#World_Health
Published 13 May 2023

လူလတ်ပိုင်းတွေကြား ကျန်းမာရေးနဲ့မညီညွတ်တဲ့ နေထိုင်စားသောက်မှုပုံစံတွေကြောင့် ဗိုက်ရွှဲသူတွေများလာပါတယ်။

ဒါ့အပြင်လူအများစုဟာ အကြောင်းအမျိုးမျိုးကြောင့် ဆံပင်ကျွတ်ခြင်းခံစားနေကြရပါတယ်။

ဒါကြောင့် ဗိုက်ပူခြင်းနဲ့ ဆံပင်ကျွတ်ခြင်းတို့ကြား သွယ်ဝိုက်စွာဆက်စပ်နေတာကို သိကြပါသလား။

ကယ်လီဖိုးနီးယားမှ အစာအိမ်ဆိုင်ရာ ပါရဂူဒေါက်တာ'ပါလာနီယာပန်မန်နစ်ကမ်'က အင်ဆူလင်ကဲ့သို့ ကြီးထွားခြင်း(IGF-1)ဟော်မုန်းက ဆံပင်ကျွတ်ခြင်းနောက်ကွယ်က အကြောင်းအရင်းဖြစ်နိုင်ကြောင်း အင်စတာဂရမ်မှာ ဝေမျှသွားပါတယ်။

IGF-1 ဟော်မုန်းက ဆံပင်အမြစ်သို့သွေးစီးဆင်းမှုကိုမြှင့်တင်ရန်နဲ့ ဆံပင်ကျွတ်ခြင်းကို ကာကွယ်ရန်အရေးကြီးကြောင်း ဒေါက်တာကပြောပြပါတယ်။

အင်ဆူလင်အလုပ်မလုပ်တဲ့အခါ IGF ကလည်း အလုပ်မလုပ်တော့ကာ ဆံပင်ကြီးထွားမှုလျော့နည်းသွားတယ်လို့ ပြောပြခဲ့ပါတယ်။

အင်ဆူလင်က ပန်ကရိယမှထုတ်တဲ့ အရေးကြီးဟော်မုန်းဖြစ်ပြီး သွေးတွင်းရှိဂလူးကို့စ်ပမာဏကို ထိန်းချုပ်ပေးပါတယ်။

အသည်း၊ အဆီနဲ့ ကြွက်သားများမှာ ဂလူးကို့စ်ကိုသိုလှောင်ရန်ကူညီပေးပြီး ကာဗိုဟိုက်ဒရိတ်၊ အဆီနဲ့ ပရိုတိန်းများရဲ့ ခန္ဓာကိုယ်ဇီဝဖြစ်ပျက်မှုကို ထိန်းညှိပေးပါတယ်။

IGF က သွေးထဲမှာသဘာဝအတိုင်းတွေ့ရတဲ့ ဟော်မုန်းဖြစ်ပြီး တစ်ရှူးနဲ့ အရိုးကြီးထွားမှုတို့မှာ ပါဝင်ပါတယ်။

သူ့ရဲ့အခန်းကဏ္ဍက ဆံပင်မွေးညင်းပေါက်များဖွံ့ဖြိုးစဉ် ဆဲလ်တိုးပွားမှုနဲ့ ရွှေ့ပြောင်းခြင်းတို့ကို ထိန်းညှိပေးပါတယ်။

အမျိုးသားတွေရဲ့ ခါးအတိုင်း ၉၀ စင်တီမီတာအထက်၊ အမျိုးသမီးတွေမှာ ၈၀ စင်တီမီတာအထက်ဆိုရင် ဗိုက်ပူတယ်လို့ယူဆပြီး ၉၀ ရာခိုင်နှုန်းလောက်က ဆံပင်ကျွတ်ခြင်းခံစားနေရတယ်လို့ ဆိုပါတယ်။

အာဟာရပြည့်တဲ့ အစားအစာအပြင် တစ်ပတ်ကို လေ့ကျင့်ခန်း ၁၅၀ မိနစ်မျှ လုပ်ဆောင်ခြင်းဟာလည်း အင်ဆူလင်အလုပ်လုပ်ဖို့ လွန်စွာအရေးကြီးပါတယ်။

ဆံပင်ကျွတ်ရခြင်း အဓိကအကြောင်းအရင်းတစ်ခုက ဟော်မုန်းမညီမျှခြင်းဖြစ်ကြောင်း၊ ပိုလျှံတဲ့အဆီက DHT ဟော်မုန်းပမာဏမြင့်မားစေကာ မွေးညင်းပေါက်များကျဉ်းစေပြီး ဆံပင်ကျွတ်စေပါတယ်လို့ နယူးဒေလီမှ ဒေါက်တာ'နက်ဗ်ယာဟန်ဒါ'က ပြောပြပါတယ်။

ဒါ့အပြင် စိတ်ဖိစီးမှုကလည်း ဆံပင်ကျွတ်ရခြင်း အကြောင်းအရင်းတစ်ခုဖြစ်ပြီး ဗိုက်ရွှဲနေခြင်းဟာ နာတာရှည်ဖိစီးမှုဖြစ်စေတဲ့ လက္ခဏာဖြစ်ပါတယ်။

Source: India Today #World_Health #ဗိုက်ပူခြင်း #ဆံပင်ကျွတ်ခြင်း
#YMG #Yangon_Media_Group