွန်လိုင်းလိမ်လည်လုပ်ငန်း #တိုက်ဖျက်နေမှုများစစ်ဆေး
#YMG #Yangon_Times #Yangon_Media_Group

#Daily_News

Published 4 March 2025

၁။ ဗဟိုဘဏ်ကစက်သုံးဆီလုပ်ငန်းရှင်များကို ဒေါ်လာ၂၃ သန်းနှင့် ဘတ်သန်း ၁၅၀ ထပ်မံရောင်းပေးမည်

၂။ E-စီးကရက် နှင့် Vape များအား ဥပဒေအရ ထိန်းချုပ်ရန်ဆောင်ရွက်နေ

၃။ မော်လမြိုင် အမြန်ရထားကြိုတင်လက်မှတ်များ ပိတ်ရက်မရှိ ရောင်းချပေးနေ

၄။ ထိုင်းဝန်ကြီးချုပ် နယ်စပ်ဒေသသို့သွားရောက်ကာ အွန်လိုင်းလိမ်လည်လုပ်ငန်းတိုက်ဖျက်နေမှုများအားစစ်ဆေး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

၄ မတ် ၂၀၂၅

မြန်မာနိုင်ငံဟာ အာရှပစိဖိတ်ဒေသမှာ ရုရှားရဲ့ အရေးကြီးတဲ့ မိတ်ဖက်နိုင်ငံဖြစ်တယ်လို့ ရုရှား ဝန်ကြီးချုပ် မစ်ရှုစတင်က မြန်မာအစိုးရ ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်ကိုပြောပါတယ်။

ရုရှားနိုင်ငံသို့ချစ်ကြည်ရေးခရီးရောက်ရှိနေတဲ့ ဗိုလ်ချုပ်မှူးကြီးမင်းအောင်လှိုင်ဟာ ရုရှားဝန်ကြီးချုပ် မစ်ရှုစတင်နှင့် ဒီကနေ့ မတ်လ ၄ရက်နေ့မှာ မော်စကို၌ တွေ့ဆုံခဲ့စဉ် ရုရှားဝန်ကြီးချုပ်ကပြောကြားခဲ့တာ ဖြစ်တယ်လို့ ရုရှားTASS သတင်းဌာနက သတင်းဖော်ပြပါတယ်။

“ ရုရှားနှင့်မြန်မာ နှစ်နိုင်ငံစလုံးကို တရားမဝင်အရေးယူပိတ်ဆို့မှုတွေပြုလုပ်ခဲ့ကြပေမယ့် ကျွန်တော်တို့ရဲ့ ကုန်သွယ်ရေးနှင့် စီးပွာရေးပူးပေါင်းဆောင်ရွက်မှုတွေဟာ အောင်မြင်စွာတိုးတက်လာနေပါတယ်။ နှစ်နိုင်ငံအကြား အပြန်အလှန်ကုန်သွယ်မှုဟာ တိုးတက်လာနေတယ်။  ကျွန်တော်တို့ဟာ စွမ်းအင်၊ ငြိမ်းချမ်းသော နျူကလီးယားစွမ်းအင်၊ သယ်ယူပို့ဆောင်ရေးအခြေခံအဆောက်အအုံနှင့် စိုက်ပျိုးရေးလုပ်ငန်းတွေမှာ ပူးပေါင်းဆောင်ရွက်မှု တိုးမြှင့်နိုင်မယ့် အခွင့်အလမ်းကောင်းတွေ ရှိနေပါ      တယ်” လို့ ရုရှားဝန်ကြီးချုပ်ကပြောပါတယ်။

