Published 19 October 2023
ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက်တစ်ရပ်ကို ဗုဒ္ဓဟူးနေ့မှာ အမေရိကန်က ဗီတိုအာဏာသုံး ပယ်ချလိုက်ပါတယ်။
ထိုဆုံးဖြတ်ဖြေရှင်းချက်မှာ ဂါဇာကမ်းမြောင်ဒေသသို့ လူသားချင်းစာနာကူညီမှုများ ရရှိနိုင်ရေးအတွက် အစ္စရေးလ်နဲ့ ပါလက်စ်တိုင်း ဟားမတ်စ်စစ်သွေးကြွတို့ရဲ့ ပဋိပက္ခ ယာယီရပ်ဆိုင်းပေးဖို့ တောင်းဆိုတာ ဖြစ်ပါတယ်။
ဂါဇာသို့ ကူညီထောက်ပံ့ရေးမှာ အမေရိကန်က ကြားဝင်ဖို့ ကြိုးပမ်းနေတာကြောင့် ဘရာဇီးလ်မှ အကြံပြုတင်သွင်းတဲ့ အဆိုပြုချက်ကို မဲဆန္ဒပေးဖို့ရာ နောက်ဆုံးနှစ်ရက်အတွင်း နှစ်ကြိမ်တိုင် ကြန့်ကြာခဲ့ပါတယ်။
ဆုံးဖြတ်ချက်မူကြမ်းကို ၁၂ နိုင်ငံက သဘောတူမဲပေးခဲ့ပြီး ရုရှားနဲ့ ဗြိတိန်တို့က ကြားနေမဲပေးခဲ့ပါတယ်။
သံတမန်ရေးရာမှာ အထူးကြိုးပမ်း လုပ်ကိုင်နေရပြီး ထိုသံတမန်ရေး ဖြစ်မြောက်ဖို့လိုအပ်တယ်လို့ ယုံကြည်ကြောင်း ကုလသမဂ္ဂဆိုင်ရာ အမေရိကန်သံအမတ် လင်ဒါသောမတ်စ်ဂရင်းဖီးလ်က ၁၅ နိုင်ငံ မဲဆန္ဒပေးအပြီးမှာ ပြောကြားခဲ့ပါတယ်။
‘’ဆုံးဖြတ်ဖြေရှင်းချက်တွေက အရေးကြီးတာ မှန်ပါတယ်။ ကောင်စီအနေနဲ့ တစ်ခုခုလုပ်ရမှာ မှန်ပါတယ်။
ဒါပေမဲ့ မြေပြင်က တကယ့်အခြေအနေတွေအတိုင်း ဆောင်ရွက်ဖို့နဲ့ သံတမန်ရေးရာ တိုက်ရိုက်အားထုတ်မှုတွေကို ထောက်ပံ့ပေးဖို့ လိုအပ်ပါတယ်။ ဒါမှသာ လူ့အသက်တွေကို ကယ်ဆယ်နိုင်မှာ ဖြစ်ပါတယ်။
ကောင်စီအနေနဲ့ မှန်ကန်အောင် ဆောင်ရွက်ဖို့ လိုပါတယ်’’ လို့ ပြောကြားသွားပါတယ်။
အမေရိကန်ကတော့ ကုလသမဂ္ဂ လုံခြုံရေးကောင်စီရဲ့ လုပ်ဆောင်ချက်တွေကနေ ယင်းရဲ့မဟာမိတ် အစ္စရေးလ်ကို ထုံးစံအတိုင်း ကာကွယ်ပေးနေတာ ဖြစ်ပါတယ်။
ဖမ်းဆီးခံထားရတဲ့ ဓားစာခံတွေ လွှတ်ပေးရေးနဲ့ ဂါဇာသို့ လူသားချင်းစာနာကူညီမှုများ ရရှိရေးတို့အတွက် ချက်ချင်းအပစ်အခတ် ရပ်စဲပေးဖို့ ကုလထွေချုပ် အန်တိုနီယိုဂူတာရက်စ်က ဗုဒ္ဓဟူးနေ့က ပြောကြားလိုက်ပါတယ်။
ပဋိပက္ခနဲ့ ပတ်သက်ပြီး အရေးပေါ်ဆွေးနွေးရန် ၁၉၃ နိုင်ငံပါဝင်တဲ့ ကုလသမဂ္ဂ အထွေထွေညီလာခံ ကျင်းပရန် ရုရှားက တောင်းဆိုထားပါတယ်။
ထိုညီလာခံမှာ မည်သည့်နိုင်ငံမျှ ဗီတိုအာဏာသုံးခွင့်မရှိဘဲ အဆိုပြုမူကြမ်းကို မဲဆန္ဒပေးနိုင်မှာ ဖြစ်ပါတယ်။
စစ်ပွဲပဋိပက္ခ ပိုမိုကျယ်ပြန့်လာနိုင်ခြေ အလွန်များနေတယ်လို့ ကုလသမဂ္ဂ အရှေ့အလယ်ပိုင်းဆိုင်ရာ ငြိမ်းချမ်းရေး သံတမန် တော်ဝင်နက်စ်လန်က ကောင်စီထံ ပြောပြသွားပါတယ်။
ဆုံးဖြတ်ချက်မူကြမ်းက အစ္စရေးလ်တို့ရဲ့ ကိုယ်ပိုင်ကာကွယ်ခွင့်အကြောင်း မဖော်ပြထားတဲ့အတွက် အမေရိကန်က စိတ်ပျက်မိကြောင်း သောမတ်စ်ဂရင်းဖီးလ်က ဆိုလိုက်ကာ ဂါဇာမှာ ပြည်သူများအကြပ်အတည်း ဖြစ်ရခြင်းအတွက် ဟားမတ်စ်တို့ကို အပြစ်တင်လိုက်ပါတယ်။
ဂါဇာမှ ဒုက္ခသည်အကြပ်အတည်း ဖြေရှင်းပေးရန် အစ္စရေးလ်၊ အိမ်နီးချင်းနိုင်ငံများ၊ ကုလသမဂ္ဂ၊ မိတ်ဖက်နိုင်ငံများနဲ့ အတူလုပ်ဆောင်နေကြောင်း၊ ဂါဇာသို့ စားနပ်ရိက္ခာ၊ ဆေးဝါး၊ ရေ၊ လောင်စာများ အမြန်ဆုံးရောက်ရှိရန် လိုအပ်ကြောင်း၊ ဟားမတ်စ်တွေ ကိုယ်တိုင်ကြောင့်ပဲ ဒီပြဿနာများ ဖြစ်လာတာဖြစ်ကြောင်း ပြောပြသွားပါတယ်။
အစ္စရေးလ်တို့ဟာ ဂါဇာကို လုံးဝဝန်းရံထားပြီး ပစ်ခတ်တိုက်ခိုက်နေကာ ဟားမတ်စ်တို့ကို အမြစ်ပြတ်ချေမှုန်းသွားမယ်လို့ အခိုင်အမာဆိုထားပါတယ်။
Source: Reuters
Yangon_Times
#World_News
#Published_ 19 October 2023
#YMG #Yangon_Times #Yangon_Media_Group
