#LocalNews
Published - 7 April 2022

နှစ်သစ်ကူးမဟာသင်္ကြန်ပွဲတော်အစီအစဉ်ကြောင့် ဝေဖန်မှုတွေခံနေရတဲ့ ရမည်းသင်းမြို့အပန်း ဖြေစခန်းဟာ မြန်မာနိုင်ငံရဲ့ ထင်ရှားကျော်ကြားတဲ့ စီးပွားရေးလုပ်ငန်းရှင် ဦးတေဇပိုင်ဆိုင်သည့် "Resort" မဟုတ်ကြောင်း အဆိုပါအပန်းဖြေစခန်းမှ ဒီကနေ့မှာ ပြန်လည်ဖြေရှင်းလိုက်ပါတယ်။

"သားငယ်လေး ထူးလပြည့်ဝန်း အဲ့ဒါကြောင့် အပန်းဖြေစခန်းကို 'ထူး'လို့အမည်ပေးထားတာပါ"လို့ အဆိုပါအပန်းဖြေစခန်း၏ ပိုင်ရှင်ဖြစ်သူက ၄င်း၏ လူမှုကွန်ရက်တွင် ရေးသားထားသည်ကို တွေ့ရပါတယ်။

ဒါ့အပြင် ရမည်းသင်းမြို့ရှိ 'ထူး' အပန်းဖြေစခန်းသည် ဦးတေဇ(ထူး)နှင့် အမည်တူရုံမှလွဲ၍ မည်သည့်အကြောင်းမျှ ဆက်စပ်မှု၊ သက်ဆိုင်မှု(လုံးဝ)မရှိကြောင်းနှင့် နိုင်ငံရေးအဖွဲ့အစည်းများနှင့်လည်း ပတ်သက်ဆက်နွယ်မှုအလျင်းမရှိကြောင်း ဒီကနေ့မှာ ၄င်းတို့၏ တရားဝင်ဖေ့ဘုတ်ကနေတစ်ဆင့် ပြန်လည်ဖြေရှင်းခဲ့တာပါ။

အဆိုပါအပန်းဖြေစခန်းတွင် သင်္ကြန်ပွဲတော်ရက်များကာလအတွင်း နာမည်ကြီးအဆိုတော်များဖြစ်တဲ့ ထူးအယ်လင်း၊ သာဒီးလူ၊ ဝန တို့ အပါအဝင် Chocolate၊ Snow၊ Su၊ ပိုးပိုး၊ Dancer & DJ
တို့ရဲ့ ဖျော်ဖြေမှုတွေနဲ့ သင်္ကြန်ပွဲတော်ကို ဆင်နွှဲကြဖို့ဖိတ်ခေါ်ထားတဲ့ အပန်းဖြေစခန်းတစ်ခုဖြစ်ပါတယ်။

ထိုသို့ စီစဥ်ထားမှုအပေါ် လူထုရဲ့ဝေဖန်မှုတွေက မြင့်တက်ခဲ့တာ ဖြစ်ပါတယ်။

ယင်း 'ထူး'အပန်းဖြေစခန်းဟာ ရမည်းသင်းမြို့၊ကျီးနီကန်ဘောင်အနောက်ဘက်မှာ တည်ရှိတဲ့
အပန်းဖြေစခန်းတစ်ခုဖြစ်တယ်လို့ သိရပါတယ်။

ymg/kg
#Yangon_Media_Group

#LocalNews
Published_7 April 2022

မြန်မာနိုင်ငံတော်ဗဟိုဘဏ်ဒုတိယဥက္ကဋ္ဌ ဒေါ်သန်းသန်းဆွေ နေအိမ်တွင် သေနတ်ဖြစ်ပစ်ခတ်ခံရသည့် သတင်းမှာ မှန်ကန်ကြောင်း သက်ဆိုင်ရာက အတည်ပြုပါတယ်။