နှစ်နိုင်ငံဟာ တယ်လီဆက်သွယ်ရေးနှင့်သတင်းအချက်အလက်နည်းပညာ၊စားသောက်ကုန်လုပ်ငန်းနှင့် သတ္တုတူးဖော်ထုတ်လုပ်ရေးတွေမှာ ပူးတွဲစီမံကိန်းအသစ်တွေ အတွက် လုပ်ဆောင်နေကြတယ်လို့ သူက ဆက်ပြောပါတယ်။
“ ဒီနှစ်မှာ ကျွန်တော်တို့ဟာ ရုရှားနှင့်မြန်မာ ချစ်ကြည်ရင်းနှီးသောဆက်ဆံရေးတည်ဆောက်မှု ပူးတွဲ ကြေညာစာတမ်းလက်မှတ်ရေးထိုးတဲ့ ၂၅ နှစ်မြောက် နှစ်ပတ်လည်ဖြစ်ပါတယ်။အဆွေတော်ရဲ့ခရီးစဉ် ဟာ နယ်ပယ်အားလုံးမှာ နှစ်နိုင်ငံအကြားပူးပေါင်းဆောင်ရွက်မှုဖွံ့ဖြိုးတိုးတက်စေဖို့ တွန်းအားအသစ် တစ်ခု ပေးစွမ်းလိမ့်မယ်လို့ ကျွန်တော်ယုံကြည်ပါတယ်။ သမ္မတပူတင်နှင့်အဆွေတော်တို့တွေ့ဆုံဆွေးနွေး ပြီးတဲ့အခါရရှိမယ့် ရလဒ်တွေကို ကျွန်တော်တို့အစိုးရက တိတိကျကျ အသေအချာအကောင်အထည် ဖော်ပေးပါမယ်” လို့လည်း ရုရှားဝန်ကြီးချုပ်ကပြောတယ်လို့ရုရှားမီဒီယာကသတင်းရေးသားပါတယ်။

#World_News
Published 04 March 2025

▪️ ပြီးခဲ့တဲ့သီတင်းပတ် အမေရိကန်သမ္မတ ဒေါ်နယ်ထရမ့်နဲ့ ယူကရိန်းသမ္မတ ဗိုလိုဒီမာဇယ်လန်စကီတို့ အချေအတင်ဖြစ်ခဲ့ပြီးနောက်မှာ ယူကရိန်းကို စစ်ရေးအကူအညီ ထောက်ပံ့ခြင်း အမေရိကန် ရပ်ဆိုင်းလိုက်ပြီလို့ အိမ်ဖြူတော်အရာရှိတစ်ဦးက ပြောသွားပါတယ်။

▪️ ဒီအတွက် အရင်က မိတ်ဖက်များဖြစ်ခဲ့ကြတဲ့ နှစ်နိုင်ငံကြား ဆက်ဆံရေးအက်ကွဲကြောင်း ပိုမိုနက်ရှိုင်းလာတဲ့သဘော မြင်တွေ့လာရပါတယ်။

▪️ "သမ္မတထရမ့်က ငြိမ်းချမ်းရေးရဖို့ရာ အာရုံစိုက်လုပ်ဆောင်နေတာ အရှင်းသားတွေ့နေရပါတယ်။ မိတ်ဖက်များအနေနဲ့လည်း ဒီရည်မှန်းချက်အတိုင်း စိတ်ပိုင်းဖြတ်လုပ်ဆောင်ပေးဖို့ လိုပါတယ်။ ဖြေရှင်းဆုံးဖြတ်ချက်တစ်ခု သေချာပေါက်ရရှိဖို့အတွက် အထောက်အပံ့များကို ရပ်ဆိုင်းထားပြီး ပြန်လည်သုံးသပ်နေပါတယ်" လို့ အမည်မဖော်လိုသူ အရာရှိက တနင်္လာနေ့မှာ ပြောပြပါတယ်။

▪️ အထောက်အပံ့တွေ ဘယ်လောက်အတိုင်းအတာအထိ ရပ်ဆိုင်းမလဲ၊ ဘယ်လောက်ကြာမလဲဆိုတာတော့ မပြောထားပါဘူး။

▪️ ယူကရိန်းသမ္မတရုံးနဲ့ ဝါရှင်တန်ရှိ ယူကရိန်းသံရုံးတို့က ဒါနဲ့ပတ်သက်ပြီး ပြန်လည်ပြောကြားခြင်း မရှိသေးပါဘူး။

