#Local_News
Published 8 March 2025

▪️ သီတဂူဆရာတော်ကြီး၏ ၄၆ လုံးမြောက်ဆေးရုံတော်အဖြစ် သီတဂူကေတုမတီအာယုဒါန အထွေအထွေရောဂါကုဆေးရုံတော်သစ်ကိုပဲခူးတိုင်းဒေသကြီး၊ တောင်ငူမြို့၊ကေတုမတီမြို့သစ်၌ ဖွင့်လှစ်ခဲ့ကြောင်း သိရသည်။

▪️ အဆိုပါ သီတဂူကေတုမတီအာယုဒါန အထွေအထွေရောဂါကုဆေးရုံတော်သစ်ကို မတ်လ ၆ ရက်က စတင်ဖွင့်လှစ်ခဲ့ပြီး ၎င်းဆေးရုံသည် သီတဂူသာသနာပြုအဖွဲ့နှင့် တပည့်သား ဒါယကာဒါယိကာမအပေါင်းတို့က ကျေးဇူးတော်ရှင် ရွှေကျင်သာသနာပိုင် သီတဂူဆရာတော်ကြီး၏ သက်တော် (၈၈) နှစ်ပြည့် မွေးနေ့အထိမ်းအမှတ်ဖြင့်  ပူဇော်လှူဒါန်းခဲ့သော ကောင်းမှုအလှူတော်ဖြစ်သည်။     

▪️ သီတဂူကေတုမတီအာယုဒါနဆေးရုံတော်သစ် ဖွင့်ပွဲအခမ်းအနားသို့ ကျေးဇူးတော်ရှင် ရွှေကျင်သာသနာပိုင် သီတဂူဆရာတော်ဘုရားကြီးကိုယ်တော်တိုင်ကြွရောက်တော်မူကာ တရားဒေသနာများ ချီးမြင့်တိုက်ကျွေး၍ ဆေးရုံတော်သစ်ကို ၇ ရက်သားသမီးအားလုံးတို့အား ရေစက်ချလှူဒါန်းပေးတော်မူခဲ့ကြောင်း သိရသည်။

▪️ ထို့နောက် ပြုပြုသမျှကုသိုလ်အဖို့ကိုလည်း အမျှတမ်းပေးဝေတော်မူကာ သီတဂူကေတုမတီအာယုဒါနအထွေအထွေရောဂါကုဆေးရုံတော်သစ်ကို စက်ခလုတ်နှိပ် ဖွင့်လှစ်ပေးတော်မူခဲ့ကြောင်း နိုင်ငံတော်အစိုးရ ကျန်းမာရေးဝန်ကြီးနှင့် သာသနာရေးနှင့် ယဉ်ကျေးမှုဝန်ကြီးတို့သည်လည်း ဆေးရုံတော်သစ်ဖွင့်ပွဲအခမ်းအနားသို့ တက်ရောက်၍ ဖဲကြိုးဖြတ် ဖွင့်လှစ်ပေးခဲ့ကြောင်းသိရသည်။

▪️ အဆိုပါ ဆေးရုံတော်သည်  သီတဂူစက္ခုဒါနဆေးရုံတော်အပြင် သီတဂူကေတုမတီအာယုဒါနဆေးရုံဝန်းအတွင်း၌ပင် တိုးချဲ့တည်ထောင်ခဲ့သော အထွေထွေရောဂါကုဆေးရုံတော်ဖြစ်ပြီး ဆေးရုံတော်သည် ကျေးဇူးတော်ရှင် ရွှေကျင်သာသနာပိုင်သီတဂူဆရာတော်ကြီး၏ ဆုံးမဩဝါဒနှင့်အညီ နိုင်ငံတော်အစိုးရ ကျန်းမာရေးဝန်ကြီးဌာနနှင့် သီတဂူသာသနာပြုအဖွဲ့တို့ ပူပေါင်း၍ အောင်မြင်စွာ ဖွင့်လှစ်နိုင်ခဲ့သော ဆေးရုံတော်ဖြစ်ပြီး ကျေးဇူးတော်ရှင် သီတဂူဆရာတော်ကြီး၏ ၄၆ လုံးမြောက်သော ဆေးရုံတော်လည်းဖြစ် ကြောင်း သိရသည်။

