#LocalNews
Published_30 March 2022

ရွှေသံလွင်ကုမ္ပဏီ ဥက္ကဌလည်းဖြစ်၊ Sky Net ရုပ်သံလိုင်း ပိုင်ရှင်လည်းဖြစ်သော ဦးကျော်ဝင်းအား ဖမ်းဆီးထားသည်ဆိုသောသတင်းမှာ မဟုတ်မှန်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက YMG ကို ပြောသည်။

"ဦးကျော်ဝင်းကို ဖမ်းတာမဟုတ်ပါဘူး။အဲဒီသတင်းမဟုတ်ဘူးဗျ"ဟု ယင်းကဆိုသည်။

သို့သော်လည်း မီဒီယာတစ်ခုတွင် ဦးကျော်ဝင်းအား လွန်ခဲ့သော ၄ ရက်ခန့်ကပင် ဖမ်းဆီးသွားကြောင်း ရေးသားထုတ်ပြန်သည့်အတွက် အဆိုပါ သတင်းကို ပြန်လည်ဝေမျှသူများကြောင့် လူမှုကွန်ရက်တွင် ပျံ့နှံသွားခြင်းဖြစ်ကြောင်းလည်း သိရသည်။

ymg/mt
#Yangon_Media_Group

#LocalNews
Published- 30 Mar 2022

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်ကို လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့အစည်းများ၏ စတုတ္ထအကြိမ် ထိပ်သီးခေါင်းဆောင်များညီလာခံ (ဒုတိယပိုင်း) ကို ထိုင်းနိုင်ငံ၊ ချင်းမိုင်မြို့တွင် ၂၀၂၂ ခုနှစ်၊ မတ်လ ၂၉ ရက်နေ့မှ စတင်ပြီးမျက်နှာချင်းဆိုင်နှင့် Video Conferencing နည်းနာနှစ်မျိုးဖြင့် ကျင်းပလျက်ရှိကာ ညီလာခံကို လာမည့် ဧပြီလ (၂) ရက်နေ့အထိ ဆက်လက်ကျင်းပသွားမယ်လို့ သိရပါတယ်။

ညီလာခံဖွင့်ပွဲအခမ်းအနား ဦးဆောင်သဘာပတိများအဖြစ် ဗိုလ်ချုပ်ကြီး စောမူတူးစေးဖိုး၊ သျှမ်းပြည်ပြန်လည်ထူထောင် ရေးကောင်စီ ဥက္ကဌ ဗိုလ်ချုပ်ကြီး ယွက်စစ်နှင့် မွန်ပြည်သစ်ပါတီဥက္ကဌ နိုင်ဟံသာ တို့က ဆောင်ရွက်ခဲ့ကြပြီး ဗိုလ်ချုပ်ကြီး စောမူတူးစေးဖိုးနှင့် ဗိုလ်ချုပ်ကြီး ယွက်စစ်တို့က ညီလာခံဖွင့်ပွဲအခမ်းအနား အဖွင့်အမှာစကားများအား အသီးသီး ပြောကြားခဲ့ကြပါတယ်။

နိုင်ငံတကာသံတမန်များ အပါအဝင် နိုင်ငံတကာအဖွဲ့အစည်းများမှ တာဝန်ရှိသူများက တက်ရောက်ခဲ့ကြပြီး ညီလာခံဖွင့်ပွဲအခမ်းအနားနှုတ်ခွန်းဆက်အမှာစကားများပြောရာ မြန်မာနိုင်ငံဆိုင်ရာ ကနေဒါနိုင်ငံသံအမတ်ကြီး Mr. Francois Lafreniere ၊ မြန်မာနိုင်ငံဆိုင်ရာ ဖင်လန်နိုင်ငံသံအမတ်ကြီး Mr. Pekka Shemeikka ၊ မြန်မာနိုင်ငံဆိုင်ရာ နော်ဝေနိုင်ငံသံအမတ်ကြီး Ms. Hilde Solbakken ၊ဩစတြေးလျနိုင်ငံမှ သံတမန်ဖြစ်သူ Mr. Bryan Bong၊အီတလီနိုင်ငံမှ Deputy Head of Mission ဖြစ်သူ Mr. Andrea Ferrara ၊ဆွစ်ဇာလန်နိုင်ငံမှ လူသားလုံခြုံရေးဆိုင်ရာ အကြံပေးပုဂ္ဂိုလ် Mr. Thomas Meier Nidecker၊ USAID မှ ယာယီဌာနေကိုယ်စားလှယ်ဖြစ်သူ Ms. Pamela Fessenden တို့ကပြောကြားအပြီးတွင် မွန် ပြည်သစ်ပါတီဥက္ကဌ နိုင်ဟံသာက ညီလာခံဖွင့်ပွဲအခမ်းအနားရဲ့ နိဂုံးချုပ်အမှာစကား ပြောကြားခဲ့တယ်လို့ သိရပါတယ်။

