#World_News
Published 23 May 2025
▪️ အမေရိကန်သမ္မတ ဒေါ်နယ်ထရမ့်အစိုးရအဖွဲ့က ကြာသပတေးနေ့မှာ ဟားဗတ်တက္ကသိုလ်ကို နိုင်ငံတကာမှ ကျောင်းသားများ ကျောင်းအပ်နှံနိုင်ခွင့် ရုပ်သိမ်းလိုက်ကာ လက်ရှိနိုင်ငံခြားကျောင်းသားများကို အခြားကျောင်းများသို့ ပြောင်းရွှေ့စေပြီး ဒီလိုမှမဟုတ်ရင် ယင်းတို့ရဲ့ တရားဝင်နေထိုင်သင်ကြားခွင့် ဆုံးရှုံးစေမှာဖြစ်သလို အခြားကောလိပ်များအထိပါ ရှင်းထုတ်သွားဖို့ ခြိမ်းခြောက်နေပါတယ်။
▪️ ၂၀၂၅ - ၂၀၂၆ စာသင်နှစ်အတွက် ဟားဗတ်တက္ကသိုလ်ရဲ့ နိုင်ငံခြားကျောင်းသားများ တက်ရောက်ခွင့်အစီအစဉ်ကို သေချာထိရောက်စွာ အဆုံးသတ်ဖို့ နိုင်ငံ့လုံခြုံရေးဝန်ကြီး ခရစ္စတီနွန်းက ညွှန်ကြားလိုက်ကြောင်း ထုတ်ပြန်ထားပါတယ်။
▪️ ဒီတက္ကသိုလ်က အကြမ်းဖက်မှု၊ ဆန့်ကျင်ရေးဝါဒီတွေကို လက်ခံပျိုးထောင်နေပြီး တရုတ်ကွန်မြူနစ်ပါတီနဲ့ ပူးပေါင်းနေတယ်လို့ နွန်းက စွပ်စွဲလိုက်ပါတယ်။
▪️ နိုင်ငံခြားကျောင်းသား ထောင်ပေါင်းများစွာအပေါ် သက်ရောက်စေမယ့် အစိုးရလုပ်ရပ်ဟာ တရားဥပဒေမဲ့ပြီး လက်တုံ့ပြန်ချင်တဲ့သဘောလို့ ဟားဗတ်က ပြောပါတယ်။
▪️ ဒါဟာ မာဆာချူဆက်စ် ကိမ်းဘရစ်ချ်ရှိ နာမည်ကြီး Ivy League တက္ကသိုလ်ကို ဆန့်ကျင်တဲ့ ထရမ့်အစိုးရလုပ်ငန်းစဉ်တွေ သိသိသာသာ မြင့်တက်လာတဲ့သဘောဖြစ်ပြီး နွန်းက ဟားဗတ်ရှိ နိုင်ငံခြားကျောင်းသားဗီဇာ ကိုင်ဆောင်ထားသူများနဲ့ ပတ်သက်တဲ့ အချက်အလက်များကို တောင်းခံရာမှာ ဟားဗတ်က ငြင်းပယ်ခဲ့ပြီးနောက် အခုလိုကြေညာလိုက်တာ ဖြစ်ပါတယ်။
▪️ ဟားဗတ်မှာ ၂၀၂၄ - ၂၀၂၅ စာသင်နှစ်အတွင်း နိုင်ငံတကာမှ ကျောင်းသားပေါင်း ၆,၈၀၀ နီးပါး အပ်နှံတက်ရောက်ခဲ့ပါတယ်။
▪️ ၂၀၂၂ ခုနှစ်မှာ နိုင်ငံခြားကျောင်းသားများအနက် တရုတ်နိုင်ငံသား အများဆုံးပါဝင်ခဲ့ပါတယ်။
▪️ ဟားဗတ်ထံပေးပို့တဲ့ စာစောင်ထဲမှာ ပြီးခဲ့တဲ့ ၅ နှစ်အတွင်း နိုင်ငံခြားကျောင်းသားများရဲ့ ဆန္ဒပြလှုပ်ရှားမှု ဗီဒီယို အသံဖိုင်တွေအပါအဝင် မှတ်တမ်းများကို ၇၂ နာရီအတွင်းပေးအပ်ပါက နွန်းဟာ ဟားဗတ်ရဲ့ နိုင်ငံခြားကျောင်းသားတက်ရောက်ခွင့် ပြန်လည်ရရှိဖို့ အခွင့်အရေးပေးလိုက်ပါတယ်။
▪️ Fox News နဲ့အင်တာဗျူးမှာ အခြားတက္ကသိုလ်တွေမှာလည်း အလားတူလုပ်ရပ်မျိုး ပြုလုပ်ဖို့ အစီအစဉ်ရှိလားလို့ မေးမြန်းရာမှာ နွန်းက သေချာပေါက်ရှိပြီး ဒါဟာ အခြားတက္ကသိုလ်တွေအတွက် သတိပေးရာရောက်တယ်လို့ ပြောသွားပါတယ်။
#Source: Reuters
