Published 24 May 2022

ထရမ့်အစိုးရလက်ထက်က အကောက်ခွန်ကောက်ခံခဲ့တဲ့ တရုတ်ပစ္စည်းတွေကို  အခွန်ကောက်ခံမှု ပြန်ရုပ်သိမ်းပေးဖို့ သူစဉ်းစားနေတယ်လို့ အမေရိကန်သမ္မတ ဂျိုးဘိုင်ဒင်ကပြောပါတယ်။

ဂျပန်နိုင်ငံ တိုကျိုမြို့မှာ ဂျပန်ဝန်ကြီးချုပ် ဖူမီယိုကီရှီဒါနှင့် ပူးတွဲသတင်းစာရှင်းလင်းပွဲမှာ ဘိုင်ဒင်က ယခုလိုပြောကြားခဲ့တာ ဖြစ်ပါတယ်။

“ ကျွန်တော် ဒါကို စဉ်းစားနေတယ်။ ဒီကုန်ပစ္စည်းတွေကို ကျွန်တော်တို့ အကောက်ခွန်ကောက်ခဲ့တာမဟုတ်ဘူး။ ပြီးခဲ့တဲ့ အစိုးရလုပ်ခဲ့တာ။ အဲဒါကို ကျွန်တော်တို့ စဉ်းစားနေတယ်” လို့ ဘိုင်ဒင်ကပြောပါတယ်။

၂၀၁၈ခုနှစ်မှာ ထရမ့်အစိုးရက တရုတ်ကုန်ပစ္စည်းတွေကို စတင်အခွန်ကောက်ခဲ့တာပါ။ တရုတ်က အမေရိကန်ကိုတင်ပို့တဲ့ ပစ္စည်းအားလုံးရဲ့ သုံးပုံနှစ်ပုံကို အမေရိကန်က သွင်းကုန်အခွန် ၂၅ ရာခိုင်နှုန်းကောက်ခံခဲ့တာဖြစ်တယ်လို့ ဝါရှင်တန်ပို့စ်က ရေးသားပါတယ်။

အမေရိကန်ရဲ့ငွေကြေးဖောင်းပွမှုတွေရှိနေတဲ့ကြားထဲတွင် အမေရိကန်ဘဏ္ဍာရေးဝန်ကြီး ဂျက်နက်ယီလင်က အချို့သော ကုန်ပစ္စည်းတွေကို အကောက်ခွန်ပြန်ရုပ်သိမ်းပေးဖို့ စဉ်းစားနေတယ်လို့ ဗုဒ္ဓဟူးနေ့က ပြောကြားအပြီး ယခုသတင်းထပ်မံ ထွက်ပေါ်လာတာဖြစ်ပါတယ်။

၂၀၂၂ခုနှစ်မတ်လမှာ အမေရိကန်ရဲ့ ငွေကြေးဖောင်းပွမှုဟာ ၄၁နှစ်အတွင်း အမြင့်ဆုံးသို့ရောက်ရှိခဲ့တယ်လို့ Insider က ယခင် သတင်းရေးသားခဲ့ပြီးဖြစ်ပါတယ်။

မေ၁၈ရက် ဂျာမနီမှာပြုလုပ်တဲ့ သတင်းစာရှင်းလင်းပွဲမှာ ထရမ့်အစိုးရက တရုတ်ပစ္စည်းတွေ အခွန်စည်းကြပ်ခဲ့တာကို ဝန်ကြီးယီလင်က အပြစ်တင် ဝေဖန်ခဲ့ပါတယ်။

“ တရုတ်ရဲ့ မမျှတတဲ့ကုန်သွယ်ရေးလက်တွေ့လုပ်ဆောင်မှုတွေကို လက်စားချေတဲ့အနေနှင့် သမ္မတထရမ့်က  အချို့ကုန် ပစ္စည်းတွေကို အခွန်စည်းကြပ်ခဲ့တယ်လို့ ကျွန်မအရင်ကပြောပြီးပါပြီ။ ကျွန်မအတွက်တေ့ ဒီလိုအခွန်ကောက်တာဟာ စားသုံး  သူတွေနှင့် စီးပွားရေးလုပ်ငန်းတွေကို ပိုထိခိုက်စေတယ်လို့ ထင်မိပါတယ်” လို့သူမက ပြောပါတယ်။

တရုတ်နှင့်ကျွန်မတို့ဖြစ်နေတဲ့ တကယ့် ပြဿနာတွေနှင့် လက်ရှိအခွန်စည်းကြပ်မှုတွေက သိပ်ပြီး မဟာဗျူဟာမကျဘူးလို့ ကျွန်မထင်တယ် လို့ သူမကပြောပါတယ်။

အမေရိကန်ကို သူပြန်ရောက်တဲ့အခါ ယီလင်ကို အဲဒီအခွန်ကိစ္စပြောမယ်လို့ ဘိုင်ဒင်က တိုကျို သတင်းစာရှင်းလင်းပွဲမှာ ပြောခဲ့ပါတယ်။

