ကုလသမဂ္ဂ အတွင်းရေးမှူးချုပ်၏ အထူးကိုယ်စားလှယ် နိုလင်းဟေဇာ၏ သတင်းထုတ်ပြန်ချက်အပြည်အစုံ

( Unofficial Translation)

နေပြည်တော်-

ကုလသမဂ္ဂအတွင်းရေးမှူးချုပ်၏ အထူးကိုယ်စားလှယ် နိုလင်းဟေဇာသည် အထူးကိုယ်စားလှယ်အဖြစ် မြန်မာနိုင်ငံသို့ ပထမဆုံးခရီးတွင် အကြမ်းဖက်မှုများလျှော့ချရေး၊ဘက်ပေါင်းစုံအကျပ်အတည်းများကို ကိုင်တွယ်ဖြေရှင်းရေးနှင့် လူသားချင်းစာနာထောက်ထားမှုအကူအညီများ လိုအပ်နေသော ပြည်သူအားလုံးသို့  ခွဲခြားဆက်ဆံမှုမရှိစေရဘဲ အနှောင်အဖွဲ့မရှိ ရောက်ရှိစေရေးတို့အတွက် လက်တွေ့ကျသော ခြေလှမ်းအဖြစ် လူချင်းတွေ့ဆုံဆွေးနွေးရန် နေပြည်တော်တွင် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်နှင့် တွေ့ဆုံခဲ့ပါသည်။

ဗိုလ်ချူပ်မှူးကြီးနှင့် သူ၏ အကြီးတန်းအကြံပေးများကို  အထူးကိုယ်စားလှယ်၏ တွေ့ဆုံမှုသည် ပြည်သူများ၏ ဆန္ဒနှင့် လိုအပ်ချက်အပေါ်အခြေခံသည့် အရပ်သားအုပ်ချုပ်မှုကို ပြန်လည်‌ရောက်ရှိစေရန် အကျိုးရှိပြီးငြိမ်းချမ်းသည့် မြန်မာက ဦးဆောင်သော နိုင်ငံရေးလမ်းကြောင်းတစ်ခုကို  ကုလသမဂ္ဂ၏ အရေးတကြီး ထောက်ခံအားပေးမှုဖြင့်   ကျယ်ပြန့်စွာ ကြိုးစားအားထုတ်မှု၏ အစိတ်အပိုင်းတစ်ခုဖြစ်ပါသည်။ ဘက်မလိုက်သည့် လှုပ်ရှားဆောင်ရွက်သူတစ်ဦးအဖြစ် အထူးကိုယ်စားလှယ်၏ အခွင့်အာဏာသည်ကုလသမဂ္ဂ၏ အခြေခံမူများနှင့်ကိုက်ညီစွာ မြန်မာနိုင်ငံ၊ဒေသနှင့် ကမ္ဘာကြီးအတွင်းက ပါဝင်ပတ်သက်သူ အားလုံးနှင့် စေ့စပ်ညှိနှိုင်းရန်ဖြစ်ပါသည်။ နိုင်ငံရေးနယ်ပယ်တစ်လွှားက လှုပ်ရှား ဆောင်ရွက်ကြသူများ၊အရပ်ဘက်အဖွဲ့အစည်းများနှင့် ပဋိပက္ခ အကျိူးသက်ရောက်မှုရှိနေသည့် လူ့အဖွဲ့အစည်းများနှင့်  ကျယ်ပြန့်စွာဆွေးနွေးပြီးနောက် အထူးကိုယ်စားလှယ်၏ ခရီးပေါ်ပေါက်လာခဲ့ပါသည်။

“ ကုလသမဂ္ဂ အတွင်းရေးမှူးချုပ်ရဲ့ အထူးကိုယ်စားလှယ်ဟာ လူသားချင်းစာနာထောက်ထားမှုဆိုင်ရာ၊လုံခြုံရေးဆိုင်ရာနှင့် စီးပွားရေးနှင့်လူမှုရေးအကျပ်အတည်းတွေနှင့်ပတ်သက်ပြီး အလွန်အမင်း စိုးရိမ်ပူပန်နေပါတယ်” ဟု အထူးကိုယ်စားလှယ် ဟေဇာကပြောပါသည်။ “ ကျွန်မရဲ့ခရီးဟာ ကုလသမဂ္ဂရဲ့စိုးရိမ်ပူပန်မှုတွေကို ပြောပြဖို့နှင့် ပဋိပက္ခတွေနှင့်ပြည်သူတွေထိခိုက်ခံစားနေရမှုတွေ လျှော့ချနိုင်ရေးအတွက် လိုအပ်တဲ့ တိကျတဲ့ ခြေလှမ်းတွေ  အဆိုပြုဖို့ ဖြစ်ပါတယ် ။ ကုလသမဂ္ဂရဲ့ စေ့စပ်ဆွေးနွေးမှုဟာ တရားဝင်ဖြစ်မှုကို မည်သည့်နည်းနှင့်မျှ အပ်နှင်းပေးခြင်း မဟုတ်ပါ။မြန်မာပြည်သူများသည် ကြောက်ရွံမှုကင်းစွာဖြင့်  ဒီမိုကရေစီအခွင့်အရေးနှင့်  ကိုယ်ပိုင်ဆုံးဖြတ်နိုင်သည့် အခွင့်အရေးများ ရှိပါသည်။ ထိုအခွင့်အရေးများသည်လည်း အားလုံးပါဝင်သော လုပ်ငန်းစဉ်တစ်ခုတွင် ပါဝင်ပတ်သက်သူအားလုံး၏ စေတနာနှင့် ကြိုးပမ်းအားထုထ်မှုများဖြင့်သာ ဖြစ်နိုင်ပါတယ်”ဟု သူမကပြောပါသည်။

