#LocalNews
Published - 28 May 2022

ပူတာအို ဒေသတွင် တိုက်ပွဲများမရှိတော့သည့်အတွက် တောတောင်များထဲတွင် ခိုလှုံ့နေကြရသည့် ဒေသခံ
စစ်ဘေးရှောင်ပြည်သူများနေရပ်သို့ ပြန်လည်သွားလာနိုင်ကြပြီဖြစ်တယ်လို့ စစ်ဘေးရှောင်အရေးကိစ္စရပ်များအား ကူညီဆောင်ရွက်ပေးနေသူများထံမှ သိရပါတယ်။

#Yangon_Media_Group

#LocalNews
Published -28 May 2022

လာမယ့်ပွင့်လင်းရာသီမှာ တောင်တက်ခရီးစဥ်တွေနဲ့ တောတွင်းခရီးစဥ်(Hiking)တွေ ပြန်လည်စတင်နိုင်ဖို့ မျှော်မှန်းထားတယ်လို့ တက္ကသိုလ်ခြေလျင်နှင့်တောင်တက်အသင်း၊ သဘာဝခေါ်သံဖေါင်ဒေးရှင်းဥက္ကဌ ဦးမျိုးသန့်က ပြောပါတယ်၊၊

#Yangon_Media_Group

#LocalNews
Published - 28 May 2022

နိုင်ငံတော်စီမံအုပ်ချုပ်ရေးကောင်စီ တာဝန်ယူဆောင်ရွက်လျက်ရှိသည့် ၂၀၂၁ ခုနှစ် ဖေဖော်ဝါရီမှ ၂၀၂၂ မေလအထိ နိုင်ငံခြားရင်းနှီးမြှုပ်နှံမှု လုပ်ငန်းပေါင်း ၆၇ ခုရှိပြီး ကန်ဒေါ်လာ ၃ ဒသမ ၉ ဘီလျံဝင်ရောက်မှုရှိခဲ့ကြောင်း ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာနမှ ထုတ်ပြန်သည့် စာရင်းဇယားများအရသိရသည်။

ပြည်တွင်းရှိ လျှပ်စစ်ဓာတ်အားကဏ္ဍတွင် ကန်ဒေါ်လာ ၃ ဒသမ ၀၆ ဘီလျံဖြင့် အများဆုံးရင်းနှီးမြှုပ်နှံထားပြီး စက်မှုကဏ္ဍ၊ အခြားဝန်ဆောင်မှုကဏ္ဍ၊ ပို့ဆောင်ဆက်သွယ်ရေးကဏ္ဍတို့တွင် ရင်းနှီးမြှုပ်နှံခြင်းဖြစ်ကြောင်း၊ အဆိုပါရင်းနှီးမြှုပ်နှံသည့် နိုင်ငံများတွင် ဗြိတိန်နိုင်ငံမှ အများဆုံးဝင်ရောက်မှုရှိပြီး ဂျပန်၊ စင်ကာပူသမ္မတနိုင်ငံ၊ တရုတ်ပြည်သူ့သမ္မတနိုင်ငံနှင့် ဟောင်ကောင်တို့မှ ကုမ္ပဏီများက အသီးသီးရင်းနှီးမြှုပ်နှံမှုများ ပြုလုပ်ထားကြောင်း သိရသည်။

"ရင်းနှီးမြှုပ်နှံမှုနဲ့ ကော်မရှင်ရုံးအသီးသီးကနေ စိစစ်နေတဲ့ နိုင်ငံခြားရင်းနှီးမြှုပ်နှံမှု လုပ်ငန်းပေါင်း ၁၇ ခုရှိတယ်။ ခွင့်ပြုသွားဖို့ရှိတာပေါ့။ တခြားနိုင်ငံတွေလည်း ကိုဗစ်-၁၉ နောက်ပိုင်း စီးပွားရေးနလန်ထူမှုတွေလုပ်ပြီးတော့မှ ရင်းနှီးမြှုပ်နှံမှုတွေလုပ်မှာ ဖြစ်တဲ့အတွက် ၁ ဒသမ ၅ ဘီလျံလောက်လျာထားတယ်။ ဒီဘဏ္ဍာနှစ်ကုန်ရင် လျာထားချက်အတိုင်းပြည့်မှာပါ'' ဟု ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနမှ တာဝန်ရှိသူတစ်ဦးက ပြောသည်။

