#LocalNews
Published -28 May 2022

ရှမ်းပြည်နယ်၊ ဆီဆိုင်မြို့နယ်နှင့်ပင်လောင်းမြို့နယ်ရှိ အကြောင်းအမျိုးမျိုးကြောင့် နေရပ်စွန့်ခွာလာရတဲ့ပြည်သူတွေကို ICRC က စားနပ်ရိက္ခာတွေထပ်မံထောက်ပံ့ပေးခဲ့တယ်လို့ ICRC Myanmar မှ ထုတ်ပြန်လိုက်ပါတယ်၊၊

မြန်မာနိုင်ငံကြက်ခြေနီအသင်း (MRCS) နဲ့အတူ လားရှိုးမြို့မှ အိုင်စီအာရ်စီအဖွဲ့တွေဟာ ပင်လောင်းနှင့် ဆီဆိုင်မြို့နယ်တွေက နေရပ်စွန့်ခွာရသူတွေဆီကို သွားရောက်ပြီး လိုအပ်နေတဲ့စားနပ်ရိက္ခာတွေကို ထောက်ပံ့ပေးခဲ့တာပါ၊၊

“ကျွန်တော်တို့အတူတကွလုပ်ဆောင်ပြီး မြို့နယ်နှစ်ခုလုံးမှာနေထိုင်တဲ့ မိသားစုပေါင်း ၂,၀၀၀ နီးပါးကို ဆန်၊ ပဲ၊ ဆီ နဲ့ ဆား တို့ကို ထောက်ပံ့ပေးနိုင်ခဲ့ပါတယ်။ အခုတစ်ခေါက်က ဆီဆိုင်နဲ့ ပင်လောင်းမြိုနယ်တွေကို ဒုတိယအကြိမ်အဖြစ် ပေးဝေတာဖြစ်ပါတယ်။ ရပ်ရွာအသိုက်အဝန်းတွေမှာ လိုအပ်ချက်တွေရှိနေသေးတာကြောင့် မကြာခင်မှာ ဒီကိုပြန်လည်ရောက်ရှိလာဖို့ မျှော်လင့်ပါတယ်” လို့ အိုင်စီအာရ်စီ လားရှိးရုံးက ဦးမာတင်ဆမ်တန် ကပြောပါတယ်။

ICRC အနေနဲ့အရေးပေါ်အကူအညီတွေပေးအပ်ခြင်းအပြင်၊ တိုက်ပွဲဖြစ်ပွားပြီးနောက် နေရပ်ပြန်လိုတဲ့ ရပ်ရွာအသိုက်အဝန်းတွေအားလုံးအတွက် မြေမြှုပ်မိုင်းနှင့် မပေါက်ကွဲသေးတဲ့ ပစ္စည်းတွေရဲ့အန္တရာယ်တွေနဲ့သက်ဆိုင်တဲ့ အသက်ကယ်အချက်အလက်တွေကို မျှဝေခဲ့ပါတယ်။

တိုက်ပွဲကြောင့် သို့မဟုတ် နေရာရွှေ့ပြောင်းမှုကြောင့် ပျောက်ဆုံးနေတဲ့ ကိုယ်ချစ်ခင်ရသူတွေနဲ့ကွဲကွာခဲ့ရသူတွေအတွက် အိုင်စီအာရ်စီရဲ့ အရေးပေါ်ဖုန်းနံပါတ်ကိုလည်း မျှဝေပေးခဲ့တယ်လို့သိရပါတယ်၊၊

ymg/tthl
#Yangon_Media_Group

#LocalNews
Published - 28 May 2022

၂၀၂၂ ခုနှစ် တက္ကသိုလ်ဝင်စာမေးပွဲအောင်စာရင်းကို လာမည့် ဇွန်လ ၁၂ ရက်တွင် ထုတ်ပြန်ကြေညာမည်ဖြစ်ကြောင်း ပညာရေးဝန်ကြီးဌာနမှ သိရသည်။

ပြီးခဲ့သည့်မတ်လတွင် ဖြေဆိုခဲ့သည့် တက္ကသိုလ်ဝင်စာမေးပွဲအောင်စာရင်းအား ဇွန်လ ၁၂ ရက်တွင် ထုတ်ပြန်ကြေညာမည်ဖြစ်ကြောင်း သိရသည်။

တက္ကသိုလ်ဝင်အောင်စာရင်းများကို အွန်လိုင်းကတဆင့်ကြည့်လိုသူများအနေဖြင့် မြန်မာနိုင်ငံစာစစ်ဦးစီးဌာန Website ဖြစ်သည့် myanmarexam.org မှ နေတဆင့်ဝင်ရောက်ကြည့်ရှုနိုင်သည်ဟု ကြေညာထားပြီး ဝင်ရောက်ကြည့်ရှုလိုသူတွေအနေဖြင့် အောင်စာရင်းကြေညာသည့်နေ့တွင် သက်ဆိုင်ရာ တိုင်းနှင့် ပြည်နယ်အလိုက်၊ မြို့နယ်အလိုက် ဝင်ရောက်ကြည့်ရှုရမည်ဖြစ်ကြောင်း သိရသည်။