ငြိမ်းချမ်းရေးနှင့် မည်သည့် စီးပွားရေးနှင့်လူမှုပြုပြင်ပြောင်းလဲခြင်းမဆို ရရှိစေရန် သော့ချက်ဖြစ်နေသည့် မြန်မာနိုင်ငံရှိ အမျိုးသမီးများကို အကာအကွယ်ပေးရေးနှင့် လုပ်ပိုင်ခွင့်ပေးရေးတို့အတွက် ထောက်ခံအားပေးမှုပေးရန် ကုလသမဂ္ဂအနေဖြင့် အာရုံစိုက်ထားကြောင်းလည်း သူမကဖြည့်စွက်ပြောပါသည်။

မြန်မာနိုင်ငံရှိ မည်သည့်တိုးတက်မှုမဆို အကြမ်းဖက်မှုများအဆုံးသတ်မှုနှင့် အောက်ခြေရှိပြည်သူများ၏ ဘဝများ မြင်သာသိသာသည့် တိုးတက်မှုများရှိသည့်အပေါ် မှီတည်နေကြောင်းလည်း ထုတ်ဖော်ပြောကြားခဲ့ပါသည်။ ကုလသမဂ္ဂက ပြင်းထန်စွာရှုတ်ချခဲ့သည့် ဒီမိုကရေစီတက်ကြွလှုပ်ရှားသူများအပေါ် သေဒဏ်ပေးခဲ့ပြီးနောက် အနာဂတ်တွင်‌သေဒဏ်ပေး ကွက်မျက်ခြင်းများကို တရားဝင် ဆိုင်းငံ့ထားပေးရန်  အထူးကိုယ်စားလှယ်က ဗိုလ်ချူပ်မှူးကြီးထံ တိုက်ရိုက်တောင်းဆိုခဲ့ပါသည်။ နိုင်ငံရေးအကျဉ်းသားများအားလုံး လွှတ်ပေးရန် ကုလသမဂ္ဂအတွင်းရေးမှူးချုပ်၏ တောင်းဆိုမှုကိုလည်း သူမက ထပ်လောင်းပြောဆိုခဲ့ပါသည်။

“ ကုလသမဂ္ဂအတွင်းရေးမှူးချုပ်၏ မေတ္တာရပ်ခံမှုကို အကောင်အထည်ဖော်ပေးဖို့ နစက ကို ကျွန်မတောင်းဆိုခဲ့ပါတယ်” ဟု အထူးကိုယ်စားလှယ်ကပြောပါသည်။ “ ဩစတြေလျစီးပွားရေးပညာရှင် ရှောင်တာနယ်ကို လွှတ်ပေးဖို့ ဩစတြေးလျ အစိုးရရဲ့ အထူး မေတ္တာရပ်ခံချက်ကိုလည်း ကျွန်မ လက်ဆင့်ကမ်းခဲ့ပါတယ်။ အကျဉ်းထောင်ထဲမှာ ဒါမှမဟုတ် အခြားနေရာတွေမှာ ထိန်းသိမ်းခံနေရတဲ့ ကလေးသူငယ်တွေကိုလွှတ်ပေးဖို့ကိုလည်း ကျွန်မ ပုဂ္ဂလိက တောင်းဆိုပါတယ်”

အကြမ်းဖက်မှုပုံစံအားလုံး ချက်ခြင်းရပ်စဲရန်၊လူ့အခွင့်အရေးနှင့် တရားဥပဒေစိုးမိုးရေးကို အပြည့်အဝလေးစားလိုက်နာရန်နှင့် လိုအပ်နေသူများအားလုံးထံ အပြည့်အဝဖြစ်ပြီး ဘေးကင်းလုံခြုံ၊ချုပ်ခြယ်မှုကင်းသော လူသားချင်းဆိုင်ရာ ဆောင်ရွက်ခွင့်များရရှိရေးတို့အတွက် ကုလသမဂ္ဂလုံခြုံရေးကောင်စီ၏ နောက်ဆုံး တောင်းဆိုချက်ကို အထူးကိုယ်စားလှယ်က ချဲ့ထွင်ရှင်းပြခဲ့ပါသည်။ လေကြောင်းဖြင့် ဗုံးကြဲခြင်းနှင့်အရပ်သား နေအိမ်များနှင့် အဆောက်အအုံများကို မီးရှို့ခြင်းတို့ကို အဆုံးသတ်ရန်အပါအဝင် လက်ငင်းနှင့်တိကျသော အရှိန်လျှော့ချရေးအဆင့်များ ဆောင်ရွက်ရန် သူမက တောင်းဆိုခဲ့ပါသည်။

