၂၃ ဇန်နဝါရီ ၂၀၂၄

မြန်မာ့တပ်မတော် သယ်ယူပို့ဆောင်ရေးလေယာဉ်တစ်စီး ယနေ့ ဇန်နဝါရီ ၂၃ ရက်မနက်ပိုင်းက အိန္ဒိယနိုင်ငံ မီဇိုရမ်ပြည်နယ် လန်ပူရီလေဆိပ်တွင် ပြေးလမ်းချော်ခဲ့တယ်လို့ နစကရဲ့သတင်းထုတ်ပြန်ရေးအဖွဲ့ကအတည်ပြုပါတယ်။

အဆိုပါတပ်မတော်(လေ) လေယာဉ်တစ်စီး အိန္ဒိယနိုင်ငံတွင် ပြေးလမ်းချော်မှုဖြစ်ပွားခဲ့တယ်လို့ အိန္ဒိယပြည်တွင်း မီဒီယာများက သတင်းများထုတ်ပြန်ခဲ့ပြီးနောက် နစက သတင်းထုတ်ပြန်ရေးအဖွဲ့က အဆိုပါသတင်းကို အတည်ပြုပေးခဲ့ခြင်း  ဖြစ်ပါတယ်။

မြန်မာတပ်မတော်မှ သယ်ယူပို့ဆောင်ရေးလေယာဉ် (Y-8 F200 WBအမျိုးအစား လေယာဉ်အမှတ်-၅၈၂၁)သည်မြန်မာ-အိန္ဒိယ စစ်ဘက်ဆိုင်ရာပူးပေါင်းဆောင်ရွက်ရေး လုပ်ငန်းများဆောင်ရွက်ရန်အတွက် ယနေ့နံနက်၁၀ နာရီခန့်တွင် မိတ္ထီလာခြို့မှ ထွက်ခွာခဲ့တာဖြစ်တယ်လို့ သတင်းထုတ်ပြန်ချက်မှာဖော်ပြထားပါတယ်။

အဆိုပါလေယာဉ်သည်  အိန္ဒိယနိုင်ငံ မီဇိုရမ်ပြည်နယ်;လန်ပူရီမြို့ လေဆိပ်သို့ ဒေသစံတော်ချိန် နံနက် ၁၁ နာရီ ၂၀ မိနစ်ခန့်တွင်ရောက်ရှိဆင်းသက်စဉ် ရုတ်တရက် စက်ချို့ယွင်းမှုကြောင့် လေယာဉ်ပြေးလမ်းချော်မှုဖြစ်ပွားခဲ့တာလို့လည်း နစကသတင်း ထုတ်ပြန်ချက်ကဆိုပါတယ်။

ယင်းလေယာဉ်ပြေးလမ်းချော်မှုကြောင့် လေယာဉ်ပေါ်တွင် လိုက်ပါလာခဲ့ကြသည့် လေယာဉ် အရာထမ်း/အမှုထမ်းများအနက် ၈ ဦး ထိခိုက်ဒဏ်ရာရရှိခဲ့ပြီး ဆေးကုသမှုခံယူစေလျက်ရှိနေကြောင်းသတင်းထုတ်ပြန်ပါတယ်။

ထိုသို့ လေယာဉ်စက်ချို့ယွင်းပြီးပြေးလမ်းချော်ခဲ့မှုနှင့်ပတ်သက်ပြီး အသေးစိတ် စိစစ်ဆောင်ရွက်လျက်ရှိကြောင်းဖြင့်လည်း သတင်းထုတ်ပြန်ချက်အရသိရပါတယ်။

Photo Credit: India Today/WION

-ymg/knl

၂၂ ဇန်နဝါရီ ၂၀၂၄

နစက ဥက္ကဋ္ဌရုံးဝန်ကြီးဌာန(၃) ပြည်ထောင်စုဝန်ကြီးနှင့် ဝန်ကြီးဌာန(၄) ဒုတိယဝန်ကြီးတို့ကို ခန့်အပ်လိုက်ကြောင်း သိရပါတယ်။

