#Local_News
Published_ 1 December 2022

မဲခေါင်ဒေသများဆိုင်ရာလုံခြုံရေးနှင့် ပူးပေါင်းဆောင်ရွက်မှုစင်တာ Safe Mekong Coordination Center(SMCC)ကိုအသုံးပြု၍ မဲခေါင်မြစ်ဝှမ်းတွင် မူးယစ်ဆေးဝါးတားဆီးနှိမ်နင်းမှုမြှင့်တင်သွားမည်ဖြစ်ကြောင်း မြန်မာနိုင်ငံဆိုင်ရာတရုတ်သံရုံးက ထုတ်ပြန်ထားသည်။

အဆိုပါ မဲခေါင်ဒေသများဆိုင်ရာလုံခြုံရေးနှင့် ပူးပေါင်းဆောင်ရွက်မှုစင်တာ Safe Mekong Coordination Center(SMCC)ကို နိုဝင်ဘာလ ၂၉ ရက်က ရှမ်းပြည်နယ်တောင်ကြီးမြို့၌ ဖွင့်လှစ်ခဲ့ခြင်း ဖြစ်သည်၊၊

ယင်းစင်တာကို အသုံးပြု၍ မဲခေါင်မြစ်ဝှမ်း၌ မူးယစ်ဆေးဝါး တားဆီးနှိမ်နင်းမှုမြှင့်တင်ရေး၊ မူးယစ်ဆေးဝါးတားဆီးနှိမ်နင်းရေး အချက်အလက်များ အတူမျှဝေရေး၊ အစည်းအဝေးကျင်းပရေးစသည်တို့ကို ဆောင်ရွက်ကြမည် ဖြစ်ကြောင်း သိရသည်။

တရုတ်-မြန်မာနှစ်နိုင်ငံအနေဖြင့် မူးယစ်ဆေးဝါးတားဆီးနှိမ်နင်းရေးကဏ္ဍတွင် မိတ်ဖက်နိုင်ငံများ ဖြစ်ကြောင်း၊ မြန်မာနိုင်ငံအပါအဝင် မဲခေါင်မြစ်ဒေသများ ဖြစ်သည့် တရုတ်၊ လာအို၊ ဗီယက်နမ်၊ ထိုင်းနိုင်ငံတို့နှင့် အတူ “Safe Mekong” ပူးတွဲမူးယစ်ဆေးဝါးတိုက်ဖျက်ရေးလှုပ်ရှားမှုကိုလည်း ခြောက်ကြိမ်ဖော်ဆောင်ခဲ့ပြီး အဆိုပါ နိုင်ငံများ က မဲခေါင်မြစ်ပူးတွဲကင်းလှည့်လှုပ်ရှားမှုကို ၁၂၃ ကြိမ်ဖော်ဆောင်ခဲ့ပြီးဖြစ်ကြောင်း ၊ မူးယစ်ဆေးဝါးတားဆီးနှိမ်နင်းမှုမြှင့်တင်ရာတွင် ရွှေတြိဂံဒေသ ၊ လန်ချန်း-မဲခေါင် ဒေသများအတွက် ပါဝင်ကြောင်း လည်း မြန်မာနိုင်ငံဆိုင်ရာတရုတ်သံရုံး၏ ထုတ်ပြန်ချက်တွင် ဖော်ပြထားသည်။

#ymg/tthl
#Yangon_Media_Group

#Local_News
Published_1 December 2022

ဘဏ်များအနေဖြင့် လုပ်ငန်းတည်နေရာ ပြောင်းရွှေ့ခြင်းအတွက် အခကြေးငွေအဖြစ် ငွေကျပ် ငါးသိန်းပေးဆောင်ရမည်ဖြစ်ကြောင်း ဗဟိုဘဏ်မှညွှန်ကြားချက်ထုတ်ပြန်ထားသည်။

ဗဟိုဘဏ်အနေဖြင့် ငွေရေးကြေးရေး အဖွဲ့အစည်းများ ဥပဒေအရ ယခုလို ညွှန်ကြားချက်ထုတ်ပြန်ခဲ့ခြင်းဖြစ်ကြောင်း ဖော်ပြထားသည်။