၂၀၂၂ ခုနှစ် တက္ကသိုလ်ဝင်စာမေးပွဲ စာဖြေလွှာတွေကို ပြီးခဲ့သည့် မေလ ပထမအပတ်အတွင်း စစ်ဆေးခဲ့ပြီးဖြစ်ကြောင်း သိရသည်။

ymg/sth
#Yangon_Media_Group

#DailyNews
Published - 28 May 2022

၁။ လာမည့်ပွင့်လင်းရာသီတွင် တောင်တက်ခရီးစဉ်များနှင့် တောတွင်းခရီးစဉ်(Hiking)များ ပြန်လည်စတင်နိုင်ရန်မျှော်မှန်း
(တက္ကသိုလ်ခြေလျင်နှင့်တောင်တက်အသင်း၊သဘာဝခေါ်သံဖေါင်ဒေးရှင်းဥက္ကဌ ဦးမျိုးသန့်)

၂။ ပူတာအိုဒေသတွင် တိုက်ပွဲများမရှိတော့သည့်အတွက် စစ်ဘေးရှောင်ပြည်သူများနေရပ်ပြန်ကြပြီဟုဆို
ပူတာအို ဒေသခံတစ်ဦး ကချင်ပြည်နယ်

၃။ နေ့စဉ်မိုးလေဝသသတင်း။

၄။ စစ်ပွဲပဋိပက္ခကြောင့်စားနပ်ရိက္ခာဖူလုံရေးကြပ်တည်းလာသည့်အင်ဒိုနီးရှားနိုင်ငံ ...အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldPolitics
Published 28 May 2022

မလေးရှားဝန်ကြီးချုပ်ဟောင်း'မဟာသီယာမိုဟာမက်'က အမေရိကန်ဦးဆောင်တဲ့ စီးပွားရေးအဖွဲ့အသစ်ကို သောကြာနေ့ကဝေဖန်လိုက်ကာ ထိုအဖွဲ့ဖွဲ့စည်းခြင်းရည်ရွယ်ချက်က တရုတ်ကိုဖယ်ရှား ဖို့ရည်ရွယ်တာဖြစ်ပြီး တရုတ်မပါဘဲနဲ့ ဒေသတွင်းစီးပွားရေးတိုးတက်မှု အကျိုးရှိမှာမဟုတ်ဘူးလို့ ဆိုခဲ့ပါတယ်။

အမေရိကန်သမ္မတ'ဂျိုးဘိုင်ဒန်'က ယခုသီတင်းပတ်အစောပိုင်း ဂျပန်သို့လည်ပတ်စဉ် နိုင်ငံ ၁၃ နိုင်ငံပါဝင်တဲ့ အင်ဒို-ပစိဖိတ်စီးပွားရေးမူဘောင်ကို စတင်ချမှတ်ခဲ့ပါတယ်။

ဒီနည်းလမ်းဖြင့် အမေရိကန်က ကုန်ပစ္စည်းလည်ပတ်ရေးလုပ်ငန်းများ၊ ဒီဂျစ်တယ်ကုန်သွယ်ရေး၊ စွမ်းအင်ထောက်ပံ့ရေးနဲ့ အကျင့်ပျက်ခြစားမှုတိုက်ဖျက်ရေးကဏ္ဍတို့မှာ အာရှနိုင်ငံများနဲ့ ပိုမိုနီးကပ်စွာ ပူးပေါင်းဆောင်ရွက်သွားမှာဖြစ်ကြောင်း 'ဘိုင်ဒန်'ကဆိုပါတယ်။

"အမေရိကန်က တရုတ်ကိုရှောင်ကြဉ်ဖို့ ဒီလိုအဖွဲ့ဖွဲ့တာတွေအမြဲတမ်းလုပ်နေမှာပါ၊ ဒါက စီးပွားရေးအဖွဲ့ဖွဲ့တာမဟုတ်ဘဲ နိုင်ငံရေးအဖွဲ့ခွဲတယ်ဆိုတာကို နိုင်ငံအများစုကလည်း သိရှိကြမှာပါ" လို့ 'မဟာသီယာ'က တိုကျိုမြို့နိုင်ငံတကာညီလာခံမှာ ပြောကြားသွားပါတယ်။

အဖွဲ့မှာပါဝင်ဖို့လက်မှတ်ရေးထိုးကြတဲ့နိုင်ငံတွေထဲမှာ ဩစတြေးလျ၊ ဘရူနိုင်း၊ အိန္ဒိယ၊ အင်ဒိုနီးရှား၊ ဂျပန်၊ မလေးရှား၊ နယူးဇီလန်၊ ဖိလစ်ပိုင်၊ စင်ကာပူ၊ တောင်ကိုရီးယား၊ ထိုင်း၊ အမေရိကန်နဲ့ ဗီယက်နမ်တို့ပါဝင်ပြီး ထိုနိုင်ငံအားလုံးပေါင်းလိုက်ရင် တစ်ကမ္ဘာလုံးစုစုပေါင်းပြည်တွင်းထုတ်ကုန်တန်ဖိုးရဲ့ ၄၀ ရာခိုင်နှုန်းအထိရှိနေပါတယ်။

