#Local_News
Published - 18 July 2022

ဗဟိုဘဏ်က ကန့်သတ်ထားတဲ့ ငွေသားထုတ်ယူမှုတွေကြောင့် ပြည်ပခရီးသွားလုပ်ငန်းတွေမှာ အခက်အခဲတွေရှိနေတယ်လို့ မြန်မာနိုင်ငံခရီးသွားလုပ်ငန်းရှင်များအသင်းကနေ သိရပါတယ်။

#Yangon_Media_Group

#DailyNews
Published - 18 July 2022

၁။ ငွေသားထုတ်ယူမှု ကန့်သတ်ချက်တွေကြောင့် ပြည်ပခရီးသွားလုပ်ငန်း အခက်ကြုံနေဟု UMTA ဥက္ကဌပြော

၂။ အိမ်သုံး Gas များ ပြတ်လုနီးပါးကြုံတွေ့နေရ

၃။ နေ့စဉ်မိုးလေဝသသတင်း။

၄။ ချွန်ထက်သည့်လက်သည်း၊ အကြေးခွံများရှိပြီးအဆိပ်ရှိသည့် ထူးခြားရှားပါးသည့် ဂွာတီမာလာပုတ်သင်များ စောင့်ရှောက်ထိန်းသိမ်းနေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 18 July 2022

လာမည့်ပြောင်းဖူးရာသီတွင် အစေ့ထုတ်ပြောင်းများကို တရုတ်နိုင်ငံသို့တင်ပို့ရန် တရုတ်ပြည်သူ့သမ္မတနိုင်ငံ အကောက်ခွန်အထွေထွေ အုပ်ချုပ်မှုအာဏာပိုင်အဖွဲ့ (GACC) တွင်မြန်မာကုမ္ပဏီ ၁၀၀ ကျော် မှတ်ပုံတင်ထားပြီးဖြစ်ကြောင်း မြန်မာနိုင်ငံ ပဲမျိုးစုံ၊ ပြောင်းနှင့် နှမ်းကုန်သည်များအသင်းမှ သိရသည်။

GACC အနေဖြင့် မြန်မာနိုင်ငံဘက်မှ ပထမအသုတ် ၈၆ ကုမ္ပဏီ၊ ဒုတိယအသုတ် ၂၂ ကုမ္ပဏီက Register လုပ်ဆောင်ထားပြီး သတ်မှတ်ချက် အောင်မြင်ကြောင်းလည်း သိရသည်။

မြန်မာနိုင်ငံမှ အစေ့ထုတ်ပြောင်းများအား တရုတ်နိုင်ငံသို့တင်ပို့နိုင်ရန် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနနှင့် GACC တို့သဘောတူညီမှု လက်မှတ်ရေးထိုးထားပြီး ဖြစ်သည်။

လက်ရှိတွင် မြန်မာ့ပြောင်းများကို ထိုင်းနိုင်ငံအပါအဝင် အခြားနိုင်ငံများသို တင်ပို့လျက်ရှိပြီး လာမည့်ပြောင်းရာသီမှ စတင်ကာ တရုတ်နိုင်ငံသို့ GACC မှတ်ပုံတင်ကာ တင်ပို့မည်ဖြစ်ကြောင်း သိရသည်။

မြန်မာ့ပြောင်းများကို နယ်စပ်ဒေသမှတဆင့် ထိုင်းနိုင်ငံသိုနှစ်စဉ် ဖေဖော်ဝါရီလမှ သြဂုတ်လအတွင်း အခွန်သက်သာခွင့်ဖြင့် တင်ပို့နေပြီးလာမည့် ပြောင်းရာသီတွင် တရုတ်နိုင်ငံသို့ပါ တင်ပို့နိုင်မည်ဖြစ်သည့်အတွက် ပြည်ပဈေးကွက်ပိုမိုရရှိလာမည်ဖြစ်ကြောင်း သိရသည်။

ymg/sth
Yangon_Media_Group

#Local_News
Published - 18 July 2022

စားအုန်းဆီ အခြေခံကာလက်ကားရည်ညွှန်းဈေးနှုန်း တစ်ပိသာ ၃၆၆၅ ကျပ်သတ်မှတ်ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်း သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ ထုတ်ပြန်ကြေညာထားသည်။