အဆိုပါကြေညာချက်တွင် ဖွင့်လှစ်ပြီးသည့် ဘဏ်တွေ၏ ရုံးချုပ်များ၊ ရုံးခွဲများ လုပ်ငန်းနေရာ ပြောင်းရွှေ့ရာတွင် ယခင်လုပ်ငန်းနေရာနှင့် မြို့နယ်တူသည်ဖြစ်စေ၊ မတူသည်ဖြစ်စေ လုပ်ငန်းနေရာ ပြောင်းရွှေ့မည်ဆိုပါက အခကြေးငွေ ကျပ်ငါးသိန်းကို ပေးသွင်းရမည်ဖြစ်ကြောင်း ပါရှိသည်။

ယင်းအပြင် ဘဏ်မဟုတ်သည့် ငွေရေးကြေးရေး အဖွဲ့အစည်းများ၏လုပ်ငန်းနေရာ ပြောင်းရွှေ့ခြင်းနှင့် ပိတ်သိမ်းခြင်းများ ဆောင်ရွက်မည်ဆိုပါက အခကြေးငွေ ကျပ်နှစ်သိန်းပေးရမည်ဖြစ်ကြောင်း သိရသည်။

ပြည်တွင်းဘဏ်စုစုပေါင် ၂၄ ခုရှိပြီး လက်ရှိတွင်လည်း ပြည်တွင်းဘဏ်ကြီးတစ်ခုဖြစ်သည့် ဧရာဝတီဘဏ် (AYA) သည် အများပိုင်ကုမ္ပဏီအဖြစ် ပြောင်းလဲရန်အတွက် ကုမ္ပဏီများဆိုင်ရာ မှတ်ပုံတင်အရာရှိထံ တင်ပြထားကြောင်း တရားဝင်အသိပေးထုတ်ပြန်ထားသည်။

#ymg/sth
#Yangon_Media_Group

#Local_News
Published_1 December 2022

နိုဝင်ဘာ ၁ ရက်မှ ၃၀ ရက်အတွင် တောင်ကိုရီးယားနိုင်ငံသို့ အစိုးရပြည်ပအလုပ်အကိုင် အေဂျင်စီမှ တစ်ဆင့် EPS စနစ်ဖြင့် အလုပ်သမား စုစုပေါင်း ၇၂၉ ဦးကို တရားဝင် ပို့ဆောင်ထားကြောင်း ဆိုးလ်မြို့ မြန်မာသံရုံးမှ ထုတ်ပြန်ထားသည်။

နိုဝင်ဘာလ ၁ ရက်တွင် Regular ကုန်ထုတ်လုပ်သားသစ် (၆၈) ဦး၊ CBT ကုန်ထုတ်လုပ်သား (၁၆) ဦး၊ Re-entry ကုန်ထုတ်လုပ်သား (၂၁) ဦး၊ Re-entry စိုက်ပျိုးရေးနှင့် မွေးမြူရေးလုပ်သား (၄) ဦး၊ စုစုပေါင်း (၁၀၉) ဦး၊ နိုဝင်ဘာ ၃ ရက်တွင် Re-Entry ကုန်ထုတ်လုပ်သား (၂၇) ဦး၊ နိုဝင်ဘာ ၁၀ ရက်တွင် Regular ကုန်ထုတ်လုပ်သား(၃၄)ဦး ၊ Re-Entry ကုန်ထုတ်လုပ်သား (၁၅) ဦး၊ Re-entry စိုက်ပျိုးရေးနှင့် မွေးမြူရေးလုပ်သား (၂) ဦး စုစုပေါင်း (၅၁) ဦး၊ နိုဝင်ဘာလ ၁၅ ရက် တွင် ကုန်ထုတ်လုပ်သားသစ် (၈၈) ဦး၊ ဆောက်လုပ်ရေးလုပ်သားသစ် (၃၁) ဦး၊ စိုက်ပျိုးရေးနှင့် မွေးမြူရေးလုပ်သား (၂၉) ဦး စုစုပေါင်း (၁၄၈) ဦး၊နိုဝင်ဘာ ၁၇ ရက်တွင် ကုန်ထုတ်လုပ်သားသစ် (၃၈) ဦး၊ CBT ကုန်ထုတ်လုပ်သား (၁၀) ဦး၊ Re-Entry ကုန်ထုတ်လုပ်သား (၇၈) ဦး စုစုပေါင်း ၁၂၆ ဦး၊ နိုဝင်ဘာ ၂၄ ရက်တွင် ကုန်ထုတ်လုပ်သားသစ် (၇၃) ဦး၊ CBT ကုန်ထုတ်လုပ်သား (၉) ဦး၊ Re-Entry ကုန်ထုတ်လုပ်သား (၃၇) ဦးစုစုပေါင်း ၁၁၉ ဦးနှင့်နိုဝင်ဘာလ၂၆ ရက်တွင် ကုန်ထုတ်လုပ်သားသစ် (၁၄၁) ဦး၊ CBT ကုန်ထုတ်လုပ်သား (၆) ဦး၊ Re-Entry ကုန်ထုတ်လုပ်သား (၂) ဦး စုစုပေါင်း ၁၄၉ ဦး ပို့ဆောင်ပေးခဲ့ကြောင်း သိရသည်။