စတုတ္ထအကြိမ် NCA-S EAO ထိပ်သီးခေါင်းဆောင်များညီလာခံဖွင့်ပွဲအခမ်းအနားသို့ ညီလာခံဖွင့်ပွဲဦးဆောင် သဘာပတိများ၊ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အဖွဲ့ဝင်ခေါင်းဆောင်များ၊ ငြိမ်းချမ်းရေးလုပ်ငန်းစဉ် ဦးဆောင်အဖွဲ့၏ ဦးဆောင်မှုအလုပ်အဖွဲ့ အဖွဲ့ဝင်များ၊ PPST ၏ အကြံပေးပုဂ္ဂိုလ်၊ NCA-S EAO မှ ခေါင်းဆောင်ကိုယ်စားလှယ်များ၊ NCA-S EAO ၏ ငြိမ်းချမ်းရေးလုပ်ငန်းစဉ်တွင် အမျိုးသမီးများ၏ ဦးဆောင်မှုမြှင့်တင်ရေးအစီအစဉ် (WLPP)မှ ညှိနှိုင်းရေးမှူး၊ နိုင်ငံတကာ သံတမန်များ၊ နိုင်ငံတကာအဖွဲ့အစည်းများမှ ကိုယ်စားလှယ်များနှင့် လေ့လာသူများတက်ရောက်ခဲ့ကြပါတယ်။

ymg/hm
#Yangon_Media_Group

#Local_News
Published_ 30 March 2022

မြန်မာနိုင်ငံသားများအား (၁၀၂) ကြိမ်မြောက် ကယ်ဆယ်ရေးလေယာဉ်ဖြင့် ဆိုးလ်မြို့မှ ရန်ကုန်သို့ မတ် (၂၉) ရက်တွင် ပြန်လည်ပို့ဆောင်ပေးခဲ့ကြောင်း သိရပါတယ်။

အဆိုပါလေယာဉ်ဟာ အင်ချွန်း အပြည်ပြည်ဆိုင်ရာလေဆိပ်မှ ရန်ကုန် အပြည်ပြည်ဆိုင်ရာလေဆိပ်သို့ ညနေ ၄ နာရီခွဲတွင် ထွက်ခွာခဲ့ပြီး၊ ကနေဒါမှ ၂ ဦး၊ အီတလီမှ ၂ ဦး၊ အမေရိကန်ပြည်ထောင်စုမှ ၁၂ ဦး၊ ကမ္ဘောဒီးယားမှ ၁ ဦး၊ ကိုရီးယား သမ္မတနိုင်ငံမှ မြန်မာနိုင်ငံသား ၅၅ ဦးဖြင့် စုစုပေါင်း ၇၂ ဦး လိုက်ပါသွားခဲ့ကြောင်း သိရပါတယ်။

ကိုဗစ်-၁၉ ကူးစက်ရောဂါ ဖြစ်ပွားနေသည့်ကာလအတွင်း မြန်မာနိုင်ငံသို့ ပြန်လည် ထွက်ခွာ/ သွားရောက်နိုင်ရေးအတွက် မြန်မာသံရုံး၊ ဆိုးလ်မြို့မှ တစ်ပတ်လျှင် တစ်ကြိမ် ကယ်ဆယ်ရေးလေယာဉ် ပျံသန်းပြေးဆွဲနိုင်ရေး စီစဉ်ပေးလျက်ရှိရာ မတ် ၂၉ ရက် အင်္ဂါနေ့တွင် မြန်မာအပြည်ပြည်ဆိုင်ရာ လေကြောင်းလိုင်းဖြင့် (၁၀၂) ကြိမ်မြောက် ကယ်ဆယ်ရေးလေယာဉ် ပျံသန်းပြေးဆွဲရန် စီစဉ်ပေးခဲ့တာဖြစ်ပါတယ်။

လိုက်ပါသည့်ခရီးသည်များ လေဆိပ်၌ အခက်အခဲတစ်စုံတစ်ရာ မရှိစေရေးအတွက် မြန်မာသံရုံး၊ ဆိုးလ်မြိုမှ သံရုံးဝန်ထမ်းများက လေဆိပ်သို့သွားရောက်၍ လိုအပ်သည်များ ကူညီဆောင်ရွက်ပေးခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group.

