#LocalNews
Published - 9 Jan 2022
တရုတ်-မြန်မာ ချစ်ကြည်ရေး၏ ပြယုဂ်တစ်ခုဖြစ်သည့် ပုဂံဒေသရှိ ချူအင်လိုင်းတန်ဆောင်း ပြုပြင်မွမ်းမံခြင်းစီမံကိန်း စတင်ဆောင်ရွက်ခြင်းအခမ်းအနားကို ဒီကနေ့ ဇန်နဝါရီလ ၈ ရက်နေ့မှာ ပုဂံမြို့မှာ ကျင်းပခဲ့ပါတယ်။ ၁၉၆၁ ခုနှစ်၊ ဇန်နဝါရီလ ၈ ရက်နေ့မှာ ဝန်ကြီးချုပ်ချူအင်လိုင်းသည် ပုဂံသို့လာရောက်ခဲ့ပြီး ရွှေစည်းခုံစေတီတော်အတွက် လှူဒါန်းငွေ ထည့်ဝင်ခဲ့ကာ မြန်မာနိုင်ငံကမိတ်ဆွေက ထိုလှူဒါန်းငွေဖြင့် စေတီဘေး၌ ပြည်သူများနားနေရန်အတွက် ဤတန်ဆောင်းကို တည်ဆောက်ခဲ့ခြင်း ဖြစ်တယ်လို့ သိရပါတယ်။
"ချူအင်လိုင်းတန်ဆောင်း" ဟာ တရုတ်-မြန်မာချစ်ကြည်ရေး၏ ပြယုဂ်ဖြစ်ပြီး ရာစုနှစ်ထက်ဝက်ကျော် ဖြတ်သန်းခဲ့ကာ ယနေ့အချိန်မှာတော့ မြန်မာပြည်သူများ ပိုမိုအဆင်ပြေချောမွေ့ စွာ နားနေနိုင်ရန်အတွက် တရုတ်-မြန်မာချစ်ကြည်ရေး အမွေဆက်ခံနိုင်ရေး အခန်းကဏ္ဍကိုဖော်ဆောင်ခြင်း ဖြစ်တယ်လို့လည်း မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai က ပြောပါတယ်။
ဒါ့အပြင် ယနေ့ အခမ်းအနားမှာ "စီမံကိန်းတရားဝင် စတင်ဆောင်ရွက်ခြင်းအား ဂုဏ်ပြုကြောင်း" ကိုလည်း သံအမတ်ကြီးက ဆိုပါတယ်။ "ယနေ့ဟာ ဝန်ကြီးချုပ်ချူအင်လိုင်း မြန်မာနိုင်ငံသို့ လာရောက်လည်ပတ်ခဲ့သည့် ၆၁ နှစ်မြောက် အထိမ်းအမှတ်နေ့ဖြစ်ပါတယ်။ ဝန်ကြီးချုပ်ချူအင်လိုင်း ကွယ်လွန်သည့် ၄၆ နှစ်မြောက် နှစ်ပတ်လည်နေ့လည်း ဖြစ်ပါတယ်။
ဝန်ကြီးချုပ်ချူအင်လိုင်းသည် သက်ရှိထင်ရှားရှိစဉ်က မြန်မာနိုင်ငံသို့ (၉)ကြိမ် လာရောက်ခဲ့ပြီး တရုတ်-မြန်မာ ချစ်ကြည်ရင်းနှီးသောဆက်ဆံရေးအတွက် ဖျောက်ဖျက်၍မရသည့် အကျိုးဆောင်မှုများ ပြုလုပ်ခဲ့ပါတယ်။"လို့ သံအမတ်ကြီး Mr. Chen Hai က ပြောကြားခဲ့တာပါ။ ဆက်လက်၍ သံအမတ်ကြီးက "ချူအင်လိုင်းတန်ဆောင်း"ကို မြန်မာနိုင်ငံဆိုင်ရာတရုတ်သံရုံးနှင့် မြန်မာနိုင်ငံ သာသနာရေးနှင့် ယဉ်ကျေးမှုဝန်ကြီးဌာန၊ မန္တလေးတိုင်းဒေသကြီးအစိုးရအဖွဲ့၊ ရွှေစည်းခုံစေတီတော်ဂေါပကအဖွဲ့တို့က ဆွေးနွေးညှိနှိုင်းပြီးနောက် တန်ဆောင်းကိုပြုပြင်မွမ်းမံပြီး ပြည်သူများအသုံးပြုနိုင်ရန်အတွက် ဖွင့်လှစ်ခဲ့ကြောင်း၊ မိမိတို့သည် မြန်မာနိုင်ငံ နယ်ပယ်အသီးသီးနှင့်အတူ ချူအင်လိုင်းတန်ဆောင်းမှတစ်ဆင့် တရုတ်-မြန်မာချစ်ကြည်ရင်းနှီးမှုကို မြှင့်တင်ရန် ဉာဏ်ပညာနှင့် ခွန်အားများ ရယူပြီး တရုတ်-မြန်မာအေးအတူပူအမျှအသိုက်အဝန်း အတူတည်ဆောက်ရေးအတွက် မဆုတ်မနစ် ကြိုးပမ်းဆောင်ရွက်သွားရန် ဆန္ဒရှိတယ်လို့လည်း ယနေ့ စီမံကိန်းစတင်ခြင်းအခမ်းအနားမှာ ထည့်သွင်း ပြောကြားခဲ့ပါတယ်။
ထို့နောက် မြန်မာနိုင်ငံ သာသနာရေးနှင့်ယဉ်ကျေးမှုဝန်ကြီးဌာန ဒုတိယဝန်ကြီး ဦးထွန်းအုံက "ချူအင်လိုင်းတန်ဆောင်းသည် မြန်မာ-တရုတ် အစဉ်အလာချစ်ကြည်ရေး၏ သင်္ကေတဖြစ်ပါတယ်။ မြန်မာ-တရုတ် နှစ်နိုင်ငံပြည်သူအချင်းချင်း “ဆွေမျိုးပေါက်ဖော်” ဟု ခေါ်ဆိုကြပါတယ်။ ဒါသည် နှစ်နိုင်ငံပြည်သူတို့ရဲ့ နီးကပ်သော ချစ်ကြည်ရင်းနှီးမှုဆက်ဆံရေးကို ဖော်ညွှန်းနေတာပါ။ ၁၉၆၁ ခုနှစ်က ဝန်ကြီးချုပ်ချူအင်လိုင်းမှ တန်ဆောင်းတည်ဆောက်ရန်အတွက် လှူဒါန်းခဲ့ပြီးနောက်ပိုင်း နှစ်နိုင်ငံသည် နယ်ပယ်အသီးသီး၌ နီးကပ်သော ပူးပေါင်းဆောင်ရွက်မှုကို ရေရှည်ထိန်းသိမ်းထားလျက်ရှိပြီး ချစ်ကြည်ရင်းနှီးသောဆက်ဆံရေး အဆက်မပြတ် တိုးတက်လျက်ရှိပါတယ်"လို့ ပြောကြားခဲ့ပါတယ်။
ယနေ့ အခမ်းအနားတွင် သံမှူး Mr. Yang Shouzheng ကလည်း တရုတ်သံရုံးကို ကိုယ်စားပြု၍ ရွှေစည်းခုံစေတီတော်ဂေါပကအဖွဲ့သို့ နှာခေါင်းစည်း၊ ပိုးသတ်ဆေးရည်၊ အရက်ပြန် စသည့် ကပ်ရောဂါကာကွယ်ရေးပစ္စည်းများ လှူဒါန်းပေးခဲ့တယ်လို့ မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်ခဲ့ပါတယ်။
ymg/kg
#Yangon_Media_Group