စားသုံးဆီအခြေခံလက်ကားရည်ညွှန်းစျေးကို ၃၆၆၅ ကျော် သတ်မှတ်ထားသော်လည်း စျေးကွက်တွင် တစ်ပိဿာ ၈၆၀၀ ကျပ်ဖြစ်ကြောင်း ဝယ်ယူသုံးစွဲသူများထံမှ သိရသည်။

မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းနှင့် စားသုံးဆီတင်သွင်းသော ကုမ္ပဏီများမှ ပူးပေါင်း၍ စားသုံးသူပြည်သူများသို့ အရောင်းဈေးကားများဖြင့် စားသုံးဆီများကို ယမန်နေ့(ဇူလိုင် ၁၇)ရက် မှစပြီး တိုက်ရိုက်ရောင်းချပေးနေကြောင်း သိရသည်။

စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်းတွင် ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်ရေးကို ထိန်းကျောင်းဆောင်ရွက်နေကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်း သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက ဆိုသည်။

ကော်မတီအနေဖြင့် စားအုန်းဆီအဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပိုဆောင်ခ ကုန်ကျစရိတ်၊ ဘဏ်စရိတ်၊ အခွန် အခများ ထည့်သွင်းတွက်ချက်၍ ပြည်တွင်းဈေးကွက်တွင် ရောင်းဝယ်ဖောက်ကားရမည့်အခြေခံလက်ကားရည် ညွှန်းဈေးနှုန်းကို ထုတ်ပြန်ပေးနေခြင်းဖြစ်ကြောင်း သိရသည်။

ဇူလိုင် ၁၈ ရက်မှ ၂၄ ရက်အထိ အခြေခံလက်ကားရည်ညွှန်းဈေးနှုန်းမှာ တစ်ပိဿာလျှင် ၃၆၆၅ ကျပ်အဖြစ် သတ်မှတ်ထုတ်ပြန်ထား ခြင်းဖြစ်သည်။

လက်ရှိတွင်လည်း စားအုန်းဆီများနှင့် ပတ်သက်၍ ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းများ ပြုလုပ်ပါက ဥပဒေအရ အရေးယူသွားမည်ဟု နစကဘက်မှ ထုတ်ပြန်ပြောဆိုထားသော်လည်း ပြည်သူများမှာ စားအုန်းဆီကို ဈေးနှုန်းမြင့်မားစွာဖြင့် ဝယ်ယူစားသုံးနေရခြင်းဖြစ်သည်။

ymg/sth
Yangon_Media_Group

#MyanmarNews

Published 18 July 2022

ရှမ်းပြည်နယ်( အရှေ့ပိုင်း)တာလေမြို့နယ် မြို့ရှောင်လမ်းအား ဖောက်လုပ်လျက်ရှိရာ ဇူလိုင်လ ပထမအပတ်မှ စတင်ကာ အနီးဝန်းကျင်ရှိ ရွာများတွင် နေထိုင်သူများမှာ သွားလာရခက်ခဲလျက်ရှိကြောင်း ဒေသခံများ၏ ပြောပြချက်အရ သိရှိရပါတယ်။

မြို့ရှောင်လမ်းအား ယမန်နှစ်မှစတင်ဖောက်လုပ်ခြင်းဖြစ်ကာ ယခုနှစ်ဇူလိုင်လတွင်မိုးများခြင်းကြောင့် ဗွက်ထပြီး ရွှံ့နွံများဖြင့် သွားလာရခက်ခဲလျက်ရှိကြောင်း၊ သွားလာရလွယ်ကူစေရန် မြေပိုင်ရှင်များအား လမ်းလွှဲအသုံးပြုခွင့် တောင်းခံထားရာ ခွင့်ပြုခြင်းမရရှိသဖြင့်ကျောင်းသား ကျောင်းသူများ နေ့စဉ်ကျောင်းတက်ကျောင်းဆင်းပြုရာတွင် အခက်အများဖြင့် ကြုံတွေ့နေရကြောင်း တာလေမြို့နယ်နေသူတစ်ဦးထံမှ သိရှိရပါတယ်။

အဆိုပါ မြို့ရှောင်လမ်းအနီးတွင် ဝမ်ကောင်း၊ ဝမ်ကမ်နား၊ ပါခါး (၂)၊ နာဟိုင်းလုံ၊ ဝိန်းမနော်၊ နားဟိုင်းနွဲ၊ နမ့်ခမ်းဝ၊ စိုးမြင့်၊ ကျကစသည့် ကျေးရွာ (၉)ရွာ တည်ရှိပြီး အိမ်ခြေ (၃၁၄)ခန့်နှင့် လူဦးရေ (၁)ထောင်ကျော် ဝန်းကျင်နေထိုင်နေပါတယ်။