ယင်းအပြင် Regular လုပ်သား (၆၂) ဦးနှင့် Re-Entry လုပ်သား (၂၈) ဦးကို ယခုလဆန်းပိုင်းတွင် စေလွှတ်သွားမည်ဖြစ်ကြောင်း အလုပ်သမားညွှန်ကြားရေးဦးစီးဌာနအောက်ရှိ အစိုးရပြည်ပအလုပ်အကိုင်အေဂျင်စီ (POEA) က ထုတ်ပြန်ကြေညာထားသည်။

တောင်ကိုရီးယားနိုင်ငံသို သွားရောက်အလုပ်လုပ်ကိုင်သည့် အလုပ်သမားအများစုသည် ကုန်ထုတ်လုပ်သား ၊ ကုန်ထုတ် Re-entry လုပ်သား ၊ စိုက်ပျိုးရေးနှင့် မွေးမြူရေး Re-entry လုပ်သားများအဖြစ် ဝင်ရောက်လုပ်ကိုင်နေကြခြင်းဖြစ်သည်။

#ymg/sth
#Yangon_Media_Group

#Local_News
Published _ 1 December 2022

စစ်ကိုင်းတိုင်းဒေသကြီး၊ အင်းတော်မြို့နယ်၊ အောင်ချမ်းသာရပ်ကွက်ရှိ အင်းတော်မြို့မရဲစခန်းကို လက်နက်ကိုင်တစ်ဖွဲ့က နိုဝင်ဘာလ ၂၉ ရက် ညနေပိုင်းတွင် ၄၀ မမ ဗုံးပစ်လောင်ချာများဖြင့် ရမ်းပစ်ခတ်ခဲ့သောကြောင့် ရဲစခန်းအနီး လူနေရပ်ကွက်များအတွင်း ကျရောက်ပေါက်ကွဲခဲ့သောကြောင့် အရပ်သားအမျိုးသမီး ၇ ဦးထိခိုက်ဒဏ်ရာရရှိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

လက်နက်ကိုင်များက ရဲစခန်း၏ မြောက်ဘက် ၄ ဖာလုံခန့်အကွာရှိ ဗန်းမောက်လမ်းဆုံဘက်မှ ၄၀ မမဗုံးပစ်လောင်ချာများဖြင့် ရမ်းပစ်ခတ်တိုက်ခိုက်ခဲ့သောကြောင့် လုံခြုံရေးတပ်ဖွဲ့ဝင်များက ပြန်လည်ခုခံပစ်ခတ်ခဲ့ရာ သက္ကယ်ကျင်းကျေးရွာဘက်သို့ ဆုတ်ခွာထွက်ပြေးသွားခဲ့ကြကြောင်း သိရသည်။

လက်နက်ကိုင်အဖွဲ့တစ်ခု ပစ်ခတ်သော ဗုံးသီးများမှာ ရဲစခန်းအနီး လူနေရပ်ကွက်များအတွင်းသို့ ကျရောက်ပေါက်ကွဲခဲ့မှုကြောင့် ဒေါ်စိန်ရင် (၅၀)နှစ်၊ ဒေါ်မိုးဥမ္မာကျော် (၄၇)နှစ်၊ ဒေါ်သဲကော(၃၂)နှစ်၊ ဒေါ်ဝါဝါခိုင်(၅၁)နှစ်၊ ဒေါ်မိမိငယ်(ခ)မငယ်(၄၃)နှစ်၊ ဒေါ်ခင်ထွေးစိန် (၃၇)နှစ်နှင့် ဒေါ်ကေသွယ်ဝင်း (၄၆)နှစ်တို့ ၇ ဦးတို့ ဗုံးစထိမှန်ဒဏ်ရာရရှိခဲ့ကြကြောင်း သိရသည်။

