#Myanmar_News
Published 17 April 2023

အင်းစိန်ဗဟို အကျဉ်းထောင်တွင် ပြစ်ဒဏ်ကျခံနေရသည့် အောက်ပါ သီရိလင်္ကာနိုင်ငံသား ၅ ဦးကို ပြစ်ဒဏ်များလျှော့ပေါ့ပြီး ပြစ်ဒဏ်လွတ်ငြိမ်းခွင့်ပြု၍ ပြည်နှင်ဒဏ်ပေးလိုက်တယ်လို့ ယနေ့ ဧပြီလ (၁၇)ရက် မြန်မာနှစ်ဆန်းတစ်ရက်နေ့မှာ နစက,က အမိန့်အမှတ် ၃၀/၂၀၂၃ ဖြင့်ထုတ်ပြန်ကြေညာပါတယ်။

ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ (၁) အရ “ နောက်တစ်ကြိမ် ပြစ်မှုထပ်မံကျူးလွန်ပါက၎င်းပြစ်ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည် " ဟူသောစည်းကမ်းသတ်မှတ်ချက်ဖြင့် ယင်းတို့ကျခံရန်ကျန်ရှိသော ပြစ်ဒဏ်များအပေါ် လျှော့ပေါ့ပြီး ပြစ်ဒဏ်လွတ်ငြိမ်းခွင့်ပြု၍ ပြည်နှင်ဒဏ်ပေးလိုက်တာဖြစ်ပါတယ်။

နစက ဥက္ကဋ္ဌသည် မြန်မာနှစ်သစ်မင်္ဂလာအခါသမယအထိမ်းအမှတ်အားဖြင့်လည်းကောင်း၊ နိုင်ငံအချင်းချင်းမိတ်ဝတ်မပျက်ဆက်ဆံရေးကို ရှေးရှုသောအားဖြင့်လည်းကောင်း၊ လူသားချင်းစာနာထောက်ထားမှုကို အလေးထားသောအားဖြင့်လည်း ယခုလိုဆောင်ရွက်ပေးလိုက်တာဖြစ်တယ်လို့ အမိန့်မှာဖော်ပြထားပါတယ်။
-ymg/knl
#ပြစ်ဒဏ်လွတ်ငြိမ်းခွင့်ပြု #နစက
#YMG #Yangon_Media_Group

[ Album ]
#Local_News
Published _17 April 2023

ပြစ်ဒဏ်လွတ်ငြိမ်းခွင့်တွင် အင်းစိန်အကျဉ်းထောင်မှ အကျဉ်းသား ၊အကျဉ်းသူ ၂၀၀ ကျော် ပါဝင်ကြောင်း အဆိုပါအကျဉ်းထောင်က သိရသည်။

ယနေ့တွင် တစ်နိုင်ငံလုံးရှိ အကျဉ်းထောင်၊အချုပ်ထောင်စခန်းအသီးသီး၌ ပြစ်ဒဏ်ကျခံနေရသော အကျဉ်းသား အကျဉ်းသူ ၃၀၁၅ ဦးကို ပြစ်ဒဏ်လွတ်ငြိမ်းခွင့်ပြုလိုက်ကြောင်း နစက က ထုတ်ပြန်ထားသည်။

ယင်းတွင်ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ (၁) အရ နောက်တစ်ကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည် ဟူသော စည်းကမ်းသတ်မှတ်ချက်ဖြင့်ယင်းတို့ကျခံရန်ကျန်ရှိသော ပြစ်ဒဏ်များအပေါ်လျှော့ပေါ့၍ ပြစ်ဒဏ်လွတ်ငြိမ်းခွင့်ပြုလိုက်ကြောင်း ကြေညာချက်တွင် ဖော်ပြထားသည်။

ymg/mt
#Local_News ##ပြစ်ဒဏ်လွတ်ငြိမ်းခွင့် #အင်းစိန်အကျဉ်းထောင် #အကျဉ်းသား၊အကျဉ်းသူ ၂၀၀
#YMG #Yangon_Media_Group

Published_ 17 April 2023

အခုနှစ်နှစ်ဆန်းတစ်ရက်နေ့ဧပြီလ(၁၇)ရက်မှာရွှေတိဂုံစေတီတော်၊မဟာဝိဇယစေတီတော်စတဲ့ရန်ကုန်မြိုရှိတန်ခိုးကြီးဘုရားတွေ၊စေတီပုထိုးတွေကိုရပ်နီးရပ်ဝေးမှ လာရောက်ဖူးမြော်သူတွေ၊ကုသိုလ်ယူသူတွေ များပြားခဲ့တယ်လိုသိရပါတယ်။