ကျေးရွာချင်းဆက် လမ်းများပေါ်မှ မြို့ရှောင်လမ်းပေါ်သို့ ဆိုင်ကယ် ၊ကားများ မောင်းနှင်ခွင့်မပြုသည့်အတွက် ပညာရေး၊ ကျန်းမာရေး ၊ဈေးသွားဈေးလာ ကိစ္စရပ်များအား ဆောင်ရွက်ရာတွင် အခက်အခဲများစွာ ကြုံတွေ့နေရလျက်ရှိကြောင်း အုပ်ချုပ်ရေးဆိုင်ရာ တာဝန်ရှိသူတစ်ဦးကလည်းပြောပါတယ်။

ymg/ys-tcl
#Yangon_Media_Group

#Local_News
Published - 18 July 2022

တောင်ကိုရီးယား အလုပ်အကိုင်(EPS) စာမေးပွဲဝင်ရောက်ဖြေဆိုရန်လျှောက်ထားသူဦးရေ ၈,၀၀၀နီးပါးအထိ ရှိနေပြီဖြစ်ကြောင်း ပြည်ပအလုပ်အကိုင်အေဂျင်စီ(POEA) ၏ ထုတ်ပြန်ချက်အရ သိရသည်။

အဆိုပါ စာမေးပွဲဖြေဆိုခွင့်အတွက် လျှောက်လွှာများကို ဇူလိုင် ၇ရက်မှ စတင်လက်ခံခဲ့ပြီး လျှောက်ထားသူတွေအနက် စာမေးပွဲမှတ်ပုံတင်ကြေးပေးသွင်းခွင့်ရသူတွေ စာရင်းကို POEA က ထုတ်ပြန်ထားခြင်းဖြစ်သည်။

ယင်းအပြင် စာမေးပွဲမှတ်ပုံတင်ကြေးကို ဇူလိုင်လ ၁၄ ရက်မှ ၁၆ရက်အထိ တစ်ရက်လျှင် မှတ်ပုံတင်ကြေးပေးသွင်းရမည့်သူ ၂,၀၀၀ ဦး၏အမည်စာရင်းကို ထုတ်ပြန်ထားပြီး ဇူလိုင် ၁၈ရက်အတွက် ၁,၉၉၆ ဦးအမည်စာရင်းကို ကြေညာထားသည်။

အဆိုပါ စာမေးပွဲဖြေဆိုမည့်သူများ အနေဖြင့် မှတ်ပုံတင်ကြေးကို တစ်ဦးလျှင် ၂၄ဒေါ်လာပေးသွင်းရမည်ဖြစ်ကြောင်း၊ စာမေးပွဲဖြေဆိုခွင့်လျှောက်လွှာများကို ဇူလိုင် ၂၃ ရက်နောက်ဆုံးထားလျှောက်ရမည်ဖြစ်ကြောင်း POEA က ထုတ်ပြန်ထားသည်။

EPS စာမေးပွဲကို သြဂုတ်လကနေ ဒီဇင်ဘာလအထိ လုပ်ငန်းကဏ္ဍအလိုက်အသုတ်လိုက် ကျင်းပသွားမည်ဖြစ်ကြောင်း သိရသည်။

ymg/sth
#Yangon_Media_Group

#Local_News
Published_ 18 July 2022

ရန်ကုန်တိုင်းဒေသကြီး စမ်းချောင်းမြို့နယ်တွင် ငွေကျပ် ၁၆၃၆.၃ သိန်းတန်ဖိုးရှိ မူးယစ်ဆေးဝါးများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

ဇူလိုင် ၁၅ ရက် ညနေ ၆ နာရီခန့် မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များသည် သတင်းအရ သက်သေများနှင့်အတူ စမ်းချောင်းမြို့နယ်၊ စမ်းချောင်း (မြောက်)ရပ်ကွက်တွင် လမ်းလျှောက်လာသူ မင်းသူရိန်(ခ) ဘေကြီး အားစစ်ဆေး ရှာဖွေခဲ့ပါတယ်။

