#WorldPolitics
Published - 01 April 2022
ရုရှားနိုင်ငံမှဓာတ်ငွေ့များဝယ်ယူသူတွေအနေနဲ့ ဧပြီ ၁ ရက်နေ့(သောကြောနေ့)ကစတင်ကာ ရုရှားငွေရူဘယ်လ်ဖြင့်ဝယ်ယူပေးချေရမှာဖြစ်ပြီး ရူဘယ်လ်ဖြင့်မပေးချေနိုင်ပါက ဓာတ်ငွေ့ထောက်ပံ့မှုရပ်ဆိုင်းသွားမှာဖြစ်ကြောင်း ရုရှားသမ္မတ'ဗလာဒီမီယာပူတင်'က သတ်မှတ်ပြောကြားလိုက်ပါတယ်။

'ပူတင်'ရဲ့မိန့်ကြားချက်ကို ဥရောပမြို့ကြီးတွေက ငြင်းပယ်လိုက်ကြပြီး ဒါဟာ ခြိမ်းခြောက်မှုတစ်ခုဖြစ်တယ်လို့ ဂျာမနီတို့ကပြောဆိုလိုက်ပါတယ်။ ကြာသပတေးနေ့ကထုတ်ပြန်လိုက်တဲ့ 'ပူတင်'ရဲ့အမိန့်ကြောင့် ဥရောပအနေနဲ့ ဓာတ်ငွေ့ရရှိမှု ၃ ပုံ ၁ ပုံကျော်ကို လက်လွှတ်ဆုံးရှုံးရဖွယ်ရှိနေပါတယ်။

ဥရောပရဲ့စီးပွားရေးအင်အားအကြီးဆုံးဂျာမနီနိုင်ငံက ဓာတ်ငွေ့ရရှိဖို့ ရုရှားကိုအလွန်အမင်းမှီခိုနေရတာကြောင့် အခုဆိုရင် ဓာတ်ငွေ့ကိုခွဲတမ်းနဲ့အသုံးပြုဖို့ အရေးပေါ်အစီအစဉ်တွေစတင်လုပ်ဆောင်နေပြီဖြစ်ပါတယ်။

ရုရှားတို့ကယူကရိန်းကို ကျူးကျော်ခဲ့တာကြောင့် အနောက်နိုင်ငံတွေက ရုရှားဘဏ်တွေ၊ ကုမ္ပဏီတွေ၊ စီးပွားရေးလုပ်ငန်းရှင်တွေ၊ အစိုးရနဲ့ဆက်စပ်တဲ့သူတွေကို ဒဏ်ခတ်ပိတ်ဆို့မှုတွေပြင်းပြင်းထန်ထန်ချမှတ်ခဲ့ပါတယ်။

ထိုဒဏ်ခတ်ပိတ်ဆို့မှုတွေကိုတုန့်ပြန်ဖို့ 'ပူတင်'ကစွမ်းအင်လောင်စာတင်ပို့ခြင်းကဏ္ဍကို အဓိကအားထားလျက်ရှိပါတယ်။

"ရုရှားမှဓာတ်ငွေ့ဝယ်ယူမယ်ဆိုရင် ရုရှားဘဏ်တွေမှာ ရူဘယ်လ်အကောင့်စာရင်းဖွင့်ဖို့လိုပါတယ်။ ဧပြီ ၁ ရက်နေ့ကစပြီး ဓာတ်ငွေ့ဝယ်ယူမယ့်သူတွေ ဒီအကောင့်စာရင်းတွေကနေ ပေးချေရမှာဖြစ်ပါတယ်" လို့ 'ပူတင်'က ပြောကြားခဲ့ပါတယ်။

"ဒီလိုမျိုးမပေးချေဘူးဆိုရင် ဓာတ်ငွေ့ဝယ်ယူတယ်လို့ သတ်မှတ်မှာမဟုတ်ပါဘူး။ ဘယ်သူကမှ ပစ္စည်းတွေကိုအလကားမရောင်းကြသလို ကျုပ်တို့ကလည်း အလှူလုပ်နေတာမဟုတ်ပါဘူး။ ရူဘယ်လ်နဲ့မပေးချေဘူးဆိုရင် လက်ရှိစာချုပ်တွေရပ်ဆိုင်းသွားမှာပါ" လို့ ရုပ်သံကနေပြောကြားလိုက်ပါတယ်။