-ymg/tthl

#နှစ်ဆန်းတစ်ရက်နေ့

#ရွှေတိဂုံဘုရားကုသိုလ်ယူသူများ

#မြန်မာနှစ်သစ်ကူး

#မြန်မာ့သင်္ကြန်

#YangonMediaGroup

Published _17 April 2023

မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်ရှိ မန်းရွှေစက်တော်ဘုရား ဗုဒ္ဓပူဇနိယပွဲတော် ပိတ်ပွဲအခမ်းအနားကို ယနေ့ ဧပြီလ ၁၇ ရက်  မြန်မာနှစ်ဆန်းတစ်ရက်နေ့ နံနက် ၈ နာရီအချိန်က ကျင်းပပြုလုပ်ခဲ့ကြောင်း သိရသည်။

အဆိုပါပိတ်ပွဲအခမ်းအနားသို့ မန်းရွှေစက်တော် ဘုရားဩဝါဒါစရိယ ဆရာတော်ကြီးများ၊ မကွေးတိုင်းဒေသကြီးအစိုးရအဖွဲ့ လူမှုရေးရာဝန်ကြီး၊တိုင်းရင်းသားရေးရာဝန်ကြီး နှင့် စီမံအုပ်ချုပ်ရေးအဖွဲ့ တာဝန်ရှိသူများ တက်ရောက်ခဲ့ကြကြောင်း၊မန်းရွှေစက်တော်ဘုရားဂေါပကအဖွဲ့ ဩဝါဒါစရိယ ဆရာတော်ကြီးများက အောက်စက်တော်ရာနှင့် အထက်စက်တော်ရာ ပါဒစေတီတော်နှစ်ဆူအား ဗုဒ္ဓါဘိသေက အနေကဇာတင်လှူပူဇော်ခဲ့ကြကြောင်း သိရသည်။

ဩဝါဒါစရိယ ဆရာတော်ကြီးများနှင့် တာဝန်ရှိသူများက မန်းရွှေစက်တော်ဘုရား ပါဒစေတီတော်နှစ်ဆူအား နမ္မဒါရေစင်သွန်းဖျန်း၍ ရွှေသင်္ကန်းများ ကပ်လှူပူဇော်ခဲ့ကြပြီး အောက်ခြေတော်ရာ ပါဒစေတီတော် အလင်းပေါက် ဖန်အုပ်ဆောင်းတော်အား စက်ခလုပ်နှိပ် ပိတ်သိမ်းခြင်းနှင့် အထက်စက်တော်ရာ ပါဒစေတီတော် ခြေတော်ရာသံတံခါးအား ပိတ်သိမ်းခြင်းများ ဆောင်ရွက်ခဲ့ကြကြောင်း သိရသည်။

ယင်းအပြင် မန်းရွှေစက်တော်ဘုရား ဗုဒ္ဓပူဇနိယပွဲတော် အောင်မြင်စွာ ကျင်းပနိုင်ခဲ့ခြင်းနှင့် ပါဒစေတီတော်နှစ်ဆူ ခြေတော်ရာပိတ်သိမ်းပွဲ အောင်မြင်ခြင်း အထိမ်းအမှတ်အလှူတော်ကို မန်းရွှေစက်တော်ဘုရား သုံးထပ်ဆောင် သာသနာ့ဗိမ္မာန်တော်၌ ဆက်လက်ကျင်းပခဲ့ကြကြောင်း ၊ယနေ့သည် မြန်မာနှစ်ဆန်းတစ်ရက်နေ့ဖြစ်သောကြောင့် နှစ်ဦးကုသိုလ်အဖြစ် မန်းရွှေစက်တော်ဘုရား မန်းချောင်းအတွင်း ဇီဝိတဒါန ငါးလွှတ်ကုသိုလ်ပြုခဲ့ကြသေးကြောင်းလည်း သိရသည်။

မန်းရွှေစက်တော်ဘုရား ဗုဒ္ဓပူဇနိယ ဘုရားပွဲတော်ကြီးကို နှစ်စဉ် တပို့တွဲလဆန်း ၅ ရက်မှ မြန်မာနှစ်ဆန်းတစ်ရက်နေ့အထိ စည်းကားသိုက်မြိုက်စွာ ကျင်းပပြုလုပ်ခဲ့ကာ ပွဲတော်စတင်ဖွင့်လှစ်ခဲ့သည့်နေ့မှစ၍ ယနေ့အထိ ဘုရားပွဲကာလအတွင်း အနယ်နယ်အရပ်ရပ်မှ ဘုရားဖူး ရဟန်းရှင်လူ မိဘပြည်သူပေါင်း ငါးသိန်းခန့်၊မော်တော်ယာဉ်အစီးရေပေါင်း ၅၆၀၀၀ ကျော် လာရောက် ခဲ့ကြောင်း မန်းရွှေစက်တော်ဘုရား ဂေါပကအဖွဲ့၏စာရင်းများအရ သိရသည်။