ယင်းအပြင် ပုံမှန်ရင်းနှီးမြှုပ်နှံမှုပြုလုပ်နေသည့် တရုတ်၊ ထိုင်း၊ စင်ကာပူအပြင် မြန်မာနိုင်ငံ၏ မိတ်ဖက်နိုင်ငံဖြစ်သည့် ရုရှားအပါအဝင် အရှေ့အာရှဥရောပနိုင်ငံများမှ ရင်းနှီးမြှုပ်နှံမှုများဝင် ရောက်ရန် ခန့်မှန်းထားကြောင်း သိရသည်။

"ဒေါ်လာနဲ့ပတ်သက်လို့ အခက်ခဲရယ်လို့မဟုတ်ပါဘူး။ ရင်းနှီးမြှုပ်နှံမှုအပိုင်းမှာတော့ အဓိကပစ္စည်းသွင်းတာတို့ဘာတို့ ငွေချေတဲ့အခါ ကော်မတီကနေနိုင်ငံခြားသုံးငွေတွေစိစစ်ပြီးတော့မှ ရုံးလုပ်ထုံးလုပ်နည်းအတိုင်း ပုံမှန်ခွင့်ပြုပေးဖို့ရှိပါတယ်" ဟု ယင်းက ထပ်မံပြောကြားသည်။

ymg/sth
#Yangon_Media_Group

#LocalNews
Published -28 May 2022

ဂျပန်ကိုသွားရောက်မည့် မြန်မာနိုင်ငံသားများအနေနဲ့ ဇွန်လ(၁)ရက်ကစပြီး လေဆိပ်ဆိုက်ရောက်ချိန် ကိုဗစ်စစ်ရတဲ့ On arrival test စစ်စရာ မလိုသလို ကွာရန်တင်းဝင်စရာလည်း မလိုတော့ဘူးလို့ ဂျပန်နိုင်ငံဆိုင်ရာ မြန်မာသံရုံး(တိုကျို)က ထုတ်ပြန်လိုက်ပါတယ်၊၊

ဒီ့အပြင် မြန်မာနိုင်ငံသားတွေအနေနဲ့ ဂျပန်အစိုးရ အသိအမှတ်ပြုထားတဲ့ကာကွယ်ဆေးထိုးလက်မှတ်ကိုလည်း တင်ပြစရာမလိုဘဲ ဂျပန်နိုင်ငံကလက်ခံသွားမှာ ဖြစ်ပါတယ်၊၊

အဲဒီလိုမျိုးဖြေလျှော့မှုတွေရှိပေမယ့်လည်း မြန်မာနိုင်ငံက မထွက်ခွာမီကိုဗစ်မရှိကြောင်းစစ်ဆေးမှု Pre departure test တော့ ဆောင်ရွက်ဖို့လိုတယ်လို့ ဆိုပါတယ်၊၊

ဂျပန်နိုင်ငံ၊ နိုင်ငံခြားရေးဝန်ကြီးဌာနအနေနဲ့ ပြည်ဝင်ခွင့်တွေ နိုင်ငံ၊ ဒေသအလိုက် သတ်မှတ်ချက်တွေထုတ်ပြန်ခဲ့ပြီး မြန်မာနိုင်ငံကတော့ ဖြေလျှော့မှုများတဲ့ အပြာအုပ်စုထဲမှာ ပါဝင်ခဲ့တာဖြစ်တယ်လို့သိရပါတယ်၊၊

ymg/tthl
#Yangon_Media_Group

#LocalNews
Published -28 May 2022

ရှမ်းပြည်နယ်၊ ဆီဆိုင်မြို့နယ်နှင့်ပင်လောင်းမြို့နယ်ရှိ အကြောင်းအမျိုးမျိုးကြောင့် နေရပ်စွန့်ခွာလာရတဲ့ပြည်သူတွေကို ICRC က စားနပ်ရိက္ခာတွေထပ်မံထောက်ပံ့ပေးခဲ့တယ်လို့ ICRC Myanmar မှ ထုတ်ပြန်လိုက်ပါတယ်၊၊

မြန်မာနိုင်ငံကြက်ခြေနီအသင်း (MRCS) နဲ့အတူ လားရှိုးမြို့မှ အိုင်စီအာရ်စီအဖွဲ့တွေဟာ ပင်လောင်းနှင့် ဆီဆိုင်မြို့နယ်တွေက နေရပ်စွန့်ခွာရသူတွေဆီကို သွားရောက်ပြီး လိုအပ်နေတဲ့စားနပ်ရိက္ခာတွေကို ထောက်ပံ့ပေးခဲ့တာပါ၊၊

