#World_Society
Published 1 March 2023
ဂျေဆန်အာဒေးဟာ အသက် ၂၇ နှစ်အရွယ်တုန်းက PhD တန်းတက်ရောက်နေခဲ့ပြီး သူ့မိဘအိမ်ရှိ အိပ်ခန်းနံရံတွေမှာ သူ့ဘဝရဲ့ရည်မှန်းချက်တွေကို ချရေးထားခဲ့ပါတယ်။
ထိုရည်မှန်းချက်တွေထဲက တစ်ခုကတော့ အောက်စ်ဖို့ဒ် ဒါမှမဟုတ် ကိမ်းဘရစ်ခ်ျမှာ တစ်နေ့နေ့အလုပ်လုပ်ရဖို့ပဲ ဖြစ်ပါတယ်။
နောက် ၁၀ နှစ်အကြာ အသက် ၃၇ နှစ်အရွယ်မှာတော့ သူ့အိပ်မက်တွေ အမှန်တကယ်ဖြစ်လာရုံမက ကိမ်းဘရစ်ခ်ျတက္ကသိုလ်သမိုင်းမှာ အသက်အငယ်ဆုံး လူမည်းပရော်ဖက်ဆာအဖြစ် မှတ်တမ်းဝင်နိုင်ခဲ့ပါတယ်။
မတ်လ ၆ ရက်နေ့မှာ ပညာရေးဌာနရှိ လူမှုဗေဒပါမောက္ခအဖြစ် တာဝန်ထမ်းဆောင်ရတော့မယ့် အာဒေးကတော့ ဇွဲလုံ့လအတုယူစရာကောင်းတဲ့ နောက်ခံရှိနေပါတယ်။
သူဟာ အသက် ၃ နှစ်အရွယ်မှာ အော်တစ်ဇင်ဝေဒနာရှိကြောင်း တွေ့ရှိခဲ့ပြီး အသက် ၁၁ နှစ်မတိုင်ခင်အထိ စကားမပြောနိုင်ခဲ့ပါဘူး။
ဒါပေမဲ့ ၁၈ နှစ်အရွယ်မှာ စာပေမတတ်ခြင်းအခက်အခဲကို ကျော်ဖြတ်နိုင်ခဲ့ပါတယ်။
သူ့ကို လန်ဒန်တောင်ပိုင်း ကလပ်ဟမ်မှာ မွေးဖွားကြီးပြင်းစေခဲ့ပြီး လူမှုစီးပွားရးနိမ့်ကျသူတွေ၊ လူမည်းလူမျိုးတွေ၊ အာရှလူမျိုးတွေ၊ လူနည်းစုတိုင်းရင်းသားတွေ ရင်ဆိုင်ရလေ့ရှိတဲ့ အခက်အခဲအားလုံးနဲ့ ရင်ဆိုင်ခဲ့ရပါတယ်။
သူ့ဘဝမှာ တသက်တာလုံး အထောက်အကူရယူပြီး နေထိုင်သွားရမယ်လို့ ထင်ခဲ့တဲ့ ကျန်းမာရေးပညာရှင်တွေကို မှားယွင်းကြောင်း သက်သေပြနိုင်ခဲ့ပါတယ်။
ရာထူးတာဝန်အသစ်ယူပြီးနောက် နိမ့်ကျတဲ့နောက်ခံကလူတွေအတွက် အားကျအတုယူဖွယ်ဖြစ်အောင် ကျင့်ကြံဖို့ရည်ရွယ်ထားပြီး ဒီကိစ္စနဲ့ပတ်သက်လို့ တက္ကသိုလ်ရဲ့ အစီအစဉ်တွေမှာ ထည့်သွင်းသွားမှာဖြစ်ပါတယ်။
သူ့ရဲ့စိတ်ပိုင်းဖြတ်လုပ်ဆောင်ချက်တွေအတွက် ဆိုရှယ်မီဒီယာတွေမှာ အသိအမှတ်ပြုနေကြပါတယ်။
"ကိမ်းဘရစ်ခ်ျမှာ အသက်အငယ်ဆုံးလူမည်းပရော်ဖက်ဆာဖြစ်လာတဲ့ ဂျေဆန်အာဒေးကို တကယ်ကိုဂုဏ်ပြုလိုက်ပါတယ်၊ အခက်အခဲတွေကို ဖြတ်သန်းလာပြီးနောက် ဘဝပန်းတိုင်ကိုရောက်ရှိပုံက တကယ်ကိုလေးစားဖွယ်ဖြစ်ပြီး ဒီတိုင်းပြည်မှာ အခြားလူမျိုးတွေရဲ့ ပညာရေးကဏ္ဍကို ပိုမိုကောင်းမွန်အောင် ဖန်တီးပေးဖို့ တောင်းဆိုရာရောက်ပါတယ်" လို့ Netflix က ပြသနေတဲ့ Bridgerton မှ သရုပ်ဆောင်'အန်ဂျိုအာအန်ဒို'က တွစ်တာမှာရေးသားခဲ့ပါတယ်။
"လူမျိုးရေး၊ မညီမျှမှုနဲ့ ပညာရေးတို့မှာ လူသိများခဲ့တဲ့ ဂျေဆန်အာဒေးဟာ လူမှုဗေဒပရော်ဖက်ဆာအဖြစ် မတ်လကစပြီး တာဝန်ထမ်းဆောင်မှာဖြစ်ပါတယ်၊ ကိမ်းဘရစ်ခ်ျမှ ကြိုဆိုပါတယ်" လို့ တက္ကသိုလ်ကလည်း တွစ်တာမှာ ဖော်ပြခဲ့ပါတယ်။
#Source: WION #World_Society #အသက်(၁၈)နှစ် #အသက်အငယ်ဆုံး #လူမည်းပါမောက္ခ #YMG #Yangon_Media_Group