"ဒီလိုအဖွဲ့ဖွဲ့တာက သူတို့ကိုယ်တိုင်အတွက်လည်း မကောင်းပါဘူး၊ တရုတ်က မလေးရှားအတွက် အရေးကြီးတဲ့ကုန်သွယ်ဖက်နိုင်ငံဖြစ်ပါတယ်၊ တရုတ်နဲ့တင်းမာမှုတွေ ပဋိပက္ခတွေဖြစ်မှာ မလိုလားပါဘူး၊ တရုတ်နိုင်ငံကပျောက်ကွယ်သွားမှာ မဟုတ်ဘဲ ဆက်လက်တည်ရှိနေမယ်ဆိုတာကို အမေရိကန်အနေနဲ့ သဘောပေါက်ဖို့လိုပါတယ်၊ ကျွန်တော်တို့က တရုတ်နဲ့ ရှေ့ဆက်နေထိုင်သွားရမှာပါ၊ တရုတ်ကအခုဆိုရင် ကမ္ဘာပေါ်ကနိုင်ငံအများစုထက် ချမ်းသာတဲ့နိုင်ငံဖြစ်နေပါပြီ" လို့ 'မဟာသီယာ'က Nikkei Inc က စီစဉ်ပြုလုပ်တဲ့ 'အာရှအနာဂတ်'လိုခေါ်တဲ့ညီလာခံမှာ ပြောကြားခဲ့ပါတယ်။

သောကြာနေ့နှောင်းပိုင်းမှာ လက်ရှိမလေးရှားဝန်ကြီးချုပ်'အစ္စမေးလ်ဆာဘရီယာကော့'ကလည်း တိုကျိုသို့ရောက်ရှိနေပြီး ဂျပန်ဝန်ကြီးချုပ်'ဖူမီယိုကီရှီဒါ'နဲ့ တွေ့ဆုံခဲ့ပါတယ်။

သူတို့က စီးပွားရေးမူဘောင်စတင်ခြင်းကို ကြိုဆိုလိုက်ပြီး ဒီဂျစ်တယ်အသွင်ကူးပြောင်းခြင်း၊ ဆိုက်ဘာလုံခြုံရေး၊ နည်းပညာပေါ်ထွန်းခြင်း၊ ကုန်ပစ္စည်းလည်ပတ်ရေးခိုင်မာခြင်း စတဲ့နယ်ပယ်တွေမှာ ပူးပေါင်းဆောင်ရွက်ကြဖို့ကို အတည်ပြုခဲ့ကြတယ်လို့ ဂျပန်နိုင်ငံခြားရေးဝန်ကြီးဌာနက အသိပေးလိုက်ပါတယ်။

ဒေသအတွင်း စစ်ရေးနဲ့စီးပွားရေးအင်အားကြီးထွားလာတဲ့ တရုတ်ကိုတန်ပြန်ပြီး လွတ်လပ်ပွင့်လင်းတဲ့အင်ဒို-ပစိဖိတ်ဒေသဖြစ်လာဖို့ ဂျပန်နဲ့အမေရိကန်တို့ရဲ့ကြိုးပမ်းမှုကို ထောက်ပံ့ကူညီပေးရန် 'ကီရှီဒါ'က မလေးရှားကို တောင်းဆိုခဲ့ပါတယ်။

အသက် ၉၆ နှစ်ရှိပြီဖြစ်တဲ့ 'မဟာသီယာ'ဟာ မလေးရှားနိုင်ငံရဲ့ စတုတ္ထမြောက်နဲ့ သတ္တမမြောက်ဝန်ကြီးချုပ်အဖြစ် တာဝန်ထမ်းဆောင်ခဲ့ပြီး ဖွံ့ဖြိုးမှုအားနည်းတဲ့ နိုင်ငံများအတွက် နှစ်ပေါင်းများစွာထုတ်ဖော်ပြောဆိုသူဖြစ်ခဲ့ပြီး အနောက်နိုင်ငံကို အစဉ်တစိုက်ဝေဖန်ခဲ့သူဖြစ်ပါတယ်။

မလေးရှားနိုင်ငံမှာ ဩဇာသက်ရောက်တဲ့နိုင်ငံရေးပုဂ္ဂိုလ်အဖြစ်ရှိနေဆဲဖြစ်ပြီး ၁၉၅၇ ခုနှစ်နောက်ပိုင်း ပထမဆုံးငြိမ်းချမ်းစွာအာဏာလွှဲပြောင်းမှုအတွင်း အကျင့်ပျက်ခြစားမှု အရိုးစွဲနေတဲ့အစိုးရအဖွဲ့ကိုဖြုတ်ချပြီး ၂၀၁၈ ခုနှစ်သမိုင်းဝင်ရွေးကောက်ပွဲမှာ အတိုက်အခံညွန့်ပေါင်းအဖွဲ့အနိုင်ရအောင် ဦးဆောင်ခဲ့ပါတယ်။

'မဟာသီယာ'က အသက် ၉၂ နှစ်အရွယ်တုန်းက ကမ္ဘာမှာအသက်အကြီးဆုံးခေါင်းဆောင်ဖြစ်ခဲ့ပေမယ့် သူ့ရဲ့အစိုးရအဖွဲ့ဟာ အတွင်းရေးပဋိပက္ခတွေကြောင့်ပြိုလဲခဲ့ပြီး ၂၂ လသာအုပ်ချုပ်ခဲ့ရပါတယ်။

ခေါင်းဆောင်အသစ်ကိုဆန့်ကျင်ဖြုတ်ချဖို့အတွက် 'မဟာသီယာ'က ၂၀၂၀ မှာ မလေးရှားတိုင်းရင်းသားပါတီအသစ်တစ်ခုကို တည်ထောင်ခဲ့ပါတယ်။