“ကျွန်တော်တို့အတူတကွလုပ်ဆောင်ပြီး မြို့နယ်နှစ်ခုလုံးမှာနေထိုင်တဲ့ မိသားစုပေါင်း ၂,၀၀၀ နီးပါးကို ဆန်၊ ပဲ၊ ဆီ နဲ့ ဆား တို့ကို ထောက်ပံ့ပေးနိုင်ခဲ့ပါတယ်။ အခုတစ်ခေါက်က ဆီဆိုင်နဲ့ ပင်လောင်းမြိုနယ်တွေကို ဒုတိယအကြိမ်အဖြစ် ပေးဝေတာဖြစ်ပါတယ်။ ရပ်ရွာအသိုက်အဝန်းတွေမှာ လိုအပ်ချက်တွေရှိနေသေးတာကြောင့် မကြာခင်မှာ ဒီကိုပြန်လည်ရောက်ရှိလာဖို့ မျှော်လင့်ပါတယ်” လို့ အိုင်စီအာရ်စီ လားရှိးရုံးက ဦးမာတင်ဆမ်တန် ကပြောပါတယ်။

ICRC အနေနဲ့အရေးပေါ်အကူအညီတွေပေးအပ်ခြင်းအပြင်၊ တိုက်ပွဲဖြစ်ပွားပြီးနောက် နေရပ်ပြန်လိုတဲ့ ရပ်ရွာအသိုက်အဝန်းတွေအားလုံးအတွက် မြေမြှုပ်မိုင်းနှင့် မပေါက်ကွဲသေးတဲ့ ပစ္စည်းတွေရဲ့အန္တရာယ်တွေနဲ့သက်ဆိုင်တဲ့ အသက်ကယ်အချက်အလက်တွေကို မျှဝေခဲ့ပါတယ်။

တိုက်ပွဲကြောင့် သို့မဟုတ် နေရာရွှေ့ပြောင်းမှုကြောင့် ပျောက်ဆုံးနေတဲ့ ကိုယ်ချစ်ခင်ရသူတွေနဲ့ကွဲကွာခဲ့ရသူတွေအတွက် အိုင်စီအာရ်စီရဲ့ အရေးပေါ်ဖုန်းနံပါတ်ကိုလည်း မျှဝေပေးခဲ့တယ်လို့သိရပါတယ်၊၊

ymg/tthl
#Yangon_Media_Group

#LocalNews
Published - 28 May 2022

၂၀၂၂ ခုနှစ် တက္ကသိုလ်ဝင်စာမေးပွဲအောင်စာရင်းကို လာမည့် ဇွန်လ ၁၂ ရက်တွင် ထုတ်ပြန်ကြေညာမည်ဖြစ်ကြောင်း ပညာရေးဝန်ကြီးဌာနမှ သိရသည်။

ပြီးခဲ့သည့်မတ်လတွင် ဖြေဆိုခဲ့သည့် တက္ကသိုလ်ဝင်စာမေးပွဲအောင်စာရင်းအား ဇွန်လ ၁၂ ရက်တွင် ထုတ်ပြန်ကြေညာမည်ဖြစ်ကြောင်း သိရသည်။

တက္ကသိုလ်ဝင်အောင်စာရင်းများကို အွန်လိုင်းကတဆင့်ကြည့်လိုသူများအနေဖြင့် မြန်မာနိုင်ငံစာစစ်ဦးစီးဌာန Website ဖြစ်သည့် myanmarexam.org မှ နေတဆင့်ဝင်ရောက်ကြည့်ရှုနိုင်သည်ဟု ကြေညာထားပြီး ဝင်ရောက်ကြည့်ရှုလိုသူတွေအနေဖြင့် အောင်စာရင်းကြေညာသည့်နေ့တွင် သက်ဆိုင်ရာ တိုင်းနှင့် ပြည်နယ်အလိုက်၊ မြို့နယ်အလိုက် ဝင်ရောက်ကြည့်ရှုရမည်ဖြစ်ကြောင်း သိရသည်။