နစက ဥက္ကဋ္ဌရုံးဝန်ကြီးဌာန(၃)ပြည်ထောင်စုဝန်ကြီးအဖြစ် ဦးအောင်ကျော်ဟိုးအားလည်းကောင်း၊ နစကဥက္ကဋ္ဌရုံး ဝန်ကြီးဌာန (၄) ဒုတိယဝန်ကြီးအဖြစ် ဗိုလ်ချုပ်ခွန်သန့်ဇော်ထူးအားလည်းကောင်း  ခန့်အပ်လိုက်တယ်လို့ နစကက ယနေ့ ဇန်နဝါရီ ၂၂ရက်ရက်စွဲဖြင့် အမိန့်အမိန့် ၇/၂၀၂၄ နှင့် ၈/၂၀၂၄ တို့ကို ထုတ်ပြန်ကြေညာခဲ့တာဖြစ်ပါတယ်။

-ymg/knl

၂၁ ဇန်နဝါရီ ၂၀၂၄

အမေရိကန်လုပ် ကိုဗက် စစ်သင်္ဘော HTMS Sukhothai ပြန်လည်ဆယ်ယူရာတွင် တရုတ်ကုမ္ပဏီတစ်ခုပါဝင် ပတ်သက်နေသည်ဟူသည့် သတင်းများနှင့်ပတ်သက်၍ ထိုင်းတော်ဝင်ရေတပ်ကို အမေရိကန်ပြည်ထောင်စုက သတိပေးစာ ပေးပို့ထားသည်။

 အဆိုပါသတိပေးစာကို  ၂၀၂၄ဘတ်ဂျက်သုံးသပ်ရေး အောက်လွှတ်တော်ကော်မတီအဖွဲ့ဝင်တစ်ဦးဖြစ်သူ ရှေ့သို့ချီပါတီ၏ ဘန်ကောက်လွှတ်တော်အမတ် ချာရာဖွန်ဆာတွန်ဒီက ဖော်ထုတ်ခဲ့ခြင်းဖြစ်သည်။

မစ္စတာ ချာရာဖွန်၏ အဆိုအရ  အဆိုပါစာကို ထိုင်းနိုင်ငံရှိ အမေရိကန်ပြည်ထောင်စုစစ်ရေးအကြံပေးပူးတွဲအုပ်စုက ရေးသား ပေးပို့ခဲ့ခြင်းဖြစ်သည်ဟုသိရသည်။ ၂၀၂၂ခုနှစ် ဒီဇင်ဘာ ၁၈ရက်က ထိုင်းပင်လယ်ကွေ့တွင် အဆိုပါ ထိုင်းရေတပ်ပိုင်သင်္ဘော နစ်မြုပ်ပြီးကတည်းက အမေရိကန်၏ စိုးရိမ်ပူပန်မှုအပေါ် ထိုင်းရေတပ်က တုန့်ပြန်မှုမပြုခဲ့သေးဟု ရေးသားဖော်ပြထားသည်။  သင်္ဘောနစ်မြုပ်မှုကြောင့် သင်္ဘောသား ၁၀၆ဦးအနက် (၂၄)ဦး သေဆုံးခဲ့ကာ ငါးဦးပျောက်ဆုံးနေပြီး ထိုပျောက်ဆုံးသူများ သေဆုံးသွားပြီဟု ယူဆရသည်။

ထိူင်းနိုင်ငံရှိ အမေရိကန်၏ စစ်ရေးကိစ္စများကို ကြီးကြပ်ရသည့်အဖွဲ့သည် သင်္ဘောနစ်မြုပ်ပြီး တစ်လအကြာတွင် ထိုင်းရေတပ်ကို ဆက်သွယ်ခဲ့ပြီး ၁၉၈၇ခုနှစ်ကတည်းက အမှုထမ်းခဲ့သည့် အဆိုပါသင်္ဘောပျက်ကို မည်ကဲ့သိုဆယ်ယူမည် ဆိုသည့် အစီအစဉ်နှင့်ပတ်သက်၍ မေးမြန်းခဲ့သည်။ ပြန်စာမရရှိသေးသည့်အတွက် ပြီးခဲ့သည့် ဒီဇင်ဘာ (၁)ရက်က နောက်ထပ် စာတစ်စောင်ထပ်ပို့ခဲ့ခြင်းဖြစ်သည်ဟု မစ္စတာ ချာရာဖွန်ကပြောသည်။