Photo-Maung Maung (Minbu)

ymg/mt

Yangon_Media_Group

#မန်းရွှေစက်တော်

#မန်းရွှေစက်တော်ဘုရားဗုဒ္ဓပူဇနိယပွဲတော်ပိတ်ပွဲ

Published _17 April 2023

နိုင်ငံစီးပွားရေး အနုတ်လက္ခဏာမှ အပေါင်း ၃ ရာခိုင်နှုန်းခန့် တိုးတက်လာခဲ့ကြောင်း နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင် က ယနေ့ ဧပြီလ ၁၇ ရက် (နှစ်ဆန်းတစ်ရက်)မြန်မာနှစ်သစ်ကူး နှုတ်ခွန်းဆက်မင်္ဂလာစကားတွင် ထည့်သွင်းပြောကြားခဲ့သည်။

"ကျွန်တော်တို့နိုင်ငံမှာ ၂၀၂၁ ခုနှစ်အတွင်း စီးပွားရေးအကြပ်အတည်းများ ရှိခဲ့ပါတယ်။ ၂၀၂၂ ခုနှစ်မှာ ကျွန်တော်တို့ပြည်တွင်းအားတွေ စုစည်းမှုကောင်းလာသောကြောင့် ကုန်ထုတ်လုပ်မှုတွေ ကောင်းမွန်လာပါတယ်။ နယ်စပ်ကုန်သွယ်မှုတွေကို အတိုင်းအတာတစ်ခုအထိ ဖွင့်လှစ်လာနိုင်ခြင်းတွေကြောင့် လုပ်ငန်းတွေပြန်လည်လည်ပတ်လာနိုင်ပြီး နိုင်ငံရဲ့စီးပွားရေးဟာ အနုတ်လက္ခဏာမှ အပေါင်း ၃ ရာခိုင်နှုန်းနီးပါး တိုးတက်လာခဲ့ပါတယ်” ဟု သူက နှစ်သစ်ကူးနှုတ်ခွန်းဆက်စကားတွင်ထည့်သွင်းပြောကြားခဲ့ခြင်းဖြစ်သည်။

“စီးပွားရေးမြှင့်တင်မှုတွေဆောင်ရွက်ရာမှာ ခိုင်မာတဲ့စီးပွားရေးလုပ်ငန်းတွေကို ဆောင်ရွက်ရန်လိုအပ်ပြီး ပြည်တွင်းကုန်ထုတ်လုပ်မှုလုပ်ငန်းတွေကို အားပေးခြင်းဟာ နိုင်ငံ့စီးပွားမြှင့်တင်ရေးကို အားပေးခြင်းဖြစ်ပါတယ်။ MSME လုပ်ငန်းတွေကိုအားပေး ဆောင်ရွက်လျက်ရှိပါတယ်။ ထုတ်ကုန်တွေ ပိုမိုတင်ပို့နိုင်ဖို့ ကျွန်တော်တို့ပြည်သူတွေက ပိုမိုကြိုးပမ်းဆောင်ရွက်ခဲ့ရင် ဒီနှစ်ဟာ ယခင်နှစ်တွေကထက် စီးပွားရေးတိုးတက်မှုအား ပိုကောင်းလာမယ်လို့ ကျွန်တော်အပြည့်အဝ ယုံကြည်ပါတယ်” ဟုလည်း ဗိုလ်ချူပ်မှူးကြီးက ဆက်လက်ပြောကြားခဲ့သည်။

သို့ရာတွင် အကြမ်းဖက်မှုဖြစ်စဉ်တွေရှိနေသည့် နိုင်ငံတွေသည် တိုးတက်မှုနှောင့်နှေးနေသည်ဟုလည်း နစက ဥက္ကဋ္ဌက ပြောဆိုသွားသည်။