လူမှုအသိုက်အဝန်းများအကြား အရပ်သားများ နေရပ်ပြောင်းရွှေ့နေရခြင်းနှင့်ပတ်သက်၍ နက်ရှိုင်းစွာ စိုးရိမ်ပူပန်ကြောင်းနှင့် ထိခိုက်ခံစားနေရသူများထံ အသက်ကယ်အကူအညီများနှင့်အတူ လူသာချင်းစာနာထောက်ထားရေးဆောင်ရွက်သူများ ရောက်ရှိရေး ပိုမိုကျယ်ပြန့်သော နေရာပေးရန်လိုအပ်ကြောင်းကို အထူးကိုယ်စားလှယ်က ဖော်ပြခဲ့ပါသည်။  လိုအပ်နေသည့် ပြည်သူများထံ လူသားချင်းစာနာထောက်ထားမှုအကူအညီများကို ခွဲခြားဆက်ဆံမှုမရှိ၊ချုပ်ကိုင်ခြယ်လှယ်မှုမရှိဘဲ ပိတ်ဆီးခြင်းမရှိ ချက်ခြင်းပေးပို့နိုင်စေရေး  အဖွဲ့အစည်းအားလုံးက လုပ်ဆောင်ရမည်ကိုလည်း သူမက အလေးပေး ပြောဆိုခဲ့ ပါသည်။   လမ်းကြောင်းအားလုံးမှ ပေးဝေနိုင်ရေး အရေးကြီးမှုကို အလေးပေးပြောဆိုခဲ့ပြီး တိုင်းရင်းသားလက်နက်ကိုင် အဖွဲ့အစည်းအချို့နှင့် အခြား လှုပ်ရှားဆောင်ရွက်သူများက နိုင်ငံရေး အကျပ်အတည်း၏ တိုက်ရိုက် ရလာဒ်ဖြစ်သည့် အရေးပေါ်ကိစ္စများ အာရုံစိုက်နိုင်ရန် လူသားချင်းစာနာထောက်ထားမှု စေ့စပ်ဆောင်ရွက်ရေးဆိုင်ရာ အားလုံးပါဝင်သည့်ဖိုရမ်တစ်ခုကို တည်ထောင်ပေးရန် သူမကို တောင်းဆိုထားသည့်ကိစ္စ တင်ပြခဲ့ပါသည်။

နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့်  သူမအပေါ် နောက်ဆုံးပြစ်ဒဏ်များချမှတ်ပြီးသည့်နောက် တွေ့ဆုံခွင့်ရရန် အထူးကိုယ်စားလှယ်က မေတ္တာရပ်ခံခဲ့ပါသည်။ “ ဒေါ်အောင်ဆန်းစုကြည်ရဲ့ ကျန်းမာရေးနှင့် လက်ရှိအခြေအနေမှာ သူကျန်းမာပျော်ရွှင်ရေးတွေအတွက် ကျွန်မ အထူးစိတ်ပူပန်မိပါတယ်။ အိမ်ကို ခပ်စောစောပဲ သူမပြန်သွားနိုင်အောင်လို့လည်း မေတ္တာရပ်ခံခဲ့ပါတယ်” ဟု အထူးကိုယ်စားလှယ် ဟေဇာကပြောပါသည်။ “ ကျွန်မအနေနှင့် သူမကို မြန်နိုင်သမျှမြန်မြန်တွေ့လိုပါတယ်။  ဒါဟာ ကျွန်မရဲ့တစ်သီးပုဂ္ဂလက ဂရုစိုက်မှုအရရော၊ သက်ဆိုင်တဲ့ အဖွဲ့အစည်းအားလုံးနှင့် ကျွန်မလုပ်ဆောင်နေတဲ့ ဆွေးနွေးမှုတွေမှာ သူမဟာ အရေးကြီးသူတစ်ဦးလို့ ကျွန်မယုံကြည်တာရော ကြောင့်ဖြစ်ပါတယ်”

ယခုလကုန်ပိုင်းတွင် ဘင်္ဂလားဒေ့ရှ်သို့ သွားရောက်ရန်ရှိသည့် သူမ၏ ခရီးမတိုင်ခင် သူမအနေဖြင့် အစိုးရနှင့်တွေ့ဆုံအကြံပေး ပြီး ရိုဟင်ဂျာ တစ်သန်းနှင့် အတင်းအကြပ် နေရပ်ပြောင်းရွှေ့ခံထားရသည့်အခြားသူများကို လက်ခံထားသည့် ကော့ဘာဇားရှိဒုက္ခသည်စခန်းသို့ သွားရောက်မည့် သူမစီစဉ်ထားကြောင်း ဗိုလ်ချူပ်မှူးကြီးကို အထူးကိုယ်စားလှယ်က ပြောကြားခဲ့ပါသည်။  ဒုက္ခသည်များ ဆန္ဒအလျောက် ဘေးကင်းပြီး ဂုဏ်သိက္ခာရှိစွာနှင့် စဉ်ဆက်မပြတ်ပြန်လာရေး အထောက်အကူပေးသည့် အခြေအနေများအတွက် မြန်မာနိုင်ငံ၏ တာဝန်ရှိမှုအပြင် ရိုဟင်ဂျာများ၏ အခွင့်အရေးနှင့် ချမ်းသာသုခများသည် ငြိမ်းချမ်းပြီးကြွယ်ဝချမ်းသာသည့် မြန်မာနိုင်ငံ၏ အနာဂတ်တွင် အသေအချာ ပေါင်းစည်းနိုင်ရေးများကို သူမက အလေးပေးပြောဆိုခဲ့ပါသည်။