“ မှန်ပါတယ်။ နေအိမ်မှာပစ်ခတ်ခံရတာပါ။တစ်ဦးတည်းပါ" ဟု သတင်းထုတ်ပြန်ရေးအဖွဲ့ခေါင်းဆောင် ပြန်ကြားရေးဝန်ကြီးဌာန ဒုတိယဝန်ကြီး ဗိုလ်ချုပ်ဇော်မင်းထွန်းက YMG ၏မေးမြန်းချက်ကို ဖြေကြားခဲ့တာဖြစ်ပါတယ်။

“ သူဟာ အခု တပ်မတော်ဆေးရုံကြီးမှာ ဆေးကုသမှုခံယူနေပါတယ်။ဒဏ်ရာက မစိုးရိမ်ရပါဘူး" လို့ ဗိုလ်ချူပ်ဇော်မင်းထွန်းက ဆက်လက်ပြောဆိုပါတယ်။

ယနေ့ ဧပြီ ၇ ရက် မနက်ပိုင်းက ရန်ကုန်တိုင်းဒေသကြီး ၊ ဗဟန်းမြို့နယ် ရွှေဂုဏ်ရိပ်မွန်အိမ်ရာရှိ ဒေါ်သန်းသန်းဆွေကို သူ၏နေအိမ်တွင် အမည်မသိသူများက သေနတ်ဖြင့် ပစ်ခတ်သွားခဲ့တာဖြစ်တယ်လို့ သိရပါတယ်။

ymg/mt
#Yangon_Media_Group

#DailyNews
Published -7 April 2022

၁။ မြန်မာငှက်ပျော တရုတ်ကို တရားဝင်တပ်ပိုခွင့်ရရန် အပင်နှင့် တိရစ္ဆာန်ကျန်းမာရေးဆိုင်ရာ ပိုးမွှားကင်းစင်ရေး သဘောတူစာချုပ် ချုပ်ဆို

၂။ မြောက်ဦးယဉ်ကျေးမှုအမွေအနှစ် ယူနက်စကိုဝင်နိုင်ရေး စုပေါင်းအမှိုက်ကောက်လုပ်ငန်းကို တစ်ပတ်တစ်ကြိမ်ပြုလုပ်မည်

၃။ မိုးလေဝသ သတင်း

၄။ ပျောက်ဆုံးနေခဲ့သော ချားလ်စ်ဒါဝင်း၏မှတ်စုစာအုပ်များအား အမည်မသိသူတစ်ဦးက ကိမ်းဘရစ်ချ်တက္ကသိုလ်သို့ ပြန်လည်ပေးအပ်...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published 7Apr 2022

၂၀၂၂ခုနှစ် ဧပြီလ ၂ ရက်နေ့နဲ့ ၅ ရက်နေ့တို့မှာ ဝ ပြည်နယ်တောင်ပိုင်း UWSA နဲ့ RCSS အဖွဲ့တို့ ထိတွေ့တိုက်ပွဲဖြစ်ပွားခဲ့ပြီး နှစ်ဖက်အကျအဆုံးတွေရှိခဲ့တယ်လို့ သိရပါတယ်။

"ဝ" ပြည်တောင်ပိုင်း UWSA (၁၇၁) စစ်ဒေသနှင့် RCSS ရှမ်းတပ်ဖွဲ့တို့၏ ဧပြီလ ၂ ရက်နေ့ ထိတွေ့တိုက်ပွဲဖြစ်စဉ်မှာ လွယ်မန်ထုံကြားခံနယ်မြေအတွင်းသို့ RCSS အဖွဲ့မှ ကျူးကျော်ဝင်ရောက်လာပြီးနောက် စနိုက်ပါဖြင့် ချောင်းမြောင်းပစ်ခတ်တာကြောင့်"ဝ" တပ်ဖွဲ့ဝင်တစ်ဦး ကျဆုံးခဲ့ရသော်လည်း အပြန်အလှန်ပစ်ခတ်မှုခဏတာသာဖြစ်ပွားခဲ့ပြီးနောက် "ဝ" တပ်ဖွဲ့မှ အင်အားသုံးပြီး ပြန်လည်လက်တုံပြန်ခြင်းမပြုခဲ့ဘူးလို့ ဝ တောင်ပိုင်းရဲ့ပြောခွင့်ရပုဂ္ဂိုလ် ဦးညီရမ်းကပြောပါတယ်။

