#TV Yangon Times Matters အစီအစဉ်
Published_ 2 April 2023

အစီအစဉ်တင်ဆင်သူ ဆရာဟိန်းလတ်က ကျော်ဇင်ဝင်း(Founder and Chief Instructor) နှင့်အတူ...

- "ရှိုးကြီးသိုင်း၊ရှမ်းသိုင်းတက်ထားကြတာများတာဖြစ်ပြီး ရှိုင်းသိုင်းကို ကျောရိုးပင်မအခြေခံပြီးခြေကွက်လက်ကွက်ပြောင်းပြန်ဖြစ်လာတာဆိုတဲ"သိုင်းပြောင်းပြန်ပညာ"စတင်ဖြစ်ပေါ်လာတဲ့အကြောင်း

-နိုင်ငံတကာမှာလည်း သိုင်းပြောင်းပြန်ပညာကိုပျံ့နှံ့အောင် Physical သင်ရိုး၊သိုင်းပြောင်းပြန်သင်ရိုးရယ်တွဲပြီး နိုင်ငံတကာကျောင်းတွေမှာ သင်ကြားပေးလျှက်ရှိကြောင်း

-ကိုရီးယား၊ဂျပန်၊စင်ကာပူ၊တရုတ်၊ကိုရီးယားရောက်နေတဲ့ ညီအစ်ကိုတွေကလည်းသိုင်းပြောင်းပြန်သင်တန်းတွေသင်ကြားပေးလျှက်ရှိကြောင်း"စတဲ့ စိတ်ဝင်စားဖွယ်အကြောင်းအရာများကို ဆွေးနွေးခဲ့ကြပါတယ်။

#YMG #Yangon_Media_Group

#local_news
Published_ 2 April 2023

မကွေးမြို့အနီး အကောင်အထည်ဖော်ဆောင်ရွက်နေသည့် နေရောင်ခြည်စွမ်းအင်နှင့်သဘာဝဓာတ်ငွေ့အင်ဂျင် ပေါင်းစပ်သုံး(Solar+Gas Engine Hybrid) စက်ရုံကိုဒီဇင်ဘာလတွင် ၁၂၀ မဂ္ဂါဝပ်ထုတ်လုပ်နိုင်ရေး ဆောင်ရွက်လျက်ရှိကြောင်း သိရပါတယ်။

လျှပ်စစ်စွမ်းအားဝန်ကြီးဌာနဝန်ကြီး ဦးသောင်းဟန်သည် မကွေးတိုင်းဒေသကြီးဝန်ကြီးများ၊ ဌာနဆိုင်ရာ တာဝန်ရှိသူများနှင့်အတူ မကွေးမြို့အနီးရှိ ၁၂၀ မဂ္ဂါဝပ်ထုတ်လုပ်နိုင်သည့် နေရောင်ခြည်စွမ်းအင်နှင့် သဘာဝဓာတ်ငွေ့အင်ဂျင်ပေါင်းစပ်သုံး (Solar+Gas Engine Hybrid)ဓာတ်အားပေးစက်ရုံ စီမံကိန်းလုပ်ငန်း ဆောင်ရွက်နေမှုအား သွားရောက်ကြည့်ရှုစစ်ဆေးခဲ့ကြောင်း သိရပါတယ်။

မကွေးမြို့အနီးရှိ ၁၂၀ မဂ္ဂါဝပ်ထုတ်လုပ်နိုင်သည့် ဓာတ်အားပေးစက်ရုံစီမံကိန်းသို့ ရောက်ရှိရာ ကုမ္ပဏီတာဝန်ရှိသူများက စီမံကိန်းဆိုင်ရာအချက်အလက်များနှင့် စီမံကိန်းလုပ်ငန်းများ ဆောင်ရွက်နေမှုအခြေအနေတို့ကို ရှင်းလင်းတင်ပြကြပါတယ်။