ထိုသို့ရှာဖွေရာတွင် ၎င်းကိုင်ဆောင်ထားသော လက်ဆွဲအိတ်အတွင်းမှ အက်တက်စီ ဆေးပြား ၁၀၀ ပြား၊ ကက်တမင်းအလေးချိန် ၅ ဂရမ်နှင့် လက်ကိုင်ဖုန်း ၁ လုံးတို့အား တွေ့ရှိသိမ်းဆည်းရမိခဲ့ပါတယ်။

ဆက်လက် စစ်ဆေးဖော်ထုတ်ချက်အရ ည ၈ နာရီအချိန်ခန့် ၎င်းနေထိုင်သည့် အဆိုပါရပ်ကွက်၊ စမ်းချောင်းလမ်းရှိနေအိမ်အတွင်းမှ အက်တက်စီဆေးပြား ၂၇၃၉ ပြား၊ ကတ်တမင်းအလေးချိန် ၂၅၀ ဂရမ်၊ စုစုပေါင်းအက်တက်စီဆေးပြား ၂၈၃၉ ပြား (ဒေသကာလပေါက်ဈေးတန်ဖိုးငွေကျပ် ၁၁၃၅.၆ သိန်း)၊ စုစုပေါင်းကက်တမင်း အလေး ချိန် ၂၅၅ ဂရမ်(ဒေသကာလပေါက်ဈေးတန်ဖိုးငွေကျပ် ၁၂၇.၅ သိန်း)နှင့် ဆေးခြောက် အလေးချိန် ၃၇.၃၂ ကီလို (ဒေသကာလပေါက်ဈေးတန်ဖိုးငွေကျပ် ၃၇၃.၂ သိန်း) တိုအား တွေ့ရှိသိမ်းဆည်းရမိခဲ့ပါတယ်။

ထိုကြောင့် မင်းသူရိန်(၃၁)နှစ်အား စမ်းချောင်းမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင် ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သတင်းထုတ်ပြန်ထားပါတယ်။

ymg-mnn
#Yangon_Media_Group

#Local_News
Published_18 July 2022

ဒေါ်အောင်ဆန်းစုကြည်ကိုစွဲဆိုထားသည့် ဦးမောင်ဝိတ်အလှူငွေပေးအပ်ခဲ့သည့် အမှုနှစ်မှု စွဲချက်တင်သင့် မတင်သင့် ယခုလ ၂၅ ရက်တွင် ဆုံးဖြတ်မည်ဖြစ်ကြောင်း တရားရုံးနှင့် နီးစပ်သည့် အသိုင်းအဝိုင်းက သိရသည်။

"ဦးမောင်ဝိတ်နဲ့ ပတ်သက်တဲ့ အမှု ၃ နဲ့ ၄ ကို ဒီနေ့စစ်ဆေးတယ်။ အဂတိက စစ်ဆေးရေးမှူး ဦးမောင်မောင်မြင့်ကို စစ်တာပါ ၊ ဦးရဲထက်တို့နဲ့ တစ်ဖွဲ့တည်းပေါ့။ ဒေါ်လာကိစ္စပဲ၊ ဦးမောင်မောင်မြင့်ကို စစ်ဆေးပြီးတော့ စွဲချက်တင်သင့် မတင်သင့်နှုတ်နဲ့ လျှောက်လဲချက်ပြောကြတယ်။ စွဲချက်မတင်သင့်ဘူးပေါ့။ လာမယ့် ၂၅ ရက်နေ့မှာ စွဲချက်အမိန့်ချမယ်။ စွဲချက်တင်မယ်၊ မတင်ဘူးပေါ့။ သက်သေတွေကတော့ ရှိသေးတယ်"ဟု တရားရုံးနှင့် နီးစပ်သူတစ်ဦးက ပြောသည်။

အဆိုပါ အမှုကို ပြီးခဲ့သည့် ဇူလိုင်လ ၁၃ရက်က တရားလွှတ်တော်သို့ ချေဖျက်ခွင့်တင်ထားခြင်းလည်း ဖြစ်ပြီး ချေဖျက်ခွင့် ရမည် မရမည်ကို မသိရသေးပေ။