Source Insider

#DailyNews
Published - 24 May 2022

၁။ ရွှေတိဂုံစေတီရှိပျက်စီးနေသည့် မြန်မာမှုပန်းပုရုပ်ကြွများကို အစားထိုးလဲလှယ်မည်၊ မူရင်းရုပ်ကြွများကို ပြတိုက်တွင်ထားမည်။

၂။ ပုဂံရှေးဟောင်းယဉ်ကျေးမှုဇုန်အတွင်း ခွင့်ပြုချက်မဲ့လူနေတဲအိမ်များကို ဖယ်ရှားရန်စီစဉ်။

၃။ နေ့စဉ်မိုးလေဝသသတင်း။

၄။ ဂျပန်နိုင်ငံမှ ကျည်ဆံရထားတွဲတစ်တွဲတွင် အိမ်မွေးခွေးလေးများကို လိုက်ပါစီးနင်းခွင့်ပြု ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published -24 May 2022

စိုင်းထီးဆိုင်ရေးသားထားတဲ့ သီချင်းတွေကို Studio မှာတီးခတ်အသံသွင်းပြီး ခွင့်မတောင်းဘဲ အွန်လိုင်းပေါ်တင်ထားခြင်းကို ပြန်ဖြုတ်ချပေးရန် သမီးဖြစ်သူက တောင်းဆိုထားတယ်လို့ သိရပါတယ်၊၊

စိုင်းထီးဆိုင်ရဲ့သမီးဖြစ်သူက "ကျမရဲ့အဖေ တေးသံရှင် စိုင်းထီးဆိုင် ရေးသားခဲ့သော တေးသီချင်းများကို cover song အနေဖြင့် သီဆိုခွင့်ပြုမှာ မဟုတ်ပါကြောင်း (ပရိတ်သတ်များမှ အပျော်သဘော ဂစ်တာဖြင့်ဖြစ်စေ piano ဖြင့်ဖြစ်စေ ကိုယ်တိုင်တီးဆိုပြီး facebookတင်ခြင်းမှလွဲ၍ ခွင့်မပြုပါ) Studioတွင် တီးခတ်အသံသွင်း MV, Lyric Video များပြုလုပ်ပြီး Facebook , You Tube,နှင့် အခြား social mediaများတွင် ခွင့်မတောင်းပဲ အသုံးပြုသီဆိုခွင့် တင်ခွင့်မရှိပါဘူး၊ တင်ထားပြီးသားရှိနေခဲ့ရင်လဲ ပြန်လည်ဖြုတ်ချပေးပါရှင်၊ ဆက်လက်တွေ့ရှိနေရမယ်ဆိုရင် တရားဥပဒေအရ အရေးယူမှာ ဖြစ်ပါတယ်၊၊ အဖေရေးထားသော သီချင်းများကိုသာ သီးသန့်ရည်ရွယ်ခြင်းဖြစ်ပါသည်၊၊ ဆရာစိုင်းခမ်းလိတ်နှင့် အခြားတေးရေးဆရာများ ရေးသားသောသီချင်းများကို ရည်ရွယ်ခြင်းမဟုတ်ပါ"လို့ သူ့ရဲ့ လူမှုကွန်ရက်စာမျက်နှာ Hseng sam မှာ ရေးသားဖော်ပြထားပါတယ်၊၊

ymg/tthl
#Yangon_Media_Group

Published 24 My 2022

ရုရှားရဲ့ ရူဘယ်ငွေကြေးဟာ တနင်္လာနေ့က ယူရိုထက် ၆ရာခိုင်နှုန်း ပိုခိုင်မာသွားပြီး ဒါဟာ ၇နှစ်အတွင်း တန်ဖိုးအမြင့်ဆုံး တက်လာတာဖြစ်ပါတယ်။ အရင်းအနှီးထိန်းချုပ်မှုတွေ၊လောင်စာဆီဈေးကောင်းနေတာနှင့် လာမယ့် အခွန်ကာလအဆုံး သတ် တော့မှာတွေကြောင့်ဖြစ်တယ်လို့ ရိုက်တာကရေးပါတယ်။

တနင်္လာနေ့ 1338 GMT အချိန်မှာ ရူဘယ်မှာ ၆.၃ ရာခိုင်နှုန်းမြင့်တက်လာပြီး တစ်ယူရိုကို  ရူဘယ်၅၈.၇၅ အထိရောက်ရှိလာတာပါ။ဒါဟာ ၂၀၁၅ခုနှစ် ဇွန်လအစောပိုင်းနောက်ပိုင်း အမာဆုံးဖြစ်ပါတယ်။

ဒေါ်လာနှင့်လဲလှယ်နှုန်းကလည်း ၅၇.၄၇ ဖြစ်လာပါတယ်။ ၂၀၁၈ မတ်လနှောင်းပိုင်းကနေဆိုရင် ဒါဟာ အမြင့်ဆုံးပါ။

