#World_News
Published 12 March 2024
နိုင်ငံသားဖြစ်မှု ပြင်ဆင်သည့်ဥပဒေကို ရက်ပိုင်းအတွင်း အကောင်အထည် ဖော်သွားရန် အိန္ဒိယအစိုးရက မတ်လ ၁၁ ရက်နေ့မှာ ကြေညာခဲ့ပြီး ထိုဥပဒေအတွက် စည်းမျဥ်းနည်းလမ်းများကို အထွေထွေ ရွေးကောက်ပွဲမတိုင်မီ အသိပေးကြေညာလိုက်တာဖြစ်ကာ ၂၀၂၄ နိုင်ငံသားဖြစ်မှုဥပဒေစည်းမျဥ်းလို့ သတ်မှတ်လိုက်ပါတယ်။
ထိုဥပဒေကို ၂၀၁၉ ဒီဇင်ဘာ ၁၁ ရက်နေ့မှာ အိန္ဒိယပါလီမန်ကနေ ပြဌာန်းခဲ့ပါတယ်။
နိုင်ငံသားဖြစ်မှုဥပဒေ ၁၉၅၅ ကို ပြုပြင်ထားတဲ့ ဥပဒေဖြစ်ပြီး ၂၀၁၄ ဒီဇင်ဘာလမကုန်ခင် ဘာသာရေး ဖိနှိပ်ညှင်းပန်းမှုတွေကြောင့် အိန္ဒိယကို ရောက်ရှိလာခဲ့တဲ့ အာဖဂန်နစ္စတန်၊ ဘင်္ဂလားဒေ့ရှ်၊ ပါကစ္စတန်တို့မှ ဟိန္ဒူ၊ ဆစ်ခ်၊ ဗုဒ္ဓ၊ ဂျိန်း၊ ပါဆစ်၊ ခရစ်ယာန်ဘာသာ စတဲ့ လူနည်းစုဘာသာဝင်များအတွက် အိန္ဒိယနိုင်ငံသားဖြစ်မှု လမ်းကြောင်းကို ရွေးချယ်ခွင့် ပေးထားတာ ဖြစ်ပါတယ်။
ထိုနိုင်ငံတွေမှ အိန္ဒိယကိုရောက်လာတဲ့ မွတ်ဆလင်တွေတော့ မပါဝင်ပါဘူး။
စည်းမျဥ်းနည်းလမ်းများအရ ပါကစ္စတန်၊ ဘင်္ဂလားဒေ့ရှ်၊ အာဖဂန်နစ္စတန်တို့မှ စာရင်းသွင်းမှတ်တမ်းတင်ခြင်း မရှိသေးတဲ့ မွတ်ဆလင်မဟုတ်တဲ့ ပြောင်းရွှေ့လာသူများကို နိုင်ငံသားဖြစ်မှု ပေးအပ်သွားမှာ ဖြစ်ပါတယ်။
ပြည်ထဲရေးဝန်ကြီးဌာနက ယနေ့မှာ ၂၀၁၉ နိုင်ငံသားဖြစ်မှု ပြင်ဆင်ချက်ဥပဒေ (CAA-2019)ရဲ့ စည်းမျဥ်းနည်းလမ်းများကို အသိပေးကြေညာသွားမှာ ဖြစ်ကြောင်း၊ ထိုစည်းမျဥ်းများအရ CAA-2019 ဥပဒေအောက် အကျုံးဝင်တဲ့ လူတွေဟာ ၂၀၂၄ မှာ အိန္ဒိယနိုင်ငံသားဖြစ်မှု လျှောက်ထားခွင့်ရမှာ ဖြစ်ပါတယ်။
လျှောက်ထားပုံကတော့ သတ်မှတ်ထားတဲ့ ဝက်ဘ်ဆိုက်ကနေပဲ အွန်လိုင်းစနစ်ဖြင့် လျှောက်ထားရမှာ ဖြစ်ပါတယ်။
အိန္ဒိယအခြေခံဖွဲ့စည်းပုံအရ ဘာသာရေးဖိနှိပ်ခံ ဒုက္ခသည်တွေကို အခြေခံ လူ့အခွင့်အရေးများနဲ့အညီ ထောက်ပံ့ပေးခွင့်ရှိပြီး လူသားချင်းစာနာမှု ရှုထောင့်ကနေ နိုင်ငံသားဖြစ်မှု ပေးအပ်မှာ ဖြစ်ကြောင်း ပြည်ထဲရေးက ပြောကြားလိုက်ပါတယ်။
ကိုဗစ်-၁၉ ကပ်ရောဂါဘေးကြောင့် နိုင်ငံသားဖြစ်မှု ပြင်ဆင်ချက်ဥပဒေ နှောင့်နှေးနေခဲ့ရတာ ဖြစ်ပါတယ်။
အိန္ဒိယအမျိုးသားကွန်ဂရက်(INC)မှ အထွေထွေအတွင်းရေးမှူး ဂျေရမ်ရာမက်ရှ်က ထိုဥပဒေကြေညာချက်နဲ့ ပတ်သက်ပြီး လာမယ့်ရွေးကောက်ပွဲမှာ နှစ်ခြမ်းကွဲစေရန် ရည်ရွယ်ထားတယ်ဆိုတာ သိသာထင်ရှားကြောင်း ပြောကြားလိုက်ပါတယ်။
ဒေလီမြို့ရှိရဲတွေက ဒေလီအရှေ့မြောက်ပိုင်း၊ ရှာဟင်ဘဂ်၊ ဂျာမီယာနဲ့ မြို့တော်တဝိုက် အန္တရာယ်ရှိနေရာတွေမှာ လုံခြုံရေးအင်အား တိုးမြှင့်ထားပါတယ်။
၂၀၁၉ ခုနှစ်က ကြေညာချက် ထုတ်ပြန်ရာမှာ နိုင်ငံတဝှမ်း နိုင်ငံသားဖြစ်မှု ပြင်ဆင်ချက်ဥပဒေ ဆန့်ကျင်ရေးဆန္ဒပြမှုများ ဖြစ်ပေါ်ခဲ့ပြီး လူ ၁၀၀ ကျော် သေဆုံးခဲ့တယ်လို့ သတင်းတွေမှာ ဖော်ပြခဲ့ပါတယ်။
#World_News #မွတ်ဆလင်မဟုတ်သော အခြားဘာသာဝင် #နိုင်ငံသားဖြစ်မှုပြင်ဆင်သည့်ဥပဒေ #Source: WION