ဦးမောင်ဝိတ်နှင့် ပတ်သက်သည့်အမှုများမှာ ဒေါ်ခင်ကြည်ဖောင်ဒေးရှင်းနှင့် ပတ်သက်ကြခြင်းဖြစ်ပြီး အမှု အမှတ် ၃ မှာ ဦးမောင်ဝိတ်က ဒေါ်လာ နှစ်သိန်းခွဲ လှူသည်ဆိုသည့်အမှု ဖြစ်ပြီး အမှုအမှတ် ၄ မှာ ဒေါ်လာ ၃ သိန်း လှူသည်ဆိုသည့် အမှုများ ဖြစ်ကြကြောင်းလည်း သိရသည်။

ymg/mt
#Yangon_Media_Group

Published 18 Juky 2022

ရုပ်ရှင်မင်းသမီး ဂျနီဖာလိုပက်ဇ်က သူမနှင့် ဘင် အက်ဖလက်တို့ လက်ထပ်လိုက်ကြပြီလို့ တနင်္ဂနွေနေ့က အတည်ပြုပြောဆိုပါတယ်။ လိုပက်ဇ်က သူတို့လက်ထပ်တဲ့နေ့က ပျော်ရွှင်စရာသတင်းနှင့် ဓာတ်ပုံတွေကို  ဂျေလို သတင်းလွှာနှင့်ဖြန့်ချိပေးခဲ့ပါတယ်။

“ ကျွန်မတို့လုပ်ဆောင်ခဲ့ပြီးပြီ” လို့ ပို့စ်ကို ခေါင်းစဉ်တပ်ထားပါတယ်။ ပို့စ်မှာ သူမဟာ ခင်ပွန်းသစ် အက်ဖလက်နှင့်အတူ ဗီဂက်စ်လက်ထပ်ပွဲက ပုံတွေကို တွဲတင်ထားပါတယ်။ သူမဟာ ပုခုံးလျော ဝတ်ရုံ၊ ဇာအင်္ကျီလက်နှင့်  အက်ဖလက်ကလည်း အဖြူရောင် tuxedo နှင့် ဘိုတိုင်အနက်ရောင်နှင့်ဖြစ်ပြီး သူမရဲ့ပါးပြင်ကို မွှေးမွေးပေးခဲ့ပါတယ်။ သူတို့နှစ်ဦးစလုံး လက်ထပ်လက်စွပ်တွေ ဝတ်ဆင်ထားကြပါတယ်?

“ကျွန်မတို့လုပ်ဆောင်ခဲ့ပြီ။ အချစ်ဟာ လှပတယ်။ အချစ်ဟာ ကြင်နာတယ်။  ပြီးတော့ အချစ်ဟာ စိတ်ရှည်တယ်။ နှစ်နှစ်ဆယ်တိတိစိတ်ရှည်တယ်” လို့ လိုပက်ဇ်ကရေးသားထားပါတယ်။

“ဒီပွဲလေးဟာ ကျွန်မတိုလုပ်ချင်တဲ့အတိုင်းကွက်တိပဲ။ မနေ့ညကကျွန်မတို့ ဗီဂက်စ်ကို လေယာဉ်နှင့်သွားတယ်။ စုံတွဲလေးတွဲနှင့်အတူ လက်ထပ်လိုင်စင်အတွက် တန်းစီတယ်။ ကျွန်မတို့နောက်မှာ အမျိုးသားနှစ်ဦးက လက်ချင်းတွဲထားကြတယ်။ ကျွန်မတို့ရှေ့မှာ သူတို့ရဲ့သမီးကလေး (၂)နှစ်ပြည့်မွေးနေ့မှာ ဗစ်တိုဗီလီကနေ သုံးနာရီကြာ ကားမောင်းလာခဲ့ရတဲ့ ငယ်ရွယ်တဲ့ စုံတွဲတစ်တွဲရှိတယ်” လို့ သူမကပြောပါတယ်။

သူတို့နှစ်ဦးဟာ ၂၀၀၄ခုနှစ် ဇန်နဝါရီမှာ ပထမစေ့စပ်ပွဲပျက်ပြီးနောက် မနှစ်ကပြန်တွဲခဲ့ကြပါတယ်။ ဒီနှစ်ဧပြီလမှာတော့ အသက် ၄၉နှစ်အရွယ် အက်ဖလက်က အသက်၅၂နှစ်ရှိပြီဖြစ်တဲ့ လိုပက်ဇ်ကို ထပ်ပြီး လက်ထပ်ဖို့ကမ်းလှမ်းခဲ့ပါတာဖြစ်ပါတယ်။

