#WorldHealth
Published 27 April 2022
အမျိုးသမီးဆယ်လီအနုပညာရှင်တွေကြား လက်သည်းရှည်ထားခြင်းခေတ်စားလာပေမယ့် လက်သည်းရှည်တွေအောက်မှာ ဘက်တီးရီးယားနဲ့မှိမျိုးစိတ်အချို့ ခိုအောင်းနေနိုင်ကြောင်း ဇီဝဗေဒပညာရှင်တစ်ဦးက သတိပေးလိုက်ပါတယ်။
ဝါရှင်တန်ဒီစီရှိ အမေရိကန်တက္ကသိုလ်မှ ဇီဝဗေဒပညာရှင်ဒေါက်တာ'ဂျက်ဖရေးကပ္ပလန်'က လက်သည်းရှည်တွေဟာ မျက်စိနဲ့မမြင်ရတဲ့ပိုးမွှားတွေအတွက် ခိုလှုံရာနေရာများဖြစ်ကြောင်း သတိပေးခဲ့ပါတယ်။
နေ့စဉ်ထိတွေ့နေရတဲ့ပစ္စည်းတွေကနေ ကျွန်ုပ်တို့လက်သည်းတွေမှာ ဘက်တီးရီးယားပိုးမွှားတွေရှိနေနိုင်ပါတယ်။
ဒီပိုးမွှားတွေက အန္တရာယ်မဖြစ်စေတတ်ပေမယ့် ရောဂါပိုးကူးစက်ဝင်ရောက်ပြီဆိုရင်တော့ ဖောရောင်ခြင်း၊ နာကျင်ခြင်း၊ လက်သည်းထူခြင်းများ ဖြစ်ပေါ်လာတတ်ပါတယ်။
ဒါ့အပြင် ပိုးသတ်ဆေးယဉ်ပါးတဲ့ Steph aureus ပိုးမွှားဟာ အရေပြားရောဂါကူးစက်မှုဖြစ်ပွားနိုင်ပြီး လက်သည်းရှည်တွေအောက်မှာ ခိုအောင်းနေထိုင်ပါတယ်။
"လက်သည်းတွေအောက်မှာတွေ့ရတတ်တဲ့ ဘက်တီးရီးယား ၃၂ မျိုးနဲ့ မှိုကပ်ပါးမျိုး ၂၈ မျိုးတွေ့ရှိခဲ့ကြပါတယ်" လို့ 'ကပ္ပလန်'က USA Today ကိုပြောကြားခဲ့ပါတယ်။
လက်သည်းရှည်အစစ်တွေရော လက်သည်းတုတွေရော ဂျယ်လက်သည်းအမျိုးအစားတွေအားလုံးမှာ ဘက်တီးရီးယားတွေပိုမှို ပေါက်ဖွားနေနိုင်ပါတယ်။
လက်သည်းမှာရှိနေတဲ့ ဘက်တီးရီးယားတွေကို ဖယ်ရှားလို့မရပါဘူး။ လက်သည်းကုတ်ခြင်း၊ လက်သည်းကိုက်ခြင်း၊ နှာခေါင်းနှိုက်ခြင်း၊ လက်ချောင်းစုပ်ခြင်းတို့ဖြင့် ဘက်တီးရီးယားက ခန္ဓာကိုယ်ထဲသို့ ဝင်ရောက်လာနိုင်ပါတယ်။
ဘက်တီးရီးယားတွေစုပြုံလာတဲ့အခါ ရောဂါကူးစက်မှုဖြစ်လာစေပြီး ပြင်းထန်တဲ့အခြေအနေတွေမှာ လက်သည်းပုံပျက်ခြင်းအထိ ဖြစ်တတ်ပါတယ်။
ကယ်ရိုလိုင်းနားတောင်ပိုင်းမှာ လက်သည်းအလှဆင်ပညာရှင်'ကေလာနယူးမန်း'ကတော့ ပရော်ဖက်ဆာတွေရဲ့ပြောကြားချက်ကို သဘောမတူခဲ့ဘဲ လက်သည်းတွေအောက်မှာ ပိုးမွှားနေထိုင်နိုင်ချေနည်းတယ်လို့ ဆိုခဲ့ပါတယ်။
"လက်သည်းရှည်ထားတဲ့သူတွေက သူတို့လက်သည်းကို ဘယ်လိုထိန်းသိမ်းရမလဲ သန့်ရှင်းရမလဲဆိုတာ သိကြပါတယ်။ လက်သည်းအလှပြင်ဖို့အတွက် ၆၀ ဒေါ်လာလောက်သုံးစွဲတဲ့သူတွေက လက်သည်းကိုသေချာသန့်ရှင်းအောင်မထားဘူးဆိုတာ ဖြစ်နိုင်ပါ့မလား" လို့ ထောက်ပြလိုက်ပါတယ်။
နာမည်ကြီးအဆိုတော် Cardi B နဲ့ Billie Eilish တို့က သူတို့ရဲ့လက်သည်းရှည်များကို ထင်သာအောင် ဓာတ်ပုံအရိုက်ခံခဲ့ကြပါတယ်။
ရောဂါထိန်းချုပ်ကာကွယ်ရေးစင်တာ(CDC)က ပိုးမွှားတွေမခိုအောင်းနိုင်အောင် လက်သည်းရှည်မထားဖို့ အကြံပြုထားပြီး လက်သည်းအလှပြင်ပစ္စည်းတွေကိုလည်း မသုံးခင်နဲ့အသုံးပြုပြီးတိုင်း ပိုးသတ်သန့်စင်ဖို့ မှာကြားလိုက်ပါတယ်။
Source: DailyMail
#Yangon_Media_Group