အထူးကိုယ်စားလှယ်က ဗိုလ်ချူပ်မှူးကြီးထံ အာဆီယံပဋိညာဉ်၏ အခြေခံဖြစ်သော ကုလသမဂ္ဂ ပဋိညာဉ်စာတမ်းကိုပေးအပ်ခဲ့ပါသည်။ ထို့အပြင် အချုပ်အခြာအာဏာသည် ဘယ်သူတစ်ဦးတစ်ယောက်မျှကျန်ခဲ့၍မရဘဲ  အားလုံးဖွံ့ဖြိုးတိုးတက်မှု၊ နိုင်ငံတိုင်းရှိ လူတစ်ဦးချင်းစီသည် ဂုဏ်သိက္ခာ၊လေးစားမှုနှင့် လိုလားမှုနှင့်ကြောက်ရွံမှုများကင်းပြီး လွတ်လပ်မှုများ ညီတူညီမျှဖြစ်စေရန် ကတိနှင့်အတူ တွဲလာရမည်ကိုပါ အသားပေး ပြောဆိုခဲ့ပါသည်။

ကုလသမဂ္ဂ၏ ပဋိညာဉ်သည် စည်းမျည်းအခြေခံသည့် ကမ္ဘာ့အစီအစဉ်၏ အုတ်မြစ်ဖြစ်ကြောင်း အထူးကိုယ်စားလှယ်က ဗိုလ်ချူပ်မှူးကြီးကို ပြောကြားခဲ့ပြီး ငြိမ်းချမ်းရေးနှင့်တည်ငြိမ်ရေးကို ရရှိလိုလျှင် အဆိုပါသတ်မှတ်ချက်နှင့် စံနှုန်းများနှင့် ကိုက်ညီရမည်ဖြစ်ကြောင်းလည်း ဖြည့်စွက်ပြောကြားခဲ့ပါသည်။

ကုလသမဂ္ဂသည် လူသားချင်းညှာတာထောက်ထားချင်းဆိုင်ရာ အကူအညီများနှင့်လိုအပ်နေသည့် ပြည်သူများထံ လူ့ရပ်ရွာအခြေပြုသည့် ကြံ့ကြံ့ခံသော အထောက်အကူများနှင့် အကာအကွယ်များပေးအပ်ရန် နိုင်ငံတကာ အသိအမှတ်ပြုထားသည့် လူသားဆိုင်ရာ ဘက်မလိုက်သော ၊ကြားနေသော၊လွတ်လပ်သော အခြေခံမူများဖြင့် ထိန်းကျောင်းလျှက်ဆက်လက်ကြိုးပမ်း အားထုတ်သွားမည့် ပြင်းပြသော ကတိကဝတ်ကို အလေးထားပြောကြားခဲ့ပြီး ဗိုလ်ချူပ်မှူးကြီးအနေဖြင့်လည်း ထိုကြိုးပမ်းအားထုတ်မှုများကိုလေးစားထောက်ခံပေးပါရန် တောင်းဆိုခဲ့ပါသည်။

အကာအကွယ်လိုအပ်နေသူများနှင့် မလုံခြုံဆုံးခံစားနေရသူများကိစ္စ ကိုင်တွယ်ဖြေရှင်းရန်နှင့် ပဋိပက္ခချုပ်ငြိမ်းရန် သူမ၏ ပေါင်းကူးဆက်သွယ်ပေးသည့်အခန်းကဏ္ဍနှင့် စုစည်းစည်းရုံးမှု အခွင့်အာဏာ အရှိန်အဝါများဖြင့် ဆက်လက် ဖြေရှင်း ဆောင်ရွက်သွားမည့်အကြောင်းလည်း အလေးပေးခဲ့ပါသည်။

ရှေ့ဆက်လက်၍ အထူးကိုယ်စားလှယ်နှင့် ဗိုလ်ချူပ်မှူးကြီးတို့သည် ငြိမ်းချမ်းပြီး ဒီမိုကရက်တစ်ဖြစ်သော မြန်မာနိုင်ငံအတွက် ပြည်သူများ၏ ဆန္ဒကို ထင်ဟပ်ကာ အားလုံးပါဝင်သော အဖြေများလိုအပ်မှုကို အာရုံစိုက်ရင်း လွတ်လပ်ပွင့်လင်းသော ဆက်ဆံပြောဆိုမှုများဖြင့် စေ့စပ်ဆွေးနွေးသွားကြရန် သဘောတူညီခဲ့ကြပါသည်။

Published 19 August 2022

မြန်မာနှင့်အိန္ဒိယဆက်ဆံရေးကို ယနေ့ နိုင်ငံရေးကိုကြည့်ပြီး ဝေဖန်အကဲဖြတ်လို့မရဘူးလို့ အိန္ဒိယနိုင်ငံ ပြည်ပရေးရာဝန်ကြီး ဆူဘရာမန်ယမ် ဂျေရှန်ကာက ပြောလိုက်ပါတယ်။