ရုရှားမှာ စီးပွားရေးအကျပ်အတည်းတွေဖြစ်နေတဲ့ကြားထဲက ဒီနှစ်မှာ ရူဘယ်ဟာ ဒေါ်လာနှင့်ယှဉ်ရင် ၃၀ရာခိုင်နှုန်းပိုမာလာခဲ့ပြီး  ကမ္ဘာမှာအကောင်းဆုံးစွမ်းဆောင်နိုင်တဲ့ ငွေကြေးအဖြစ်ရောက်ရှိလာတယ်လို့ ရိုက်တာက သတင်းဖော်ပြပါတယ်။

ရုရှားရဲ့ ရွှေနှင့်နိုင်ငံခြားငွေံကြေး တစ်ဝက်နီးပါးခန့် ထိန်းချုပ်ခံရပြီးနောက် ပို့ကုန်ဦးစားပေးကုမ္ပဏီတွေဟာ သူတို့ရဲ့နိုင်ငံခြာငွေကြေးတွေကို  ရူဘယ်နှင့်လဲလှယ်ပေးကြရပါတယ်။

ရုရှားရဲ့ဗဟိုဘဏ်နှင့် အစိုးရဟာ ကန့်သတ်မှုတွေ ပြုလုပ်နေစဉ်မှာ ရူဘယ်ဟာ ကာလလတ်မှာ ဆက်လက်ခိုင်မာ အားကောင်းနေဦးမှာဖြစ်တယ်လို့ Tinkoff Investments analysts ကပြောပါတယ်။

“ ဆောင်းဦးရာသီနီးလာလို့  သွင်းကုန်တွေပြန်လည်သက်ဝင်လာပြီး ကန့်သတ်မှုတွေ ရုပ်သိမ်းတဲ့အခါ ငွေကြေးလဲလှယ်နှုန်းတွေဟာ ၆၀နှင့် ၆၅ အဆင့်လောက်မှာ စပြီးတည်ငြိမ်သွားမယ်” လို့ သူတို့ကပြောပါတယ်။

နှစ်ကုန်မှာ တစ်ဒေါ်လာ ၇၀နှင့် ၈၀ရူဘယ်ကြား အားပျော့မသွားခင် ယခုတစ်လအတွင်း ရူဘယ်ဟာ တစ်ဒေါ်လာကို ၅၅ ရူဘဘ်အထိမာလာနိုင်တယ်လို့လည်း Otkritie ဘဏ်ကပြောပါတယ်။

ရုရှားက နိုင်ငံခြားက ဓာတ်ငွေ့ဝယ်ယူသူတွေကို ရူဘယ်နှင့်ပေးချေဖို့ တောင်းဆိုထားတာကလည်း ရူဘယ်ရဲ့လက်ရှိ မာလာမှုကို အထောက်အကူပြုနေပါတယ်လို့ သုံးသပ်သူတွေက ပြီးခဲ့တဲ့အပတ်ကပြောထားပါတယ်။

ရူဘယ်ငွေကြေး ထိန်းမရလောက်အောင်ခိုင်မာလာမှာစိုးတဲ့အတွက် ရုရှားဗဟိုဘဏ်က နိုင်ငံခြားငွေတွေ လိုက်ဝယ်နေတယ်လို့ ဗီဒိုမိုစတီသတင်းစာကရေးပါတယ်။ ဗဟိုဘဏ်ကနေ အဲဒီရေးသားမှုဟာ လက်ရှိအခြေအနေတွေနှင့် ကိုက်ညီမှုမရှိဘူးဆိုပြီး ပြန်ငြင်းဆိုထားပါတယ်။

Source Reuters

Published 24 May 2022

မြောက်ကိုးရီးယားခေါင်းဆောင် ကင်မ်ဂျုန်အန်ဟာ ပြုံယမ်းမှာပြုလုပ်တဲ့ ကွယ်လွန်သူ ကိုးရီးယားပြည်သူ့တပ်မတော်ရဲ့မာရှယ်ယွန်ချိုဟေးရဲ့ ဈာပနကို ကိုယ်တိုင်တက်ရောက်ပြီး ခေါင်းတလားကိုပါ ကိုယ်တိုင်သယ်ဆောင်သင်္ဂြိုလ်ပေးခဲ့ပါတယ်။

တနင်္ဂနွေနေ့ကပြုလုပ်တဲ့ အဆိုပါဈာပနအခမ်းအနားကို မြောက်ကိုးရီးယား အစိုးရမီဒီယာက ထုတ်ပြန်ခဲ့တာဖြစ်ပြီး ကွယ်လွန်သူ မာရှယ်ယွန်ချိုဟေးဟာ ကင်မ်ဂျုန်အန်ရဲ့ ဆရာတစ်ဦးဖြစ်ခဲ့ပြီး ဖခင်ကင်ဂျုန်အီလ် ၂၀၁၁ခုနှစ်မှာသေဆုံးတဲ့အခါ သူ့အရိုက်အရာကို ကင်မ်ဂျုန်အန်ဆက်ခံနိုင်အောင်ပြင်ဆင်ပေးခဲ့သူလို့ သိထားကြပါတယ်။သူဟာ ကာကွယ်ရေးဝန်ကြီးဌာနရဲ့ အထွေထွေအကြံပေးပုဂ္ဂိုလ်တစ်ဦးလည်းဖြစ်ပါတယ်။