ရုရှားရဲ့ထုတ်ပြန်ချက်ကိုတုန့်ပြန်ဖို့ အီတလီက ဥရောပနိုင်ငံတွေနဲ့ ဆက်သွယ်ထားကြောင်းဆိုလိုက်ပြီး ရုရှားဓာတ်ငွေ့ပြတ်တောက်သွားလျှင် အရန်ဓာတ်ငွေ့သိုလှောင်ရေးဖြင့် စီးပွားရေးလုပ်ငန်းတွေဆက်လက်လုပ်ဆောင်သွားမယ်လို့ပြောကြားလိုက်ပါတယ်။
ဂျာမနီမှစွမ်းအင်ကုမ္ပဏီတွေကလည်း ဘာလင်နဲ့နီးနီးစပ်စပ်ဆွေးနွေးလျက်ရှိပြီး ရုရှားဓာတ်ငွေ့ထောက်ပံ့မှုရပ်တန့်သွားရင် နောက်ထပ်လမ်းကြောင်းဖြင့်ရယူသုံးစွဲဖို့ တိုင်ပင်နေကြပါတယ်။

ဓာတ်ငွေ့ဝယ်ယူမယ့်သူတွေက ရုရှားနိုင်ငံပိုင် Gazprom ဘဏ်မှာ အကောင့်စာရင်းဖွင့်ပြီးဝယ်ယူရမှာဖြစ်ပါတယ်။ Gazprom ဘဏ်က ဓာတ်ငွေ့ဝယ်ယူသူတွေကိုယ်စား ရူဘယ်လ်ငွေဝယ်ယူပေးမှာဖြစ်ပါတယ်။

ဧပြီလအတွင်းဓာတ်ငွေ့ထောက်ပံ့မှုအတွက် စာချုပ်အချို့မှာ ဧပြီလလယ် သို့မဟုတ် မေလမှစတင်သက်ရောက်မှာဖြစ်တာကြောင့် ဓာတ်ငွေ့ထောက်ပံ့မှုချက်ချင်းရပ်ဆိုင်းသွားမှာမဟုတ်ဘူးလို့ ယူဆရကြောင်း သတင်းအရင်းအမြစ်တစ်ခုက ရိုက်တာသတင်းဌာနကိုပြောကြားခဲ့ပါတယ်။

ဖေဖော်ဝါရီ ၂၄ ရက်နေ့ ယူကရိန်းကိုစတင်ကျူးကျော်ကတည်းက ရုရှားငွေရူဘယ်လ်တန်ဖိုးစံချိန်တင်ကျဆင်းခဲ့တာကြောင့် တန်ဖိုးပြန်တက်လာအောင် ရူဘယ်လ်ငွေဖြင့်ပေးချေခိုင်းဖို့ 'ပူတင်'ကဆုံးဖြတ်လိုက်တာဖြစ်ပါတယ်။

အနောက်နိုင်ငံများမှ အစိုးရတွေနဲ့ကုမ္ပဏီတွေကတော့ ဓာတ်ငွေ့ဝယ်ယူဖို့ စာချုပ်မှာ ငွေကြေးပြောင်းလဲပေးချေဖို့ အချက်ကို ငြင်းပယ်လိုက်ကြပါတယ်။

ရူဘယ်လ်ဖြင့်ပေးချေရမယ်ဆိုရင် အနောက်နိုင်ငံတွေမှအရေးယူချမှတ်ထားတဲ့ ရုရှားနိုင်ငံအပေါ်နိုင်ငံခြားငွေလဲလှယ်ခွင့်ပိတ်ပင်ခြင်းဟာ ထိရောက်မှုရှိတော့မှာမဟုတ်ပါဘူး။
ပြင်သစ်နဲ့ဂျာမနီတို့ ကတော့ ရုရှားဓာတ်ငွေ့ထောက်ပံ့မှုရပ်ဆိုင်းသွားနိုင်တဲ့အခြေအနေအပေါ် ကြိုတင်ပြင်ဆင်နေကြကြောင်း ပြင်သစ်စီးပွားရေးဝန်ကြီး'ဘရူနိုလီမိုင်ရာ'က ဆိုလိုက်ပါတယ်။

အနောက်နိုင်ငံက စီးပွားရေးနဲ့ဘဏ္ဍာရေးကဏ္ဍတွေကို အဓိကလက်ကိုင်တုတ်အဖြစ်အသုံးပြုနေပြီး ရုရှားမှာ ဒေါ်လာနဲ့ယူရိုငွေအသုံးပြုခြင်းရပ်ဆိုင်းလိုက်တာကြောင့် ထိုငွေများဖြင့်ဆက်လက်ရောင်းချသွားဖို့ မဖြစ်နိုင်ကြောင်း 'ပူတင်'က ပြောကြားခဲ့ပါတယ်။