ထိုင်းနိုင်ငံ ဘန်ကောက်မြို့က ချူလာလောင်ကွန်တက္ကသိုလ်မှာ ပရိဿတ်တွေကို ဩဂုတ် ၁၈ရက်က မိန့်ခွန်းပြောကြားစဉ်မှာ အိန္ဒိယပြည်ပ ရေးရာ ဝန်ကြီးကပြောကြားခဲ့တာဖြစ်တယ်လို့ စင်္ကာပူမီဒီယာတစ်ခုဖြစ်တဲ့ ချယ်နယ်နယူးအေရှား သတင်း ဌာနက ရေးသားခဲ့ ပါတယ်။

မြန်မာနိုင်ငံအပေါ် အိန္ဒိယရဲ့ရပ်တည်မှုဟာ ဆယ်စုနှစ်များစွာ တစ်သတ်မတ်တည်းရှိပြီး ကိုလိုနီစနစ်ကို တွန်းလှန်ခဲ့ကြတဲ့ လွတ်လပ်ရေးကြိုးပမ်းခဲ့တဲ့ကာလတွေကိုပြန်သွားကြည့်လို့ရတယ် လို့ သူကပြောပါတယ်။

Telegramတွင်ယခုသတင်းဖတ်လိုပါက

အိန္ဒိယဟာ မြန်မာနိုင်ငရဲ့ တိုက်ရိုက်အိမ်နီးချင်းဖြစ်လို့ မြန်မာစစ်အစိုးရကို ဆက်ဆံရေးကို ရှောင်ကွင်းလို့မရဘူးလို့ သူကပြောပါတယ်။ ဘာဖြစ်လို့လဲဆိုတော့ ရာဇဝတ်ဂိုဏ်းတွေ၊ကိုရိုနာဗိုင်းရပ်စ်နှင့် မြန်မာနိုင်ငံထဲမှာ အိန္ဒိယသူပုန်တွေရှိနေ တာစတဲ့ နယ်စပ်ကိစ္စတွေရှိနေလို့ဖြစ်တယ်လို့ ဂျေရှန်ကာ ကပြောပါတယ်။

“ ကျွန်တော်တို့ဟာ အိမ်နီးချင်းနိုင်ငံတစ်ခုအနေနှင့် နယ်စပ်ဆက်ဆံရေးနှင့် ရှုပ်ထွေးမှုတွေကို စီမံခန့်ခွဲဆောင်ရွက်  နေကြတယ်” လို့ သူကပြောပါတယ်။

အိန္ဒိယဟာ မြန်မာရဲ့ အနီးကပ်ဆုံး အိမ်နီးချင်းဖြစ်လို့ မြန်မာ့ဒီမိုကရေစီနှင့်ပတ်သက်ပြီး လူတတ်ကြီးတွေလုပ်နေကြတဲ့ အများကြီးဝေးကွာနေတဲ့ နိုင်ငံတွေနှင့် မတူတဲ့  မျှဝေခံစားမှုနှင့် နားလည်မှုတွေရှိနေတာဖြစ်တယ်လို့ သူကပြောပါတယ်။

စစ်အစိုးရနှင့် ထိတွေ့ဆက်ဆံမှုတွေလုပ်နေပေမယ့် မြန်မာနိုင်ငံအတွက် အကောင်းဆုံးဟာ ဒီမိုကရေစီဖြစ်ပြီး ပြည်သူတွေရဲ့ သဘောထားနှင့် ဆန္ဒတွေကလည်း အဲဒါကို ထင်ဟပ်နေတယ်လို့ ဂျေရှန်ကာကပြောပါတယ်။

Reference: CNA

Published 18 August 2022

နယူးဇီလန်က လေလံပွဲတစ်ခုကနေ ဝယ်ယူခဲ့တဲ့ ခရီးဆောင်လက်ဆွဲသေတ္တာ နှစ်လုံးထဲက ကလေးငယ်(၂)ဦးရဲ့ ရုပ်အလောင်းတွေကို တွေ့ရှိခဲ့ရတယ်လို့ ကြာသပတေးနေ့က ရဲတွေက ပြောပါတယ်။ အဲဒီအတွက်ရဲက တရားခံကို ရှာဖွေဖို့ ကြိုးစားနေကြပါတယ်။

အဲဒီအလောင်းတွေဟာ နှစ်ပေါင်းများစွာ ဒီအထဲ သိမ်းဆည်းထားခဲ့ပုံရတယ်လို့ စုံထောက်တစ်ဦးဖြစ်တဲ့ တိုဖီလော ဖမ်မန်နူအား ဗက်လူရာက ပြောပါတယ်။ ရုပ်ကြွင်းတွေထဲက ကလေးနှစ်ဦးဟာ သူတို့သေဆုံးစဉ်က အသက်ငါးနှစ်နှင့် ဆယ်နှစ်ကြား ဖြစ်ပုံရတယ်လို့ သူကပြောပါတယ်။

