#Local_News
Published-18 July 2023
အိမ်ခြံမြေစျေးနှုန်းမြင့်တက်နေမှုများကြောင့် စျေးကွက်အတွင်း အငှားပိုသွက်လာကြောင်း အိမ်ခြံမြေဝန်ဆောင်မှုအသင်း လှိုင်မြို့နယ် ဥက္ကဌ ဒေါ်သန္တာဝင်းက ဆိုသည်။
၂၀၂၂ခုနှစ် ကိုဗစ်ဖြစ်ပွားမှုလျော့နည်းလာချိန်မှစ၍ ရန်ကုန်အိမ်ငှားစျေးကွက်၌ ပုံမှန်နေထိုင်သူများအပြင် အနယ်နယ်အရပ်ရပ်မှ ရန်ကုန်မြို့သို့လာရောက်၍ သင်တန်းလာတက်သူများရှိနေ၍ အငှားတောက်လျောက်ဖြစ်နေကြောင်းလည်း အိမ်ခြံမြေဝန်ဆောင်မှုအသင်း(ဗဟို) ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံမှုဆိုင်ရာ အသိပညာဆွေးနွေးပွဲတွင် ယင်းက ပြောကြားခဲ့ခြင်းဖြစ်သည်။
"အခုက အိမ်ခြံမြေစျေးက အမြင့်ပိုင်းရောက်နေလို့ ဝယ်ဖို့မလိုက်နိုင်တော့တာကြောင့် အငှားပိုဖြစ်လာတဲ့ သဘောမျိုးပါ။ အငှားက ပြောသမျှ၊ ထွက်သမျှ Customer က လိုအပ်နေတယ်။ တိုက်ခန်း၊ ကွန်ဒို၊ လုံးချင်း အစုံငှားနေရပါတယ်။ လှိုင်မြို့နယ်ဘက် မှာဆိုရင် အင်းစိန်လမ်းကနေ ဘုရင့်နောင်လမ်းတစ်လျှောက် တိုက်ခန်းအရေအတွက်ကလည်းများသလို အငှားကလည်းတောက်လျောက်ငှားနေရတယ်"ဟု ဒေါ်သန္တာဝင်းကဆိုသည်။
စျေးနှုန်းအနေဖြင့် ၂သိန်းအထက်၊ ၃သိန်း၊ ၁၀သိန်း ဝန်းကျင်အထိ အငှားရှိနေသည့်အနက် ၂သိန်းကျော်ဝန်းကျင် အငှားခန်းများပို၍ အငှားသွက်ကြောင်းလည်း ယင်းကဆိုသည်။
မြန်မာနိုင်ငံ၏အိမ်ခြံမြေစျေးကွက်သည် ၂၀၂၂ခု နှစ်ဇွန်လမှစ၍စျေးပိုမိုမြင့်တက်လာခဲ့ပြီး အိမ်ခြံမြေစျေးကွက် အတက်ဘက်သို့ဦးတည်နေကြောင်းလည်း မြန်မာနိုင်ငံအိမ်ခြံမြေဝန်ဆောင်မှုအသင်း ဥက္ကဌ ဦးခင်မောင်သန်းက ပြောကြားသည်။
#Local_News #အိမ်ခြံမြေ အငှားဈေးကွက်
#Yangon_Times/BM