စားရေရိက္ခာဖူလုံရေးအတွက် အဓိကအသက်မွေး မြူရေးလုပ်ငန်းဖြစ်သော စိုက်ပျိုးရေးနှင့်မွေးမြူရေးကိုအခြေခံသည့် ကုန်ထုတ်လုပ်မှုလုပ်ငန်းတွေကို အမျိုးသားရေးရည်မှန်းချက်အဖြစ် ချမှတ်၍ အားပေးမြှင့်တင်ဆောင်ရွက်လျက် ရှိကြောင်းလည်း နစက ဥက္ကဌက နှုတ်ခွန်းဆက်စကားတွင် ထည့်သွင်းပြောဆိုသွားခဲ့သည်။

ymg/mt

#YangonMediaGroup

#နစကဥက္ကဋ္ဌ

#ဗိုလ်ချူပ်မှူးကြီးမင်းအောင်လှိုင်

#မြန်မာ့နှစ်သစ်ကူးနှုတ်ခွန်းဆက်စကား

Published _17 April 2023

မလေးရှားနိုင်ငံ ပီနန်းကမ်းခြေတွင် အပျော်စီး ရေပေါ်ရှပ်ပြေးယာဉ်တိုက်မိ၍ မြန်မာနိုင်ငံသား လူငယ်တစ်ဦးသေဆုံးသွားကြောင်း စေတနာ့အားမာန်လူမှုကူညီရေးအသင်း နှင့် မြန်မာလူမှုကူညီရေးအသင်း(မလေးရှား) တို့က သိရသည်။

ဧပြီလ ၁၆ ရက် (သင်္ကြန်အတက်နေ့ )ညနေပိုင်းတွင် မလေးရှားနိုင်ငံ ပီနန်းကမ်းခြေ$ အပျော်စီး ရေပေါ်ရှပ်ပြေးယာဉ် နှင့် တစ်ဖက်မှ မောင်းနှင်လာသော ယာဉ်တို့ အရှိန်မထိန်းနိုင်ဘဲ ထိပ်တိုက် မျက်နှာချင်ဆိုင်တိုက်မိခဲ့သောကြောင့် အထက်ပါအတိုင်း ဖြစ်ပွားခဲ့ခြင်းလည်း ဖြစ်သည်။

"သင်္ကြန်ကာလဆိုတော့ အသောက်အစားတော့ နည်းနည်းရှိတာပေါ့၊ကျွန်တော်တို့ အသင်းဘက်ကို ပြန်ပြောပြချက်အရ ကတော့ ရှပ်ပြေးယာဉ်ကို မောင်းတဲ့နေရာမှာ အရှိန်မထိန်းနိုင်ဘဲ တခြားယာဉ်တစ်စီးကို ဝင်ဖြစ်သွားတာ။မေးရိုးကွဲသွားတာ၊ရှပ်ပြေးယာဉ်တွေက နာရီနဲ့ ငှားစီးရတာ၊စီးနေကျမဟုတ်ဘဲ စီးလို့မရဘူးလေ၊အဲဒီယာဉ်တွေက၊အဲဒီမှာ အရှိန်မထိန်းနိုင် ဖြစ်တာ။လူတွေကလည်း များတယ်။မနေ့က သင်္ကြန် အတက်မှာလေ။သူက ပထမ ပီနန်းမှာနေတယ်။နောက်ပိုင်းမှ KL မှာနေတာတဲ့"ဟု စေတနာ့အားမာန်လူမှုကူညီရေးအသင်း တာဝန်ရှိသူက ပြောသည်။

ယင်းသေဆုံးသူမှာ မန္တလေးတိုင်းဒေသကြီး မြင်းခြံမြို့နယ်မှ အသက်၂၃ နှစ်အရွယ် ကိုထွန်းလင်းအောင် ဖြစ်ကြောင်း၊ယင်းမှာ မူလက ပီနန်းတွင် နေထိုင်ပြီးနောက် မကြာသေးမီကကွာလာလမ်ပူမြို့၌ သွားရောက် အလုပ်လုပ်ကိုင်နေကြောင်း၊ယခု ဖြစ်စဉ်မှာ ပီနန်းသို့ လာလည်စဉ် ဖြစ်ပွားခဲ့ခြင်း ဖြစ်ကြောင်း သိရသည်။

သေဆုံးသူ၏ ရုပ်အလောင်းကို မိသားစုက မြန်မာနိုင်ငံသို့ ပြန်လည် သယ်ဆောင်လိုသောကြောင့် နှလုံးလှပရဟိတလူငယ်များသွေးလှူရှင်အဖွဲ့ ( ကွာလာလမ်ပူ - မလေးရှား ) က ပို့ဆောင်ပေးရန် လုပ်ဆောင်နေကြကြောင်းလည်း သိရသည်။

ymg/mt

Yangon_Media_Group

#ပီနန်ကမ်းခြေအပျော်စီးရေပေါ်ရှပ်ပြေးယာဉ်တိုက်မိမြန်မာတစ်ဦးသေ

#မလေးရှား

#ပီနန်ကမ်းခြေ