၂၀၂၂ ခုနှစ် တက္ကသိုလ်ဝင်စာမေးပွဲ စာဖြေလွှာတွေကို ပြီးခဲ့သည့် မေလ ပထမအပတ်အတွင်း စစ်ဆေးခဲ့ပြီးဖြစ်ကြောင်း သိရသည်။

ymg/sth
#Yangon_Media_Group

#DailyNews
Published - 28 May 2022

၁။ လာမည့်ပွင့်လင်းရာသီတွင် တောင်တက်ခရီးစဉ်များနှင့် တောတွင်းခရီးစဉ်(Hiking)များ ပြန်လည်စတင်နိုင်ရန်မျှော်မှန်း
(တက္ကသိုလ်ခြေလျင်နှင့်တောင်တက်အသင်း၊သဘာဝခေါ်သံဖေါင်ဒေးရှင်းဥက္ကဌ ဦးမျိုးသန့်)

၂။ ပူတာအိုဒေသတွင် တိုက်ပွဲများမရှိတော့သည့်အတွက် စစ်ဘေးရှောင်ပြည်သူများနေရပ်ပြန်ကြပြီဟုဆို
ပူတာအို ဒေသခံတစ်ဦး ကချင်ပြည်နယ်

၃။ နေ့စဉ်မိုးလေဝသသတင်း။

၄။ စစ်ပွဲပဋိပက္ခကြောင့်စားနပ်ရိက္ခာဖူလုံရေးကြပ်တည်းလာသည့်အင်ဒိုနီးရှားနိုင်ငံ ...အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldPolitics
Published 28 May 2022

မလေးရှားဝန်ကြီးချုပ်ဟောင်း'မဟာသီယာမိုဟာမက်'က အမေရိကန်ဦးဆောင်တဲ့ စီးပွားရေးအဖွဲ့အသစ်ကို သောကြာနေ့ကဝေဖန်လိုက်ကာ ထိုအဖွဲ့ဖွဲ့စည်းခြင်းရည်ရွယ်ချက်က တရုတ်ကိုဖယ်ရှား ဖို့ရည်ရွယ်တာဖြစ်ပြီး တရုတ်မပါဘဲနဲ့ ဒေသတွင်းစီးပွားရေးတိုးတက်မှု အကျိုးရှိမှာမဟုတ်ဘူးလို့ ဆိုခဲ့ပါတယ်။

အမေရိကန်သမ္မတ'ဂျိုးဘိုင်ဒန်'က ယခုသီတင်းပတ်အစောပိုင်း ဂျပန်သို့လည်ပတ်စဉ် နိုင်ငံ ၁၃ နိုင်ငံပါဝင်တဲ့ အင်ဒို-ပစိဖိတ်စီးပွားရေးမူဘောင်ကို စတင်ချမှတ်ခဲ့ပါတယ်။

ဒီနည်းလမ်းဖြင့် အမေရိကန်က ကုန်ပစ္စည်းလည်ပတ်ရေးလုပ်ငန်းများ၊ ဒီဂျစ်တယ်ကုန်သွယ်ရေး၊ စွမ်းအင်ထောက်ပံ့ရေးနဲ့ အကျင့်ပျက်ခြစားမှုတိုက်ဖျက်ရေးကဏ္ဍတို့မှာ အာရှနိုင်ငံများနဲ့ ပိုမိုနီးကပ်စွာ ပူးပေါင်းဆောင်ရွက်သွားမှာဖြစ်ကြောင်း 'ဘိုင်ဒန်'ကဆိုပါတယ်။

"အမေရိကန်က တရုတ်ကိုရှောင်ကြဉ်ဖို့ ဒီလိုအဖွဲ့ဖွဲ့တာတွေအမြဲတမ်းလုပ်နေမှာပါ၊ ဒါက စီးပွားရေးအဖွဲ့ဖွဲ့တာမဟုတ်ဘဲ နိုင်ငံရေးအဖွဲ့ခွဲတယ်ဆိုတာကို နိုင်ငံအများစုကလည်း သိရှိကြမှာပါ" လို့ 'မဟာသီယာ'က တိုကျိုမြို့နိုင်ငံတကာညီလာခံမှာ ပြောကြားသွားပါတယ်။

အဖွဲ့မှာပါဝင်ဖို့လက်မှတ်ရေးထိုးကြတဲ့နိုင်ငံတွေထဲမှာ ဩစတြေးလျ၊ ဘရူနိုင်း၊ အိန္ဒိယ၊ အင်ဒိုနီးရှား၊ ဂျပန်၊ မလေးရှား၊ နယူးဇီလန်၊ ဖိလစ်ပိုင်၊ စင်ကာပူ၊ တောင်ကိုရီးယား၊ ထိုင်း၊ အမေရိကန်နဲ့ ဗီယက်နမ်တို့ပါဝင်ပြီး ထိုနိုင်ငံအားလုံးပေါင်းလိုက်ရင် တစ်ကမ္ဘာလုံးစုစုပေါင်းပြည်တွင်းထုတ်ကုန်တန်ဖိုးရဲ့ ၄၀ ရာခိုင်နှုန်းအထိရှိနေပါတယ်။

"ဒီလိုအဖွဲ့ဖွဲ့တာက သူတို့ကိုယ်တိုင်အတွက်လည်း မကောင်းပါဘူး၊ တရုတ်က မလေးရှားအတွက် အရေးကြီးတဲ့ကုန်သွယ်ဖက်နိုင်ငံဖြစ်ပါတယ်၊ တရုတ်နဲ့တင်းမာမှုတွေ ပဋိပက္ခတွေဖြစ်မှာ မလိုလားပါဘူး၊ တရုတ်နိုင်ငံကပျောက်ကွယ်သွားမှာ မဟုတ်ဘဲ ဆက်လက်တည်ရှိနေမယ်ဆိုတာကို အမေရိကန်အနေနဲ့ သဘောပေါက်ဖို့လိုပါတယ်၊ ကျွန်တော်တို့က တရုတ်နဲ့ ရှေ့ဆက်နေထိုင်သွားရမှာပါ၊ တရုတ်ကအခုဆိုရင် ကမ္ဘာပေါ်ကနိုင်ငံအများစုထက် ချမ်းသာတဲ့နိုင်ငံဖြစ်နေပါပြီ" လို့ 'မဟာသီယာ'က Nikkei Inc က စီစဉ်ပြုလုပ်တဲ့ 'အာရှအနာဂတ်'လိုခေါ်တဲ့ညီလာခံမှာ ပြောကြားခဲ့ပါတယ်။

သောကြာနေ့နှောင်းပိုင်းမှာ လက်ရှိမလေးရှားဝန်ကြီးချုပ်'အစ္စမေးလ်ဆာဘရီယာကော့'ကလည်း တိုကျိုသို့ရောက်ရှိနေပြီး ဂျပန်ဝန်ကြီးချုပ်'ဖူမီယိုကီရှီဒါ'နဲ့ တွေ့ဆုံခဲ့ပါတယ်။

သူတို့က စီးပွားရေးမူဘောင်စတင်ခြင်းကို ကြိုဆိုလိုက်ပြီး ဒီဂျစ်တယ်အသွင်ကူးပြောင်းခြင်း၊ ဆိုက်ဘာလုံခြုံရေး၊ နည်းပညာပေါ်ထွန်းခြင်း၊ ကုန်ပစ္စည်းလည်ပတ်ရေးခိုင်မာခြင်း စတဲ့နယ်ပယ်တွေမှာ ပူးပေါင်းဆောင်ရွက်ကြဖို့ကို အတည်ပြုခဲ့ကြတယ်လို့ ဂျပန်နိုင်ငံခြားရေးဝန်ကြီးဌာနက အသိပေးလိုက်ပါတယ်။

ဒေသအတွင်း စစ်ရေးနဲ့စီးပွားရေးအင်အားကြီးထွားလာတဲ့ တရုတ်ကိုတန်ပြန်ပြီး လွတ်လပ်ပွင့်လင်းတဲ့အင်ဒို-ပစိဖိတ်ဒေသဖြစ်လာဖို့ ဂျပန်နဲ့အမေရိကန်တို့ရဲ့ကြိုးပမ်းမှုကို ထောက်ပံ့ကူညီပေးရန် 'ကီရှီဒါ'က မလေးရှားကို တောင်းဆိုခဲ့ပါတယ်။