#LocalNews
Published_ 29 March 2022
စင်ကာပူနိုင်ငံတွင်ရောက်ရှိနေတဲ့ မြန်မာနိုင်ငံသား ၁၁၇ ဦးအား ကယ်ဆယ်ရေး လေယာဉ်ဖြင့် မနေ့က ရန်ကုန်မြို့သို့ ပြန်လည်ပို့ ဆောင်ပေးခဲ့ကြောင်း သိရပါတယ်။

မြန်မာနိုင်ငံသို့ ပြန်လည်ထွက်ခွာလိုသည့် မြန်မာနိုင်ငံသားများအား မတ် ၂၈ ရက်၊ တနင်္လာနေ့၊ ဒေသစံတော်ချိန် ၁၂နာရီခွဲတွင် (၉၇) ကြိမ်မြောက် ကယ်ဆယ်ရေး လေယာဉ် အဖြစ် မြန်မာအမျိုးသားလေကြောင်းလိုင်းဖြင့် စင်ကာပူနိုင်ငံမှရန်ကုန်မြို့သို့ ပြန်လည် ပို့ဆောင်ပေးခဲ့ခြင်းဖြစ်ပါတယ်။

အဆိုပါ ကယ်ဆယ်ရေး လေယာဉ်တွင် စင်ကာပူနိုင်ငံသို့ ကာလတို လာရောက်စဉ် COVID-19 ကြောင့် ပိတ်မိနေသူများ၊ စင်ကာပူနိုင်ငံတွင် ပညာသင်ကြားနေသည့် ကျောင်းသား/ ကျောင်းသူများ၊ ကိုယ်ဝန်ဆောင်မိခင်များ၊ အလုပ်လုပ်ခွင့်ပါမစ် ဖျက်သိမ်း/ ရပ်နားခြင်း ခံထားရသူများ၊ သင်္ဘောသားများနှင့် မြန်မာနိုင်ငံရှိ မိသားစုများထံ အလည်အပတ် ပြန်ကြသူများ အပါအဝင် စုစုပေါင်း ၁၁၇ ဦး လိုက်ပါသွားခဲ့ပါတယ်။

အဆိုပါ ကယ်ဆယ်ရေးလေယာဉ်ဖြင့် လိုက်ပါမည့် မြန်မာနိုင်ငံသားများ အနေဖြင့် လေဆိပ်၌ လူဝင်မှုကြီးကြပ်ရေးဆိုင်ရာ ကိစ္စရပ်များ ဆောင်ရွက်ရာတွင် အခက်အခဲ မရှိစေရေးနှင့် စင်ကာပူနိုင်ငံမှ အဆင်ပြေချောမွေ့စွာ ထွက်ခွာနိုင်ရေး အတွက် မြန်မာသံရုံးမှ တာဝန်ရှိသူများက ချန်ဂီအပြည်ပြည်ဆိုင်ရာ လေဆိပ်၌ လိုအပ်သည်များ ကူညီဆောင်ရွက်ပေးခဲ့ကြောင်း သိရှိရပါတယ်။

ymg-mnn
#Yangon_Media_Group

#LocalNews
Published_29 March 2022

ထိုင်းနိုင်ငံထဲကို တရားမဝင် ဝင်နေကြတဲ့ အထောက်အထားမဲ့ မြန်မာတွေ အဖမ်းခံရတာတွေ တောက်လျှောက် ရှိလာနေတဲ့အတွက် အများစုက တရားဝင်လမ်းကြောင်းကနေ သွားချင်လာကြပါပြီ။

#Yangon_Media_Group

#LocalNews
Published_29 March 2022

ရန်ကုန်တိုင်းဒေသကြီးအတွင်းမှ မြန်မာနိုင်ငံအနှံ့သို့ ပြေးဆွဲနေကြသည့် ခရီးသည်တင်ယာဉ်လိုင်းများ ဈေးတက်နေကြပြီ ဖြစ်ကြောင်း သိရသည်။