ကိုဗစ်ကူးစက်မှုတွေမြင့်မားနေတဲ့ မြောက်ကိုးရီးယားမှာ ခေါင်းဆောင် ကင်မ်ဟာ ဈာပနအခမ်းအနားမှာ maskတပ်ဆင်ခြင်း မရှိဘဲ အခြားအရာရှိကြီးတွေနှင့်အတူ ခေါင်းတလားကိုသယ်ဆောင်ခဲ့တာပါ။

Source AFP

#Local_News
Published_ 24 May 2022

တောင်ကိုရီးယားနိုင်ငံက မြန်မာအလုပ်သမားများအား ပြန်လည်လက်ခံနေရာ ဒီကနေ့ မေ ၂၅ ရက်တွင် အလုပ်သမား ၁၃၀ ဦး အင်ချွန်းလေဆိပ်သို့ ရောက်ရှိလာခဲ့ကြောင်း ဆိုးလ်မြို့ရှိ မြန်မာသံရုံးရဲ့ ထုတ်ပြန်ချက်အရ သိရပါတယ်။

ထပ်မံရောက်ရှိလာတဲ့ အလုပ်သမားများမှာ Re-entry လုပ်သား ၃၀ ဦး၊ ကုန်ထုတ်လုပ်သားအဖြစ် အသစ်ဝင်ရောက်လုပ်ကိုင်မယ့် လုပ်သားသစ် ၅၀ ဦးနဲ့ စိုက်ပျိုးရေးလုပ်သားအဖြစ် အသစ်ဝင်ရောက်လုပ်ကိုင်မယ့် လုပ်သားသစ် ၅၀ ဦး စုစုပေါင်း ၁၃၀ ဦး တို့ဖြစ်ကြပါတယ်။

ရောက်ရှိလာတဲ့ အလုပ်သမားများကို ဆိုးလ်မြို့ မြန်မာသံရုံးမှ အလုပ်သမား သံအရာရှိကကြိုဆိုခဲ့ပြီး အလုပ်သမားများ သိရှိလိုက်နာသင့်တဲ့ အချက်တွေကို မှာကြားခဲ့ကာ လိုအပ်သည်များ ကူညီပေးခဲ့ကြောင်း သိရပါတယ်။

ymg-mnn
#Yangon_Media_Group

#Local_News
Published_ 24 May 2022

ဒဂုံမြို့သစ်(တောင်ပိုင်း)မြို့နယ်၊ အောင်မြင့်မိုရ်အိမ်ရာတွင် အခန်းတန်ဖိုးငွေ အကြေပေးသွင်းဝယ်ယူထားသူများကို အိမ်ပေါ်တက်ရောက် နေထိုင်ခွင့်ပြုသည့် အကြောင်းကြားစာများ ထုတ်ပေးသွားမည်ဖြစ်ကြောင်း သိရပါတယ်။

မြိုပြနှင့်အိမ်ရာဖွံ့ဖြိုးရေးဦးစီးဌာန၊ ရန်ကုန်တိုင်းဒေသကြီးရုံး၊ ဗိုလ်ချုပ်အောင်ဆန်းလမ်းသို့ မေ ၃၀ ရက်မှ စတင်ပြီး နံနက် ၁၀ နာရီမှ ၄ နာရီအတွင်း ရုံးဖွင့်ရက်များတွင် လာရောက်ထုတ်ယူနိုင်ပါကြောင်း အသိပေးကြေညာထားပါတယ်။

အိမ်ခန်းဝယ်ယူရန် DUHD Sale Housing Facebook Page မှ လျှောက်ထား လာသူများအနက် အခန်းမဲနှိုက်ခွင့် ရရှိသူများစာရင်းကို ကြေညာပြီး မတ် ၃၀ ရက်က Live လွှင့်ကာ သက်ဆိုင်ရာအိမ်ရာ အမျိုးအစားအလိုက် မဲပေါက်သည့်အခန်းများကို ကြေညာပေးခဲ့တာ ဖြစ်ပါတယ်။

ထို့ပြင် အိမ်ခန်းဝယ်ယူခွင့် အကြောင်းကြားစာများကို ပြီးခဲ့တဲ့ ဧပြီလအတွင်းက ထုတ်ပေးခဲ့ပြီး CHID Bank ဘဏ်သို့ဆက်သွယ်ကာ အခန်းတန်ဖိုးငွေပေးသွင်းဝယ်ယူရေး ဆောင်ရွက်ခဲ့ကြတာ ဖြစ်ပါတယ်။

ymg-mnn
#Yangon_Media_Group

#LocalNews
Published -24 May 2022

အမျိုးသားယဥ်ကျေးမှုနှင့်အနုပညာတက္ကသိုလ်(ရန်ကုန်)မှာ မြန်မာ့ပြက္ခဒိန် ဘွဲ့လွန်ဒီပလိုမာသင်တန်းဖွင့်လှစ်နိုင်ဖို့ ဆောင်ရွက်နေတယ်လို့ သိရပါတယ်၊၊