▪️ ဆေးရုံတော်သစ်၏ အဖွင့် ကျန်းမာရေးစောင့်ရှောက်မှုတစ်ရပ်နေဖြင့် အာခေါင်ကွဲနှုတ်ခမ်းကွဲလူနာပေါင်း ၃၁ ဦးကို ခွဲစိတ်ကုသပေးခြင်း၊ သွားနှင့်ခံတွင်းဆိုင်ရာ ဝေဒနာရှင်ပေါင်း ၉၀၀ကျော်တို့ကို စစ်ဆေးကုသခြင်းတို့ကို ကုသိုလ်ပြု စောင့်ရှောက်ပေးနိုင်ခဲ့ကြောင်း သိရသည်။

#YMG/NN #Yangon_Times

ရွှေလုပ်ငန်းလိုင်စင်မရှိဘဲ အွန်လိုင်းမှာ ရောင်းချပါက အရေးယူခံရနိုင်တယ်လို့ ရန်ကုန်တိုင်းဒေသကြီးရွှေလုပ်ငန်းရှင်များအသင်းဥက္ကဌ ဦးမျိုးမြင့်က ဒီကနေ့ အသင်းရုံးမှာပြုလုပ်တဲ့ ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ အသိပညာပေးသင်တန်းဖွင့်ပွဲမှာ ပြောကြားခဲ့ပါတယ်။
#Local_News
Published 8 March 2025
#လိုင်စင်မတင် #အွန်လိုင်း၌ရွှေရောင်းသူများ
#YMG/NN #Yangon_Times

အခု ၂၀၂၅ခုနှစ်  မိုးရာသီအကျ‌စောနိုင်သလို မိုးကာလအတွင်းမှာလည်း မိုးရွာသွန်းမှုများပြားနိုင်ကာ မိုးကောင်းနိုင်တယ်လို့ မိုးလေဝသပြင်ပပညာရှင် ဦးဝင်းနိုင်က သုံးသပ်ထားပါတယ်။
#Local_News
Published 8 March 2025
#မိုးရာသီအကျ‌စောနိုင် #မိုးလေဝသပြင်ပပညာရှင်ဦးဝင်းနိုင်
#YMG/NN #Yangon_Times

ပြည်တွင်းငါးစားသုံးမှုတိုးတက်ပြီး ငါးစားနပ်ရိက္ခာဖူလုံဖို့နဲ့ ငါးမွေးမြူရေးလုပ်ငန်းတိုးတက်စေဖို့အတွက်ဈေးကွက်ဝင် ရေချိုငါးသားပေါက်တွေကို သက်သာတဲ့ဈေးနှုန်း‌တွေနဲ့ ရောင်းချသွားမယ်လို့ စိုက်ပျိုးမွေးမြူရေးနှင့်ဆည်မြောင်းဝန်ကြီးဌာန၊ ငါးလုပ်ငန်းဦးစီးဌာနမှ သိရပါတယ်။
#Local_News
Published 8 March 2025
#ရေချိုငါးသားပေါက် #ငါးစားနပ်ရိက္ခာဖူလုံ
#YMG/SW #Yangon_Times

ပြည်တွင်းသုံးစွဲမှု ဖူလုံပြီး ပိုလျှံတဲ့ဝါဂွမ်းတွေကို နိုင်ငံတကာအရည်အသွေး သတ်မှတ်ချက်တွေနဲ့အညီ ထုတ်လုပ်တင်ပို့နိုင်ဖို့ အလုပ်ရုံဆွေးနွေးပွဲကို မတ်လ ၆ ရက်က စီးပွားရေးနှင့် ကူးသန်းရောင်းဝယ်ရေးဝန် ကြီးဌာန ၊ မြန်မာကုန်သွယ်မှုမြှင့်တင်ရေးအဖွဲ့၊ အစည်းအဝေးခန်းမမှာ ပြုလုပ်ခဲ့ပါတယ်။
#Local_News
Published 8 March 2025
#ဝါဂွမ်း #ဝါဂွမ်းများကိုပြည်ပသို့တင်ပို့ 
#YMG/NN #Yangon_Times