သူတို့ကိုယ်တိုင်ရပ်ဆိုင်းလိုက်တဲ့ယူရိုငွေတွေနဲ့သာ ဆက်ပြီးရောင်းနေရမယ်ဆိုရင် ဥရောပကို ဓာတ်ငွေ့အလကားရောင်းချနေရသလိုဖြစ်နေကြောင်း ပြောကြားသွားပါတယ်။

ဒါပေမဲ့လည်း ရုရှားတို့က သူတို့ရဲ့စီးပွားရေးဂုဏ်သိက္ခာကိုတန်ဖိုးထားပြီး လက်ရှိစာချုပ်များအရ ဓာတ်ငွေ့ထောက်ပံ့ရေးတာဝန်ကျေအောင် ဆက်လက်လုပ်ဆောင်သွားမှာပါလို့ ပြောကြားခဲ့ပါတယ်။
Source: Reuters

Published 31 March 2022

ရုရှားနှင့် တရုတ်တို့ဟာ ပိုပြီးမျှတတဲ့ ကမ္ဘာ့အင်အားအစီအစဉ်ကို ဦးတည်တဲ့လမ်းကြောင်းကို ဦးတည်နေကြပြီလို့ ရုရှားနိုင်ငံခြားရေးဝန်ကြီး ဆာဂေးလက်ဗရော့က ပြောကြားလိုက်ပါတယ်။

ရုရှားဟာ ယူကရိန်းထဲ ကျူးကျော်ဝင်ရောက်ပြီးနောက်ပိုင်း တရုတ်နိုင်ငံကို ရုရှားနိုင်ငံခြားရေးဝန်ကြီးဟာ ပထမဆုံးအဖြစ် လာရောက်ခဲ့ရာမှာ ယခုလိုပြောကြားခဲ့တာပါ။

လာဗရော့ဗ်ဟာ တရုတ်အရှေ့ပိုင်းဟွမ်ရှမ်းမြို့ကို ဗုဒ္ဓဟူးနေ့ စောစောပိုင်းက ရောက်ရှိလာခဲ့ပြီး တရုတ်နိုင်ငံခြားရေးဝန်ကြီး ဝမ်ယီနှင့် တွေ့ဆုံဆွေးနွေးခဲ့ပါတယ်။

ရုရှားနိုင်ငံခြားရေးဝန်ကြီးဌာနက ထုတ်ပြန်တဲ့ဗွီဒီယိုထဲမှာ ကမ္ဘာကြီးဟာ လက်ရှိအရေးကြီးတဲ့အဆင့်ကျော်သွားရင် အင်အားပေါင်းစုံဝင်ရိုးစွန်း multipolar ကမ္ဘာ့အစီအစဉ်သစ်တစ်ခုထဲ ဦးတည်ရွေ့လျားသွားလိမ့်မယ်လို့ ရုရှားနိုင်ငံခြားရေးဝန်ကြီးက ပြောပါတယ်။

Source AFP

#WorldPolitics
Published - 31 March 2022
ရုရှားနိုင်ငံမှထုတ်လုပ်တဲ့ စွမ်းအင်လောင်စာများနဲ့ ပို့ကုန်ပစ္စည်းများအားလုံးကို ရုရှားငွေကြေးရူဘယ်လ်ဖြင့်ဝယ်ယူပေးချေသွားရမှာဖြစ်ကြောင်း ရုရှားတို့ ကဗုဒ္ဓဟူးနေ့က အသိပေးကြေညာလိုက်ပါတယ်။

ယူကရိန်းကိုကျူးကျော်တဲ့အတွက် အနောက်နိုင်ငံက ရုရှားအပေါ်ဒဏ်ခတ်ပိတ်ဆို့ မှုများပြုလုပ်ခြင်းကို ရုရှားသမ္မတ'ဗလာဒီမီယာပူတင်'က ပြန်လည်တုန့်ပြန်တဲ့အနေနဲ့ အခုလိုချမှတ်ဖို့ ဆုံးဖြတ်လိုက်တာဖြစ်ပါတယ်။