တင်ပြမှုများအပေါ် ဝန်ကြီးကသတ်မှတ်ရက်များတွင် လျှပ်စစ်ဓာတ်အားထုတ်လုပ်နိုင်ရမည်ဖြစ်သော်လည်း အကြောင်းအမျိုးမျိုးကြောင့် နောက်ကျနေသည်များရှိ၍ ယခုတွင်တည်ဆောက်ရေးလုပ်ငန်းများ စတင်နေပြီဖြစ်ပြီး ထပ်မံသတ်မှတ်ထားသည့်ရက်များတွင် လျှပ်စစ်မီးထုတ်လုပ်နိုင်ရန် လိုအပ်တယ်လို့ ဆိုပါတယ်။

ယင်းသို့ထုတ်လုပ်နိုင်ရန်အတွက် ရောက်ရန်ကျန် စက်ပစ္စည်းများကိုလည်း အမြန်ဆုံးရောက်ရှိအောင်ဆောင်ရွက်ဖို့ တိုက်တွန်းပြောကြားပါတယ်။

ထို့နောက် စီမံကိန်းလုပ်ငန်းခွင်အတွင်း မြေပြုပြင်ခြင်းလုပ်ငန်းဆောင်ရွက်နေမှု၊ Engine Foundation လုပ်ငန်းများဆောင်ရွက်နေမှု၊ ဓာတ်အားပေးစက်များရောက်ရှိနေမှု၊ Construction Power တည်ဆောက်ခြင်းလုပ်ငန်းဆောင်ရွက်ပြီးစီးမှု၊ ခြံစည်းရိုးကာရံခြင်းလုပ်ငန်းဆောင်ရွက်နေမှုနှင့် စီမံကိန်းအဝင်လမ်း တည်ဆောက်ခြင်းလုပ်ငန်း ဆောင်ရွက်ပြီးစီးမှုအခြေအနေတို့အား ကြည့်ရှုစစ်ဆေးခဲ့ပါတယ်။

အဆိုပါ ၁၂၀ မဂ္ဂါဝပ်ထုတ်လုပ်နိုင်သည့် နေရောင်ခြည်စွမ်းအင်နှင့် သဘာဝဓာတ်ငွေ့ အင်ဂျင်ပေါင်းစပ် သုံး (Solar+Gas Engine Hybrid) ဓာတ်အားပေးစက်ရုံစီမံကိန်းသည် မကွေးတိုင်းဒေသကြီး မကွေး မြို့နယ် သပြေစမ်းကျေးရွာအနီးရှိမြေဧရိယာ ဧက ၄၉၀ ပေါ်တွင် တည်ဆောက်လျက်ရှိပြီး စက်တပ်ဆင်အင်အားမှာ ၁၂၀ မဂ္ဂါဝပ်ဖြစ်ပါတယ်။

စီမံကိန်းတစ်ခုလုံး ပြီးစီးပါက ထွက်ရှိလာမည့် ဓာတ်အားများကို ၁၃၂ ကေဗွီ မကွေးပင်မဓာတ်အားခွဲရုံမှတစ်ဆင့် နိုင်ငံတော် ဓာတ်အားစနစ်သို့ ချိတ်ဆက်ပို့လွှတ်ဖြန့်ဖြူးသွား မှာဖြစ်ပါတယ်။

မကွေးတိုင်းဒေသကြီး၌ နေရောင်ခြည်စွမ်းအင်သုံး လျှပ်စစ်ဓာတ်အားများ ထပ်မံထုတ်လုပ်နိုင်ရန် စီမံဆောင်ရွက်လျက်ရှိကြောင်း သတင်းရရှိပါတယ်။

ymg_mnn
#မကွေးမြို့ #နေရောင်ခြည်စွမ်းအင်နှင့်သဘာဝဓာတ်ငွေ့အင်ဂျင် #ဓာတ်အားပေးစက်ရုံစီမံကိန်း
#YMG #Yangon_Media_Group

 #local_news
Published_ 2 April 2023

လက်ရှိတွင် စားသုံးဆီလက်ကျန် တန်ချိန် ၃ သောင်းကျော်ရှိပြီး ဧပြီလအတွင်း တန်ချိန် ၄ သောင်းခွဲကျော် ထပ်မံရောက်ရှိမည်ဖြစ်ကြောင်း မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်းမှ သိရပါတယ်။