#Local_News
Published 8 March 2025

▪️ နိုင်ငံပေါင်း ၁၅နိုင်ငံတက်ရောက်မည့်Medical Fair India 2025 ပြပွဲသို့ မြန်မာနိုင်ငံမှ ကိုယ်စားလှယ်များ တက်ရောက်ရန်ဖိတ်ကြားထားကြောင်းမြန်မာကုန်သွယ်မှုမြှင့်တင်ရေးအဖွဲ့၊ ကုန်သွယ်မှုဖွံ့ဖြိုးရေးဌာနခွဲမှ သိရသည်။

▪️ အိန္ဒိယနိုင်ငံ၏ ထိပ်တန်းဆေးဘက်ဆိုင်ရာ ကုန်စည်ပြပွဲတစ်ခုဖြစ်သော  Medical Fair India 2025 ကို နယူးဒေလီမြို့ရှိ၊ ဘာရတ်မန်ဒါပမ်၊ ပရဂတိမိန်ဒါန် (Bharat Mandapam, Pragati Maidan) အဆောက်အအုံ၊ ခန်းမအမှတ် ၄ နှင့် ၅ တို့တွင်  ၂၀၂၅ ခုနှစ်၊ မတ်လ ၂၇ ရက်နေ့မှ ၂၉ ရက်နေ့အထိ ကျင်းပမည်ဖြစ်ကြောင်း ၊အဆိုပါ Medical Fair India 2025 သည် နှစ်စဉ် မွန်ဘိုင်းမြို့နှင့် နယူးဒေလီမြို့တို့၌ အလှည့်ကျ ကျင်းပလျက်ရှိပြီး ဆေးပစ္စည်းနှင့် ဆေးရုံသုံးပစ္စည်းမျိုးစုံအား ခင်းကျင်းပြသမည်ဖြစ်၍ ပြပွဲနှင့်အတူ ကျင်းပမည့် ဆွေးနွေးပွဲများသည် လူတိုင်းအတွက် ကျန်းမာရေးစောင့်ရှောက်မှုကို ပိုမိုလက်လှမ်းမီပြီး စျေးနှုန်းသက်သာစေရန် ဖြေရှင်းနည်းများကို ဆွေးနွေးကြမည်ဖြစ်‌ကြောင်း သိရသည်။

▪️ Medical Fair India 2025 ပြပွဲ၌ နိုင်ငံပေါင်း ၁၅ နိုင်ငံမှ ကုမ္ပဏီ ၃၅၀ ကျော် ပါဝင်မည်ဖြစ်၍ ပူးပေါင်းဆောင်ရွက်လိုသူများ၊ ဖြန့်ဖြူးရောင်းချသူများကို ရှာဖွေနေသည့် နိုင်ငံတကာနှင့် အိန္ဒိယပြည်တွင်းထုတ်လုပ်သူများနှင့် ချိတ်ဆက်ကာ လုပ်ငန်းများအကောင်အထည်ဖော်ဆောင်ရွက်နိုင်မည့် အခွင့်အလမ်းများကို ရရှိနိုင်မည်ဖြစ်ကြောင်း သိရှိရသည်။

▪️ အဆိုပါပြပွဲသို့ ပါဝင်တက်ရောက်ပြသလိုသည့် မြန်မာစီးပွားရေးလုပ်ငန်းရှင်များအနေဖြင့် မြန်မာကုန်သွယ်မှုမြှင့်တင်ရေးအဖွဲ့၊ ကုန်သွယ်မှုဖွံ့ဖြိုးရေးဌာနခွဲ၊ ဖုန်း- ၀၆၇-၄၀၈၆၂၂၊ E-mail: This email address is being protected from spambots. You need JavaScript enabled to view it. သို့ ဆက်သွယ်စုံစမ်းစာရင်းပေးသွင်းနိုင်ကြောင်း သိရသည်။