အဲဒီ့လိုဖွင့်လှစ်နိုင်ဖို့ သာသနာရေးနှင့်ယဥ်ကျေးမှုဝန်ကြီးဌာန၊ ဒုတိယဝန်ကြီးဒေါက်တာမိုးဇော်ထွန်း၊ အနုပညာဦးစီးဌာနညွှန်ကြားရေးမှူးချုပ်၊ အမျိုးသားယဥ်ကျေးမှုနှင့် အနုပညာတက္ကသိုလ် (ရန်ကုန်) ပါမောက္ခချုပ်၊ မြန်မာနိုင်ငံပြက္ခဒိန်အကြံပေးအဖွဲ ဥက္ကဌဆရာတော်နဲ့ဒုဥက္ကဌဆရာတော်တို့က မေလ(၂၃)ရက်မှာ ဆွေးနွေးခဲ့ကြပါတယ်၊၊

မြန်မာ့ပြက္ခဒိန် ဘွဲ့လွန်ဒီပလိုမာသင်တန်းဖွင့်လှစ်နိုင်ဖို့ သင်ရိုးညွှန်းတမ်းရေးဆွဲတာ၊သင်ရိုးမာတိကာနဲ့ သင်တန်းပြဌာန်းစာအုပ်တွေ ပြုစုဖို့လုပ်ငန်းအဖွဲ့လည်း ဖွဲ့စည်းဆောင်ရွက်နေပြီလို့ သိရပါတယ်၊၊

မြန်မာ့ပြက္ခဒိန်တွက်နည်းစနစ်တွေ၊ မဟာသင်္ကြန်စာရေးသားပြုစုနည်းတွေ တိမ်ကောပပျောက်မှုမရှိအောင် မြန်မာ့ပြက္ခဒိန် ဘွဲ့လွန်ဒီပလိုမာသင်တန်းဖွင့်လှစ်ဖို့ ဆောင်ရွက်သွားမှာဖြစ်ပြီး သာသနာရေးနှင့် ယဥ်ကျေးမှုဝန်ကြီးဌာန၊ အနုပညာဦးစီးဌာနက ဦးဆောင်ဆောင်ရွက်သွားမှာဖြစ်တယ်လို့ သိရပါတယ်၊၊

ymg/tthl
#Yangon_Media_Group

#WorldPolitics
Published 24 May 2022

ယူကရိန်းသမ္မတ'ဗိုလိုဒီမီယာဇယ်လန်စကီ'က စစ်ပွဲအဆုံးသတ်ရေးကိစ္စများ ဆွေးနွေးဖို့အတွက် ရုရှားအစိုးရဘက်က သမ္မတ'ဗလာဒီမီယာပူတင်'နဲ့သာ တွေ့ဆုံဖို့ဆန္ဒရှိကြောင်း တနင်္လာနေ့ကထုတ်ဖော်ပြောကြားလိုက်ပါတယ်။

'ဇယ်လန်စကီ'ပြောကြားထားတဲ့ဗီဒီယိုကို ဒါးဗိုစ်မြိုမှာပြုလုပ်တဲ့ ကမ္ဘာ့စီးပွားရေးဖိုရမ်ဆွေးနွေးပွဲတက်ရောက်လာသူများကို ပြသခဲ့ရာမှာ ရုရှားတိုသိမ်းပိုက်နေတဲ့နေရာတွေမှာ အရပ်သားများအပေါ်ကျူးလွန်ထားတဲ့အထောက်အထားတွေကြောင့် တွေ့ဆုံဆွေးနွေးဖိုစီစဉ်ရတာခက်ခဲနေကြောင်း ပြောကြားသွားပါတယ်။

ရုရှားတို့က ယူကရိန်းနိုင်ငံရဲ့စစ်ရေးဆောင်ရွက်ချက်တွေကိုချေမှုန်းဖို့ အထူးစစ်ဆင်ရေးခေါင်းစဉ်ဖြင့် ကျူးကျော်ရာမှာ အရပ်သားတွေကို ပစ်မှတ်ထားခြင်းမရှိကြောင်း ငြင်းဆန်နေပါတယ်။

'ဇယ်လန်စကီ'ရဲ့ပြောကြားချက်ကို စကားပြန်မှတဆင့်ဖော်ပြရာမှာ "ရုရှားသမ္မတကပဲ ကျူးကျော်ဖို့ကိစ္စအားလုံးကို ဆုံးဖြတ်ခဲ့တာဆိုတော့ သူမပါဘဲနဲ့ စစ်ပွဲအဆုံးသတ်ရေးညှိနှိုင်းလို့မရပါဘူး" လို့ ပြောပြခဲ့ပါတယ်။