၁၉၉၁ ခုနှစ် ဆိုဗီယက်ပြည်ထောင်စုပြိုကွဲပြီးနောက်ပိုင်း ရုရှားစီးပွားရေးအကြီးအကျယ်ထိခိုက်နေရတာဖြစ်ပါတယ်။

ထို့ကြောင့် 'ပူတင်'က အနောက်နိုင်ငံကိုလက်တုံ့ပြန်တဲ့အနေနဲ့ မတ်လ ၂၃ ရက်နေ့က ရုရှားဓာတ်ငွေ့ဝယ်ယူရာမှာ ရူဘယ်လ်ငွေဖြင့်ပေးချေဖို့ အမိန့်ချမှတ်လိုက်ပါတယ်။

အခုလိုသတ်မှတ်လိုက်ခြင်းက ဥရောပရဲ့စီးပွားရေးအကြီးမားဆုံးနိုင်ငံဖြစ်တဲ့ ဂျာမနီအနေနဲ့ အရေးပေါ်လောင်စာထောက်ပံ့မှုလိုအပ်နေပြီဖြစ်ကြောင်း အရိပ်အမြွက်ကြေညာခဲ့ပါတယ်။
ပြီးခဲ့တဲ့နှစ်အတွင်း ဂျာမနီကိုတင်သွင်းတဲ့ဓာတ်ငွေ့ ၅၅ ရာခိုင်နှုန်းခန့်ဟာ ရုရှားမှတင်သွင်းထားတာဖြစ်ပါတယ်။

အနောက်နိုင်ငံတွေရဲ့ဒဏ်ခတ်ပိတ်ဆို့မှုတွေကို ရုရှားတို့ ပိုမိုပြင်းထန်စွာတုန့်ပြန်သွားဖို့ ပြင်ဆင်သွားဖွယ်ရှိနေပြီး ရုရှားမှဓာတ်ငွေ့တင်ပို့ ခြင်းနဲ့ ပို့ ကုန်ပစ္စည်းများဝယ်ယူခြင်းအတွက် ရူဘယ်လ်ငွေဖြင့်သတ်မှတ်ပေးချေဖို့ ရုရှားထိပ်သီးဥပဒေအရာရှိတစ်ဦးက အကြံပြုလိုက်ပါတယ်။

ကမ္ဘာ့အမေရိကန်ဒေါ်လာတန်ဖိုးလည်း ထိခိုက်မှုတွေရှိနေပြီး ရုရှားအဓိကပို့ ကုန်ပစ္စည်းတွေကို ရူဘယ်လ်ဖြင့်ပေးချေဖို့ သတ်မှတ်လိုက်ခြင်းက ရုရှားနဲ့မိတ်ဖက်နိုင်ငံများအကျိုးအမြတ်ရရှိဖိုဖြစ်ကြောင်း ရုရှားအစိုးရအဖွဲ့ မှပြောရေးဆိုခွင့်ရှိသူ'ဒီမစ်ထရီပက်စ်ကော့ဗ်'က ပြောကြားခဲ့ပါတယ်။

ဥရောပကိုတင်သွင်းတဲ့ဓာတ်ငွေ့ ၄၀ ရာခိုင်နှုန်းကို ရုရှားမှတင်သွင်းတာဖြစ်ပြီး ယူရိုငွေဖြင့်အများဆုံးပေးချေနေရပါတယ်။

ဥရောပနိုင်ငံတွေအနေနဲ့ ရုရှားနိုင်ငံပိုင်ဓာတ်ငွေ့ကုမ္ပဏီကြီး Gazprom နဲ့ နောက်ထပ်စာချုပ်ချုပ်ဆိုသွားဖွယ်မရှိပါဘူး။

"ဓာတ်ငွေ့ဝယ်ချင်ရင် ရူဘယ်လ်နဲ့ပေးချေရပါမယ်။ ဒါ့အပြင် ရုရှားအကျိုးအမြတ်ရဖို့ အတွက် ရူဘယ်လ်နဲ့ပေးချေဝယ်ယူရမယ့်ကုန်ပစ္စည်းတွေထဲမှာ မြေဩဇာ၊ ဆန်စပါး၊ ဆီ၊ ကျောက်မီးသွေး၊ သတ္တု၊ သစ် စတဲ့ပစ္စည်းတွေကိုလည်း ထည့်သွင်းသတ်မှတ်သွားသင့်ပါတယ်" လို့ လွှတ်တော်ဥက္ကဌ'ဗီယာချက်စ်လက်ဗ်ဗိုလိုဒင်'က တယ်လီဂရမ်မှာ ဖော်ပြသွားပါတယ်။