Source: South China Morning
#Yangon_Media_Group

#Local_News
Published_ 28 May 2022

ကရင်ပြည်နယ်၊ ဘားအံမြို့နယ်တွင် ငွေကျပ် ၅ ဒသမ ၁၆ ဘီလီယံတန်ဖိုးရှိ အိုက်စ် (မက်သ်အဖက်တမင်း)များ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန် ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မေ ၁၅ ရက် ညနေ ၅ နာရီခွဲတွင် ဘားအံမြို့နယ်၊ ရန်ကုန်-မြဝတီသွားကားလမ်း၊ တရုတ်လှကျေးရွာအနီးတွင် သထုံမှမြဝတီဘက်သို့ ကျော်ဇေယျာမောင်းနှင်ပြီး ဆန်းဝင်းကျော် လိုက်ပါလာတဲ့ Alphard မော်တော်ယာဉ်ကို သတင်းအရ ရှာဖွေခဲ့ပါတယ်။

ထိုသို့ရှာဖွေရာတွင် ဒေသကာလတန်ဖိုး ငွေကျပ် ၅ ဒသမ ၁၆ ဘီလီယံတန်ဖိုးရှိ အိုက်စ်(မက်သ်အဖက်တမင်း) ၂၀၅ ကီလိုနှင့် ကတ်တမင်း ၁ ကီလို သိမ်းဆည်းရမိခဲ့ပါတယ်။

စစ်ဆေးဖော်ထုတ်ချက်အရ မေ ၁၉ ရက် မွန်းတည့် ၁၂ နာရီတွင် မန္တလေးတိုင်းဒေသကြီး၊ မဟာအောင်မြေမြို့နယ်၊ ၇၈ လမ်းရှိ ဟိုတယ်တွင် မူးယစ်ဆေးဝါးများ တာဝန်ခံသယ်ဆောင်သူ ထွန်းလင်းအောင်ကို ဆက်လက်ဖမ်းဆီးရမိခဲ့ပါတယ်။

သိမ်းဆည်းရမိမူးယစ်ဆေးဝါးများကို ရှမ်းပြည်နယ်(တောင်ပိုင်း)မှ ကရင်ပြည်နယ်သို့ သယ်ဆောင်ခဲ့ခြင်းဖြစ်ပြီး ၎င်းတို့အား ဥပဒေအရအရေးယူထားကာ ကွင်းဆက်ပြစ်မှု ကျူးလွန်သူများကို ဆက်လက်စစ်ဆေးဖော်ထုတ်လျက်ရှိကြောင်း သိရပါတယ်။

ymg-mnn
#Yangon_Media_Group

#LocalNews
Published -28 May 2022

မေလ(၃၁)ရက်တွင်ကျရောက်မယ့် ကမ္ဘာ့ဆေးလိပ်မသောက်ရေးနေ့ အခမ်းအနားမြန်မာနိုင်ငံမှာကျင်းပသွား မှာဖြစ်တယ်လို့ သိရပါတယ်၊၊

ကမ္ဘာ့ဆေးလိပ်မသောက်ရေးနေ့ အခမ်းအနားကို ကျန်းမာရေးဝန်ကြီးဌာနက ကြီးမှူးကျင်းပသွားမှာဖြစ်ပြီး ပြည်သူ့ကျန်းမာရေးဖောင်ဒေးရှင်းအနေနဲ့လည်း တက်ရောက်သွားမှာဖြစ်တယ်လို့
ပြည်သူ့ကျန်းမာရေး ဖောင်ဒေးရှင်းဥက္ကဌ ဒေါက်တာသန်းစိန်ကYMG ကို ပြောပါတယ်၊၊

"မေလ(၃၁)ရက်ဟာ ကမ္ဘာ့ဆေးလိပ်မသောက်ရေးနေ့ ဖြစ်ပါတယ်၊၊ နှစ်စဥ်ကျင်းပလေ့ရှိတဲ့ ကမ္ဘာ့ ဆေးလိပ်မသောက်ရေးနေ့ အခမ်းအနားကိုမေလ(၃၁)ရက်မှာ နေပြည်တော်မှာ ကျန်းမာရေးဝန်ကြီးဌာနက ကျင်းပဖို့ရှိပါတယ်၊၊ ဆရာတို့ပြည်သူ့ကျန်းမာရေး ဖောင်ဒေးရှင်းအနေနဲ့လည်းတက်ရောက်သွားဖို့ရှိပါတယ်"လို့ ဒေါက်တာသန်းစိန်က ပြောပါတယ်၊၊

ကမ္ဘာ့ဆေးလိပ်မသောက်ရေးနေ့ အခမ်းအနားမတိုင်မီ ပြည်သူ့ကျန်းမာရေးဖောင်ဒေးရှင်းအနေနဲ့ ပြည်နယ်နဲ့တိုင်းအသီးသီးရှိ ကျေးလက်ဒေသအချို့ကိုသွားပြီး ဆေးလိပ်၊ ဆေးရွက်ကြီးရဲ့ဆိုးကျိုးများကို အသိပညာပေးဟောပြောခြင်းတွေ ဆောင်ရွက်ခဲ့တယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published - 28 May 2022

မြန်မာနိုင်ငံစက်သုံးဆီ တင်သွင်းဖြန့်ဖြူးရောင်းချရေးအသင်းမှ Terminal များမှ တစ်ဆင့် စက်သုံးဆီ အဆက်မပြတ်ထုတ်ပေးနေသည်ဟု ဆိုသော်လည်း မြေပြင်တွင် ဝယ်ရခက်သည့် အခြေ အနေကြုံတွေ့နေရကြောင်း တက္ကစီယာဥ်မောင်းများနှင့် ကိုယ်ပိုင်ယာဥ်မောင်းနှင်သူများက ပြောသည်။

