#World_Health
Published 11 October 2026

■ ဆယ်ကျော်သက်အရွယ်မှာ နီကိုတင်းပါတဲ့ Vape သောက်သုံးတာဟာ ရေတိုစွဲလမ်းမှုတစ်ခုတင် မဟုတ်ဘဲ နောင်တစ်ချိန်မှာပါ ပိုပြီး ဒုက္ခပေးနိုင်ကြောင်း သုတေသနအသစ်တစ်ခုမှာ ဖော်ပြလိုက်ပါတယ်။

■ ကြွက်တွေနဲ့ စမ်းသပ်ထားတဲ့ ဒီလေ့လာမှုအရ ငယ်စဉ်အခါက နီကိုတင်းအငွေ့နဲ့ ထိတွေ့ခဲ့ရခြင်းဟာ လူကြီးဖြစ်လာတဲ့အခါ နီကိုတင်းကို ပိုပြီး တောင့်တစွဲလမ်းတဲ့ အပြုအမူတွေကို ဖြစ်ပေါ်စေတယ်လို့ ဆိုပါတယ်။

■ ဒါဟာ ဆယ်ကျော်သက်တွေကြား Vape သောက်သုံးမှုရဲ့ ရေရှည်ဆိုးကျိုးတွေနဲ့ ပတ်သက်လို့ စိုးရိမ်စရာ ဖြစ်လာစေပါတယ်။

■ တက္ကဆက်တက္ကသိုလ် က သုတေသီတွေဟာ ဆယ်ကျော်သက်အရွယ် ကြွက်တွေကို နီကိုတင်းနဲ့ ထိတွေ့စေပြီး သူတို့ကြီးပြင်းလာတဲ့အခါ ဘာတွေပြောင်းလဲသွားသလဲဆိုတာကို လေ့လာခဲ့ကြတာပါ။

■ အဲဒီလို ငယ်စဉ်ကတည်းက နီကိုတင်းအငွေ့ ထိတွေ့ခဲ့ရတဲ့ ကြွက်တွေဟာ အရွယ်ရောက်လာတဲ့အခါ နီကိုတင်းကို ပိုမိုပြင်းထန်စွာ တောင့်တရှာဖွေတဲ့ အပြုအမူတွေကို ပြသခဲ့ကြပါတယ်။

■ ဒါဟာ ငယ်စဉ်မှာ နီကိုတင်းနဲ့ ထိတွေ့လိုက်ရခြင်းကြောင့် ဖွံ့ဖြိုးဆဲ ဦးနှောက်ကို ပြောင်းလဲသွားစေပြီး၊ ကြီးပြင်းလာတဲ့အခါ နီကိုတင်းရဲ့ သာယာမှုကို ပိုမိုခံစားချင်လာအောင် ဒါမှမဟုတ် နီကိုတင်းကို ပိုပြီး မနေနိုင်မထိုင်နိုင် ရှာဖွေချင်လာအောင် ဖန်တီးလိုက်တာမျိုး ဖြစ်နိုင်တယ်လို့ သုတေသီတွေက ဆိုပါတယ်။

■ ဒါကြောင့် လူငယ်တွေအနေနဲ့ Vape သောက်သုံးခြင်းရဲ့ ကျန်းမာရေးဆိုင်ရာ ဆိုးကျိုးတွေကို သေချာပေါက် သတိပြုမိဖို့ အရေးကြီးနေပါတယ်။

■ ■ ဆယ်ကျော်သက် ဘယ်လောက်များများ Vape သောက်နေကြသလဲ

■ အမေရိကန် အစားအသောက်နှင့် ဆေးဝါးကွပ်ကဲရေးဌာန (FDA) ရဲ့ နောက်ဆုံးထုတ်ပြန်ချက်အရ ၂၀၂၅ ခုနှစ်မှာ အလယ်တန်းနဲ့ အထက်တန်းကျောင်းသား ၁.၄၄ သန်းခန့်ဟာ Vape တွေကို အသုံးပြုကြတယ်လို့ဆိုပါတယ်။

■ ဆေးရွက်ကြီး ထုတ်ကုန်အမျိုးအစား အားလုံးကို အသုံးပြုသူ ၂ သန်းခန့် ရှိတဲ့အနက် Vape နဲ့ အီးစီးကရက်တွေဟာ ဆယ်ကျော်သက်တွေကြား ရေပန်းအစားဆုံးနည်းလမ်းဖြစ်နေဆဲပါ။

■ လွန်ခဲ့တဲ့ နှစ်အနည်းငယ်အတွင်း ဆယ်ကျော်သက်တွေကြား ဆေးရွက်ကြီး သောက်သုံးမှု ပမာဏဟာ စုစုပေါင်းအားဖြင့် လျော့ကျလာတာကိုတွေ့ရပါတယ်။

■ ၂၀၂၃ ခုနှစ်မှာ ၂.၁၃ သန်း ရှိခဲ့ရာကနေ ၂၀၂၄ မှာ ၁.၆၃ သန်းအထိ လျော့ကျသွားခဲ့တာကြောင့် ဆယ်ကျော်သက်တွေကြား Vape ခေတ်စားမှုဟာ အတန်အသင့် လျော့နည်း သက်သာလာတယ်လို့ ယူဆနိုင်ပါတယ်။

■ ■ ဆက်လက်စောင့်ကြည့်ရမည့်အချက်များ

■ အမေရိကန်မှာ ပထမဆုံးအီးစီးကရက်တွေကို ၂၀၀၇ ခုနှစ်ကမှ  စတင်မိတ်ဆက်ခဲ့တာကြောင့် Vape ရဲ့ ခန္ဓာကိုယ်အပေါ် ရေရှည်ဆိုးကျိုးတွေကို တိတိကျကျ မသိရသေးပါဘူး။ ရောဂါထိန်းချုပ်ရေးနှင့် ကာကွယ်ရေးဗဟိုဌာန (CDC) ကတော့ ဘာဆေးရွက်ကြီး ထုတ်ကုန်မှ ဘေးမကင်းကြောင်းနဲ့ နီကိုတင်းဟာ စွဲလမ်းစေတတ်ပြီး ဖြတ်ရခက်တဲ့ လက္ခဏာတွေကို ဖြစ်ပေါ်စေကြောင်း သတိပေးထားပါတယ်။

■ သုတေသီတွေကလည်း ဒီအကြောင်းအရာနဲ့ ပတ်သက်ပြီး ထပ်မံလေ့လာမှုတွေ ပြုလုပ်ဖို့ အကြံပြုထားပါတယ်။ "ဆယ်ကျော်သက်အရွယ်မှာ စတင်ခဲ့ပြီး လူကြီးဘဝအထိ ပါလာမယ့် Vape သောက်တဲ့ အလေ့အထရဲ့ စုပေါင်းကျန်းမာရေး ဆိုးကျိုးတွေကို သေချာ မဖော်ထုတ်နိုင်ရင် နီကိုတင်း စွဲလမ်းမှုနှုန်းတွေ၊ ကာကွယ်လို့ရပါလျက်နဲ့ သေဆုံးရမှုတွေနဲ့ ကျန်းမာရေးစောင့်ရှောက်မှု ကုန်ကျစရိတ်တွေ မကြုံစဖူးများပြားလာနိုင်ပါတယ်" လို့ သုတေသီတွေက သတိပေးထားပါတယ်။

Source - The Indian Express