နှစ်စဉ်နှစ်တိုင်း ရုရှားမှဥရောပသို့ တင်ပို့ တဲ့ဓာတ်ငွေ့တွေဟာ ဒေါ်လာဘီလီယံရာနဲ့ချီပြီး တန်ကြေးရှိပါတယ်။

Gazprom ကုမ္ပဏီကတင်ပို့တဲ့ဓာတ်ငွေ့ ၅၈ ရာခိုင်နှုန်းကိုယူရိုငွေ၊ ၃၉ ရာခိုင်နှုန်းကို အမေရိကန်ဒေါ်လာ၊ ၃ ရာခိုင်နှုန်းကို စတာလင်ပေါင်နဲ့ ပေးချေနေကြတာဖြစ်ပါတယ်။

ရူဘယ်လ်ငွေနဲ့ပြောင်းလဲဝယ်ယူနိုင်ဖို့ ဝယ်ယူသူတွေကိုအချိန်ပေးသွားမှာဖြစ်ကြောင်း 'ပက်စ်ကော့ဗ်'က ဆိုပါတယ်။

ကမ္ဘာပေါ်မှာ သဘာဝအရင်းအမြစ်အများဆုံးထုတ်လုပ်ထွက်ရှိရာရုရှားနိုင်ငံကို ဒဏ်ခတ်ပိတ်ဆို့ မှုပြုလုပ်ခြင်းက ကုန်ပစ္စည်းဈေးနှုန်းများအဆမတန်မြင့်တက်လာနိုင်ကာ ဥရောပနဲ့အမေရိကန်တို့ မှာ စီးပွားရေးဆုတ်ယုတ်မှုများဖြစ်လာနိုင်တယ်လို့ ရုရှားတာဝန်ရှိသူများက အကြိမ်ကြိမ်သတိပေးထားပါတယ်။
Source: Reuters

#WorldMilitary
Published - 30 March 2022
ယူကရိန်း-ရုရှားအရေးကိစ္စအကြောင်းညှိနှိုင်းဆွေးနွေးကြရာမှာ ယူကရိန်းမြို့တော်ကိဗ်နဲ့ နောက်ထပ်မြို့ ကြီးတစ်မြို့ မှာ စစ်ရေးတိုက်ခိုက်မှုများကို လျှော့ချသွားဖို့ ရုရှားတို့ ကတိပေးချက်ကို ယူကရိန်းကယုံစားနေမှာမဟုတ်ဘူးလို့ တုန့်ပြန်လိုက်ပါတယ်။

ရုရှားတို့ က ယူကရိန်းနိုင်ငံရဲ့အခြားအစိတ်အပိုင်းနေရာတွေမှာ အင်အားတိုးချဲ့လာနိုင်တယ်လို့ အနောက်နိုင်ငံတွေက ခန့်မှန်းထားကြပါတယ်။

ယူကရိန်းကို ရုရှားတို့ ကျူးကျော်တိုက်ခိုက်ပြီး တစ်လကျော်ကြာတဲ့အချိန်မှာ အစ္စတန်ဘူလ်နန်းတော်၌ တွေ့ဆုံညှိနှိုင်းခဲ့ကြတာဖြစ်ပါတယ်။

ဒုတိယကမ္ဘာစစ်နောက်ပိုင်း ဥရောပနိုင်ငံတစ်နိုင်ငံအပေါ် အကြီးမားဆုံးတိုက်ခိုက်မှုကြီးပြုလုပ်ခဲ့တာဖြစ်ပြီး ဒဏ်ရာရ/သေဆုံးသူ ထောင်ဂဏန်းအထိရှိလာကာ လူပေါင်း ၄ သန်းနီးပါး နေရပ်စွန့်ခွာထွက်ပြေးနေကြရပါတယ်။

အနောက်နိုင်ငံတွေက ရုရှားစီးပွားရေးကိုဒဏ်ခတ်ပိတ်ဆို့မှုတွေပြုလုပ်ပြီး အထိနာအောင်ပြုလုပ်ခဲ့ပါတယ်။ စစ်မြေပြင်တွေမှာ ယူကရိန်းတပ်ဖွဲ့ တွေကြံ့ကြံ့ခံခုခံထားတာကြောင့် ရုရှားတို့ ဆက်လက်မကျူးကျော်နိုင်ဘဲဖြစ်နေပါတယ်။