"တချို့ဆိုင်တွေမရဘူး။ ဆိုင်တွေမှာဆိုရင် 92 ဘယ်လောက် 95 ဘယ်လောက်ဆိုပြီး ရေးထားတာတွေရှိတယ်။ အဲ့လိုရေးထားတာမရှိဘူးဆိုရင် ဆီကုန်နေလို့ပဲ။ ဒီဇယ်သီးသန့်တစ်မျိုးတည်းရတော့တယ်။ ဆီစျေးကလည်း နည်းနည်းတော့တက်နေတယ်" ဟု တက္ကစီယာဥ်မောင်း ဦးအောင်ကျော်ဦးက ပြောသည်။

မေလ ၂၈ ရက် ထုတ်ပြန်ကြေညာထားသည့် စက်သုံးဆီစျေးနှုန်းမှာ ၉၅ တစ်လီတာ ၂၁၇၅ ကျပ်၊ ၉၂ တစ်လီတာ ၂၂၈၅ ကျပ်၊ ပရီမီယံဒီဇယ်တစ်လီတာ ၂၂၈၅ ကျပ်၊ ရိုးရိုးဒီဇယ်တစ်လီတာ ၂၃၁၀ ကျပ်ဖြစ်ပြီး ဆီစျေးအနည်းငယ်တတ်သွားကြောင်း သိရသည်။

"95 ကဆိုင်တိုင်းမရဘူး။ မရတာကများတယ်။ တချို့ဆိုင်တွေဆိုရင် ဆီကုန်ပြီလို့ပြောတယ်။ ဆီကလည်းတော်တော်စျေးကြီးတယ်။ ဝယ်ရတာလည်း အခက်အခဲရှိတယ်" ဟု တာမွေမြို့နယ်တွင်နေထိုင်သူ ဦးနေလင်းက ပြောသည်။

အဆိုပါကိစ္စရပ်များနှင့် ပတ်သက်၍ မြန်မာနိုင်ငံစက်သုံးဆီတင်သွင်းဖြန့်ဖြူးရောင်းချရေးအသင်းသို့ဆက်သွယ်မေးမြန်းသော်လည်း ဖုန်းလက်ခံဖြေကြားခြင်းမရှိသေးပါ။

ymg/sth
#Yangon_Media_Group

#LocalNews
Published - 28 May 2022

ပညာရေးဝန်ကြီးဌာနမှ ကျောင်းအပ်နှံခြင်းနှင့် ပတ်သက်၍ ငွေကြေးကောက်ခံမှုမပြုလုပ်ရန် ညွှန်ကြားထားပြီး မြေပြင်အခြေအနေတွင် ကောက်ခံမှုရှိနေပါက ပညာရေးဝန်ကြီးဌာနသို့ တိုင်ကြားနိုင်ကြောင်း အခြေခံပညာဦးစီးဌာန ညွှန်ကြားရေးမှူး ဦးခင်မောင်ထွေးကပြောသည်။

"အပြင်မှာကြားနေရတဲ့သတင်းတွေက အကုန်ဆန့်ကျင်ဘက်ဖြစ်နေတာပေါ့။ ကျွန်တော်တို့ညွှန်ကြားချက်ထဲမှာ အဲဒါတွေမပါဘူး။ ထောက်ခံချက်ဆိုတာက ရန်ကုန်လိုဧရိယာမှာတော့ရှိတယ်။ ကိုယ့်ဧရိယာ သူ့ဧရိယာမကျော်ရဘူးလေ။ အဲ့လိုလေးသတ်မှတ်ချက်တော့ရှိတယ်။ အချိန်မရွေးတိုင်ကြားလို့ရတယ်။ တိုင်ကြားလို့အမှန်တကယ် ဖြစ်နေရင် နိုင်ငံ့ဝန်ထမ်းဥပဒေ နည်းဥပဒေတွေနဲ့ အရေးယူဆောင်ရွက်သွားမယ်" ဟု ယင်းကပြောသည်။

၂၀၂၂-၂၀၂၃ ပညာသင်နှစ်တွင် ကျောင်းအပ်နှံမှု ပိုမိုများပြားလာပြီး ရာနှုန်းပြည့်နီးပါးအပ်နှံမည်ဟု ခန့်မှန်းထားပြီး အစိုးရစာသင်ကျောင်းအပါအဝင် ကိုယ်ပိုင်အထက်တန်းကျောင်းများတွင်လည်း အပ်နှံမှုပိုများလာကြောင်း၊ ယခုပညာသင်နှစ်အတွက် သင်ကြားမှုဆရာ ဆရာမအင်အားလျော့နည်းမှုမရှိစေရန် သင်တန်းဆင်းဆရာဆရာမများကိုခန့်အပ်ထားပြီး သတင်းစာကြော်ငြာတွင်လည်း မူလတန်း၊ အလယ်တန်း၊ အထက်တန်း အတွက် ဆရာဆရာမများခေါ်ယူခန့်အပ်ရန် စီစဥ်ထားကြောင်း သိရသည်။

ymg/sth
#Yangon_Media_Group

#LocalNews
Published -28 May 2022

တရုတ်နိုင်ငံမှလှူဒါန်းသည့် ကာကွယ်ဆေး(၁၀)သန်းအနက် နောက်ဆုံးပေးပို့ဖို့ကျန်ရှိတဲ့ကာကွယ်ဆေး (၅)သန်းကိုမေလ(၂၉) ရက်မှာ ပို့ဆောင်ပေးမှာ ဖြစ်တယ်လို့ မြန်မာနိုင်ငံဆိုင်ရာ တရုတ်သံရုံးက ထုတ်ပြန်လိုက်ပါတယ်၊၊