တရုတ်မိတ်ဖက်ကုမ္ပဏီနှင့်အတူတွဲလုပ်မည့် ထိုင်းကန်ထရိုက်တာကုမ္ပဏီတစ်ခုကို သင်္ဘောဆယ်ယူရန် ရွေးချယ်ထားသည် ဟူသောသတင်းများထွက်ပေါ်ပြီးနောက်  ထိုင်းရေတပ်ကို အမေရိကန်နှင့်သဘောတူညီချက်လိုက်နာရန် ထိုဒုတိယစာတွင် တိုက်တွန်းထားသည်။

သဘောတူညီချက်မှာ အမေရိကန်ထုတ်သင်္ဘောများကို ဆယ်ယူဖို့ရှိလာပါက ထိုင်းရေတပ်သည်  အမေရိကန်အစိုးရထံ ဆယ်ယူမည့်ကန်ထရိုက်တာကို အတည်ပြုချက်ရယူရမည်ဟုဖော်ပြပါရှိသည်ဟု မစ္စတာ ချာရာဖွန်ကပြောသည်။

အကယ်၍ ထိုင်းရေတပ်သည် အဆိုပါပဋိညာဉ်ကို ချိုးဖောက်ပါက  ထိုင်းနိုင်ငံနှင့်အမေရိကန်အကြား နိုင်ငံခြား စစ်ပစ္စည်း‌ ရောင်းချမှုအပေါ် အကျိုးသက်ရောက်မှာဖြစ်ကြောင်း သူကဆက်ပြောပြသည်။

မည်သို့ဆက်လုပ်ရမည်ကို စဉ်းစာနေသည်ဟု ရေတပ်ဦးစီးချုပ် ဗိုလ်ချုပ်ကြီး အက်ဒမ်ဖန်အမ်ကပြောသည်။

တကယ်လို့ အမေရိကန်က ဆယ်ယူရေးမှာပါဝင်မယ်ဆိုရင် ဆယ်ယူဖို့မူလသတ်မှတ်ထားတဲ့ ဧပြီလထက် နောက်ကျသွားနိုင် တယ်ဟု အမည်မဖော်လိုသူ သတင်းအရင်းအမြစ်ကပြောသည်။

ထိုင်းရေတပ်သည် စစ်သင်္ဘော ဆယ်ယူရေးတွင် ဘတ်ငွေ ၁၉၉သန်းဖြင့် ဆောင်ရွက်ပေးမည့် ကန်ထရိုက်တာကိုတွေ့ရှိပြီး ဖြစ်သော်လည်း အတည်ပြရန် ဆိုင်းငံ့ထားဆဲဖြစ်သည်။

-ymg/knl

#Thailand_navy

#HTMS_Sukhothai

#yangonmediagroup

၂၁ ဇန်နဝါရီ ၂၀၂၄

ဖိလစ်ပိုင်သမ္မတ ဖာဒီနန်မားကို့စ်ဂျူနီယာသည် သမ္မတရဟတ်ယာဉ်ကို အသုံးပြုကာ မနီလာမြို့တော်မြောက်ဘက်ရှိ ဗြိတိန် ရော့ခ်တီးဝိုင်း Coldplay ကို သောကြာနေ့ညက သွားရောက်ကြည့်ရှုခဲ့လို့ ဆိုရှယ်မီဒီယာတွေပေါ်ကနေ ဝေဖန်မှုတွေ ခံနေရပါတယ်။

ဖိလစ်ပိုင် အရီနာ လို့ခေါ်တဲ့ ကမ္ဘာ့အကြီးဆုံး မိုးလုံလေလုံပွဲခင်းကြီးမှာ လာရောက်ကြည့်ရှုသူတွေဟာ လေးသောင်းခန့်ရှိတဲ့ အတွက် အကျိုးဆက်အးဖြင့် “ အဲဒီမိုးလုံလေလုံကွင်းကြီးထဲသွားတဲ့ လမ်းတစ်လျောက် မလွှဲမရှောင်သာတဲ့ ယာဉ်ကြောပိတ် ဆို့မှုတွေရှိခဲ့ပါတယ်” လို့ သမ္မတလုံခြုံရေးအဖွဲ့က အဆိုပါကိစ္စကို သတင်းထုတ်ပြန်ပါတယ်။