#YMG/SW #Yangon_Times

#Local_News
Published_8 March 2025

▪️ မြန်မာနိုင်ငံအတွင်းသို့ နယ်စပ်လမ်း ကြောင်းများမှတစ်ဆင့် တရားမဝင် ဝင်ရောက်နေထိုင်ပြီး ကရင်ပြည်နယ် မြဝတီမြို့ - ရွှေကုက္ကိုလ်၊ မယ်ထော် သလေး နှင့် KK Park နယ်မြေများတွင် အွန်လိုင်းလောင်းကစားမှုများ၊ အွန် လိုင်းလိမ်လည်မှုများနှင့် ဒုစရိုက်မှုများ လုပ်ဆောင်ခဲ့ကြသည့် တရုတ်နိုင်ငံသား ၃၀၄ ဦးကို မြန်မာ- ထိုင်းအမှတ် (၂) ချစ်ကြည်ရေးတံတားမှ တစ်ဆင့် သက်ဆိုင်ရာ နိုင်ငံသို့ ယနေ့မတ်လ ၈ ရက်တွင် ထပ်မံပြည်နှင်လွှဲပြောင်းပေးခဲ့ကြောင်း သိရသည်။

▪️ ကရင်ပြည်နယ်အစိုးရအဖွဲ့ လုံခြုံရေးနှင့် နယ်စပ်ရေးရာဝန် ကြီး ဗိုလ်မှူးကြီး မင်းသူကျော်နှင့် တာဝန်ရှိသူများ၊ တရုတ်ပြည်သူ့သမ္မတနိုင်ငံ၊ ပြည်သူ့လုံခြုံရေးဝန်ကြီးဌာန ပြစ် မှုဆိုင်ရာစုံစမ်းစစ်ဆေးရေးဌာန ဒုတိယညွှန် ကြားရေးမှူးချုပ် Mr. Liu Ning Ning နှင့် ထိုင်းနိုင်ငံ တာ့ခ်ခရိုင် လူဝင်မှုကြီးကြပ်ရေးဦးစီးဌာနမှ တာဝန်ရှိသူများ တက်ရောက်ခဲ့ကြပြီး မြန်မာနိုင်ငံမှ တာဝန်ရှိသူများက သက်ဆိုင်ရာနိုင်ငံမှ ကိုယ်စားလှယ်များထံသို့ ပြည်နှင်လွှဲပြောင်းလက်ခံရေးဆိုင်ရာ အထောက်အထား စာရွက်စာ တမ်းများကို လွှဲပြောင်းပေးအပ်ခဲ့ကြောင်း သိရသည်။

▪️ နိုင်ငံတော်မှ အွန်လိုင်းအသုံးပြု လိမ်လည်မှု (Online Scam)နှင့် အွန်လိုင်း လောင်းကစားမှု (Online Gambling) လုပ်ဆောင်နေသူများ၊ ပါဝင်ပတ်သက်သူများ အားလုံးကို ပြတ်ပြတ်သားသား စုံစမ်းဖော်ထုတ် လျက်ရှိပြီး အိမ်နီးချင်းနိုင်ငံများ အပါအဝင် နိုင်ငံတကာမှအဖွဲ့အစည်းများ၊ အထူးသဖြင့် မြန်မာ-တရုတ်-ထိုင်း သုံးနိုင်ငံ အကြား သုံးပွင့်ဆိုင်ပူးပေါင်းဆောင်ရွက်မှုပုံစံ (Trilateral Cooperation) တို့ဖြင့် စဉ်ဆက်မပြတ်တက် ကြွစွာ ဖော်ထုတ်အရေးယူဆောင်ရွက်လျက်ရှိသည့်အပြင် အဆိုပါ လုပ်ငန်းများတွင် ဆက်စပ်ပါဝင်ခဲ့ကြသည့် ပြည်ပနိုင်ငံသားများကို သက်ဆိုင်ရာ နိုင်ငံများသို့ စနစ်တကျ ပြည်နှင်လွှဲပြောင်းဆောင်ရွက်ပေးလျက်ရှိကြောင်း သိရသည်။

#Yangon_Times/PP

#Local_News
Published 8 March 2025

▪️ ရန်ကုန်မြို့၊ ရန်ကင်းမြို့နယ် မိုးကောင်းဆုတောင်းပြည့်စေတီတော်အနောက်ဖက်တန်ဆောင်းတွင် မတ် ၉ ရက် နံနက် ၉ နာရီမှ ညနေ ၆ နာရီထိ ဓာတ်တော်ပွားများ ဝေငှလှူဒါန်းမည်ဖြစ်ကြောင်း သိရသည်။