အသက် ၉၆ နှစ်ရှိပြီဖြစ်တဲ့ 'မဟာသီယာ'ဟာ မလေးရှားနိုင်ငံရဲ့ စတုတ္ထမြောက်နဲ့ သတ္တမမြောက်ဝန်ကြီးချုပ်အဖြစ် တာဝန်ထမ်းဆောင်ခဲ့ပြီး ဖွံ့ဖြိုးမှုအားနည်းတဲ့ နိုင်ငံများအတွက် နှစ်ပေါင်းများစွာထုတ်ဖော်ပြောဆိုသူဖြစ်ခဲ့ပြီး အနောက်နိုင်ငံကို အစဉ်တစိုက်ဝေဖန်ခဲ့သူဖြစ်ပါတယ်။

မလေးရှားနိုင်ငံမှာ ဩဇာသက်ရောက်တဲ့နိုင်ငံရေးပုဂ္ဂိုလ်အဖြစ်ရှိနေဆဲဖြစ်ပြီး ၁၉၅၇ ခုနှစ်နောက်ပိုင်း ပထမဆုံးငြိမ်းချမ်းစွာအာဏာလွှဲပြောင်းမှုအတွင်း အကျင့်ပျက်ခြစားမှု အရိုးစွဲနေတဲ့အစိုးရအဖွဲ့ကိုဖြုတ်ချပြီး ၂၀၁၈ ခုနှစ်သမိုင်းဝင်ရွေးကောက်ပွဲမှာ အတိုက်အခံညွန့်ပေါင်းအဖွဲ့အနိုင်ရအောင် ဦးဆောင်ခဲ့ပါတယ်။

'မဟာသီယာ'က အသက် ၉၂ နှစ်အရွယ်တုန်းက ကမ္ဘာမှာအသက်အကြီးဆုံးခေါင်းဆောင်ဖြစ်ခဲ့ပေမယ့် သူ့ရဲ့အစိုးရအဖွဲ့ဟာ အတွင်းရေးပဋိပက္ခတွေကြောင့်ပြိုလဲခဲ့ပြီး ၂၂ လသာအုပ်ချုပ်ခဲ့ရပါတယ်။

ခေါင်းဆောင်အသစ်ကိုဆန့်ကျင်ဖြုတ်ချဖို့အတွက် 'မဟာသီယာ'က ၂၀၂၀ မှာ မလေးရှားတိုင်းရင်းသားပါတီအသစ်တစ်ခုကို တည်ထောင်ခဲ့ပါတယ်။

Source: South China Morning
#Yangon_Media_Group

#Local_News
Published_ 28 May 2022

ကရင်ပြည်နယ်၊ ဘားအံမြို့နယ်တွင် ငွေကျပ် ၅ ဒသမ ၁၆ ဘီလီယံတန်ဖိုးရှိ အိုက်စ် (မက်သ်အဖက်တမင်း)များ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန် ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မေ ၁၅ ရက် ညနေ ၅ နာရီခွဲတွင် ဘားအံမြို့နယ်၊ ရန်ကုန်-မြဝတီသွားကားလမ်း၊ တရုတ်လှကျေးရွာအနီးတွင် သထုံမှမြဝတီဘက်သို့ ကျော်ဇေယျာမောင်းနှင်ပြီး ဆန်းဝင်းကျော် လိုက်ပါလာတဲ့ Alphard မော်တော်ယာဉ်ကို သတင်းအရ ရှာဖွေခဲ့ပါတယ်။

ထိုသို့ရှာဖွေရာတွင် ဒေသကာလတန်ဖိုး ငွေကျပ် ၅ ဒသမ ၁၆ ဘီလီယံတန်ဖိုးရှိ အိုက်စ်(မက်သ်အဖက်တမင်း) ၂၀၅ ကီလိုနှင့် ကတ်တမင်း ၁ ကီလို သိမ်းဆည်းရမိခဲ့ပါတယ်။

စစ်ဆေးဖော်ထုတ်ချက်အရ မေ ၁၉ ရက် မွန်းတည့် ၁၂ နာရီတွင် မန္တလေးတိုင်းဒေသကြီး၊ မဟာအောင်မြေမြို့နယ်၊ ၇၈ လမ်းရှိ ဟိုတယ်တွင် မူးယစ်ဆေးဝါးများ တာဝန်ခံသယ်ဆောင်သူ ထွန်းလင်းအောင်ကို ဆက်လက်ဖမ်းဆီးရမိခဲ့ပါတယ်။