ထပ်မံ၍ ဧပြီလ ၅ ရက်နေ့နံနက်ပိုင်းတွင် ၀ ထိန်းချုပ်နယ်မြေမုန်းထဒေသရှိ လုံခြုံရေးတာဝန်ထမ်းဆောင်နေသော UWSA တပ်ဖွဲ့ဝင်အင်အား(၁၈)ဦး စခန်းချရာနေရာသို့ RCSS တပ်ဖွဲ့မှအင်အား ၂၀ ခန့် နယ်‌မြေကျူးဝင်ရောက်လာခဲ့တာကြောင့် "ဝ"တပ်ဖွဲ့မှ မေးမြန်းစဉ် RCSS အဖွဲ့မှ အခွင့်ကောင်းယူကာ စတင်ပစ်ခတ်သဖြင့် မိမိတို့"ဝ"တပ်ဖွဲ့ဝင် ရဲဘော်တစ်ဦးကျဆုံးခဲ့ရပြီးနောက် နယ်မြေရှင်းလင်းရေးအတွက် အပြန်အလှန်တိုက်ပွဲဖြစ်ပွားခဲ့ရာ RCSS ဘက်မှ (၅) ဦး ကျဆုံးပြီး လက်နက်ငယ် ၆ လက်ရရှိခဲ့ပြီး UWSA မှ တပ်ဖွဲ့ဝင်(၂)ဦး ဒဏ်ရာအနည်းငယ်ရရှိခဲ့တယ်လို့ သိရပါတယ်။

ymg/hm
#Yangon_Media_Group

#LocalNews
Published_7 April 2022

ပဲခူးတိုင်းဒေသကြီး၊တောင်ငူမြို့ ၊အမှတ်၁ရပ်ကွက်၊လှိုင်လမ်းမပေါ်က မြင့်မိုရ်နန်းစားသောက်ဆိုင်တွင်မွေးမြူထားသော ဝက်ဝံနှစ်ကောင် အရိုင်းစိတ်ဝင်ကာ ကုတ်ခြစ်ခဲ့သောကြောင့် ယနေ့ ဧပြီလ ၇ ရက် နံနက်စောစောတွင် ဝက်ဝံပိုင်ရှင် သေဆုံးသွားခဲ့ရကြောင်း တောင်ငူမြို့ခံများထံမှ သိရသည်။

ဝက်ဝံပိုင်ရှင်မှာ ဦးကိုကိုအောင်ဆိုသူဖြစ်ပြီး ၎င်းမှာ တိရစ္ဆာချစ်သူတစ်ယောက်လည်းဖြစ်ကြောင်း၊လမ်းဘေးခွေးလေခွေးလွင့်များ ကာကွယ်ထိန်းသိမ်းစောင့်ရှောက်ရေးလုပ်ငန်းများလည်း လုပ်ကိုင်နေသည့်အပြင် မြင့်မိုရ်နန်း စားသောက်ဆိုင်ဖွင့်လှစ်ထားသူဖြစ်ကြောင်း သိရသည်။

