Published_ 06 October 2023

လျှပ်စစ်လိုအပ်ချက်ရှိနေ၍ ကာဇက်စတန်နိုင်ငံမှ ပတ်ဝန်းကျင်မထိခိုက်စေဘဲ ကျောက်မီးသွေးမှလျှပ်စစ်ထုတ် ယူနိုင်ရေးနည်းပညာများကို မြန်မာနိုင်ငံမှစွမ်းအင်ဝန်ကြီးဌာန၊ ပြည်ထောင်စုဝန်ကြီးနှင့်အဖွဲ့ဝင်များက လေ့လာခဲ့ကြောင်း သိရသည်။

ရှန်ဟိုင်းပူးပေါင်းဆောင်ရွက်မှုအဖွဲ့၏ စွမ်းအင်ဖိုရမ်ကိုတက်ရောက်ရန် မြန်မာနိုင်ငံမှ စွမ်းအင်ဝန်ကြီးဌာန၊ ပြည်ထောင်စုဝန်ကြီးနှင့်အဖွဲ့သည် ကာဇက်စတန်နိုင်ငံ Astanaမြို့သို့ရောက်ရှိခဲ့ခြင်းဖြစ်ပြီး ကာဇက်စတန်နိုင်ငံ မှစွမ်းအင်ဝန်ကြီးနှင့်တွေ့ဆုံခဲ့ခြင်းဖြစ်သည်။

မြန်မာ-ကာဇက်စတန် နှစ်နိုင်ငံ စွမ်းအင်ဝန်ကြီးနှစ်ဦးတွေ့ဆုံစဉ် မြန်မာနိုင်ငံမှစွမ်းအင်ဝန်ကြီးက ‘မြန်မာနိုင်ငံတွင်ကျောက်မီးသွေးထွက်ရှိသော်လည်းထိရောက်စွာအသုံးမချနိုင်သေးကြောင်း၊မိမိတို့နိုင်ငံတွင် လျှပ်စစ်ဓာတ်အားလိုအပ်ချက်ရှိနေ၍ကျောက်မီးသွေးမှ လျှပ်စစ်ထုတ်ယူရန်လည်းကြိုးပမ်းလျက်ရှိနေကြောင်း၊ ကာဇက်စတန်နိုင်ငံသည်ကျောက်မီးသွေးထွက်ရှိသည့်နိုင်ငံဖြစ်သလို လျှပ်စစ်ဓာတ်အားထုတ်လုပ်မှု၏၇၀ရာ ခိုင်နှုန်းကိုကျောက်မီးသွေးမှထုတ်လုပ်လျက်ရှိသည်ဟုသိရှိရကြောင်း၊

ယင်းကဲ့သို့ထုတ်လုပ်လျက်ရှိသည့်အတွက် ပတ်ဝန်းကျင်မထိခိုက်စေဘဲ ကျောက်မီးသွေးမှလျှပ်စစ်ထုတ်ယူနိုင်ရေး နည်းပညာ၊Human Resourceဆိုင်ရာများ၊အထူးသဖြင့်ရေနံရှာဖွေရေးဘာသာရပ်၊ရေနံအင်ဂျင်နီယာဘာသာရပ်၊ ရေနံဓာတုဗေဒဘာသာရပ်နှင့်သတ္တုဗေဒဘာသာရပ်များကို Academicသာမဟုတ်ဘဲ On Job Trainingများပေး နိုင်ရန်ဆွေးနွေးပြောကြားခဲ့သည်။

အဆိုပါကာဇက်စတန်နိုင်ငံမှကျောက်မီးသွေးစက်ရုံများသည် ကျောက်မီးသွေးနှင့် သဘာဝဓာတ်ငွေ့နှစ်မျိုးလုံး အသုံးပြုနိုင်သည့် လျှပ်စစ်ဓာတ်အားပေးစက်ရုံဖြစ်ပြီး လောင်ကျွမ်းပြီးကျောက်မီးသွေးပြာများကို နည်းပညာ အသုံးပြုပြီး အဆင့်ဆင့်သန့်စင်ကြောင်း၊၉၉ရာခိုင်နှုန်းသန့်စင်ပြီးလေထဲသို့လွှင့်ထုတ်ကြောင်း၊ ပတ်ဝန်းကျင် ထိခိုက်မှုမရှိကြောင်း ပြည်ထောင်စုဝန်ကြီးကို ရှင်းလင်းတင်ပြခဲ့ကြောင်း သိရသည်။
#Yangon-Times/tthl
#Local_News
#YMG #Yangon_Times #Yangon_Media_Group