အဆိုပါ ယာဉ်ကြောပိတ်ဆို့မှုဟာ  သောကြာနေ့ညက အဲဒီပွဲကို ဇနီးဖြစ်သူနှင့်အတူ သွားကြည့်တဲ့ မားကို့စ်အတွက် လုံခြုံရေး အရ အန္တရာယ်ရှိနေတဲ့အတွက် သမ္မတရဲ့ အလုပ်သုံး ရဟတ်ယာဉ်ကို မသုံးမဖြစ်သုံးလိုက်ရတယ်လို့ သတင်းထုတ်ပြန်ချက်မှာ ဖြေရှင်းထားပါတယ်။

ဒါပေမယ့် ဆိုရှယ်မီဒီယာသုံးသူတွေကတော့ ဖိလစ်ပိုင်ကို ဆယ်စုနှစ်လေးစုနီးပါး အုပ်ချုပ်ပြီးနောက် သမိုင်းဝင်တဲ့ ပြည်သူ့အာဏာတော်လှန်ရေးကြောင့် ပြုတ်ကျခဲ့တဲ့ အာဏာရှင်မားကို့စ်ရဲ့ သားဖြစ်သူ လက်ရှိသမ္မတ မားကို့စ်ဂျူနီယာအနေ    နှင့် ပြည်သူ့အခွန်ဘဏ္ဍာကို အသုံးပြုတာဖြစ်တယ်လို့ ဝေဖန်နေကြပါတယ်။

“ တရားဝင်အရင်းအမြစ်တွေဖြစ်တဲ့ သမ္မတရဟတ်ယာဉ်လိုမျိုးတွေကို ကိုဘ်ရေးကိုယ်တာနှင့် အလုပ်ကိစ္စမဟုတ်ဘဲ  အသုံးပြု ခြင်းဟာ  အာဏာအလွဲသုံးစားလုပ်တာ ဒါမှမဟုတ် အစိုးရရဲ့အရင်းအမြစ်ကို အလွဲသုံးစားလုပ်တာပဲဖြစ်တယ်”လို့ ဖေ့စ်ဘုတ်ခ် အသုံးပြုသူ ဂျိမ်းစ်ပက်ထရစ် အရစ်စတိုရင်က ပို့စ်ရေးတင်ပါတယ်။

“ ရဟတ်ယာဉ်သုံးတာ၊ပြီးတော့လောင်စာဆီနှင့်လုံခြုံရေး အဲဒါတွေအတွက် ကျွန်တော်တို့ပိုက်ဆံပေးထားရတာ။လူတိုင်းရဲ့ ပွဲလက်မှတ်တွေအတွက်တောင်သုံးတယ်ဆိုတာ ဘယ်သူတွေကသိကြမှာလဲ” လို့ နောက်ထပ်ဖေ့စ်ဘုတ်ခ်သုံးသူ အာဗိုင် ကွန်ဆက်ဆီယွန်ကပြောပါတယ်။

Source Reuters

#yangontimes

#Marcosjunior

#Philippines_Politics

၂၀ ဇန်နဝါရီ ၂၀၂၄

အိန္ဒိယနှင့်မြန်မာနယ်စပ်တလျောက် ဗဟိုအစိုးရအနေနှင့် ခြံစည်းရိုးများခတ်တော့မည်ဖြစ်ကြောင်း အိန္ဒိယနိုင်ငံ ပြည်ထောင်စု ပြည်ထဲရေး ဝန်ကြီး အမ်မစ်ရှားက ပြောပါတယ်။ အိန္ဒိယပြည်ထဲရေးဝန်ကြီးဟာ  ဂူဝါဟတီမှာကျင်းပတဲ့ အာသံရဲကော်မန်ဒို တပ်ဖွဲ့ စစ်ရေးပြအခမ်းအနားတစ်ခုမှာ ယနေ့ ဇန်နဝါရီ ၂၀ရက်မှာ ပြောခဲ့တာဖြစ်တယ်လို့ အိန္ဒိယပြည်တွင်းသတင်းဌာနများမှ သတင်းများအရသိရပါတယ်။

