Published-14 Jan 2022
မြန်မာနိုင်ငံမှာ ငြိမ်းချမ်းရေးခြေလှမ်းသစ်အနေနဲ့ ယခုနှစ်အတွင်း အဆင့်တစ်ခုရောက်အောင် ဆောင်ရွက်သွားမှာ ဖြစ်ပြီး အနည်းဆုံး အပစ်ခတ်ရပ်စဲရေးအဆင့်ထိလုပ်ဆောင်ပေးနိုင်မယ်လို့ နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်း ပြောပါတယ်။
ယခု ၂၀၂၂ ခုနှစ်အတွင်း ငြိမ်းချမ်းရေးအတွက် ခြေလှမ်းအသစ်တွေကို စတင်ပြီး နောက်ထပ်ခရီးဆက်နိုင်အောင်ဆောင်ရွက်သွားမယ်လို့ ဗိုလ်ချုပ်ဇော်မင်းထွန်း က ဒီကနေ့(ဇန်နဝါရီ ၁၄)ရက်တွင်
နေပြည်တော်မှာ ပြုလုပ်ခဲ့တဲ့ နစက၏ (၁၁)ကြိမ်မြောက် သတင်းစာရှင်းလင်းပွဲမှာ ထည့်သွင်းပြောကြားခဲ့ပါတယ်။
"ငြိမ်းချမ်းရေးမရှိတဲ့အတွက် ကျနော်တို့ရဲ့ ခွန်အားတွေ စွမ်းအားတွေ ကျနော်တို့ရဲ့ အချိန်တွေဟာ ဒီအပေါ်မှာဘဲကုန်ခဲ့ရတယ်။ တိုင်းပြည်ဖွံ့ ဖြိုးတိုးတက်ရေး အပေါ်မှာ အားစိုက်သင့်သလောက်အားမစိုက်ရဘူး။ ဒါကြောင့်မို့ ငြိမ်းချမ်းရေးကို လုပ်ဆောင်မယ်၊ ၂၀၂၂ မှာ လုပ်ဆောင်မယ်ဆိုပြီးပြောတာပါ။ ၂၀၂၂ ဟာတစ်နှစ်ထဲ ဆိုပေမယ့်ရောက်နိုင်တဲ့ အဆင့်ထိရောက်အောင်ဆောင်ရွက်ပါမယ်။ နောက် ငြိမ်းချမ်းရေးအတွက် ခြေလှမ်းအသစ် နိုင်ငံရေးပါတီတွေအနေနဲ့ UEC နဲ့ တွေ့ဆုံနေတာရှိပါတယ်။ ငြိမ်းချမ်းရေးဦးဆောင်မှု ညှိနှိုင်းအဖွဲ့တွေ့ဆုံနေတာရှိပါတယ်။ ဒီတွေမှာ ကျနော်တို့ လမ်းဖွင့်ပေးထားပါတယ်။ ဒါတွေကတော့ ညှိနှိုင်းမှုပေါ့လေ၊ ညှိနှိုင်းဆွေးနွေးရင်းကနေ နောက်ထပ်ခရီးဆက်နိုင်ဖို့ဆောင်ရွက်ထားတာဖြစ်ပါတယ်။"လို့ ဗိုလ်ချုပ်ဇော်မင်းထွန်း က ပြောကြားခဲ့တာပါ။
ထို့အပြင် ၄င်းက "တွေ့ဆုံးဆွေးနွေးတဲ့ လုပ်ငန်းတွေ လုပ်ဆောင်သွားမှာ ဖြစ်သလို ဒီနှစ်အတွင်းမှာ အဆင့်တစ်ခုရောက်အောင် အနည်းဆုံး အပစ်ခတ်တိုက်ခိုက်မှုရပ်စဲအောင် ကျွန်တော်တို့ ဆောင်ရွက်ပေးနိုင်မှာဖြစ်တယ်။ ဒါ့အတွက်လည်း ဆောင်ရွက်လျက်ရှိပါတယ်” လို့ သူကဆက်ပြောပါတယ်။
ငြိမ်းချမ်းရေးအတွက် လုပ်ဆောင်ရာမှာလည်း ဘယ်သူ ဘယ်သူ့မှ အပြစ်မတင်ဘဲလုပ်ဆောင်ဖို့ လိုမယ်လို့ ဗိုလ်ချုပ်ဇော်မင်းထွန်းက တိုက်တွန်းပြောကြားခဲ့ပါသေးတယ်။
"ငြိမ်းချမ်းရေးဟာ အဓိက လိုအပ်ချက်ဖြစ်တယ်ဆိုတာ အစိုးရအဆက်ဆက်က ဖော်ထုတ်ခဲ့ပါတယ်။ ဒီငြိမ်းချမ်းရေး မရှိလို့သာကျနော်တို့ တိုင်းပြည်တိုးတက်မှုမရှိတာပေါ့။ သို့သော်လက်တွေ့ ဖြစ်နိုင်တဲ့ဟာ လုပ်နိုင်တဲ့ဟာ ပြေလည်သွားတယ်ဆိုတာက အားလုံးဖြေရှင်းပေးနိုင်တယ်ဆိုတာ မရှိတာကိုတွေ့ရပါတယ်။ ဘယ်လိုပဲပြောပြော ဒီမိုကရေစီ အသွင်ကူးပြောင်းကာလမှာ ၂၀၁၅ မှာ NCA လက်မှတ်ရေးထိုးနိုင်တာဟာ နိုင်ငံတကာအဖွဲ့အစည်းတွေ အပါအဝင် ပေါ့လေ။ လက်မှတ်ရေးထိုးနိုင်တာဟာ သမိုင်းမော်ကွန်းတစ်ရပ်ဖြစ်ပါတယ်။"လို့ ဗိုလ်ချုပ်ဇော်မင်းထွန်းက ဒီကနေ့ သတင်းစာရှင်းလင်းပွဲမှာ ပြောကြားခဲ့တာပါ။
ဒါ့အပြင် လက်ရှိဖြစ်ပေါ်နေတဲ့ နိုင်ငံရေးအကြပ်အတည်းတွေကို ဖြေရှင်းနိုင်ရေးအတွက် သက်ဆိုင်သူများအားလုံးပါဝင်သော အဓိပ္ပယ်ပြည့်ဝသည့် နိုင်ငံရေးဆွေးနွေးပွဲများနဲ့သာဖြေရှင်းနိုင်မယ်လို့တစ်နိုင်ငံလုံးပစ်ခတ် တိုက်ခိုက်မှုရပ်စဲရေးသဘောတူစာချုပ်လက်မှတ်ရေးထိုးထားသော တိုင်းရင်းသားလက်နက်ကိုင်တော်လှန်ရေး အဖွဲ့အစည်းများရဲ့ ငြိမ်းချမ်းရေးလုပ်ငန်းစဥ် ဦးဆောင်အဖွဲ့ PPSTကလည်း ဇန်နဝါရီလ ၇ ရက်နေ့က ထုတ်ပြန်ချက်တစ်ခုထုတ်ပြန်ကြေငြာထားခဲ့တာဖြစ်ပါတယ်။
ymg/kg
#Yangon_Media_Group