ဒါ့အပြင် စစ်ပွဲအစပိုင်းတုန်းက မြို့တော်ကိဗ်အပြင်ဘက် ရုရှားတပ်များအခြေချခဲ့တဲ့နေရာတွေမှာ အရပ်သားအစုလိုက် အပြုံလိုက်အသတ်ခံထားရတဲ့ အထောက်အထားတွေတွေ့ထားတာကြောင့် တွေ့ဆုံဆွေးနွေးပွဲစီစဉ်ဖို့ ပိုမိုခက်ခဲနေပြီး ရုရှားဘက်မှအခြားအရာရှိတွေနဲ့တော့ တွေ့ဆုံသွားမှာမဟုတ်ပါဘူး။

"ရုရှားအစိုးရဘက်က သမ္မတကလွဲပြီး တခြားဘယ်သူနဲ့မှတွေ့ဆုံဖို့ လက်ခံမှာမဟုတ်ပါဘူး။ ဆွေးနွေးတဲ့အခါမှာလည်း စစ်ပွဲအဆုံးသတ်ရေး ကိစ္စတစ်ခုတည်းပဲ ဆွေးနွေးမှာဖြစ်ပြီး တခြားဘာကိစ္စမှ ထည့်သွင်းဆွေးနွေးမှာမဟုတ်ပါဘူး" လို့ ဆိုပါတယ်။

ဖေဖော်ဝါရီလကုန်အနီး ရုရှားနဲ့ယူကရိန်းတို့မှအရာရှိတွေ ကြိုကြားတွေ့ဆုံပြောဆိုမှုတွေ ပြုလုပ်ခဲ့ပေမယ့် ရှေ့မဆက်ခဲ့ကြကြောင်း နှစ်ဘက်စလုံးမှ အသိပေးခဲ့ပါတယ်။

ပြီးခဲ့တဲ့အပတ်က 'ဇယ်လန်စကီ'က ယူကရိန်းရုပ်သံမှာ ထုတ်လွှင့်ပြောကြားခဲ့ရာမှာ သံတမန်ရေးညှိနှိုင်းမှု မပါဝင်ဘဲ စစ်ပွဲကိုရပ်တန့်လို့မရနိုင်ဘူးလို့ ဆိုခဲ့ပါတယ်။

စစ်ပွဲဖြစ်ပွားခဲ့တဲ့အတွက် ယူကရိန်းပြည်သူအများအပြားပေးဆပ်ခဲ့ရကြောင်း၊ ဒုတိယအကြီးဆုံးမြို့ခါကိဗ်အနီးမှာ ယူကရိန်းတပ်တွေအသာရလာပေမယ့် ဒွန်ဘတ်စ်ဒေသမှာတော့ အများအပြားကျဆုံးခဲ့ရကြောင်း မှတ်ချက်ပြုသွားပါတယ်။

၂၀၁၄ ခုနှစ်က ရုရှားတို့သိမ်းပိုက်ခဲ့တဲ့ ခရိုင်မီယာကျွန်းဆွယ်ကို ပြန်လည်သိမ်းယူဖို့ကြံစည်လာသမျှကလည်း လူထောင်သောင်းများစွာ သေကြေပျက်စီးရမှာပဲဖြစ်ကြောင်း ထပ်လောင်းပြောကြားသွားပါတယ်။

Source: Reuters
#Yangon_Media_Group

#Health_Tips
Published 24 May 2022

ရယ်မောခြင်းက ကျန်းမာရေးအတွက်အထောက်အကူပြုသကဲ့သို့ ကခုန်ခြင်းကလည်း နာတာရှည်ရောဂါနဲ့ စိုးရိမ်ပူပန်စိတ်တွေကိုလျှော့ချပေးနိုင်ကာ သဘာဝဆေးတစ်ခွက်ဖြစ်လာနိုင်ပြီး အယ်လ်ဇိုင်းမားလူနာတွေမှာလည်း စိတ်အခြေအနေတိုးတက်လာအောင် ပြုလုပ်ပေးနိုင်ပါတယ်။

ထင်ရှားတဲ့သိပ္ပံပညာစာရေးဆရာ ဘူမိဗေဒပညာရှင်ဟောင်း'စတဲဗာတန်'က ဝါရှင်တန်ပိုစ်အတွက်ရေးသားဖော်ပြခဲ့ရာမှာ ကိုဗစ်ကပ်ရောဂါကာလအတွင်း ကခုန်ခြင်းဖြင့် တစ်ယောက်တည်းအထီးကျန်ခက်ခဲနေရတာကို ကူညီဖြေဖျောက်ပေးနိုင်ကြောင်း ဖော်ပြခဲ့ပြီး ဦးနှောက်အတွက်ကောင်းကျိုးပြုပေးနိုင်ကြောင်း ပညာရှင်များကသဘောတူခဲ့ပါတယ်။