သင်္ကြန်ကာလ၌ လက်ကျန်စားသုံးဆီ တန် ၃၀၀၀၀ ရှိပြီး သင်္ကြန်မတိုင်မီမှာ သင်္ဘောရှစ်စင်းနဲ့ တန်ချိန် ၃၅၀၀၀ ခန့် ထပ်မံရောက်ရှိမည်ဖြစ်၍ စုစုပေါင်း တန်ချိန် ၆၅၀၀၀ ရှိမည်ဖြစ်ကာ၊ သင်္ကြန်အပြီး၌ တန်ချိန် ၁ သောင်းကျော်ရှိ သင်္ဘောနှစ်စင်း ထပ်မံရောက်ရှိမည်ဖြစ်ကာ အားလုံးပေါင်း တန်ချိန် ၇သောင်းခွဲကျော် ရှိမှာဖြစ်ပါတယ်။

ဧပြီလ၌ သင်္ကြန်ကာလအခါကြီးရက်ကြီးတွေမှာ အလှူအတန်းများပြား၍ စားသုံးသူတွေကို အလုံအလောက် စားသုံးနိုင်ရန်အတွက် တင်သွင်းထားခြင်းဖြစ်တယ်လို့ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ သိရပါတယ်။

စားသုံးဆီတင်သွင်းမှုပိုင်းတွင်စားသုံးဆီကို ပြည်သူတွေအတွက် ကျန်းမာရေးနဲ့ညီညွတ်တဲ့ စားသုံးဆီဖြစ်စေရေး၊ စားသုံးသူများထံကို သင့်တင့်မျှတတဲ့ဈေးနှုန်းနဲ့ ရောင်းချနိုင်ဖို့နှင့် ဆီဖူလုံမှုရှိအောင် ဆောင်ရွက်နေတယ်လို့ ဆိုပါတယ်။

လက်ရှိအချိန်တွင် စားသုံးဆီလက်ကျန် တန်ချိန် ၃ သောင်းကျော်ခန့် ရှိပြီး သင်္ကြန်မတိုင်မီ ဆီတင်သင်္ဘောကြီးရှစ်စင်းဖြင့် ဆီတန်ချိန် ၃ သောင်းခွဲ ထပ်ရောက်မည်ဖြစ်ပြီး သင်္ကြန်ကာလပြီးလျှင်လည်း ဆီသင်္ဘောကြီးနှစ်စင်းဖြင့် ဆီတန်ချိန် ၁ သောင်းကျော် ထပ်မံရောက်ရှိလာမည်ဖြစ်ရာ စုစုပေါင်းဧပြီကာလအတွင်း ဆီတန်ချိန် ၇ သောင်း ၆ ထောင်ခန့်ရှိဖြစ်ကြောင်း မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ သိရပါတယ်။

ymg_mnn
#စားသုံးဆီ # မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်း
#YMG #Yangon_Media_Group

#Local_News
Published-2 April 2023

မြန်မာနိုင်ငံ၌ အိမ်ရှင်အဖြစ်လက်ခံကျင်းပမည့် ၂၀၂၄ ပါရီအိုလံပစ် အမျိုးသမီးဘောလုံးပြိုင်ပွဲ အာရှဇုန် ခြေစစ်ပွဲ ပထမအဆင့် အုပ်စု(ခ)တွင် အိမ်ရှင်မြန်မာ၊ အီရန်၊ ဘင်္ဂလားဒေ့ရှ်၊ မော်လ်ဒိုက်စ်တို့ ကျရောက်ခဲ့ပြီး ဘင်္ဂလားဒေ့ရှ်၊ မော်လ်ဒိုက်စ်အသင်းတို့ ပြိုင်ပွဲမှ နုတ်ထွက်ခဲ့သည့်အတွက် အိမ်ရှင်မြန်မာအသင်းနှင့် အီရန်အသင်း (၂)သင်းသာ ဆက်လက်ယှဉ်ပြိုင်ရမည်ဖြစ်ကြောင်း မြန်မာနိုင်ငံဘောလုံးအဖွဲ့ချုပ်က သိရသည်။