လွန်ခဲ့သည့် ရှစ်နှစ်ခန့်မှ ဝက်ဝံပေါက်တစ်ကောင် စတင်မွေးမြူရာမှ ယခုလက်ရှိအချိန်ထိ ဝက်ဝံ ၁၂ ကောင်ကို မွေးမြူထားကြောင်း၊ကုတ်ခြစ်သတ်ဖြတ်ခဲ့သည့် ဝက်ဝံနှစ်ကောင်အနက် ဦးကိုကိုအောင် စတင်မွေးမြူခဲ့သော အိစိကွေး ဟုခေါ်သည့် ဝက်ဝံလည်းပါကြောင်း၊ ဦးကိုကိုအောင်မှာ ဝက်ဝံနှစ်ကောင်ဘေးတွင် သေဆုံးနေခဲ့ခြင်းဖြစ်ကြောင်း သိရသည်။

ဦးကိုကိုအောင်၏ ရုပ်အလောင်းကို ယူဆောင်နိုင်ရန် အခက်အခဲရှိနေသည့်အတွက် အဆိုပါအရိုင်းစိတ်ဝင်နေသော ဝက်ဝံများ၏ဦးခေါင်းကို သေနတ်ဖြင့်ပစ်သတ်ခဲ့ရကြောင်းလည်း သိရသည်။

ymg/mt
#Yangon_Media_Group

#LocalNews
Published_ 6 April 2022

မြန်မာနိုင်ငံရဲ့ အကြီးဆုံးပုဂ္ဂလိကဘဏ်ဖြစ်တဲ့ ကမ္ဘောဇဘဏ်ရဲ့ အမှုဆောင်အရာရှိချုပ်အမေရိကန်နိုင်ငံသား Mike DeNoma အနားယူပြီး သူ့နေရာမှာ မြန်မာလူမျိုးထဲက ကမ္ဘောဘဏ်ရဲ့ အဆင့်မြင့်အရာရှိကြီးဖြစ်တဲ့ ဦးဇော်လင်းအောင်က အမှုဆောင်အရာရှိချုပ်အဖြစ် တာဝန်ယူမှာ ဖြစ်တယ်လို့ ကမ္ဘောဇဘဏ်က ယမန်နေ့က ကြေညာပါတယ်။

ဦးဇော်လင်းအောင်မှာ KBZ Pay ကို တာဝန်ယူထားသူဖြစ်ပြီး ကမ္ဘောဇဘဏ်မှာ ၇ နှစ်ကျော် တာဝန်ထမ်းဆောင်ခဲ့တယ်လို့ ကမ္ဘောဘဏ်က ဆိုပါတယ်။ သူသည် KBZ Pay အား စတင်အကောင်အထည်ဖော်ရာတွင် ဦးဆောင်ပေးခဲ့သူဖြစ်ပြီး ဘဏ်၏ ပြုပြင်ပြောင်းလဲမှုလုပ်ငန်းစဉ်များနှင့် ဒစ်ဂျစ်တယ်အသွင်ကူးပြောင်းရေးလုပ်ငန်းစဉ်များတွင် အဓိကကျသည့်နေရာ၌ ပါဝင်ဆောင်ရွက်ခဲ့သူတစ်ဦးဖြစ်တယ်လို့ ဆိုပါတယ်။

ကမ္ဘောဇဘဏ်အနေဖြင့် Cash Account အသစ်ဖွင့်လှစ်မှုတွင် မကြာသေးမီက မြန်မာကျပ်ငွေ ၁ ထရီလီယံကျော် ထပ်တိုးရရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

မိုဘိုင်းပိုက်ဆံအိတ်လုပ်ငန်းကဏ္ဍမှာ KBZPay ကနေ ငွေလွှဲပြောင်းမှုဟာ မတ်လအတွင်း Transaction ၅၈ သန်းကျော်နဲ့ စုစုပေါင်း ငွေကျပ် ၄.၃ ထရီလီယံကျော်အထိ သုံးစွဲသူများအတွက် ငွေလွှဲဝန်ဆောင်မှုပေးအပ်နိုင်ခဲ့ကြောင်း သတင်းထုတ်ပြန်ချက်အရ သိရပါတယ်။

ymg-mnn
#Yangon_Media_