#World_News
Published 11 January 2023
ဇန်နဝါရီ ၁၀ ရက်နေ့မှာ စင်္ကာပူသို့ထွက်ခွာမည့် Scoot လေကြောင်းလိုင်းလေယာဉ်တစ်စင်းဟာ လေပေါ်မတက်ခင်မှာပဲ ပါဝါဘဏ် Power Bank တစ်ခုကနေ မီးထလောင်ခဲ့တာကြောင့် ခရီးသည် ၂ ဦး ဒဏ်ရာရရှိခဲ့ပါတယ်။
"ဇန်နဝါရီ ၁၀ ရက်နေ့မှာ ထိုင်ပေကနေ စင်္ကာပူသို့ပျံသန်းမယ့် Scoot လေယာဉ် TR993 ဟာ မြေပြင်မှာပြေးနေဆဲမှာပဲ ခရီးသည်တစ်ဦးရဲ့ ပါဝါဘဏ်ကနေ အပူလွန်လောင်ကျွမ်းခဲ့တာကြောင့် လေယာဉ်ဂိတ်သို့ ပြန်လှည့်ခဲ့ရပါတယ်" လို့ Scoot လေကြောင်းလိုင်းက CNA ထံ ပြန်ကြားခဲ့ပါတယ်။
လေယာဉ်က ဂိတ်သို့ ဘေးကင်းစွာပြန်ရောက်လာခဲ့ကြောင်း သိရပါတယ်။
ပါဝါဘဏ်ပိုင်ရှင်နဲ့ သူ့နဲ့အတူပါလာသူတို့ လက်ချောင်းတွေမှာ ဒဏ်ရာရခဲ့ပြီး ဆေးကုသစောင့်ရှောက်မှု ပေးခဲ့ပါတယ်။
"ခရီးစဉ်ကို အချိန်ရွှေ့ပြောင်းဖို့စီစဉ်နေပြီး ပါဝင်ခဲ့တဲ့ခရီးသည်တွေအတွက် နေထိုင်ရေးနဲ့ စားသောက်ရေး စီစဉ်ပေးမှာဖြစ်ပါတယ်" လို့ ဆိုပါတယ်။
ဒေသတွင်းမီဒီယာရဲ့ ဖော်ပြချက်အရ Scoot လေယာဉ်ဟာ ထိုင်ပေရှိ တောင်ယွမ်လေဆိပ်ကနေ မြေပြင်မှတက်ရန်ပြင်ဆင်နေတာဖြစ်ပြီး ညနေ ၇ နာရီ မိနစ် ၄၀ ခန့်မှာ လေဆိပ်အာဏာပိုင်များထံ မီးဘေးသတင်းတင်ပို့ခဲ့ကြပါတယ်။
လေဆိပ်အာဏာပိုင်များက မီးသတ်သမားများစေလွှတ်ခဲ့ကာ မီးငြှိမ်းသတ်ပြီးနောက် လေယာဉ်ကို ဂိတ်သို့ပြန်လာခွင့်ပြုလိုက်ပါတယ်။
ဒီအဖြစ်အပျက်ကြောင့် တောင်ယွမ်လေဆိပ်ရှိ ထွက်ခွာလေယာဉ်များနဲ့ ဆိုက်ရောက်လေယာဉ်များကိုတော့ ဘာသက်ရောက်မှုမှ မဖြစ်စေခဲ့ပါဘူး။
အဖြစ်အပျက်အတွက် Scoot ကနေ အနူးအညွတ်တောင်းပန်ပါကြောင်း၊ ခရီးသည်များနဲ့ လေယာဉ်ဝန်ထမ်းများ ဘေးကင်းစိတ်ချဖို့က အရေးကြီးဆုံးဖြစ်ကြောင်း လေကြောင်းလိုင်းက ထုတ်ပြန်ခဲ့ပါတယ်။
ဒါ့အပြင် စုံစမ်းစစ်ဆေးမှုတွေလည်း ပြုလုပ်နေတယ်လို့ ဖြည့်စွက်ပြောကြားလိုက်ပါတယ်။
Source: CNA
#Yangon_Media_Group