အဝိုင်းခံထားရတဲ့မြို့တွေထဲမှာ ပိတ်မိနေတဲ့အရပ်သားတွေရှိနေတဲ့ကြားထဲက ယူကရိန်းတပ်ဖွဲ့တွေဟာ အချို့ နယ်မြေတွေကို ပြန်လည်သိမ်းယူနိုင်ခဲ့ပါတယ်။

"သဘောတူညှိနှိုင်းရေးပြုလုပ်ဖို့ လိုအပ်ချက်တွေဖြည့်ဆည်းပြီး အပြန်အလှန်ယုံကြည်မှုရယူဖို့ အတွက် ကိဗ်နဲ့ချာနိုင်ဟစ်ဗ်မြို့ တွေမှာ စစ်ရေးတိုက်ခိုက်မှုတွေလျှော့ချဖို့ အဓိကဆုံးဖြတ်ခဲ့ကြပါတယ်" လို့ ရုရှားဒုကာကွယ်ရေးဝန်ကြီး'အလက်ဇန်ဒါဖိုမင်'က သတင်းထောက်တွေကို ပြောကြားခဲ့ပါတယ်။

အပစ်အခတ်အများဆုံးဖြစ်နေကြတဲ့ အရှေ့တောင်ဘက်ရှိ မာရီယူပိုလ်၊ အရှေ့ဘက်ရှိ ဆူမီနဲ့ ခါကစ်ဗ်၊ တောင်ဘက်ရှိ ခါဆန်နဲ့ မစ်ကိုလေ့ဗ်မြို့ များကိုတော့ ထည့်သွင်းဖော်ပြသွားခြင်းမရှိပါဘူး။

ယူကရိန်းသမ္မတ'ဗိုလိုဒီမီယာဇယ်လန်စကီ'က အင်္ဂါနေ့ကတုန့်ပြန်ပြောကြားရာမှာ "ယူကရိန်းလူမျိုးတွေက တုံးအတဲ့သူတွေမဟုတ်ပါဘူး။ လွန်ခဲ့တဲ့ ၈ နှစ်အတွင်း ဒွန်ဘတ်စ်ဒေသမှာဖြစ်ပွားနေတဲ့တိုက်ပွဲတွေနဲ့ အခု ၃၄ ရက်တာကျူးကျော်ခံရတဲ့ဖြစ်စဉ်တွေကနေ အတွေ့အကြုံရလိုက်ပါပြီ။ လက်တွေ့အခိုင်အမာပြနိုင်တဲ့ရလာဒ်တွေကိုပဲ ယုံကြည်သွားကြမှာပါ" လို့ ဆိုပါတယ်။

ကိဗ်မြို့တော်နားတဝိုက်မှာ ရုရှားတပ်ဖွဲ့ အနည်းငယ်မျှ ရွှေ့ပြောင်းသွားကြပေမယ့် ဒါဟာ တပ်ဆုတ်တာမျိုးမဟုတ်ဘဲ တပ်ဖွဲ့ နေရာပြန်ချခြင်းသဘောဖြစ်ကြောင်း ပန်တဂွန်ကပြောကြားခဲ့ပါတယ်။

ယူကရိန်းရဲ့အခြားနေရာဒေသတွေကို အဓိကတိုက်ခိုက်လာနိုင်တာကြောင့် ကြိုတင်ပြင်ဆင်ထားဖို့ လိုအပ်ကြောင်း၊ ယူကရိန်းကအန္တရာယ်ကြားက မလွတ်မြောက်သေးကြောင်း ပန်တဂွန်မှပြောရေးဆိုခွင့်ရှိသူ'ဂျွန်ကာဘီ'က စာနယ်ဇင်းရှင်းလင်းပွဲမှာပြောကြားခဲ့ပါတယ်။

ဗြိတိန်ကာကွယ်ရေးဝန်ကြီးဌာနက ရရှိလာတဲ့ထောက်လှမ်းရေးအချက်အလက်များကို သုံးသပ်ကာ ရုရှားတို့ က ယူကရိန်းမြောက်ဘက်ကနေ အရှေ့ဘက်ရှိ ဒိုနက်စ်နဲ့လူဟန့်စ်ဒေသတွေကို စစ်အင်အားရွှေ့ပြောင်းလာနိုင်ကြောင်း အသိပေးခဲ့ပါတယ်။