တရုတ်နိုင်ငံကလှူဒါန်းတဲ့ Vaccine ဆေးထိုးအပ် (၅.၄၂) သန်းဟာမေလ (၂၈)ရက်မှာ ရောက်ရှိခဲ့ပြီ ဖြစ်ပါတယ်၊၊

တရုတ်နိုင်ငံမှမြန်မာနိုင်ငံသို့ လှူဒါန်းတဲ့ အသစ်တစ်သုတ် ကိုဗစ်-၁၉ Vaccine(၁၀)သန်းနဲ့ Vaccine ဆေးထိုးအပ်(၁၃) သန်းဟာ မေလ ၁၈ ရက်နေ့မှစပြီး အသုတ်ခွဲကာ ရှေ့ဆင့် နောက်ဆင့်ပို့ဆောင်ရောက်ရှိလျက်ရှိတယ်လို့ ထုတ်ပြန်ချက်မှာဖော်ပြပါရှိပါတယ်၊၊

ymg/tthl
#Yangon_Media_Group

#Local_News
Published_ 28 May 2022

ခေတ်ကာလအရ နိုင်ငံတကာတွင် မီးရထားများကို လျှပ်စစ်ဓာတ်အား အသုံးပြု၍ ပြေးဆွဲနေကြသဖြင့် မိမိတို့နိုင်ငံတွင်လည်း လျှပ်စစ်ရထားများပြေးဆွဲနိုင်ရေး ကြိုးပမ်းဆောင်ရွက်ရန်လိုကြောင်း နစကဥက္ကဌက ပြောကြားခဲ့ပါတယ်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ယမန်နေ့ နံနက်ပိုင်းတွင် တာဝန်ရှိသူများလိုက်ပါ၍ အင်းစိန်မြို့နယ်ရှိ မြန်မာ့မီးရထား၊ စက်ခေါင်း စက်ရုံ(အင်းစိန်)သို့ သွားရောက်ကြည့်ရှုစစ်ဆေးစဉ် ပြောကြားခဲ့တာဖြစ်ပါတယ်။

လျှပ်စစ်ရထားများ ပြေးဆွဲနိုင်ရေး လိုအပ်တဲ့လျှပ်စစ်ဓာတ်အားသုံး စက်ခေါင်းများ ထုတ်လုပ်နိုင်ရေး နိုင်ငံတကာမှနည်းပညာများကို လေ့လာ၍ ပြည်တွင်း၌ ထုတ်လုပ်နိုင်သည့် ပစ္စည်းများနှင့်ပြည်ပမှဝယ်ယူရမည့် ပစ္စည်းများကိုပေါင်းစပ်၍ ပထမခြေလှမ်း အနေဖြင့် ဒီဇယ်လျှပ်စစ်သုံး(DEMU) စက်ခေါင်းများ တည်ဆောက်ထုတ်လုပ်နိုင်ရေး ကြိုးပမ်းဆောင်ရွက်မှာကြားခဲ့ပါတယ်။

ဒီဇယ်လျှပ်စစ် ရထားစက်ခေါင်းများမှတစ်ဆင့် လျှပ်စစ်ရထား(EMU)အထိပြေးဆွဲ နိုင်ရေး ကြိုတင်ပြင်ဆင်မှုများ ဆောင်ရွက်ထားရန်လိုကြောင်း၊ ယခုရန်ကုန်မြို့ပတ်ရထားလမ်းတွင် ဒီဇယ်လျှပ်စစ်သုံး ရထားများအသုံးပြု၍ မြို့ပတ်ရထားများပြေးဆွဲနေပြီး မိမိတို့နိုင်ငံတွင် လျှပ်စစ်ရထားများပြေးဆွဲနိုင်ရေး သုတေသနပြုဆောင်ရွက်ရန် မှာကြားခဲ့ပါတယ်။

ထိုမှတဆင့် တစ်နိုင်ငံလုံးရှိ အဓိကကျသည့်နေရာများကို လျှပ်စစ်ရထား အသုံးပြု ပြေးဆွဲနိုင်ရေး အဆင့်ဆင့်ကြိုးပမ်း ဆောင်ရွက်သွားရန်လိုကြောင်း၊ မီးရထား စက်ခေါင်းများနှင့် ရထားတွဲများကောင်းမွန်ရန်လိုသကဲ့သို့ ရထားလမ်းများ စနစ်တကျဖြင့် ကောင်းမွန်ချောမွေ့မှုရှိစေရေးကိုလည်း အမြဲမပြတ်ဆောင်ရွက်နေရန် မှာကြားခဲ့ပါတယ်။