▪️ ဓာတ်တော်ပွားများကိုလှူဒါန်းရာတွင် မိုးကောင်းဆုတောင်းပြည့်စေတီတော် အတွင်းရှိ လှိုင်မြို့နယ် အရိန္ဒမကျောင်း ဓာတ်တော်တိုက် သာသနာ့ရိပ်သာ၌ ကိန်းဝပ်စံပါယ်လျက်ရှိသည့် မြတ်စွာဘုရားရှင်၏ အရောင်အဆင်းအမျိုးမျိုးရှိ ဓာတ်တော်မွေတော်များ၊ ရှင်မဟာမောဂ္ဂလာန်၊ ရှင်သာရိပုတ္တရာ၊ ရှင်အာနန္ဒာ၊ ရှင်ဗာကုလ၊ ရှင်သီလဝိ၊ ရှင်နာဂသိန်၊ အရှင်အနုရုဒ္ဓါ၊ အစရှိသည့် ဓာတ်တော်ပွားများကို လှူဒါန်းဝေငှာသွားမည်ဖြစ်ကြောင်း သိရသည်။

▪️ ထိုသို့လှူဒါန်းရာတွင်မြင်းခြံမြို့ သာသနာ့ဇောတိကာရုံကျောင်း ဆရာတော် မဟာသဒ္ဓမ္မဇောတိကဓဇ ဘဒ္ဒန္တကောဏ္ဍာည တပည့် လှိုင်မြို့နယ် အရိန္ဒမကျောင်း ဓာတ်တော်တိုက် သာသနာ့ရိပ်သာ ဆံတော်ရှင်ဓာတ်တော်တိုက်ဆရာတော် ဘဒ္ဒန္တ ဝိစိတ္တသာရ ကိုယ်တော်တိုင် ဝေငှလှူဒါန်းသွားမည်ဖြစ်ကြောင်း သိရသည်။

#YMG/SW #Yangon_Times

#Local_News
Published 8 March 2025

▪️ ကိုယ်ဝန်ဆောင်မိခင်များနှင့် ၎င်းတို့မှမွေးဖွားလာသော အသက်(၂)နှစ်အောက် ကလေးသူငယ်များအား ငွေကြေးထောက်ပံ့ခြင်းအစီအစဉ်
MCCT ထောက်ပံ့ကြေးပေးအပ်မှုနှင့်ပတ်သက်၍ Facebook Page များ ဖွင့်လှစ်စာရင်းကောက်ယူ၍ ထောက်ပံ့ကြေးပေးအပ်မှုမရှိကြောင်း လူမှုဝန်ထမ်းဦးစီးဌာနမှ အသိပေးကြေညာလိုက်သည်။

▪️ လူမှုဝန်ထမ်းဦးစီးဌာနအနေဖြင့်  (MCCT) နှင့်ပတ်သက်၍ Social Media ဖြစ်သည့် Facebook Page များ ဖွင့်လှစ်စာရင်း ကောက်ယူ၍ ထောက်ပံ့ကြေးများပေးအပ်မှု လုံးဝမရှိပါကြောင်း မိဘပြည်သူများသို့ အသိပေး ကြေညာထားကြောင်း သိရသည်။

▪️ ထို့အပြင် စုံစမ်းမေးမြန်းလိုပါက လူမှုဝန်ထမ်းဦးစီးဌာန၏ Viber ဖုန်းနံပါတ် 09-889900077 နှင့် Hot Line နံပါတ် 1566 သို့ တိုက်ရိုက်ဆက်သွယ် မေးမြန်းနိုင်ကြောင်း လူမှုဝန်ထမ်းဦးစီးဌာနမှ သိရသည်။

#YMG/NN #Yangon_Times

#World_News
Published 08 March 2025

▪️ အမေရိကန် နိုင်ငံခြားရေးဝန်ကြီး မာကိုရူဘီယိုက ယူကရိန်း နိုင်ငံခြားရေးဝန်ကြီး အန်ဒရီဆီဘီဟာနဲ့ သောကြာနေ့က ဖုန်းပြောဆိုခဲ့ကာ သမ္မတ ဒေါ်နယ်ထရမ့်က ရုရှား-ယူကရိန်းစစ်ပွဲကို မြန်နိုင်သမျှအမြန်ဆုံး အဆုံးသတ်ဖို့ စိတ်ပိုင်းဖြတ်ထားကြောင်း ပြောပြခဲ့တယ်လို့ နိုင်ငံခြားရေးဌာနက ဖော်ပြပါတယ်။