သိမ်းဆည်းရမိမူးယစ်ဆေးဝါးများကို ရှမ်းပြည်နယ်(တောင်ပိုင်း)မှ ကရင်ပြည်နယ်သို့ သယ်ဆောင်ခဲ့ခြင်းဖြစ်ပြီး ၎င်းတို့အား ဥပဒေအရအရေးယူထားကာ ကွင်းဆက်ပြစ်မှု ကျူးလွန်သူများကို ဆက်လက်စစ်ဆေးဖော်ထုတ်လျက်ရှိကြောင်း သိရပါတယ်။

ymg-mnn
#Yangon_Media_Group

#LocalNews
Published -28 May 2022

မေလ(၃၁)ရက်တွင်ကျရောက်မယ့် ကမ္ဘာ့ဆေးလိပ်မသောက်ရေးနေ့ အခမ်းအနားမြန်မာနိုင်ငံမှာကျင်းပသွား မှာဖြစ်တယ်လို့ သိရပါတယ်၊၊

ကမ္ဘာ့ဆေးလိပ်မသောက်ရေးနေ့ အခမ်းအနားကို ကျန်းမာရေးဝန်ကြီးဌာနက ကြီးမှူးကျင်းပသွားမှာဖြစ်ပြီး ပြည်သူ့ကျန်းမာရေးဖောင်ဒေးရှင်းအနေနဲ့လည်း တက်ရောက်သွားမှာဖြစ်တယ်လို့
ပြည်သူ့ကျန်းမာရေး ဖောင်ဒေးရှင်းဥက္ကဌ ဒေါက်တာသန်းစိန်ကYMG ကို ပြောပါတယ်၊၊

"မေလ(၃၁)ရက်ဟာ ကမ္ဘာ့ဆေးလိပ်မသောက်ရေးနေ့ ဖြစ်ပါတယ်၊၊ နှစ်စဥ်ကျင်းပလေ့ရှိတဲ့ ကမ္ဘာ့ ဆေးလိပ်မသောက်ရေးနေ့ အခမ်းအနားကိုမေလ(၃၁)ရက်မှာ နေပြည်တော်မှာ ကျန်းမာရေးဝန်ကြီးဌာနက ကျင်းပဖို့ရှိပါတယ်၊၊ ဆရာတို့ပြည်သူ့ကျန်းမာရေး ဖောင်ဒေးရှင်းအနေနဲ့လည်းတက်ရောက်သွားဖို့ရှိပါတယ်"လို့ ဒေါက်တာသန်းစိန်က ပြောပါတယ်၊၊

ကမ္ဘာ့ဆေးလိပ်မသောက်ရေးနေ့ အခမ်းအနားမတိုင်မီ ပြည်သူ့ကျန်းမာရေးဖောင်ဒေးရှင်းအနေနဲ့ ပြည်နယ်နဲ့တိုင်းအသီးသီးရှိ ကျေးလက်ဒေသအချို့ကိုသွားပြီး ဆေးလိပ်၊ ဆေးရွက်ကြီးရဲ့ဆိုးကျိုးများကို အသိပညာပေးဟောပြောခြင်းတွေ ဆောင်ရွက်ခဲ့တယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published - 28 May 2022

မြန်မာနိုင်ငံစက်သုံးဆီ တင်သွင်းဖြန့်ဖြူးရောင်းချရေးအသင်းမှ Terminal များမှ တစ်ဆင့် စက်သုံးဆီ အဆက်မပြတ်ထုတ်ပေးနေသည်ဟု ဆိုသော်လည်း မြေပြင်တွင် ဝယ်ရခက်သည့် အခြေ အနေကြုံတွေ့နေရကြောင်း တက္ကစီယာဥ်မောင်းများနှင့် ကိုယ်ပိုင်ယာဥ်မောင်းနှင်သူများက ပြောသည်။

"တချို့ဆိုင်တွေမရဘူး။ ဆိုင်တွေမှာဆိုရင် 92 ဘယ်လောက် 95 ဘယ်လောက်ဆိုပြီး ရေးထားတာတွေရှိတယ်။ အဲ့လိုရေးထားတာမရှိဘူးဆိုရင် ဆီကုန်နေလို့ပဲ။ ဒီဇယ်သီးသန့်တစ်မျိုးတည်းရတော့တယ်။ ဆီစျေးကလည်း နည်းနည်းတော့တက်နေတယ်" ဟု တက္ကစီယာဥ်မောင်း ဦးအောင်ကျော်ဦးက ပြောသည်။