အရွယ်တူ ခရီးဆောင်သေတ္တာနှစ်လုံးထဲမှာ ကလေးတစ်ဦးစီ ထည့်သွင်းထားတာဖြစ်ပါတယ်။

“သေဆုံးတဲ့အချိန်နှင့် တွေ့ရှိတဲ့အချိန်နှစ်ခုအကြား အချိန်ခြားနားမှုက စုံစမ်းစစ်ဆေးမှုတွေကိုပြုလုပ်ရာမှာ ရှာဖွေတွေ့ရပုံရဲ့ သဘာဝအရကို  အနည်းငယ် ရှုပ်ထွေးမှုတွေဖြစ်စေပါတယ်” လို့ ဗက်လူရာကပြောပါတယ်။

တောင်အောက်ကလန်မှာရှိတဲ့ ဂိုဒေါင်တစ်ခုမှာ ပစ္စည်းတွေ အစုလိုက်အပြုံလိုက်ကို လေလံပစ်တာကို သံသယမရှိဘဲ ဝယ်ယူမိတဲ့ မိသားစုတစ်စုက အဲဒီရုပ်အလောင်းတွေကို တွေ့ခဲ့တာပါ။

မိသားစုဘယ်သူဆိုတာဖွင့်မပြောတာဟာ လူသတ်မှုနှင့်ဆက်နွယ်တာကြောင့်မဟုတ်ဘဲ အလောင်းတွေတွေ့ရလို့ သူတို့ စိတ်ထိခိုက်ခံစားနေရတာတွေကို စာနာနားလည်လို့ဖြစ်တယ်လို့ ဗက်လူရာကဆက်ပြောပါတယ်။

သေဆုံးသူတွေဘယ်သူဆိုတာသိနိုင်ဖို့ ရဲတွေက အဲဒီခရီးဆောင်သေတ္တာနှင့်အတူပါလာတဲ့အခြား အိမ်သုံးပစ္စည်းတွေကနေ စုံစမ်းဖော်ထုတ်နေကြပါတယ်။

အချိန်ကြာသွားတဲ့အတွက် အဲဒီကလေးတွေကို ဘယ်သူဘယ်ဝါတွေဆိုတာ သိအောင်လုပ်ဖို့ အတော်ရှုပ်ထွေးခက်ခဲနေယ်လို့ ရဲတွေကပြောပါတယ်။

ဒါပေမယ့် အဲဒီခရီးဆောင်သေတ္တာထားခဲ့တဲ့ ဂိုဒေါင်နှင့် အိမ်တွေကိုတော့ မှုခင်းပညာရှင်တွေက စစ်ဆေးနေကြပါတယ်။

အဲဒီအပြင် နယူးဇီလန်ရဲတွေက နိုင်ငံတကာရာဇဝတ်မှုခင်းရဲတပ်ဖွဲ့တွေနှင့်ပါ ချိတ်ဆက်ပြီး အမှုကိုဖော်ထုတ်နိုင်အောင် ကြိုးစာနေကြတယ်လို့ ဗက်လူရာကပြောပါတယ်။

သူတို့မိသားစုတွေက ဒီကလေးတွေ သေသွားခဲ့တာတောင် သိချင်မှသိကြလိမ့်မယ်လို့လည်း သူကပြောပါတယ်။

မျိုးရိုးဗီဇတွေကို စုံစမ်းထောက်လှမ်းမှုကတော့ အတော်တိုးတက်နေပါတယ်လို့တော့ ပြောချင်ပါတယ်လို့ သူကဖြည့်စွက်ပြောပါတယ်။

အလောင်းတွေရှာတွေတဲ့ မိသားစုရဲ့ အိမ်နီးချင်းက အဲဒီမိသားစုရဲ့ အိမ်ကိုစောင့်ရှောက်ပေးနေရတယ်လို့ဆိုပါတယ်။ ဘာဖြစ်လို့လဲဆိုတော့ အဲဒီမိသားစုက မီဒီယာတွေရဲ့ အာရုံစိုက်လာတာကို ရှောင်ရှားချင်လို့ အိမ်ကနေ ထွက်သွားခဲ့ကြတာ ဖြစ်ပါတယ်။

Source: AFP

#New_Zealand

#Bodeis_in_Suitcases_New_Zealand

#Crime_story

Published 17 August 2022

မငြိမ်မသက်ဖြစ်နေတဲ့ ထိုင်းနိုင်ငံတောင်ပိုင်းမှာ ဗုဒ္ဓဟူးနေ့ ဩဂုတ် ၁၇ ရက်က မီးကွင်းပစ်တိုက်ခိုက်မှုတွေကြောင့် နေရာ ဒါဇင်ခန့်မှာ မီးလောင်ပေါက်ကွဲမှုတွေဖြစ်ပြီး လူ(၇)ဦးဒဏ်ရာရရှိခဲ့တယ်လို့ အာဏာပိုင်တွေကပြောပါတယ်။

တိုက်ခိုက်ခံရတဲ့‌ နေရာအများစုဟာ ဓာတ်ဆီဆိုင်တွေအတွင်းက  အလွယ်ဝယ် စတိုးဆိုင်တွေဖြစ်ကြတယ်လို့ အရာရှိတွေက ပြောပါတယ်။ အဲဒီနေရာအားလုံးဟာ ပက်တန်နီ၊ယာလာနှင့် နာရက်သီဝတ် ပြည်နယ်တွေမှာတည်ရှိကြတာဖြစ်ပါတယ်။