အာရှဘောလုံးအဖွဲ့ချုပ်မှ ဘင်္ဂလားဒေ့ရှ်၊ မော်လ်ဒိုက်စ်အသင်းတို့၏ နုတ်ထွက်မှုကို လက်ခံခဲ့ပြီးနောက် အသစ်ပြန်လည် ရေးဆွဲခဲ့သည့် ပွဲစဉ်ဇယားကို ပြန်လည်ပြုပြင်ရေးဆွဲမှုအရ မြန်မာအသင်းနှင့် အီရန်အသင်းတို့ အိမ်ကွင်း၊ အဝေးကွင်းစနစ်ဖြင့် (၂)ပွဲ ယှဉ်ပြိုင်ရမည်ဖြစ်ပြီး အဆိုပါပွဲစဉ် (၂)ပွဲလုံးကို မြန်မာနိုင်ငံတွင်သာ ယှဉ်ပြိုင်ကစားမည်ဖြစ်ကြောင်း သိရသည်။

မြန်မာအသင်းနှင့်အီရန်အသင်းတို့သည် ဧပြီလ (၅)ရက်နှင့် (၈)ရက်၊ မြန်မာ စံတော်ချိန်ညနေ (၄)နာရီ အချိန် သုဝဏ္ဏဘောလုံးကွင်း၌ ယှဉ်ပြိုင်ကစားမည်ဖြစ်ပြီး နှစ်ပွဲပေါင်း ရမှတ်အများဆုံးရရှိသည့်အသင်းအနေဖြင့်၂၀၂၄ ပါရီအိုလံပစ် အမျိုးသမီးဘောလုံးပြိုင်ပွဲ အာရှဇုန်ခြေစစ်ပွဲ ဒုတိယအဆင့်သို့ တက်ရောက်ခွင့်ရရှိမည်ဖြစ်ကြောင်း သိရသည်။

ယင်းတွင် အကယ်၍ ၂ပွဲကစားပြီး ရမှတ်တူခဲ့ပါက ဧပြီလ ၈ ရက်ယှဉ်ပြိုင်မည့်ပွဲစဉ်အပြီး အချိန်ပို ၃၀ မိနစ် ဆက်လက်ကစားမည်ဖြစ်ကာ ပွဲကစားချိန်အတွင်း အနိုင်အရှုံးရလဒ်မပေါ်ခဲ့ပါက ပင်နယ်တီ အဆုံးအဖြတ် ဆက်လက်ခံယူရမည်ဖြစ်ကြောင်း သိရသည်။

ymg/mt
#ပါရီအိုလံပစ် #အမျိုးသမီးဘောလုံးပြိုင်ပွဲ #အာရှဇုန်ခြေစစ်ပွဲ #မြန်မာနှင့်အီရန်
#YMG #Yangon_Media_Group

#Local_News
Published-1 April 2023

ဂျပန်ကုမ္ပဏီ (၂၈၀)ကျော်​က မြန်မာအလုပ်သမားဦး​ရေ (၈၀၀)​ကျော်​ ခေါ်ယူမည်ဖြစ်ကြောင်း ဂျပန်​နိုင်​ငံ၊ တိုကျိုမြို့ရှိ မြန်မာသံရုံးက မတ်​လ ၃၁ ရက်​​တွင်​ ထုတ်ပြန်​လိုက်​သည်​။

အဆိုပါထုတ်ပြန်ချက်အရ မြန်မာသံရုံး၊ တိုကျိုမြို့အနေဖြင့် အလုပ်သမားဝန်ကြီးဌာနက နိုင်ငံခြားရေးဝန်ကြီးဌာနမှတစ်ဆင့် ပေးပို့လာသည့် အလုပ်ကမ်းလှမ်းစာ (Demand Letter) များကို အချိန်နှင့်တစ်ပြေးညီ စိစစ်ဆောင်ရွက်ပေးလျက်ရှိကြောင်း သိရသည်​။

