#WorldNews
Published 27 June 2022
အသက် ၇၈ နှစ်ရှိ အမျိုးသမီးကြီးတစ်ဦးဟာ သန့်ရှင်းရေးအမျိုးသမီးဝန်ထမ်းတစ်ဦးကို နေရာလမ်းညွှန်မေးခဲ့ရာ မမျှော်လင့်ဘဲ ထိုအမျိုးသမီးဟာ ၂၄ နှစ်ကြာအောင်ပျောက်ဆုံးနေခဲ့တဲ့သမီးဖြစ်နေကြောင်း သိရှိခဲ့ရပါတယ်။
ဒီအဖြစ်အပျက်ဟာ ယခုလအစောပိုင်းက တရုတ်နိုင်ငံ စီချွမ်ပြည်နယ်ရှိ မြို့လေးတစ်မြို့မှာဖြစ်ပွားခဲ့တာဖြစ်ပြီး တရုတ်သတင်းဌာန The Cover မှာဖော်ပြခဲ့ပါတယ်။
'ကိုင်ယုရှောင်'လို့ခေါ်တဲ့ အမျိုးသမီးကြီးဟာ ရဲတွေရဲ့အကူအညီနဲ့ သမီးဖြစ်သူ'ဟူဂျန်'ရှိရာ လန်ဇောင်မြို့သို့ခြေရာခံလိုက်လာတာဖြစ်ကြောင်း သတင်းမှာဖော်ပြထားပါတယ်။
ရဲတွေက သူတို့နှစ်ဦးပြန်လည်တွေ့ဆုံနိုင်ဖို့ စီစဉ်ထားကြပြီး တွေ့ဆုံမယ့်ရက်မတိုင်ခင်တစ်ရက်အလိုမှာ အခုလိုတိုက်ဆိုင်စွာ တွေ့ဆုံမိကြတာဖြစ်ပါတယ်။
"ကျွန်မက ကျောင်းအဝင်ဝရှေ့မှာ သန့်ရှင်းရေးလုပ်နေတုန်း အမျိုးသမီးကြီးတစ်ဦးရောက်လာပြီး နေရာလမ်းညွှန်မေးမြန်းရာမှာ သူဟာကျွန်မအမေဖြစ်ကြောင်း ချက်ချင်းမှတ်မိခဲ့ပါတယ်၊ ကျွန်မအရမ်းစိတ်လှုပ်ရှားသွားပါတယ်၊ ဒါပေမဲ့ ကျွန်မက သူ့ကိုအမေလို့ခေါ်တာတောင် သူကကျွန်မကိုမမှတ်မိခဲ့ဘူး" လို့ အသက် ၄၆ နှစ်ရှိ'ဟူဂျန်'က The Cover ကိုပြောကြားခဲ့ပါတယ်။
'ကိုင်'ကအစပိုင်းမှာ သတိထားနေခဲ့ပြီး ရဲတွေကိုဖုန်းဆက်ကာ သူ့သမီးဖြစ်ကြောင်းအတည်ပြုမေးမြန်းခဲ့ပါတယ်။
ဒီဇာတ်လမ်းက တရုတ်ဆိုရှယ်မီဒီယာတွေမှာ ယခုအပတ်အတွင်းလွှမ်းမိုးသွားခဲ့ပြီး ရုပ်ရှင်ဇာတ်ကားတစ်ခုနဲ့ ခိုင်းနှိုင်းခဲ့ကြပါတယ်။
သူတို့နှစ်ယောက်ရဲ့အကြောင်းကို Weibo အက်ပ်မှာဖော်ပြခဲ့ရာမှာ ကြည့်ရှုသူ ၃၄ သန်းကျော်သွားခဲ့ပါတယ်။
ရဲစခန်းရှေ့မှာရိုက်ကူးခဲ့တဲ့ သားအမိနှစ်ယောက်နဲ့ ရဲအရာရှိနှစ်ယောက်တိုရဲ့ပုံတွေဟာ အွန်လိုင်းမှာ ပျံ့နှံသွားခဲ့ပါတယ်။
ဆိုရှယ်မီဒီယာပေါ်မှာတော့ 'ဟူ'ကိုဝေဖန်ပြစ်တင်ခဲ့ကြပြီး သူ့မိသားစုနဲ့ပြန်လည်ပေါင်းစည်းဖို့ ပိုပြီးကြိုးစားခဲ့သင့်ကြောင်းပြောကြားခဲ့ကြပါတယ်။
တရုတ်မီဒီယာ Red Star ရဲ့ဖော်ပြချက်အရ ၁၉၉၉ ခုနှစ်မှာ 'ဟူ'က ကျောက်မျက်ရတနာစက်ရုံတစ်ခုမှာ အလုပ်ရှာဖို့အတွက် မွေးရပ်မြေယွန်ယန်ခရိုင်ကနေ အခြားဒေသတစ်ခုသို့ရွှေ့ပြောင်းလာပြီးနောက် သူ့မိသားစုတွေနဲ့အဆက်အသွယ်ပြတ်သွားခဲ့ပါတယ်။
မိသားစုရဲ့ဖုန်းနံပါတ်ပါဝင်တဲ့ စာရွက်စာတမ်းတွေ အထားမှားပြီးတော့ အိမ်ကိုဖုန်းဆက်သွယ်လို့မရဘဲ ဖြစ်နေခဲ့ပါတယ်။
Three Gorges Dam ရေကာတာဆောက်လုပ်ရေးအတွက် သူ့မိသားစုက မွေးရပ်မြေကနေဖယ်ရှားလိုက်ရပြီးနောက် လုံးဝအဆက်အသွယ်ပြတ်သွားခဲ့ပါတယ်။
စာရေးပေးပိုခဲ့ပေမယ့် လိပ်စာအဟောင်းကို ပိုလို့မရတော့တာကြောင့် 'ဟူ'ဆီကိုပဲ စာတွေပြန်ရောက်လာပါတယ်။
"အမေနဲ့နေရမယ့်အချိန်တွေ အများကြီးကုန်ဆုံးခဲ့ရပါတယ်၊ အခုတော့ လက်ကျန်အချိန်တွေကို အမေနဲ့ပဲဖြတ်သန်းသွားဖို့ သစ္စာပြုလိုက်ပါပြီ" လို့ ပြောပြသွားပါတယ်။
Source: Insider
#Yangon_Media_Group