▪️ ထရမ့်သမ္မတတာဝန် ယူချိန်ကစပြီး ယူကရိန်းနဲ့ ရုရှားအပေါ်ထားတဲ့ အမေရိကန်မူဝါဒ ဆန့်ကျင်ဘက်ဖြစ်သွားကာ ရုရှားအတွက် ပြေရာပြေကြောင်းပုံစံ ကျင့်သုံးလာတဲ့ အနေအထားမှာ အခုလို အကူအညီ ရပ်ဆိုင်းလိုက်တာ ဖြစ်ပါတယ်။

▪️ ဇယ်လန်စကီဟာ ရုရှားနဲ့စစ်ပွဲအတွက် အမေရိကန်မှ ထောက်ပံ့ကူညီခဲ့တဲ့အပေါ်ကျေးဇူးမသိဘူးလို့ ထရမ့်က ဝေဖန်ခဲ့ပါသေးတယ်။

▪️ စစ်ပွဲအဆုံးသတ်ရေးက အလှမ်းဝေးလွန်းနေတယ်လို့ ဇယ်လန်စကီပြောကြားခဲ့တာနဲ့ ပတ်သက်ပြီး အမေရိကားက ဒီထက်ပိုပြီး သည်းခံမှာမဟုတ်ဘူးလို့ ထရမ့်က Truth Socialမှာ ဖော်ပြထားပါတယ်။

▪️ ယူကရိန်းနဲ့ ပတ်သက်လို့ စိတ်ပျက်နေပေမယ့် ယူကရိန်း တွင်းထွက်သတ္တုပစ္စည်းများ ရင်းနှီးမြှုပ်နှံရေးကတော့ သဘောတူညီမှု ရနိုင်သေးတယ်လို့ ဆိုပါတယ်။

▪️ ရုရှားတို့ ယူကရိန်းကို လွန်ခဲ့တဲ့ ၃ နှစ်က ကျူးကျော်ပြီးနောက်ပိုင်း အမေရိကန်မှ ယူကရိန်းကို ဘဏ္ဍာရေးနဲ့ စစ်ရေးအကူအညီ ပေးခဲ့သမျှအတွက် သတ္တုပစ္စည်းကိစ္စကနေ ဒေါ်လာဘီလီယံချီပြန်ရယူမယ့် နည်းလမ်းအဖြစ် အမေရိကန်အစိုးရက ရှုမြင်ထားပါတယ်။

▪️ စစ်ပွဲကာလအတွင်း အမေရိကန်လွှတ်တော်က ယူကရိန်းထောက်ပံ့ရေးအတွက် စုစုပေါင်း ဒေါ်လာ ၁၇၅ ဘီလီယံ ခွင့်ပြုပေးကမ်းထားပါတယ်။

#Source: Reuters

စားသုံးသူရေးရာဦးစီးဌာနကထုတ်ပြန်တဲ့ မတ်လအတွက်ဆန်ရည်ညွှန်းဈေး‌တွေကျဆင်းလာပြီးနောက်မှာတော့ အရောင်းစင်တာ‌တွေမှာ ရောင်းချတဲ့ ဆန်ဈေး‌တွေလည်း ကျဆင်းလာပါတယ်။ ၅၀၀၀ ကျပ်အထိ ကျဆင်းလာတယ်လို့ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာနက သိရပါတယ်။
#Local_News
Published 4 March 2025
#ဆန်ရည်ညွှန်းဈေးများကျဆင်း #စားသုံးသူရေးရာဦးစီးဌာန
#YMG/SW #Yangon_Times

ခရီးသွားပြည်သူတွေအဆင်ပြေစေဖို့ မော်လမြိုင် - ရန်ကုန် (၈၂)အစုန်အမြန်ရထားခရီးစဉ်တွေအတွက် ကြိုတင်လက်မှတ်တွေကိုပိတ်ရက်မရှိ ရောင်းချပေးနေတယ်လို့ မော်လမြိုင်ဘူတာကြီးက  သိရပါတယ်။
#Local_News
Published 4 March 2025
#မော်လမြိုင်အမြန်ရထား #ပိတ်ရက်မရှိရောင်းချပေး
#YMG/NN #Yangon_Times