#Source_Yahoo

#Jennifer_Lopez_marries_Ben_ Affleck

#Celebrities_wedding

#Local_News
Published - 18 July 2022

(၁)နှစ်ကျော်အတွင်း ငွေကြေးဖောင်းပွမှုနှုန်း (၇) ရာခိုင်နှုန်းအထိ မြင့်တက်လာကြောင်း ဗဟိုစာရင်းအင်းအဖွဲ(CSO) ရဲ့ သုံးလပတ်စာရင်းအင်းစာစောင်တွင် ဖော်ပြထားသည်။

၂၀၂၁ အာဏာအလွှအပြောင်းနောက်ပိုင်း ဖေဖော်ဝါရီလတွင် ဖြစ်ပေါ်ခဲ့သည့်ငွေကြေးဖောင်းပွမှုနှုန်းသည် ၂ ဒသမ ၆၁ ရာခိုင်နှုန်းသာ ရှိခဲ့ပြီး ၂၀၂၂ မီနီဘတ်ဂျတ်ကုန်ဆုံးခဲ့သည့် မတ်လတွင် ငွေကြေးဖောင်းပွမှုနှုန်းသည် ၉ ဒသမ ၅၇ ရာခိုင်နှုန်းအထိ ဆက်တိုက်မြင့်တက်လာခဲ့ ကြောင်း ဖော်ပြထားသည်။

ကုန်ပစ္စည်းနှင့် ဝန်ဆောင်မှုများ၏ ဈေးနှုန်းမြင့်တက်လာခြင်းသည် ငွေကြေးဖောင်းပွမှု ဖြစ်ပေါ်ရခြင်း၏ အဓိကအကြောင်းအရင်းဖြစ်ပြီး ကျပ်ငွေတန်ဖိုးဆက်တက်ကျဆင်းလာချိန် နိုင်ငံခြားငွေ အလုံ အလောက်မရှိခြင်းသည်လည်း ငွေကြေးဖောင်းပွမှုကို မြင့်တက်စေနိုင်ကြောင်း သုံးသပ်ထားသည်။

ငွေကြေးဖောင်းပွမှုနှုန်း မြင့်တက်လာမှုကြောင့် စားအုန်းဆီ၊ စက်သုံးဆီ၊ ဆေးဝါးကဲ့သို့ နိုင်ငံခြားငွေအများအပြားသုံးစွဲပြီး တင်သွင်းရသည့် ကုန်ပစ္စည်းများကို ဈေးကြီးပေးဝယ်ခဲ့ရပြီး လက်ရှိတွင် ပြည်ပတင်သွင်းမှုအပေါ် မှီခိုနေရသည့် စားအုန်းဆီတစ်ပိဿာ ကျပ် ၈၀၀၀ အထိ မြင့်တက်လာနေခြင်းဖြစ်ကြောင်း သိရသည်။

ယင်းအပြင် နှစ်အလိုက် ငွေကြေးဖောင်းပွမှု ကြည့်ပါက ၂၀၂၁-၂၀၂၂ ဒုတိယသုံးလပတ်တွင် ၁၅ ဒသမ ၀၆ ရာခိုင်နှုန်းကို ရောက်ရှိခဲ့ပြီး ၂၀၂၀-၂၀၂၁ ဘဏ္ဍာနှစ် သုံးလပတ်တွင် ဖြစ်ပေါ်ခဲ့သည့် ၁ ဒသမ ၆၃ ရာခိုင်နှုန်းဖြင့် နှိင်းယှဉ်ပါက အဆမတန် မြင့်တက်လာကြောင်း ဖော်ပြထားသည်။

ymg/sth
#Yangon_Media_Group

Published 18 July 2022

ဆားဘီးယားမှ ဘင်္ဂလားဒေ့ရှ်သို့ပေးပို့တဲ့ လက်နက်ခဲယမ်းမီးကျောက်တွေ သယ်ဆောင်လာတဲ့ ယူကရိန်း ကုန်တင်လေယာဉ် တစ်စီး စနေနေ့က ဂရိနိုင်ငံမြောက်ပိုင်းမှာ ပျက်ကျခဲ့ရာ လေယာဉ်အမှုထမ်း(၈)ဦးစလုံး သေဆုံးသွားခဲ့တယ်လို့ ဂရိနှင့် ဆားဘီးယား အာဏာပိုင်တွေက တနင်္ဂနွေနေ့က ထုတ်ဖော်ပြောကြားပါတယ်။