▪️ "သမ္မတထရမ့်က စစ်ပွဲကို အမြန်ဆုံးအဆုံးသတ်ရန် ဆုံးဖြတ်ထားတယ်လို့ နိုင်ငံခြားရေးဝန်ကြီးက အလေးပေးပြောသွားကာ ရေရှည်တည်တံ့တဲ့ ငြိမ်းချမ်းရေးရရှိဖို့ အားလုံးအဆင့်ဆင့် ဆောင်ရွက်သွားဖို့ အလေးထားပြောသွားပါတယ်" လို့ ဖော်ပြထားပါတယ်။

▪️ ရူဘီယိုက ထိုနေ့အစောပိုင်းကလည်း ပြင်သစ်နိုင်ငံခြားရေးဝန်ကြီး ရှောင်နိုအယ်ဘာရော့နဲ့ စစ်ပွဲအကြောင်း ဖုန်းပြောဆိုဆွေးနွေးခဲ့တယ်လို့ ဖော်ပြပါတယ်။

▪️ လွန်ခဲ့တဲ့ ၃ နှစ်ကျော်က ရုရှားကျူးကျော်ခြင်းကြောင့် ဖြစ်ခဲ့တဲ့ ယူကရိန်းစစ်ပွဲကို အမေရိကန်သမ္မတက အဆုံးသတ်လိုတယ်လို့ ပြောထားပြီး ယင်းလုံခြုံရေးအတွက် ဥရောပက ပိုပြီးတာဝန်ယူရမယ်လို့ ဆိုပါတယ်။

▪️ ဘဲဥပုံရုံးခန်းမှာ အချေအတင်ဖြစ်ကြပြီးနောက် အပစ်အခတ်ရပ်စဲရေးကို ယူကရိန်းလက်ခံလာအောင် ထရမ့်က စစ်ရေးနဲ့ ထောက်လှမ်းရေးအကူအညီများ ရပ်ဆိုင်းလိုက်ပါတယ်။

▪️ ဥရောပခေါင်းဆောင်တွေက ဇယ်လန်စကီကို ထောက်ခံဖို့ စုရုံးကြပေမယ့် ဥရောပလုံခြုံရေးနဲ့ စစ်ပွဲအပေါ် ချဉ်းကပ်ပုံမှာတော့ အမေရိကန်သမ္မတကို များစွာမှီခိုနေရပါတယ်။

▪️ အပစ်အခတ်ရပ်စဲရေးနဲ့ ငြိမ်းချမ်းရေး သဘောတူညီချက် မရမချင်း ရုရှားအပေါ် အခွန်တင်းကြပ်မှုများနဲ့ ဘဏ်လုပ်ငန်းစဉ်များ အပါအဝင် ဒဏ်ခတ်ပိတ်ဆို့မှု အများအပြားပြုလုပ်ဖို့ ထရမ့်က ကြံရွယ်နေပါတယ်။

#Source: News

#World_Health
Published 08 March 2025

▪️ ကမ္ဘာတဝှမ်း အမျိုးသမီးအယောက် ၂၀ တိုင်းမှာ ၁ ယောက်နှုန်းက ရင်သားကင်ဆာ ဖြစ်လာလိမ့်မယ်လို့ WHOက ဆန်းစစ်ဖော်ပြလိုက်ပါတယ်။

▪️ လက်ရှိရောဂါတွေ့ရှိမှုနှုန်းအတိုင်း ဆက်သွားပါက ၂၀၅၀ အရောက်မှာ နှစ်စဉ် ရင်သားကင်ဆာ ဖြစ်ပွားသူ ၃.၂ သန်းနဲ့ ရင်သားကင်ဆာနဲ့ ဆက်စပ်တဲ့သေဆုံးသူ ၁.၁ သန်း ရှိလာနိုင်ပါတယ်။