အိန္ဒိယဟာ အိမ်နီးချင်းဘင်္ဂလားဒေ့ရှ် နယ်စပ်တစ်လျောက် လွတ်လပ်စွာသွားလာခွင့်ကိုထိန်းချုပ်ဖို့ အတားအဆီးတွေချထား အပြီး မြန်မာနယ်စပ်ခြံစည်းရိုးခတ်ဖို့ ဆုံးဖြတ်ချက်ချခဲ့တာဖြစ်ပါတယ်။

“ အိန္ဒိယနှင့်မြန်မာနယ်စပ်ကို မကြာမီမှာ ဘင်္ဂလားဒေ့ရှ်နယ်စပ်လိုဘဲ ကာကွယ်တော့မယ်။ အာသံက ကျွန်တော့်မိတ်ဆွေ တွေကို ပြောချင်တာက နာရင်ဒရာမိုဒီအစိုးရဟာ မြန်မာနှင့်နယ်စပ်ကို ခြံစည်းရိုးခတ်ဖို့ဆုံးဖြတ်ခဲ့တယ်ဆိုတာပဲဖြစ်ပါတယ်။ ဘင်္ဂလားဒေ့ရှ်လိုပဲပေါ့။ အစိုးရအနေနှင့် မြန်မာနှင့်သဘောတူထားခဲ့တဲ့ အက်ဖ်အမ်ဂျီ ( လွတ်လပ်စွာလှုပ်ရှားသွားလာမှု) Free Movement Regime ကို မကြာမီအဆုံးသတ်ဖို့ ပြန်စဉ်းစားနေပါတယ်” လို့ အာမစ်ရှားက ပြောပါတယ်။

အဲဒီသဘောတူညီချက်အရ မြန်မာနှင့်အိန္ဒိယနိုင်ငံတွေမှသူတွေဟာ နယ်စပ်ပိုင်နယ်တစ်ဖက်ချင်းစီကို ဗီဇာမပါဘဲ ၁၆ကီလို  မီတာအထိ သွားလာခွင့်ပေးထားတာပဲဖြစ်ပါတယ်။

အိန္ဒိယနှင့်မြန်မာနိုင်ငံတို့ဟာ နယ်စပ်ချင်း ၁၆၄၃ ကီလိုမီတာထိစပ်နေကြပါတယ်။ အိန္ဒိယဘက်က မီဇိုရမ်၊မဏိပူ၊နာဂလန်းနှင့် အာရွမ်နာချာပရာဒေ့ရှ်စတာတွေနှင့်ထိစပ်နေတာပါ။ အဲဒီပြည်နယ်တွေဟာ လွတ်လပ်စွာသွားလာခွင့်ကြောင့် အကျိုး  အမြတ်တွေရှိနေခဲ့ကြတာဖြစ်ပါတယ်။

မြန်မာ-အိန္ဒိယနယ်စပ်မှာ တိုက်ပွဲတွေနှင့်မတည်ငြိမ်မှုတွေဖြစ်နေပြီး မြန်မာနိုင်ငံမှ ဒုက္ခသည်တွေ အိန္ဒိယထဲ ဝင်ရောက်လာပြီး နောက် မိုဒီအစိုးရက ယခုလိုဆုံးဖြတ်ခဲ့တာလို့ သိရပါတယ်။

-ymg/knl

၁၉ ဇန်နဝါရီ ၂၀၂၄

အစ္စလမ်မာဘတ် (AFP) - ယခုသီတင်းပတ်အတွင်း အီရန်ရှိ စစ်သွေးကြွပစ်မှတ်များကို လေကြောင်းမှလက်တုန့်ပြန်၍ ကြောက်မက်ဖွယ် တိုက်ခိုက်မှုများ ပြုလုပ်ပြီးနောက် ပါကစ္စတန် ၀န်ကြီးချုပ်သည် သောကြာနေ့တွင် အရေးပေါ် လုံခြုံရေး အစည်းအဝေး ပြုလုပ်မည်ဖြစ်သည်။