အဲဒီဖြစ်ရပ်တွေကြောင့် လူ(၇)ဦးဟာ ထိခိုက်မှု အနည်းအကျဉ်းရှိခဲ့ပါတယ်လို့ ထိုင်းစစ်တပ်ရဲ့ သတင်းထုတ်ပြန်ချက်အရ သိရပါတယ်။ စီစီတီဗွီက အရုပ်တွေနှင့် အခြားအထောက်အထားတွေစုဆောင်နေတယ်လို့ ရဲကပြောပါတယ်။

မီးနှင့် ဒီလိုဘာ့ကြောင့်တိုက်ခိုက်ကြသလဲဆိုတာကိုတော့ ရှင်းရှင်းလင်းလင်းမသိကြရသေးပဲရှိပါတယ်။ စစ်သွေးကြွတွေက  ထိုင်းရဲ့အဲဒီပြည်နယ်နှင့် လုံခြုံရေးတပ်ဖွဲ့တွေကို ပစ်မှတ်ထားတိုက်ခိုက်လေ့တော့ရှိကြပါတယ်။

ကိုရိုနာဗိုင်းရပ်စ်ကပ်ဘေးကြောင့် ထိုင်းတောင်ပိုင်းမှာ ထိုင်းစစ်တပ်နှင့်သူပုန်တွေအကြား ပစ်ခတ်မှုတွေ စဲသွားခဲ့ပါတယ်။ ဒါပေမယ့် ပြီးခဲ့တဲ့အောက်တိုဘာလတုန်းကတော့ ခြောက်ရက်ကြာ တိုက်ပွဲဖြစ်ခဲ့ပြီး လူ(၆)ဦးသေဆုံးခဲ့ရပါတယ်။

ပြီးခဲ့တဲ့ ဇန်နဝါရီလတုန်းကတော့ ထိုင်းအစိုးရနှင့် သူပုန်အဖွဲ့ဖြစ်တဲ့ “ဘာရီဆန် ရီဗိုလူစီ နာရှင်နယ်” အဖွဲ့တို့ (၂)နှစ်အတွင်း ပထမဆုံးအကြိမ်အဖြစ် မလေးရှားနိုင်ငံ ကွာလာလမ်ပူမှာ  လူချင်းတွေ့ဆုံခဲ့ကြပါတယ်။ဒါပေမယ့် ဘာတစ်ခုမှရလာဒ်မထွက်ခဲ့ပါဘူး။

၂၀၀၄ခုနှစ်ဇန်နဝါရီမှာ သူပုန်ထမှုပြန်ဖြစ်ခဲ့ပြီးတဲ့နောက် ထိုင်းနိုင်ငံရဲ့ တောင်ဘက်အစွန်းမှာ လူပေါင်း ၇၀၀၀ကျော်သေဆုံးခဲ့ရပြီး လူပေါင်း တစ်သောင်း သုံးထောင်ငါးရာခန့် ဒဏ်ရာရရှိခဲ့ကြပါတယ်လို့ ပြည်တွင်း ဉာဏ်ကြီးရှင်အဖွဲ့ဖြစ်တဲ့ Deep South Watch ရဲ့အဆိုအရသိရပါတယ်။

Source AFP

#Thailand_Southern

#Arson_Attacks_Thaland

#Thailand_Politics

Published 17 August 2022

နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်ဟာ မြန်မာနိုင်ငံသို့ရောက်ရှိနေတဲ့ ကုလသမဂ္ဂအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ် မစ္စနိုလင်းဟေဇာကို ဩဂုတ်(၁၇)ရက် မွန်းလွဲပိုင်းက နေပြည်တော်မှာ တွေ့ဆုံကြောင်း နစကရဲ့ သတင်းထုတ်ပြန်ချက်အရသိရပါတယ်။

ထိုသို့တွေ့ဆုံရာတွင် မြန်မာနိုင်ငံနှင့်ကုလသမဂ္ဂအကြား ယုံကြည်မှုနှင့်ပူးပေါင်းဆောင်ရွက်မှုမြှင့်တင်နိုင်ရေးကိစ္စအပါအဝင် အခြားကိစ္စတွေ ဆွေးနွေးကြတယ်လို့ သတင်းမှာဖော်ပြထားပါတယ်။

အခြားအသေးစိတ်တော့ ဖော်ပြထားခြင်းမရှိပါဘူး။

အထူးကိုယ်စားလှယ် နိုလင်းဟေဇာဟာ  “ ဆိုးရွားလာနေတဲ့ မြန်မာ့အခြအနေနှင့် လက်ငင်းစိုးရိမ်ပူပန်မှုတွေအပြင် သူမကို တာဝန်ပေးအပ်ထားတဲ့ အခြားနယ်ပယ်နှင့်ဆိုင်တာတွေကိုဆွေးနွေးမယ်လို့ ကုလသမဂ္ဂရဲ့ ပြောရေးဆိုခွင့်ရပုဂ္ဂိုလ် စတက်ဖိန်း ဒူဂျာရစ်က  သူမရဲ့ မြန်မာနိုင်ငံခရီးစဉ်နှင့်ပတ်သက်လို့ သတင်းထုတ်ပြန်ပြောကြားထားပါတယ်။

