#World_Politics
Published 15 August 2023
မြောက်ကိုရီးယားခေါင်းဆောင် 'ကင်မ်ဂျုံအန်း'နဲ့ ရုရှားသမ္မတ'ဗလာဒီမာပူတင်'တို့ဟာ ဩဂုတ် ၁၅ ရက်နေ့က အပြန်အလှန် စာပေးပို့ခဲ့ကြပြီး သူတို့ရဲ့ ဆက်ဆံရေးကို ကာလကြာရှည်စွာ ရပ်တည်နေမည့် ဗျူဟာမြောက်ဆက်ဆံရေးအဖြစ် မြှင့်တင်ရန် ကတိပြုခဲ့ကြကြောင်း မြောက်ကိုရီးယားနိုင်ငံပိုင် KCNA မီဒီယာက ဖော်ပြခဲ့ပါတယ်။
ထိုကဲ့သို့ စာပေးပို့မှုဟာ ၁၉၁၀-၁၉၄၅ ခုနှစ် ဂျပန်ကိုလိုနီလက်အောက်မှ ကိုရီးယားလွတ်မြောက်ရေး ၇၈ နှစ်ပြည့် အထိမ်းအမှတ်ကို ရည်ညွှန်းတာဖြစ်ပြီး တောင်ကိုရီးယားမှာလည်း နိုင်ငံတော်အားလပ်ရက်အဖြစ် သတ်မှတ်ထားပါတယ်။
နှစ်နိုင်ငံ ရင်းနှီးဆက်ဆံရေးက ဒုတိယကမ္ဘာစစ် ဂျပန်ကိုအနိုင်ရပြီး စတင်လာခဲ့ကာ နယ်ချဲ့ရန်သူတွေရဲ့ မတရားကျင့်မှုများ၊ လွှမ်းမိုးအုပ်စိုးမှုများကို ချေမှုန်းရန်အတွက် ခွန်အားနဲ့ အစွမ်းအစတွေကို အပြည့်အဝဖော်ပြနေတယ်လို့ ကင်မ်ဂျုံအန်းက ပူတင်ကို စာပေးပို့ခဲ့ကြောင်း KCNA က ဖော်ပြခဲ့ပါတယ်။
ချစ်ကြည်ရင်းနှီးမှုနဲ့ စည်းလုံးညီညွတ်မှုတို့ကနေ ခေတ်သစ်လိုအပ်ချက်နဲ့အညီ ရေရှည်တည်မြဲတဲ့ မဟာဗျူဟာမြောက် ဆက်ဆံရေးအဖြစ် တိုးတက်လာမယ်လို့ အခိုင်အမာယုံကြည်ကြောင်း ဆိုထားပါတယ်။
နှစ်နိုင်ငံ ဘုံရည်မှန်းချက်နဲ့ ရည်ရွယ်ချက်များ အောင်မြင်ရေးလုပ်ငန်းစဉ်မှာ အချင်းချင်း အခိုင်အမာထောက်ခံပြီး ပူးပေါင်းဆောင်ရွက်ခြင်းဖြင့် အောင်ပွဲများ ရရှိလာမှာဖြစ်ကြောင်း ဆိုပါတယ်။
ယူကရိန်းစစ်ပွဲအတွက် မြောက်ကိုရီးယားက ရုရှားကို အမြောက်ကျည်များ၊ ပခုံးထမ်းဒုံးကျည်များဖြင့် ထောက်ပံ့ပေးတယ်လို့ အမေရိကန်က စွပ်စွဲထားပါတယ်။
မြောက်ကိုရီးယားနဲ့ ရုရှားတို့ကတော့ လက်နက်ပေးပို့မှု မရှိဘူးလို့ ငြင်းဆိုထားပါတယ်။
ပြီးခဲ့တဲ့လက ပြုံယမ်းမှာကျင်းပတဲ့ စစ်ရေးလက်နက်ပြပွဲမှာ ကင်မ်ဂျုံအန်းက ရုရှားကာကွယ်ရေးဝန်ကြီးကို နျူကလီးယားဒုံးကျည်များ၊ တိုက်ခိုက်ရေးဒရုန်းများ လိုက်လံပြသခဲ့ပါတယ်။
ကိုရီးယားကျွန်းဆွယ် တည်ငြိမ်ရေး၊ လုံခြုံရေးနဲ့ အရှေ့မြောက်အာရှတစ်ခုလုံးအတွက် နှစ်နိုင်ငံပြည်သူများရဲ့ သုခချမ်းသာအတွက် နယ်ပယ်ပေါင်းစုံမှာ နှစ်နိုင်ငံပူးပေါင်းဆောင်ရွက်မှုကို ခိုင်မာစေမယ်ဆိုတာ သေချာပေါက်ယုံကြည်ကြောင်း ပူတင်က ပြောကြားခဲ့ပါတယ်။
တောင်ကိုရီးယား၊ အမေရိကန်၊ ဂျပန်တို့မှ ခေါင်းဆောင်များက မြောက်ကိုရီးယား၊ ယူကရိန်း၊ အခြားကိစ္စများနဲ့ ပတ်သက်ပြီး လုံခြုံရေးပူးပေါင်းဆောင်ရွက်ရေးများအကြောင်း ဩဂုတ် ၁၈ ရက်နေ့မှာ ဆွေးနွေးသွားရန် စီစဉ်ထားပါတယ်။
#World_Politics #ကင်မ်ဂျုံအန်းနှင့်ပူတင် #နှစ်နိုင်ငံဆက်ဆံရေးမဟာဗျူဟာ
Source: CNA