မေလ ၂၈ ရက် ထုတ်ပြန်ကြေညာထားသည့် စက်သုံးဆီစျေးနှုန်းမှာ ၉၅ တစ်လီတာ ၂၁၇၅ ကျပ်၊ ၉၂ တစ်လီတာ ၂၂၈၅ ကျပ်၊ ပရီမီယံဒီဇယ်တစ်လီတာ ၂၂၈၅ ကျပ်၊ ရိုးရိုးဒီဇယ်တစ်လီတာ ၂၃၁၀ ကျပ်ဖြစ်ပြီး ဆီစျေးအနည်းငယ်တတ်သွားကြောင်း သိရသည်။

"95 ကဆိုင်တိုင်းမရဘူး။ မရတာကများတယ်။ တချို့ဆိုင်တွေဆိုရင် ဆီကုန်ပြီလို့ပြောတယ်။ ဆီကလည်းတော်တော်စျေးကြီးတယ်။ ဝယ်ရတာလည်း အခက်အခဲရှိတယ်" ဟု တာမွေမြို့နယ်တွင်နေထိုင်သူ ဦးနေလင်းက ပြောသည်။

အဆိုပါကိစ္စရပ်များနှင့် ပတ်သက်၍ မြန်မာနိုင်ငံစက်သုံးဆီတင်သွင်းဖြန့်ဖြူးရောင်းချရေးအသင်းသို့ဆက်သွယ်မေးမြန်းသော်လည်း ဖုန်းလက်ခံဖြေကြားခြင်းမရှိသေးပါ။

ymg/sth
#Yangon_Media_Group

#LocalNews
Published - 28 May 2022

ပညာရေးဝန်ကြီးဌာနမှ ကျောင်းအပ်နှံခြင်းနှင့် ပတ်သက်၍ ငွေကြေးကောက်ခံမှုမပြုလုပ်ရန် ညွှန်ကြားထားပြီး မြေပြင်အခြေအနေတွင် ကောက်ခံမှုရှိနေပါက ပညာရေးဝန်ကြီးဌာနသို့ တိုင်ကြားနိုင်ကြောင်း အခြေခံပညာဦးစီးဌာန ညွှန်ကြားရေးမှူး ဦးခင်မောင်ထွေးကပြောသည်။

"အပြင်မှာကြားနေရတဲ့သတင်းတွေက အကုန်ဆန့်ကျင်ဘက်ဖြစ်နေတာပေါ့။ ကျွန်တော်တို့ညွှန်ကြားချက်ထဲမှာ အဲဒါတွေမပါဘူး။ ထောက်ခံချက်ဆိုတာက ရန်ကုန်လိုဧရိယာမှာတော့ရှိတယ်။ ကိုယ့်ဧရိယာ သူ့ဧရိယာမကျော်ရဘူးလေ။ အဲ့လိုလေးသတ်မှတ်ချက်တော့ရှိတယ်။ အချိန်မရွေးတိုင်ကြားလို့ရတယ်။ တိုင်ကြားလို့အမှန်တကယ် ဖြစ်နေရင် နိုင်ငံ့ဝန်ထမ်းဥပဒေ နည်းဥပဒေတွေနဲ့ အရေးယူဆောင်ရွက်သွားမယ်" ဟု ယင်းကပြောသည်။

၂၀၂၂-၂၀၂၃ ပညာသင်နှစ်တွင် ကျောင်းအပ်နှံမှု ပိုမိုများပြားလာပြီး ရာနှုန်းပြည့်နီးပါးအပ်နှံမည်ဟု ခန့်မှန်းထားပြီး အစိုးရစာသင်ကျောင်းအပါအဝင် ကိုယ်ပိုင်အထက်တန်းကျောင်းများတွင်လည်း အပ်နှံမှုပိုများလာကြောင်း၊ ယခုပညာသင်နှစ်အတွက် သင်ကြားမှုဆရာ ဆရာမအင်အားလျော့နည်းမှုမရှိစေရန် သင်တန်းဆင်းဆရာဆရာမများကိုခန့်အပ်ထားပြီး သတင်းစာကြော်ငြာတွင်လည်း မူလတန်း၊ အလယ်တန်း၊ အထက်တန်း အတွက် ဆရာဆရာမများခေါ်ယူခန့်အပ်ရန် စီစဥ်ထားကြောင်း သိရသည်။

ymg/sth
#Yangon_Media_Group