#ymg/mt
#Yangon_Media_Group

#Local _News
Published _ 1 December 2022

တနင်္သာရီတိုင်း၊ ထားဝယ်မြို့နယ်၊ ဇဟာကျေးရွာအနီးတွင် နိုဝင်ဘာလ ၃၀ ရက်ညနေပိုင်းတွင် အန်ဇာတုံးကားတစ်စီး အရှိန်မထိန်းနိုင်ဘဲတိမ်းမှောက်ခဲ့သည်ဟု မြန်မာနိုင်ငံမီးသတ်တပ်ဖွဲ့ဌာနချုပ်နှင့် ဇဗ္ဗူသီရိလူမှုကူညီရေးအသင်းတို့ထံမှ သိရှိရသည်။

ယမန်နေ့ညနေ ၄ နာရီ ၁၀ မိနစ်ကျော်ခန့်က ထားဝယ်မြို့နယ်၊ ဇဟာကျေးရွာအနီးတွင် အန်ဇာတုံး(အဖြူရောင်)ကားသည် အရှိန်မထိန်းနိုင်ဘဲ တိမ်းမှောက်ခဲ့ကြောင်း သတင်းအရ ထားဝယ်ခရိုင်မီးသတ်စခန်း၊ ဇမ္မူသီရိလူမှုကူညီရေးအသင်း၊ ထားဝယ်ကြက်ခြေနီအသင်းများမှ ကူညီကယ်ဆယ်ရေးလုပ်ငန်းများပြုလုပ်ခဲ့ကြောင်း သိရသည်။

ဖြစ်စဉ်ကြောင့် ကားပေါ် လိုက်ပါလာသည့် အမျိုးသား ၁ ဦးနှင့် အမျိုးသမီး ၆ ဦးတို့အနက် အမျိုးသမီး ၁ ဦးမှာ ထိခိုက်ဒဏ်ရာများရရှိ၍ အခင်းဖြစ်နေရာ၌ပင် သေဆုံးသွားခဲ့ကြောင်း သိရသည်။

ဒါ့အပြင် အမျိုးသမီး ၄ ဦးလည်း ထိခိုက်ဒဏ်ရာများရရှိခဲ့သဖြင့် ဇဗ္ဗူသီရိလူမှုကူညီရေးအသင်းကားဖြင့် ထားဝယ်မြို့ပြည်သူ့ဆေးရုံကြီးသို့ပို့ဆောင်ပေးခဲ့ကြကြောင်းလည်း သိရသည်။

#ymg/NN
#Yangon_Media_Group

#Local_News
Published _ 1 December 2022

အများပြည်သူကို ဖြန့်ဖြူးဆောင်ရွက်နေသောလျှပ်စစ်တာဝါတိုင်များကို လက်နက်ကိုင်အဖွဲ့က မိုင်းခွဲဖျက်ဆီးမှု အကြိမ်ကြိမ်ပြုလုပ်၍ ပြန်လည်ပြုပြင်ရန်သွားရောက်သည့် လျှပ်စစ်ဝန်ဖမ်းများကို ထပ်မံပစ်ခတ်သဖြင့် သေဆုံးသည့်လျှပ်စစ်ဝန်ထမ်း ၁၉ ဦးနှင့်ဒဏ်ရာရဝန်ထမ်း ၅၆ ဦးထိ ရှိလာပြီ ဖြစ်ကြောင်း လျှပ်စစ်စွမ်းအားဝန်ကြီးဌာနက သိရသည်။