နှစ်နိုင်ငံကြားမျှဝေထားသည့် အလွယ်တကူဖြတ်သန်းနိုင်သော Baluchistan နယ်စပ်ရှိ ရှားရှားပါးပါး စစ်ရေး လှုပ်ရှား မှုများသည် အစ္စရေး-ဟားမတ်စ်စစ်ပွဲကြောင့် ပေါ်ပေါက်နေသည့်ဒေသတွင်း တင်းမာမှုများအပေါ် ပို၍ဆွပေးသလိုဖြစ်စေ ခဲ့သည်၊။

အင်္ဂါနေ့ညက ပါကစ္စတန်ရှိ အကြမ်းဖက်သမားပစ်မှတ်များဆိုသည့်နေရာတွေကို အီရန်က ဒုံးကျည်နှင့် ဒရုန်းတို့ဖြင့် တိုက်ခိုက်ခဲ့ပြီး အပြန်အလှန်အားဖြင့် ပါကစ္စတန်က အီရန်နိုင်ငံအတွင်း စစ်သွေးကြွပစ်မှတ်တွေကို ကြာသပတေးနေ့မှာ ပစ်ခတ်တိုက်ခိုက်ခဲ့သည်။

ပါကစ္စတန်သည် တီဟီရန်မှ ယင်း၏သံအမတ်ကို ပြန်ခေါ်ခဲ့ပြီး အီရန်မှ အစ္စလမ်မာဘတ်သို့ပြန်လာမည့် သံအမတ်၏ အိမ်ပြန် ခရီးကို အီရန်က ပိတ်ဆို့ထားသည်ဟု သံအမတ်ကပြောသည်။

ကုလသမဂ္ဂနှင့် အမေရိကန်တို့က ချုပ်ထိန်းကြရန် မေတ္တာရပ်ခံခဲ့ကြပြီး တရုတ်ကလည်း ကြားဝင် ဖျန်ဖြေရန် ကမ်းလှမ်း ခဲ့သည်။

“ဝန်ကြီးချုပ်က ဒီနေ့မှာ အမျိုးသားလုံခြုံရေးကော်မတီအစည်းအဝေးကို ကျင်ပဖို့ဆင့်ခေါ်ထားပါတယ်” ဟု ယင်း၏ရုံးမှ ပြောရေးဆိုခွင့်ရှိသူတစ်ဦးက အေအက်ဖ်ပီသို့ ပြောကြားခဲ့သည်။

ကြည်းတပ်ဦးစီးချုပ်နှင့် ထောက်လှမ်းရေးအဖွဲ့ အကြီးအကဲတို့သည် မွန်းလွဲပိုင်း အစည်းအဝေးသို့ တက်ရောက် မည်ဖြစ်ကြောင်း အစ္စလမ်မာဘတ် လုံခြုံရေးအရာရှိတစ်ဦးက ပြောကြားခဲ့သည်။

တိုက်ခိုက်မှုများပြီးသည်နောက် ပါကစ္စတန်နိုင်ငံ ခေါင်းဆောင် Anwaar-ul-Haq Kakar သည် ဆွစ်ဇာလန်နိုင်ငံ ဒါးဗို့စ်တွင် ကျင်းပသည့် ကမ္ဘာ့စီးပွားရေးဖိုရမ်ခရီးစဉ်ကို ချုံ့ပစ်ခဲ့သည်။

သူ၏ အိမ်စောင့်အစိုးရသည် ပါကစ္စတန်ကို သုံးပတ်သာ လိုတော့သော အထွေထွေ ရွေးကောက်ပွဲသို့ ဦးတည်သွားနေပြီး မဲအကြိုမသမာမှု စွပ်စွဲချက်များဖြင့် ရုပ်ပျက်ဆင်းပျက် ဖြစ်နေသည်။

