#World_Health
Published_ 20 April 2023
အနောက်ဘင်္ဂလားမှာ အပူလှိုင်းပျံ့နှံ့နေပြီး လူအများအပြားက နွေရာသီနဲ့ဆက်နွယ်တဲ့ ရောဂါများ ခံစားနေကြရပါတယ်။
ဒီလိုအပူချိန်ကြောင့် အရေပြားပြဿနာများ အဖြစ်များကြပြီး ပုံမှန်မထိန်းသိမ်းတဲ့အခါမျိုးမှာ ပိုဆိုးတတ်ပါတယ်။
အပူချိန်ရုတ်တရက် မြင့်တက်လာတဲ့အခါ လူတစ်ယောက်ရဲ့ကျန်းမာရေးကို သိသိသာသာထိခိုက်စေပါတယ်။
နေပူထိတွေ့ခြင်းဖြင့် အရေပြားရောင်ရမ်းကာ နေလောင်တာမျိုး ဖြစ်တတ်ပါတယ်။
နေမှခရမ်းလွန်ရောင်ခြည်နဲ့ အနီအောက်ရောင်ခြည်တို့ကို အလွန်အကျွံထိတွေ့မိတာကြောင့် နေလောင်တာဖြစ်ပါတယ်။
နေလောင်ခြင်းမဖြစ်စေဖို့ နေပူထဲမထွက်ရမှာဖြစ်ပေမယ့် ဒါကလည်း သိပ်ပြီးလက်တွေ့မကျပါဘူး။
နေရောင်နဲ့ထိတွေ့ခြင်းများလာတဲ့အခါ အရေပြားတွန့်ခြင်း၊ တင်းတိပ်၊ အရေပြားကင်ဆာတို့ ဖြစ်နိုင်ချေများပါတယ်။
နယူးဒေလီ မက်စ်ဆေးရုံမှ အရေပြားအထူးကုဒေါက်တာ'ပရာတိနာဂရာနီ'က နေလောင်ခြင်းမဖြစ်စေရန် အကြံဉာဏ်များမျှဝေသွားပါတယ်။
- မနက် ၁၁ နာရီမှ မွန်းလွဲ ၄ နာရီကြား နေရောင်ထိတွေ့မှုကို အတတ်နိုင်ဆုံးလျှော့ချပါ။
- အရောင်ဖျော့ဖျော့၊ ချောင်ချောင်ချိချိနဲ့ လက်ရှည်အင်္ကျီများဝတ်ဆင်ကာ ဦးထုပ်၊ နေကာမျက်မှန်တို့လည်း တပ်ဆင်သင့်ပါတယ်။
- UVA ၊ UVB နဲ့ IR ရောင်ခြည်တို့ကို ကာကွယ်ပေးနိုင်တဲ့ နေကာခရင်မ်များလိမ်းပေးပါ။
- အပြင်ထွက်တဲ့အခါ ၃ နာရီတစ်ခါ နေလောင်ကာခရင်မ်ပြန်ပြန်လိမ်းပေးပါ။
- နေကာခရင်မ်များများဖြင့် မျက်နှာ၊ လည်ပင်း၊ ကိုယ်ခန္ဓာအနှံ့လိမ်းပေးပါ။
- ရေနဲ့သဲတွေက အရေပြားပေါ်သို့ ရောင်ခြည်များအလင်းပြန်လာနိုင်တာကြောင့် ဂရုပြုနေသင့်ပါတယ်။
- ရေများများသောက်ပြီး ရေဓာတ်ပြည့်ဝအောင်နေပါ။
- ထောပတ်နို့၊ သံပရာရည်၊ အုန်းရည်၊ ကိုကမ်ရည်တို့က ရေဓာတ်ဖြည့်ပေးတယ်လို့ အာဟာရပညာရှင်များအကြံပြုထားပါတယ်။
- အပြင်ကပြန်ရောက်တဲ့အခါ ပူနွေးတယ်လို့ခံစားရနိုင်တဲ့ မျက်နှာနဲ့ ခန္ဓာကိုယ်အစိတ်အပိုင်းတွေကို ရေခဲကပ်သင့်ပါတယ်။
- နေနဲ့ထိတွေ့ရင် အရေပြားကိုပိုဆိုးစေတဲ့ ဆေးများသောက်ရတာကိုလည်း သတိပြုသင့်ပါတယ်။
Source: India Today
#World_Health #နွေရာသီ #နေလောင်ခြင်းမဖြစ်စေရန် #ရှောင်ရှားဂရုစိုက်
#YMG #Yangon_Media_Group
