#World_Health
Published 6 September 2022
ကျားဟော်မုန်းတစ်မျိုးဖြစ်တဲ့ တက်စ်တိုစတီရုန်းပမာဏနည်းပါးပြီး ကိုဗစ်ရောဂါကူးစက်တဲ့ အမျိုးသားတွေဟာ တက်စ်တိုစတီရုန်းပုံမှန်ရှိတဲ့အမျိုးသားတွေထက် ရောဂါပိုမိုဆိုးရွားနိုင်ပြီး ဆေးရုံတက်ရောက်ကုသရမယ့် အခြေအနေပိုများကြောင်း ဝါရှင်တန်ဆေးပညာတက္ကသိုလ်နဲ့ စိန့်လူးဝစ်ဆေးပညာတက္ကသိုလ်မှ သုတေသီများက JAMA Network Open မှာ ဖော်ပြခဲ့ကြပါတယ်။
၂၀၂၀ တုန်းက ကာကွယ်ဆေးတွေမရခင်မှာ ကိုဗစ်ရောဂါတွေ့ရှိခဲ့တဲ့အမျိုးသား ၇၂၃ ဦးကို သုတေသီများလေ့လာခဲ့ရာ ဆီးချို၊ နာတာရှည်အဆုတ်ရောဂါ၊ နှလုံးရောဂါတို့လို တက်စ်တိုစတီရုန်းနည်းတဲ့သူတွေဟာ ကိုဗစ်ရောဂါကြောင့် ဆေးရုံတက်ကုသနိုင်ချေ ပိုများကြောင်း တွေ့ရှိခဲ့ရပါတယ်။
တက်စ်တိုစတီရုန်းနည်းပြီး ကိုဗစ်ရောဂါဖြစ်တဲ့ အမျိုးသားတွေက ပုံမှန်ဟော်မုန်းရှိတဲ့လူတွေထက် ဆေးရုံတက်ကုသရမှုနှုန်း ၂.၄ ဆပိုများပါတယ်။
တက်စ်တိုစတီရုန်းနည်းပြီး ကိုဗစ်ဖြစ်တဲ့အမျိုးသားတွေကို ဟော်မုန်းကုသခြင်းဖြင့် ဆေးရုံတက်ကုသရမှုကို လျှော့ချပေးနိုင်ပါတယ်။
သုတေသီများက စိန့်လူးဝစ်ဆေးရုံကြီးနှစ်ခုမှာ လူနာတွေကို လေ့လာကုသခဲ့ကြပါတယ်။
"တက်စ်တိုစတီရုန်းနည်းပါးခြင်းက ကိုဗစ်ကြောင့် ဆေးရုံတက်ကုသခံယူမှု မြင့်တက်လာနိုင်ကာ ဟော်မုန်းလိုအပ်ချက်ကို ကုသခြင်းဖြင့် ကာကွယ်လျှော့ချနိုင်ပါတယ်၊ ပုံမှန်ပမာဏက ၁ ဒက်ဆီလီတာမှာ ၃၀၀ ကနေ ၁,၀၀၀ နာနိုဂရမ်ကြားရှိပြီး ၂၀၀ နာနိုဂရမ်ထက်နည်းတဲ့အခါ ဖြစ်နိုင်ချေပိုများပါတယ်၊ ဒီအချက်တွေက အသက်၊ အဝလွန်၊ အခြားဝေဒနာများနဲ့ ဆက်စပ်ထားတာ မဟုတ်ပါဘူး၊ ဒါပေမဲ့ ကုသမှုခံယူနေတဲ့သူတွေက အခြေအနေပုံမှန်ဖြစ်သွားပါတယ်"လို့ စိန့်လူးဝစ်မှ ဒေါက်တာ'ဆန်ဒိဒင်ဆာ'က ပြောပြခဲ့ပါတယ်။
လေ့လာမှုတွေ့ရှိချက်အရ တက်စ်တိုစတီရုန်းနည်းတဲ့ အမျိုးသားတွေဟာ ပုံမှန်ဟော်မုန်းရှိသူတွေထက် ကိုဗစ်ကြောင့် ဆေးရုံတက်ကုသခံယူရခြင်း ၃၃ ရာခိုင်နှုန်းပိုများကြောင်း တွေ့ရှိခဲ့ရပါတယ်။
တက်စ်တိုစတီရုန်းနည်းပါးခြင်းကို ကုသခြင်းဖြင့် အမျိုးသားတွေမှာ ကိုဗစ်ရောဂါပြင်းထန်တဲ့ အခြေအနေကို ကာကွယ်နိုင်ချေရှိနေကြောင်း ကောက်ချက်ချခဲ့ပါတယ်။
Source: The Jerusalem Post
#Yangon_Media_Group