တီဟီရန်နှင့် အစ္စလာမာဘတ်တို့ကလည်း ၎င်းတို့သည် ပြည်ပနယ်မြေများတွင် ခိုလှုံနေသည့် ယင်းတို့၏ ပြည်တွင်းစစ်သွေးကြွများကို တိုက်ခိုက်ခဲ့ခြင်းဖြစ်သည်ဟု အပြန်အလှန်ပြောထားကြသည်။

စစ်သွေးကြွများ ဆယ်စုနှစ်များစွာ အုံကြွနေသော မိုးနည်းရေရှားဒေသကို ပိုင်းခြားထားသည့် နယ်စပ်နှစ်ဖက်စလုံးတွင် စုစုပေါင်းသေဆုံးသူ ၁၁ ဦးရှိပြီး အများစုမှာ အမျိုးသမီးများနှင့် ကလေးငယ်များဖြစ်သည်ဟုသိရသည်။

“ဟယ်လီကော်ပတာတွေက ခေါင်းပေါ်ကနေ ပျံတက်ပြီး အီရန်တိုက်ခိုက်ခဲ့တဲ့နေရာကို ဦးတည်သွားပေမယ့် ဘာဖြစ်သွားခဲ့မှန်း ကျွန်တော်တို့ မသိပါဘူး” ဟု ဒုံးကျည်ထိမှန်သည့်နေရာမှ ၅ ကီလိုမီတာအကွာရှိ ဘာသာရေးကျောင်းငယ်တစ်ခု၏ ဝတ်ပြုအဖွဲ့ခေါင်းဆောင် အသက် ၂၄နှစ်အရွယ် Maulana Mohammad Sadiq ကြာသပတေးနေ့တွင် AFP သို့ပြောကြားခဲ့ သည်။

နှစ်ဖက်ကြား ဆက်ဆံရေး ယိုယွင်းလာခြင်းကြောင့် နယ်စပ်ကို ပိတ်ထားရပြီး ဒေသခံများ အလုပ်အကိုင်နှင့် စားနပ်ရိက္ခာ တင်သွင်းမှုများကို မှီခိုနေရသည့် အီရန် ကုန်သွယ်မှုမှ ဖြတ်တောက်ခံရမည်ကို ရွာသားများက စိုးရိမ်နေကြသည်။

.

“အီရန်နိုင်ငံသားတွေ နယ်စပ်ကို ပိတ်လိုက်ရင် လူတွေ ငတ်ပြီး လူငယ်တွေက ခွဲထွက်ရေး အဖွဲ့တွေနဲ့ ပူးပေါင်းမှာ ဖြစ်လို့ စစ်သွေးကြွတွေ ပိုဖြစ်လာလိမ့်မယ်” ဟု အသက် ၅၅ နှစ်အရွယ် ဟာဂျီ မိုဟာမက် အစ္စလာမ်က ပြောကြားခဲ့သည်။

Baluch ခွဲထွက်ရေးသမားများသည် တွင်းထွက်သယံဇာတများဝေစုများပိုမိုရရှိရေးအတွက် ကောင်းကောင်းမအုပ်ချုပ်နိုင်ဘဲ ရှိသည့်ဆင်းရဲနွမ်းပါးသောဒေသမှနေ၍ ပါကစ္စတန်အာဏာပိုင်များကို ဆန့်ကျင်ကာ အဆင့်နိမ့်သောင်းကျန်းမှုများကို ဆယ်စုနှစ်များကြာအောင် ဆင်နွှဲလျက်ရှိသည်။

သူပုန်ထမှုကို စစ်တပ်က နှိမ်နင်းမှုတွင် ပျောက်ဆုံးမှုနှင့် တရားလက်လွတ် သတ်ဖြတ်မှုများ ကျယ်ကျယ်ပြန့်ပြန့် လုပ်ဆောင် ခဲ့သည်ဟု လူ့အခွင့်အရေးအုပ်စုများကပြောထားသည်။

၂၀၂၁ ခုနှစ်တွင် တာလီဘန်များ အာဏာပြန်ရလာပြီးနောက် ပါကစ္စတန်နှင့် အာဖဂန်နစ္စတန်နယ်စပ်တွင် စစ်သွေးကြွရန်လိုမှု များ သိသိသာသာ မြင့်တက်လာသည်။

Source AFP