#World_News
Published 29 January 2024
ဆီးရီးယားနယ်စပ်နား ဂျော်ဒန်အရှေ့မြောက်ပိုင်းမှာ စခန်းချထားတဲ့ အမေရိကန်တပ်တွေကို ဒရုန်းဖြင့် တိုက်ခိုက်ခဲ့ရာမှာ အမေရိကန်တပ်သား ၃ ဦး သေဆုံးခဲ့ကာ ဒါဇင်များစွာခန့် ဒဏ်ရာရရှိနိုင်တယ်လို့ သမ္မတဂျိုးဘိုင်ဒင်နဲ့ တာဝန်ရှိသူများက တနင်္ဂနွေနေ့မှာ ပြောကြားလိုက်ပါတယ်။
အစ္စရေးလ်-ဟားမတ်စ် စစ်ပွဲဖြစ်ပွားပြီးနောက်ပိုင်း အမေရိကန်တပ်တွေကို ပထမဆုံးအကြိမ် ထိခိုက်သေဆုံးစေခဲ့တဲ့ တိုက်ခိုက်မှုဖြစ်ခဲ့ကာ အရှေ့အလယ်ပိုင်းတလျှောက် ရိုက်ခတ်မှု ပေါ်ပေါက်လာခဲ့ပြီး ထိုတိုက်ခိုက်မှုအတွက် အီရန်နောက်ခံပြုအဖွဲ့တွေကို ဘိုင်ဒင်က အပြစ်တင်လိုက်ပါတယ်။
တိုက်ခိုက်မှုနဲ့ ပတ်သက်ပြီး အချက်အလက်တွေ စုဆောင်းနေဆဲဖြစ်ပေမယ့် ဆီးရီးယားနဲ့ အီရတ်တို့မှာရှိနေတဲ့ အီရန်နောက်ခံပြုအဖွဲ့တွေ လုပ်တယ်ဆိုတာကို သိနေပါတယ်လို့ ဘိုင်ဒင်က ပြောကြားသွားပါတယ်။
ဒီနောက် ကျဆုံးသွားတဲ့ စစ်မှုထမ်း ၃ ဦးအတွက် အသံတိတ်ဂုဏ်ပြုဖို့ ဘိုင်ဒင်က တောင်းဆိုလိုက်ပြီး တုန့်ပြန်သွားမယ်လို့ ဆိုလိုက်ပါတယ်။
တိုက်ခိုက်မှုကြောင့် အနည်းဆုံး တပ်သား ၃၄ ဦး ဒဏ်ရာရထားကာ အရေအတွက် အပြောင်းအလဲ ဖြစ်နိုင်ကြောင်း အမေရိကန် ဗဟိုစစ်ဌာနချုပ်က ဆိုပါတယ်။
အမေရိကန် စစ်တန်းလျားအနီးမှာ နံနက်ပိုင်းက ဒရုန်းတိုက်ခိုက်ခဲ့တာဖြစ်ပြီး အထိအခိုက်များရတာ ဖြစ်တယ်လို့ အရာရှိ ၂ ဦးက ပြောလိုက်ပါတယ်။
အီရန်အခိုင်အမာ နောက်ခံပြုထားတဲ့ အစ္စလာမ် အတိုက်အခံစစ်သွေးကြွအဖွဲ့က စခန်း ၃ ခုကို တိုက်ခိုက်ခဲ့တယ်လို့ ဆိုလိုက်ပါတယ်။
အစ္စရေးလ်နဲ့ ပါလက်စ်တိုင်းတို့ရဲ့ ပဋိပက္ခကြောင့် အရှေ့အလယ်ပိုင်းမှာ တင်းမာမှုမြင့်နေရာကနေ ယခုလိုတိုက်ခိုက်မှုကြောင့် ပိုမိုဆိုးရွားလာဖွယ် ရှိနေပါတယ်။
အီရတ်နဲ့ ဆီးရီးယားတို့မှာ အီရန်နောက်ခံပြုအဖွဲ့တွေ အကြိမ် ၁၅၀ ကျော် တိုက်ခိုက်ထားတာကို အမေရိကန်တပ်တွေ ကြုံတွေ့ထားပြီး အနည်းဆုံး အယောက် ၇၀ ထိခိုက်ထားပါတယ်။
အမေရိကန် စစ်သင်္ဘောတွေကလည်း ယီမင်မှ ဟူသီအဖွဲ့တွေကို ပစ်ခတ်နေပါတယ်။
အမေရိကန်တပ်တွေ တိုက်ခိုက်ခံနေရတာကို အခွင့်ကောင်းယူပြီး ဘိုင်ဒင်ရဲ့ပြိုင်ဘက် ရီပတ်ဘလစ်ကန်တွေက သမ္မတဟာပျော့ညံ့နေတယ်လို့ ဝေဖန်လိုက်ကြပါတယ်။
ဂါဇာမှာ အပြစ်မဲ့တွေကို သတ်ဖြတ်နေတာတွေ မရပ်မချင်း ဆက်လက်တိုက်ခိုက်သွားမယ်လို့ ဟားမတ်စ်အဖွဲ့မှ အကြီးတန်းအရာရှိတစ်ဦးက ပြောကြားခဲ့ပါတယ်။
#World_News #အီရန်နောက်ခံပြုအဖွဲ့ #တပ်သား(၃)ဦးသေဆုံး #ဒါဇင်များစွာဒဏ်ရာရ #Source: Reuters