"အရင်က ရန်ကုန်ကနေ သံတွဲတောင်ကုတ်ကိုသွားတယ်ဆိုရင် လေအိတ်ကား တစ်ယောက်ကို နှစ်သောင်းခွဲကနေ ခုဆိုရင် သုံးသောင်းခွဲပါ။ကားဂိတ်တွေအားလုံးလိုလို ဈေးတက်ပါတယ်။ လက်မှတ်တွေကိုလည်း ဧပြီလ ပထမပတ်မှာ ပြန်မယ်ဆိုရင် အခုကတည်းက ကြိုဝယ်ရတာ ပါ"ဟု ရခိုင်ပြည်နယ်သို့ ပြန်မည့်ခရီးသည်တစ်ဦးက ပြောသည်။

လက်ရှိတွင် စက်သုံးဆီဈေးနှုန်းများ မြင့်တက်နေသောကြောင့် အဝေးပြေးယာဉ်စီးနင်းခကို ဈေးတိုးကောက်ခံခြင်း ဖြစ်ကြောင်း အဝေးပြေးယာဉ်လိုင်းများက သိရသည်။

"မကိုက်ဘူးလေဗျာ။ကျွန်တော်တို့က ခရီးသည်တွေကို ငဲ့ကွက်ပြီးတော့ ပြေးဆွဲပေးနေတာပါ။တကယ်တမ်းကတော့ ဆီဈေးတက်တာ အားလုံး သိတဲ့အတိုင်း ၊ မပြေးဆွဲဘဲ ရပ်ပစ်လိုက်ဖို့ အထိ စဉ်းစားနေကြသူတွေအများကြီးပါ။ဒါပေမယ့်လည်း ခရီးသွားတွေအဆင်ပြေအောင်လို့ ပါ ခင်ဗျာ"ဟု အဝေးပြေးယာဉ်လိုင်းလုပ်ငန်းတစ်ခုတွင် လုပ်ကိုင်နေသူက ပြောသည်။

သို့သော်လည်း ရန်ကုန်တိုင်းဒေသကြီး၊ ပုဂ္ဂလိက သယ်ယူပို့ဆောင်ရေး ကြီးကြပ်မှုကော်မတီ (YRTC) အနေဖြင့် အဝေးပြေး ယာဉ်လိုင်းခများ တိုးမြှင့်ကောက်ခံသည်ကို တိုင်ကြားသူရှိပါက အရေးယူမည်ဟု မီဒီယာများကို ထုတ်ပြန်ပေးထားသည်။

သင်္ကြန်ရုံးပိတ်ရက်ကာလ နေရပ်ပြန်ကြသူများရှိသောကြောင့် အဝေးပြေးယာဉ်လိုင်းများတွင် ပုံမှန်ကာလ ထက် စီးနင်းသူ များပြားကာ လက်မှတ်ဝယ်ယူသူများလည်း အလွန်များပြားကြောင်း ၊သို့သော်လည်း ၂၀၂၀ ပြည့်နှစ် ကိုဗစ်ကာလ နောက်ပိုင်းတွင် ခရီးသွားများ သိသိသာသာလျော့ကျခဲ့ကြောင်း သိရသည်။

အဝေးပြေး ယာဉ်လိုင်းတွေကို သင်္ကြန်မတိုင်မီ ကာလနှင့် သင်္ကြန်ပြီးကာလအတွင်း နေရပ်ပြန်ကြမည့်ခရီးသည်အပေါ်ကြည့်၍ ပြေးဆွဲပေးမည် ဖြစ်ရာသင်္ကြန်ပိတ်ရက်တွင် အဝေးပြေး ယာဉ်လိုင်းပြေးဆွဲမှုနည်းပါးမည် ဖြစ်ကြောင်း၊လက်ရှိတွင် အဝေးပြေးယာဉ်လိုင်း ၁၉၀ မှ ယာဉ်အစီးရေ ၄၉၉ စီးဖြင့် ခရီးသည် ၆၀၀၀ ခန့်ကို နေ့စဉ်ပြေးဆွဲပေးနေကြောင်း သိရသည်။

ymg/mt
#Yangon_Media_Group