ဒေသစံတော်ချိန် ညသန်းခေါင်ခန့်မှာ လေယာဉ်ဟာ ပြောင်းဖူးခင်းထဲ ပျက်ကျပေါက်ကွဲမှုမဖြစ်ခင်  မီးလျှံအလုံးကြီးနှင့်အတူ ငိုက်ဆင်းကျလာတာဖြစ်တယ်လို့ မျက်မြင်သက်သေတွေက ပြောပါတယ်။ စောစောပိုင်းမှာတော့ လေယာဉ်မှူးက အင်ဂျင်ချို့ဃွင်းနေနှင့် အရေးပေါ်ဆင်းသက်ဖို့ သတင်းပေးပို့ခဲ့ပါသေးတယ်။

အခင်းဖြစ်ပွားရနေရာကို ဒရုန်းနှင့်ရိုက်ကူထားသော ပုံတွေမှာ ကွင်းတလျောက် အဲဒီကုန်တင်လေယာဉ် Antonov An-12 ရဲ့ အပျက်အစီးအစိတ်အပိုင်းတွေ ပြန့်ကျဲကျနေပြီး မီးတစ်ငွေ့ငွေ့လောင်ကျွမ်းနေတာတွေ့ရပါတယ်။

အဆိုပါလေယာဉ်ကို စီမံလုပ်ဆောင်တဲ့ ယူကရိန်းအခြေစိုက်တဲ့ မာရီဒီယန်လေကြောင်းလိုင်းက  ပျက်ကျမှုကြောင့် အမှုထမ်း(၈)ဦးစလုံး သေဆုံးခဲ့တာကို အတည်ပြုပါတယ်။  အားလုံးဟာ ယူကရိန်းနိုင်ငံသားတွေဖြစ်တယ်လို့ ယူကရိန်း နိုင်ငံခြားရေးဝန်ကြီးဌာနက ပြောပါတယ်။

ဂရိအာဏာပိုင်တွေဟာ အခုထက်ထိ အလောင်းတစ်လောင်းပဲပြန်ရပါသေးတယ်လို့ မြို့ပြကာကွယ်ရေးဌာနရဲ့ ပြောရေးဆိုခွင့် ရသူတစ်ဦးက ပြောပါတယ်။ ကနဦး ဒရုန်းဖြင့် စစ်ဆေးမှုများအရ အဲဒီနေရာတစ်ဝိုက်မှာ အလောင်း(၆)လောင်း တည်ရှိတဲ့နေရာတွေ သိရှိခဲ့ပြီးဖြစ်တယ်လို့ ဒေသဆိုင်ရာ မြို့တော်ဝန်တစ်ဦးကလည်းပြောပါတယ်။

လေယာဉ်ဟာ ဆားဘီးယားကာကွယ်ရေး ဝန်ကြီးဌာနက ထုတ်လုပ်တဲ့ မော်တာစိန်ပြောင်း တွေနှင့်အမြောက်ဆံတွေအပါအဝင် ပစ္စည်းတွေ စုစုပေါင်း တန်ချိန် ၁၁.၅တန်ကို သယ်ဆောင်သွားတာဖြစ်တယ်လို့  ဆားဘီးယားကာကွယ်ရေးဝန်ကြီး နီဘိုချာ စတီဖန်နိုဗစ်က ပြောပါတယ်။ဒီခဲယမ်းမီးကျောက်တွေကို ဘင်္ဂလားဒေ့ရှ် ကာကွယ်ရေးဝန်ကြီးဌာနက ဝယ်ယူတာလို့လည်း သူကဖြည့်စွက်ပြောပါတယ်။

#Source_Reuters

#Ukrainian_cargo_plane_crash

#Plane_carrying_munitions_from_Serbia_to_Bangladesh_Crash

#Aviation_accidents

#Local_News
Published _ 18 July 2022

ပြီးခဲ့သည့် ရော်ဘာအစေး ခြစ်ရာသီမှ လက်ရှိအချိန်အထိ ပြည်တွင်း၊ပြည်ပ ဈေးကွက်၌ ရော်ဘာဈေးကောင်းရရှိနေခြင်းကြောင့် ယခုနှစ်တွင် တိုင်းဒေသကြီးနှင့် ပြည်နယ်အများစု၌ ရော်ဘာမျိုးကောင်းမျိုးသန့်များ အစားထိုး စိုက်ပျိုးမှုများပြားလာကြောင်း သိရသည်။

