#LocalNews
Published_10 May 2022
အထောက်အထားမဲ့ မြန်မာနိုင်ငံသားများ တင်ဆောင်လာသော မော်တော်ယာဉ်တစ်စီး ထိုင်းနိုင်ငံအတွင်းတိမ်းမှောက်၍ တစ်ဦးသေပြီး ၈ ဦးဒဏ်ရာရခဲ့ကြောင်း သိရသည်။
ယာဉ်ပေါ်တွင် အထောက်အထားမဲ့ မြန်မာနိုင်ငံသား၂၁ ဦး လိုက်ပါလာခြင်းဖြစ်ပြီး မေလ ၉ ရက် က ထိုင်းနိုင်ငံ တာခ်ခရိုင် နယ်စပ် မဲ့လမတ်မြိုနယ်အတွင်း တိမ်းမှောက်မှုဖြစ်ပွားခဲ့ခြင်း ဖြစ် ကြောင်း သိရသည်။
"ကားပေါ်မှာ အမျိုးသား ၁၂ ယောက်၊ အမျိုးသမီးက ၉ ယောက်ပါတယ်လို့ ကြားတယ်။ ကားက ချောက်ထဲကို ထိုးကျသွားတာ။ ကားအမျိုးအစားက ပစ်ကပ်ထရပ်ကား Isuzu အမျိုးအစားလို့သိရတယ်။ ဒဏ်ရာရသူတွေကလည်း ပြင်းထန်တာကြောင့် မဲ့လမတ်ဆေးရုံကို ပို့ထားတယ်တဲ့"ဟု ထိုင်းနိုင်ငံရောက် မြန်မာနိုင်ငံသားတစ်ဦးက ပြောသည်။
ထိုင်းနိုင်ငံသို့ တရားမဝင်လမ်းကြောင်းမှ သွားရောက်သည့်မြန်မာရွှေ့ပြောင်းအလုပ်သမားတင်ဆောင်သောယာဉ်များ တိမ်းမှောက်ခြင်း၊ အဖမ်းဆီးခံရခြင်းနှင့် အခြားဘေးအန္တရာယ်များ ကြုံတွေ့ခြင်းများ မကြာခဏဖြစ်ပေါ်လေ့ရှိနေသည့်အတွက် မြန်မာရွှေ့ပြောင်းအလုပ်သမားများအနေဖြင့် တရားမဝင်လမ်းကြောင်းမှ မလာရောက်ကြရန်လည်း ရွှေ့ပြောင်းလုပ်သားများ အရေးလုပ်ကိုင်နေသူများက တိုက်တွန်းနေကြသည်။
ymg/mt
#Yangon_Media_Group