▪️ အထူးသဖြင့် လူသားဖွံ့ဖြိုးမှုညွှန်းကိန်း နိမ့်ပါးတဲ့နိုင်ငံတွေမှာ ပိုမိုသက်ရောက်လာနိုင်ပါတယ်။

▪️ ကမ္ဘာတဝှမ်းက အမျိုးသမီးတွေကြားမှာ ရင်သားကင်ဆာက အဖြစ်အများဆုံး ကင်ဆာအမျိုးအစားဖြစ်ပြီး ၂၀၂၂ခုနှစ်က ရင်သားကင်ဆာ ဖြစ်ပွားသူ ၂.၃ သန်းခန့်ရှိကာ ၆၇၀,၀၀၀ဦးက ကင်ဆာဆက်စပ်ပြီး သေဆုံးခဲ့ကြပါတယ်။

▪️ ဩစတြေးလျနဲ့ နယူးဇီလန်တို့မှာ ရင်သားကင်ဆာ အဖြစ်အများဆုံးဖြစ်ပြီး သူ့နောက်မှာ မြောက်အမေရိက၊ ဥရောပမြောက်ပိုင်းတို့ ရှိနေပြီး အာရှတောင်ပိုင်းအလယ်၊ အာဖရိကအလယ်ပိုင်းနဲ့ အရှေ့ပိုင်းတို့က အဖြစ်အနည်းဆုံး ဖြစ်ပါတယ်။

▪️ တင်ပြချက်တွေအရ အရည်အသွေးမြင့်တဲ့ ကင်ဆာအချက်အလက်တွေ တိကျတဲ့ ရောဂါဖြစ်ပွားမှုနှုန်းတွေ သိရဖို့ အရေးကြီးကြောင်း ဖော်ပြနေတယ်လို့ ကင်ဆာစောင့်ကြည့်ရေးဌာနခွဲမှ လက်ထောက်အကြီးအကဲ ဒေါက်တာ အစ္စဘဲလ်ဆိုဂျိုမက်ထရမ်က ပြောပါတယ်။

▪️ ရင်သားကင်ဆာရဲ့ အဖြစ်အများဆုံး လက္ခဏာတွေက ရင်သားမှာ အဖုဖြစ်ခြင်း၊ အရွယ်အစား ပုံသဏ္ဍာန် ပြော်ငးလဲခြင်း၊ အရေပြားပြောင်းလဲခြင်း၊ ချိုင်းမှာ ဖောရောင်ခြင်း အဖုအကျိတ်ဖြစ်ခြင်းတို့ ဖြစ်နိုင်ပါတယ်။

▪️ ရင်သားကင်ဆာနဲ့ ပတ်သက်လို့ ကိုယ့်ဘာသာ စစ်ဆေးတွေ့ရှိနိုင်သလို ဓာတ်မှန်ရိုက်ခြင်းဖြင့် ကင်ဆာဖြစ်တဲ့နေရာ တိတိကျကျစစ်ဆေးနိုင်ပါတယ်။

▪️ မျိုးရိုးဗီဇစစ်ဆေးခြင်းနည်းလမ်းကတော့ ရင်သားကင်ဆာ ဖြစ်နိုင်ခြေရှိမရှိကို ကူညီသိရှိစေနိုင်ပါတယ်။

▪️ ကုသနည်းများအနေနဲ့ ဓာတုကုထုံး၊ ဓာတ်ရောင်ခြည်ကုထုံး၊ ကိုယ်ခံအားစနစ်ကုထုံးတို့ ရှိပါတယ်။

▪️ ဆေးလိပ်သောက်ခြင်း၊ အရက်အလွန်အကျွံသောက်ခြင်း၊ လှုပ်ရှားမှုမရှိခြင်း၊ အဝလွန်ခြင်းစတဲ့ နေထိုင်စားသောက်မှုပုံစံတွေက ရင်သားကင်ဆာ ဖြစ်လာနိုင်စေပါတယ်။

