#World_News
Published 09 April 2025
▪️ ဒိုမီနီကန်သမ္မတနိုင်ငံ မြို့တော်ရှိ နိုက်ကလပ်တစ်ခု ခေါင်မိုးပြိုကျခဲ့ရာမှာ အနည်းဆုံး လူ ၆၆ ဦးသေဆုံးပြီး ထိုထဲမှာ နာမည်ကြီးအဆိုတော်တစ်ဦး၊ ပြည်နယ်အုပ်ချုပ်ရေးမှူးတစ်ဦး၊ မေဂျာလိဂ်ဘေ့စ်ဘော အပစ်သမားဟောင်း အော့တေဗီယိုဒိုတယ်တို့ ပါဝင်ကြောင်း အာဏာပိုင်များက အင်္ဂါနေ့မှာ ပြောပါတယ်။
▪️ လူ ၁၅၅ ဦးခန့် ဒဏ်ရာရရှိခဲ့ကာ အရေးပေါ်ကယ်ဆယ်ရေးများက Jet Set နိုက်ကလပ် အပျက်အစီးများကြားမှ အသက်ရှင်ကျန်သူများကို ဆွဲထုတ်ဖို့ ကြိုးစားနေကြဆဲဖြစ်ပြီး ထိုထဲမှ ပါဝင်သူများရဲ့ မိသားစုဝင်များကတော့ သက်ဆိုင်သူများကို ရှာဖွေဖို့ ရောက်ရှိနေကြပါတယ်။
▪️ အပျက်အစီး အစအနများကို အရှိန်မြှင့်ဖယ်ရှားဖို့အတွက် စက်ပစ္စည်းကိရိယာကြီးများ ပိုမိုအသုံးပြုလာကြကာ အရေးပေါ်ကယ်ဆယ်ရေးများ တိုးမြှင့်လာကြသလို ရှာဖွေရေးများ ဆက်လက်လုပ်ဆောင်နေကြောင်း သမ္မတရုံးမှ ပြောရေးဆိုခွင့်ရှိသူ ဟိုမဲရိုဖီဂွယ်ရိုအာက မွန်းလွဲထုတ်ပြန်ချက်မှာ ပြောထားပါတယ်။
▪️ ပြိုကျချိန်မှာ ကလပ်ထဲ လူဘယ်နှယောက်ရှိလဲဆိုတာ အတိအကျ မသိရသေးဘူးလို့ ဒိုမီနီကန် အရေးပေါ်ကယ်ဆယ်ရေးစင်တာ အကြီးအကဲ ဟွမ်မန်နျူရယ်မန်ဒက်ဇ်က အင်္ဂါနေ့အစောပိုင်းမှာ ပြောသွားပါတယ်။
▪️ သေဆုံးသူတွေထဲက အပါအဝင်ဖြစ်တဲ့ ဒိုမီနီကန် နာမည်ကြီးအဆိုတော် ရပ်ဘီပီရက်ဇ် ဖျော်ဖြေမှုပြုလုပ်စဉ် ပြိုကျခဲ့တာဖြစ်တယ်လို့ သူ့ရဲ့ မန်နေဂျာနဲ့ အနီးနားရှိ မိသားစုဝင်များ ပြောကြားချက်အရ သိရကာ ထိုပွဲကို နိုင်ငံရေးသမားများ၊ အားကစားသမားများနဲ့ အခြားသော အထင်ကရပုဂ္ဂိုလ်များ တက်ရောက်ခဲ့ပါတယ်။
▪️ ထိုထဲမှာ မွန်တီခရစ္စတီမြောက်ပိုင်းပြည်နယ် အုပ်ချုပ်ရေးမှူး နယ်လ်စီခရုဇ်လည်း ပါဝင်ပြီး သူမဟာ မေဂျာလိဂ်ဘေ့စ်ဘော All-Star ၇ ကြိမ်ရ နယ်လ်ဆန်ခရုဇ်ရဲ့ ညီမဖြစ်တယ်လို့ သမ္မတ လူးဝစ်အာဘီနေဒါက ဆိုပါတယ်။
▪️ MLBကစားသမားဟောင်းများဖြစ်တဲ့ အော့တေဗီယိုဒိုတယ်၊ တိုနီဘလန်ကိုတို့လည်း ပြိုကျမှုအတွင်း သေဆုံးခဲ့ကာ ဒိုတယ်ကတော့ အပျက်အစီးများကြားမှ ဆွဲထုတ်ပြီးနောက် ဆေးရုံသွားရာလမ်းမှာ ဆုံးပါးခဲ့တာဖြစ်ပါတယ်။
▪️ ထိခိုက်ဆုံးပါးသူတွေရဲ့ သက်ဆိုင်သူဆွေမျိုးတွေကို စိတ်ပိုင်းဆိုင်ရာ အားပေးမှုများ ပေးနေပြီး ခေါင်မိုးပြိုကျရတဲ့ အကြောင်းအရင်းကို စစ်ဆေးနေဆဲဖြစ်ကြောင်း အရာရှိများ ပြောထားပါတယ်။
#Source: Reuters