E-စီးကရက် ၊Vape တွေကို ဥပဒေအရ ထိန်းချုပ်နိုင်ဖို့ဆောင်ရွက်နေတယ်လို့ ယမန်နေ့က ကျန်းမာရေးဝန်ကြီးဌာနမှာပြုလုပ်တဲ့ ဆေးလိပ်နှင့် ဆေးရွက်ကြီးထွက်ပစ္စည်း သောက်သုံးမှုထိန်းချုပ်ရေးဗဟိုအဖွဲ့ အစည်းအဝေးအရ သိရပါတယ်။
#Local_News
Published 4 March 2025
#E-စီးကရက် #Vape
#YMG/NN #Yangon_Times

မြန်မာနိုင်ငံတော်ဗဟိုဘဏ်က စက်သုံးဆီလုပ်ငန်းရှင်‌တွေအတွက် အမေရိကန် ဒေါ်လာ၂၃သန်းနဲ့ ထိုင်းဘတ်သန်း၁၅၀ကို နိုင်ငံခြားငွေကြေး‌စျေးကွက်က တဆင့်ရောင်းချပေးသွားမယ်လို့ ယမန်နေ့ထုတ်ပြန်ထားပါတယ်။
#Local_News
Published 4 March 2025
#စက်သုံးဆီလုပ်ငန်းရှင် #မြန်မာနိုင်ငံတော်ဗဟိုဘဏ်
#YMG/SW #Yangon_Times

#Local_News
Published 4 March 2025

▪️ မြန်မာနိုင်ငံတွင် ရှေးခေတ်များစွာကတည်းက ပုဂံရှေးဟောင်းယဉ်ကျေးမှုဒေသရှိ အပယ်ရတနာဘုရားနှင့် စူဠာမဏိစေတီတို့ရှိ နံရံဆေးပန်းချီများတွင်သနပ်ခါးလိမ်းခြယ်သုံးစွဲမှု တည်ရှိခဲ့ကြောင်းကို လေ့လာတွေ့ရှိရကြောင်း ရှေးဟောင်းသုတေသနနှင့်အမျိုးသားပြတိုက်ဦးစီးဌာန (ပုဂံဌာနခွဲ) ပြုပြင်ထိန်းသိမ်းရေးဌာနစုမှ သိရသည်။

▪️ အဆိုပါ နံရံဆေးပန်းချီများသည် သမိုင်းအထောက်အထားများအဖြစ် ခိုင်မာစွာ တည်ရှိပြသလျက်ရှိပြီး ရှေးဟောင်းယဉ်ကျေးမှုအတွက် တန်ဖိုးဖြတ်၍ မရသည့်  သမိုင်းအမွေအနှစ်ပုံများဖြစ်ကြောင်း သိရသည်။

▪️ ရှေးဟောင်းသုတေသနနှင့်အမျိုးသားပြတိုက်ဦးစီးဌာနသည် ပုဂံဒေသရှိ ရှေးဟောင်းယဉ်ကျေးမှုအမွေအနှစ်များကို ထိန်းသိမ်းပြုပြင်စောင့်ရှောက်လျက်ရှိပြီး အပယ်ရတနာဘုရားရှိ သနပ်ခါးလိမ်းခြယ်မှုဟန် ပါဝင်သည့် နံရံဆေးပန်းချီများကို မှတ်တမ်းပြုစုထားရှိပြီးဖြစ်သည်။

▪️ ထို့အတူ ၁၉၉၁ - ၁၉၉၂ ခုနှစ်တွင် ရှေးဟောင်းသုတေသနနှင့် အမျိုးသားပြတိုက်ဦးစီးဌာနနှင့် ကုလသမဂ္ဂဖွံ့ဖြိုးမှုအစီအစဉ်တို့ ပူးပေါင်းပြီး ပြုပြင်ထိန်းသိမ်းရေးစီမံကိန်းလုပ်ငန်း ဆောင်ရွက်ခဲ့ရာ စူဠာမဏိစေတီအတွင်းရှိ နံရံဆေးပန်းချီကားများအား သန့်စင်ချေးချွတ်ရာမှ သနပ်ခါးလိမ်းခြယ်နေသောပုံများကို တွေ့ရှိမှတ်တမ်းပြုစုနိုင်ခဲ့ခြင်းဖြစ်ကြောင်း သိရသည်။

#YMG/NN #Yangon_Times