တစ်နိုင်ငံလုံးလျှပ်စစ်စက်ခေါင်းများဖြင့် ပြေးဆွဲနိုင်ရေး အဓိကထားရည်မှန်း ဆောင်ရွက်ရမည်ဖြစ်သဖြင့် မီးရထားစက်ခေါင်းစက်ရုံ(အင်းစိန်)အနေဖြင့် လျှပ်စစ် စက်ခေါင်းငယ်များမှစ၍ သုတေသနပြုထုတ်လုပ်ပြီး ၎င်းမှတဆင့် အဆင့်မြှင့်တင်ခြင်းနှင့် လျှပ်စစ်စက်ခေါင်းကြီးများ ထုတ်လုပ်ခြင်းလုပ်ငန်းများကို အဆင့်ဆင့်ကြိုးပမ်း ဆောင်ရွက်သွားရန် မှာကြားခဲ့ပါတယ်။

ထို့နောက် နစကဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် မြို့ပတ်ဒီဇယ် စက်ခေါင်းရုံသို့ရောက်ရှိပြီး ဂျပန်နိုင်ငံမှရောက်ရှိလာသည့် DEMU ရထားတွဲဆိုင်း အသစ်များအား ကြည့်ရှုစစ်ဆေးခဲ့ကြောင်း သတင်းထုတ်ပြန်ထားပါတယ်။

ymg-mnn
#Yangon_Media_Group

#WorldHealth
Published 28 May 2022

လေထုညစ်ညမ်းထူထပ်တဲ့နေရာတွေမှာ နေထိုင်ရခြင်းက ကျန်းမာရေးပြဿနာအမျိုးမျိုးဖြစ်ပေါ်နိုင်ကာ အသက်အန္တရာယ်ဖြစ်စေနိုင်ကြောင်း လေ့လာတွေ့ရှိပြီး တစ်ကမ္ဘာလုံးမှာ လေထုသန့်ရှင်းမှုအရေးကြီးပုံကို ထောက်ပြခဲ့ကြပါတယ်။

ကိုလိုရာဒိုတက္ကသိုလ်၊ ဟားဗတ်တက္ကသိုလ်၊ ဘရာဇီးလ်၊ တောင်ကိုရီးယားတို့မှ ကိုယ်စားလှယ်များပါဝင်တဲ့ နိုင်ငံတကာသုတေသီအဖွဲ့က အမေရိကန်သက်ကြီးရွယ်အိုတွေဟာ ညစ်ညမ်းလေထုရှူရှိက်ရလို အသက်အန္တရာယ်အများဆုံးခံရနိုင်တဲ့လူတွေဖြစ်ကြောင်း တွေ့ရှိခဲ့ကြပါတယ်။

လေထုညစ်ညမ်းခြင်းက လူတွေကိုတိုက်ရိုက်သေဆုံးအောင်မလုပ်နိုင်ပေမယ့် အထွေထွေကျန်းမာရေးအခြေအနေကျဆင်းကာ အဆုတ်၊ ဦးနှောက်၊ နှလုံး စတဲ့နေရာအမျိုးမျိုးမှာ ပြဿနာဖြစ်လာနိုင်ပြီး အသက်သေဆုံးသည်အထိ ဖြစ်နိုင်ပါတယ်။

၂၀၁၀ မှ ၂၀၁၅ အတွင်း အမျိုးသားကျန်းမာရေးစင်တာမှ အချက်အလက်များကိုရယူပြီး အမေရိကရှိ စာရင်းပေးသွင်းထားတဲ့လူဦးရေ တည်ရှိနေရာအားလုံးနီးပါးက လေထုအမှုန်ပါဝင်မှုနှုန်းအချက်အလက်တစ်ခုကို ဖန်တီးခဲ့ကြပါတယ်။

အမေရိကန်တလျှောက် လေထုထဲအမှုန်အမွှားပါဝင်မှုနှုန်း PM 2.5 ရှိခဲ့ရာ ဒါဟာအန္တရာယ်များ လှတဲ့ပမာဏ ဖြစ်နေပါတယ်။

အမေရိကန်မှာ လေထုအမှုန်အမွှားအများဆုံး ပါဝင်တဲ့နေရာတွေက လော့စ်အိန်ဂျလိစ်၊ ဖီလာဒယ်လ်ဖီယာ၊ အိုဟိုင်ယိုနဲ့ တောင်ဘက်စွန်းစွန်းက နေရာတွေဖြစ်ပါတယ်။

လေထုထဲအမှုန်အမွှားပါဝင်မှုနှုန်းကို အနည်းဆုံးအဖြစ်အဆင့်တစ်ကနေ အများဆုံးအဆင့် ၁၀ အထိသတ်မှတ်ထားပြီး နိုင်ငံအရှေ့ဘက်နဲ့ယှဉ်ရင် လူဦးရေကျဲပါးတဲ့ အနောက်ဘက်နေရာတွေကတော့ လေထုအမှုန်အမွှားပါဝင်မှုနှုန်းအဆင့် ၁၀ ဖြစ်ပါတယ်။

အသက်အရွယ်ကြီးတဲ့ အမေရိကန်လူမျိုးတွေက နေရာဒေသတိုင်းမှာ သေဆုံးနိုင်ချေအများဆုံးသူတွေဖြစ်နေပါတယ်။

အဆင့် ၉ နဲ့ ၁၀ ရှိ နေရာတွေမှာ နေထိုင်တဲ့ အသက် ၇၅ နှစ်မှ ၈၄ နှစ်ကြားလူကြီးတွေဟာ အသက်သေဆုံးနိုင်ချေ ၁.၃၈ ရာခိုင်နှုန်းရှိပြီး အဆင့် ၁ နေရာမှာနေထိုင်တဲ့ သက်ကြီးရွယ်အိုတွေကတော့ သေဆုံးနိုင်ချေ ၁.၁၉ ရာခိုင်နှုန်းရှိပါတယ်။