“ သူမဟာ နိုင်ငံရေး နယ်ပယ်တစ်လွှားက ပါဝင်သူတွေ၊အရပ်ဘက်အဖွဲ့အစည်းတွေနှင့် လက်ရှိပဋိပက္ခဖြစ်နေတဲ့ လူမှုအဖွဲ့ အစည်းတွေနှင့် ကျယ်ပြန့်စွာ ဆွေးနွေးပြီးတဲ့နောက် သူမရဲ့ယခုခရီးဖြစ်လာတာ”လို့လည်း ဒူဂျာရစ်ကပြောကြောင်း ကုလရဲ့ သတင်းထုတ်ပြန်ချက်ထဲမှာဖော်ပြထားပါတယ်။

သူမဟာ စင်္ကာပူက လူ့အခွင့်အရေးလှုပ်ရှားတက်ကြွသူနှင့် အမျိုးသမီးတွေစီးပွားဖွံ့ဖြိုးတိုးတက်ရေးမြှင့်တင်ပေးတဲ့ ကုလရဲ့ UNIFEMကို ၁၉၉၄မှ ၂၀၀၇ အထိ ဦးဆောင်ခဲ့ သူဖြစ်ပါတယ်။ ၂၀၀၇မှ ၂၀၁၄ အထိ ကုလသမဂ္ဂ စီးပွားရေးနှင့် လူမှုရေးကော်မရှင် (အာရှပစိဖိတ်ဒေသ)ရဲ့ အမှုဆောင်အတွင်းရေးမှူးလုပ်ခဲ့သူလည်းဖြစ်တဲ့အကြောင်းသိရပါတယ်။

ymg/knl

Published_ 16 Aug 2022

ရုရှားနိုင်ငံမှ ဝယ်ယူထားသည့် စက်သုံးဆီများ ယခုလကုန်ပြီး မကြာမီ ဝင်ရောက် လာမည်ဖြစ်ပြီး ဆက်တိုက်ဝင်ရောက်လာမည်ဖြစ်ကြောင်း၊ ထိုကြောင့် စက်သုံးဆီနှင့် ပတ်သက်၍ စိုးရိမ်ပူပန်ရန်မလိုကြောင်း နစကဥက္ကဌ ဗိုလ်ချုပ်မှူးကြီးမင်းအောင်လှိုင်က နစက အစည်းအဝေး (၇/၂၀၂၂) တွင် ပြောကြားခဲ့ပါတယ်။

စက်သုံးဆီနှင့်ပတ်သက်၍ ယခုလကုန်အထိ လုံလောက်စွာရှိပြီးဖြစ်ကြောင်း၊ ဝယ်ယူထားပြီးဖြစ်တဲ့ စက်သုံးဆီတင်သင်္ဘောများလည်း မကြာမီဆိုက်ရောက်မည်ဖြစ်ကာ စက်သုံးဆီဈေးနှုန်း ပတ်သက်၍ ကုန်သည်များ ဈေးကစားနေခြင်းသာဖြစ်ကြောင်း၊ သတ်မှတ်ချက်အတိုင်း ရောင်းချပေးရန် ညွှန်ကြားထားပြီးဖြစ်တယ်လို့ ဆိုပါတယ်။

ပြည်တွင်းနိုင်ငံခြားငွေကြေး လဲလှယ်နှုန်းနှင့်ပတ်သက်၍ မြန်မာနိုင်ငံရှိ ဘဏ်အား လုံး၏ ဝင်ငွေထွက်ငွေအခြေအနေ၊ နိုင်ငံခြားကုန်သွယ်မှု ဝင်ငွေထွက်ငွေ အခြေအနေတို အပေါ်တွင်မူတည်ကာ ဗဟိုဘဏ်က တွက်ချက်သတ်မှတ်ခြင်း ဖြစ်တယ် လို့ ဆိုပါတယ်။

ဝိသမလောဘသားများ ဈေးကစားခြင်းကြောင့်ငွေကြေးတည်ငြိမ်မှုမရှိခြင်း ဖြစ်ကာ နိုင်ငံတကာတွင်လည်း စီးပွားရေးကျဆင်းမှုများ တွေ့ကြုံနေကြရပြီး အရန်ငွေကြေး နည်းပါးတဲ့ မိမိတိုနိုင်ငံအတွက်လည်း ထိခိုက်မှုများရှိကြောင်း၊ သို့သော် လက်ရှိကုန်သွယ်မှု စနစ်အရ ပြဿနာမရှိနိုင်ဘူးလို့ ဆိုပါတယ်။

ထို့ပြင် ငြိမ်းချမ်းရေးကိုလည်း ကြိုးပမ်းလုပ်ဆောင်လျက်ရှိကြောင်း၊ အားလုံး တက်ညီလက်ညီတွန်းအားဖြင့် ဆောင်ရွက်သွားရန်လိုကြောင်း၊ ကောင်စီဝင်များ အနေဖြင့်လည်း ရှုထောင့်မျိုးစုံမှ စွမ်းအားရှိသမျှ ပူးပေါင်းဆောင်ရွက်ပေးကြရန် တိုက်တွန်းပြောကြားခဲ့ပါတယ်။

ygm_mnn

#Yangon_Media_Group