"တာဝါတိုင်တွေကို အကြိမ်ကြိမ် ဖျက်ဆီးတယ်၊ ဖောက်ခွဲတယ်။ ချိုးပစ်တယ်၊ သွားပြင်တဲ့ ဝန်ထမ်းတွေကို ပစ်တယ်၊အခုဆိုရင် သေဆုံးသွားတဲ့ဝန်ထမ်း ၁၉ ယောက် ရှိပြီ၊ ထိခိုက်ဒဏ်ရာရတာ က ၅၆ ယောက် ရှိပြီ၊ ဒါပေမဲ့လည်း ကျွန်တော်တို့အနေနဲ့ အများပြည်သူကို လျှပ်စစ်မီးပေးနိုင်ဖို့ ဆက်ပြီးတော့ ဘယ်လို ပြုပြင်ရင် ရမလဲဆိုတာကို ချင့်ချိန်ပြီး လုပ်နေကြပါတယ်။သက်ဆိုင်ရာနယ်မြေတွေကလုံခြုံရေးအဖွဲ့တွေနဲ့ ပူးပေါင်းပြီးတော့ လုပ်နေပါတယ်"ဟု လျှပ်စစ်စွမ်းအားဝန်ကြီးဌာန၏ အရာထမ်းတစ်ဦးက ပြောသည်။

ယင်းအပြင် နိုဝင်ဘာလ ၂၉ ရက် ညနေပိုင်းက မွန်ပြည်နယ်၊ ကျိုက်ထိုမြို့နယ်လျှပ်စစ်ရုံး၌ တာဝန်ထမ်း‌ဆောင်လျက်ရှိသော မြို့နယ်လျှပ်စစ်အင်ဂျင်နီယာတစ်ဦးကို ပြီးခဲ့သည့်လုပ်ကြံခဲ့၍ သေဆုံးခဲ့ရသောကြောင့် ယခုအခါ လျှပ်စစ်စွမ်းအားဝန်ကြီးဌာန၏ ဝန်ထမ်းများအား လုပ်ကြံပစ်ခတ်မှု(၂၄) ကြိမ် ရှိပြီ ဖြစ်ကြောင်းလည်း သိရသည်။

ပြီးခဲ့သည့် နိုဝင်ဘာလ ၂၈ ရက် ကလည်း အများပြည်သူကို ဖြန့်ဖြူးဆောင်ရွက်နေသော ၂၃၀ ကေဗွီ ညောင်ပင်ကြီး-ချောင်းကူး မဟာဓာတ်အားလိုင်းကို လက်နက်ကြီးဖြင့် ပစ်ခတ်ခဲ့သဖြင့် မြို့(၁၃)မြို့ ဓာတ်အားပြတ်တောက်ခဲ့သည့်အပြင် မကွေးတိုင်းဒေသကြီး၊ ကျွန်းချောင်းရှိ (၂၀ ဒသမ ၅၄)မဂ္ဂါဝပ် သဘာဝဓာတ်ငွေ့သုံးအင်ဂျင် စက်ရုံမှဝန်ထမ်းများကို ခြိမ်းခြောက်ငွေတောင်းခံခဲ့သဖြင့် နိုင်ငံခြားသားဝန်ထမ်းများ ထွက်ခွာခဲ့ရကာ ဓာတ်အားပေးစက်ရုံကို ရပ်တန့်ခဲ့ရပြီး ဓာတ်အားထုတ်လုပ်မှု လျော့နည်းခဲ့ရခြင်းများ ဖြစ်ပေါ်ခဲ့သေးကြောင်း သိရသည်။

၎င်းအပြင် လက်နက်ကိုင်အဖွဲ့က ဓာတ်အားပေးစက်ရုံ၊ ခွဲရုံ၊ ရုံးနှင့် ဝန်ထမ်းအိမ်ရာများသို့ ဝင်ရောက်ဖောက်ခွဲပစ်ခတ်ဖျက်ဆီးမှု (၂၀၉)ကြိမ်၊အများပြည်သူသို့ ဖြန့်ဖြူးပေးလျက်ရှိသည့် မဟာဓာတ်အားလိုင်းတာဝါ (၄၈)တိုင်နှင့် ဖြန့်ဖြူးရေးလိုင်း (၄၉)တိုင်တို့ကို ဖျက်ဆီးဖောက်ခွဲခဲ့သဖြင့် လျှပ်စစ်ဓာတ်အား (၁၆၀) မဂ္ဂါဝပ်ခန့် လျော့နည်းခဲ့ကာ အချို့သောနေရာများတွင် ပြုပြင်ဆောင်ရွက်ခြင်းမပြုလုပ်နိုင်သေးသဖြင့် ပြည်သူလူထုသို့ လျှပ်စစ်ဖြန့်ဝေပေးနိုင်မှုမရှိကြောင်းလည်း လျှပ်စစ်စွမ်းအားဝန်ကြီးဌာနက သိရသည်။

#ymg/mt
#Yangon_Media_Group