ပုံမှန်ကိုယ်လက်လှုပ်ရှားမှုနဲ့ စိတ်ကျန်းမာရေးအခြေအနေတို့က ဆက်စပ်မှုရှိနေကြပြီး ကခုန်ခြင်းက ပို၍ပင်အကျိုးကျေးဇူးရရှိနိုင်တယ်လို့ သုံးသပ်ထားကြပါတယ်။

နေ့စဉ်ကခုန်ခြင်းဖြင့် စိုးရိမ်ပူပန်ခြင်းလက္ခဏာများလျှော့ချနိုင်ခြင်း၊ နာတာရှည်လက္ခဏာခံစားရမှုထိန်းချုပ်နိုင်ခြင်း၊ အယ်လ်ဇိုင်းမားရောဂါလူနာတွေရဲ့ အခြေအနေတိုးတက်လာခြင်းတို့နဲ့ ဆက်စပ်နေပါတယ်။

ကိုဗစ်ကပ်ရောဂါကာလအတွင်း 'ဗာတန်'ရဲ့အဖေနာမကျန်းဖြစ်ခြင်း၊ ကိုဗစ်နဲ့ရင်ဆိုင်ရတဲ့အခြေအနေတွေကြောင့် စိတ်ပိုင်းဆိုင်ရာခက်ခဲခဲ့ရကြောင်း 'ဗာတန်'ကရေးသားခဲ့ပါတယ်။

ဒီအခြေအနေတွေမှာ ကခုန်ခြင်းဖြင့် သူမရဲ့ စိုးရိမ်ပူပန်စိတ်တွေ သက်သာပြေလျော့သွားတာကို တွေ့ရှိခဲ့ပါတယ်။

ကခုန်ခြင်းမှာ ကိုယ်လက်လှုပ်ရှားမှုအကျိုးဆက်တွေအပြင် စိတ်ပိုင်းဆိုင်ရာခံစားမှုတွေပါ ပါဝင်လာပါတယ်။

ကခုန်ခြင်းက စက်ဘီးစီးခြင်းလို သာမန်လှုပ်ရှားမှုထက်စာရင် ပိုပြီးကွဲပြားခြားနားနေတယ်လို့ ဖီလာဒယ်လ်ဖီယာ ဒရက်ဆဲတက္ကသိုလ်မှဒေါက်တာ'ဂျေ့စ်လင်ဘီယွန်ဒို'က ဝါရှင်တန်ပိုစ်ကိုပြောကြားသွားပါတယ်။

ကခုန်ခြင်းက လှုပ်ရှားမှုပုံစံတစ်မျိုးတည်းမဟုတ်ဘဲ ကိုယ့်စိတ်ကြိုက်လှုပ်ရှားနိုင်တယ်လို့ ဆိုပါတယ်။

ပြင်းထန်တဲ့စိတ်ရောဂါတစ်မျိုးဖြစ်တဲ့ စိတ်ကစဉ့်ကလျားရောဂါလက္ခဏာတွေကိုလည်း ကုသပေးနိုင်တယ်လို့ တွေ့ရှိထားပါတယ်။

၂၀၂၁ ခုနှစ်က 'ဘီယွန်ဒို'ဦးဆောင်တဲ့လေ့လာမှုမှာ ကခုန်ခြင်းကုထုံးများက စိတ်ကစဉ့်ကလျားဝေဒနာရှင်တွေမှာ အာရုံချောက်ခြားခြင်း၊ အကြောက်လွန်ခြင်း၊ ကယောက်ကတမ်းဖြစ်နိုင်ချေတို့ကို သက်သာစေတယ်လို့ တွေ့ရှိထားပါတယ်။

တစ်ဦးတည်းကခုန်ခြင်းဖြင့် အကျိုးကျေးဇူးရရှိနိုင်သလို ကုထုံးပညာရှင်နဲ့တိုင်ပင်လေ့ကျင့်ပါက ပိုမိုထိရောက်လာနိုင်ပါတယ်။

Source: DailyMail
#Yangon_Media_Group

#Local_News
Published_ 24 May 2022

ကချင်ပြည်နယ်၊ မိုးညှင်းမြို့နယ်၌ ငွေကျပ် ၁ ဘီလီယံကျော်တန်ဖိုးရှိ ဘိန်းဖြူနှင့် စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း မြန်နိုင်ငံရဲတပ်ဖွဲ့က သတင်းထုတ်ပြန်ထားပါတယ်။

လုံခြုံရေးတပ်ဖွဲ့ဝင်များ ပါဝင်သော ပူးပေါင်းအဖွဲ့သည် မေ ၁၆ ရက် ညနေ ၆ နာရီခန့်က မိုးညှင်းမြို့နယ်၊ မန္တလေး-မြစ်ကြီးနားသွားကားလမ်း၊ နန့်စီးအောင်ပူးပေါင်း စစ်ဆေးရေးစခန်းတွင် မန္တလေးမှမိုးညှင်းသို့ သန်းဇော်မောင်းနှင်သည့် FUSO ၆ ဘီး မော်တော်ယာဉ်ကို သတင်းအရရှာဖွေခဲ့ပါတယ်။

