#World_Health
Published 18 April 2023
ကားအသစ်ရဲ့အနံ့ကို လူအများက ကြိုက်နှစ်သက်ကြပေမယ့် တကယ်တမ်းမှာတော့ ကျန်းမာရေးအတွက် ဘေးအန္တရာယ်ရှိနေနိုင်ပါတယ်။
အဲဒီအနံ့က ကင်ဆာဖြစ်နိုင်ချေများစေကြောင်း Cell Reports Physical Science ဂျာနယ်မှာ ဖော်ပြထားပါတယ်။
ဟားဗတ်တက္ကသိုလ်နဲ့ ပေကျင်းနည်းပညာတက္ကသိုလ်တို့မှ သိပ္ပံပညာရှင်တွေက တကယ်လက်တွေ့အခြေအနေနဲ့ စမ်းသပ်လေ့လာခဲ့ကြတာပါ။
အပြင်ဘက်မှာ ၁၂ ရက်ဆက်တိုက်ရပ်ထားတဲ့ ကားအသစ်တွေထဲကလေကို လေ့လာကာ ထွက်လာတဲ့ဓာတုပစ္စည်း ၂၀ ခန့်ကို ဆင်ဆာကိရိယာများဖြင့် လေ့လာခဲ့ကြပါတယ်။
ဓာတုပမာဏတွေဟာ တရုတ်နိုင်ငံရဲ့ ကားထဲရှိလေအနေအထားစံချိန်စံညွှန်းထက် ကျော်လွန်နေတာကို သုတေသီများတွေ့ရှိခဲ့ကြပါတယ်။
ကင်ဆာဖြစ်ပွားစေတယ်လို့ သိရှိထားကြတဲ့ ဖော်မယ်ဒီဟိုက်က စံချိန်စံညွှန်းတွေထက် ၃၅ ရာခိုင်နှုန်းကျော်လွန်နေကာ အက်ဆီတယ်ဒီဟိုက်ကတော့ ၆၁ ရာခိုင်နှုန်းအထိ ကျော်လွန်နေပါတယ်။
၂၀၂၁ လေ့လာချက်အရ ကားကိုအချိန်ကြာမြင့်စွာမောင်းနှင်သူတွေဟာ ကျန်းမာရေးဆိုးကျိုးရှိနိုင်တယ်လို့ သိထားပေမယ့် ယခုသုတေသနအရ အချိန်အကြာကြီးမမောင်းဘဲနဲ့တောင် ဘေးအန္တရာယ်ရှိနေနိုင်ပါတယ်။
လူတစ်ယောက်ဟာ တစ်နေ့ကို ကားထဲမှာ မိနစ် ၃၀ မျှရှိနေရုံဖြင့် အဆိုပါကင်ဆာဓာတုပစ္စည်းတွေ လုံခြုံရေးစံညွှန်းထက်ကျော်လွန်နိုင်ချေရှိပါတယ်။
ဒါ့အပြင် ရာသီဥတုပူနွေးတဲ့အခါမှာလည်း ဓာတုပစ္စည်းပမာဏမြင့်တက်စေနိုင်ပါတယ်။
လေအပူချိန်ကို အဓိကထားပြီးလေ့လာကြတာဖြစ်ပေမယ့် သုတေသနအရ ပစ္စည်းတွေရဲ့မျက်နှာပြင်အပူချိန်ကနေ အကြီးမားဆုံးသက်ရောက်နေပါတယ်။
ဒီလေ့လာချက်တွေကနေ အခန်းတွင်းဓာတုထုတ်လွှတ်ခြင်းဖြစ်စဉ်ကို နားလည်လာစေမှာဖြစ်ကြောင်း သုတေသီများဖော်ပြခဲ့ကြပါတယ်။
Source: NY Post
#World_Health #ကားအသစ်၏အနံ့ # ကင်ဆာဖြစ်နိုင်ချေမြင့်မား #လေ့လာတွေ့ရှိ
#YMG #Yangon_Media_Group