ရုရှားတို့ စစ်ရေးတိုက်ခိုက်မှုလျှော့ချဖို့ ကတိပေးခဲ့တဲ့နယ်မြေအများစုက သူတို့ စစ်ရှုံးနေတဲ့နေရာတွေသာဖြစ်ကြောင်း သုံးသပ်လေ့လာထားကြပါတယ်။ ပိုလန်နိုင်ငံရှိ အမေရိကန်တပ်ဖွဲ့ တွေက ယူကရိန်းတပ်တွေနဲ့ချိတ်ဆက်လျက်ရှိပြီး စစ်လက်နက်များနဲ့ F-18 လေယာဉ် ၁၀ စင်း ပေးအပ်ခဲ့တဲ့အပြင် ရုရှားနိုင်ငံနားရှိ နေတိုး(NATO)အဖွဲ့ ဝင်နိုင်ငံလစ်သူရေးနီးယားကို တပ်အင်အား ၂၀၀ ကျော်နေရာချထားခဲ့ကြောင်း 'ကာဘီ'က ပြောပြသွားပါတယ်။
Source: Reuters

#LocalNews
Published - 29 March 2022
ရှစ်လအတွင်း တိုင်းရင်းသားလက်နက်ကိုင်အဖွဲ့ EAOs နယ်မြေများ၌ တိုက်ပွဲဖြစ်ပွားမှုက အ ရေအတွက် နှစ်ထောင်ကျော်ရှိလာတယ်လို့ ISP Myanmar ၏ သု တေသနစစ်တမ်းတွင် ဖော်ပြခဲ့ပါတယ်။

အဆိုပါ တိုက်ပွဲတွေဟာ ပြီးခဲ့တဲ့ ၂၀၂၁ ခုနှစ်၊ ဇူလိုင် ၁ ရက် ကနေ ၂၀၂၂ ခုနှစ်၊ မတ် ၂၀ ရက်အထိ ရှစ်လတာကာလအကြား တိုင်းရင်းသားလက်နက်ကိုင်တပ်ဖွဲ့တွေ (EAOs) ရဲ့ နယ်မြေတွေမှာ တပ်မတော်နဲ့ EAOs တွေရဲ့ အကြားတိုက်ပွဲ အကြိမ်ရေ( ၂,၁၉၃) ကြိမ်ထက်မနည်း ဖြစ်ပွားခဲ့ခြင်းဖြစ်တယ်လို့ ISP Myanmar က ဆိုပါတယ်။

တိုက်ပွဲတွေဟာ ကရင်ပြည်နယ်၊ ကချင်ပြည်နယ်၊ ကယားပြည်နယ်နဲ့ ချင်းပြည်နယ်အတွင်းက EAOs နယ်မြေတွေမှာ ဖြစ်ပွားခဲ့ခြင်း ဖြစ်ပါတယ်။

အဲ့ဒီအထဲကမှ ကရင်အမျိုးသားအစည်းအရုံး(KNU)ရဲ့ နယ်မြေ အတွင်းမှာတော့ (၁,၇၇၅)ကြိမ်ထက်မနည်း တိုက်ပွဲတွေ ဖြစ်ပွားခဲ့သလို ယခုမတ်လ ၁၉ ရက်နေ့ကလည်း KNU တပ်မဟာ ၃ ထိန်းချုပ်နယ်မြေထဲက ကွီးလားကျေးရွာနဲ့ တကက်ပူကျေးရွာတို့တွင် စစ်ရေးတင်းမာနေတဲ့ အခြေအနေတွေ ရှိနေတယ်လို့ ဆိုပါတယ်။

တဆက်တည်းမှာပဲ တိုင်းနှင့်ပြည်နယ် ဒေသအသီးသီးမှာ တပ်မတော်နဲ့ ဒေသခံကာကွယ်ရေးတပ်ဖွဲ့ တို့ အကြား တိုက်ပွဲဖြစ်ပွားမှုတွေကလည်း ပိုမိုကျယ်ပြန့်လာခဲ့သလို ၂၀၂၁ ခုနှစ်၊ ဇူလိုင် ၁ ရက်ကနေ ၂၀၂၂ ခုနှစ်၊ မတ် ၂၀ ရက်ထိ ကိုးလတာအတွင်း တပ်မ တော်နဲ့ ဒေသခံကာကွယ်ရေး တပ်ဖွဲ့တွေအကြား တိုက်ပွဲဖြစ်ပွားမှု ၇၆၈ ကြိမ်ထက်မနည်း ရှိခဲ့တာဖြစ်တယ်လို့ သိရပါတယ်။