#Source: India Today

#World_Health
Published 08 March 2025

▪️ ကယ်လီဖိုးနီးယား ဆန်ဖရန်ဆစ္စကိုတက္ကသိုလ်မှ သုတေသီတွေက ကျန်းမာရေးကောင်းတဲ့ သက်ကြီးပုဂ္ဂိုလ် ၂၃၁ ယောက်ကို သွေးစစ်ဆေးချက် ပြုလုပ်ခဲ့ကြရာမှာ ဗိုက်တာမင်-ဘီ၁၂ နည်းတဲ့သူတွေက ဦးနှောက်မှတ်ဉာဏ်နဲ့ အမြင်အာရုံ ပုံဖော်မှုနှုန်းတွေ နှေးသွားတယ်လို့ တွေ့ရှိကြောင်း ဖော်ပြထားပါတယ်။

▪️ ထိုလူတွေရဲ့ ဦးနှောက်အဖြူသားနေရာမှာ ထိခိုက်မှုတွေ ပိုများလာပြီး အသိဉာဏ်ကျဆင်းခြင်း၊ ဒီမန်ရှာနဲ့ လေဖြတ်ခြင်းလက္ခဏာတွေ အချက်ပေးတဲ့သဘော မြင်လာရပါတယ်။

▪️ သက်ကြီးပိုင်းတွေဆိုတာက ဘီ၁၂ နည်းပါးကြတဲ့ အရွယ်တွေဖြစ်ပြီး ဘီ၁၂ ပုံမှန်ပမာဏ ရှိနေရင်တောင် အာရုံကြောဆိုင်ရာ လက္ခဏာများ ပေါ်တတ်တဲ့သူတွေမှာ ဖြည့်စွက်အားဆေးအသုံးပြုဖို့ ချင့်ချိန်သင့်ကြောင်း အော့တာဝါတက္ကသိုလ် အာရုံကြောဌာနမှ အဲလက်ဇန်ဒရာဗျူဒရီရစ်ချတ်က ပြုစုဖော်ပြထားပါတယ်။

▪️ ဗိုက်တာမင်ဘီအုပ်စု ဖြည့်စွက်အားဆေးတွေက လိုအပ်တဲ့ဓာတ်တွေကို ထိန်းညှိရာမှာ အကူအညီဖြစ်စေတယ်လို့ ဖလော်ရီဒါမှ အာရုံကြောအထူးကု ဒေါက်တာ ဘရက်အော့စ်ဘွန်းက ပြောပါတယ်။

▪️ ဦးနှောက်လုပ်ဆောင်ချက် ကျဆင်းစေတဲ့ ဟိုမိုဆစ္စတင်းမြင့်တက်လာခြင်းကို ဘီအုပ်စုက ထိန်းချုပ်ပေးတာ ဖြစ်ပါတယ်။

▪️ လက်တွေ့စမ်းသပ်ချက်ရလဒ်တွေကို စောင့်ဆိုင်းနေမယ့်အစား ဖြည့်စွက်အားဆေး အသုံးပြုခြင်းက ဦးနှောက်ကျန်းမာရေး အကျိုးပြုစေတာကို သိနေတဲ့အတွက် စောင့်မနေသင့်ဘူးလို့ အော့စ်ဘွန်းက ဆိုပါတယ်။

▪️ ဘီ၁၂ ဘယ်လောက်ပမာဏက ချို့တဲ့တယ်လို့ သတ်မှတ်တာနဲ့ပတ်သက်ပြီး မေးခွန်းထုတ်စရာ ဖြစ်နေတယ်လို့ ဂျက်ခ်ဆန်-မက်ဒီဆန်ကောင်တီ အထွေထွေဆေးရုံမှ အသိအမှတ်ပြု အာရုံကြောအထူးကု ဒေါက်တာ အန်းနက်စ်လီမာရေးက ပြောသွားပါတယ်။

▪️ ဒါ့အပြင် ဗိုက်တာမင်တွေ အများအပြား အသုံးပြုခြင်းကိုလည်း သတိပေးထားပါတယ်။

▪️ ဦးနှောက်စွမ်းဆောင်ရည် ကျဆင်းလာနိုင်တဲ့ သူတွေ သက်ကြီးပိုင်းတွေမှာ ဗိုက်တာမင်-ဘီ၁၂သာမက ဘီ၁၂ စုပ်ယူမှုကို ထိခိုက်စေတဲ့ အကြောင်းအရာတွေကိုပါ စစ်ဆေးဖို့ အကြံပြုထားပါတယ်။

#Source: New York Post