ထိုသို့ စိစစ်ဆောင်ရွက်ရာတွင် ဂျပန်နိုင်ငံရှိ အလုပ်သမားကြီးကြပ်ရေးကုမ္ပဏီနှင့် အလုပ်ခေါ်ယူသည့် စက်ရုံ/ ကုမ္ပဏီများသည် ဂျပန်နိုင်ငံတွင် တရားဝင်တည်ထောင်ထားခြင်း ရှိ/ မရှိ စာရွက်စာတမ်း အထောက်အထားများ စိစစ်ပြီး စိစစ်တွေ့ရှိချက် များ၊ သဘောထားမှတ်ချက် များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့လျက်ရှိကြောင်း သိရသည်။

မြန်မာသံရုံး၊ တိုကျိုမြို့မှ (၂၀၂၃) ခုနှစ်၊ ​မတ်​လ (၁၆) ရက်​နေ့မှ ​မတ်​လ (၃၁) ရက်​​နေ့အတွင်း စိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့သည့် အလုပ်ကမ်းလှမ်းစာ (၂၈၄) ခုနှင့် ပတ်သက်သည့် အချက်အလက် များအား အသိပေးအကြောင်းကြားအပ်ပါသည်​ဟု ပါရှိပြီး
အဆိုပါထုတ်​ပြန်​ချက်​အရ ဂျပန်ကုမ္ပဏီ (၂၈၄)ခုက မြန်မာအလုပ်သမား အမျိုးသား (၃၀၀)​​ကျော်​၊ အမျိုးသမီး(၄၀၀)​ကျော်​၊ စုစု​ပေါင်း ဦး​ရေ(၈၀၀)​ကျော်​ ခေါ်ယူမည်ဖြစ်ကြောင်း သိရသည်။

မတ်​လ (၁) ရက်​မှ ​မတ်​လ (၁၅) ရက်​​နေ့အတွင်းကလည်း နိုင်ငံခြားရေးဝန်ကြီးဌာနသို့ စိစစ်ပေးပို့ပြန်ကြားခဲ့​သော အလုပ်ကမ်းလှမ်းစာ (၂၀၆) ခုတွင် မြန်မာအလုပ်သမား အမျိုးသား၊ အမျိုးသမီး စုစုပေါင်း ဦး​ရေ (၈၀၀)​​ကျော်​ ခေါ်ယူမည်ဖြစ်ကြောင်း မြန်မာသံရုံး၊ တိုကျိုမြို့က ထုတ်ပြန်ခဲ့သည်​။

#ymg/mt
#ဂျပန်ကုမ္ပဏီ(၂၈၀)​ကျော်​ #မြန်မာအလုပ်သမား(၈၀၀)​ကျော်​
#YMG #Yangon_Media_Group

#Local_News
Published-1 April 2023

ရခိုင်ပြည်နယ်အတွင်းရှိ လေယာဉ်ကွင်းများ ကို အဆင့်မြှင့်တင်ရန် ဆောင်ရွက်လျက်ရှိကြောင်း နိုင်ငံတော်စီမံအုပ်ချုပ်ရေးကောင်စီကသိရသည်။

အဆိုပါလေယာဉ်ကွင်းများ အဆင့်မြှင့်တင်ရန် လုပ်ဆောင်နေသည်ကို နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ဧပြီလ ၁ ရက်တွင် ကြည့်ရှုစစ်ဆေးခဲ့ကြောင်း သိရသည်။