ဒါ့အပြင် စစ်ကိုင်းတိုင်းမှာ တိုက်ပွဲဖြစ်ပွားမှု အများဆုံး ဖြစ်ခဲ့ပြီး ၂၉၃ ကြိမ်ထက်မနည်း ရှိခဲ့ကာ မြေပြင်အခြေအနေမှာတော့ အခုဖော်ပြတဲ့ ကိန်းဂဏန်းတွေထက် ပိုများနိုင်မယ်လို့ ဆိုပါတယ်။

ထို့အပြင် ၂၀၂၁ ခုနှစ်၊ ဇူလိုင် ၁ ရက်ကနေ ၂၀၂၂ ခုနှစ် ဖေဖော်ဝါရီ ၂၈ ရက်အထိ ရှမ်းပြည်နယ် အတွင်းမှာလည်း မြောက်ပိုင်းမဟာမိတ်တပ်ဖွဲ့တွေနဲ့ သျှမ်းပြည်ပြန်လည်ထူထောင်ရေးကောင်စီ (RCSS/SSA) တို့ အကြား တိုက်ပွဲဖြစ်ပွားမှုတွေရှိခဲ့ပြီး လက်ရှိအချိန်မှာတော့ ရှမ်းပြည်နယ် တောင်ပိုင်း ရပ်စောက်မြို့နယ်နဲ့ ပင်လုံမြို့နယ်တို့ မှာ အခြေအနေတွေ တင်းမာနေဆဲ ဖြစ်ပါတယ်။

ထူးခြားချက်အနေနဲ့ကတော့ ၂၀၂၂ ခုနှစ် မတ် ၁ ရက် ကနေ ၂၀ ရက်အတွင်း တိုင်းရင်းသား လက်နက်ကိုင်တပ်ဖွဲ့ တွေအကြား ထိပ်တိုက်ရင်ဆိုင်တိုက်ပွဲဖြစ်ပွားနှုန်းကတော့ သိသိသာသာကို လျော့နည်းလာခဲ့တယ်လို့ ISP Myanmar ၏ သု တေသနစစ်တမ်းတွင် ဖော်ပြထားပါတယ်။

Photo - RCSS/SSA

ymg/kg
#Yangon_Media_Group

#LocalNews
Published_ 29 March 2022

ယနေ့ မတ် ၂၉ ရက် မနက် (၉) နာရီတွင် ပြည်သူ့ပါတီ ဥက္ကဌ ဦးကိုကိုကြီးအား တရုတ်ပြည်သူ့ သမ္မတနိုင်ငံ၏ မြန်မာနိုင်ငံဆိုင်ရာ သံအမတ်ကြီး H.E. Mr.CHEN Hai က ပြည်ထောင်စုရိပ်သာလမ်းရှိ တရုတ်ပြည်သူ့သမ္မတနိုင်ငံသံရုံးတွင် လက်ခံ တွေ့ဆုံခဲ့ပါတယ်။

အဆိုပါတွေ့ဆုံမှုတွင် လက်ရှိ မြန်မာ့နိုင်ငံရေးအခြေအနေများနှင့် ရှေ့ဆက်ဖြစ်ပေါ် လာနိုင်မည့် အနာဂတ်နိုင်ငံရေး အလားအလာ အခြေအနေများအပေါ် ရင်းရင်းနှီးနှီး တွေ့ဆုံဆွေးနွေးခဲ့ကြောင်း သိရပါတယ်။

ပြည်သူ့ပါတီဥက္ကဋ္ဌ ဦးကိုကိုကြီးနှင့် ပါတီဗဟိုအလုပ် အမှုဆောင်များ၊ ဗဟိုကော်မတီဝင်များဟာ မတ် ၂၂ ရက်ကလည်း အာဆီယံအထူးကိုယ်စားလှယ်ဖြစ်သူ ကမ္ဘောဒီးယားနိုင်ငံ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး H.E. Mr. PRAK Sokhoon နှင့်အဖွဲ့ ကိုလည်း တွေ့ဆုံခဲ့ပါသေးတယ်။

ပြည်သူ့ပါတီအနေဖြင့် ဗဟိုကော်မတီဖွဲ့စည်းခြင်းနှင့် ပထမအကြိမ် ဗဟိုကော်မတီ အစည်းအဝေးကို မတ် ၂၄ ရက်နှင့် ၂၅ ရက်နေ့များတွင် ကျင်းပခဲ့ပါတယ်။

ymg-mnn
#Yangon_Media_Group