အဆင့် ၉ နဲ့ ၁၀ နေရာတွေမှာနေထိုင်တဲ့ လူမည်းအမေရိကန်တွေက အသက်ရှင်သန်နိုင်ချေအများဆုံးဖြစ်ပြီး လေထုထဲအမှုန်ပါဝင်မှုအနည်းဆုံးနေရာတွေက ဆင်းရဲနွမ်းပါးသူအများစုနေထိုင်ကြတာဖြစ်ပါတယ်။

"လေထုညစ်ညမ်းမှုကို တိုက်ဖျက်ဖို့လုပ်ဆောင်ရမှာဖြစ်သလို လူသားတွေနေထိုင်တဲ့ လူမှုရေးရာ၊ လုပ်ငန်းရေးရာ၊ နိုင်ငံပထဝီရေးရာ၊ စီးပွားရေးရာတို့ကို ပြန်လည်သုံးသပ်ဖို့လိုအပ်ပါတယ်" လို့ သုတေသီများက ဖော်ပြခဲ့ကြပါတယ်။

အမေရိကန်အပါအဝင် တစ်ကမ္ဘာလုံးရှိလူတွေ လေထုညစ်ညမ်းမှုဒဏ်ကို ခံစားနေရတာဟာ စိုးရိမ်ရတဲ့ အခြေအနေကို မြင့်တက်လာပြီး အသက်သေဆုံးမှုနှုန်းပိုများလာဖွယ် ရှိနေပါတယ်။

လေထုထဲက အမှုန်အမွှားတွေက အဆုတ်ထဲသို့ဝင်ရောက်ပြီး သွေးလည်ပတ်မှုစနစ်ထဲ ရောက်ရှိကာ နှလုံးသွေးကြော၊ ဦးနှောက်သွေးကြော၊ အသက်ရှူလမ်းကြောင်းပြဿနာများဖြစ်ပွားတတ်ပါတယ်။
အခြားအင်္ဂါများနဲ့ ရောဂါများဖြစ်ပွားနိုင်တဲ့အထောက်အထားတွေလည်း ရှိနေပါပြီ။

Source: DailyMail

#Yangon_Media_Group

#Local_News
Published_ 28 May 2022

ထိုင်းနိုင်ငံသို့ MOU စနစ်ဖြင့် မြန်မာရွှေ့ပြောင်းလုပ်သား ၃၅၀ ဦး မဲဆောက် - မြဝတီ ချစ်ကြည်ရေးအမှတ် ၂ တံတားကနေ မေလ ၂၆ ရက်နေ့တွင် ထပ်မံစေလွှတ် ခဲ့ကြောင်းသိရပါတယ်။

အဆိုပါမြန်မာလုပ်သားများကို ပြည်ပအလုပ်အကိုင်အကျိုးဆောင် ပွင့်ဖူးအောင် အေဂျင်စီ၊ ယွန်းနဒီဦး အေဂျင်စီ၊ New Covenant အေဂျင်စီ ကုမ္ပဏီတို့မှ တာဝန်ယူစေလွှတ်ခြင်း ဖြစ်ကြောင်း သိရပါတယ်။

ပြည်ပအလုပ်အကိုင်အကျိုးဆောင် ပွင့်ဖူးအောင်အေဂျင်စီကုမ္ပဏီမှ တာဝန်ယူစေလွှတ်လိုက်သည့် လုပ်သား ၁၅၀ ဦးသည် ထိုင်းနိုင်ငံ၊ ဆူဖန်မြို့ရှိ ကြက်သားစက်ရုံသို့ သွားရောက်လုပ်ကိုင်ရမှာဖြစ်ပါတယ်။

ထို့အတူ ပြည်အလုပ်အကိုင်အကျိုးဆောင် ယွန်းနဒီ‌ဦး အေဂျင်စီကုမ္ပဏီမှ တာဝန်ယူစေလွှတ်လိုက်သည့် လုပ်သား ၄၉ ဦးသည် ထိုင်းနိုင်ငံ၊ နခွန်းနာယုတ်မြို့ရှိ Chuseng Farm Co., Ltd ကုမ္ပဏီပိုင် မွေးမြူရေးလုပ်ငန်းသို့ သွားရောက်လုပ်ကိုင်ရမှာဖြစ်ပါတယ်။

ပြည်ပအလုပ်အကိုင်အကျိုးဆောင် New Covenant အေဂျင်စီကုမ္ပဏီကလည်း ထိုင်းနိုင်ငံ၊ ချွန်ဘူရီမြို့ရှိ ကြမ်းခင်းအထပ်သားထုတ်လုပ်ရေးစက်ရုံသို့ လုပ်သား ၉၈ ဦးနှင့် ထိုင်းနိုင်ငံ ဘန်ကောက်မြို့ရှိ ကလေးကစားစရာ အရုပ်ချုပ်လုပ်သည့်စက်ရုံသို့ လုပ်သား ၅၇ ဦး၊ စုစုပေါင်း ၁၅၅ ဦးကို မဲဆောက် - မြဝတီ ချစ်ကြည်ရေး အမှတ် ၂ တံတားမှ စေလွှတ်ခဲ့ခြင်း ဖြစ်ကြောင်း သိရပါတယ်။

ymg-mnn
#Yangon_Media_Group