ယင်းအဆင့်မြှင့်မည့် လေယာဉ်ကွင်းများဖြစ်သော စစ်တွေ၊ ကျောက်ဖြူနှင့် သံတွဲလေယာဉ်ကွင်းများ၏ သမိုင်းအကျဉ်းနှင့် လေယာဉ်ကွင်းဆိုင်ရာ အချက်အလက်များ၊ လေယာဉ်များဆင်းသက်နိုင်မှု၊ လေဆိပ် ဆိုင်ရာအချက်အလက်များ၊ လေဆိပ်အထောက်အကူပြုစက်ကိရိယာများနှင့် လေကြောင်းဆက်သွယ်ရေးစက်များတပ်ဆင်ထားမှု၊ လုံခြုံရေးစက်ပစ္စည်းများတပ်ဆင်ထားရှိမှု၊ လေယာဉ်ပြေးလမ်းများနှင့် လေဆိပ်များ တိုးချဲ့တည်ဆောက်ခြင်းနှင့် အဆင့်မြှင့်တင်မှု လုပ်ငန်းများ အဆင့်လိုက်ဆောင်ရွက်နိုင်ရေး ဆက်လက်ဆောင်ရွက်သွားမည့် အခြေအနေများကို နိုင်ငံတော်စီမံအုပ်ချုပ်ရေးကောင်စီဥက္ကဋ္ဌထံ သက်ဆိုင်ရာဌာနများအနေဖြင့် တင်ပြကြကြောင်းလည်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

နစကဥက္ကဌက လေယာဉ်ကွင်းများတိုးချဲ့ခြင်းနှင့် အဆင့်မြှင့်တင်မှုများဆောင် ရွက်ရာတွင် လေယာဉ်ပြေးလမ်းများကို ရေရှည်အတွက် မျှော်တွေးပြီး စနစ်တကျတွက်ချက် ဆောင်ရွက်ရန်လိုကြောင်း၊ လေယာဉ်ပြေးလမ်းများ တိုးချဲ့အဆင့်မြှင့်တင်ရာတွင် သတ်မှတ်စံချိန်စံညွှန်းနှင့် ကိုက်ညီမှုရှိစေရန် ၊ လေယာဉ်ရပ်နားရန်နေရာများ တည်ဆောက်ရာတွင်လည်း စနစ်တကျတည်ဆောက်ရန်လိုကြောင်းပြောကြားခဲ့သည်။

ယင်းအပြင် ကျောက်ဖြူရေနက်ဆိပ်ကမ်းမှာနောင်အချိန်တွင် ဆိပ်ကမ်းစက်မှုလုပ်ငန်းများတိုးတက်လာပြီး ကုန်သွယ်မှုများပါ မြင့်တက်လာနိုင်ခြင်းကြောင့် နိုင်ငံခြားခရီးသွားများလည်း ပိုမိုဝင်ရောက်လာနိုင်ပြီး ကုန်တင်လေယာဉ်ကြီးများပါ ဝင်ရောက်လာနိုင်သဖြင့် လေယာဉ်ပြေးလမ်းတိုးချဲ့ရာ၌ ၎င်းအတွက်လည်း မျှော်မှန်းဆောင်ရွက်သွားရန်လည်း နစက ဥက္ကဌကဆိုသည်။

စစ်တွေလေယာဉ်ကွင်းမှာ ပြည်နယ်၏မြို့တော်ကွင်းဖြစ်သောကြောင့် A-320 ၊ B-737 စသည့် လေယာဉ်များ ဆင်းသက်နိုင်မည့် လေယာဉ်ပြေးလမ်းတိုးချဲ့ ခြင်းနှင့် လေဆိပ်တိုးချဲ့အဆင့်မြှင့်တင် ဆောင်ရွက်ခြင်းကို အဆင့်လိုက်ဦးစားပေးအနေဖြင့် ဆောင်ရွက်ရန်၊သံတွဲလေယာဉ်ကွင်းသည်လည်း ပြည်တွင်း၊ ပြည်ပခရီးသွားများဝင်ရောက်မှုများပြားသည့်အတွက် ဂျက်လေယာဉ်များ ဆင်းသက်နိုင်သည်အထိ မြှင့်တင်ဆောင်ရွက်ရန်လည်း နစက ဥက္ကဌကပြောကြားခဲ့ကြောင်း သိရသည်။

ymg/mt
#ရခိုင်ပြည်နယ် #လေယာဉ်ကွင်းများအဆင့်မြှင့်တင်
#YMG #Yangon_Media_Group