ယခုနှစ်များတွင် ရော်ဘာ ဈေးကောင်းလာသောကြောင့် ယခင်က အရည်အသွေးနိမ့်ကျသော ရော်ဘာမျိုးများ၊ ဒေသနှင့် မကိုက်ညီသော ရော်ဘာမျိုးများ စိုက်ပျိုးထားကြသော ခြံများ၌၊ ရော်ဘာမျိုးကောင်း မျိုးသန့်များ အစားထိုး စိုက်ပျိုးလာကြခြင်းဖြစ်ပြီး၊ ကျန်ရှိနေသော ရော်ဘာခြံများတွင်လည်း အရည်အသွေးနှင့် အထွက်နှုန်းကောင်းသော ရော်ဘာမျိုးများ အစားထိုးစိုက်ပျိုးရန် စီစဉ်ဆောင်ရွက်လာကြကြောင်း သိရသည်။

"ဒီတစ်နှစ်၊ နှစ်နှစ်အတွင်းမှာ ရော်ဘာဈေးတွေ တက်လာတော့ ရော်ဘာခြံရှင်တွေက ရော်ဘာမျိုးကောင်း မျိုးသန့်တွေ အစားထိုး စိုက်ပျိုးလာကြပြီး ဒီနှစ်မှာဆိုရင် ရော်ဘာ ခြံငယ်တော်တော်များများ မှာ အစားထိုး စိုက်ပျိုးလာကြတာကို တွေ့ရတယ်။ အဲဒီလို စိုက်ပျိုးတဲ့အခါမှာ အဓိကအားဖြင့် ဒေသနှင့်ကိုက်ညီတဲ့ ရော်ဘာမျိုးကောင်းမျိုးသန့်တွေ၊ ကိုင်းကူးမျိုးတွေရဖို့ လိုအပ်တယ်"ဟု ဦးခိုင်မြင့်က ပြော သည်။

ယင်းကဲ့သို့ အစားထိုးဆောင်ရွက်ရာတွင် ပြည်ပဝင်ငွေရရှိစေရေး အတွက် အရည်အသွေးကောင်းသော ရော်ဘာမျိုးများကို အစားထိုး စိုက်ပျိုးထုတ်လုပ်နိုင်စေရန် သက်ဆိုင်ရာ အစိုးရဌာနများမှနေ၍ ရော်ဘာခြံလုပ်ငန်းရှင်များ ကို ပံ့ပိုးကူညီဆောင်ရွက်သွားမည်ဖြစ်ကြောင်း သိရသည်။

မြန်မာနိုင်ငံတွင် ရော်ဘာခြံများကို မွန်ပြည်နယ်တွင် အများဆုံးစိုက်ပျိုးကြပြီး ကရင်ပြည်နယ်၊ တနင်္သာရီတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး စသည့် ပြည်နယ်နှင့် တိုင်းဒေသကြီးများတွင်လည်း အများအပြား စိုက်ပျိုးထားကြကြောင်း၊ ယခုနောက်ပိုင်း ရှမ်းပြည်နယ်၊ ကချင်ပြည်နယ်နှင့် စစ်ကိုင်းတိုင်းဒေသကြီးတို့တွင်လည်း ရော်ဘာခြံများ တိုးချဲ့စိုက်ပျိုးလာကြကြောင်း သိရသည်။

ယခု တစ်နိုင်ငံလုံး၌ ရော်ဘာစိုက်ပြီးသော ဧကပေါင်းတစ်ဆယ့်ခြောက်သိန်းလေးသောင်းကျော်ရှိပြီး လက်ရှိတွင် ရော်ဘာထုတ်လုပ်နိုင်သော ဧကပေါင်း ရှစ်သိန်းခွဲအထိရှိပြီး မြန်မာနိုင်ငံတွင် တစ်နှစ်လျှင် ရော်ဘာတန်ချိန် သုံးသိန်းကျော် ထုတ်လုပ်နိုင်ကာ ပြည်တွင်း၌ ရှစ်ရာခိုင်နှုန်းသာသုံးစွဲ၍ ပြည်ပသို့ အမြောက်အမြား တင်ပို့နေခြင်းကြောင့် ပြည်ပဝင်ငွေ အများအပြား ရှာဖွေပေးနိုင်သော ထုတ်ကုန်တစ်မျိုးဖြစ်ကြောင်း သိရသည်။

ymg/NN
#Yangon_Media_Group