ထိုသို့ရှာဖွေရာ ယာဉ်ပေါ်မှ ဒေသကာလတန်ဖိုးငွေကျပ် ၁ ဘီလီယံကျော်တန်ဖိုးရှိ ဘိန်းဖြူ ၂၆ ဒသမ ၄ ကီလို နှင့် စိတ်ကြွရူးသွပ်ဆေးပြား ၃ ဒသမ ၄၂ သိန်း တို့အား သိမ်းဆည်းရမိခဲ့ပါတယ်။

စစ်ဆေးဖော်ထုတ်ချက်အရ သိမ်းဆည်းရမိ မူးယစ်ဆေးဝါးများအား မန္တလေးတိုင်း ဒေသကြီးမှ ကချင်ပြည်နယ်သို့ သယ်ဆောင်ခြင်းဖြစ်ကြောင်းသိရှိရသဖြင့် ၎င်းအား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေး ဖော်ထုတ်လျက်ရှိကြောင်း သတင်းထုတ်ပြန်ချက်အရ သိရပါတယ်။

ymg-mnn
#Yangon_Media_Group

#WorldHealth
Published 24 May 2022

အက်ဆစ်ဓာတ်လျှော့ချပေးတဲ့ အန်တဆစ်အမျိုးအစား ဖာမိုတဒင်းဆေးတွေဟာ ကိုဗစ်ရောဂါလက္ခဏာများသက်သာအောင် ကူညီပေးနိုင်ကြောင်း သုတေသီများက လက်တွေ့စမ်းသပ်မှုတွေပြုလုပ်ပြီး တွေ့ရှိခဲ့ကြပါတယ်။

ကြွက်တွေနဲ့စမ်းသပ်ရာမှာ ဖာမိုတဒင်းဆေးက ရောဂါကိုယ်ခံအားနဲ့ ခန္ဓာကိုယ်လှုပ်ရှားမှုတွေကို ထိန်းချုပ်ပေးတဲ့ ဗေးဂတ်စ်နာ့ဗ်အာရုံကြောကို လှုဆော်ပေးနိုင်တာကို တွေ့ရှိခဲ့ပါတယ်။

Cytokine storms လို့ခေါ်တဲ့ ကိုယ်ခံအားတုန့်ပြန်မှုစနစ်က ရောင်ရမ်းခြင်းဖြစ်စေတဲ့ ပရိုတိန်းတွေကို သွေးထဲပိုမိုရောက်ရှိစေပါတယ်။

ဗေးဂတ်စ်နာ့ဗ်ကို လှုံ့ဆော်ခြင်းဖြင့် အဆိုပါကိုယ်ခံအားတုန့်ပြန်မှုစနစ်ကို ဖိနှိပ်ပေးပါတယ်။

ဖာမိုတဒင်းကို ကြွက်တွေကိုပေးတဲ့အခါ သွေးတွေနဲ့သရက်ရွက်ထဲမှာ ရောင်ရမ်းခြင်းပရိုတိန်းပမာဏ သိသိသာသာနည်းလာပြီး အသက်ရှင်ဖို့ ရာခိုင်နှုန်းတိုးတက်လာခဲ့ပါတယ်။

ဒါပေမဲ့ ဗေးဂတ်စ်နာ့ဗ်ပြတ်တောက်သွားရင်တော့ ဖာမိုတဒင်းပေးပေမယ့်လည်း ကိုယ်ခံအားတုန့်ပြန်မှုစနစ်ကို မထိန်းချုပ်နိုင်တော့ကြောင်း Molecular Medicine မှာ တနင်္လာနေ့က ဖော်ပြခဲ့ပါတယ်။

လေ့လာချက်တွေအရ ကိုဗစ်လူနာ‌တွေမှာ ဗေးဂတ်စ်နာ့ဗ်က ကိုယ်ခံအားတုန့်ပြန်မှုစနစ်ကို ထိန်းချုပ်နိုင်ကြောင်း နယူးယော့ခ်မြို့ ဖိုင်စတိုင်ဆေးပညာတက္ကသိုလ်မှ ‘ကီဗင်ထရေစီ’က ပြောပြခဲ့ပါတယ်။

ဗေးဂတ်စ်နာ့ဗ်ကို လျှပ်စစ်ဖြင့်တိုက်ရိုက်လှုံ့ဆော်ခြင်းက ရောဂါအမျိုးမျိုးမှာ သိသာစေတယ်လို့သိရှိထားပါတယ်။

ဖာမိုတဒင်းသောက်ဆေးက ဗေးဂတ်စ်နာ့ဗ်ကိုလှုံ့ဆော်ပေးပြီး ကိုဗစ်လူနာတွေမှာ တစ်ရှူးထိခိုက်ခြင်းနဲ့ ပရိုတိန်းပြန်လည်ဖြစ်ပေါ်မှုတွေကို လျှော့ချပေးကြောင်း သုတေသီများက သုံးသပ်ထားပါတယ်။

Source: Reuters.
#Yangon_Media_Group